MPITULUKILO YA MU MIZHILO
1 Bino byo byambo byaambile Mosesa ku bena Isalela bonse mu kiselebwa kyajinga kwipi na Yodano, biselebwa byatalañene na Sufwa byajinga pakachi ka Palana, Tofwela, Labanyi, Hazelota ne Dizahaba. 2 Lwajinga lwendo lwa moba 11 kufuma ku Holeba kuya ku Kadeshi-balaneya+ kupita mu jishinda japita ku Mutumba wa Seila. 3 Mu mwaka wa bu 40,+ mu ñondo wa bu 11, pa juba jitanshi ja ñondo, Mosesa wabuujile bena Isalela* bintu byonse byamukambizhe Yehoba. 4 Waambile bino kimye kyo apwishishe kushinda Sihona+ mfumu wa bena Amoli waikalanga mu Heshibonyi ne Oga+ mfumu wa Bashana waikalanga mu Ashatalota mu Edeleyi.+ 5 Mu kibunji kya Yodano mu kyalo kya Moabu, Mosesa mo mo ebalumbulwijile uno Muzhilo,+ waambile’mba:
6 “Yehoba Lesa wetu witubuujile mu Holeba amba, ‘Mwabandamo bingi mu kino kibunji kya mitumba.+ 7 Yainga ku kibunji kya mitumba kya bena Amoli+ ne ku bibunji byonse bikizhokoloka, ko kuba’mba: Alaba,+ kibunji kya mitumba, Shefela, Negeba ne kibunji kiji ku kitulu kya kalunga ka mema.+ Kabiji mukaye mu kyalo kya bena Kenana. Mukafike ne ku Lebanoni*+ ne ku mukola mukatampe wa Ufelata.+ 8 Talai, nemupa kino kyalo. Twelaimo ne kwikala mu kyalo Yehoba kyo achipile ku bashakulu benu, Abalahama, Izaka+ ne Yakoba+ amba ukekipana kwi abo ne ku baana* babo bakalondela panyuma yabo.’+
9 “Kabiji pa kyokya kimye nemubuujile namba, ‘Kechi nakonsha kwimusenda bunke bwami ne.+ 10 Yehoba Lesa wenu wimuvuzha, kabiji lelo jino mwavula bingi nobe tubangabanga twa mwiulu.+ 11 Yehoba Lesa wa bashakulu benu emuvuzhe,+ kabiji emupeshe monka mo emulayijile.+ 12 Nakonsha kusenda byepi pa bipuzhi byami kisendwa kyenu ne kuyuka mwakubila na makatazho enu aku saka mubena kuntobosha?+ 13 Salai banabalume ba maana, ba milangwe kabiji bafikilamo ba mu mikoka yenu, ne amiwa nkebatongola kwikala bakulumpe pe anweba.’+ 14 Anweba mwankumbwile’mba, ‘Kintu kyo mwitubuula kuba kijitu bulongo.’ 15 Byonkabyo, nasajile bakulumpe ba mu mikoka yenu, banabalume ba maana kabiji bafikilamo ne kwibatongola kwikala bakulumpe pe anweba, bakulumpe ba pa biumbi, bakulumpe ba pa bitota, bakulumpe ba pa makumi atanu, bakulumpe ba pa makumi ne bantangi ba mikoka yenu.+
16 “Kabiji pa kyokya kimye nakambizhe bamitonyi benu namba, ‘Pa kuchiba mambo a balongo benu, mwafwainwa kuchiba mambo monka mo aolokela+ pakachi ka muntu ne mulongo wanji nangwa muntu wafuma ku kyalo kingi.+ 17 Pa kuchiba mambo kechi mwafwainwa kwikala na misalululo ne.+ Mukatelekenga ku bonse, bantutu ne babinemanga.+ Kechi mwafwainwa kuchina bantu ne,+ mambo mubena kwimenako Lesa pa kuchiba mambo.+ Pakuba umvwe mambo emukatazha, mukealete kwi amiwa ne amiwa nkeomvwa mo atala.’+ 18 Pa kyokya kimye, nemubuujile bintu byonse byo mwafwainwa kuba.
19 “Kepo twafumine ku Holeba ne kupita monkamwa mu kiselebwa kikatampe kilenga moyo+ kyo mwamwene byo mwayilenga ku kibunji kya mitumba kya bena Amoli,+ byonkatu Yehoba Lesa wetu byo etukambizhe, kabiji twafikile ku Kadeshi-balaneya.+ 20 Kabiji nemwambijile namba, ‘Mwafika ku kibunji kya mitumba kya bena Amoli, Yehoba Lesa wetu kyo abena kwitupa. 21 Talai, Yehoba Lesa wenu wimupa kino kyalo. Yainga mukekitambule, byonkatu Yehoba Lesa wa bashakulu benu byo emubuujile.+ Kange muchine nangwa kukakilwa ne.’
22 “Nangwa byonkabyo, anweba bonse mwaishile kwi amiwa ne kuñambila’mba, ‘Twayai tutume bantu baye na kwitumwenako kyalo byo kiji kabiji bakabwele ne kwitubuula jishinda jo tukapitamo ne kuyuka mizhi yo tukataana byo iji.’+ 23 Kabiji kino kintu kyantokejile ku muchima kya kuba nasajile banabalume 12 kufuma mwi anweba, mu mukoka yense mwafumine muntu umo.+ 24 Kepo baimene ne kuya ku kibunji kya mitumba+ kabiji bafikile ku Kimpachiko* kya Eshikola ne kwikimona byo kiji. 25 Kabiji basendeleko bipangwa bya mu kyokya kyalo ne kwibileta kwi atweba, kabiji betubuujile’mba, ‘Kyalo kyo abena kwitupa Yehoba Lesa wetu ke kyalo kyawama bingi.’+ 26 Pakuba anweba mwakaine kuya kabiji mwalengulwile mukambizho wa Yehoba Lesa wenu.+ 27 Kabiji mwanyinyichilenga mu matente enu ne kwamba’mba, ‘Mambo Yehoba witushikwa kyo kyo etufumisha mu kyalo kya Ijipita ne kwitupana mu maboko abena Amoli amba betwipaye. 28 Nanchi mpunzha ya mutundu ka yo tubena kuyako? Balongo betu betulengeshe moyo*+ byo baambile’mba, “Bano bantu bakosa kabiji bazama kwitukila ne mizhi yabo ikatampe kabiji iji na masakwa afika mwiulu,*+ kabiji twamwenemo ne bena Anaki.”’+
29 “Onkao mambo, nemubuujile namba, ‘Kange mukakilwe nangwa kuba moyo na mambo a abo ne.+ 30 Yehoba Lesa wenu ukatangilako kulutwe yenu kabiji ukemulwilako+ byonkatu byo aubile mu Ijipita ne anweba saka mumonako.+ 31 Kabiji mwamwene Yehoba Lesa wenu byo emusendele konse konse ko mwayilenga mu kiselebwa, byonkatu mwanamulume byo asenda mwananji, posotu ne byo mwafikile ku ino mpunzha.’ 32 Nangwa kyajinga bino, kechi mwamuketekejile Yehoba Lesa wenu,+ 33 yenka wimutangijile byo mwayile na kukeba mpunzha ya kutebelelamo ne. Bufuku wamwekanga kwi anweba mu mujilo kabiji mute mu jikumbi ne kwimumwesha jishinda ja kuyamo.+
34 “Kabiji Yehoba waumvwinenga bintu byonse byo mwaambilenga kabiji wazhingijile ne kuchipa amba,+ 35 ‘Kafwako muntu nangwa umo wa mu kino kisemi kyatama ukamona kyalo kyawama kyo nachipile kupa bashakulu benu ne,+ 36 kanatu Kaleba mwana wa kwa Yefune. Aye ukekimona kabiji nkamupa mpunzha aye ne baana banji mu kyalo kyo aendelemo, mambo walondejilenga Yehoba na muchima yense.+ 37 (Ne amiwa Yehoba wanzhingijile na mambo a anweba ne kuñambila’mba, “Ne obewa kechi ukatwelamo ne.+ 38 Yoshua mwana wa kwa Nuni wa mwingilo wobe,+ ye ukatwelamo mu kyalo.+ Mukoseshe,*+ mambo ye ukalengela bena Isalela kwikiswana.”) 39 Kabiji baana benu bo mwaambile’mba bakebasenda mu buzha+ ne baana benu babula kuyuka kyawama ne kyatama, bo bakatwelamo kabiji nkekipana kwi abo ke kyabo kya kwikalamo.+ 40 Pakuba anweba alulukai ne kuya mu kiselebwa kupita mu jishinda ja ku Kalunga ka Mema Kachila.’+
41 “Kabiji anweba mwañambijile’mba, ‘Twamulenga mambo Yehoba. Pano tusakuya na kulwa byonkatu Yehoba Lesa wetu byo etukambizha!’ Byonkabyo, anweba bonse mwasendele bilwilo bya nkondo kabiji mwalangulukilenga amba ke kintu kyapela kukanjila ku mutumba.+ 42 Bino Yehoba wañambijile’mba, ‘Babuule’mba: “Kange mukanjile ne kulwa ne, mambo amiwa kechi nsakwikala ne anweba ne.+ Umvwe muye, balwanyi benu basakwimushinda.”’ 43 Onkao mambo, nemubuujile, bino kechi mwaumvwine ne. Pakuba mwalengulwile mukambizho wa Yehoba kabiji mwilundumikile ne kukanjila ku mutumba. 44 Kepo bena Amoli baikalanga ku yewa mutumba baishile na kwimusambakana ne kwimupangisha byonkatu byuba nyuki, kabiji bemupalañenyejile ku Seila kukafika ne ku Holama. 45 Onkao mambo, mwabwelele ne kutatula kujijila Yehoba, bino Yehoba kechi wimumvwine nangwa kwimuta muchima ne. 46 O ene mambo o mwaikejile mu Kadeshi moba avula.
2 “Kepo twaalulukile ne kuya mu kiselebwa kupita mu jishinda ja ku Kalunga ka Mema Kachila, byonkatu byambuujile Yehoba,+ kabiji twaendele moba avula kwipi na Mutumba wa Seila. 2 Ponkapo Yehoba wañambijile’mba, 3 ‘Mwaenda moba avula ku uno mutumba. Pano alulukai muyenga ja ku kabeta ka ku buyeke. 4 Kabiji ubuule bantu amba: “Mukapita mu mupaka wa balongo benu, ba mu kisemi kya kwa Isao+ bekala mu Seila,+ kabiji bakemuchina,+ ne anweba mwafwainwa kujimuka bingi. 5 Kange mukalwe* nabo ne, mambo kechi nkemupa kyalo kyabo nangwa pa kunyantatu kulu kwenu ne, mambo napana Mutumba wa Seila kwi Isao kwikala wanji.+ 6 Mwafwainwa kwibapa mali pa kajo ko mukaja, kabiji mwafwainwa kwibapa mali pa mema o mukatoma.+ 7 Mambo Yehoba Lesa wenu wimupesha mu bintu byonse byo mwauba. Aye wayukishatu bulongo byo mubena kwenda mu kino kiselebwa kikatampe. Yehoba Lesa wenu waikala ne anweba pa ino myaka 40 kabiji kechi mwakajilwapo kintu nangwa kimo ne.”’+ 8 Onkao mambo, twapichile ku balongo betu, ba mu kisemi kya kwa Isao+ bekala ku Seila, kusezha kupichila ja ku Alaba, Elata ne Eziona-gebela.+
“Kepo twaalulukile ne kupichila mu jishinda ja mu kiselebwa kya Moabu.+ 9 Kabiji Yehoba wañambijile’mba, ‘Kange mwibakatazhe bena Moabu nangwa kulwa nabo ne, mambo kechi nkemupa kyalo kyabo nangwa kimo kwikala ke kyenu ne, mambo napana Ala ku ba mu kisemi kya kwa Lota.+ 10 (Bena Emi+ mo mo baikalanga kabiji bajinga bantu bakosa, bavula ne kulepa nobe bena Anaki. 11 Kabiji bena Lefwaimu+ nabo bebamonanga byonka byo bamonanga bena Anaki,+ kabiji bebatelanga ku bena Moabu amba bena Emi. 12 Kala bena Holi+ bo baikalanga mu Seila, bino bebashinjile ku ba mu kisemi kya kwa Isao ne kwibepaya, kabiji baikele mu mpunzha yabo,+ byonkatu bena Isalela byo bakoba ku kyalo kyabo Yehoba kyo akebapa.) 13 Pano yainga ne kwabuka Kimpachiko* kya Zeleda.’ Onkao mambo, twaabukile Kimpachiko* kya Zeleda.+ 14 Myaka yo twaendele kufuma ku Kadeshi-balaneya kufika ne byo twaabukile Kimpachiko* kya Zeleda yajinga myaka 38, posotu ne kisemi kyonse kya bashilikale byo kyafwile mukachi ketu, byonkatu Yehoba byo achipile kwi abo.+ 15 Kuboko kwa Yehoba kwajinga pe abo kuba’mba ebavizhe mukachi ketu, kufikatu ne byo bafwile.+
16 “Bashilikale bonse byo bapwile na kufwa mukachi ketu,+ 17 Yehoba wañambijile jibiji amba, 18 ‘Lelo jino usakupita mu nyaunda ya Moabu, ko kuba’mba mu Ala. 19 Byo usakufika kwipi na bena Amonyi kange wibayanjishe nangwa kwibazhingijisha ne, mambo kechi nkakupa kyalo nangwa kimo kya bena Amonyi kwikala kyobe ne, mambo nekipana ku ba mu kisemi kya kwa Lota kwikala kyabo.+ 20 Kino kyalo nakyo bekimonanga’mba kya bena Lefwaimu.+ (Kala mo mwaikalanga bena Lefwaimu, kabiji bebatelanga ku bena Amonyi amba bena Zamazumu. 21 Bajinga bantu bakosa, bavula kabiji balepele nobe bena Anaki;+ bino Yehoba wibepayijile ku bena Amonyi kabiji abano bebapangilemo ne kwikala mu mpunzha yabo. 22 Abino byo byo aubijile ba mu kisemi kya kwa Isao baikalanga mu Seila,+ byo aipayile bena Holi+ kwi abo kuba’mba bebapangemo ne kwikala mu mpunzha yabo kufika ne lelo jino. 23 Bena Avi baikalanga mu mizhi yajinga kwipi na Gaza,+ kufikatu ne bena Kafutole+ bafumine ku Kafutole* byo bebepayile ne kwikala mu mpunzha yabo.)
24 “‘Pano imanai, mwabuke Kimpachiko* kya Alanonyi.+ Talai, napana mu maboko obe Sihona+ mwina Amoli mfumu wa Heshibonyi. Onkao mambo, pano tendeka kutambula kyalo kyanji ne kulwa nanji. 25 Lelo jino nsakuleta moyo wa kwimuchina pa bantu bonse baji pano pa ntanda baumvwa nkuwa yenu. Bakekalanga na bijikila ne kuzakama* na mambo a anweba.’+
26 “Kabiji natumine baluwe kufuma mu kiselebwa kya Kedemota+ kuya kwi Sihona Mfumu wa Heshibonyi, na byambo bya mutende amba,+ 27 ‘Nswishai mpiteko mu kyalo kyenu. Nsakupitatu mu jishinda kabiji kechi nsakusendukila ku kilujo nangwa ku kipiko ne.+ 28 Kajo ko musakumpotesha ko ko nsakuja, ne mema o musakumpotesha oo nsakutoma. Nswishai mpitemotu, 29 abino byo byangubijile ne ba mu kisemi kya kwa Isao bekala mu Seila ne bena Moabu bekala mu Ala, kufikatu ne byo nsakwabuka Yodano kuya mu kyalo kyo abena kwitupa Yehoba Lesa wetu.’ 30 Bino Sihona Mfumu wa Heshibonyi kechi wituswishishe kupitamo ne, mambo Yehoba Lesa waswishishe muchima wa kwa Sihona kukosa+ pa kuba’mba amupane mu maboko etu byonkatu byo kiji lelo.+
31 “Kepo Yehoba añambijile’mba, ‘Talai, napana kala Sihona ne kyalo kyanji kwi obewa. Pano tambula kyalo kyanji.’+ 32 Sihona byo aishile na bantu banji bonse na kwitusambakana amba tulwe nkondo ku Yahaza,+ 33 Yehoba Lesa wetu wamupaine kwi atweba kya kuba twamushinjile ne baana banji ne bantu banji bonse. 34 Kabiji pa kyokya kimye twaangachile mizhi yanji yonse ne kwiyonauna, kuvwangakotu ne banabalume, banabakazhi ne baana. Kechi twapulwishepo muntu nangwa umo ne.+ 35 Twasendelekotu banyama ba kulela pamo na bipukulwa bya mu yoya mizhi yo twaangachile. 36 Kufuma ku Aloa+ uji kwipi na Kimpachiko* kya Alanonyi (kuvwangakotu ne muzhi wajinga mu kimpachiko), kukafikatu ne ku Gileada, kafwako muzhi ye twabujile kufikako ne. Yehoba Lesa wetu wiipaine yonse kwi atweba.+ 37 Nangwa byonkabyo, kechi mwafikileko ku kyalo kya bena Amonyi,+ nangwatu kwipi na Kimpachiko* kya Yaboka+ ne mizhi yajinga mu mpunzha ya mitumba, nangwa mpunzha ikwabo yo betukainye kwi Yehoba Lesa wetu ne.
3 “Kepo twaalulukile ne kuya mu jishinda jaya ku Bashana. Kabiji Oga mfumu wa Bashana waishile na bantu banji bonse na kulwa nkondo ne atweba ku Edeleyi.+ 2 Ponkapo Yehoba wañambijile’mba, ‘Kange mumuchine ne, mambo amiwa nsakwimupaye, bantu banji bonse ne kyalo kyanji, kabiji mukamuba byonka byo mwaubile Sihona mfumu wa bena Amoli waikalanga mu Heshibonyi.’ 3 Onkao mambo, Yehoba Lesa wetu witupele Oga Mfumu wa Bashana ne bantu banji bonse, ne atweba twibepayile kya kuba kafwakotu nangwa umo wapulukile ne. 4 Kabiji twaangachile mizhi yanji yonse. Kechi kwashajilepo muzhi nangwa umo ye twabujile kwibangata ne, mizhi 60 ne kibunji kyonse kya Alagoba kya mu bufumu bwa kwa Oga mu Bashana.+ 5 Ino mizhi yonse yajinga na masakwa akosa alepa ajinga na bibelo ne mipingilo, kubikapotu ne mizhi icheche yavula. 6 Nangwa byonkabyo, twaonawine byonsetu+ byonkatu byo twaubile Sihona Mfumu wa Heshibonyi, twaonawine mizhi yonse kuvwangakotu ne banabalume, banabakazhi ne baana.+ 7 Kabiji twasendele banyama bonse ba kulela ne bipukulwa bya mu mizhi.
8 “Kabiji twaangachile kyalo kya bamfumu babiji ba bena Amoli+ baikalanga mu kibunji kya Yodano, kufuma ku Kimpachiko* kya Alanonyi kukafika ne ku Mutumba wa Helemone+ 9 (mutumba bena Shidona ye batelanga’mba Siliyoni, kabiji bena Amoli bamutelanga’mba Senila), 10 ne mizhi yonse yajinga ku mutunta,* Gileada yense, Bashana yense kukafikatu ne ku Saleka ne ku Edeleyi,+ mizhi yajinga mu bufumu bwa kwa Oga mu Bashana. 11 Oga Mfumu wa Bashana ye wapeleleko mu bena Lefwaimu. Makila* anji bealengele na kapotwe,* kabiji ne lunotu aji mu Laba wa bena Amonyi. Mu bula ajinga makyubichi atanu na ana ne mu bwipi makyubichi* ana monka mwayila kipimo kya kyubichi. 12 Kabiji twatambwile kino kyalo kwikala ke kyetu: kufuma ku Aloa+ uji kwipi na Kimpachiko* kya Alanonyi ne kichika kya kibunji kya mitumba ya Gileada. Kabiji napana mizhi yakyo ku bena Lubenyi ne ku bena Gadi.+ 13 Kabiji kibunji kyashajileko kya Gileada ne Bashana yense wajinga mu bufumu bwa kwa Oga, nebipana ku kichika kya mukoka wa bena Manase.+ Kibunji kyonse kya Alagoba kiji ku Bashana bekiyukile’mba kyo kyalo kya bena Lefwaimu.
14 “Yaila+ mwana wa kwa Manase watambwile kibunji kyonse kya Alagoba+ kukafika ne ku mupaka wa bena Geshula ne bena Maakata,+ kabiji watumbile aya mizhi ya mu Bashana jizhina janji amba Havota-yaila*+ kufika ne lelo jino. 15 Kabiji napana Gileada kwi Makila.+ 16 Kabiji bena Lubenyi ne bena Gadi,+ nebapa kufuma ku Gileada kukafika ne ku Kimpachiko* kya Alanonyi, pakachi ka kimpachiko po pa mupaka, kufika ne ku Yaboka, kimpachiko kiji ku mupaka wa bena Amonyi, 17 ne Alaba ne Mukola wa Yodano ne kitulu kyanji kufuma ku Kineleta kukafika ne ku Kalunga ka Mema ka mu Alaba, ko kuba’mba Kalunga ka Mukele* munshi ya mikolo ya Pishika uji ku musela.+
18 “Kabiji nemukambizhe namba: ‘Yehoba Lesa wenu wimupa kino kyalo kwikala ke kyenu. Banabalume benu bakosa bonse bakasenda bilwilo byabo ne kwabuka, kabiji bakatangilako kulutwe ya balongo benu bena Isalela.+ 19 Kanatu bakazhi benu, baana benu ne bilelwa byenu (nayuka’mba muji na bilelwa byavula) bo bakashala mu mizhi yo nemupa, 20 posotu Yehoba akalengele balongo benu kukokoloka byonkatu byo auba kwi anweba, kabiji bakatambule kyalo kyabo kya kwikalamo, Yehoba Lesa wenu kyo akebapa ku bushiya bwa Yodano. Po po mukabwela, muntu yense ku mpunzha yanji yo namupa.’+
21 “Kabiji pa kyokya kimye namukambizhe Yoshua namba:+ ‘Wimwena Yehoba Lesa wobe byo auba ku bano bamfumu babiji. Yehoba ukoba kintutu kimo ku bufumu bonse bo ubena kwabukilako.+ 22 Kechi mwafwainwa kwibachina ne, mambo Yehoba Lesa wenu ye ubena kwimulwilako.’+
23 “Kabiji namusashijile Yehoba pa kyokya kimye namba, 24 ‘Anweba Nkambo Mfumu Yehoba, mwatendeka kumwesha kalume wenu bukata bwenu ne kuboko kwenu kwa bulume,+ nanchi kujipo lesa uji mwiulu nangwa pano pa ntanda wakonsha kuba mingilo ya bulume nobe anweba nyi?+ 25 Mwane nswishai ngabuke ne kumona kyalo kyawama kiji ku bushiya bwa Yodano, ku kibunji kyawama kya mitumba ne ku Lebanoni.’+ 26 Bino Yehoba wakinzhingijile na mambo a anweba,+ kabiji kechi wañumvwine ne. Yehoba wañambijile’mba, ‘Pela ponkapo! Kechi uñambile jibiji pa mambo a kino ne. 27 Kanjila peulu ya Pishika+ ne kutala ku muzhika ne ku kabeta ka ku buyeke ne ku kabeta ka ku bulenge ne ku musela umone kyalo na meso obe, mambo kechi ukabuka uno Yodano ne.+ 28 Tongola Yoshua+ kabiji umutundaike ne kumukosesha, mambo ye ukatangilako kulutwe ya bano bantu pa kwabuka+ kabiji ye ukebalengela kuswana akya kyalo kyo usakumona.’ 29 Bino byonse byamwekele byo twaikelenga mu musanza wajinga kwipi na Bete-peola.+
4 “Pano anweba bena Isalela, telekai ku malamuna ne mizhilo yo mbena kwimufunjisha kuba’mba mwiilame, pa kuba’mba mwikale na bumi+ ne kuya mu kyokya kyalo ne kwikitambula, kyo abena kwimupa Yehoba, Lesa wa bashakulu benu. 2 Kechi mukanungepo byambo ku byo mbena kwimukambizha nangwa kufumyapo ne,+ pa kuba’mba mukalamenga mikambizho ya Yehoba Lesa wenu yo mbena kwimukambizha.
3 “Mwimwenejile byaubile Yehoba pa mambo a Baela wa ku Peola; Yehoba Lesa wenu waipayile banabalume bonse bajinga mwi anweba baongolokejile kwi Baela wa ku Peola.+ 4 Pakuba anweba bonse mwakakachila kwi Yehoba Lesa wenu, mwi bomi kufika ne lelo jino. 5 Umvwai, nemufunjisha malamuna ne mizhilo+ byonkatu Yehoba Lesa wami byo ankambizhe, pa kuba’mba mukealondelenga mu kyalo kyo mukekalamo. 6 Mwafwainwa kuteshako muchima kwialondela,+ mambo bantu bakomvwa ano malamuna bakamona’mba mwi ba maana+ kabiji mwi ba milangwe,+ ne abo bakamba’mba, ‘Kino kisaka kikatampe kiji na bantu ba maana kabiji ba milangwe.’+ 7 Nanchi kujipo kisaka kiji na balesa baji kwipi ne akyo, byonkatu Yehoba Lesa wetu byo aji kwipi ne atweba mu bimye byonse byo tumujijila nyi?+ 8 Abya kujipo kisaka kikwabo kiji na malamuna aoloka ne mizhilo iji nobe ino Mizhilo yonse yo mbena kwimubuula lelo jino nyi?+
9 “Bino mwafwainwa kuteshako muchima ne kujimuka,* pa kuba’mba mukabule kuvulama bintu byonse byo mwimwenejile, kuba’mba bikabule kufuma mu michima yenu moba onse a bumi bwenu. Kabiji mukebifunjishenga baana benu ne bankana benu.+ 10 Pa juba jo mwaimene ku meso a Yehoba Lesa wenu ku Holeba, Yehoba wañambijile’mba, ‘Konkanya bantu pamo kwi amiwa kuba’mba bomvwe byambo byami,+ pa kuba’mba bafunde kungakamwa+ moba onse o bakiji na bumi kabiji bakebifujishenga ne ku baana babo.’+
11 “Byonkabyo, anweba mwaishile kwipi ne kwimana munshi ya mutumba, kabiji mutumba watemenenga mujilo kufika ne mwiulu* mwine; kwajinga mfishi ne jikumbi jafitatu bwii.+ 12 Kabiji Yehoba waambile ne anweba jiwi saka jifuma mu mujilo.+ Anweba mwaumvwine jiwi saka jamba byambo, bino kafwako kintu nangwa kimo kyo mwamwenemo mu mujilo ne,+ pakuba mwaumvwinekotu jiwi.+ 13 Kabiji wimubuujile lulayañano lwanji+ lo alayañene ne anweba lo emukambizhe kulama, ko kuba’mba Mikambizho Jikumi.*+ Byo apwishishe kuba bino, wiinembele pa mabwe abiji apapakana.+ 14 Pa kyokya kimye, Yehoba wankambizhe kwimufunjisha malamuna ne mizhilo yo mukalondelanga mu kyalo kyo mubena kuyamo kyo mukatambula.
15 “Onkao mambo, mwafwainwa kujimuka*—mambo pa joja juba Yehoba jo aambile kwi anweba ku Holeba jiwi saka jifuma mu mujilo, kechi mwamwenemo kintu nangwa kimo ne— 16 pa kuba’mba mukabule kutamisha kupichila mu kwilengela kipashañano kya kusonga kya mutundu yense, kyapasha mwanamulume nangwa mwanamukazhi,+ 17 kyapasha banyama ba pano pa ntanda nangwa bañonyi bapitañana mwiulu,+ 18 nangwa kyapasha kintu kikalaba panshi nangwa kyapasha masabi aji mu mema pano pa ntanda.+ 19 Kabiji byo mukatala mwiulu ne kumona juba, ñondo ne tubangabanga, ko kuba’mba bintu byonse biji mwiulu, kechi mukongolwe ne kwibilambila nangwa kwibingijila ne.+ Yehoba Lesa wenu wibipana ku bantu bonse baji pano pa ntanda. 20 Pakuba Yehoba wimusendele ne kwimufumya mu kisha kya mujilo mo basungulwila kapotwe, ko kuba’mba mu Ijipita, kuba’mba mwikale bantu ba kyanji kyanji,*+ byonkatu byo muji lelo jino.
21 “Yehoba wanzhingijile na mambo a anweba+ kabiji wachipile ne kuñambila’mba kechi nkabuka Yodano nangwa kutwela mu kyalo kyawama kyo abena kwimupa Yehoba Lesa wenu kwikala ke kyenu kya buswanyi ne.+ 22 Mambo nkafwila mu kino kyalo; kechi nkabuka Yodano ne,+ bino anweba mukabuka ne kutambula kyo kya kyalo kyawama. 23 Mwafwainwa kujimuka kuchina’mba mwakavulama lulayañano lwa Yehoba Lesa wenu lo alayañene ne anweba,+ kabiji kange mukesongele kipashañano kya kusonga kya kintu kyonse kyo emukanya Yehoba Lesa wenu ne.+ 24 Mambo Yehoba Lesa wenu ye mujilo usokañana,+ Lesa ukeba bantu kumwingijilatu bunke bwanji.+
25 “Umvwe mukaseme baana ne kwikala na bankana saka mwaikala kala mu kyalo myaka yavula kabiji mukatamishe kupichila mu kwisongela bipashañano bya kusonga+ bya mutundu yense ne kumuzhingijisha Yehoba Lesa wenu na mambo a kuba byatama ku meso anji,+ 26 baji mwiulu ne baji pano pa ntanda basakwikala bakamonyi lelo jino ba kwimushinawina kuba’mba kine mukafwa ne kuvila bukiji mu kyalo kyo mukatambula byo mubena kwabuka Yodano. Kechi mukabandamo ne, bino mukavilatu bonse pelu.+ 27 Kabiji Yehoba ukemupalañenya mu bantu,+ kabiji bachechetu mwi anweba bo bakapuluka+ mu bisaka bya bantu byo akemutwalamo Yehoba. 28 Kabiji mukengijilanga balesa ba bichi ne ba mabwe bo balenga ku bantu,+ balesa babula kumona nangwa kumvwa nangwa kuja nangwa kumvwa bwema.
29 “Umvwe mukamukebe Yehoba Lesa wenu kokwa, kine mukamutaana,+ umvwe mukamukebe na muchima wenu yense ne na mweo* wenu yense.+ 30 Byo mukapita mu bya malwa ne bino bintu byonse bikemufikile mu oa moba, po po mukabwela kwi Yehoba Lesa wenu ne kumvwa jiwi janji.+ 31 Mambo Yehoba Lesa wenu ye Lesa wa lusa.+ Kechi ukemusha nangwa kwimonauna nangwa kuvulama lulayañano lo achipile ku bashakulu benu ne.+
32 “Pano ipuzhai pa mambo a moba a kala saka mukyangye kwikalako kufuma juba Lesa jo alengele muntu pano pa ntanda; kebakebai kufuma kwatendekela jiulu kukafikatu ne ko japelela. Nanchi kwakimwekapo kala kintu kikatampe kya uno mutundu nangwa mwakikyumvwapo kala nyi?+ 33 Nanchi kujipo bantu bakwabo bakyumvwapo kala jiwi ja Lesa saka amba kufuma mu mujilo byonkatu anweba byo mwijumvwine ne kutwajijila kwikala bomi nyi?+ 34 Nanchi kujipo Lesa wakifumyapo kala kisaka mu kisaka kikwabo kupichila mu kwibeseka* na biyukilo, na bya kukumya,+ na nkondo,+ ne na kuboko kwa bulume,+ na kuboko kwakosa ne na mingilo ilenga moyo,+ byonkatu Yehoba Lesa wenu byo aubile kwi anweba mu Ijipita saka mutalako nyi? 35 Anweba bemumwesheshe bino bintu kuba’mba muyuke’mba Yehoba ye Lesa wa kine;+ kafwako mukwabo ne.+ 36 Aye wimulengejile kumvwa jiwi janji kufuma mwiulu kuba’mba emololeko, kabiji pano pa ntanda wimulengejile kumona mujilo wanji mukatampe, ne byambo byanji mwibyumvwine saka bifuma mu mujilo.+
37 “Na mambo a kuba mwatemenwe bashakulu benu ne kusala baana* babo balondejile panyuma yabo,+ anweba bemufumishe mu Ijipita saka emumona kupichila mu bulume bwanji bukatampe. 38 Kabiji wapangile kwi anweba bisaka bya bantu byabaya byakosa kwimukila, kuba’mba emutwezhe mu kyalo kyabo ne kwimupakyo kwikala kya buswanyi, byonkatu byo kiji lelo jino.+ 39 Pano kufuma ja lelo, vulukainga bino amba Yehoba ye Lesa wa kine mwiulu ne pano pa ntanda.+ Kechi kujipo mukwabo ne.+ 40 Kabiji mukalamenga malamuna anji ne mizhilo yanji yo mbena kwimukambizha lelo jino, pa kuba’mba anweba ne baana benu bakemulondela panyuma, mukamone byawama kabiji mukekale moba avula mu kyalo kyo abena kwimupa Yehoba Lesa wenu.”+
41 Kabiji Mosesa wasajile mizhi isatu yajinga ku musela wa Yodano.+ 42 Umvwe muntu waipaya mukwabo kya mapuso ye abujile kushikwa,+ wafwainwa kunyemena ku umo pa ino mizhi kuba’mba akekale na bumi.+ 43 Muzhi wa Bezela+ wajinga mu kiselebwa ku mutunta,* mo mwajinga bena Lubenyi, muzhi wa Lamota+ wajinga mu Gileada, mo mwajinga bena Gadi ne muzhi wa Golanyi+ wajinga mu Bashana, mo mwajinga bena Manase.+
44 Ino yo Mizhilo+ Mosesa yo apele bena Isalela. 45 Abino byo byajinga bya kwibavululako, malamuna ne mizhilo Mosesa yo apele bena Isalela byo bafumine mu Ijipita,+ 46 mu kibunji kyajinga kwipi na Yodano, mu musanza watalañene na Bete-peola+ mu kyalo kya kwa Sihona Mfumu wa bena Amoli waikalanga mu Heshibonyi,+ yenka ye bashinjile kwi Mosesa ne ku bena Isalela byo bafumine mu Ijipita.+ 47 Kabiji baangachile kyalo kyanji ne kyalo kya kwa Oga+ Mfumu wa Bashana ne bamfumu babiji ba bena Amoli baikalanga mu kibunji kya ku musela wa Yodano. 48 Kino kyalo kyafumine ku Aloa+ uji kwipi na Kimpachiko* kya Alanonyi kufika ne ku Mutumba wa Siliyoni, ko kuba’mba Helemone.+ 49 Kabiji mpunzha yafikile ne ku Alaba mu kibunji kya ku musela wa Yodano kukafikatu ne ku Kalunga ka Mema ka mu Alaba,* munshi ya mikolo ya Pishika.+
5 Mosesa waichile bena Isalela bonse ne kwibambila’mba: “Anweba bena Isalela, umvwai malamuna ne mizhilo yo mbena kwimubuula lelo jino, kabiji mwafwainwa kwiiyuka ne kuteshako muchima kwiilama. 2 Yehoba Lesa wetu walayañene lulayañano ne atweba ku Holeba.+ 3 Yehoba kechi walayañene luno lulayañano na bashakulu betu ne, bino walayañene ne atweba bonse tujiko lelo jino. 4 Yehoba waambilenga ne anweba kilungi na kilungi konka ku mutumba, jiwi saka jifuma mu mujilo.+ 5 Pa kyokya kimye, naimene pakachi ka Yehoba ne anweba+ kuba’mba nemubuule byambo bya Yehoba, mambo anweba mwaubile moyo na mambo a mujilo, kabiji kechi mwakanjijile ku mutumba ne.+ Wañambijile’mba:
6 “‘Amiwa yami Yehoba Lesa wenu, wimufumishe mu kyalo kya Ijipita mu nzubo ya buzha.+ 7 Kechi mwafwainwa kwikala na balesa bakwabo kununga pe amiwa* ne.+
8 “‘Kechi mwafwainwa kwilengela kipashañano kya kusonga+ nangwa kintu kyapasha* kintu kiji mwiulu nangwa kiji pano pa ntanda nangwa kiji mu mema pano pa ntanda ne. 9 Kechi mwafwainwa kwibilambila nangwa kwibingijila ne,+ mambo amiwa Yehoba Lesa wenu, yami Lesa ukeba bantu kuñingijilatu bunke bwami,+ kabiji na mambo a bubi bwa bashabo nkabisha baana, bankana ne bankanununa ba boba banshikwa,+ 10 bino mmwesha butemwe bubula kwaluka* kufika ne ku bisemi biumbi bya boba bantemwa ne kulama mikambizho yami.
11 “‘Kechi mwafwainwa kwingijisha jizhina ja Yehoba Lesa wenu mu jishinda jabula kufwainwa ne,+ mambo amiwa Yehoba nkakabisha yense wingijisha jizhina jami mu jishinda jabula kufwainwa.+
12 “‘Mukalamenga juba ja Sabado ne kwijizhijika, byonkatu Yehoba Lesa wenu byo emukambizhe.+ 13 Mukengilenga mingilo yenu yonse mu moba atanu na jimo,+ 14 bino juba ja butanu na bubiji jo ja sabado kwi Yehoba Lesa wenu.+ Kechi mwafwainwa kwingila mwingilo nangwa umo,+ anweba, mwanenu wa mulume nangwa mwanenu wa mukazhi, muzha wenu wa mulume nangwa wa mukazhi, ñombe wenu, mbongolo wenu, nangwa nyama wenu wa kulela, nangwa muntu wafuma ku kyalo kingi wikala mu mizhi yenu ne,+ pa kuba’mba muzha wenu wa mulume nangwa wa mukazhi akakokoloke byonkatu byo mukakokoloka.+ 15 Vulukai’mba mwajinga bazha mu kyalo kya Ijipita, kabiji Yehoba Lesa wenu wimulupwilemo na kuboko kwanji kwa bulume kabiji kwakosa.+ O ene mambo Yehoba Lesa wenu o emukambizhizhe kulama juba ja Sabado.
16 “‘Nemeka bashobe ne bainobe,+ byonkatu byo akukambizhe Yehoba Lesa wobe, pa kuba’mba ukekale moba avula ne kumona byawama* mu kyalo kyo abena kukupa Yehoba Lesa wobe.+
17 “‘Kechi wafwainwa kwipayañana ne.+
18 “‘Kechi wafwainwa kuba bukende ne.+
19 “‘Kechi wafwainwa kwiba ne.+
20 “‘Kechi wafwainwa kwikala kamonyi wa bubela ne kushiina mukwenu ne.+
21 “‘Kechi wafwainwa kukumbwa muka mukwenu ne.+ Kechi wafwainwa kukumbwa nzubo ya mukwenu, nangwa bujimi bwanji, nangwa wa mwingilo wanji wa mulume nangwa wa mwingilo wanji wa mukazhi, ñombe wanji mulume, mbongolo wanji, nangwa kintu kyonse kya mukwenu ne.’+
22 “Yehoba waambile ino mikambizho* ku kipwilo kyenu kyonse konka ku mutumba, na jiwi ja peulu saka jifuma mu mujilo ne mu jikumbi jafitatu bwii,+ kabiji kechi wanungilepo byambo bikwabo ne; kepo einembele pa mabwe abiji apapakana ne kumpao.+
23 “Bino byo mwaumvwine jiwi saka jifuma mu mfishi, ne mutumba byo ateemenenga mujilo,+ bantangi bonse ba mikoka yenu ne bakulumpe benu baishile kwi amiwa. 24 Kepo mwaambile’mba, ‘Yehoba Lesa wetu witumwesha lukumo lwanji ne bukata bwanji kabiji twaumvwa jiwi janji saka jifuma mu mujilo.+ Lelo jino twamona’mba Lesa wakonsha kwamba na muntu ne aye muntu watwajijila kwikala na bumi.+ 25 Pano mambo ka o tusakufwila? Mambo uno mujilo mukatampe wakonsha kwitusoka. Umvwe tutwajijile kumvwa jiwi ja Yehoba Lesa wetu, kine tusakufwa. 26 Mambo ñanyi muntu* wakyumvwapo kala jiwi ja Lesa mumi saka amba kufuma mu mujilo byonkatu byo twijumvwa ne kwikala na bumi? 27 Anweba mwafwainwa kufwenya kwipi kuba’mba mumvwe bintu byonse Yehoba Lesa wetu byo asakwamba, kabiji yenu musakwitubuula bintu byonse Yehoba Lesa wetu byo asakwimubuula, ne atweba tusakwibyumvwa ne kwibyuba.’+
28 “Onkao mambo, Yehoba waumvwine byambo byenu byo mwañambijile, kabiji Yehoba wañambijile’mba, ‘Naumvwa byambo byakwambila bano bantu. Bintu byonse byo baamba bijitu bulongo.+ 29 Umvwe kimye kyonse bakekale na muchima wa kungakamwa+ ne kulama mikambizho yami yonse;+ ko kuba’mba bakekalanga bulongo na baana babo kikupu!+ 30 Yanga ukebabuule’mba: “Bwelai ku matente enu.” 31 Bino obewa wikale konka kuno ne amiwa, pa kuba’mba nkubuule mikambizho yonse, malamuna onse ne mizhilo yonse yo wafwainwa kwibafunjisha kuba’mba bakeilamenga mu kyalo kyo mbena kwibapa kwikala ke kyabo.’ 32 Onkao mambo, anweba mwafwainwa kuteshako muchima kuba byonkatu Yehoba Lesa wenu byo emukambizha.+ Kechi mwafwainwa kusendukila ku kilujo nangwa ku kipiko ne.+ 33 Mukendenga mu mashinda onse Yehoba Lesa wenu o emukambizha kwendamo,+ pa kuba’mba mukekale na bumi ne kumona byawama ne kwikala moba avula mu kyalo kyo mukatambula.+
6 “Ino yo mikambizho, malamuna ne mizhilo Yehoba Lesa wenu yo ampa amba nemufunjishe, kuba’mba mukeilamenga byo mukabukila mu kyalo kyo mukatambula, 2 pa kuba’mba mukamwakamwenga Yehoba Lesa wenu ne kulama malamuna anji ne mikambizho yo mbena kwimukambizha anweba, baana benu ne bankana benu+ moba onse a bumi bwenu, kuba’mba mukekale moba avula.+ 3 Kabiji anweba bena Isalela, umvwai ne kuteshako muchima kwiilama pa kuba’mba mukamonenga byawama kabiji mukavule mu kyalo kyavula mukaka ne buki, byonkatu Yehoba, Lesa wa bashakulu benu, byo emulayile.
4 “Anweba bena Isalela, telekai: Yehoba Lesa wetu ye Yehoba umotu.+ 5 Mwafwainwa kutemwa Yehoba Lesa wenu na muchima wenu yense, ne na mweo* wenu yense+ ne na bulume* bwenu bonse.+ 6 Abino byambo byo mbena kwimukambizha ja lelo byafwainwa kwikala mu muchima wenu, 7 kabiji mwafwainwa kwibifunjishanga na mukoyo* baana benu+ ne kwibyambanga pa kwikala mu nzubo yenu, pa kwenda mu jishinda, pa kulaala ne pa kubuuka.+ 8 Mukebikase pa kuboko kwenu nobe kintu kya kwimuvululako, kabiji byafwainwa kwikala nobe kintu kyo mwakasa pa bilungi* byenu.+ 9 Mukebinembe pa mashiki a ku bibelo bya nzubo yenu ne pa bibelo bya mizhi yenu.
10 “Yehoba Lesa wenu byo akemufikizha mu kyalo kyo achipile ku bashakulu benu ba Abalahama, Izaka ne Yakoba+ ne kwimupa mizhi ikatampe kabiji yawama yo mwabujile kushimika,+ 11 mazubo ayula na bintu byawama byapusana pusana byo mwabujile kwingijila, ne mishima* yo mwabujile kupoya ne majimi a miñanzañanza ne bichi bya maolivi byo mwabujile kujimba kabiji byo mukaja ne kwikuta,+ 12 mwafwainwa kuteshako muchima kuchina’mba mwakamuvulama Yehoba+ yenka wimufumishe mu kyalo kya Ijipita mu nzubo ya buzha. 13 Mwafwainwa kwakamwanga Yehoba Lesa wenu+ ne kumwingijila,+ kabiji mu jizhina janji mo mo mwafwainwa kuchipila.+ 14 Kechi mwafwainwa kongolokela ku balesa bangi, balesa bonse ba bantu bemuzhokoloka ne,+ 15 mambo Yehoba Lesa wenu uji ne anweba, ke Lesa ukeba bantu kumwingijilatu bunke bwanji kwapwa.+ Mambo inge ne, Yehoba Lesa wenu ukemuzhingijila+ ne kwimuvizhatu bonse pelu pano pa ntanda.+
16 “Kechi mwafwainwa kumweseka Yehoba Lesa+ wenu byonkatu byo mwamwesekele ku Masa ne.+ 17 Mwafwainwa kuteshako muchima kulama mikambizho ya Yehoba Lesa wenu ne bya kwimuvululako byanji ne malamuna anji o emukambizha kulama. 18 Kabiji mwafwainwa kubanga byaoloka ne byawama kwi Yehoba kuba’mba mukamone byawama ne kutwela mu kyalo kyawama kyo achipile Yehoba ku bashakulu benu,+ 19 byo apangilemo balwanyi benu bonse baji kwi anweba, byonkatu byo alayile Yehoba.+
20 “Kabiji kulutwe umvwe baana benu bakemushikishe’mba, ‘Nanchi bya kwituvululako, malamuna ne mizhilo Yehoba Lesa wetu byo emukambizhe byatala mu ka?’ 21 mukebakumbule’mba, ‘Twajinga bazha ba kwa Felo mu Ijipita, bino Yehoba witufumishe mu Ijipita na kuboko kwanji kwa bulume. 22 Onkao mambo, Yehoba watwajijile kuleta biyukilo ne bya kukumya bikatampe kabiji bya malwa pa bena Ijipita+ ne pe Felo ne pa ba mu nzubo yanji bonse, ne atweba saka tumonako.+ 23 Kabiji witufumishe momwa kuba’mba etulete kuno ne kwitupa kyalo kyo achipile ku bashakulu betu.+ 24 Kepo Yehoba etukambizhe kulondela ano malamuna onse ne kumwakamwa Yehoba Lesa wetu kuba’mba tukamwenemo byawama+ ne kutwajijila kwikala bomi+ byonkatu byo tuji lelo jino. 25 Kabiji tukatelwa’mba baoloka umvwe twateshako muchima kulama ino mikambizho yonse ne kukookela Yehoba Lesa wetu, byonkatu byo etukambizha.’+
7 “Yehoba Lesa wenu byo akemufikizha mu kyalo kyo mubena kuyamo ne kwikitambula ke kyenu,+ aye ukapangamo bisaka bya bantu byabaya kufuma kwi anweba:+ bena Hiti, bena Giligashi, bena Amoli,+ bena Kenana, bena Pelizi, bena Hivi ne bena Yebusi,+ abino ke bisaka bitanu na bibiji byabaya ne kukosa kwimukila.+ 2 Kabiji Yehoba Lesa wenu ukebapana kwi anweba, ne anweba mukebashinda.+ Mwafwainwa kwibonaunatu bonse pelu.+ Kabiji kechi mukalayañane nabo lulayañano nangwa kwibobila lusa ne.+ 3 Kechi mukasongozhanyenga nabo ne. Baana benu ba bakazhi kange mukebasongweshe ku baana babo ba balume ne, kabiji baana benu ba balume kange bakasongolenga baana babo ba bakazhi ne.+ 4 Mambo bakongola baana benu kufuma kwi Lesa ne kuya na kwingijila balesa bangi;+ kabiji Yehoba ukemuzhingijila ne kwimuvizha bukiji.+
5 “Abino byo byo mukeboba: Mukakundaule bya kusokelapo bitapisho byabo, mukalalaule mashiki abo azhila,+ mukatetaule bichi* byabo bya milumbulumbu byazhila+ ne kusoka bipashañano byabo bya kusonga.+ 6 Mambo anweba mwi bantu bazhila kwi Yehoba Lesa wenu, kabiji Yehoba Lesa wenu wimusala kwikala bantu banji, kya bunonshi* bwanji kufuma mu bisaka bya bantu bonse baji pano pa ntanda.+
7 “Yehoba kechi wimutemenwe ne kwimusala na mambo a kuba’mba mwavujile kukila bisaka bya bantu bonse ne,+ mambo anweba mwajingatu bacheche pa bisaka bya bantu bonse.+ 8 Bino na mambo a kuba Yehoba wimutemenwe kabiji walamine luchipo lo achipile ku bashakulu benu,+ o ene mambo Yehoba o emufumishe na kuboko kwanji kwa bulume ne kwimukuula kufuma mu nzubo ya buzha,+ kufuma ku bulume* bwa kwa Felo mfumu wa Ijipita. 9 Kabiji anweba mwayukishatu bulongo kuba’mba Yehoba Lesa wenu ye Lesa wa kine, Lesa wa kishinka ulama lulayañano lwanji ne butemwe bwanji bubula kwaluka kufika ne ku bisemi biumbi bya boba bamutemwa kabiji balama mikambizho yanji.+ 10 Pakuba aba bamushikwa ukebonauna.+ Kechi ukabanda kushinkanya na boba bamushikwa ne, ukashinkanya nabo. 11 Onkao mambo, mutesheko muchima kulama mikambizho, malamuna ne mizhilo yo mbena kwimukambizha lelo jino, kabiji mukeilondelenga.
12 “Umvwe mwatwajijila kumvwina ino mizhilo, kwiilama ne kwiilondela, Yehoba Lesa wenu ukafikizha lulayañano ne butemwe bubula kwaluka bo achipile ku bashakulu benu. 13 Ukemutemwa ne kwimupesha ne kwimulengela kuvula. Kine ukemupesha, mukasema baana* bavula,+ ukapesha bintu bikafuma mu mushiji wenu, kajo kenu, binyu byenu bya katataka, manyi enu,+ baana ba bañombe ne baana ba mikooko mu kyalo kyo achipile ku bashakulu benu kwimupa.+ 14 Mukobilwa bibusa kukila bantu bonse;+ kafwako mwanamulume nangwa mwanamukazhi ukabula kusema baana nangwa bilelwa byenu bikabula kusema baana ne.+ 15 Kabiji Yehoba ukafumyapo bikola byonse pe anweba, kabiji kechi ukaleta pe anweba bikola byakatazha byo mwayukile mu Ijipita ne.+ Pakuba aye ukebileta pa boba bemushikwa. 16 Mukepaye* bantu bonse bo akemupa Yehoba Lesa wenu.+ Kechi mukebobile lusa ne,+ kabiji kechi mukengijilenga balesa babo ne,+ mambo bakekala ke kitewa kwi anweba.+
17 “Umvwe mukambe mu michima yenu amba, ‘Abino bisaka byavula kwitukila. Twakonsha kwibipanga byepi?’+ 18 Kechi mukebachine ne.+ Mwafwainwa kuvuluka Yehoba Lesa wenu byo aubile kwi Felo ne ku bonse bena Ijipita,+ 19 meseko akatampe o mwimwenejile, biyukilo ne bya kukumya+ ne kuboko kwa bulume kabiji kwakosa kwa Yehoba Lesa wenu ko aingijishe pa kwimufumyamo.+ Abino byo bikoba Yehoba Lesa wenu ku bisaka byonse bya bantu bo muchina.+ 20 Yehoba Lesa wenu ukebalengela kwikala na moyo* posotu ne boba bakashalamo+ ne bakefya kwi anweba bakafwe. 21 Kange mukebachine ne, mambo Yehoba Lesa wenu uji ne anweba,+ ke Lesa wa bulume kabiji ulenga moyo.+
22 “Yehoba Lesa wenu ukebipanganga pachepache bino bisaka kwi anweba.+ Kechi bakemuswisha kwibyonauna kimye kimotu ne, kuchina’mba banyama ba mungye bakemuvujila. 23 Yehoba Lesa wenu ukebapana kwi anweba kabiji mukebashinda kufikatu ne byo bakavila bonse.+ 24 Ukemupa bamfumu babo+ kabiji mukazhimañanya mazhina abo pano pa ntanda.+ Kafwako muntu nangwa umo ukemwimena ne,+ kufikatu ne byo mukebavizha bonse.+ 25 Bipashañano byabo bya kusonga bya balesa babo mukebisoke mu mujilo.+ Kechi mukakumbwe siliva ne ngolode yabo nangwa kwibisenda kwikala byenu ne,+ pa kuba’mba bikabule kwikala ke kitewa kwi anweba, mambo ke bintu bya bunya kwi Yehoba Lesa wenu.+ 26 Kechi mukalete bintu bya bunya mu mazubo enu ne, kuchina’mba ne anweba mwakekala ke bintu byafwainwa konaunwa pamo ne abyo. Mwafwainwa kwibimona’mba bya bunya ne kwibishikwa, mambo ke bintu byafwainwa konaunwa.
8 “Mwafwainwa kuteshako muchima kulama mikambizho yonse yo mbena kwimubuula lelo jino, pa kuba’mba mukatwajijile kwikala+ na bumi ne kusemununa ne kutwela mu kyokya kyalo kyo achipile Yehoba ku bashakulu benu ne kwikitambula ke kyenu.+ 2 Mukavulukenga jino jishinda jalepa Yehoba Lesa wenu jo emupishishemo mu kiselebwa myaka 40,+ kuba’mba emufunjishe kwipelula ne kwimweseka+ pa kuba’mba ayuke biji mu michima+ yenu umvwe mukalama mikambizho yanji nangwa ne. 3 Onkao mambo, wimufunjishe kwipelula pa kwimuleka na nzala+ ne kwimujisha manna+ o mwabujile kuyuka anweba nangwa bashakulu benu, kuba’mba muyuke’mba muntu kechi umwena bumi mu kajo konkatu ne, bino muntu umwena bumi ne mu byambo bifuma mu kanwa ka Yehoba.+ 4 Mu ino myaka 40, bivwalo byo mwavwajilenga kechi byafwilenga ne, ne maulu enu kechi avimbilenga ne.+ 5 Mwayukishatu bulongo amba byonkatu muntu byo ololako mwananji, ne Yehoba Lesa wenu byo byo emolwelengako.+
6 “Mwafwainwa kulama mikambizho ya Yehoba Lesa wenu kupichila mu kwenda mu mashinda anji ne kumwakamwa. 7 Mambo Yehoba Lesa wenu ubena kwimutwala mu kyalo kyawama,+ kyalo muji tukola twa mema, masulo* a mema atupauka ne kupita mu bimpachiko ne mpunzha ya mitumba, 8 kyalo kiji na wichi, mbaale, miñanzañanza, bichi bya mikuyu ne mapomegulanchi,+ kyalo muji buki ne maolivi a kulengela manyi,+ 9 kyalo mukabula kupwa kajo kabiji kechi mukakajilwa kintu nangwa kimo ne, kyalo muji mabwe a kapotwe kabiji mu mitumba yakyo mukapoyangamo mukuba.
10 “Byo mukaja ne kwikuta, mwafwainwa kumutota Yehoba Lesa wenu pa mambo a kyalo kyawama kyo akemupa.+ 11 Kange mukavulame Yehoba Lesa wenu ne kukankalwa kulama mikambizho yanji, mizhilo yanji ne malamuna anji o mbena kwimukambizha lelo ne. 12 Byo mukaja ne kwikuta ne kushimika mazubo awama ne kwikalamo,+ 13 ne bañombe ne mikooko yenu byo ikasemununa, ne siliva wenu ne ngolode wenu byo akavula, ne byo mukekala na bintu byavula, 14 kange mukaleke michima yenu kwitota+ ne kuvulama Yehoba Lesa wenu ne, aye ye wimufumishe mu kyalo kya Ijipita mu nzubo ya buzha,+ 15 ne kwimulengela kwenda mu kiselebwa kikatampe kilenga moyo,+ mwajinga miloolo ya bulembe ne tuminye kabiji mwajinga mushiji wauma mwabujile mema. Walengejile mema kupokomoka mu jibwe jakosa+ 16 ne kwimujisha manna+ abujile kuyuka bashakulu benu monka mu kiselebwa, pa kuba’mba emufunjishe kwipelula+ ne kwimweseka kuba’mba mukamwenemo byawama kulutwe.+ 17 Umvwe mukambe mu michima yenu amba, ‘Bulume bwami ne ngovu yami yo yandengela kwikala na buno bunonshi,’+ 18 mukavulukenga’mba Yehoba Lesa wenu ye wimupa bulume bwimulengela kunonka,+ pa kuba’mba afikizhe lulayañano lwanji lo achipile ku bashakulu benu, byonkatu byo kiji lelo jino.+
19 “Umvwe mukamuvulame Yehoba Lesa wenu ne kongolokela ku balesa bangi ne kwibengijila ne kwibalambila, nachipa ja lelo namba, kine mukafwa.+ 20 Byonkatu Yehoba byo akonauna bisaka bya bantu ku meso enu, ne anweba byo byo mukafwa, mambo a kubula kumvwina jiwi ja Yehoba Lesa wenu.+
9 “Anweba bena Isalela umvwai, lelo jino musakwabuka Yodano+ ne kwangata mizhi ikatampe iji na masakwa alepa kufika mwiulu,*+ ya bisaka byabaya ne kukosa kwimukila,+ 2 bo bantu bakosa kabiji balepa, bena Anaki+ bonka bo mwayuka bo mwaumvwa nkuwa yabo amba, ‘Ñanyi wakonsha kwimena bena Anaki?’ 3 Onkao mambo, yukai’mba lelo jino Yehoba Lesa wenu usakutangilako kulutwe yenu byo musakwabukanga.+ Aye ye mujilo usokañana+ kabiji ukebavizha. Kabiji ukebashinda saka mutalako, pa kuba’mba mukebapangemo* bukiji ne kwibonauna byonkatu byo emulayile Yehoba.+
4 “Yehoba Lesa wenu byo akebapanga ku meso enu, kange mukambe mu michima yenu amba, ‘Yehoba witulengela kutambula kino kyalo+ na mambo a bololoke bwetu’ ne. Bino na mambo a bubi bwa bino bisaka,+ Yehoba kyo kyo abena kwibipangilamo kufuma kwi anweba. 5 Kechi na mambo a bololoke bwenu nangwa koloka kwa michima yenu ko kukemulengela kutwelamo ne kutambula kyalo kyabo ne. Bino mukekitambula na mambo a bubi bwa bino bisaka Yehoba Lesa wenu byo abena kupanga kufuma kwi anweba,+ ne kuba’mba Yehoba akafikizhe byambo byanji byo achipile ku bashakulu benu ba Abalahama,+ Izaka+ ne Yakoba.+ 6 Kabiji yukai’mba Yehoba Lesa wenu kechi ubena kwimupa kino kyalo kyawama kwikala kyenu na mambo a bololoke bwenu ne, mambo anweba mwi bantu bakosa* michima.+
7 “Vulukai, kechi mukavulame byo mwamuzhingijishe Yehoba Lesa wenu mu kiselebwa ne.+ Kufumatu juba jo mwafumine mu kyalo kya Ijipita kufikatu ne byo mwafikile ku ino mpunzha, mukimusatukila Yehoba.+ 8 Ne ku Holeba nako mwamuzhingijishe Yehoba, kabiji Yehoba wimuzhingijile bingi kya kuba wakebele ne kwimuvizha.+ 9 Byo nakanjijile ku mutumba na kutambula mabwe apapakana abiji,+ o mabwe apapakana a lulayañano Yehoba lo alayañene ne anweba,+ naikele pa mutumba moba 40 mute ne bufuku,+ kabiji kechi najiilepo kajo nangwa kutoma mema ne. 10 Kepo Yehoba ampele mabwe apapakana abiji Lesa mwine o anembelepo na munwe wanji, kabiji pa ano mabwe pajinga byambo byonse Yehoba byo emwambijile pa mutumba jiwi saka jifuma mu mujilo pa juba jo mwabuñene.*+ 11 Ku mpelo ya moba 40 mute ne bufuku, Yehoba wampele mabwe apapakana abiji, o mabwe a lulayañano. 12 Kabiji Yehoba wañambijile’mba, ‘Imana, kunkuluka bukiji kufuma kuno, mambo bantu bobe bo wafumishe mu Ijipita batamisha.+ Basendukamo bukiji mu jishinda jo nebakambizhe kuyamo. Belengela kipashañano kya kyela.’+ 13 Kepo Yehoba añambijile’mba, ‘Namona bano bantu namba ke bantu bakosa* michima.+ 14 Ndeke, nebonauna ne kuzhiya jizhina jabo pano pa ntanda, ne obewa nsakukwalula ke kisaka kyakosa kabiji kyabaya kwibakila.’+
15 “Kepo naalulukile ne kukunkulukapo pa mutumba, aku mutumba saka ateema mujilo,+ kabiji najinga na mabwe apapakana abiji a lulayañano mu maboko ami.+ 16 Kabiji natajile ne kumona’mba mwamulenga mambo Yehoba Lesa wenu! Mwalengele mwana ñombe wa kyela. Mwasendukilemo bukiji mu jishinda Yehoba jo emukambizhe kuyamo.+ 17 Ponkapo nashikwile mabwe apapakana abiji ne kwiataya panshi ne kwialalaula saka mutalako.+ 18 Kepo naponene panshi kinkuvumene ku meso a Yehoba byonkatu byo naubile kimye kitanshi moba 40 mute ne bufuku. Kabiji kechi najiilepo kajo nangwa kutoma mema ne,+ naubile kino na mambo enu onse o mwalengele byo mwaubile kintu kyatama kwi Yehoba ne kumuzhingijisha. 19 Kabiji nachiine, mambo Yehoba wimuzhingijile+ bingi kya kuba wakebele ne kwimuvizha. Pano bino, pa kyokya kimye napo Yehoba wañumvwine.+
20 “Yehoba wamuzhingijile bingi Alona kya kuba wakebele ne kumwipaya,+ bino pa kyokya kimye, Alona naye namusashijileko. 21 Ponkapo nashikwile akya kintu kimulengejile kulenga mambo kyo mwalengele, ko kuba’mba mwana ñombe,+ ne kwikisoka mu mujilo; nekilalawile ne kwikivingaula ke bungatu kabiji natayile buno bunga bwakyo mu kakola kafuma ku mutumba.+
22 “Kabiji ku Tabela,+ ku Masa+ ne ku Kibilota-hataba+ nako mwamuzhingijishe Yehoba. 23 Kabiji Yehoba byo emutumine kufuma ku Kadeshi-balaneya+ ne kwimwambila’mba, ‘Yainga mukatambule kyalo kyo mbena kwimupa,’ mwakaine kulondela mikambizho ya Yehoba Lesa wenu+ kabiji kechi mwamwitabijile+ ne kumukookela ne. 24 Mwamusatukila Yehoba kufumatu kimye kyo nemuyukile.
25 “Onkao mambo, naponenenga panshi kinkuvumene ku meso a Yehoba moba 40 mute ne bufuku,+ naubilenga bino mambo Yehoba waambile’mba usakwimuvizha. 26 Natatwile kumusashijila Yehoba namba, ‘Anweba Nkambo Mfumu Yehoba, kange mwibonaune bano bantu ne. Mambo bo bantu benu,+ ba kyenu kyenu* bo mwakuujile na bulume bwenu ne kwibafumya mu Ijipita na kuboko kwenu kwa bulume.+ 27 Vulukai bakalume benu abo ba Abalahama, Izaka ne Yakoba.+ Kange mute muchima pa kukosa kwa michima kwa bano bantu, pa bubi bwabo ne pa mambo abo ne.+ 28 Mambo umvwe mube kino, bantu ba mu kyalo mo mwitufumishe bakamba’mba: “Yehoba wakankalwa kwibafikizha mu kyalo kyo ebalayile, kabiji na mambo a kwibashikwa kyo kyo ebafumishemo kuba’mba ebepayile mu kiselebwa.”+ 29 Abo ke bantu benu, ba kyenu kyenu*+ bo mwafumishe na bulume bwenu bukatampe ne na kuboko kwenu kwakosa.’+
10 “Pa kyokya kimye, Yehoba wañambijile’mba, ‘Songa mabwe abiji apapakana aesakana na mabwe atanshi,+ kabiji wiye kwi amiwa ku mutumba; kabiji wafwainwa kwilengela jikwachi* ja bichi. 2 Ne amiwa nsakunembapo pa mabwe abiji apapakana byambo byonka byajinga pa mabwe atanshi o walalawile, kabiji wiabike mu jikwachi.’ 3 Onkao mambo, nalengele jikwachi na kichi kya mwiba wa kaseele ne kusonga mabwe abiji apapakana aesakene na mabwe atanshi kabiji nakanjijile ku mutumba saka nasenda mabwe abiji mu kuboko kwami.+ 4 Kepo anembelepo pa mabwe byambo byo anembele patanshi,+ Mikambizho* Jikumi,+ Yehoba yo aambile kwi anweba pa mutumba jiwi saka jifuma mu mujilo+ pa juba jo mwabuñene;*+ kabiji Yehoba wampeleo. 5 Kabiji naalulukile ne kukunkuluka ku mutumba+ ne kubika ano mabwe mu jikwachi jo nalengele, monka mo aji, byonkatu byo ankambizhe Yehoba.
6 “Kepo bena Isalela baimene lwendo kufuma ku Beelota Bene-yakana kuya ku Moselota. Akwa ko kwafwijile Alona kabiji ko ko bamuzhiikile,+ kabiji mwananji aye Eleaza ye waikele ke ñanga kupingakena pe aye.+ 7 Kufuma kokwa bayile ku Gugoda, kabiji kufuma ku Gugoda bayile ku Yotabata,+ kyalo kiji na tukola twa mema.
8 “Pa kyokya kimye, Yehoba wasajile mukoka wa bena Levi+ kuba’mba basendenga jikwachi ja lulayañano lwa Yehoba+ ne kwimana kwi Yehoba kuba’mba bamwingijilenga ne kupesha bantu mu jizhina janji+ byonkatu byo boba ne lelo jino. 9 O ene mambo bena Levi o babujila kya kwibabilapo nangwa buswanyi mu balongo babo. Yehoba bo buswanyi bwabo, byonkatu Yehoba Lesa wenu byo aambile kwi abo.+ 10 Naikele pa mutumba byonkatu byo naubile kimye kitanshi, moba 40 mute ne bufuku,+ kabiji pa kyokya kimye napo Yehoba wañumvwine.+ Yehoba kechi wakebele kwimonauna ne. 11 Kepo Yehoba añambijile’mba, ‘Pichila kulutwe ya bantu ne kwinengezha kwimana lwendo, pa kuba’mba bakatwele ne kutambula kyalo kyo nachipile kupa bashakulu babo.’+
12 “Anweba bena Isalela, ñanyi kintu Yehoba Lesa wenu kyo abena kwimukebela?+ Kanatu kino: kwakamwa Yehoba Lesa wenu,+ kwenda mu mashinda anji onse,+ kumutemwa, kumwingijila Yehoba Lesa wenu na muchima wenu yense ne na mweo* wenu yense,+ 13 ne kulama mikambizho ne malamuna a Yehoba o mbena kwimukambizha lelo, pa kuba’mba mukamwenemo byawama.+ 14 Talai, jiulu jo ja Yehoba Lesa wenu, ne mwiulu mwine* ne ntanda ne bintu byonse bijipo.+ 15 Bino Yehoba wafwenyenye kwipi na bashakulu benu ne kwibamwesha butemwe bwanji, kabiji wasala anweba baana babo+ kufuma mu bisaka byonse bya bantu byonkatu byo kiji lelo jino. 16 Mwafwainwa kutokesha* michima yenu+ ne kuleka kukosa* michima.+ 17 Mambo Yehoba Lesa wenu, ye Lesa wa balesa+ kabiji Nkambo wa bankambo, ye Lesa mukatampe, wa bulume kabiji ulenga moyo, wabula misalululo+ kabiji kechi utambula mazhikakanwa ne. 18 Mwana wabula bashanji* ne mwanamukazhi wafwilwa+ wibachibila mambo monka mo aolokela, kabiji watemwa muntu wafuma ku kyalo kingi,+ kabiji umupa kajo ne bivwalo. 19 Ne anweba mwafwainwa kutemwa muntu wafuma ku kyalo kingi, mambo ne anweba mwajinga benyi mu kyalo kya Ijipita.+
20 “Mwafwainwa kumwakamwa Yehoba Lesa wenu, kumwingijila,+ kumukakachila kabiji mwafwainwa kuchipila mu jizhina janji. 21 Aye ye ye mwafwainwa kutotanga.+ Ye Lesa wenu yenka wimubila bino bintu bikatampe byonse ne bintu bilenga moyo byo mwimwena.+ 22 Bashakulu benu bayile ku Ijipita bajingatu bantu* 70,+ lelo jino Yehoba Lesa wenu wimuvuzha nobe tubangabanga twa mwiulu.+
11 “Mwafwainwa kutemwa Yehoba Lesa wenu+ kabiji mukamwingijilenga moba onse, kulama malamuna anji, mizhilo yanji ne mikambizho yanji. 2 Anweba mwayukishatu bulongo amba lelo jino mbena kwambila anweba, kechi mbena kwambila baana benu ne, mambo abo kechi bayuka nangwa kumona Yehoba Lesa wenu byo emufunjileko,+ bukata bwanji+ ne kuboko kwanji kwa bulume+ kabiji kwakosa ne. 3 Kabiji kechi bamweneko biyukilo byanji ne bintu byo aubile mu Ijipita kwi Felo mfumu wa Ijipita ne kyalo kyanji kyonse ne;+ 4 nangwa byo aubile na mazhita a mu Ijipita, bambili ba kwa Felo ne makalaki a nkondo, byo bebibizhe mu Kalunga ka Mema Kachila kimye kyo bemupupijilenga ne. Kabiji Yehoba wibonawine bonsetu pa kimye kimo.*+ 5 Kabiji kechi bamweneko bintu byo emubijile mu kiselebwa ne, posotu ne byo mwafikile ku ino mpunzha, 6 nangwa byo aubile kwi Datanyi ne Abilama baana ba kwa Eliaba, Eliaba mwana wa kwa Lubenyi, kimye mushiji kyo aasamine ne kwibamiina pamo na ba mu mazubo abo, ne matente abo ne bintu byonse byumi byo bajinga nabyo ne bena Isalela saka bamonako ne.+ 7 Bino anweba mwimwenejile mingilo yonse ikatampe Yehoba yo aubile.
8 “Mwafwainwa kulama mikambizho yonse yo mbena kwimupa lelo jino, pa kuba’mba mukakose ne kwabukila mu kyalo ne kwikitambula kwikala ke kyenu, 9 kuba’mba mukekale moba avula+ mu kyalo kyo achipile Yehoba kupa bashakulu benu ne baana* babo,+ kyalo kyavula mukaka ne buki.+
10 “Kyalo kyo mubena kuya na kutambula kechi kiji nobe kyalo kya Ijipita mo mwafuma, mo mwaingilanga bingi na ngovu na kutekezha majimi byonkatu byo mutekezha mashamba a bishu ne. 11 Pakuba kyalo kyo mubena kwabukilamo ne kwikitambula ke kyalo kya mitumba ne misanza.+ Kiji na mema avula afuma mwiulu;+ 12 ke kyalo Yehoba Lesa wenu kyo abena kulama bulongo. Meso a Yehoba Lesa wenu aji pa kino kyonka kyalo kufumatu ku ntendekelo ya mwaka kufika ne ku mpelo ya mwaka.
13 “Kabiji umvwe kine mukakookele mikambizho yami yo mbena kwimukambizha lelo jino, ne kutemwa Yehoba Lesa wenu ne kumwingijila na muchima wenu yense ne na mweo* wenu yense,+ 14 amiwa* nkanokesha mvula mu kyalo kyenu pa kimye kyayo, mvula mutanshi ne mvula wapelako kabiji mukabungizha kajo kenu, binyu byenu bya katataka ne manyi enu.+ 15 Kabiji nkamenesha nsono mu ntanda yenu ya kuja bilelwa byenu, ne anweba mukajanga kajo ne kwikuta.+ 16 Jimukai kuchina’mba michima yenu yakajimbaikwa ne kuya mungi ne kupopwela balesa bangi ne kwibalambila.+ 17 Umvwe mwauba kino, Yehoba ukemuzhingijila ne kushinkamo mu bipenze bya mwiulu pa kuba’mba mvula akaleke kunoka+ ne mu mushiji kechi mukamenanga bintu ne, kabiji mukafwa bukiji ne kufuma mu kyalo kyawama kyo abena kwimupa Yehoba.+
18 “Abino byambo byami mukebilame mu michima yenu ne na myeo* yenu ne kwibikashila pa kuboko kwenu nobe kintu kya kuvulukilako, kabiji byafwainwa kwikala nobe kikome kya ku mutwe kiji pa kilungi kyenu.+ 19 Mukebifunjishenga baana benu ne kwibyambanga pa kwikala mu nzubo yenu, pa kwenda mu jishinda, pa kulaala ne pa kubuuka.+ 20 Mukebinembe pa mashiki a ku bibelo bya nzubo yenu ne pa bibelo bya mizhi yenu, 21 pa kuba’mba anweba ne baana benu mukekale moba avula+ mu kyalo kyo achipile Yehoba kupa bashakulu benu,+ pa moba onse jiulu o jikekala peulu ya ntanda.
22 “Umvwe kine mukalame ino mikambizho yo mbena kwimupa ne kwiilondela, kutemwa Yehoba Lesa wenu,+ kwenda mu mashinda anji onse ne kukakachila kwi aye,+ 23 Yehoba ukebipangamo bino bisaka byonse kufuma kwi anweba,+ kabiji mukashinda bisaka byakosa byabaya kwimukila.+ 24 Mpunzha yonse po mukanyanta kulu kwenu ikekala ke yenu.+ Mupaka wenu ukafuma ku kiselebwa kufika ne ku Lebanoni, kabiji ukafuma ku Mukola, ko kuba’mba mukola wa Ufelata kufika ne ku kalunga* ka ku muzhika.+ 25 Kafwako muntu nangwa umo ukemwimena ne.+ Yehoba Lesa wenu ukabika mu bantu moyo wa kwimuchina mu kyalo kyonse kyo mukapitamo+ byonkatu byo emulayile.
26 “Umvwai, lelo jino nabika mapesho ne mafingo kwi anweba:+ 27 bakemupesha umvwe mwakookela mikambizho ya Yehoba Lesa wenu yo mbena kwimukambizha lelo jino,+ 28 kabiji mukafingwa umvwe mwabula kukookela mikambizho ya Yehoba Lesa wenu+ ne kusendukamo mu jishinda jo nemukambizha kuyamo lelo jino ne kongolokela ku balesa bangi bo mwabujile kuyuka.
29 “Yehoba Lesa wenu byo akemufikizha mu kyalo kyo mukatambula ke kyenu, mukambile* mapesho pa Mutumba wa Gelizimu ne mafingo pa Mutumba wa Ebala.+ 30 Nanchi ino mitumba kechi iji ku bushiya bwa Yodano na ku muzhika,* mu kyalo kya bena Kenana bekala mu Alaba watalañana na Giligala kwipi na bichi bya Mole bikatampe nenyi?+ 31 Mambo anweba mubena kwabuka Yodano ne kutwela mu kyalo kyo abena kwimupa Yehoba Lesa wenu ne kwikitambula kwikala ke kyenu.+ Byo mukekitambula ne kwikalamo, 32 mwafwainwa kuteshako muchima kulondela malamuna onse ne mizhilo yonse yo mbena kwimubuula lelo jino.+
12 “Ano o malamuna ne mizhilo yo mwafwainwa mukatesheko muchima kulondela moba onse o mukekala na bumi mu kyalo Yehoba Lesa wa bashakulu benu kyo akemupa kwikala ke kyenu. 2 Mukonaune mapunzha onse o bapopwelangamo balesa ba bisaka bya bantu byo mukashinda,+ nangwa pa mitumba yalepa nangwa pa tutumbatumba nangwa munshi ya bichi bikatampe. 3 Mukakundaule bya kusokelapo bitapisho byabo ne mashiki abo azhila+ ne kutetaula bichi* byabo bya milumbulumbu byazhila kabiji mukebisoke mu mujilo ne kutetaula bipashañano bya balesa babo+ bya kusonga ne kuzhiya mazhina abo ku yoya mpunzha.+
4 “Abino kechi byo byo mwafwainwa kupopwela Yehoba Lesa wenu ne.+ 5 Pakuba anweba mukamukebenga Yehoba Lesa wenu mu mpunzha yo akasala mwa kwikala jizhina janji, kabiji mukaye konkakwa ku mpunzha ko akekala mukachi ka mikoka yenu yonse.+ 6 Akwa, ko ko mwafwainwa kutwala milambo yenu ya kusoka,+ bitapisho byenu, bya bujikumi,+ bya bupe,+ milambo ya luchipo, milambo ya kwifuukwila+ ne babeji ba bañombe ne ba mikooko yenu.+ 7 Anweba ne ba mu mazubo enu mukebijiilenga konkakwa ku meso a Yehoba Lesa wenu+ ne kusangalela mu mingilo yenu yonse yo mukengilanga,+ mambo Yehoba Lesa wenu wimubila bibusa.
8 “Kechi mwafwainwa kubanga byonka byo tubena kuba kuno lelo jino, kya kuba muntu yense keeubile kyo amona* amba kijitu bulongo ne, 9 mambo mukyangye kufika mu mpunzha ya kukokolokelamo+ ne mpunzha ya buswanyi yo abena kwimupa Yehoba Lesa wenu. 10 Kabiji byo mukabuka Yodano+ ne kwikala mu kyalo kyo abena kwimupa Yehoba Lesa wenu kwikala ke kyenu, kine aye ukemukokolosha ku balwanyi benu bonse bemuzhokoloka, kabiji mukekala mu mutende.+ 11 Mukalete bintu byonse byo mbena kwimukambizha mu mpunzha yo akasala Yehoba Lesa wenu mwa kwikala jizhina janji,+ ko kuba’mba milambo yenu ya kusoka, bitapisho byenu, bya bujikumi,+ bya bupe byenu ne milambo yonse ya luchipo yo mukachipa kwi Yehoba. 12 Mukasangalalenga kwi Yehoba Lesa wenu, anweba,+ baana benu ba balume ne baana benu ba bakazhi, bazha benu ba balume ne ba bakazhi ne mwina Levi wikala mu mizhi* yenu, mambo aye kechi uji na kya kumwabilapo nangwa kya buswanyi mukachi kenu ne.+ 13 Mwafwainwa kujimuka kuchina’mba mwakalambula milambo yenu ya kusoka mu mpunzha yonse yo mukamona.+ 14 Mukalambwiletu milambo yenu ya kusoka mu mpunzha ya mukoka wenu yo akasala Yehoba, kabiji monkamwa mo mo mukobilanga bintu byonse byo mbena kwimukambizha.+
15 “Bino kimye kyonse kyo mukakebanga* kuja nyama, mwakonsha kwipaya ne kuja+ monka mwayila bibusa Yehoba Lesa wenu byo emubila, mu mizhi* yenu yonse. Muntu wa muzhilo ne wabula wa muzhilo bakonsha kujako, byonkatu byo mwakonsha kuja lupaala ne nsebula. 16 Bino kechi mwafwainwa kuja mashi ne;+ mwafwainwa kwiechila panshi nobe mema.+ 17 Kechi bakemuswisha kujiila mu mizhi yenu bya bujikumi bya mu kajo kenu, bya mu binyu byenu bya katataka, bya mu manyi enu, babeji ba bañombe ne ba mikooko yenu,+ milambo yenu yonse ya luchipo, milambo yenu ya kwifuukwila nangwa bya bupe byenu ne. 18 Mukebijiilenga kwi Yehoba Lesa wenu mu mpunzha yo akasala Yehoba Lesa wenu,+ anweba, mwanenu wa mulume ne mwanenu wa mukazhi, wa mwingilo wenu wa mulume ne wa mukazhi ne mwina Levi wikala mu mizhi* yenu; kabiji mukasangalalenga kwi Yehoba Lesa wenu mu mingilo yonse yo mukengilanga. 19 Mwafwainwa kujimuka kuchina’mba mwakeya kuvulama mwina Levi+ moba onse o mukekalanga mu kyalo kyenu.
20 “Yehoba Lesa wenu byo akemubayishisha nyaunda yenu+ byonkatu byo emulayile+ kabiji mukambe’mba, ‘Nakeba kuja nyama,’ na mambo a lukasha,* mwakonsha kuja kimye kyonse kyo mukakeba* kuja.+ 21 Umvwe mpunzha yo akasala Yehoba Lesa wenu mwa kwikala jizhina janji+ iji kwalepa na ko mwikala, mwakonsha kwipayapo bañombe nangwa mikooko yenu yo emupa Yehoba byonkatu byo nemukambizha, kabiji mwafwainwa kujiila mu mizhi* yenu kimye kyonse kyo mukakeba* kuja. 22 Byonkatu byo mwakonsha kuja lupaala ne nsebula+ byo byo mukebaja; muntu wa muzhilo ne wabula muzhilo bakonsha kujako. 23 Pano bino, kechi mukaje mashi ne,+ mambo mashi bo bumi*+ kabiji kechi mukajiile bumi* pamo na nyama ne. 24 Kechi mukeaje mashi ne, mukeechile panshi nobe mema.+ 25 Kechi mukeaje ne, pa kuba’mba mukamone byawama anweba ne baana benu bakemulondela panyuma yenu, mambo mubena kuba kyawama kwi Yehoba. 26 Pa kuya ku mpunzha yo akasala Yehoba, mukasendengatu bintu byenu byazhila ne milambo yenu ya luchipo. 27 Akwa, ko ko mukalambwilanga milambo yenu ya kusoka, nyama ne mashi+ pa kya kusokelapo bitapisho kya Yehoba Lesa wenu, ne mashi a bitapisho byenu mukeechile ku kya kusokelapo bitapisho+ kya Yehoba Lesa wenu, pakuba nyama mwakonsha kwiija.
28 “Mwafwainwa kuteshako muchima kulama bino byambo byonse byo mbena kwimukambizha, pa kuba’mba mukamonenga byawama anweba ne baana benu bakemulondela panyuma, mambo mubena kuba byawama ne byaoloka ku meso a Yehoba Lesa wenu.
29 “Yehoba Lesa wenu byo akonauna bisaka bya bantu byo mukashinda+ ne kwikala mu kyalo kyabo, 30 mukajimuke kuchina’mba mwakongolwa byo bakebonauna ku meso enu. Kange mukashikishe pa balesa babo ne, amba, ‘Nanchi bino bisaka bya bantu byaingijilanga byepi balesa babo? Ne amiwa nsakubanga kintutu kimo.’+ 31 Kechi mukoobenga kino kwi Yehoba Lesa wenu ne, mambo abya byonse bya bunya Yehoba byo ashikwa, byo byo bobila balesa babo. Kabiji basokela ne balesa babo baana babo ba balume ne baana babo ba bakazhi mu mujilo.+ 32 Byambo byonse byo mbena kwimukambizha mukateshekotu muchima kwibyuba.+ Kechi mukanungeko nangwa kufumyako ne.+
13 “Umvwe ngauzhi nangwa muntu ulota biloto wamweka mukachi kenu ne kwamba bintu bikamweka kulutwe ne kwimumwesha kiyukilo nangwa kya kukumya, 2 ne kyo kyo kiyukilo nangwa kya kukumya kyo aambilenga kyamweka kabiji wimwambila’mba, ‘Twayai tongolokele ku balesa bangi, balesa bo mwabujile kuyuka, ne kwamba’mba twayai twibengijile,’ 3 kechi mukomvwine byambo bya yewo ngauzhi nangwa yewo muntu ulota biloto ne.+ Mambo Yehoba Lesa wenu ubena kwimweseka+ kukeba kuyuka umvwe mwamutemwa Yehoba Lesa wenu na muchima wenu yense ne na mweo* wenu yense.+ 4 Mukalondelenga Yehoba Lesa wenu, kumwakamwa, kulama mikambizho yanji, kumvwina jiwi janji; kabiji ye yenkatu ye mwafwainwa kwingijila ne kukakachila.+ 5 Pakuba awo ngauzhi nangwa awo muntu ulota biloto, bafwainwa kumwipaya,+ mambo ubena kutundaika kusatukila Yehoba Lesa wenu—yenka wimufumishe mu kyalo kya Ijipita ne kwimukuula mu nzubo ya buzha—kabiji ubena kukeba kwimusendulamo mu jishinda Yehoba Lesa wenu jo emukambizhe kuyamo. Kabiji mwafwainwa kufumyamo bubi mukachi kenu.+
6 “Umvwe kolojobe nangwa nkasobe ye wasemwa nanji jivumo jimo, nangwa mwanobe wa mulume nangwa mwanobe wa mukazhi nangwa mukazhobe ye watemwisha nangwa mulunda* nobe wa pa muchima keakebe kukongola ku mbaji ne kukwambila’mba, ‘Twaya twingijile balesa bangi,’+ balesa bo wabujile kuyuka nangwa babujile kuyuka bashakulu bobe, 7 balesa ba bisaka bya bantu bimuzhokoloka, biji pepi na ko wikala nangwa biji kwalepa, kufuma kwatendekela kyalo kufika ne ko kyakapelela, 8 kechi ukamukookele nangwa kumumvwina ne.+ Kabiji kechi wafwainwa kumubila lusa nangwa kifyele nangwa kumuzhikijila ne; 9 bino wafwainwa kumwipaya.+ Yobe wafwainwa kutatwilapo kumwasa mabwe pa kumwipaya, apa bino bantu bonse bakamwase mabwe.+ 10 Ukamwase mabwe akafwe,+ mambo ubena kukeba kukufumya kwi Yehoba Lesa wobe, yenka wakufumishe mu kyalo kya Ijipita mu nzubo ya buzha. 11 Kabiji bena Isalela bonse bakomvwa kino ne kuba moyo, kabiji kechi bakabwezhapo kuba kintu kyatama nobe kino mukachi kenu ne.+
12 “Umvwe mu mizhi yenu Yehoba Lesa wenu yo akemupa kwikalamo mwaumvwa’mba, 13 ‘Bantu babula maana bafuma mwi anweba ne kukeba kongola bangikazhi ba mu muzhi wabo ne kwamba’mba: “Twayai twingijilenga balesa bangi,” balesa bo mwabujile kuyuka,’ 14 mwafwainwa kutalapo ne kukebakeba bulongo ne kushikishapo bulongo;+ kabiji inge kyatanwa’mba kya kine kino kintu kya bunya kyaubiwe mwi anweba, 15 mwafwainwa kwipaya bangikazhi ba mu yewo muzhi na mpoko.+ Mukamonaune na mpoko ne bintu byonse bijimo kumvwangakotu ne bilelwa byabo.+ 16 Bipukulwa bya mu muzhi mukebilumbike pa lubanza wa muzhi ne kusoka muzhi na mujilo ne bipukulwa byanji bikekala ke mulambo yense kwi Yehoba Lesa wenu. Ukekalatu ke mulumba wa bikulukulu myaka ne myaka. Kechi bakamushimukulula ne. 17 Kafwako kintu nangwa kimo kyo mwafwainwa kusenda pa bintu byafwainwa konaunwa* ne,+ pa kuba’mba Yehoba akabule kwimuzhingijila kabiji akemubile lusa ne kifyele ne kwimulengela kusemununa byonkatu byo achipile ku bashakulu benu.+ 18 Mwafwainwa kukookela* Yehoba Lesa wenu ne kulama mikambizho yonse yo mbena kwimukambizha lelo jino, kuba’mba mukoobenga byawama ku meso a Yehoba Lesa wenu.+
14 “Anweba mwi baana ba Yehoba Lesa wenu. Kechi mukechibaule+ nangwa kutenda kipepule bilungi byenu na mambo a muntu wafwa ne.+ 2 Mambo anweba mwi bantu bazhila+ kwi Yehoba Lesa wenu, kabiji Yehoba wimusala kwikala bantu banji, kya bunonshi* kyanji kufuma mu bisaka bya bantu bonse baji pano pa ntanda.+
3 “Kechi mukaje kintu kya bunya nangwa kimo ne.+ 4 Bano bo banyama bo mwakonsha kuja:+ ñombe mulume, mukooko, mbuzhi, 5 nsebula, lupaala, sontwa, kikwinji, ntengu, mukooko wa mungye ne mukooko wa ku mutumba. 6 Mwakonsha kuja nyama yense uji na mikono yalenduka kabiji usheñununa kajo. 7 Nangwa byonkabyo, kechi mukajenga bano banyama basheñununa kajo nangwa boba baji na mikono yalenduka ne: ngamela, kalulu ne kibila, mambo basheñununa kajo bino kechi baji na mikono yalenduka ne. Bo ba muzhilo kwi anweba.+ 8 Ne nkumba, mambo uji na mikono yalenduka, bino kechi usheñununa kajo ne. Ye wa muzhilo kwi anweba. Kechi mukaje nyama yabo nangwa kukwata pa mibiji yabo yafwa ne.
9 “Byumi byonse bya mu mema byo mwakonsha kuja ke bino: Kintu kyonse kiji na towelo ne mabamba mwakonsha kuja.+ 10 Pakuba kechi mukaje kintu kyonse kyabula towelo ne mabamba ne. Kyo kya muzhilo kwi anweba.
11 “Mwakonsha kuja ñonyi yense wabula wa muzhilo. 12 Bañonyi bo mukabulanga kuja ke bano: mpungu, nkwashi, jikubi mukatampe,+ 13 kiswakozhi, kibimbe ne mitundu yonse ya bibimbe, 14 mitundu yonse ya bikwangala, 15 osetelechi, kapwa, kabwilile, mitundu yonse ya tubemba, 16 kapwa kakacheche, jikwikwi, kafutubiji, 17 pelekanyi, jikubi mucheche, mulondwe, 18 ñendabwala, mitundu yonse ya tukonge tukatampe, susute ne mujima. 19 Bilengwa* byonse biji na byapi byenda kisamba ke bya muzhilo kwi anweba. Kechi mukebije ne. 20 Bilengwa byonse bitumbuka byabula muzhilo mwakonsha kwibija.
21 “Kechi mukaje nyama wifwila ne.+ Mwakonsha kumupana ku muntu wafuma ku kyalo kingi, wikala mu mizhi* yenu ne aye wakonsha kwiija; nangwa mwakonsha kwiipotesha ku muntu ungi. Mambo anweba mwi bantu bazhila kwi Yehoba Lesa wenu.
“Kechi wafwainwa kuteeka mwana mbuzhi mu mukaka wa inanji ne.+
22 “Pa mwaka pa mwaka, mukapanenga bya bujikumi bikafumanga mu nkunwa yenu yonse yo mukabyalanga mu majimi enu.+ 23 Bya bujikumi bya mu kajo kenu, bya mu binyu byenu bya katataka, bya mu manyi enu ne babeji ba bañombe ne ba mikooko yenu, byonse mukebijiilenga kwi Yehoba Lesa wenu mu mpunzha yo akasala mwa kwikala jizhina janji,+ pa kuba’mba mukafunde kumwakamwa Yehoba Lesa wenu moba onse.+
24 “Pakuba umvwe museke akemulepele kabiji mwakankalwa kubila bino bintu mu mpunzha yo akasala Yehoba Lesa wenu mwa kwikala jizhina janji+ na mambo a kuba kwalepa na ko mwikala (mambo Yehoba Lesa wenu ukemubila bibusa), 25 mukebipoteshe ne kusendela mali mu mafukuta ne kuya nao ku mpunzha yo akasala Yehoba Lesa wenu. 26 Mwakonsha kwingijisha oo mali kupotamo kintu kyonse kyo mubena kukeba,* nabiji bañombe, mikooko, bambuzhi, binyu ne maalwa akwabo ne bintu byonse byo mukakeba;* kabiji mukebijiile konkakwa kwi Yehoba Lesa wenu ne kusangalala anweba ne ba mu mazubo enu.+ 27 Kechi mukavulame mwina Levi wikala mu mizhi yenu ne,+ mambo aye kechi uji na kya kumwabilapo nangwa kya buswanyi mukachi kenu ne.+
28 “Ku mpelo yonse ya myaka isatu, mukalete bya bujikumi byonse bya mu kajo kenu bya mu yewo mwaka ne kwibilamina mu mizhi yenu.+ 29 Kabiji mwina Levi wabula kya kwibabilapo nangwa kya buswanyi ne muntu wafuma ku kyalo kingi, mwana wabula bashanji* ne mwanamukazhi wafwilwa bekala mu mizhi yenu, bakeya na kuja ne kwikuta,+ kuba’mba Yehoba Lesa wenu akemupeshe mu byonse byo muba.+
15 “Ku mpelo ya mwaka yense wa butanu na bubiji, mukalubekotu ku baji na nkongole.+ 2 Mukoobenga bino: Muntu yense wakongwesheshe mukwabo akalubeko ku nkongole iji na mukwabo. Kechi akakende mukwabo nangwa mulongo wanji amba amubwezhezhe nkongole ne, ukooba kino na mambo a kunemeka Yehoba.+ 3 Mwakonsha kukenda muntu wafuma ku kyalo kingi,+ bino mwafwainwa kulubako ku bintu byenu byakongwele mulongo wenu. 4 Nangwa byonkabyo, kafwako nangwa umo mwi anweba wafwainwa kwikala muyanji ne, mambo kine Yehoba ukemupesha+ mu kyalo kyo abena kwimupa Yehoba Lesa wenu kwikala ke kyenu kya buswanyi, 5 inge mwakookela jiwi ja Yehoba Lesa wenu ne kuteshako muchima kulama mikambizho yanji yo mbena kwimupa lelo jino.+ 6 Mambo Yehoba Lesa wenu ukemupesha byonkatu byo emulayile, kabiji mukakongweshanga* bisaka bya bantu byavula, pakuba anweba kechi mukakongolanga ne;+ kabiji mukekala na bunkambo bwa pa bisaka bya bantu byavula, bino abo kechi bakemubila bunkambo ne.+
7 “Umvwe mulongo wenu waikala muyanji mu muzhi umo wa mu kyalo kyo abena kwimupa Yehoba Lesa wenu, kechi mukakoseshe michima yenu ne kutana mulongo wenu muyanji ne.+ 8 Mwafwainwa kuvungulula kuboko kwenu ne kupapo mulongo wenu+ kabiji mukamukongweshe* kintu kyonse kyo akonsha kukeba nangwa kyo akajilwa. 9 Mwafwainwa kujimuka kuchina’mba mwakekala na uno mulanguluko watama mu michima yenu ne kwamba’mba, ‘Mwaka wa butanu na bubiji, mwaka wa kubula kukenda nkongole wafika,’+ kabiji mwakana kupapo mulongo wenu muyanji kintu. Umvwe akemujijile kwi Yehoba, mukekala na mambo.+ 10 Mwafwainwa kumupapo+ kabiji anweba* kechi mwafwainwa kumupa kya kwimukanjikizha ne, mambo Yehoba Lesa wenu ukapesha mingilo yenu yonse yo mukengilanga.+ 11 Mambo bayanji kechi bakapwamo mu kyalo ne.+ O ene mambo o mbena kwimukambizhizha namba, ‘Mwafwainwa kuvungulula kuboko kwenu ne kupapo mulongo wenu wakajilwa nangwa muyanji ukekala mu kyalo kyenu.’+
12 “Umvwe mulongo wenu mwanamulume nangwa mwanamukazhi Muhebelu wipotesha mwine kwi anweba ne kwimwingijila myaka itanu na umo, ko kuba’mba mu mwaka wa butanu na bubiji mukamukasulule.+ 13 Kabiji umvwe mwamukasulula, kange mukamuleke akaye mabokotu ne. 14 Mwafwainwa kumupapo banyama benu, kajo ka pa kipujilo ne manyi ne binyu byo mwafina. Mukamupepo kwesakana na monka mo akemubila bibusa Yehoba Lesa wenu. 15 Vulukai’mba mwajinga bazha mu kyalo kya Ijipita ne kuba’mba Yehoba Lesa wenu wimukuujile. O ene mambo o mbena kwimukambizhizha kuba kino lelo jino.
16 “Bino inge akemwambile’mba, ‘Amiwa kechi nsakufuma kwi anweba ne,’ na mambo a kwimutemwa anweba ne ba mu nzubo yenu, byo aikele bulongo ne anweba,+ 17 ko kuba’mba mukamusabe kutwi na kyela kya kusabilako konka ku kibelo, ne aye ukekala ke muzha wenu kikupu. Mukoobenga kintutu kimo ne ku muzha wenu wa mukazhi. 18 Kechi mukalangulukenga amba kyo kintu kyakatazha kumukasulula amba ayenga ne, mambo byo emwingijila pa myaka itanu na umo, waingijile mwingilo wakonsha kwingila bantu babiji bo batwezha nkito, kabiji Yehoba Lesa wenu wimupesheshe mu bintu byonse byo mwaubilenga.
19 “Mubeji yense wa ñombe mulume ne mukooko mulume mukamuzhijike kwi Yehoba Lesa wenu.+ Kechi mukengijishe mubeji wa ñombe wenu nangwa kutenda boya bwa mubeji wa mikooko yenu ne. 20 Pa mwaka pa mwaka, anweba ne ba mu nzubo yenu mukamujiilenga kwi Yehoba Lesa wenu mu mpunzha yo akasala Yehoba.+ 21 Bino inge kilema, wasabika meso nangwa bulema bukwabotu bwatama, kechi mukamutapishe kwi Yehoba Lesa wenu ne.+ 22 Mukamujiilenga mu mizhi* yenu, kabiji muntu wabula muzhilo ne wa muzhilo bonse bakonsha kujako byonkatu byo baja lupaala ne nsebula.+ 23 Bino kechi mwafwainwa kuja mashi anji ne;+ mwafwainwa kwiechila panshi nobe mema.+
16 “Mukavulukenga ñondo wa Abibi* ne kwikala na Kijiilo kya Lupitailo kwi Yehoba Lesa wenu,+ mambo mu ñondo wa Abibi, Yehoba Lesa wenu mo mo emufumishe mu Ijipita bufuku.+ 2 Kabiji mukatapishe mulambo wa Kijiilo kya Lupitailo kwi Yehoba Lesa wenu+ kufuma mu mikooko, bambuzhi ne bañombe+ mu mpunzha yo akasala Yehoba mwa kwikala jizhina janji.+ 3 Kechi mukamujiile pamo na kintu kiji na mbizho ne;+ mukajenga bashinkwa babula mbizho pa moba atanu na abiji, ko kuba’mba bashinkwa ba lumanamo, mambo mwafumine mu kyalo kya Ijipita lubilo.+ Mukoobenga kino moba onse o mukekala na bumi pa kuba’mba mukavulukenga juba jo mwafumine mu kyalo kya Ijipita.+ 4 Pa moba atanu na abiji,+ kechi mwafwainwa kwikala na muvuba uji na mbizho mu nyaunda yenu yonse ne, kabiji nyama ye mukatapisha mabanga pa juba jitanshi nyama yanji kechi yafwainwa kwikala bufuku bonse kufika ne lukelo ne.+ 5 Kechi bakemuswisha kutapisha mulambo wa Kijiilo kya Lupitailo mu muzhi yense ye abena kwimupa Yehoba Lesa wenu ne. 6 Bino mukamutapishishenga mu mpunzha yo akasala Yehoba Lesa wenu mwa kwikala jizhina janji. Mwafwainwa kutapisha mulambo wa Kijiilo kya Lupitailo mabanga aku juba jizhikatu,+ pa kyonkakya kimye kyo mwafuminemo mu Ijipita. 7 Mukeiteke ne kwiijiila+ mu mpunzha yo akasala Yehoba Lesa wenu,+ kabiji lukelo mukabwele ku matente enu. 8 Mukajenga bashinkwa babula mbizho pa moba atanu na jimo, kabiji pa juba ja butanu na bubiji kukekale kubuñana kwazhila kwi Yehoba Lesa wenu. Kechi mukengilenga mwingilo nangwa umo ne.+
9 “Mukabale milungu itanu na ibiji. Mukatatwile kubala milungu itanu na ibiji kufuma pa juba jitanshi jo mukatendeka kunowa kajo.+ 10 Apa bino, mukekale na Kijiilo kya Milungu kwi Yehoba Lesa+ wenu kabiji mukalambulenga milambo ya kwifuukwila monkatu mwayila bibusa byo akemubila Yehoba Lesa wenu.+ 11 Kabiji mukasangalalenga kwi Yehoba Lesa wenu, anweba, mwanenu wa mulume ne mwanenu wa mukazhi, muzha wenu wa mulume ne wa mukazhi, mwina Levi wikala mu mizhi* yenu, muntu wafuma ku kyalo kingi, mwana wabula bashanji* ne mwanamukazhi wafwilwa bo mwikala nabo, monka mu mpunzha yo akasala Yehoba Lesa wenu mwa kwikala jizhina janji.+ 12 Vulukai’mba mwajinga bazha mu Ijipita,+ kabiji mukalamenga ne kulondela ano malamuna onse.
13 “Mukekalenga na Kijiilo kya Mimba*+ pa moba atanu na abiji byo mukabungizhanga kajo ka pa kipujilo ne manyi ne binyu bya mu bya kufiinamo. 14 Mukasangalalenga kimye kya kijiilo kyenu,+ anweba, mwanenu wa mulume ne mwanenu wa mukazhi, muzha wenu wa mulume ne wa mukazhi, mwina Levi, muntu wafuma ku kyalo kingi, mwana wabula bashanji ne mwanamukazhi wafwilwa bekala mu mizhi yenu. 15 Mukekalenga na kijiilo moba atanu na abiji+ kwi Yehoba Lesa wenu mu mpunzha yo akasala Yehoba, mambo Yehoba Lesa wenu ukapesha kajo kenu konse ne bintu byonse byo muba,+ kabiji mukasangalalanga bingi.+
16 “Bimye bisatu mu mwaka, banabalume bonse bafwainwa kwiya kwi Yehoba Lesa wenu mu mpunzha yo akasala: pa Kijiilo kya Bashinkwa Babula Mbizho,+ pa Kijiilo kya Milungu+ ne pa Kijiilo kya Mimba,*+ kafwako muntu nangwa umo mwi abo wafwainwa kwiya kwi Yehoba mabokotu ne. 17 Muntu yense akapane bupe monkatu mwayila bibusa byo emubila Yehoba Lesa wenu.+
18 “Mukatongole bamitonyi+ ne bantangi ba mikoka mu mizhi* yonse Yehoba Lesa wenu yo akemupa, ne abo bafwainwa kuchibilanga bantu mambo abo monka mo aolokela. 19 Kechi mukachibilenga mambo mungi,+ nangwa kuba misalululo,+ nangwa kutambula mazhikakanwa ne, mambo mazhikakanwa akonsha kutwala mungi bamitonyi ba maana+ kabiji akonsha kutwala mungi milanguluko ya muntu waoloka. 20 Bunchibamambo bwaoloka, bo bonkatu bo mwafwainwa kulondela+ pa kuba’mba mukatwajijile kwikala na bumi ne kutambula kyalo Yehoba Lesa wenu kyo abena kwimupa.
21 “Kange mukasumpe kichi* kya mulumbulumbu+ nangwa kimo kwipi na kya kusokelapo bitapisho kya Yehoba Lesa wenu kyo mukashimika ne kwikipopwela ne.
22 “Kabiji kange mukeimikile jishiki jazhila,+ kintu kyo ashikwa Yehoba Lesa wenu ne.
17 “Kange mukatapishe ñombe nangwa mukooko uji na bulema nangwa uji na lukatazho lukwabo kwi Yehoba Lesa wenu ne, mambo kikekala kintu kya bunya kwi Yehoba Lesa wenu.+
2 “Mu mizhi yenu yonse yo abena kwimupa Yehoba Lesa wenu, umvwe mukatanwe mwanamulume nangwa mwanamukazhi ubena kuba bintu byatama ku meso a Yehoba Lesa wenu ne kuzhilulula lulayañano lwanji,+ 3 kabiji waya mungi ne kutatula kupopwela balesa bangi ne kulambila juba nangwa ñondo nangwa bintu byonse bya mwiulu,+ kintu kyo nabujile kwimukambizha.+ 4 Umvwe bemubuula nangwa mwaumvwatu kya kumvwa, mukakebekebe bulongo bishinka pa oo mambo. Umvwe kyatanwa’mba kya kine,+ akyo kintu kya bunya kyaubiwe mu Isalela, 5 awo mwanamulume nangwa mwanamukazhi wauba kyo kyo kintu kyatama mwafwainwa kumuleta ku kibelo kya muzhi, kabiji awo mwanamulume nangwa mwanamukazhi bakamwase mabwe akafwe.+ 6 Bafwainwa kumwipaya umvwe bamushinawina ku bakamonyi babiji nangwa basatu.+ Bino kechi bakamwipaye umvwe bamushinawina ku kamonyi umotu ne.+ 7 Bakamonyi bo bafwainwa kutatwilapo kumwasa mabwe kuba’mba afwe, apa bino ke bantu bonse. Mwafwainwa kufumya kintu kyatama mukachi kenu.+
8 “Umvwe mu muzhi wenu umo mwaikala mambo a kwichila mashi+ nangwa a bantu babena kwikatazha nangwa a kupumañana nangwa mambotu akwabo a kwitobosha emukatazha kuchiba, mukemane ne kuya ku mpunzha yo akasala Yehoba Lesa wenu.+ 9 Mukaye ku bañanga bena Levi ne ku mutonyi+ ukachibanga mambo mo oa moba, kabiji mukebepuzhe ne abo bakemubuula mwa kwiachibila.+ 10 Kabiji mwafwainwa kuba byonka byo bakemubuula mu mpunzha yo akasala Yehoba. Mukatesheko muchima kuba byonse byo bakemukambizha. 11 Mwafwainwa kubila monka mwayila muzhilo ye bakemubuula, ne mwa kuchibila mambo mo bakemubuujila.+ Kechi mukalengulule mo bakemubuujila mwa kwiachibila, nangwa kuya ku kilujo nangwa ku kipiko ne.+ 12 Awa muntu uketota ne kubula kumvwina ñanga wingijila Yehoba Lesa wenu nangwa mutonyi, bafwainwa kumwipaya.+ Mukafumye kintu kyatama mu Isalela.+ 13 Bantu bonse bakomvwa kino ne kuba moyo kabiji kechi bakabwezhapo kwitota ne.+
14 “Byo mukatwela mu kyalo kyo abena kwimupa Yehoba Lesa wenu ne kwikitambula ne kwikalamo, inge mukambe’mba, ‘Twayai twitongwele mfumu wetu byonka biji bisaka bya bantu byonse bituzhokoloka,’+ 15 mukatongole mfumu yenka Yehoba Lesa wenu ye akasala.+ Mukatongole mfumu kufuma mu balongo benu. Kange mukatongole muntu ungi wabula mulongo wenu ne. 16 Nangwa byonkabyo, kechi akevuzhizhe bambili+ nangwa kulengela bantu kubwela ku Ijipita kuba’mba akekale na bambili bavula ne,+ mambo Yehoba wimubuujile’mba, ‘Kechi mwafwainwa kubwela ku Ijipita ne.’ 17 Kabiji kechi akevuzhizhe bakazhi ne, pa kuba’mba muchima wanji akabule kuya mungi;+ kabiji kange akevuzhizhe siliva ne ngolode ne.+ 18 Byo akekala pa jitanda ja bufumu bwanji, akekopolwele mu buku ino Mizhilo kufuma mu buku* uji na bañanga bena Levi.+
19 “Kabiji akekale nanji ne kutangangamo moba onse a bumi bwanji,+ pa kuba’mba akafunde kwakamwa Yehoba Lesa wanji ne kulama byambo byonse bya mu ino Mizhilo ne kulondela ano malamuna.+ 20 Onkao mambo, muchima wanji kechi uketumbijika pa balongo banji ne, kabiji kechi ukalengulula mikambizho ne kusendukila ku kilujo nangwa ku kipiko ne, pa kuba’mba akekale pa bufumu bwanji moba avula, aye ne baana banji mukachi ka bena Isalela.
18 “Bañanga bena Levi ne mukoka yense wa bena Levi kechi bakekala na kya kwibabilapo nangwa kya buswanyi mu bena Isalela ne. Bakajanga milambo ya Yehoba ya kusoka pa mujilo, byo bya buswanyi byabo.+ 2 Onkao mambo, kechi bakekala na kya buswanyi mukachi ka balongo babo ne. Yehoba ye kya buswanyi kyabo byonkatu byo ebambijile.
3 “Abino byo bintu bikekala bya bañanga byo bakatambulanga ku bantu: Muntu yense ukatapisha ñombe mulume nangwa mukooko, akapane kuboko, mubanga ne bya munda kwi ñanga. 4 Kabiji mwafwainwa ne kumupa kajo kenu ka nsomo, binyu byenu bya katataka, manyi enu ne boya butanshi bo mukatenda kufuma ku mikooko yenu.+ 5 Yehoba Lesa wenu wasala mwina Levi ne baana banji mu mikoka yenu yonse kuba’mba bengijilenga mu jizhina ja Yehoba kimye kyonse.+
6 “Bino umvwe mwina Levi wafuma mu muzhi wenu wa mu Isalela mo aikalanga+ kabiji aye* wafuukulapo kuya ku mpunzha yo akasala* Yehoba,+ 7 wakonsha kwingijila konkakwa mu jizhina ja Yehoba Lesa wanji byonkatu bingila balongo banji bonse bena Levi bengijila konkakwa ku meso a Yehoba.+ 8 Ukatambulanga kajo kantutu kamo ne abo,+ kununga pa byo akamwenamo pa kupotesha bintu bya mu kisemi.
9 “Byo mukatwela mu kyalo kyo abena kwimupa Yehoba Lesa wenu, kechi mukafunde kuba bintu bya bunya byuba byobya bisaka ne.+ 10 Mwi anweba kechi mukatanwe muntu nangwa umo ukasoka* mwananji wa mulume nangwa mwananji wa mukazhi mu mujilo ne,+ nangwa uponga,+ nangwa ñanga+ wa bisoko nangwa muntu yense uba bya lubuko+ nangwa mulozhi ne.+ 11 Kabiji kechi mukatanwe muntu uta bakwabo bwanga nangwa wipuzha muntu wisamba na mipashi+ nangwa wamba bikamweka kulutwe+ nangwa wisamba na bafu ne.+ 12 Mambo muntu yense uba bino bintu ye wa bunya kwi Yehoba, kabiji na mambo a bino bintu bya bunya Yehoba Lesa wenu kyo kyo abena kwibapangilamo kufuma kwi anweba. 13 Anweba mwafwainwa kwikala babula mambo kwi Yehoba Lesa wenu.+
14 “Mambo bino bisaka byo mukashinda byaumvwinanga bañanga ba lubuko+ ne baponga,+ bino Yehoba Lesa wenu kechi wimuswisha kuba bintu bya uno mutundu ne. 15 Yehoba Lesa wenu ukemutongwela ngauzhi uji nobe amiwa kufuma mu balongo benu. Mwafwainwa kumumvwina.+ 16 Kikekala bino na mambo a kyo mwalombele kwi Yehoba Lesa wenu ku Holeba juba jo mwabuñene*+ ne kwamba’mba, ‘Kechi mwituleke tumvwe jiwi ja Yehoba Lesa wetu nangwa kumona jibiji mujilo mukatampe ne, kuchina’mba twakafwa.’+ 17 Kepo Yehoba añambijile’mba, ‘Kintu kyo baamba kijitu bulongo. 18 Nkebatongwela ngauzhi uji nobe obewa kufuma mu balongo babo,+ kabiji nkabika byambo byami mu kanwa kanji+ ne aye ukebabuula bintu byonse byo nkamukambizha.+ 19 Kine nkatotolwesha muntu ukabula kumvwina byambo byami byo akamba mu jizhina jami.+
20 “‘Umvwe ngauzhi yense aketote ne kwambila mu jizhina jami ye nabujile kukambizha kwamba nangwa ukambila mu jizhina ja balesa bangi, awo ngauzhi wafwainwa kufwa.+ 21 Nangwa byonkabyo, inge mukeshikishe mu michima yenu amba: “Tukayuka byepi amba Yehoba kechi ye waamba bino byambo ne?” 22 Umvwe ngauzhi akambile mu jizhina ja Yehoba ne byo byo byambo bikabule kufika nangwa byabula kwikala bya kine, ko kuba’mba Yehoba kechi ye waambile byo byo byambo ne. Awo ngauzhi waambile na mambo a bwitote. Kechi mukamuchine ne.’
19 “Yehoba Lesa wenu byo akonauna bisaka biji mu kyalo kyo abena kwimupa Yehoba Lesa wenu, kabiji byo mukebashinda ne kwikala mu mizhi yabo ne mu mazubo abo,+ 2 mukasalemo mizhi isatu mu kyalo kyenu kyo abena kwimupa Yehoba Lesa wenu kwikala ke kyenu.+ 3 Mukabanyemo manyaunda asatu mu kyalo kyo abena kwimupa Yehoba Lesa wenu kwikala ke kyenu, kabiji mukalenge jishinda ja kunyemenamo muntu waipayañana pa kunyemena ku muzhi umo pa yo yo mizhi.
4 “Abino byo byo kikekala ku muntu waipayañana ukanyemena kokwa pa kuba’mba akekale na bumi: Umvwe waipaya mukwabo kya mapuso kabiji kechi wamushikilwe ne;+ 5 kabiji inge waya na mukwabo mungye na kuchaba nkunyi ne kusuntula kapasa kuba’mba ateme lukunyi, ne kapasa kazokoka mu mupinyi kateeta mukwabo ne aye wafwa, waipayañana akanyemene mu muzhi umo pa yoya mizhi pa kuba’mba akekale na bumi.+ 6 Mambo inge ne, na mambo a bukaji,* muntu ushinkanya na mambo a mashi,+ ukamupupila awo muntu waipayañana ne kumutaana ne kumwipaya mambo muzhi wajinga palepa. Nangwa byonkabyo, kechi wafwainwa kufwa ne, mambo kechi washikilwe mukwabo ne.+ 7 O ene mambo o nemukambizhizha namba: ‘Mukasalemo mizhi isatu.’
8 “Umvwe Yehoba Lesa wenu akemubayishishe nyaunda yenu byonka byo achipile ku bashakulu benu,+ kabiji akemupe ne kyalo kyonse kyo alayile kupa bashakulu benu,+ 9 mukalamenga mu bukishinka ino mikambizho yonse yo mbena kwimupa lelo jino, ne kutemwa Yehoba Lesa wenu ne kwenda mu mashinda anji kimye kyonse,+ mukanungepo mizhi ikwabo isatu pa yoya isatu.+ 10 Umvwe mwauba kino, kafwako mashi abula mambo o bakechila+ mu kyalo kyo abena kwimupa Yehoba Lesa wenu kwikala kya buswanyi ne, kabiji kechi mukekala na mambo a mashi ne.+
11 “Pakuba umvwe muntu washikwa mukwabo+ ne kumubelamina kabiji wamukozha ne aye wafwa, ne yewo muntu wanyemena ku muzhi umo wa mu yoya mizhi, 12 bakulumpe ba mu muzhi wanji bakamwite kufuma kokwa ne kumupana ku muntu ushinkanya na mambo a mashi kabiji wafwainwa kufwa.+ 13 Kechi mukamubile lusa ne, mukafumye mu Isalela alwa luzhachisho lwaiya na mambo a kwichila mashi abula mambo,+ kuba’mba mukamonenga byawama.
14 “Byo mukatambula mpunzha mu kyalo Yehoba Lesa wenu kyo abena kwimupa kwikala kyenu, kechi mwafwainwa kutuntulula mupaka+ wa mukwenu kufuma pajinga mupaka wachibile bashakulu ne.
15 “Kamonyi umo kechi wakonsha kushinawina* mukwabo pa mambo nangwa pa bubi bo aubile ne.+ Mu byambo bya bakamonyi babiji nangwa basatu mambo mo mo akalumbulukila.+ 16 Umvwe kamonyi wa bujimbijimbi washinawina mukwabo ne kumupamo mambo,+ 17 bonse babiji babena kwitobosha bakemane ku meso a Yehoba, ku bañanga ne ku bamitonyi bakekalako mu oo moba.+ 18 Bamitonyi bakakebekebe bulongo bishinka,+ kabiji umvwe awo muntu washinawijilenga mukwabo kyatanwa’mba kamonyi wa bubela kabiji wamupelemo mulongo wanji mambo a bubela, 19 mukamube byonka byo akebelenga kuba mulongo wanji,+ kabiji mukafumye kintu kyatama mukachi kenu.+ 20 Aba bashala bakomvwa ne kuba moyo, kabiji kechi bakabwezhapo kuba kintu kyatama nabiji kino mukachi kenu ne.+ 21 Anweba* kechi mukamubile lusa ne:+ Bumi* mukebupane pa bumi* bukwabo, wasaba mukwabo jiso naye bakamusabe jiso, wazokola mukwabo jiino naye bakamuzokole jiino, wachimuna mukwabo kuboko naye bakamuchimune kuboko, wachimuna mukwabo kulu naye bakamuchimune kulu.+
20 “Umvwe mwaya na kulwa nkondo na balwanyi benu kabiji mwamona amba bambili, makalaki ne bashilikale babo bavula kwimukila, kange mukebachine ne, mambo Yehoba Lesa wenu yenka wimufumishe mu kyalo kya Ijipita uji ne anweba.+ 2 Umvwe kimye kya kulwa nkondo kyafwenya pepi, ñanga akeye ku bantu na kwibabuula.+ 3 Akebabuule’mba, ‘Umvwai anweba bena Isalela, mubena kuya na kulwa nkondo na balwanyi benu. Kange muzumbe ne. Kabiji kange muchine nangwa kuba moyo nangwa kuzakama na mambo a abo ne, 4 mambo Yehoba Lesa wenu usakuya ne anweba ne kwimulwilako ku balwanyi benu ne kwimupokolola.’+
5 “Bantangi nabo bakashikishe bantu amba, ‘Ñanyi washimika nzubo ya katataka kabiji ukyangye kuvilukilamo?* Abwele ku nzubo yanji. Mambo inge ne, wakonsha kufwila mu nkondo ne muntu mukwabo ukavilukilamo. 6 Kabiji ñanyi wajima bujimi bwa miñanzañanza kabiji ukyangye kutendeka kujako ku bipangwa? Abwele ku nzubo yanji. Mambo inge ne, wakonsha kufwila mu nkondo ne muntu mukwabo ukaja ku bipangwa. 7 Kabiji ñanyi waipanguzha mwanamukazhi kabiji ukyangye kumusongola? Abwele ku nzubo yanji.+ Mambo inge ne, wakonsha kufwila mu nkondo ne muntu mukwabo ukamusongola.’ 8 Kabiji bantangi bakashikishe bantu jikwabo amba, ‘Ñanyi uji na moyo kabiji wazumba?+ Abwele ku nzubo yanji, pa kuba’mba abule kulefula michima ya balongo banji byonka byo aji aye.’*+ 9 Bantangi byo bakapwisha kubuula bantu, bakatongole bakulumpe ba pa bashilikale ba kutangijila bantu.
10 “Byo mukafika kwipi na muzhi ye musaka kulwa nanji, mwafwainwa ne kumutayila mbila ya mutende.+ 11 Umvwe bakemukumbule mu mutende ne kwimushinkwilako, ko kuba’mba bantu bonse bo mukataanamo bakekala benu bakwingila mingilo ya buzha kabiji bakemwingijilanga.+ 12 Bino umvwe bakakane kumvwañana ne anweba mu mutende, bino bakakebe amba balwe ne anweba, awo muzhi mukamuzhokoloke, 13 ne Yehoba Lesa wenu ukamupana mu maboko enu kabiji banabalume bonse ba mu yewo muzhi mukebepaye na mpoko. 14 Nangwa byonkabyo, banabakazhi, baana, bilelwa ne bintu byonse biji mu yewo muzhi, bipukulwa byonse mukebisende,+ kabiji mukaje bipukulwa bya balwanyi benu bo akemupa Yehoba Lesa wenu.+
15 “Abino byo byo mukoba ku mizhi yonse iji kwalepa ne anweba yabula mizhi ya bino bisaka biji kwipi. 16 Bino mu mizhi ya bano bantu Yehoba Lesa wenu yo abena kwimupa kwikala buswanyi bwenu, kechi mukapulushemo kintu nangwa kimo kiji na bumi ne.+ 17 Mukebonaunetu bonse pelu, bena Hiti, bena Amoli, bena Kenana, bena Pelizi, bena Hivi ne bena Yebusi+ byonkatu Yehoba Lesa wenu byo emukambizhe; 18 pa kuba’mba bakabule kwimufunjisha kulondela byubilo byabo bya bunya, byo bobila balesa babo ne kwimulengela kumulenga mambo Yehoba Lesa wenu.+
19 “Umvwe mukamuzhokoloke muzhi ne kumushinda byo mukalwa nabo moba avula, kange mukateme bichi na tupasa ne. Mwakonsha kujako, bino kechi mukebiteme ne.+ Mambo ka o mwafwainwa kulukukila kichi kya mu bujimi byonkatu byo muba na muntu? 20 Mwakonsha kutematu kichi kyo mwayuka’mba kechi kipanga bipangwa bya kuja ne. Mwakonsha kwikitema ne kushimikako nsakwa ku muzhi ubena kulwa nkondo ne anweba kufikatu ne byo mukashinda.
21 “Umvwe mukataane muntu ye baipayila mungye mu kyalo kyo abena kwimupa Yehoba Lesa wenu kwikala ke kyenu, ne wamwipaya kechi wayukanyikwa ne, 2 bakulumpe benu ne bamitonyi+ bakaye na kupima bula buji pa mizhi yazhokoloka paji mubiji wa muntu wafwa. 3 Kabiji bakulumpe baji mu muzhi uji kwipi na paji mubiji wa muntu wafwa, bakasende mwana ñombe ye bakyangye kwingijishapo nangwa kuvwikapo kikonkoji, 4 kabiji bakulumpe ba mu yewo muzhi bakatwale mwana ñombe ku kimpachiko* kiji na mema abena kupita, ko bakyangye kujimapo nangwa kubyala nkunwa ne, ne mwana ñombe bakamuchimwine nshingo konkakwa ku kimpachiko.+
5 “Kabiji bañanga bena Levi bakeye kwipi, mambo Yehoba Lesa wenu wibasala kuba’mba bamwingijilenga+ ne kupesha mu jizhina ja Yehoba.+ Bakamba mwa kupwishisha lutobo lonse lwa mambo a bukapondo.+ 6 Kabiji bakulumpe bonse ba mu yewo muzhi uji kwipi na mubiji wa muntu wafwa, bakowele ku maboko+ peulu ya mwana ñombe ye bakachimwina nshingo konkakwa ku kimpachiko, 7 kabiji bakambe’mba, ‘Maboko etu kechi o aichijile ano mashi ne, ne meso etu kechi amwene byo aichikile ne. 8 Anweba Yehoba, kange mwibapemo mambo bantu benu bena Isalela bo mwakuujile ne,+ kabiji kange muleke luzhachisho lwa mashi abula mambo lwikale pa bantu benu bena Isalela ne.’+ Onkao mambo, kechi bakazhatwa na mambo a mashi ne. 9 Inge mwauba kino, mukafumyamo luzhachisho lwa mashi abula mambo mukachi kenu kupichila mu kuba bintu byaoloka ku meso a Yehoba.
10 “Umvwe mwaya ku nkondo na kulwa na balwanyi benu ne Yehoba Lesa wenu wimushinjilabo, ne anweba mwi basenda mu buzha,+ 11 kabiji mu bantu bo mwasenda mu buzha mwamonamo mwanamukazhi walamba kabiji mwamukomoka ne kukeba kumusongola, 12 mwakonsha kumuleta mu nzubo yenu. Ne aye akatende nsuki ne kusemba ngala yanji, 13 kabiji akavuule bivwalo byanji bya buzha ne kwikala mu nzubo yenu. Akajile bashanji ne bainanji ñondo umo,+ apa bino, mukalaale nanji; obewa ukekala mwatawanji ne aye ukekala mukazhobe. 14 Bino umvwe ukabule kumutemwa, ukamuleke akaye+ konse ko akakeba* kuya. Pano bino, kechi wafwainwa kumupotesha na mali, nangwa kumuyanjisha ne, mambo wamulengesha bumvu.
15 “Umvwe mwanamulume wasongola banabakazhi babiji, kabiji watemwapo umo kukila mukwabo,* ne mu bano bonse babiji wasemenamo baana ba balume, ne mubeji wamusemena mu yewa ye abula kutemwa,+ 16 pa juba jo akapananga bya buswanyi ku baana banji ba balume, kechi akapane bya bubeji ku mwana wa yewa ye atemwa byo afwainwa kupa mubeji wa yewa ye abula kutemwa ne. 17 Akavulukenga amba mwana wa yewa ye abula kutemwa ye mubeji, kabiji akamupe bibiji bibiji pa bintu byonse byo aji nabyo, mambo yo ntendekelo ya bulume bwanji bwa kusema. Kabiji ye uji na luusa lwa bubeji.+
18 “Umvwe muntu uji na mwana wa mulume ubula kumvwa, wa milengulwila, kabiji kechi ukookela bashanji nangwa bainanji ne,+ ne abo baeseka kumololako bino kechi wibomvwina ne,+ 19 bashanji ne bainanji bakamukwate ne kumutwala ku bakulumpe baji ku kibelo kya muzhi ye ekalamo. 20 Kabiji bakabuule bakulumpe ba mu muzhi ye ekalamo amba, ‘Uno mwanetu kechi umvwa ne, uji na milengulwila kabiji kechi witukookela ne. Ye kiji+ kabiji kitomi.’+ 21 Bangikazhi bonse ba mu muzhi bafwainwa kumwasa mabwe akafwe. Onkao mambo, mwafwainwa kufumya kintu kyatama mukachi kenu, kabiji bena Isalela bonse bakomvwa ne kuba moyo.+
22 “Umvwe muntu walenga mambo a kumwipayilapo kabiji bamwipaya,+ ne anweba mwamukobeka pa kichi,+ 23 mubiji wanji kechi akalaale bufuku bonse pa kichi ne.+ Mwafwainwa kumuzhiika pa jonkajo juba, mambo muntu ye bakobeka pa kichi ye wafingwa kwi Lesa,+ kabiji kechi mwafwainwa kuzhilulula kyalo Yehoba Lesa wenu kyo abena kwimupa kwikala buswanyi bwenu ne.+
22 “Umvwe wamona ñombe mulume wa mukwenu nangwa mukooko wanji ubena kuya kungi, kechi ukamuleketu ne.+ Ukamubwezhe ku mukwenu. 2 Pakuba awo muntu inge wikala kwalepa, nangwa kechi wamuyuka ne, ukasende yewo nyama ku nzubo yobe, ukamulame kufikatu ne kimye mwine kyo akamukeba. Kepo ukamubwezha kwi aye.+ 3 Abino byo byo ukooba ne na mbongolo wanji, na kivwalo kyanji ne na kintu kyonse kya mukwenu kikeleka kyo ukataana. Kechi ukekileketu ne.
4 “Umvwe wataana mbongolo wa mukwenu nangwa ñombe wanji wapona mu jishinda, kechi ukamuleketu ne. Ukamukwasheko kwimanya nyama wanji.+
5 “Mwanamukazhi kechi akavwale kivwalo kya mwanamulume ne, kabiji mwanamulume naye kechi akavwale kivwalo kya mwanamukazhi ne. Mambo yense uba kino ye wa bunya kwi Yehoba Lesa wenu.
6 “Umvwe wataana kinsa kya kañonyi ku jishinda paji twana nangwa make, nangwa kiji ku kichi nangwa panshi, ne inabo wafukamina twana twanji nangwa make, kechi wafwainwa kusenda inabo pamo na twana twanji ne.+ 7 Ukaleke inabo akaye, bino ukasendeko twana. Ukoobe kino pa kuba’mba ukamone byawama ne kwikala myaka yavula.
8 “Umvwe washimika nzubo ya katataka, wafwainwa kuzhokoloshako ka lupango peulu ya musemi,+ pa kuba’mba ukabule kwikala na mambo a mashi umvwe muntu wapona kufuma peulu.
9 “Kechi ukabyale nkunwa ya mitundu ibiji mu bujimi bobe bwa miñanzañanza ne.+ Mambo inge wauba bino, kajo konse kakafuma mu nkunwa yo ukabyala ne mañanzañanza bikekala bya ku nzubo yazhila.
10 “Pa kujima, kechi ukakase ñombe ne mbongolo pamo ne.+
11 “Kechi ukavwale kivwalo kyo bapikula na boya bwapatakana na kisapi kya linenyi ne.+
12 “Ukabike nsenkebele yalepa kuzhokolosha kivwalo kyo ukavwalanga.+
13 “Umvwe mwanamulume akasongole mwanamukazhi ne kulaala nanji, kabiji kulutwe wamushikwa* 14 ne kumupamo mambo amba uji na byubilo byatama ne kumutamishisha jizhina janji pa kwamba’mba: ‘Nasongwele uno mwanamukazhi, bino byo nalaajile nanji kechi namutaaine na kayukilo ka kumwesha’mba kisungu ne.’ 15 Bashanji ne bainanji yewo nsongwakazhi bakalete kayukilo ka kumwesha’mba awo nsongwakazhi wajinga kisungu ku bakulumpe konka ku kibelo kya muzhi. 16 Kabiji bashanji yewo nsongwakazhi, bafwainwa kubula bakulumpe amba, ‘Nasongweshe mwanami ku uno mwanamulume, bino aye wamushikwa* 17 kabiji wamupamo mambo amba uji na byubilo byatama ne kwamba’mba: “Mwanenu kechi namutaaine na kayukilo ka kumwesha’mba kisungu ne.” Pano kano ko kayukilo ka kumwesha’mba mwanami wajinga kisungu.’ Kabiji bakavungulule kisapi ku meso a bakulumpe ba mu muzhi. 18 Bakulumpe ba mu muzhi+ bakasende uno mwanamulume ne kumukambula.+ 19 Bakamulipilishe mashekele* a siliva 100 ne kupa bashanji yewo nsongwakazhi, mambo awo mwanamulume watamisha jizhina ja kisungu wa mu bena Isalela,+ kabiji ukatwajijila kwikala mukazhanji. Kabiji moba onse a bumi bwanji kechi bakamuswisha kumukana ne.
20 “Pakuba umvwe kyatanwa’mba mambo o babena kumupamo a kine, kabiji kechi paji kayukilo ka kumwesha’mba awo nsongwakazhi wajinga kisungu ne, 21 bakalupwile uno nsongwakazhi ku kibelo kya nzubo ya bashanji kabiji bantu ba mu muzhi bakamwase mabwe kuba’mba afwe, mambo waubile kintu kya bunya+ mu Isalela byo aubile bulalelale* saka akiji mu nzubo ya bashanji.+ Onkao mambo, mwafwainwa kufumya kintu kyatama mukachi kenu.+
22 “Umvwe mwanamulume bamutana saka alaala na muka bene, bonse babiji bafwainwa kwibepaya, mwanamulume ne mwanamukazhi ye alaala nanji.+ Onkao mambo, mwafwainwa kufumya kintu kyatama mu Isalela.
23 “Umvwe kisungu ye baipanguzha bamutaana ku mwanamulume ungi mu muzhi kabiji wilaala nanji, 24 bonse babiji mukebalete ku kibelo kya muzhi ne kwibasa mabwe kuba’mba bafwe, na mambo a kuba nsongwakazhi kechi watamine muteto mu muzhi ne, ne mwanamulume na mambo a kuba watamisha muka mukwabo.+ Onkao mambo, mwafwainwa kufumya bubi mukachi kenu.
25 “Pakuba umvwe mwanamulume wataaine mungye uno nsongwakazhi ye baipanguzha wamukwata ne kumukila bulume kabiji wilaala nanji, uno mwanamulume walaajile nanji bakamwipaya bunke bwanji, 26 bino nsongwakazhi kechi mukamube kintu nangwa kimo ne. Nsongwakazhi kechi walengele mambo a kumwipayilapo ne. Ano mambo ajitu pamo na mambo a mwanamulume walukuka mukwabo ne kumwipaya.+ 27 Mambo wamutaaine mungye kabiji awo nsongwakazhi ye baipanguzha watamine muteto, bino kechi kwajinga muntu wa kumupokololako ne.
28 “Umvwe mwanamulume wataana kisungu ye babula kwipanguzha kabiji wamukwata ne kwilaala nanji, ne mambo abo ayukanyikwa,+ 29 awo mwanamulume wilaajile nanji akapane mashekele a siliva 50 ku bashanji yewo nsongwakazhi kabiji ukekala mukazhanji.+ Mambo wamutamishe kabiji moba onse a bumi bwanji kechi bakamuswisha kumukana ne.
30 “Kafwako muntu nangwa umo wafwainwa kusongola ba muka bashanji ne, pa kuba’mba akabule kulengesha bashanji* bumvu.+
23 “Kafwako mwanamulume ye bashiba byendelwa nangwa ye bachiba kya bulume wafwainwa kutwela mu kipwilo kya Yehoba ne.+
2 “Kafwako mwana wa mu bukende wafwainwa kutwela mu kipwilo kya Yehoba ne.+ Kabiji kafwako nangwa umo wa mu kisemi kyanji kya kulutwe kya bujikumi wafwainwa kutwela mu kipwilo kya Yehoba ne.
3 “Kafwako mwina Amonyi nangwa mwina Moabu wafwainwa kutwela mu kipwilo kya Yehoba ne.+ Kabiji kafwako nangwa umo wa mu bisemi byabo bya kulutwe bya bujikumi wafwainwa kutwela mu kipwilo kya Yehoba ne, 4 mambo abo kechi bemupelepo kajo ne mema byo mwafuminenga ku Ijipita ne,+ kabiji baichile Balamu mwana wa kwa Beola kufuma ku Petola wa ku Mesopotamya kuba’mba emufinge.*+ 5 Bino Yehoba Lesa wenu wakaine kuteleka kwi Balamu.+ Pakuba Yehoba Lesa wenu waalwile mafingo kwikala ke mapesho pe anweba,+ mambo Yehoba Lesa wenu wimutemwa.+ 6 Kechi mukebakwashe kuba’mba bakekale bulongo nangwa kunonka mu moba enu onse ne.+
7 “Kechi mukashikwe mwina Edomu ne, mambo ye mulongo wenu.+
“Kechi mukashikwe mwina Ijipita ne, mambo ne anweba mwajinga benyi mu kyalo kyanji.+ 8 Baana babo ba mu kisemi kya busatu bakakonsha kutwela mu kipwilo kya Yehoba.
9 “Byo mukekala mu kampu pa kuya na kulwa na balwanyi benu, kange mukoobe kintu kyatama* nangwa kimo ne.+ 10 Umvwe mwanamulume waikala wa muzhilo na mambo a kwitayila malume bufuku,+ akalupukile pangye ya kampu kabiji kechi akatwelemo jibiji ne. 11 Byo kikafika mabanga akowe na mema, apa bino akabwele mu kampu pa kuzhika juba.+ 12 Kabiji mukekale na mpunzha yafyamika* pangye ya kampu yo mukengijishanga, akwa ko ko mukayanga. 13 Kabiji mukekale na kabweya kununga pa byela byo muji nabyo. Kabiji umvwe mwaya na kupambuka pangye mukapoye ka kimbo na kabweya ne kuzhiika bincha byafuma munda mwenu. 14 Mambo Yehoba Lesa wenu upitañana mukachi ka kampu wenu+ na kwimupokolola ne kupana balwanyi benu mu maboko enu, kabiji kampu wenu wafwainwa kwikala wazhila+ kuchina’mba Lesa wakamonamo kintu kyabula kufwainwa mwi anweba ne kwimuvundamina.
15 “Kechi ukabwezhe muzha kwi nkambo yanji umvwe wabomboka nkambo yanji ne kwiya kwi obewa ne. 16 Mukekale nanji ku mpunzha konse ko akasala aye mwine mu mizhi yenu. Kange mukamuyanjishenga ne.+
17 “Kafwako mwana wa mukazhi nangwa mwana wa mulume mwina Isalela wafwainwa kwikala pite* ne.+ 18 Kabiji mali onse o bakalipila mwanamukazhi pite nangwa mwanamulume pite,* kechi mukealete mu nzubo ya Yehoba Lesa wenu kufikizha luchipo ne, mambo bonse babiji bo ba bunya kwi Yehoba Lesa wenu.
19 “Kechi mwafwainwa kukeba’mba mulongo wenu emupe nsubu+ pa mali nangwa pa kajo nangwa pa kintu kyonse muntu kyo akonsha kukebelapo nsubu ne. 20 Mwakonsha kukeba nsubu ku muntu ungi,+ bino kechi mukakebe’mba mulongo wenu emupe nsubu ne,+ pa kuba’mba Yehoba Lesa wenu akemupeshe mu mingilo yenu yonse yo mukengilanga mu kyalo kyo mubena kuya na kutambula kwikala kyenu.+
21 “Umvwe mwachipa luchipo kwi Yehoba Lesa wenu,+ kange mukabande kwilufikizha ne.+ Mambo Yehoba Lesa wenu ukakeba anweba kwilufikizha; inge ne, mukekala na mambo.+ 22 Bino umvwe mukabule kuchipa, kechi mukekala na mambo ne.+ 23 Mwafwainwa kufikizha bintu byo mwalayile,+ kabiji mwafwainwa kufikizha byo mwachipile kwikala mulambo wa kwifuukwila kwi Yehoba Lesa wenu.+
24 “Umvwe mukatwele mu bujimi bwa mukwenu bwa miñanzañanza, mwakonsha kujamo mañanzañanza kuba’mba mwikute, bino kange mukasendepo amo mu kipe kyenu ne.+
25 “Umvwe mukatwele mu bujimi bwa mukwenu bwa kajo, mwakonsha kuchimunamo na maboko enu mitwe ya kajo kapya, bino kechi mukengijishe kikwakwa mu kajo ka mukwenu ne.+
24 “Umvwe mwanamulume wasongola mwanamukazhi, bino kechi wamutemwa ne, na mambo a kuba’mba wamona mwi aye kintu kyatama, mwanamulume wafwainwa kumunembela kyete kya kwipala+ ne kumupakyo, ne kumupanga mu nzubo yanji.+ 2 Inge wafuma pa nzubo ya mwanamulume, wakonsha kusongolwa ku mwanamulume mukwabo.+ 3 Umvwe mwanamulume wa bubiji wamushikwa* ne kumunembela kyete kya kwikana ne kumupakyo, kabiji wamupanga mu nzubo yanji nangwa inge mwanamulume wa bubiji wamusongwele wafwa, 4 mwatawanji mutanshi wamupangile, kechi bakamuswisha kumubwezha ne, mambo a kuba bamutamisha kala, mambo kino kyo kintu kya bunya kwi Yehoba. Kechi mukalete bubi mu kyalo kyo abena kwimupa Yehoba Lesa wenu kwikala ke kyenu kya buswanyi ne.
5 “Umvwe mwanamulume po po asongolatu, kechi wafwainwa kwikala mu nzhita nangwa kumupa mingilo ikwabo ne. Wafwainwa kwikala mwaka umo kwa kubula kwingila kabiji akekale ku nzubo yanji ne kusangajika mukazhanji.+
6 “Kafwako muntu nangwa umo wafwainwa kwangata mpelo nangwa jibwe jo bapelelapo kwikala kintu kya kukwachilamo na mambo a nkongole* ne,+ mambo kino kintu kyo abena kukeba kukwachilamo, kyo kimukwasha.*
7 “Umvwe muntu bamutaana na kubombola mulongo wanji mwina Isalela kabiji wamuyanjisha ne kumupotesha,+ awo muntu wamubombola bafwainwa kumwipaya.+ Mwafwainwa kufumya kintu kyatama mukachi kenu.+
8 “Umvwe kukeye kikola kya mbumba,* mukatesheko muchima kulondela bintu byonse bikemukambizha bañanga bena Levi.+ Mukatesheko muchima kuba byonka byo nebakambizhe. 9 Vulukai kintu Yehoba Lesa wenu kyo aubile kwi Milyama mu jishinda byo mwafuminenga ku Ijipita.+
10 “Umvwe mukakongweshe mukwenu kintu,+ kange mukatwele mu nzubo yanji ne kusenda kintu kyo apana kwikala kya kukwachilamo ne. 11 Mukemanetu pangye kabiji muntu ye mwakongwesheshe akemuletele pangye kintu kyo akapana kwikala kya kukwachilamo. 12 Kabiji inge awo muntu wakajilwa, kechi mukalaale saka muji na kintu kya kukwachilamo kyo emupele ne.+ 13 Aku juba jizhikatu, mukamubwezhezhe kintu kyo emupele kya kukwachilamo, ne aye byo akalaala saka aji na kivwalo kyanji ukemupesha;+ ne anweba mukekala baoloka ku meso a Yehoba Lesa wenu.
14 “Kechi mwafwainwa kwingijisha bujimuku pa kufweta wa mwingilo wenu wakajilwa kabiji muyanji, nangwa mulongo wenu nangwa muntu wafuma ku kyalo kingi wikala mu kyalo kyenu monka mu mizhi* yenu ne.+ 15 Jonkajo juba mukamupe mfweto yanji,+ juba saka jikyangye kuzhika, mambo aye wakajilwa kabiji bwikalo bwanji bwaimenatu pa mfweto yanji. Mambo inge mwabula kuba kino, aye ukemujijila kwi Yehoba, ne anweba mukekala na mambo.+
16 “Bashabo kechi bafwainwa kufwa na mambo a bubi bwa baana babo ne, kabiji baana nabo kechi bafwainwa kufwa na mambo a bubi bwa bashabo ne.+ Muntu bafwainwa kumwipaya na mambo a bubi bwanji mwine.+
17 “Kechi mukachibile mungi mambo a muntu wafuma ku kyalo kingi nangwa mambo a mwana wabula bashanji* ne,+ kabiji kechi mukakwachilemo kivwalo kya mwanamukazhi wafwilwa ye muji nanji na nkongole ne.+ 18 Vulukai’mba mwajinga bazha mu Ijipita, kabiji Yehoba Lesa wenu wimukuujile kufuma momwa.+ O ene mambo o mbena kwimukambizhizha kuba kino.
19 “Byo mukanowanga kajo mu majimi enu, inge mwalubako kikuta kya kajo mu bujimi, kange mukabwele na kwikisenda ne. Mukekishe kikekale ke kya muntu wafuma ku kyalo kingi, kya mwana wabula bashanji ne mwanamukazhi wafwilwa,+ pa kuba’mba Yehoba Lesa wenu akemupeshe mu bintu byonse byo muba.+
20 “Byo mukakobolanga maolivi ku bichi byenu, kange mukabwelengako jibiji ku misampi na kukobola ne. Akashalako akekale a muntu wafuma ku kyalo kingi, mwana wabula bashanji ne mwanamukazhi wafwilwa.+
21 “Byo mukapanga mañanzañanza a mu bujimi bwenu bwa miñanzañanza, kechi mwafwainwa kubwelako na kwapa akashalako ne. Akekale a muntu wafuma ku kyalo kingi, mwana wabula bashanji ne mwanamukazhi wafwilwa. 22 Vulukai’mba mwajinga bazha mu kyalo kya Ijipita. O ene mambo o mbena kwimukambizhizha kuba kino.
25 “Umvwe bantu babiji babena kutoboka, bakaye ku bamitonyi+ ne abo bakebachibile mambo kabiji bakabingishe waoloka ne kuzhachisha mubi.+ 2 Umvwe kibena kukebewa amba mubi bamupume,+ mutonyi akamulaajike panshi kinkuvumene, kabiji bakamupume ne aye mutonyi saka amonako. Bikote byo bakamupuma bikesakane na bubi bo aubile. 3 Wakonsha kumupuma bikote 40,+ bino kechi akakizhepo ne. Umvwe akatwajijile kumupuma bikote byavula kukila pa bino, ukalengesha bumvu mulongo wanji.
4 “Kange mukakase ñombe ku kanwa kimye kyo abena kupuula kajo ne.+
5 “Umvwe bankasa ne kolo bekala pamo kabiji umo wafwa kwa kubula kusemapo mwana wa mulume, mukazhi wa yewo wafwa kechi akasongolwe ku muntu wa mu kisemi kingi ne. Bukwe bwanji akamuswane ne kumusongola kwikala ke mukazhanji.+ 6 Mubeji ye akasema bakamutumbe jizhina ja yewa wafwa,+ pa kuba’mba jizhina janji jikabule kuzhiya mu Isalela.+
7 “Pano umvwe mwanamulume wakana kusongola muka mulongo wanji wafwa, uno wafwilwa akaye ku bakulumpe konka ku kibelo kya muzhi ne kwibabuula amba, ‘Mulongo wa bamwata wami wakana kulama jizhina ja mulongo wabo mu Isalela. Wakana kunswana.’ 8 Kabiji bakulumpe ba mu muzhi bafwainwa kwita mwanamulume ne kwisamba nanji. Umvwe wakosapotu na kwamba’mba, ‘Kechi nkeba kumusongola ne,’ 9 uno muka mulongo wanji wafwilwa akafwenye kwi aye ne bakulumpe saka bamonako, akamuvuule nkwabilo ku kulu,+ akamushipile mate ku meso ne kumwambila’mba, ‘Abino byo byo bafwainwa kuba muntu wakana kusemena mulongo wanji mwana.’ 10 Kabiji jizhina* ja kisemi kyanji mu Isalela jikayukanyikwa amba, ‘Ba mu nzubo ya muntu ye bavuujile nkwabilo.’
11 “Umvwe banabalume babiji babena kulwa, ne mukazhi wa mwanamulume umo waiya na kulamwinako mwatawanji ku ubena kumupuma kabiji watanyika kuboko kwanji ne kumukwata ku binungwa bya lusemo, 12 awo mwanamukazhi mwafwainwa kumuchiba kuboko. Anweba* kechi mwafwainwa kumubila lusa ne.
13 “Kechi mwafwainwa kwikala na bipimo bibiji byapusana bya mabwe mu fukuta wenu,+ kikatampe ne kicheche ne. 14 Kechi mwafwainwa kwikala na bipimo bya efa bibiji byapusana mu nzubo yenu,* kikatampe ne kicheche ne.+ 15 Mukekale na bya kupiminako kinemenezhi byalumbuluka kabiji byaesakana ne bipimo byalumbuluka kabiji byaesakana pa kuba’mba mukekale moba avula mu kyalo kyo abena kwimupa Yehoba Lesa wenu.+ 16 Mambo muntu yense wabula bukishinka uba bino bintu, ye wa bunya kwi Yehoba Lesa wenu.+
17 “Vulukai bintu bimubile bena Amaleki mu jishinda byo mwafuminenga mu Ijipita,+ 18 byo bemusambakene mu jishinda ne kulukuka bonse bashajile kunyuma yenu byo mwakookeletu zubulu. Abo kechi baakaminwe Lesa ne. 19 Yehoba Lesa wenu byo akemukokolosha ku balwanyi benu bonse bakemuzhokoloka mu kyalo kyo abena kwimupa Yehoba Lesa wenu kwikala ke buswanyi bwenu,+ mukavizhe bena Amaleki pano pa ntanda kuba’mba bakabule kwibavuluka.+ Kange mukalubeko ne.
26 “Byo mukafika mu kyalo kyo abena kwimupa Yehoba Lesa wenu kwikala ke buswanyi bwenu ne kwikitambula kwikala kyenu kabiji mukekale monka, 2 mukashikulepo bya nsomo bimo bya kajo* konse kakafuma mu mushiji ko mukabungizha mu kyalo kyenu kyo abena kwimupa Yehoba Lesa wenu, kabiji mukekabike mu ntumbe ne kwikatwala mu mpunzha yo akasala Yehoba Lesa wenu mwa kwikala jizhina janji.+ 3 Mwafwainwa kuya kwi ñanga ukengilanga mu oo moba ne kumubuula’mba, ‘Lelo mbena kubuula Yehoba Lesa wenu namba nafika mu kyalo Yehoba kyo achipile ku bashakulu betu kuba’mba uketupa.’+
4 “Kabiji ñanga ukatambula ntumbe mu kuboko kwenu ne kwiitula kwipi na kya kusokelapo bitapisho kya Yehoba Lesa wenu. 5 Kabiji mukambe ku meso a Yehoba Lesa wenu amba, ‘Batata bajinga bena Alamenya+ bapitañanangatu,* bayile ku Ijipita+ ne kukekala bwenyi konkakwa na ba mu kisemi kyabo bachechetu.+ Bino konkakwa baikele ke kisaka kikatampe, kyakosa kabiji bavujile bingi.+ 6 Kabiji bena Ijipita betuyanjishenga ne kwitumanyika ne kwitupa mingilo yakosa ya buzha.+ 7 Onkao mambo, twatatwile kumujijila Yehoba, Lesa wa bashakulu betu, kabiji Yehoba waumvwine kujila kwetu ne kumona buyanji bwetu, makatazho etu ne lumanamo lwetu.+ 8 Ponkapo Yehoba witufumishe mu Ijipita na kuboko kwa bulume kabiji kwakosa,+ ne na bintu bilengesha moyo, na biyukilo ne na bya kukumya.+ 9 Kabiji wituletele ku ino mpunzha ne kwitupa kino kyalo, kyalo kyavula mukaka ne buki.+ 10 Pano naleta bya nsomo bya mu kajo kafuma mu mushiji Yehoba ko ampa.’+
“Mwafwainwa kwikatula kwi Yehoba Lesa wenu ne kumulambila Yehoba Lesa wenu. 11 Kabiji mukasekele mu bintu byonse byawama byo akemupa Yehoba Lesa wenu, anweba ne ba mu nzubo yenu, anweba ne mwina Levi ne muntu wafuma ku kyalo kingi ye mwikala nanji.+
12 “Byo mukapwisha kubungizha byonse bya bujikumi+ bya mu kajo kenu mu mwaka wa busatu, yenka mwaka wa kupainamo bya bujikumi, mukebipane ku mwina Levi, ku muntu wafuma ku kyalo kingi, ku mwana wabula bashanji* ne ku mwanamukazhi wafwilwa ne abo bakebijiile mu mizhi* yenu.+ 13 Kabiji mukambe kwi Yehoba Lesa wenu amba, ‘Nafumya kintu kyazhila mu nzubo yami ne kwikipana ku mwina Levi, ku muntu wafuma ku kyalo kingi, ku mwana wabula bashanji ne ku mwanamukazhi wafwilwa+ byonkatu byo mwankambizhe. Kechi nalalapo nangwa kulengulula mikambizho yenu ne. 14 Kechi nekijiile byo najijilenga nangwa kutolapo byo najinga wa muzhilo nangwa kwikipanapo ku muntu wafwa ne. Amiwa nakookela jiwi ja Yehoba Lesa wami kabiji nauba bintu byonse byo mwankambizhe. 15 Pano talai pano panshi kufuma mo mwikala mwazhila mwiulu ne kupesha bantu benu bena Isalela ne kyalo kyo mwitupa,+ byonkatu byo mwachipile ku bashakulu betu,+ kyalo kyavula mukaka ne buki.’+
16 “Lelo jino, Yehoba Lesa wenu ubena kwimukambizha kulondela ano malamuna ne mizhilo. Mwafwainwa kwialama ne kwialondela na muchima wenu+ yense ne na mweo* wenu yense. 17 Lelo jino, mwiumvwina Yehoba byo aamba’mba ukekala Lesa wenu inge mukendenga mu mashinda anji ne kulama malamuna anji,+ mikambizho yanji,+ mizhilo yanji+ ne kumvwina jiwi janji. 18 Kabiji lelo jino, Yehoba waumvwa byo mwaamba’mba mukekala bantu banji, kya bunonshi* kyanji,+ byonkatu byo emulayile, ne kuba’mba mukalamanga mikambizho yanji yonse, 19 ne kuba’mba ukemutumbijika kukila bisaka bikwabo byonse byo alengele,+ ukemutakaika ne kwimulengela kuya nkuwa ne kwimupa lukumo byo mukekala bantu bazhila kwi Yehoba Lesa wenu,+ byonkatu byo alayile.”
27 Kepo Mosesa ne bakulumpe ba bena Isalela bakambizhe bantu amba: “Mukalamenga mikambizho yonse yo mbena kwimupa lelo jino. 2 Kabiji pa juba jo mukabuka Yodano ne kutwela mu kyalo kyo abena kwimupa Yehoba Lesa wenu, mukemike mabwe akatampe ne kwiashingwila.*+ 3 Kabiji byo mukabuka mukanembepo byambo byonse bya ino Mizhilo pa kuba’mba mukatwele mu kyalo kyo abena kwimupa Yehoba Lesa wenu, kyalo kyavula mukaka ne buki byonkatu Yehoba, Lesa wa bashakulu benu byo emulayile.+ 4 Byo mukabuka Yodano, mukemike oo mabwe pa Mutumba wa Ebala+ ne kwiashingwila,* byonkatu byo mbena kwimukambizha lelo jino. 5 Kabiji mukamushimikile Yehoba Lesa wenu konkakwa kya kusokelapo bitapisho kya mabwe. Kange mukeasonge na byela ne.+ 6 Mukashimike kya kusokelapo bitapisho kya Yehoba Lesa wenu kya mabwe atuntulu ne kulambwilapo milambo ya kusoka kwi Yehoba Lesa wenu. 7 Mukatapishe bitapisho bya mutende+ ne kwibijiila konkakwa+ ne kusangalela mwi Yehoba Lesa wenu.+ 8 Kabiji pa oo mabwe mukanembepo bulongo byambo byonse bya ino Mizhilo.”+
9 Kepo Mosesa ne bañanga bena Levi baambijile bena Isalela bonse amba: “Anweba bena Isalela, zhindamai ne kuteleka. Juba ja lelo mwaaluka ke bantu ba Yehoba Lesa wenu.+ 10 Mukomvwinenga jiwi ja Yehoba Lesa wenu ne kulama mikambizho yanji+ ne malamuna anji o mbena kwimukambizha lelo jino.”
11 Pa jonkaja juba, Mosesa wakambizhe bantu amba: 12 “Byo mukabuka Yodano, ino mikoka yo ikemana pa Mutumba wa Gelizimu+ na kupesha bantu: mukoka wa bena Shimeona, wa bena Levi, wa bena Yuda, wa bena Isakala, wa bena Yosefwa ne mukoka wa bena Benjamina. 13 Kabiji ino yo mikoka ikemana pa Mutumba wa Ebala+ ne kwamba mafingo: mukoka wa bena Lubenyi, wa bena Gadi, wa bena Ashela, wa bena Zebuluna, wa bena Danyi ne mukoka wa bena Nafitali. 14 Kabiji bena Levi bakambile bena Isalela bonse na jiwi ja peulu amba:+
15 “‘Wafingwa muntu yense usonga nangwa ulenga kipashañano kya kyela,+ kintu kya bunya kwi Yehoba,+ kyalengwa na maboko a sendwe nangwa usungulula byela, ne kwikifya.’ (Kabiji bantu bonse bakambe’mba, ‘Amena!’*)
16 “‘Wafingwa awa ubula kunemeka bashanji nangwa bainanji.’+ (Kabiji bantu bonse bakambe’mba, ‘Amena!’)
17 “‘Wafingwa awa utuntulula mupaka wa mukwabo.’+ (Kabiji bantu bonse bakambe’mba, ‘Amena!’)
18 “‘Wafingwa awa ulengela mpofu kusenduka mu jishinda.’+ (Kabiji bantu bonse bakambe’mba, ‘Amena!’)
19 “‘Wafingwa awa uchibila mungi mambo+ a muntu wafuma ku kyalo kingi, a mwana wabula bashanji* nangwa a mwanamukazhi wafwilwa.’+ (Kabiji bantu bonse bakambe’mba, ‘Amena!’)
20 “‘Wafingwa awa ulaala na ba muka bashanji, mambo walengesha bumvu bashanji.’*+ (Kabiji bantu bonse bakambe’mba, ‘Amena!’)
21 “‘Wafingwa awa ulaala na nyama.’+ (Kabiji bantu bonse bakambe’mba, ‘Amena!’)
22 “‘Wafingwa awa ulaala na nyenga yanji, mwana wa bashanji nangwa wa bainanji.’+ (Kabiji bantu bonse bakambe’mba, ‘Amena!’)
23 “‘Wafingwa awa ulaala na bako banji ba bakazhi.’+ (Kabiji bantu bonse bakambe’mba, ‘Amena!’)
24 “‘Wafingwa awa ubelamina mukwabo ne kumwipaya.’+ (Kabiji bantu bonse bakambe’mba, ‘Amena!’)
25 “‘Wafingwa awa utambula mazhikakanwa ne kwipaisha* muntu* wabula mambo.’+ (Kabiji bantu bonse bakambe’mba, ‘Amena!’)
26 “‘Wafingwa awa ubula kulondela byambo bya ino Mizhilo ne kubula kwibyuba.’+ (Kabiji bantu bonse bakambe’mba, ‘Amena!’)
28 “Umvwe mukomvwine jiwi ja Yehoba Lesa wenu ne kuteshako muchima kulondela mikambizho yanji yonse yo mbena kwimukambizha lelo jino, Yehoba Lesa wenu ukemutumbijika kukila bisaka byonse bya bantu biji pano pa ntanda.+ 2 Ano mapesho onse akekala pe anweba kabiji akavula bingi+ mambo a kutwajijila kumvwina jiwi ja Yehoba Lesa wenu:
3 “Mukobilwa bibusa mu muzhi, kabiji mukobilwa bibusa mu majimi.+
4 “Baana* benu ne kajo ka mu mushiji wenu ne baana ba banyama benu ba kulela, baana ba bañombe ne baana ba mikooko yenu, bakobilwa bibusa.+
5 “Ntumbe yenu ne nsanyi yenu ya kukanjilamo shinkwa bikobilwa bibusa.+
6 “Bakemupesha pa kutwela, kabiji bakemupesha pa kulupuka.
7 “Yehoba ukemulengela kushinda balwanyi benu bakemulukuka.+ Bakeshila mu jishinda jimo pa kwimulukuka, bino pa kwimunyema, bakapalañena mu mashinda atanu na abiji.+ 8 Yehoba ukapesha matala enu+ ne mingilo yenu yonse yo mukengilanga, kabiji Yehoba Lesa wenu ukapesha kyalo kyo abena kwimupa. 9 Yehoba ukemwikajika ke bantu bazhila kwi aye,+ byonkatu byo achipile kwi anweba,+ na mambo a kutwajijila kulama mikambizho ya Yehoba Lesa wenu ne kwenda mu mashinda anji. 10 Bantu bonse ba pano pa ntanda bakayuka’mba mubena kutelwa pa jizhina ja Yehoba+ kabiji bakemuchinanga.+
11 “Yehoba ukemulengela kusema baana bavula ne kwikala na bilelwa byavula ne kwikala na kajo kavula+ mu kyalo Yehoba kyo achipile ku bashakulu benu kuba’mba ukemupa.+ 12 Yehoba ukashinkula bipenze mwiulu, ne kunokesha mvula pa kyalo kyenu mu kimye kyayo+ ne kupesha byonse byo muba. Mukakongweshanga bisaka bya bantu byavula, bino anweba kechi mukakongolanga ne.+ 13 Yehoba ukemulengela kwikala bakulumpe pa bakwenu, kabiji kechi bakemulamanga ne; mukayangatu palutwe kechi mukabwelanga panyuma ne,+ umvwe mwatwajijila kukookela mikambizho ya Yehoba Lesa wenu yo mbena kwimukambizha lelo jino kuba’mba mwiilamenga ne kwiilondela. 14 Kechi mwafwainwa kulengulula byambo byo mbena kwimukambizha lelo jino, kuya ku kilujo nangwa ku kipiko+ ne kongolokela ku balesa bangi ne kwibengijila ne.+
15 “Bino umvwe mukabule kumvwina jiwi ja Yehoba Lesa wenu ne kubula kuteshako muchima kulondela mikambizho yanji ne malamuna anji o mbena kwimukambizha lelo jino, ano mafingo onse akeya pe anweba kabiji akavula bingi:+
16 “Mukafingwa mu muzhi, kabiji mukafingwa mu majimi.+
17 “Ntumbe ne nsanyi yenu ya kukanjilamo shinkwa, bikafingwa.+
18 “Baana* benu+ ne baana ba bañombe benu ne baana ba mikooko yenu, bakafingwa ne kajo kenu pamo.+
19 “Bakemufinga pa kutwela, kabiji bakemufinga pa kulupuka.
20 “Yehoba ukaleta mafingo pe anweba ne bya malwa ne lukabisho mu mingilo yenu yonse, kufikatu ne byo mukonaika ne kuvila bukiji na mambo a byubilo byenu byatama ne na mambo a kumvulama amiwa.+ 21 Yehoba ukaleta kikola pe anweba kufikatu ne byo akemuvizha mu kyalo kyo mubena kuya na kutambula kwikala kyenu.+ 22 Yehoba ukemupuma na kikola kya lunkunzha, kikola kya mashika,+ kikola kya kuvimba, kikola kya kutwisha mubiji kyuya, mpoko,+ kyashi kikatampe ne bijimwa byenu bikekala na bikola;+ kabiji bikemupupilanga kufikatu ne byo mukavila. 23 Jiulu jikekala nobe mukuba ne ntanda ikakosa nobe kyela kya kapotwe.+ 24 Yehoba ukalula mvula wa mu kyalo kyenu ke busenga ne lukungu, kabiji bikanokelanga pe anweba kufuma mwiulu kufikatu ne byo mukavila. 25 Yehoba ukalengela balwanyi benu kwimushinda.+ Mukaya mu jishinda jimo pa kwibalukuka, bino pa kwibanyema, anweba mukapalañena mu mashinda atanu na abiji; kabiji bufumu bonse bwa pano pa ntanda bukooba moyo byo bukamona bintu byatama bikemumwekela.+ 26 Kabiji mibiji yenu yafwa ikekala ke kajo ka bañonyi ne banyama, kabiji kafwako nangwa umo ukebapangapo ne.+
27 “Yehoba ukemupuma na tusungupute twa ku Ijipita, mimfumba, nkwasa ne bilonda byo mukabula kukonsha kubuka. 28 Yehoba ukemulengela kukonya ne kupofula meso ne kwimuvulañanya.+ 29 Mukapuputwangatu kimye kya mute byonkatu bipuputa mpofu mu mfishi,+ kabiji byonse byo mukoobanga kechi bikalumbuluka ne; kabiji bakemujimukilanga ne kwimwibila kabiji kechi kukekala wa kwimupokololako ne.+ 30 Mukepanguzha mwanamukazhi, bino muntu ungi ukalaala nanji kya kumukanjikizha. Mukashimika nzubo, bino kechi mukekalamo ne.+ Mukajima bujimi bwa miñanzañanza, bino kechi mukajako ne.+ 31 Ñombe wenu bakamwipaya ne anweba saka mutalako, bino kechi mukajako ne. Mbongolo wenu bakamwiba ne anweba saka mutalako, bino kechi bakemubwezhezhaye ne. Mukooko wenu bakamupana ku mulwanyi wenu, bino kechi mukekala na wa kwimukwashako ne. 32 Baana benu ba balume ne baana benu ba bakazhi bakebapana ku bantu bangi+ ne anweba saka mutalako, kabiji kimye kyonse mukebatonganga bingi, bino kafwako kyo mukoobapo ne. 33 Kajo konse kakafuma mu mushiji wenu bakekajanga ku bantu bangi bo mwabujile kuyuka,+ kabiji kimye kyonse bakemujimukilanga ne kwimukabisha. 34 Kabiji mukakonya na mambo a bintu byo mukamonanga.
35 “Yehoba ukemulengela kwikala na tusungupute twatama tubula kupwa pa manungo enu ne ku maulu onse, kufumatu mukachi ka maulu enu kufika ne pa lumbwichi. 36 Yehoba ukemutwala anweba ne mfumu ye mukesajila ku kisaka kya bantu kyo mwabujile kuyuka anweba ne bashakulu benu,+ kabiji konkakwa mukengijilanga balesa bangi, balesa ba bichi ne ba mabwe.+ 37 Mukekala kintu kilengesha moyo, kabiji bakemusekanga* ne kwimwendeleka ku bantu bonse Yehoba bo akemutwalako.+
38 “Mukabyalanga nkunwa yavula, bino mukanowatu kajo kacheche,+ mambo nzhiye ikekaja. 39 Mukajimanga majimi a miñanzañanza, bino kechi mukatomangako binyu ne, kabiji kechi mukanowamo kintu ne,+ mambo bilongolo bikeaja. 40 Mukekala na bichi bya maolivi mu nyaunda yenu yonse, bino kechi mukekala na manyi a kwishinga ne, mambo bichi byenu bya maolivi bikaponeshanga bipangwa. 41 Mukasemanga baana ba balume ne baana ba bakazhi, bino kechi bakekala benu ne, mambo bakebatwala mu buzha.+ 42 Bilongolo* bikaja bichi byenu byonse ne kajo kakafuma mu bujimi bwenu. 43 Muntu wafuma ku kyalo kingi ye mwikala nanji ukayangatu palutwe kwimukila, bino anweba mukabwelangatu panyuma. 44 Aye ukemukongweshanga, bino anweba kechi mukamukongweshanga ne.+ Aye ukekala mukulumpe pe anweba, bino anweba kechi mukamulamanga ne.+
45 “Ano onse mafingo+ akeya pe anweba, kabiji akemupupilanga ne kwimuvujila kufikatu ne byo mukavila,+ mambo kechi mwaumvwijile jiwi ja Yehoba Lesa wenu ne kulama mikambizho yanji ne malamuna anji o emukambizhe ne.+ 46 Kabiji akatwajijila kwikala pe anweba ne pa baana benu kwikala kayukilo ne kya kwimujimunako myaka ne myaka,+ 47 mambo kechi mwamwingijilenga Yehoba Lesa wenu na kusangalala ne na muchima wa lusekelo byo mwajinga na bintu byavula ne.+ 48 Yehoba ukemutumina balwanyi benu ne anweba mukebengijilanga+ saka mwafwa nzala+ ne kilaka, saka mwavwala misakila ne kukajilwa bintu byonse. Ukemuvwika pa nshingo yenu kikonkoji kya kyela kya kapotwe kufikatu ne byo akemuvizha.
49 “Yehoba ukemuletela kisaka kya bantu kiji kwalepa,+ kufuma kwapela ntanda; kikemulukuka byonkatu byuba mpungu,+ kisaka kyamba mulaka ye mukabula kumvwa,+ 50 kisaka kiji na bantu bashinta, bakabula kunemeka mukote nangwa kubila lusa mwanyike.+ 51 Bakaja baana ba bilelwa byenu ne kajo kakafuma mu bujimi bwenu kufikatu ne byo mukavila. Kechi bakashapo kajo nangwa kamo, binyu bya katataka nangwa manyi, baana ba bañombe nangwa ba mikooko yenu ne, kufikatu ne byo bakemonauna.+ 52 Bakemuzhokoloka, kwimushinkila mukachi ka mizhi* yenu mu kyalo kyenu kyonse, kufikatu ne byo bakakundaula masakwa enu alepa o mwaketekelamo. Kine, bakemuzhokoloka mu mizhi yenu yonse ya mu kyalo kyenu, kyo abena kwimupa Yehoba Lesa wenu.+ 53 Kepo mukaja baana* benu, mibiji ya baana benu ba balume ne ya baana benu ba bakazhi,+ Yehoba Lesa wenu bo emupa, na mambo a kukizhamo kwimuzhokoloka ne na mambo a bya malwa balwanyi benu byo bakaleta pe anweba.
54 “Nangwatu mwanamulume wakooka muchima kabiji uji na lusa mwi anweba kechi ukobila lusa mulongo wanji nangwa mukazhanji ye atemwisha nangwa mwananji wa mulume ukashalapo ne. 55 Kabiji kechi ukebapapo mibiji ya baana banji ba balume yo akajanga ne, mambo kechi ukekalapo na kajo kakwabo ne, na mambo a kukizhamo kwimuzhokoloka ne na mambo a bya malwa balwanyi benu byo bakaleta pa mizhi yenu.+ 56 Kabiji mwanamukazhi wakooka muchima, uji na lusa mwi anweba ubula kukeba ne kunyanta kulu kwanji panshi na mambo a kipale,+ kechi ukobila lusa mwatawanji ye atemwisha, mwananji wa mulume nangwa mwananji wa mukazhi ne, 57 mambo kechi ukakeba kwibapapo kinyinya kya munda mwanji nangwa mibiji ya baana bo akasema ne, mambo ukebajiila mu bufyamfya na mambo a kukizhamo kwimuzhokoloka ne na mambo a bya malwa balwanyi benu byo bakaleta pa mizhi yenu.
58 “Umvwe mukabule kuteshako muchima kulama byambo byonse bya ino Mizhilo byanembwa mu uno buku,+ kabiji mwabula kwakamwa jino jizhina ja lukumo kabiji jilenga moyo,+ jonka ja Yehoba,+ Lesa wenu, 59 Yehoba ukemuletela binkunka byakatazha, anweba ne baana benu, bikatampe bibula kupwa bukiji,+ byashinta ne bikola bibula kupwa bukiji. 60 Ukabwezha pe anweba bikola byonse bya mu Ijipita, byo mwachinanga kabiji bikemukakachila. 61 Kabiji Yehoba ukemuletela anweba bikola byonse nangwa binkunka byabula kunembwa mu uno buku wa Mizhilo, kufikatu ne byo mukavila. 62 Nangwa kya kuba mwavula nobe tubangabanga twa mwiulu,+ mukashalatu bantu bacheche,+ na mambo a kubula kumvwina jiwi ja Yehoba Lesa wenu ne.
63 “Byonkatu Yehoba byo akebeshenga kwimubila bibusa ne kwimulengela kuvula, Yehoba byo byo akakebesha kwimonauna ne kwimuvizha; kabiji bakemufumyamo mu kyalo kyo mubena kuya na kutambula kwikala kyenu.
64 “Yehoba ukemupalañenya mu bisaka byonse bya bantu, kufuma kwatendekela ntanda kufikatu ne ko yapelela,+ kabiji konkakwa mukengijilanga balesa ba bichi ne ba mabwe, bo mwabujile kuyuka anweba ne bashakulu benu.+ 65 Kechi mukekala mu mutende mukachi ka byobyo bisaka bya bantu ne,+ kabiji kechi mukekala ne na pa kukokolwesha maulu enu ne. Bino konkakwa, Yehoba ukalengela michima yenu kwikala na binyenge+ ne meso kuleka kumona bulongo ne kubula* kwikala na luketekelo.+ 66 Bumi bwenu bukekala mu kizumba, kabiji mukoobanga moyo bufuku ne mute; kabiji kechi mukayuka kana mukekala na bumi nangwa ne. 67 Lukelo mukambanga’mba, ‘Nanchi inge mabanga!’ Kabiji mabanga mukambanga’mba, ‘Nanchi inge lukelo!’ na mambo a moyo ye mukomvwa mu michima yenu ne na mambo a bintu byo mukamonanga. 68 Kabiji Yehoba ukemubwezha na bwato ku Ijipita mu jishinda jo nemubuujile namba, ‘Kechi mukejimonapo jibiji ne,’ kabiji konkakwa mukakebanga kwipotesha ku balwanyi benu kwikala bazha ba balume ne ba bakazhi, bino kafwako ukemupota ne.”
29 Abino byo byambo bya lulayañano Yehoba lo akambizhe Mosesa kulayañana na bena Isalela mu kyalo kya Moabu kununga pa lulayañano lo alayañene nabo ku Holeba.+
2 Kabiji Mosesa waichile bena Isalela bonse ne kwibambila’mba: “Mwimwena bintu byonse Yehoba byo aubile ku meso enu mu kyalo kya Ijipita kwi Felo ne ku bakalume banji bonse ne ku kyalo kyanji,+ 3 meseko akatampe o mwamwene, ne biyukilo ne bya kukumya bikatampe.+ 4 Bino Yehoba kechi wimupa muchima wa kukwatakanya nangwa meso a kumwenako nangwa matwi a kumvwinako kufika ne lelo jino ne.+ 5 ‘Byo nemutangijilenga myaka 40 mu kiselebwa,+ bivwalo byenu ne makwabilo a ku maulu enu kechi byafwile ne.+ 6 Kechi mwajiilenga shinkwa nangwa kutoma binyu nangwa maalwatu akwabo ne, pa kuba’mba muyuke’mba amiwa yami Yehoba Lesa wenu.’ 7 Mukuya kwa moba mwafikile ku ino mpunzha, kabiji Sihona mfumu wa Heshibonyi+ ne Oga mfumu wa Bashana+ baishile na kulwa ne atweba, bino twibashinjile.+ 8 Byo twapwishishe kuba bino, twaangachile kyalo kyabo ne kwikipana kwikala kya buswanyi ku bena Lubenyi, ku bena Gadi ne ku kichika kya mukoka wa bena Manase.+ 9 Onkao mambo, mukalamenga byambo bya luno lulayañano ne kwibilondela pa kuba’mba mukamwenemo byawama mu byonse byo mukoobanga.+
10 “Lelo jino, anweba bonse mwaimana kwi Yehoba Lesa wenu, bakulumpe ba mikoka yenu, bakulumpe benu, bantangi benu ne banabalume bonse bena Isalela, 11 baana benu, bakazhi benu,+ ne muntu wafuma ku kyalo kingi ye mwikala nanji+ mu kampu wenu, kutendekelatu ku boba bemuchabila nkunyi kufika ne ku boba bemutapwila mema. 12 Mwaiya kuno kuba’mba mulayañane lulayañano ne Yehoba Lesa wenu ne kuchipa luchipo lwanji, Yehoba Lesa wenu lo abena kulayañana ne anweba lelo jino+ 13 pa kuba’mba emwikajike lelo jino kwikala bantu banji,+ ne aye ekale Lesa wenu,+ byonkatu byo emulayile ne byo achipile ku bashakulu benu, abo ba Abalahama,+ Izaka+ ne Yakoba.+
14 “Pano kechi mbena kulayañanatu ne anweba luno lulayañano ne luno luchipo ne, 15 bino mbena kulayañana ne na bonse baimana pano lelo jino kwi Yehoba Lesa wetu, ne boba babulapo pano lelo jino. 16 (Mambo anweba mwayukishatu bulongo byo twaikele mu kyalo kya Ijipita ne byo twapichile mukachi ka bisaka bya bantu byapusana pusana pa lwendo lwetu.+ 17 Kabiji mwamwenenga bintu byabo bya bunya ne bankishi* babo ba bunya,+ ba bichi ne ba mabwe, ba siliva ne ba ngolode bo bajinga nabo.) 18 Mwafwainwa kujimuka kuchina’mba mwanamulume nangwa mwanamukazhi, kisemi nangwa mukoka uji ne anweba lelo jino, wakekala na muchima wa kusatukila Yehoba Lesa wenu ne kwingijila balesa bangi ba byobyo bisaka bya bantu,+ ne kuchina’mba mwi anweba mwakekala muzhazhi upanga bipangwa bya bulembe ne kichi kyalula.+
19 “Bino umvwe muntu waumvwa bino byambo bya luchipo ne kwitota mu muchima wanji amba, ‘Nkekalangatu mu mutende nangwa kya kuba mbena kwenda mu mashinda a mukebela muchima wami,’ bino saka onauna byonse* biji mu jishinda janji, 20 Yehoba kechi ukalekelako mambo yewo muntu ne.+ Bino Yehoba ukamuzhingijila bingi awo muntu, kabiji mafingo onse anembwa mu uno buku akamufikila,+ kabiji Yehoba ukazhimañanya jizhina ja yewo muntu pano pa ntanda. 21 Yehoba ukapaatula yewo muntu kufuma mu mikoka yonse ya bena Isalela kuba’mba akamone bya malwa monka mwayila mafingo onse a luno lulayañano anembwa mu uno buku wa Mizhilo.
22 “Kisemi kya kulutwe kya baana benu ne bantu bakafuma ku kyalo kingi byo bakamona binkunka bya mu kyo kyo kyalo, ne bikola Yehoba byo akaleta pa kyalo— 23 ne mabwe ateema mujilo ne mukele ne mfututu, kuba’mba kyalo kyonse bakabule kubyalamo kabiji kikabule kumenesha kintu nangwa bijimwa ne, byonkatu byo baonawine Sodoma ne Gomola,+ Adima ne Zeboimu,+ Yehoba byo aonawine na mambo a kuzhingila ne bukaji bwanji— 24 abo ne bisaka bya bantu byonse bakashikisha’mba, ‘Mambo ka Yehoba o aubila kino kyalo bibye?+ Ñanyi kintu kyalengejile kuba’mba azhingile bibye?’ 25 Kepo bakamba’mba, ‘Ke na mambo a kuba’mba balekele lulayañano lwa Yehoba,+ Lesa wa bashakulu babo, lo alayañene nabo kimye kyo ebafumishe mu kyalo kya Ijipita.+ 26 Kabiji bayile na kwingijila balesa bangi ne kwibalambila, balesa bo babujile kuyuka kabiji bo abujile kwibaswisha amba bakebapopwelenga.*+ 27 Onkao mambo, bukaji bwa Yehoba bwaishile pa kino kyalo byo ekiletejile mafingo onse anembwa mu uno buku wa mizhilo.+ 28 Byonkabyo, Yehoba wibazhingijile ne kwibafumyamo mu kyalo kyabo na mambo a bukaji bwanji+ ne kuzhingila kwanji kukatampe, kabiji wibatwajile mu kyalo kingi, konka ko baji lelo jino.’+
29 “Bintu byafyamika byo bya kwa Yehoba Lesa wetu,+ pakuba bintu byo asolola byo byetu atweba ne baana betu myaka ne myaka, kuba’mba tukalondelenga byambo byonse bya ino Mizhilo.+
30 “Bino byambo byonse byo bikemufikila, mapesho ne mafingo o nemubuula,+ ne anweba mukeavuluke*+ mu bisaka byonse bya bantu byo akemupalañenyamo Yehoba Lesa wenu,+ 2 kabiji mwabwela kwi Yehoba Lesa wenu+ ne kumvwina jiwi janji na muchima wenu yense ne na mweo* wenu yense, monka mwayila mikambizho yonse yo mbena kwimukambizha lelo jino, anweba ne baana benu,+ 3 Yehoba Lesa wenu ukabwezha bazha benu+ ne kwimubila lusa+ ne kwimukonkanya jibiji kufuma mu bantu bonse bo akemupalañenyamo Yehoba Lesa wenu.+ 4 Nangwa kya kuba bantu benu bakapalañene kufika kwapelela jiulu, Yehoba Lesa wenu ukemukonkanya kufuma kokwa ne kwimubwezha.+ 5 Yehoba Lesa wenu ukemubwezha mu kyalo kyatambwile bashakulu benu kabiji mukekitambula ke kyenu; ne aye ukemulengela kumona byawama ne kwimulengela kuvula kukila bashakulu benu.+ 6 Yehoba Lesa wenu ukatokesha* michima yenu ne michima ya baana benu,+ pa kuba’mba mukamutemwe Yehoba Lesa wenu na muchima wenu yense ne na mweo* wenu yense, ne kwikala na bumi.+ 7 Kepo Yehoba Lesa wenu akaleta ano mafingo onse pa balwanyi benu bemushikilwe ne kwimumanyika.+
8 “Ne anweba mukabwela ne kumvwina jiwi ja Yehoba ne kulama mikambizho yanji yo mbena kwimukambizha lelo jino. 9 Yehoba Lesa wenu ukemulengela kumona bintu byawama byavula mu mingilo yonse yo mukengilanga,+ ukavuzha baana benu ne bilelwa byenu ne kajo kakafuma mu mushiji wenu, mambo Yehoba ukakebesha jibiji kwimulengela kumona byawama byonkatu byo asekejile mu bashakulu benu.+ 10 Mambo mukomvwina jiwi ja Yehoba Lesa wenu ne kulama mikambizho yanji ne malamuna anji anembwa mu uno buku wa Mizhilo, ne anweba mukabwela kwi Yehoba Lesa wenu na muchima wenu yense ne na mweo* wenu yense.+
11 “Uno mukambizho ye mbena kwimukambizha lelo jino kechi wakatazha ne, kabiji kechi uji kwalepa ne anweba ne.+ 12 Kechi uji mwiulu ne, kya kuba’mba mwambe’mba, ‘Ñanyi ukaya mwiulu na kwituletelaye, pa kuba’mba tumumvwe ne kumulama?’+ 13 Kabiji kechi uji ku bushiya bwa kalunga ka mema ne, kya kuba’mba mwambe’mba, ‘Ñanyi usakwabukila ku bushiya bwa kalunga ka mema na kwituletelaye, pa kuba’mba tumumvwe ne kumulama?’ 14 Mambo byambo muji nabyo, monka mu kanwa kenu ne mu muchima wenu,+ pa kuba’mba mwibyubenga.+
15 “Lelo jino nabika kwi anweba bumi ne byawama, lufu ne byatama.+ 16 Umvwe mukomvwine mikambizho ya Yehoba Lesa wenu yo mbena kwimukambizha lelo jino, ne kutemwa Yehoba Lesa wenu,+ kwenda mu mashinda anji ne kulama mikambizho yanji ne malamuna anji ne mizhilo yanji, mukekala na bumi+ ne kusemununa, kabiji Yehoba Lesa wenu ukemupesha mu kyalo kyo mubena kuya na kutambula.+
17 “Bino umvwe michima yenu ikapondoke+ ne kubula kumvwa, kabiji mukongolwe ne kulambila balesa bangi ne kwibengijila,+ 18 mbena kwimubuula ja lelo namba, kine mukavila.+ Byo musakwabuka Yodano, kechi mukekala myaka yavula mu kyalo kyo musakutambula kwikala kyenu ne. 19 Baji mwiulu ne baji pano pa ntanda basakwikala bakamonyi lelo jino bakwimushinawina amba, nabika bumi ne lufu kwi anweba, mapesho ne mafingo;+ musale bumi pa kuba’mba mukekale na bumi+ anweba ne baana benu,+ 20 kupichila mu kutemwa Yehoba Lesa wenu,+ kumvwina jiwi janji ne kukakachila kwi aye,+ mambo aye ye wimupa bumi, kabiji wakonsha kwimwikazha moba avula mu kyalo Yehoba kyo achipile kupa bashakulu benu ba Abalahama, Izaka ne Yakoba.”+
31 Mosesa wayile ne kubuula bena Isalela bonse bino byambo 2 amba: “Lelo jino nafikizha myaka 120.+ Kechi nsakutwajijila kwimutangijila* ne, mambo Yehoba wañambijile’mba, ‘Kechi ukabuka uno Yodano ne.’+ 3 Yehoba Lesa wenu ye usakutangilako kulutwe yenu pa kwabuka kabiji aye yenka ye ukonauna bino bisaka bya bantu biji kulutwe yenu, ne anweba mukebipangamo.+ Yoshua ye ukemutangijila ku bushiya,+ byonkatu Yehoba byo aambile. 4 Kabiji Yehoba ukeboba byonkatu byo aubile Sihona+ ne Oga,+ ne byo aonawine bamfumu ba bena Amoli ne kyalo kyabo.+ 5 Yehoba ukemushinjilabo, ne anweba mukebobe monka mwayila mikambizho yonse yo mbena kwimupa.+ 6 Chinchikai ne kukosa.+ Kange mwakamwe nangwa kwibachina ne,+ mambo Yehoba Lesa wenu ye ubena kwenda ne anweba. Kechi ukemusha nangwa kwimulekelela ne.”+
7 Kepo Mosesa aichile Yoshua ne kumwambila ku meso a bena Isalela bonse amba: “Chinchika ne kukosa,+ mambo obewa yobe ukatwala bano bantu mu kyalo Yehoba kyo achipile kupana ku bashakulu babo, ne obewa ukebapakyo kwikala buswanyi bwabo.+ 8 Yehoba ye watangilako kulutwe yobe, kabiji ukatwajijila kwikala ne obewa.+ Kechi ukakusha bunke nangwa kukulekelela ne. Kange ube moyo nangwa kukakilwa ne.”+
9 Kabiji Mosesa wanembele ino Mizhilo+ ne kupa bañanga bena Levi bonka basendanga jikwachi ja lulayañano lwa Yehoba, ne ku bakulumpe bonse ba bena Isalela. 10 Mosesa wibakambizhe’mba: “Ku mpelo ya mwaka wa butanu na bubiji, pa kimye kyatongolwa mu mwaka wa kukasuluka,+ kimye kya Kijiilo kya Mimba,*+ 11 bena Isalela bonse byo bakeya kwi Yehoba+ Lesa wenu mu mpunzha yo akasala, mukatange ino Mizhilo kuba’mba bena Isalela bonse bakeyumvwe.+ 12 Mukakonkanye bantu pamo,+ banabalume, banabakazhi, baana* ne bantu bafuma ku kyalo kingi bekala mu mizhi* yenu, kuba’mba bakomvwe ne kufunda ne kwakamwa Yehoba Lesa wenu ne kuteshako muchima kulondela byambo byonse bya mu ino Mizhilo. 13 Kepo baana babo babula kuyuka ino Mizhilo bakomvwa+ ne kufunda kwakamwa Yehoba Lesa wenu, moba onse o mukekala mu kyalo kyo musakutambula kwikala kyenu byo musakwabuka Yodano.”+
14 Kepo Yehoba aambijile Mosesa amba: “Moba obe a kufwa afwenya kala pepi.+ Mwite Yoshua ne kuya* nanji ku tente wa lusambakeno kuba’mba namutongole kwikala ntangi.”+ Onkao mambo, Mosesa ne Yoshua batwelele ne kwimana ku tente wa lusambakeno. 15 Kepo Yehoba aishile ku tente wa lusambakeno mu jikumbi ja mulumbulumbu, kabiji jino jikumbi jaimene ku kibelo kya tente wa lusambakeno.+
16 Yehoba waambijile Mosesa amba: “Umvwa! Katatakatu ufwe,* kabiji bano bantu bakatendeka kupopwela* balesa bangi bakebazhokoloka mu kyalo kyo babena kuyamo.+ Bakankana+ ne kulala lulayañano lwami lo nalayañene nabo.+ 17 Pa kyonkakya kimye, nkebabuukila bukaji+ ne kwibakana,+ kabiji nkafya kilungi kyami kwi abo+ kufikatu ne byo bakonaika. Kabiji byo bakapita mu bya malwa byavula ne kumanama,+ bakamba’mba, ‘Nanchi bino bya malwa kechi bitufikila na mambo a kuba’mba Lesa wetu kechi uji ne atweba nenyi?’+ 18 Bino amiwa nkafya kilungi kyami mu jo ja juba na mambo a bubi bo bakooba byo bakalulukila ku balesa bangi.+
19 “Pano nembai uno lwimbo+ ne kufunjisha bena Isalela.+ Mwibafunjishe* pa kuba’mba uno lwimbo akekale ke kamonyi wami wa kushinawina bena Isalela.+ 20 Byo nkebafikizha mu kyalo kyo nachipile ku bashakulu babo,+ kyalo kyavula mukaka ne buki,+ kabiji byo bakaja ne kumona byawama,*+ bakalulukila ku balesa bangi ne kwibengijila kabiji bakandengulula ne kulala lulayañano lwami.+ 21 Bya malwa byavula ne lumanamo byo bikebafikila,+ uno lwimbo ukekala ke kamonyi wa kwibashinawina (mambo baana babo kechi bafwainwa kumuvulama ne), mambo nayuka kala milanguluko yabo+ saka nkyangye kwibafikizha mu kyalo kyo nachipile.”
22 Onkao mambo, Mosesa wanembele uno lwimbo pa joja juba ne kwibafunjishaye bena Isalela.
23 Kepo atongwele* Yoshua+ mwana wa kwa Nuni kwikala ntangi ne kumwambila’mba: “Chinchika ne kukosa,+ mambo obewa yobe ukatwala bena Isalela mu kyalo kyo nachipile kwiabo+ kabiji nkatwajijila kwikala ne obewa.”
24 Mosesa byo apwishishetu kunemba byambo byonsetu bya ino Mizhilo mu buku,+ 25 Mosesa wakambizhe bena Levi bonka basendanga jikwachi ja lulayañano lwa Yehoba amba: 26 “Sendai uno buku wa Mizhilo+ ne kumubika ku mbaji ya jikwachi+ ja lulayañano lwa Yehoba Lesa wenu, kabiji ukekala ke kamonyi wa kwimushinawina konkakwa. 27 Mambo amiwa nayuka bunsatuki bwenu+ ne kukosa michima* kwenu.+ Umvwe kya kuba mwamusatukijile Yehoba saka nkiji na bumi ne anweba, pano kikekala byepi inge nafwa! 28 Nkonkenyai bakulumpe bonse ba mikoka yenu ne bantangi benu kuba’mba nebabuule bino byambo bebyumvwe, kabiji baji mwiulu ne baji pano pa ntanda basakwikala bakamonyi ba kwimushinawina.+ 29 Mambo nayuka namba umvwe nafwa, mukoobanga bintu byatama+ ne kusendukamo mu jishinda jo nemukambizha. Kabiji kine bya malwa bikemufikila+ mu kimye kya kulutwe, mambo mukoobanga bintu byatama kwi Yehoba, kabiji mukamuzhingijisha na mambo a mingilo yenu yo mukengilanga.”
30 Kipwilo kyonse kya bena Isalela byo kyatelekelenga, Mosesa waambile byambo bya uno lwimbo kufuma ko atendekela kufika ne ku mpelo:+
32 “Umvwai anweba muji mwiulu, ne amiwa nsakwamba,
Kabiji baji pano pa ntanda bomvwe byambo bya mu kanwa kami.
2 Mikambizho yami ikanokanga nobe mvula;
Byambo byami bikapanganga nobe kime,
Byonka biji mvula umimina pa nsono
Kabiji byonka biji mvula ubatu waa pa bijimwa.
3 Mambo nkejitayila mbila jizhina ja Yehoba.+
Ambai pa bukata bwa Lesa wetu!+
5 Abo bo bauba bintu byatama.+
Kechi bo baana banji ne, bulema bwabo bene.+
Kyo kisemi kyatama kabiji kyaluwankana!+
Nanchi kechi ye Shenu wimulengela amba mwikaleko nenyi?+
Nanchi kechi ye wimulengele ne kwimwikazha bulongo nenyi?
7 Vulukai moba a kala;
Langulukai pa myaka ya bisemi bya kala.
Ipuzhai bashenu, ne abo basakwimubuula;+
Ipuzhai bakulumpe benu, ne abo basakwimulondolwela.
8 Kimye Mwine Wakila kyo apele bisaka bya bantu bya buswanyi byabo,+
Kimye kyo aabenye baana ba kwa Adama,*+
Waabenye mipaka ya bantu+
Monka mwayila kuvula kwa bena Isalela.+
Wamuzhokolokele ne kumuzhikijila, wamutele muchima,+
Kabiji wamuzhikijile nobe kantu ka pa jiso janji.+
11 Byonkatu mpungu byo asandañanya kinsa kyanji,
Kubakamina peulu ya baana,
Kutanyika byapi ne kwibasenda,
Kwibasenda pa byapi byanji,+
12 Yehoba bunke bwanji wamutangijilenga;*+
Kafwako lesa ungi wajinga ne aye ne.+
13 Wamulengejile kwenda pa mapunzha a peulu a pano pa ntanda,+
Kya kuba wajiilenga kajo kafuminenga mu majimi.+
Wamujiishishenga buki kufuma mu jibwe jikatampe
Ne manyi kufuma mu jibwe ja nguzha,
14 Mafuta achimba kufuma ku bañombe ne mukaka kufuma ku mikooko,
Pamo na mikooko yawamisha,*
Ne mikooko ilume ya ku Bashana, ne bambuzhi balume,
Pamo na wichi wawamisha;+
Kabiji watomenenga mashi* a mañanzañanza.
15 Yeshulunyi* byo abayile, wasatukile.
Wabaya, watunkana, wavuvumuka.+
Onkao mambo, wakaine Lesa wamulengele,+
Ne kulengulula aye Jibwe ja lupulukilo lwanji.
17 Batapishanga bitapisho ku bandemona, kechi kwi Lesa ne,+
Ku balesa bo babujile kuyuka,
Bonka ba katataka,
Ku balesa bo babujile kuyuka bashakulu benu.
19 Yehoba byo ekimwene, wibakaine+
Mambo baana banji ba balume ne baana banji ba bakazhi bamuzhingijishe.
20 Onkao mambo, waambile’mba, ‘Nsakufya kilungi kyami kwi abo;+
Nkamone byo bakekala.
Onkao mambo, ne amiwa nkebalengela kwikala na bukaji na bantu batu;+
Nkebazhingijisha na kisaka kya bantu kyakosama.+
22 Mambo bukaji bwami bwaambula mujilo+
Ukateemangatu kufika ne panshi pene pa Kilende,*+
Kabiji ukasoka ntanda ne bijimo
Kabiji ukasoka bitendekesho bya mitumba.
23 Nkavuzha bya malwa byabo;
Miketo yami nkeipwishisha pe abo.
Nkebatumina banyama bakaji+
Ne bintu bikalaba panshi biji na bulembe.
25 Pangye, mpoko ikebalengela kufwisha;+
Mukachi mukekala moyo+
Ku nsongwalume ne kisungu,
Mwana ukyamwa pamo na muntu uji na mvwi.+
26 Nashi nkambe’mba: “Nkebapalañanya;
Kabiji nkebalengela kubula kwibavuluka mu bantu,”
27 Bino nachiine na mambo a byakonsheshe kwamba balwanyi,+
Mambo balwanyi bakonsheshe kwikitwala mungi.+
Inge baambile’mba: “Bulume bwetu bwibashinda;+
Yehoba kechi ye waubile bino byonse ne.”
29 Nanchi inge bajinga na maana!+ Inge balangulukishapo pa kino.+
Inge balangulukapo pa kintu kikebamwekela.+
30 Muntu umo wakonsha kupangisha byepi bantu 1,000,
Kabiji bantu babiji bakonsha kupalañanya byepi bantu 10,000?+
Kanatu aye Jibwe jabo wibapotesha+
Kabiji Yehoba wibapana.
32 Mambo muñanzañanza wabo wafuma ku muñanzañanza wa ku Sodoma
Kabiji wafuma ku majimi a ku Gomola.+
Mañanzañanza abo o mañanzañanza aji na bulembe,
Bizanze byao byalula.+
33 Binyu byabo bo bulembe bwa miloolo,
Bulembe bwashinta bwa bishipila.
34 Nanchi kino kechi yami nekitula,
Saka nekikasa na katetesho mu butala bwami nenyi?+
35 Kushinkanya ko kwami, ne kukabisha,+
Pa kimye kyatongolwa kulu kwabo kukatezhimuka,+
Mambo juba ja malwa abo jijitu pepi,
Ne kintu kikebafikila kikapelawizha kufika.’
36 Mambo Yehoba ukebachibila mambo bantu banji,+
Kabiji ukebobila lusa* bakalume banji+
Byo akamona’mba bulume bwabo bwakepa,
Ne byo pakashalatu bantu ne bakooka babula wa kwibakwasha.
37 Kepo akamba’mba, ‘Balesa babo baji pi,+
Jibwe jo bafyaminengamo,
38 Bonka bajiilenga mafuta a bitapisho* byabo,
Kutoma binyu bya milambo yabo ya binyu?+
Bemane ne kwimukwasha.
Bekale kyenu kya kufyamamo.
Yami ngipaya kabiji yami mpana bumi.+
40 Mambo nasuntula kuboko kwami mwiulu,
Kabiji nachipa namba: “Byo nji wa myaka yonse,”+
41 Umvwe nanona mpoko yami ibembela,
Ne kunengezha kuboko kwami kuba’mba mfikizhe lukabisho,+
Nkashinkanya na balwanyi bami+
Ne kuleta bya malwa pa boba banshikwa.
42 Nkalengela miketo yami kupendwa mashi,
Kabiji mpoko yami ikaja nyama,
Ne mashi a boba bo bakatapa ne a bazha,
Ne mitwe ya bantangi ba balwanyi.’
43 Anweba bisaka bya bantu sangalelai pamo na bantu banji,+
Mambo ukashinkanya na mambo a mashi a bakalume banji,+
Kabiji ukashinkanya na balwanyi banji+
Ne kufuchila mambo* kyalo kya bantu banji.”
44 Byonkabyo, Mosesa waishile ne kwamba byambo byonse bya uno lwimbo ne bantu saka bomvwa,+ aye ne Hosheya*+ mwana wa kwa Nuni. 45 Mosesa byo apwishishe kwamba bino byambo byonse ku bena Isalela bonse, 46 wibambijile’mba: “Mutesheko muchima ku byambo byonse bya luno lujimuno lwami lo mbena kwimujimunako lelo jino,+ kuba’mba mukakambizhe baana benu kuteshako muchima kulondela byambo byonse bya mu ino Mizhilo.+ 47 Mambo kechi byo byambo byatu ne, bikemulengela kwikala na bumi,+ kabiji na mambo a bino byambo, mukekala moba avula mu kyalo kyo musakutambula byo musakwabuka Yodano.”
48 Kabiji pa jonkaja juba, Yehoba waambijile Mosesa amba: 49 “Kanjila ku mutumba wa Abalimu,+ Mutumba wa Nebo,+ uji mu kyalo kya Moabu watalañana na Yeliko umone kyalo kya Kenana, kyo mbena kupa bena Isalela kwikala kyabo.+ 50 Kepo usakufwila ponka pa mutumba po usakukanjila, kabiji usakuya na kulaala kwalaala* bashakulu bobe byonkatu Alona kolojobe byo afwijile ku Mutumba wa Hola+ ne kulaala kwalaala bashakulu banji, 51 mambo anweba bonse babiji kechi mwajinga ba kishinka kwi amiwa mu bena Isalela ku mema a ku Meliba+ ku Kadeshi mu kiselebwa kya Zini ne, mambo kechi mwanzhijikile ku meso a bena Isalela ne.+ 52 Kyalo usakwikimwena palepa, bino kechi usakutwelamo mu kyalo kyo mbena kupa bena Isalela ne.”+
33 Ano o mapesho Mosesa muntu wa Lesa wa kine, o apesheshe bena Isalela saka akyangye kufwa.+ 2 Waambile’mba:
“Yehoba waishile kufuma ku Sinai,+
Kabiji wasamine kwi abo kufuma ku Seila.
Wasamine mu lukumo kufuma ku kibunji kya mitumba ya Palana,+
Kabiji wajinga na mabumba* a bamalaika bazhila,+
Wajinga na bashilikale+ ba bulume ku kilujo kyanji.
5 Kabiji Lesa waikele mfumu mu Yeshulunyi,*+
Bakulumpe ba bantu byo bakonkene,+
Pamo na mikoka yonse ya bena Isalela.+
7 Kabiji ano o mapesho o apesheshe Yuda+ amba:
“Anweba Yehoba, umvwai jiwi ja kwa Yuda,+
Kabiji mubwezhai ku bantu banji.
Maboko anji alwilako bintu byanji,
Kabiji mukwashai pa kulwa na balwanyi banji.”+
8 Kabiji waambile pe Levi amba:+
Mwatobokele nanji konka ku mema a ku Meliba,+
9 Yenka waambijile bashanji ne bainanji amba, ‘Kechi nebanemeka ne.’
Nangwatu balongo banji kechi wibatele muchima ne,+
Kabiji walengulwile baana banji.
Mambo balamine byambo byenu,
Kabiji balamine lulayañano lwenu.+
Bapanenga bya kufutumuna kwikala bwema bwawama kwi anweba*+
Ne kulambula mulambo yense pa kya kusokelapo bitapisho kyenu.+
11 Anweba Yehoba, peshai bulume bwanji,
Kabiji sekelai mu mingilo ya maboko anji.
Chimaunai maulu* a boba bamulukuka,
Pa kuba’mba aba bamushikwa bakabule kumulukuka jibiji.”
12 Kabiji waambile pe Benjamina amba:+
“Ye batemwa kwi Yehoba ekale ku matwi nzoo na mambo a aye
Byo abena kumuzhikijila juba jonse,
Ukekala pa bipuzhi byanji.”
13 Kabiji waambile pe Yosefwa amba:+
“Kyalo kyanji, Yehoba ekipeshe+
Na bintu byawama bya mwiulu,
Na kime ne na mema a mu masulo a panshi,+
14 Na bintu byawama bifuma ku juba,
Ne na bintu byawama bya pa ñondo pa ñondo,+
15 Na bintu byawamisha bifuma ku mitumba+ ya kala,*
Na bintu byawama bya ku tutumbatumba twa myaka ne myaka,
16 Na bintu byawama bya pano pa ntanda byonsetu bijipo,+
Ne kumubila bibusa ku yewa wamwekele mu kipupu.+
Bikale pa mutwe wa kwa Yosefwa
Pa lumbwichi lwa yewa ye basala kufuma mu balongo banji.+
17 Lukumo lwanji luji nobe lwa ñombe mulume mubeji,
Ne nsengo yanji yo nsengo ya mboo.
Ukashinjikanga* bantu na ino nsengo
Bonsetu kufika kwapela ntanda
Abano byo biumbi jikumi bya kwa Efelaimu,+
Kabiji byo biumbi bya kwa Manase.”
18 Kabiji waambile pe Zebuluna amba:+
“Obewa Zebuluna, sekela mu mingilo yobe,
Ne obewa Isakala, usekele mu matente obe.+
19 Baketa mitundu ya bantu ku mutumba.
Ko ko bakatapishishanga bitapisho bya bololoke.
Mambo bakamwenangamo mu bunonshi bwavula bwa* mu tulunga twa mema
Ne mu bintu bya buneme* byafyamika mu busenga.”
20 Kabiji waambile pe Gadi amba:+
“Obilwe bibusa awa ubaisha mipaka ya kwa Gadi.+
Walaala konkakwa nobe bokwe,
Saka enengezha kutabaula kuboko, ne kusaba lumbwichi.
21 Ukesajilapo aye mwine kibese kitanshi,+
Mambo akwa ko ko balamina kya kwabilapo kya upana mizhilo.+
Bakulumpe ba bantu bakakonkana pamo.
Ukobilanga bintu mu bololoke bwa Yehoba,
Ne mu mizhilo yanji na bena Isalela.”
22 Kabiji waambile pe Danyi amba:+
“Danyi ye mwana bokwe.+
Ukatumbuka kufuma ku Bashana.”+
23 Kabiji waambile pe Nafitali amba:+
“Nafitali watondwa mambo bamubila bibusa
Kabiji Yehoba wamupesha bingi.
Tambula mpunzha ya ku muzhika ne ya ku kabeta ka ku bulenge.”
24 Kabiji waambile pe Ashela amba:+
“Ashela bamupeshe ekale na baana.
Obilwe bibusa ku balongo banji,
Kabiji atwezhe* maulu anji mu manyi.
25 Kyela kya kapotwe ne mukuba byo bikekala mipingilo ya ku binzhilo byobe,+
Kabiji ukekala mu mutende moba obe onse.*
26 Kafwako waesakana pamo na Lesa wa kine+ wa kwa Yeshulunyi ne,+
Yenka wenda mwiulu kuba’mba akukwashe
Kabiji yenka wenda pa makumbi mu lukumo lwanji.+
28 Bena Isalela bakekala mu mutende,
Ne nsulo ya kwa Yakoba ikeikajila pa bunke,
Mu kyalo muji kajo ne binyu bya katataka,+
Muji jiulu jinokesha kime.+
29 Mwi ba lusekelo, anweba bena Isalela!+
Ñanyi waesakana pamo ne anweba,+
Bantu bo apulusha Yehoba,+
Jikebo jenu ja kufyamamo+
Ne mpoko yenu ya lukumo?
34 Kepo Mosesa afumine mu biselebwa bya Moabu ne kukanjila ku Mutumba wa Nebo,+ peulu ya Pishika,+ watalañana na Yeliko.+ Kabiji Yehoba wamumwesheshe kyalo kyonse kufuma ku Gileada kukafika ne ku Danyi,+ 2 ne kyalo kyonse kya kwa Nafitali ne kyalo kya kwa Efelaimu ne Manase ne kyalo kyonse kya kwa Yuda kukafika ne ku kalunga ka mema ka ku muzhika,*+ 3 ne ku Negeba+ ne ku Nkambi+ ya Yodano, musanza wa Yeliko, muzhi uji na bisonga, kukafika ne ku Zoala.+
4 Kepo Yehoba amwambijile’mba: “Kino kyo kyalo kyo nachipile kwi Abalahama, Izaka ne Yakoba namba, ‘Nkekipana ku mwanobe.’*+ Nakumweshakyo, bino kechi ukabuka ne kutwelamo ne.”+
5 Kabiji Mosesa kalume wa Yehoba wafwijile konkakwa mu kyalo kya Moabu, monka mwaambijile Yehoba.+ 6 Ne aye wamuzhiikile mu kimpachiko kya mu kyalo kya Moabu, kwatalañana na Bete-peola, kabiji kafwako wayuka kuji kilende kyanji ne, kufikatu ne lelo jino.+ 7 Mosesa wajinga na myaka 120 kimye kyo afwile.+ Meso anji kechi alekele kumona ne, kabiji bulume bwanji kechi bwapwile ne. 8 Bena Isalela bamujijile Mosesa pa moba 30 monka mu biselebwa bya mu Moabu.+ Kepo moba a kumujila Mosesa apwile.
9 Kabiji Yoshua mwana wa kwa Nuni wayujile na mupashi wa maana, mambo Mosesa wamutentekele maboko;+ kabiji bena Isalela batatwile kumumvwina, kabiji baubile byonkatu Yehoba byo amukambizhe Mosesa.+ 10 Kabiji mu bena Isalela kechi mwamwekelepo ngauzhi mukwabo wajinga nobe Mosesa,+ Yehoba ye ayukile bingi ne.*+ 11 Waubilenga biyukilo ne bya kukumya byo amutumine Yehoba kuya na kuba mu kyalo kya Ijipita kwi Felo ne ku bakalume banji bonse ne ku kyalo kyanji kyonse,+ 12 kuvwangakotu ne bintu bikatampe ne bintu bilengesha moyo Mosesa byo aubile na kuboko kwa bulume bena Isalela bonse saka bamonako.+
Mu Kihebelu, “baana ba kwa Isalela.”
Kyamweka, mitumba ya ku Lebanoni.
Mu Kihebelu, “lukunwa.”
Nangwa’mba “Kakola.”
Mu Kihebelu, “balengejile michima yetu kusunguluka.”
Ko kuba’mba, masakwa alepesha.
Nangwa, “Lesa wamukosesha.”
Nangwa’mba “mukebazhingijishe ne.”
Nangwa’mba “Kakola.”
Nangwa’mba “Kakola.”
Nangwa’mba “Kakola.”
Ko kuba’mba, Keleta.
Nangwa’mba “Kakola ka Alanonyi.”
Nangwa’mba “kwikala na bisanso nabiji bya pa kusema.”
Nangwa’mba “Kakola ka Alanonyi.”
Nangwa’mba “Kakola.”
Nangwa’mba “Kakola ka Alanonyi.”
Nangwa’mba “mpunzha yazanduka ne kusebalala.”
Nangwa’mba “mbokoshi yo balenga bulongo; kikondo.”
Nangwa, “lujibwe ufiita.”
Kyubichi umo waesakana na masentimita 44.5. Monai bya Kulumbulula B14.
Nangwa’mba “Kakola ka Alanonyi.”
Kulumbulula’mba “Muzhi wa Matente wa Yaila.”
Nangwa’mba “Kakola ka Alanonyi.”
Ko kuba’mba, Kalunga ka Mema Kafwa.
Nangwa’mba “kutesha muchima ku myeo yenu.”
Mu Kihebelu, “kufikatu ne mu muchima wa mwiulu.”
Mu Kihebelu, “Byambo Jikumi.”
Nangwa’mba “kutesha muchima ku myeo yenu.”
Nangwa’mba “ba kya buswanyi kyanji.”
Monai Mutanchi.
Nangwa’mba “mu meseko.”
Mu Kihebelu, “lukunwa.”
Nangwa’mba “mpunzha yazanduka ne kusebalala.”
Nangwa’mba “Kakola ka Alanonyi.”
Ko kuba’mba, Kalunga ka Mema ka Mukele, nangwa’mba Kalunga ka Mema Kafwa.
Nangwa’mba “mu kunsatukila.” Mu Kihebelu, “ku meso ami.”
Nangwa’mba “kipashañano.”
Nangwa’mba “butemwe bwa kishinka.”
Nangwa’mba “ne bintu bikakwendelenga bulongo.”
Mu Kihebelu, “byambo.”
Nangwa’mba “mu bantu bonse ñanyi.”
Monai Mutanchi.
Nangwa’mba “ngovu; bintu.”
Nangwa’mba “kwibibwezhabwezhapo ku; kwibibika mu.”
Mu Kihebelu, “pakachi ka meso enu.”
Ko kuba’mba, kimbo mwa kulamina mema.
Monai Mutanchi.
Nangwa’mba “kipe kyo anemeka.”
Mu Kihebelu, “kuboko.”
Mu Kihebelu, “ukapesha bipangwa bya jivumo jenu.”
Mu Kihebelu, “mukonaune.”
Nangwa, “ukebalengela kususubala; ukebalengela kumanama.”
Nangwa’mba “tukola twa mema.”
Ko kuba’mba, masakwa alepesha.
Nangwa’mba “mukebangatemo.”
Mu Kihebelu, “bauma mashingo.”
Nangwa’mba “mwapwijile.”
Mu Kihebelu, “bauma mashingo.”
Nangwa’mba “kya buswanyi kyenu.”
Nangwa’mba “kya buswanyi kyenu.”
Nangwa’mba “kibokoshi.”
Mu Kihebelu, “Byambo Jikumi.”
Nangwa’mba “mwapwijile.”
Monai Mutanchi.
Nangwa’mba “mwiulu mwalepesha.”
Mu Kihebelu, “kuchiba tulomolomo twa ku.”
Mu Kihebelu, “ne kuleka kukoseshanga mashingo enu ne.”
Nangwa’mba “Mwana wa kishale.”
Nangwa’mba “myeo.”
Nangwa’mba “kufika ne lelo jino.”
Mu Kihebelu, “lukunwa.”
Monai Mutanchi.
Mu Kihebelu, “amiwa,” kulumbulula’mba Lesa.
Monai Mutanchi.
Ko kuba’mba, Kalunga ka Mema Kakatampe ka Meditelanya.
Nangwa’mba “mukapane.”
Nangwa’mba “kuzhikila juba.”
Monai Mutanchi.
Nangwa’mba “kyo alanguluka’mba kyawama.”
Mu Kihebelu, “binzhilo.”
Nangwa’mba “kimye kyonse mweo wenu kyo akakeba.”
Mu Kihebelu, “mukachi ka binzhilo byenu byonse.”
Mu Kihebelu, “binzhilo.”
Nangwa’mba “mambo mweo wenu ubena kukeba.”
Nangwa’mba “kimye kyonse mweo wenu kyo akakeba.”
Mu Kihebelu, “binzhilo.”
Nangwa’mba “kimye kyonse mweo wenu kyo akakeba.”
Nangwa’mba “mweo.”
Nangwa’mba “mweo.”
Monai Mutanchi.
Nangwa’mba “mukwenu uji nobe mweo wobe.”
Nangwa’mba “byo bazhijikile kupichila mu kwibikanya.”
Nangwa’mba “kuteleka ku jiwi ja.”
Nangwa’mba “kipe kyo anemeka.”
Nangwa’mba “bilongolo.”
Mu Kihebelu, “binzhilo.”
Nangwa’mba “kikeba mweo wenu.”
Nangwa’mba “bintu byonse bikakeba mweo wenu.”
Nangwa’mba “mwana wa kishale.”
Nangwa’mba “mukakwachilamo kintu pa kukongwesha.”
Nangwa’mba “mukakwachilemo kintu pa kukongwesha.”
Mu Kihebelu, “muchima wenu.”
Mu Kihebelu, “binzhilo.”
Monai bya Kulumbulula B15.
Mu Kihebelu, “binzhilo.”
Nangwa’mba “mwana wa kishale.”
Nangwa’mba “Bimpampa.”
Nangwa’mba “Bimpampa.”
Mu Kihebelu, “mukachi ka binzhilo byenu byonse.”
Monai Mutanchi.
Nangwa’mba “muvungilo.”
Nangwa’mba “mweo wanji.”
Ko kuba’mba, mpunzha Yehoba yo akasala kuba’mba ikekale ya kupopwelamo.
Nangwa’mba “ukapisha.”
Nangwa’mba “mwapwijile.”
Mu Kihebelu, “na mambo a kuba muchima wanji wakaba.”
Mu Kihebelu, “kumwimena.”
Mu Kihebelu, “Jiso jenu.”
Nangwa’mba “Mweo.”
Nangwa’mba “Mweo.”
Ko kuba’mba, kwiizhijika.
Nangwa’mba “abule kulengela michima ya balongo banji kusunguluka uba nobe muchima wanji.”
Nangwa’mba “kakola.”
Nangwa’mba “kwesakana na bikeba mweo wanji.”
Mu Kihebelu, “bakazhi babiji, umo wamutemwa, mukwabo wamushikwa.”
Nangwa’mba “wabwela wamukana.”
Nangwa’mba “wamukana.”
Shekele umo waesakana na magalamu 11.4. Monai bya Kulumbulula B14.
Nangwa’mba “bupite.”
Mu Kihebelu, “akabule kuvwetula kifunga kya bashanji.”
Nangwa’mba “emwambile bintu byatama.”
Nangwa’mba “kange mukatamishe kintu.”
Ko kuba’mba, kyolonyi.
Nangwa’mba “pite wa ku nzubo ya Lesa.”
Mu Kihebelu, “kabwa.”
Mu Kihebelu, “wamukana.”
Nangwa’mba “kintu kyo alaya kupana.”
Nangwa’mba “kilumbulula kusenda bumi; kilumbulula kusenda mweo.”
Kyambo kya Kihebelu kyatuntululwa’mba “mbumba” kyalumbulula byavula kabiji kyakonsha kuvwangamo ne bikolatu bikwabo bya pa bikoba bisambukilañana. Kabiji kyakonsha kuvwangamo ne bikola bikwabo bisambukilañana bitanwa ku bivwalo ne mu mazubo.
Mu Kihebelu, “binzhilo.”
Nangwa’mba “mwana wa kishale.”
Nangwa’mba “jizhina ja ba mu nzubo yanji.” Mu Kihebelu, “jizhina janji.”
Mu Kihebelu, “Jiso jenu.”
Mu Kihebelu “kwikala na efa ne efa mu nzubo yenu.” Monai bya Kulumbulula B14.
Mu Kihebelu, “bipangwa.”
Nangwa, “bafwilenga.”
Nangwa’mba “mwana wa kishale.”
Mu Kihebelu, “binzhilo.”
Monai Mutanchi.
Nangwa’mba “kipe kyo anemeka.”
Nangwa’mba “ne kulambwizhako nswakala.”
Nangwa’mba “ne kulambwizhako nswakala.”
Nangwa’mba “Kikale byonkabyo!”
Nangwa’mba “mwana wa kishale.”
Mu Kihebelu, “wavwetula kifunga kya bashanji.”
Nangwa’mba “kutapa.”
Nangwa’mba “mashi a mweo wabula mambo.”
Mu Kihebelu, “bipangwa bya jivumo jobe.”
Mu Kihebelu, “bipangwa bya jivumo jobe.”
Mu Kihebelu, “bakemwela kishimpi.”
Nangwa’mba “Bilongolo biji kyungwe.”
Mu Kihebelu, “binzhilo.”
Mu Kihebelu, “bipangwa bya jivumo jobe.”
Nangwa’mba “ne kulengela mweo kupapala.”
Kyambo kya Kihebelu kyakonsha kulumbulula’mba “tuvwi” kabiji bekingijisha kunenañenamo.
Mu Kihebelu, “byo batekezha bulongo pamo na byauma.”
Mu Kihebelu, “bo abujile kwibatongwela.”
Mu Kihebelu, “mukeavuluke jibiji mu muchima wenu.”
Monai Mutanchi.
Mu Kihebelu, “ukatwala ku mukanda.”
Monai Mutanchi.
Monai Mutanchi.
Mu Kihebelu, “kulupuka ne kutwela.”
Nangwa’mba “Bimpampa.”
Mu Kihebelu, “baana ba bacheche.”
Mu Kihebelu, “binzhilo.”
Nangwa’mba “yainga.”
Mu Kihebelu, “ulaale kwalaala bashakulu bobe.”
Nangwa’mba “kuba bupite bwa ku mupashi na.”
Mu Kihebelu, “Mwibibike mu tunwa twabo.”
Mu Kihebelu, “ne kubaya.”
Kyamweka Lesa.
Mu Kihebelu “kuma mashingo.”
Nangwa, “mutundu wa bantu.”
Ko kuba’mba, Yakoba.
Mu Kihebelu, “na mafuta a mikooko.”
Nangwa’mba “mema o bafinanga ku mañanzañanza.”
Kulumbulula’mba “Mololoke,” jo jizhina ja buneme ja bena Isalela.
Nangwa’mba “mukao.”
Nangwa’mba “Shelo,” ko kuba’mba, kilende kya bantu bonse. Monai Mutanchi.
Nangwa, “babula kumvwina byo bebafundako.”
Nangwa’mba “ukelangulusha pa.”
Nangwa’mba “bajiilenga bitapisho byabo byawamisha.”
Nangwa’mba “kutokesha.”
Jo jizhina jine ja kwa Yoshua. Hosheya ke ngipipishilo ya Hoshaaya, jilumbulula’mba “Kumupulusha kwi Yehoba; Yehoba wakupulusha.”
Ino ke ñambilo ya kifwanyikizho pa lufu.
Nangwa’mba “wajinga na makumi a biumbi bya bazhila.”
Kulumbulula’mba “Mololoke,” jo jizhina ja buneme ja bena Isalela.
Byambo bya kuba’mba“wenu” ne “anweba” mu kino kyepelo bibena kwamba pe Lesa.
Mu Kihebelu, “mu myona yenu.”
Nangwa’mba “majoma.”
Nangwa, “mitumba ya ku musela
Nangwa’mba “Ukasanga.”
Mu Kihebelu, “bakamwanga byavula bya.”
Nangwa’mba “bunonshi.”
Nangwa’mba “ovwe.”
Mu Kihebelu, “Kabiji byonka bikekala moba obe byo bikekala ne bulume bobe.”
Nangwa, “mapunzha atuntama.”
Ko kuba’mba, Kalunga ka Mema Kakatampe ka Meditelanya
Mu Kihebelu, “lukunwa wobe.”
Mu Kihebelu, “ayukile kilungi na kilungi ne.”