BUKU WA BUBIJI WA BYAMBO BYA MOBA
1 Solomone mwana wa kwa Davida wayilengatu na kukosa mu bufumu bwanji, kabiji Yehoba Lesa wanji wajinga nanji kabiji wamulengejile kutumbalala bingi.+
2 Solomone waichile bena Isalela bonse, bakulumpe ba biumbi ne ba bitota, bamitonyi ne babinemanga bonse ba bena Isalela bonse, bakulumpe ba bikota. 3 Kepo Solomone ne kipwilo kyonse bayile ku mpunzha yatuntama ku Gibeona,+ mambo ko kwajinga tente wa lusambakeno wa Lesa wa kine, yenka tente walengele Mosesa kalume wa Yehoba mu kiselebwa. 4 Nangwa byonkabyo, Davida wasendele Jikwachi ja Lesa wa kine kufuma ku Kiliata-yealimu+ ne kwijileta ku mpunzha yo ejinengezhejile; wijipopejile tente mu Yelusalema.+ 5 Kabiji kya kusokelapo bitapisho kya mukuba+ kyalengele Bezalela+ mwana wa kwa Uli, Uli mwana wa kwa Hula, bekibikile kulutwe ya tente wa lusambakeno wa Yehoba; kabiji Solomone ne kipwilo balombelanga kulutwe yakyo.* 6 Solomone walambwile milambo kwi Yehoba, kabiji walambwile banyama ba milambo ya kusoka 1,000 pa kya kusokelapo bitapisho kya mukuba+ kyajinga ku tente wa lusambakeno.
7 Bonkabwa bufuku Lesa wamwekele kwi Solomone ne kumwambila’mba: “Ndombe kintu kyo ukeba’mba nkupe.”+ 8 Ponkapo Solomone waambijile Lesa amba: “Anweba mwamwesha batata ba Davida+ butemwe bukatampe bubula kwaluka, kabiji mwanswanyika pa bufumu bwabo.+ 9 Pano anweba Yehoba Lesa, mulaye ye mwalayile batata ba Davida ekale wa kishinka,+ mambo anweba mwantongola kwikala mfumu pa bantu bavula nobe lukungu lwa panshi.+ 10 Pano mpai maana ne muchima+ wa kuyuka bya kutangijila bano bantu,* mambo ñanyi wakonsha kuchibila mambo bano bantu benu bavula bibye?”+
11 Kepo Lesa aambijile Solomone amba: “Na mambo a kuba’mba kino kyo kyasaka muchima wobe kabiji kechi walomba bubile, bunonshi, ne munema nangwa’mba aba bakushikwa bafwe* nangwa’mba wikale myaka* yavula ne, bino walomba maana ne muchima wa kuyuka bya kuchibila bantu bami mambo bo nakutongwelapo namba wikale mfumu wabo,+ 12 nsakukupa maana ne muchima wa kuyuka bintu; bino nsakukupa ne bubile ne bunonshi ne munema kya kuba kafwako bamfumu bajingako kala bajingapo nabyo ne, kabiji kafwako ukalondela pe obewa ukekala nabyo ne.”+
13 Onkao mambo, Solomone wafumine pa mpunzha yatuntama ku Gibeona,+ konka ku tente wa lusambakeno, ne kubwela ku Yelusalema; kabiji walaminenga bena Isalela. 14 Solomone watwajijile kuvuzha makalaki ne bambili;* wajinga na makalaki 1,400 ne bambili* 12,000,+ kabiji wibibikile mu mizhi ya kulaminamo makalaki+ mu Yelusalema kwipi na kwaikelanga mfumu.+ 15 Mfumu wavuzhizhe bingi siliva ne ngolode mu Yelusalema nobe mabwe,+ ne bichi bya sida byavujile nobe bichi bya mikuyu bya mu Shefela.+ 16 Bambili ba kwa Solomone bebafumishe ku Ijipita,+ kabiji jibumba ja bapoteshi ba mfumu japotanga bambili mu bipanyi* pa mutengo umo.+ 17 Kalaki umo ye bafumyanga ku Ijipita bamupotanga na mashekele a siliva 600, ne mbili umo bamupotanga mashekele 150; ne abo bebipoteshanga ku bamfumu bonse ba bena Hiti ne ku bamfumu ba ku Silya.
2 Solomone wakambizhe’mba bashimike nzubo mwa kutumbijikila jizhina ja Yehoba+ ne nzubo ya bufumu bwanji mwine.+ 2 Solomone wanembele bantu 70,000 baingilangatu mingilo ikwabo, ne bantu 80,000 bachibanga mabwe ku mitumba,+ ne bakapitao 3,600 ba kwibasopa.+ 3 Kabiji Solomone watumine jiwi kwi Hilama+ mfumu wa Tila amba: “Mungubile byonka byo mwaubijile batata ba Davida kimye kyo mwibatumijile bichi bya sida bya kushimikila nzubo yabo ya kwikalamo.+ 4 Mbena kushimika nzubo ya kutumbijikilamo jizhina ja Yehoba Lesa wami, kuba’mba neizhijike, ya kusokelangamo bya kufutumuna binunka bulongo+ kwi aye, kabiji ya kubikamo kimye kyonse bashinkwa batentakana+ ne milambo ya kusoka, lukelo ne mabanga,+ pa moba a Sabado,+ pa kutentama kwa ñondo,+ ne pa bijiilo bya Yehoba Lesa wetu.+ Uno ke mukambizho wa kikupu wa bena Isalela. 5 Nzubo yo mbena kushimika ikabaya bingi, mambo Lesa wetu ye mukatampe kukila balesa bonse. 6 Ñanyi wakonsha kumushimikila nzubo? Mambo mwiulu ne mwiulu mwine mwamukepela,+ pano yami ñanyi kuba’mba namushimikile nzubo? Nakonsha kumushimikilatu nzubo mwa kusokela bitapisho bya kufutumuna kwi aye. 7 Pano ntuminai sendwe wayuka kwingila na ngolode, siliva, mukuba,+ kapotwe, tonge wachiluluka, wachijisha, ne wa kifufya kabiji wayuka kunemba kya kukololola. Ukengilanga mu Yuda ne mu Yelusalema na basendwe bami, bo batongwele ku batata ba Davida.+ 8 Kabiji muntumine bichi bya sida, bya yunipa+ ne bya alemuga+ bya ku Lebanoni, mambo nayuka namba bakalume benu bayuka bingi kutema bichi bya ku Lebanoni.+ Bakalume bami bakengijilanga pamo na bakalume benu+ 9 pa kunnengezhezha bichi byavula, mambo nzubo yo mbena kushimika ikabaya bingi. 10 Pano umvwai! Nkebapa kajo bakalume benu+ batema bichi: Makolo* a wichi 20,000, makolo a mbaale 20,000, mabbafi* a binyu 20,000, ne mabbafi a manyi 20,000.”
11 Ponkapo Hilama mfumu wa Tila wanembele bino byambo ne kwibituma kwi Solomone amba: “Na mambo a kuba Yehoba watemwa bantu banji, wimulengela kwikala mfumu wabo.” 12 Kepo Hilama aambile’mba: “Atotwe Yehoba, Lesa wa Isalela, walengele jiulu ne ntanda, mambo wapa Mfumu Davida mwana wa maana,+ uji na milangwe kabiji ukwatakanya bintu,+ yenka ukashimikila Yehoba nzubo ne nzubo ya bufumu bwanji mwine. 13 Pano mbena kutuma sendwe uji na maana a kukwatakanya bintu, aye Hulamabi,+ 14 mwana wa mwanamukazhi mwina Danyi, bino shanji wajinga mwina Tila; aye wayuka bulongo bya kwingila na ngolode, siliva, mukuba, kapotwe, mabwe, bichi, tonge wachiluluka, tonge wa kifufya, bisapi byawama, ne tonge wachijisha.+ Wakonsha kunemba kya kukololola mu misango yonse ne kulenga kintu kyonse kyo bamubuula.+ Ukengilanga na basendwe benu ne na basendwe ba nkambo yami, shenu Davida. 15 Pano anweba nkambo yami tumai wichi, mbaale, manyi ne binyu byo mwitulaya atweba bakalume benu.+ 16 Ne atweba tukatema bichi bya ku Lebanoni,+ byavula kwesakana na byo mubena kukeba, kabiji tukebikasa nobe bikwepe ne kwibileta kwi anweba pa kalunga ka mema ku Yopa;+ apa bino mukebitwale ku Yelusalema.”+
17 Solomone wabajile banabalume bonse bajinga benyi mu kyalo kya Isalela,+ byonka byabajile shanji+ Davida, kabiji bajinga 153,600. 18 Byonkabyo, watongwele bantu 70,000 baingilangatu mingilo ikwabo, ne bantu 80,000 bachibanga mabwe+ ku mitumba, ne bantu 3,600 kwikala bakapitao ba kusopa bantu baingijilenga mwingilo.+
3 Kepo Solomone atendekele kushimika nzubo ya Yehoba+ mu Yelusalema pa Mutumba wa Moliya,+ ponka Yehoba po amwekele kwi Davida shanji,+ pa mpunzha Davida yo anengezhezhe pa kipujilo kya kwa Olananyi+ mwina Yebusi. 2 Watendekele kushimika pa juba ja bubiji mu ñondo wa bubiji, mu mwaka wa buna wa bukalama bwanji. 3 Kabiji kitendekesho Solomone kyo aajile kya kushimikilapo nzubo ya Lesa wa kine kyajinga makyubichi 60 mu bula ne makyubichi 20 mu bwipi,+ monka mwayijile kipimo* kya kala. 4 Kibamba kya pa kibelo mu bula kyalepele makyubichi 20, kyaesakene na bwipi bwa nzubo* ine, kabiji mu kimino kyalepele 120;* kabiji mukachi wikishingile ngolode yawamisha.+ 5 Walamikileko mapulanga a yunipa ku nzubo ikatampe ne kushingako ngolode yawamisha,+ kepo anembelepo bipashañano bya bisonga+ ne minyololo.+ 6 Kabiji walamikile ku nzubo mabwe awama a buneme;+ kabiji ngolode+ yo aingijishe yajinga ya ku Pavaimu. 7 Washingile ngolode ku nzubo, ku myamba, pa bibelo, ku bibumbulu, ne ku binzhilo;+ kabiji wanembele bakelubi kya kukololola pa bibumbulu.+
8 Kepo ashimikile kibamba* kya Mwazhijisha;+ bula bwakyo bwaesakene na bwipi bwa nzubo, makyubichi 20, ne mu bwipi bwakyo kyajinga makyubichi 20. Kabiji wikishingile matalenta* a ngolode yawamisha 600.+ 9 Ngolode yo bashingile ku misomali yanemene mashekele* 50; kabiji washingile ngolode ku bibamba bya peulu.
10 Kabiji mu kibamba* kya Mwazhijisha walengejilemo bipashañano bya bakelubi babiji, kabiji wibashingile ngolode.+ 11 Bula bwa byapi byonse bya bakelubi+ bwajinga makyubichi 20; kyapi kimo kya kelubi mutanshi kyalepele makyubichi atanu kabiji kyakinkile ku lubumbulu lwa nzubo, ne kyapi kyanji kikwabo kyalepele makyubichi atanu kabiji kyakinkile ku kyapi kya kelubi mukwabo. 12 Kabiji kyapi kimo kya kelubi mukwabo kyalepele makyubichi atanu kabiji kyakinkile ku lubumbulu wa nzubo mukwabo, ne kyapi kyanji kikwabo kyalepele makyubichi atanu kabiji kyakinkile ku kyapi kimo kya kelubi mutanshi. 13 Byapi bya bano bakelubi byatanamine makyubichi 20; kabiji baimene na maulu saka batala mukachi.*
14 Kabiji walengele ne kipembe+ na tonge wa kifufya, wachiluluka, wachijisha, ne kisapi kyawama, kabiji walukijilepo bakelubi.+
15 Kabiji walengejileko mashiki abiji+ kulutwe ya nzubo, mu bula ajinga makyubichi 35, ne mutwe wa jishiki jimo jimo wajinga makyubichi atanu.+ 16 Kabiji walengele minyololo yapasha bupela, ne kwiibika peulu ya mashiki, kabiji walengele mapomegulanchi 100 ne kwialamika ku minyololo. 17 Waimikile mashiki kulutwe ya nzubo ya Lesa, jimo ku kilujo* ne jikwabo ku kipiko;* jajinga ku kilujo wijitumbile’mba Yakina* ne jajinga ku kipiko wijitumbile’mba Boaza.*
4 Kabiji walengele kya kusokelapo bitapisho kya mukuba,+ mu bula kyajinga makyubichi 20, mu bwipi kyajinga makyubichi 20, ne mu kimino kyajinga makyubichi jikumi.
2 Walengele Kizhiba*+ kya kyela. Kyajinga kya kizhingu, kufuma bushiya ne bushiya bwa muvumbo pajinga makyubichi jikumi, mu kimino kyajinga makyubichi atanu, kabiji pa kupima mo kyazhokolokela, baingijishe lutambo wa kupiminako walepele makyubichi 30.+ 3 Kabiji kwajinga bintu byapasha bainamunwa+ kunshi yakyo, byazhokolokeleko, byajinga jikumi mu kyubichi umo kuzhokoloka Kizhiba. Bainamunwa bajinga mu mikuku ibiji yalengejilwe kumo nakyo. 4 Bekitentekele pa bañombe 12,+ basatu batajile ku kabeta ka ku buyeke, bakwabo basatu batajile ku muzhika, ne bakwabo basatu batajile ku kabeta ka ku bulenge, kabiji bakwabo basatu batajile ku musela; ne Kizhiba bekitentekele pa bañombe, kabiji bya matako byabo byonse byajinga na pakachi ka kizhiba. 5 Mujita wakyo wajinga nobe mu bwipi bwa kuboko;* ne muvumbo wakyo wajinga nobe muvumbo wa kapu, nobe jiluba jakenuka. Kyatwezhanga mabbafi* a mema 3,000.
6 Kabiji walengele mashomeka jikumi a kowelamo kabiji wabikile atanu ku kilujo ne akwabo atanu ku kipiko.+ Baovwelangamo bintu byo baingijishanga ku mulambo wa kusoka.+ Bino Kizhiba kyo kyajinga kya kowamo bañanga.+
7 Kabiji walengele bya kutulapo malampi bya ngolode jikumi+ monka mo bebitongwejile,+ kabiji wibibikile mu nzubo ya Lesa, bitanu ku kilujo ne bikwabo bitanu ku kipiko.+
8 Kabiji walengele ne matebulu jikumi ne kwiabika mu nzubo ya Lesa, atanu ku kilujo ne akwabo atanu ku kipiko;+ kabiji walengele masanyi afukumana a ngolode 100.
9 Kepo alengele kipango+ kya bañanga+ ne lubanza mukatampe*+ ne binzhilo bya kipango, kabiji wibishingile mukuba. 10 Kabiji wabikile Kizhiba ku kilujo, ku kabeta ka ku bulenge na ku musela.+
11 Hilama walengele ne bikopo, mafosholo ne masanyi afukumana.+
Byonkabyo, Hilama wapwishishe kwingila mingilo ya Mfumu Solomone ya ku nzubo ya Lesa wa kine:+ 12 mashiki abiji+ ne mitwe yapasha masanyi afukumana yajinga kwiulu ya mashiki abiji; makonde abiji+ avwetele mitwe ibiji yapasha masanyi afukumana yajinga kwiulu ya mashiki; 13 mapomegulanchi 400+ a ku makonde abiji, mikuku ibiji ya mapomegulanchi ku bukonde bumo, a kuvweta ku mitwe ibiji yapasha masanyi afukumana yajinga kwiulu ya mashiki;+ 14 bikochikala* jikumi ne mashomeka jikumi ajinga pa bikochikala;+ 15 Kizhiba ne bañombe 12 po bekitentekele;+ 16 ne bikopo, mafosholo, mafoloko,+ ne bipe byabyo byonse Hulamabi+ byo alengejile Mfumu Solomone bya mukuba ye batubwile bulongo bya ku nzubo ya Yehoba. 17 Mfumu wibilengejile mu nkambi ya Yodano mu buchimba bwakosa pakachi ka Sukota+ ne Zeleda. 18 Solomone walengele bino bipe byonse byavula bingi; kinemenezhi kya mukuba kechi kyayukanyikilwe ne.+
19 Solomone walengele bipe byonse+ bya ku nzubo ya Lesa wa kine: kya kusokelapo bitapisho kya ngolode,+ matebulu+ pajinga bashinkwa ba kupana kwi Lesa;+ 20 bya kutulapo malampi ne malampi abyo a ngolode yawama,+ kuba’mba ateemenga kulutwe ya kibamba kya mwine mukachi monka mwayijile mizhilo; 21 ne maluba, malampi, ne tubimano, byajinga bya ngolode, ngolode yawamisha; 22 bya kuzhimyako mujilo, masanyi afukumana, makapu, bya kwapwilapo mujilo, byajinga bya ngolode yawama; ne kibelo kya nzubo, ne binzhilo byayo bya mukachi bya Mwazhijisha,+ ne binzhilo bya ku nzubo ya Lesa, byajinga bya ngolode.+
5 Byonkabyo, Solomone wapwishishe kwingila mingilo yonse ya ku nzubo ya Yehoba.+ Kepo Solomone aletele bintu byonse byazhijikile Davida shanji+, kabiji wabikile siliva, ngolode ne bipe byonse mwa kulamina bya buneme mu nzubo ya Lesa wa kine.+ 2 Pa kyo kya kimye, Solomone wakonkenye pamo bakulumpe ba bena Isalela, bantangi bonse ba mikoka ne babinemanga ba bikota bya bena Isalela. Baishile ku Yelusalema ne kuleta jikwachi ja lulayañano lwa Yehoba kufuma mu Muzhi wa Davida,+ ko kuba’mba Ziona.+ 3 Banabalume bonse bena Isalela bakonkene pamo ku mfumu ku kijiilo* kyaikalangako mu ñondo wa butanu na bubiji.+
4 Byonkabyo, bakulumpe bonse ba bena Isalela baishile, kabiji bena Levi bashikwile Jikwachi.+ 5 Baletele Jikwachi, tente wa lusambakeno+ ne bipe byonse byazhila byajinga mu tente. Bañanga ne bena Levi* bo bebiletele. 6 Mfumu Solomone ne jibumba jonse ja bena Isalela bo baichile kukonkena pamo ne aye, bajinga konka ku Jikwachi. Onkao mambo, batapishenga mikooko yavula ne bañombe+ kya kuba kechi bakonsheshe kwibabala nangwa kuyuka kuvula kwabo ne. 7 Kepo bañanga baletele jikwachi ja lulayañano lwa Yehoba mu mpunzha yajo, monka mu kibamba kya mwine mukachi ka nzubo, Mwazhijisha, munshi ya byapi bya bakelubi.+ 8 Kabiji byapi bya bakelubi byatanamijile pa mpunzha pajinga Jikwachi, kya kuba bakelubi bavwetele Jikwachi ne mibanda yajo.+ 9 Mibanda yalepele kya kuba ne ko yapelela kwamwekelenga mu kibamba Mwazhila kulutwe ya kibamba kya mwine mukachi, bino kechi yamwekelenga pangye ne. Kabiji iji monkamwa kufika ne lelo jino. 10 Mu jino Jikwachi mwajingatu mabwe abiji apapakana abikilemo Mosesa ku Holeba,+ kimye Yehoba kyo alayañene lulayañano+ na bena Isalela byo bafuminenga mu Ijipita.+
11 Bañanga byo balupukile mwazhila (mambo bañanga bonse bajingapo bezhijikile,+ kechi na mambo a bipanyi byabo ne),+ 12 banyimbi bonse bena Levi+ ba kwa Asafwa,+ ba kwa Hemanyi,+ ba kwa Yedutuna+ ne baana babo ne balongo babo bavwajile bisapi byawama, saka baji na nsonsolo, bijimba bya mizhinge ne byansa; baimene ku musela wa kya kusokelapo bitapisho, pamo na bañanga 120 bavuminyenga matolompita.+ 13 Kimye bavumya matolompita ne banyimbi kyo batotelenga ne kusanchila Yehoba na jiwi jimo, ne kuvuma kwa matolompita, ne kwa nsonsolo ne kwa bijimba bya mizhinge byo kwayilenga mwiulu pa kutota Yehoba amba, “mambo wawama; butemwe bwanji bubula kwaluka bo bwa myaka ne myaka,”+ kepo nzubo, nzubo ya Yehoba yayujile jikumbi.+ 14 Bañanga bakankelwe kwingila mwingilo wabo na mambo a jikumbi, mambo lukumo lwa Yehoba lwayujile mu nzubo ya Lesa wa kine.+
6 Pa kyo kya kimye Solomone waambile’mba: “Anweba Yehoba mwaambile’mba mukekala mu mfishi yafiitatu bwii.+ 2 Pano nemushimikila nzubo ya lukumo, mpunzha mo mukekalanga myaka ne myaka.”+
3 Kabiji mfumu waalulukile ne kupesha kipwilo kyonse kya bena Isalela, kipwilo kyonse kya bena Isalela saka kyaimana.+ 4 Waambile’mba: “Atotwe Yehoba Lesa wa Isalela, yenka walayile batata ba Davida na kanwa kanji kabiji yenka wafikizha na maboko anji kyo alayile’mba, 5 ‘Kufumatu juba jo nafumishe bantu bami mu kyalo kya Ijipita, kechi nasajilepo muzhi nangwa umo mu mikoka yonse ya bena Isalela mwa kushimikila nzubo kuba’mba jizhina jami jikekalengamo ne,+ kabiji kechi nasala muntu kwikala ntangi wa bantu bami bena Isalela ne. 6 Bino nasala Yelusalema+ kuba’mba mukekalenga jizhina jami, kabiji nasala Davida kulama bantu bami bena Isalela.’+ 7 Kabiji batata ba Davida bakebeshe bingi kushimika nzubo ya kutumbijikilamo jizhina ja Yehoba Lesa wa Isalela.+ 8 Bino Yehoba waambijile batata ba Davida amba, ‘Muchima wobe wakebeshe bingi kushimika nzubo ya kutumbijikilamo jizhina jami, kabiji waubile bingi bulongo kukebesha kino mu muchima wobe. 9 Pano bino, kechi ukashimika nzubo ne, mwanobe ye ukasema* ye ukashimika nzubo ya kutumbijikilamo jizhina jami.’+ 10 Yehoba wafikizha mulaye ye alayile, mambo naswana batata ba Davida kabiji naikala pa jitanda ja bena Isalela+ byonkatu Yehoba byo alayile.+ Nashimika ne nzubo ya kutumbijikilamo jizhina ja Yehoba Lesa wa Isalela, 11 kabiji mo mo nabika Jikwachi muji lulayañano+ Yehoba lo alayañene na bena Isalela.”
12 Kepo aimene kwipi na kya kusokelapo bitapisho kya Yehoba kulutwe ya kipwilo kyonse kya bena Isalela, kabiji watanyikile maboko anji.+ 13 (Mambo Solomone walengele mutuntamo wa mukuba kabiji wamubikile pakachi ka kipango.*+ Mu bula wajinga makyubichi atanu,* mu bwipi wajinga makyubichi atanu ne mu kimino wajinga makyubichi asatu; kabiji waimene ponka.) Kabiji wafukamine kulutwe ya kipwilo kyonse kya bena Isalela ne kutanyika maboko anji mwiulu,+ 14 ne kwamba’mba: “Anweba Yehoba Lesa wa Isalela, kafwako Lesa mukwabo waesakana ne anweba mwiulu nangwa pano panshi ne, anweba mulama lulayañano ne kumwesha butemwe bubula kwaluka ku bakalume benu benda nenu na muchima wabo yense.+ 15 Mwalama mulaye ye mwalayile batata ba Davida bakalume benu.+ Mwalayile na kanwa kenu, kabiji lelo jino mwamufikizha na kuboko kwenu.+ 16 Pano anweba Yehoba Lesa wa Isalela, lamai mulaye ye mwalayile batata ba Davida bakalume benu byo mwaambile’mba: ‘Mu kisemi kyobe kechi mukabula muntu wa kwikala pa jitanda ja bena Isalela ku meso ami ne, inge baana bobe bakateshe muchima ku mashinda abo ne kwenda ne amiwa,+ byonkatu byo waendelenga ne amiwa.’+ 17 Pano anweba Yehoba Lesa wa Isalela, fikizhai mulaye ye mwalayile ba Davida bakalume benu.
18 “Bino anweba Lesa, nanchi mwakonsha kwikala pamo na bantu pano pa ntanda nyi?+ Talai! Mwiulu, ee kine, mwiulu mwine, mwimukepela;+ pano nga ino nzubo yo nashimika kyakonsha kupela pi!+ 19 Pano teshai muchima ku lulombelo lwami amiwa kalume wenu ne ku misashijilo yami, anweba Yehoba Lesa wami, kabiji telekai kujila kwa kukeba bukwasho ne ku lulombelo lo mbena kulomba kwi anweba amiwa kalume wenu. 20 Meso enu atalenga pa ino nzubo mute ne bufuku, ponka pa mpunzha yo mwaambile’mba mo mukekala jizhina jenu,+ ne kuteleka ku lulombelo lo nkalombanga amiwa kalume wenu saka ntala ku ino mpunzha. 21 Kabiji mutelekenga ku misashijilo yami ya kukeba bukwasho amiwa kalume wenu ne ku misashijilo ya bantu benu bena Isalela byo bakalombanga saka batala ku ino mpunzha,+ kabiji mutelekenga monka mo mwikala, mwiulu;+ ee kine, mutelekenga ne kwitulekelako mambo.+
22 “Muntu inge walenga mambo mukwabo, kabiji uno mukwabo wamuchipisha* ne aye waswa kuchipa,* kabiji byo achipa luchipo* waiya ku kya kusokelapo bitapisho kyenu kiji ku ino nzubo,+ 23 mukomvwe monka mwiulu ne kuchibila bakalume benu mambo ne kuzhachisha mubi ne kumukambula monka mwayila byubilo byanji,+ ne kubingisha awa waoloka ne kumufweta monka mwayila bololoke bwanji.+
24 “Kabiji inge bantu benu bena Isalela bakebashinde ku balwanyi babo na mambo a kutwajijila kwimulenga mambo,+ kabiji bakalulukile kwi anweba jibiji ne kutumbijika jizhina jenu+ ne kulomba+ ne kwimusashijila’mba mwibobile bibusa mu ino nzubo,+ 25 mukomvwe monka mwiulu+ ne kwibalekelako mambo bantu benu bena Isalela ne kwibabwezha mu kyalo kyo mwibapele abo ne bashakulu babo.+
26 “Inge mwiulu mukashinkike ne mvula akabule kunoka+ na mambo a kutwajijila kwimulenga mambo,+ ne abo bakalombe saka batala ku ino mpunzha ne kutumbijika jizhina jenu ne kuvundamina ku bubi bwabo na mambo a kuba mwibapelula,*+ 27 mukomvwe monka mwiulu ne kwibalekelako mambo bakalume benu, bantu benu bena Isalela, mambo anweba mukebabuula jishinda jawama jo bafwainwa kwendamo;+ kabiji mukalete mvula+ mu kyalo kyenu kyo mwapele bantu benu kwikala buswanyi bwabo.
28 “Inge mu kyalo mukekale kipowe kya nzala,+ nangwa mwalo,+ kyuya kisokañana, kabuwa,+ nzhiye nangwa nzhiye* iji na nzala ikatampe;+ nangwa inge balwanyi babo bebazhokoloka mu muzhi umo wa mu kyalo*+ nangwa inge kwaiya kinkunka nangwa kikolatu kikwabo,+ 29 milombelo yonse+ nangwa misashijilo+ yonse muntu yense yo akalomba nangwa bantu benu bonse bena Isalela (mambo muntu yense uyuka kintu kimukatazha ne misongo yanji)+ byo bakatanyikilanga maboko abo ku ino nzubo,+ 30 mukomvwe monka mwiulu, mo mwikala,+ kabiji mukebalekeleko mambo;+ ne kwibafweta pa muntu pa muntu monka mwayila mashinda abo onse, mambo anweba mwayuka michima yabo (yenu yenka mwayuka michima ya bantu),+ 31 pa kuba’mba bakemwakamwenga ne kwenda mu mashinda enu moba onse o bakekalanga mu kyalo kyo mwapele bashakulu betu.
32 “Kabiji muntu wafuma ku kyalo kingi wabula wa mu bantu benu bena Isalela, wafuma ku kyalo kiji kwalepa na mambo a jizhina* jenu jikatampe+ ne na mambo a kuboko kwenu kwakosa kabiji kwa bulume, waiya na kulomba saka atala ku ino nzubo,+ 33 mukomvwe monka mwiulu mo mwikala, ne kumupa byonse byo akemulomba awa muntu wafuma ku kyalo kingi, kuba’mba bantu bonse ba pano pa ntanda bakayuke jizhina jenu+ ne kwimwakamwa, byonka bimwakamwa bantu benu bena Isalela, kabiji bakayuke’mba jizhina jenu jitelwa pa ino nzubo yo nashimika.
34 “Inge bantu benu baya na kulwa na balwanyi babo monka mo mukebatumina+ kabiji bakalombe+ kwi anweba saka batala ku uno muzhi ye mwasala ne ku ino nzubo yo nashimika ya kutumbijikilamo jizhina jenu,+ 35 mukomvwe monka mwiulu lulombelo lwabo ne misashijilo yabo ne kwibalwilako.+
36 “Inge bemulenga mambo (mambo kafwako muntu ubula kulenga mambo ne),+ kabiji mwibazhingijila ne kwibapana ku balwanyi babo, kabiji aba bebakwata bebatwala mu buzha ku kyalo kiji kwalepa nangwa kiji kwipi,+ 37 kabiji inge bayuka’mba kintu kyo baubile kyatama saka baji mu kyalo mo bebatwajile buzha, kabiji baalulukila kwi anweba ne kwimusashijila mu kyalo mo baikala buzha amba mwibobile lusa ne kwamba’mba, ‘Twalenga mambo kabiji twauba kintu kyatama; twauba bubi,’+ 38 kabiji inge baalulukila kwi anweba na muchima wabo yense+ ne na mweo* wabo yense mu kyalo mo baikala buzha+ mo bebatwajile, kabiji balomba saka batala ku kyalo kyabo kyo mwapele bashakulu babo ne ku muzhi ye mwasajile+ ne ku nzubo yo nashimika ya kutumbijikilamo jizhina jenu, 39 mukomvwe monka mwiulu mo mwikala, lulombelo lwabo ne misashijilo yabo, kabiji mukebachibile mambo bulongo+ ne kwibalekelako mambo bantu benu bemulengele mambo.
40 “Pano anweba Lesa wami, nemusashijila namba, meso enu alabenga ne matwi enu atelekenga ku milombelo yo bakalombanga mu ino mpunzha.+ 41 Pano anweba Yehoba Lesa, yainga mwa kukokolokela mwenu,+ anweba ne Jikwachi jimwesha’mba muji na bulume. Anweba Yehoba Lesa, lekai bañanga benu bavwale lupulukilo kabiji lekai bantu benu ba kishinka basangalele mu buwame bwenu.+ 42 Anweba Yehoba Lesa, kange mukane* mushingwa wenu ne.+ Vulukai butemwe bwenu bubula kwaluka bo mwamwesheshe Davida kalume wenu.”+
7 Solomone byo apwishishetu kulomba,+ mujilo wafumine mwiulu+ ne kusoka mulambo wa kusoka ne bitapisho, kabiji lukumo lwa Yehoba lwayujile mu nzubo.+ 2 Bañanga bakankelwe kutwela mu nzubo ya Yehoba mambo lukumo lwa Yehoba lwayujile mu nzubo ya Yehoba.+ 3 Kabiji bena Isalela bonse bamwene mujilo byo afumine mwiulu ne lukumo lwa Yehoba byo lwaikele peulu ya nzubo, kabiji bafukamine ne kukinka bilungi byabo panshi pa kyalanta kabiji baponene kinkuvumene ne kusanchila Yehoba, “mambo wawama; ne butemwe bwanji bubula kwaluka bo bwa myaka ne myaka.”
4 Kabiji mfumu ne bantu bonse batapishenga bitapisho kwi Yehoba.+ 5 Mfumu Solomone watapishe kitapisho kya bañombe 22,000 ne mikooko 120,000. Byonkabyo, mfumu ne bantu bonse bazhijikile nzubo ya Lesa wa kine.+ 6 Bañanga baimene mu bifulo byabo bya mingilo, pamo na bena Levi bajinga na byombesha bya kwimbilako nyimbo kwi Yehoba.+ (Mfumu Davida walengele bino byombesha bya kusanchilako Yehoba—“mambo butemwe bwanji bubula kwaluka bo bwa myaka ne myaka”—Davida byo atotanga Lesa pamo nabo.*) Kabiji bañanga bavuminyenga bingi matolompita+ kulutwe yabo, bena Isalela bonse saka baimana.
7 Kepo Solomone azhijikile pakachi ka kipango kulutwe ya nzubo ya Yehoba, mambo ponkapa po po alambwijile milambo ya kusoka,+ ne mafuta a bitapisho bya mutende, mambo pa kya kusokelapo bitapisho kya mukuba+ Solomone kyo alengele kechi pakonsheshe kukumbana bitapisho bya kusoka, milambo ya kajo+ ne mafuta ne.+ 8 Pa kyonkakya kimye Solomone waikele na kijiilo kya moba atanu na abiji+ pamo na bena Isalela bonse, kipwilo kikatampe kufuma ku Lebo-hamata* kukafika ne ku Kimpachiko kya Ijipita.+ 9 Bino pa juba* ja butanu na busatu bajinga na kubuñana kwazhila,+ mambo bazhijikile kya kusokelapo bitapisho pa moba atanu na abiji kabiji bajinga na kijiilo pa moba atanu na abiji. 10 Kabiji pa juba ja bu 23 mu ñondo wa butanu na bubiji, waambijile bantu kubwela ku mazubo abo saka basangalala+ ne kumvwa bulongo ku michima pa bintu byonse byawama Yehoba byo aubijile Davida ne Solomone ne bantu banji bena Isalela.+
11 Byonkabyo, Solomone wapwishishe nzubo ya Yehoba ne nzubo* ya mfumu;+ ne bintu byonse byakebelenga kuba muchima wa kwa Solomone ku nzubo ya Yehoba ne ku nzubo yanji, byonse wibyubile.+ 12 Kepo Yehoba amwekele kwi Solomone+ bufuku ne kumwambila’mba: “Naumvwa lulombelo lobe, kabiji nasala ino mpunzha kwikala nzubo ya kitapisho.+ 13 Inge mwiulu nashinkamo kabiji kwabula kunoka mvula, kabiji inge nakambizha bateete konauna kyalo, kabiji inge natuma mwalo mu bantu bami, 14 inge bantu bami batelwa pa jizhina jami+ bepelula+ ne kulomba ne kunkeba ne kuvundamina ku mashinda abo atama,+ po po nkomvwa mwiulu ne kwibalekelako mambo abo ne kubuka kyalo kyabo.+ 15 Meso ami akalabanga ne matwi ami akatelekanga ku milombelo yo bakalombanga mu ino mpunzha.+ 16 Nasala ino nzubo ne kwiizhijika kuba’mba jizhina jami jikekalenga monka kikupu,+ kabiji meso ami ne muchima wami bikekala monka kimye kyonse.+
17 “Kabiji obewa, inge ukendenga ku meso ami byonka byaendelenga shobe Davida kupichila mu kuba byonse byo nakukambizha ne kukookela malamuna ami ne mizhilo yami,+ 18 po po nkekajika jitanda ja bufumu bobe,+ byonkatu byo nalayañene na shobe Davida+ namba, ‘Mu kisemi kyobe kechi mukabula muntu wa kulama bena Isalela ne.’+ 19 Bino inge mukasenduke ne kukana malamuna ami ne mikambizho yami yo nemupele kabiji inge mukaye na kwingijila balesa bangi ne kwibafukamina,+ 20 nkebatupulamo bena Isalela mu kyalo kyami kyo nebapele,+ kabiji ino nzubo yo nazhijikila jizhina jami nkeikana, kabiji bena Isalela bakebasekanga* ne kwibendeleka ku bantu bonse.+ 21 Kabiji ino nzubo ikekalatu ke milumba ya bikulukulu. Yense ukapitanga ukakumyanga+ ne kwamba’mba, ‘Mambo ka Yehoba o aubijile bibye kino kyalo ne ino nzubo?’+ 22 Kepo bakamba’mba, ‘Mambo bamushile Yehoba+ Lesa wa bashakulu babo, yenka wibafumishe mu kyalo kya Ijipita,+ kabiji bekebejile balesa bangi ne kwibafukamina ne kwibengijila.+ O ene mambo o aletejile bino bya malwa byonse pe abo.’”+
8 Ku mpelo ya myaka 20, Solomone yo ashimikijilemo nzubo ya Yehoba ne nzubo* yanji mwine,+ 2 Solomone washimukulwile mizhi yo bamupele kwi Hilama,+ kabiji wabikilemo bena Isalela* amba bekalengamo. 3 Kabiji Solomone wayile ku muzhi wa Hamata-zoba ne kumushinda. 4 Kepo ashimikile* Tadamola mu kiselebwa ne mizhi yonse ya kulaminamo bintu+ yo ashimikile mu Hamata.+ 5 Kabiji washimikile ne Bete-holona uji Kwatuntama+ ne Bete-holona uji Kwakunama,+ mizhi yakosa yajinga na masakwa ne binzhilo ne mipingilo, 6 ne muzhi wa Baalata+ ne mizhi yonse ya kwa Solomone ya kulaminamo bipe, mizhi mwa kulamina makalaki,+ mizhi yonse mwa kwikala benda pa bambili, ne bintu byonse Solomone byo akebelenga kushimika mu Yelusalema ne mu Lebanoni ne mu kyalo kyonse kyo alaminenga.
7 Bantu bonse bashajilepo ba mu bena Hiti, ne bena Amoli, ne bena Pelizi, ne bena Hivi, ne bena Yebusi,+ babujile bena Isalela,+ 8 ba mu bisemi byabo bashajile mu kyalo, bo babujile kwipaya ku bena Isalela,+ Solomone wibakambizhe kwikala ke ba kwingijila mfumu kufikatu ne lelo jino.+ 9 Bino Solomone kechi waalwilepo mwina Isalela nangwa umo kwikala muzha ne,+ mambo bajinga bashilikale banji, bantangi ba bakulumpe ba nzhita yanji, ne bakulumpe ba bantu benda pa makalaki ne benda pa bambili.+ 10 Kwajinga bakulumpe 250 ba babitumbafumu ba Mfumu Solomone, batangijilanga bantu.+
11 Kabiji Solomone wafumishe mwana wa mukazhi wa kwa Felo+ mu Muzhi wa Davida ne kumutwala ku nzubo yo amushimikijile,+ mambo waambile’mba: “Nangwa kya kuba mukazhami, kechi wafwainwa kwikala mu nzubo ya kwa Davida Mfumu wa bena Isalela ne, mambo mu mapunzha mwaiya Jikwachi ja Yehoba mwazhila.”+
12 Kepo Solomone atapishe bitapisho bya kusoka+ kwi Yehoba pa kya kusokelapo bitapisho+ kya Yehoba kyo ashimikile kulutwe ya kibamba kya pa kibelo.+ 13 Walondejile mutanchi wa moba onse ne kulambula monka mwayijile mukambizho wa kwa Mosesa wa pa moba a Sabado,+ pa kutentama kwa bañondo,+ ne pa bijiilo byatongolwa bya kwikala nabyo jisatu pa mwaka+—Kijiilo kya Bashinkwa Babula Mbizho,+ ne Kijiilo kya Milungu+ ne Kijiilo kya Mimba.*+ 14 Kabiji watongwele bipanyi bya bañanga+ ba kwingila mingilo yabo monka mwayijile muzhilo wa shanji Davida, ne bena Levi nabo mu bifulo byabo bya kwingijilamo, kuba’mba batotenga+ ne kwingijila bañanga monka mwayijile mwingilo wa pa juba pa juba, ne bakasopa ba pa bibelo mu bipanyi byabo bya ku bibelo byapusana pusana,+ mambo uno wajinga mukambizho wa kwa Davida, muntu wa Lesa wa kine. 15 Kabiji kechi balekele kulondela mukambizho mfumu ye apele bañanga ne bena Levi pa kintu kyonse nangwa pa matala ne. 16 Byonkabyo, mwingilo wa kwa Solomone bamwingijile* bulongo, kufumatu juba jo baajile kitendekesho kya nzubo ya Yehoba+ kufikatu ne byo beipwishishe. Ne ino nzubo ya Yehoba yapwile.+
17 Kyo kimye Solomone kyo ayile ku Eziona-gebela+ ne ku Elata+ ku kitulu kya kalunga ka mema mu kyalo kya Edomu.+ 18 Hilama+ wamutumijile maato ne bantu bapijilwa kwenda pa kalunga ka mema kwingijisha bakalume banji. Bayile pamo na bakalume ba kwa Solomone ku Ofila+ na kusenda matalenta* a ngolode 450+ ne kwialeta kwi Mfumu Solomone.+
9 Kabiji mfumu wa mukazhi wa ku Sheba+ waumvwine nkuwa ya kwa Solomone, onkao mambo, waishile ku Yelusalema na kumweseka na mepuzho* akatazha. Wajinga na jibumba jikatampe,* ne na bangamela basendele manyi a balasama ne ngolode yavula bingi+ ne mabwe akwabo a buneme. Wayile kwi Solomone ne kumubuula bintu byonse byajinga ku muchima wanji.+ 2 Kepo Solomone akumbwile mepuzho anji onse. Kafwako kintu nangwa kimo kyakatezhe* Solomone kyo abujile kumulumbulwila ne.
3 Mfumu wa mukazhi wa ku Sheba byo amwene maana a kwa Solomone,+ ne nzubo yo ashimikile,+ 4 ne kajo ka ku tebulu wanji,+ ne bakalume banji byo baikele ku tebulu, ne bantu banji baleta kajo ku tebulu ne byo bavwajile, ne bakaseya banji ne byo bavwajile ne bitapisho byanji bya kusoka byo atapishanga ku nzubo ya Yehoba+ kimye kyonse, ponkapo bulume bonse bwamupwile.* 5 Onkao mambo, waambijile mfumu amba: “Sawakya ye naumvwine mu kyalo kyami pa mambo a mingilo* yenu ne maana enu wa kine. 6 Bino awa sawakya kechi namwitabijile ne, poso byo naiya ne kwimwena na meso ami.+ Kabiji bintu byo bambuujile pa maana enu akila,+ byajingatu bicheche. Mwauba bintu byakila sawakya ye naumvwine.+ 7 Bantu benu bo ba lusekelo, kabiji bakalume benu bemana kimye kyonse kwi anweba na kuteleka ku maana enu bo ba lusekelo! 8 Atotwe Yehoba Lesa wenu, yenka wasekela mwi anweba pa kwimubika pa jitanda janji kwikala mfumu wa kwa Yehoba Lesa wenu. Na mambo a kuba Lesa wenu watemwa bena Isalela,+ kuba’mba bekalenga kikupu, wimutongwele anweba amba mwikale mfumu wabo wa kuchibila mambo monka mo aolokela.”
9 Kepo apele mfumu matalenta* a ngolode 120+ ne manyi a balasama avula bingi ne mabwe a buneme. Kechi kwaishilepo jikwabo manyi a balasama avujile nobe oa mfumu wa mukazhi wa ku Sheba o apele Mfumu Solomone ne.+
10 Kabiji bakalume ba kwa Hilama ne bakalume ba kwa Solomone baletele ngolode kufuma ku Ofila,+ baletele ne bichi bya alemuga ne mabwe a buneme.+ 11 Ku bichi bya alemuga mfumu walengeleko pa kukanjijila ku nzubo ya Yehoba+ ne ku nzubo* ya mfumu,+ ne byansa ne bijimba bya mizhinge bya banyimbi.+ Kafwako bichi bikwabo biji nobe bino byamwekelepo kala mu kyalo kya Yuda ne.
12 Mfumu Solomone naye wapele mfumu wa mukazhi wa ku Sheba bintu byonse byo akebelenga ne byo alombele, byavula kukila* bintu byo aletele kwi mfumu. Kepo aimene ne kubwela ku kyalo kyanji, pamo na bakalume banji.+
13 Kabiji kinemenezhi kya ngolode yo baletelanga Solomone pa mwaka pa mwaka kyajinga matalenta a ngolode 666,+ 14 kununga pa yaletanga bapoteshi ne basulu ne bamfumu bonse ba bena Alaba ne babitumbafumu ba mu kyalo bonka baletanga ngolode ne siliva kwi Solomone.+
15 Mfumu Solomone walengele makebo akatampe 200 a ngolode yapatakana na kyela kikwabo+ (jikebo jimo bejilengele na mashekele* a ngolode 600 yapatakana na kyela kikwabo)+ 16 ne tumakebo tucheche* 300 twa ngolode yapatakana na kyela kikwabo (kajikebo kamo bekalengele na mpondo* isatu ya ngolode). Kepo mfumu eabikile mu Nzubo ya Jisaka ja ku Lebanoni.+
17 Mfumu walengele ne jitanda jikatampe na meno a banzovu ne kwijishinga ngolode yawama.+ 18 Kabiji ku jitanda kwajinga kya kukanjijilapo kyajinga na pa kunyanta patanu na kimo, kabiji kwajinga kya kunyantapo maulu kya ngolode kyalamachile ku jitanda, kabiji kwajinga pa kubika maboko konse kubiji, ne bipashañano bibiji bya mabokwe+ saka byaimana ku mbaji ya pa kubika maboko. 19 Kabiji kwajinga mabokwe 12,+ aimene pa kunyanta patanu na kimo, bokwe umo konse konse kwapela pa kunyanta patanu na kimo. Kechi kwajingapo bufumu bukwabo bwalengele jitanda jajinga nobe jino ne. 20 Bipe byonse bya Mfumu Solomone bya kutomenamo byajinga bya ngolode, ne bipe byonse bya mu Nzubo ya Jisaka ja ku Lebanoni byajinga bya ngolode yawama. Kafwako nangwa kimo kyo balengele na siliva ne, mambo mu moba a kwa Solomone siliva kechi beimonanga’mba yanema ne.+ 21 Maato a mfumu ayanga ku Tashishi+ pamo na bakalume ba kwa Hilama.+ Inge papita myaka isatu, maato a ku Tashishi aletanga ngolode ne siliva, ne meno a banzovu,+ ne mapombo ne mapikoko.
22 Onkao mambo, Mfumu Solomone wanonkele bingi kabiji wajinga na maana kukila bamfumu bonse ba pano pa ntanda.+ 23 Kabiji bamfumu ba pano pa ntanda ponse baiyanga na kumona* Solomone amba bomvwe maana Lesa wa kine o abikile mu muchima wanji.+ 24 Bonse pa muntu pa muntu baletanga bupe—bipe bya siliva, bya ngolode, bivwalo,+ bilwilo, manyi a balasama, bambili ne bamyule—kabiji batwajijile kuba bino pa mwaka pa mwaka. 25 Kabiji Solomone wajinga na bipaka 4,000 bya bambili banji ne makalaki ne bambili* 12,000,+ kabiji wibibikile mu mizhi ya kulaminamo makalaki mu Yelusalema kwipi na kwaikelanga mfumu.+ 26 Kabiji walaminenga bamfumu bonse kufuma ku Mukola* kukafika ne ku kyalo kya bena Filishitiya ne ku mupaka wa Ijipita.+ 27 Mfumu wavuzhizhe bingi siliva mu Yelusalema nobe mabwe, ne bichi bya sida byavujile nobe bichi bya mikuyu bya mu Shefela.+ 28 Kabiji baletanga bambili kwi Solomone kufuma ku Ijipita+ ne ku byalo bikwabo byonse.
29 Bintu bikwabo byapichilemo Solomone,+ kufuma po atendekejile kufika ne po apelejile, nanchi kechi byanembwa mu byambo byanembele ngauzhi Natana,+ ne mu bungauzhi bwa kwa Ahiya+ mwina Shilo, ne mu bimwesho byanembwa bya kwa Ido+ wamonanga bimwesho pe Yeloboma+ mwana wa kwa Nebati nenyi? 30 Solomone walamine bena Isalela bonse myaka 40 mu Yelusalema. 31 Kepo Solomone bamutwajile na kulaala kwalaala bashakulu banji. Bamuzhiikile mu Muzhi wa Davida shanji;+ kabiji mwananji aye Lehoboma wamuswaine pa bufumu.+
10 Lehoboma wayile ku Shekema,+ mambo bena Isalela bonse baishile ku Shekema na kumuswanyika pa bufumu.+ 2 Yeloboma+ mwana wa kwa Nebati byo aumvwinetu kino (wakijinga mu Ijipita mambo wanyemene Mfumu Solomone),+ Yeloboma wabwelele kufuma ku Ijipita. 3 Kepo batumineko bakumwita, kabiji Yeloboma ne bena Isalela bonse baishile kwi Lehoboma ne kumwambila’mba: 4 “Bashenu balengejile kikonkoji kyetu kunema.+ Bino anweba inge mupeezheko mwingilo wa bashenu wakosa ne kupeezhako kikonkoji kyanema* kyo betutwikile, tukemwingijilanga.”
5 Ponkapo wibambijile’mba: “Mukabwele kwi amiwa pa kupitapo moba asatu.” Byonkabyo, bantu bayile.+ 6 Kepo Mfumu Lehoboma aipwizhe bakulumpe baingijilanga Solomone shanji byo akijinga mumi, amba: “Mbuulaiko maana, bano bantu nkebakumbule’mba ka?” 7 Abo bamukumbwile’mba: “Inge mwibobile byawama bano bantu ne kwibatokesha ku muchima ne kwibakumbula bulongo, bakekala ke bakalume benu kimye kyonse.”
8 Nangwa byonkabyo, walengulwile maana amubuujile bakulumpe, kabiji waipwizhe bansongwalume mo bakomenanga kabiji bonka baikele ba mingilo banji.+ 9 Wibashikishe’mba: “Mbuulaiko maana, tukebakumbule’mba ka bano bantu bañambijile’mba, ‘Peezhaiko kikonkoji kyo betutwikile bashenu’?” 10 Bansongwalume mo bakomenanga, bamukumbwile’mba: “Bano bantu bemwambijile’mba, ‘Bashenu balengejile kikonkoji kyetu kunema, bino anweba mwitupeezhezhekyo’; mukebabuule bino amba, ‘Amiwa nkemupa mingilo yakosa kukila imupanga batata.* 11 Batata bemutwikile kikonkoji kyanema, pakuba amiwa nkanungapo pa kikonkoji kyenu. Batata bemukambulanga na bikote, bino amiwa nkemukambulanga na bikote bitanta nobe tuminye.’”
12 Yeloboma ne bantu bonse baishile kwi Lehoboma pa juba ja busatu, byonkatu mfumu byo ebambijile’mba: “Mukabwele kwi amiwa pa juba ja busatu.”+ 13 Bino mfumu wibakumbwile na bukaji. Onkao mambo, Mfumu Lehoboma wakaine maana amubuujile bakulumpe. 14 Wibambijile monka mwayijile maana amubuujile bansongwalume amba: “Nkalengela kikonkoji kyenu kunema kabiji nkanungako ne bikwabo. Batata bemukambulanga na bikote, bino amiwa nkemukambulanga na bikote bitanta nobe tuminye.” 15 Byonkabyo, mfumu wakaine kumvwina bantu, mambo Lesa wa kine ye walengejile bintu kwaluka,+ pa kuba’mba afikizhe byambo Yehoba byo aambijile Yeloboma mwana wa kwa Nebati kupichila mwi Ahiya+ mwina Shilo.
16 Bena Isalela bonse byo bamwene’mba mfumu wakana kwibomvwa, bantu baambijile mfumu amba: “Ñanyi lubaji lo tuji nalo mwi Davida? Kechi tujimo na buswanyi mu mwana wa kwa Yese ne. Anweba bena Isalela, muntu yense abwele ku balesa banji! Pano obewa Davida, lamanga nzubo yobe.”+ Ponkapo bena Isalela babwelele ku mazubo* abo.+
17 Bino Lehoboma watwajijile kulama bena Isalela baikelenga mu mizhi ya mu Yuda.+
18 Kepo Mfumu Lehoboma atumine Adolama,+ wajinga mukulumpe wa boba bo bakambizhe kwingijila mfumu, bino bena Isalela bonse bamwashile mabwe ne kufwa wafwile. Mfumu Lehoboma wakanjijile mu kalaki wanji ne kunyemena ku Yelusalema.+ 19 Kabiji bena Isalela batwajijile kusatukila ba mu nzubo ya kwa Davida kufika ne lelo jino.
11 Lehoboma byo afikile mu Yelusalema, ponkapotu wakonkenye ba mu nzubo ya kwa Yuda ne bena Benjamina,+ bashilikale bayuka* kulwa nkondo 180,000, amba balwe na bena Isalela pa kuba’mba babwezhe bufumu kwi Lehoboma.+ 2 Kepo jiwi ja Yehoba jaishile kwi Shemaya+ muntu wa Lesa wa kine amba: 3 “Umubuule Lehoboma mwana wa kwa Solomone mfumu wa bena Yuda ne bena Isalela bonse baji mu Yuda ne mu Benjamina amba, 4 ‘Yehoba waamba’mba: “Kechi mwafwainwa kuya na kulwa na balongo benu ne. Muntu yense abwele ku nzubo yanji, mambo amiwa yami nalengela kino amba kyubiwe.”’”+ Byonkabyo, bakookejile byambo bya Yehoba ne kubwelamo kabiji kechi bayile na kulwa ne Yeloboma ne.
5 Lehoboma waikelenga mu Yelusalema kabiji washimikile mizhi ya masakwa akosa mu Yuda. 6 Washimikile* Betelema,+ Etama, Tekoa,+ 7 Bete-zula, Soko,+ Adulama,+ 8 Gata,+ Malesha, Zifu,+ 9 Adolaimu, Lakishi,+ Azeka,+ 10 Zola, Ayalona+ ne Hebulona,+ mizhi ya masakwa akosa yajinga mu Yuda ne mu Benjamina. 11 Kabiji wakoseshe mizhi ya masakwa akosa ne kubikamo bakulumpe ba bashilikale kabiji wibapelenga kajo ne manyi ne binyu, 12 kabiji mu mizhi yonse yapusana pusana wabikilemo makebo akatampe ne mafumo; wiikoseshe bingi. Kabiji watwajijile kulama Yuda ne Benjamina.
13 Kabiji bañanga ne bena Levi bajinga monse mu Isalela, baishile kwi aye kufuma mu manyaunda abo onse. 14 Bena Levi bashile mapunzha abo mwa kujiila banyama ne bipe byabo+ ne kuya ku Yuda ne ku Yelusalema, mambo bebafumishepo pa mwingilo wabo wa buñanga bwa Yehoba+ kwi Yeloboma ne baana banji. 15 Kepo Yeloboma etongwejile mwine bañanga ba pa mapunzha atuntama+ ne ba bandemona bapasha bambuzhi+ ne ba baana bañombe bo alengele.+ 16 Kabiji aba ba mu mikoka yonse ya bena Isalela, batele muchima wabo pa kukeba Yehoba Lesa wa bena Isalela, bebalondejile ku Yelusalema na kutapisha bitapisho kwi Yehoba Lesa wa bashakulu babo.+ 17 Myaka isatu bakoseshenga bufumu bwa bena Yuda ne kukwasha Lehoboma mwana wa kwa Solomone, mambo baendelenga mu jishinda ja kwa Davida ne ja kwa Solomone myaka isatu.
18 Kepo Lehoboma asongwele Mahalati mwana wa kwa Yelimota mwana wa kwa Davida, ne inanji wajinga Abihaila mwana wa kwa Eliaba mwana wa kwa Yese.+ 19 Kabiji wamusemejile baana: Yeusha, Shemaliya ne Zahama. 20 Kabiji pe aye, wasongwejilepo Maaka munkana wa kwa Abisalomo.+ Kabiji naye wamusemejile Abiya,+ Atai, Ziza ne Shelomita. 21 Lehoboma watemenwe bingi Maaka munkana wa kwa Abisalomo kukila bakazhi banji bonse ne bantombo, wasongwele banabakazhi 18 ne bantombo 60,+ kabiji wasemene baana ba balume 28 ne baana ba bakazhi 60. 22 Onkao mambo, Lehoboma watongwele Abiya mwana wa kwa Maaka kwikala mukulumpe kabiji ntangi wa balongo banji, mambo wakebelenga’mba akekale mfumu. 23 Nangwa byonkabyo, waubilenga bintu na maana ne kutuma* baana banji bamo mu bibunji byonse bya mu Yuda ne mu Benjamina, ne ku mizhi yonse ya masakwa akosa,+ kabiji wibapele kajo kavula ne kwibakebela banabakazhi bavula ba kusongola.
12 Bufumu bwa kwa Lehoboma byo bwaikajikilwetu+ ne mwine byo aikele na bulume, walekele kulondela Mizhilo ya Yehoba+ ne bena Isalela bonse bo ajinga nabo. 2 Mu mwaka wa butanu wa bukalama bwa Mfumu Lehoboma, Shishaka Mfumu+ wa Ijipita waishile na kulwa na Yelusalema, mambo balekele kwikala ba kishinka kwi Yehoba. 3 Wajinga na makalaki 1,200, ne bantu benda pa bambili 60,000 ne bashilikale bakukankalwa kubala bo aishile nabo kufuma ku Ijipita—bena Libya, bena Suki ne bena Etiopya.+ 4 Waangachile mizhi ya masakwa akosa ya mu Yuda kabiji wafikile ku Yelusalema.
5 Ngauzhi Shemaya+ waishile kwi Lehoboma ne ku babinemanga ba mu Yuda bakonkene mu Yelusalema na mambo a kuchina Shishaka, kabiji wibambijile’mba: “Yehoba waamba’mba, ‘Mwankana, onkao mambo, ne amiwa nemupana+ mu kuboko kwa kwa Shishaka.’ ” 6 Ponkapo babinemanga ba bena Isalela ne mfumu bepelwile+ ne kwamba’mba: “Yehoba waoloka.” 7 Yehoba byo amwene’mba bepelula, jiwi ja Yehoba jaishile kwi Shemaya amba: “Bepelula. Kechi nsakwibonauna ne,+ kabiji katatakatu nebapokolole. Kechi nsakwitulwila bukaji bwami pa Yelusalema kupichila mwi Shishaka ne. 8 Bino bakekala bakalume banji, pa kuba’mba bakayuke lupusano luji pa kuñingijila ne pa kwingijila bamfumu* ba mu byalo bikwabo.”
9 Onkao mambo, Shishaka Mfumu wa Ijipita waishile na kulwa na muzhi wa Yelusalema. Wasendele bya buneme bya mu nzubo ya Yehoba+ ne bya buneme bya mu nzubo* ya mfumu. Wasendele bintu byonse kubikapotu ne makebo a ngolode alengele Solomone.+ 10 Onkao mambo, Mfumu Lehoboma walengele makebo a mukuba a kupingizhapo, kabiji wiapaine ku bakulumpe ba bakasopa,* bonka basopanga kibelo kya nzubo ya mfumu. 11 Kimye kyonse mfumu kyo ayanga ku nzubo ya Yehoba, bakasopa baiyanga na kwiasenda, kabiji beabwezhanga mu kibamba mo bealaminanga. 12 Na mambo a kuba’mba mfumu wipelwile, bukaji bwa Yehoba bwafuminepo pe aye,+ kabiji kechi wibonawinetu bonse ne.+ Kabiji bantu bamo ba mu Yuda bajinga na byubilo byawama.+
13 Mfumu Lehoboma wakoseshe kifulo kyanji mu Yelusalema kabiji watwajijile kulama; Lehoboma wajinga na myaka ya kusemwa 41 kimye kyo aikele mfumu, kabiji walamine mu Yelusalema myaka 17, muzhi Yehoba ye asajile mu mikoka yonse ya bena Isalela mwa kwikala jizhina janji. Jizhina ja inanji mfumu wajinga Naama mwina Amonyi.+ 14 Bino waubilenga byatama, mambo kechi watele muchima pa kukeba Yehoba ne.+
15 Bintu byapichilemo Lehoboma, kufuma po atendekejile kufika ne po apelejile, nanchi kechi byanembwa mu byambo bya kwa ngauzhi Shemaya+ ne bya kwa Ido+ wamonanga bimwesho monka mwayijile bisemi nenyi? Kabiji pajinga makondo abulanga kupwa pe Lehoboma ne Yeloboma.+ 16 Kepo Lehoboma bamutwajile na kulaala kwalaala bashakulu banji kabiji bamuzhiikile mu Muzhi wa Davida,+ kabiji mwananji aye Abiya+ waswaine pa bufumu.
13 Mu mwaka wa bu 18 wa bukalama bwa Mfumu Yeloboma, Abiya mo mo aikele mfumu wa Yuda.+ 2 Walamine mu Yelusalema myaka isatu. Inanji wajinga Mikaya+ mwana wa kwa Uliele mwina Gibea.+ Kabiji pajinga nkondo pakachi ka kwa Abiya ne Yeloboma.+
3 Kabiji Abiya wayile ku nkondo na bashilikale 400,000, bakosa, bayuka* kulwa nkondo.+ Kabiji Yeloboma ne bashilikale 800,000 bakosa, bayuka* kulwa nkondo betanchikile’mba balwe nanji. 4 Kepo Abiya aimene pa Mutumba wa Zemalaimu uji mu kibunji kya mitumba kya Efelaimu ne kwamba’mba: “Nteleke, obewa Yeloboma ne anweba bena Isalela bonse. 5 Nanchi kechi mwayuka’mba Yehoba Lesa wa Isalela wapele Davida bufumu pa bena Isalela kikupu,+ kwi aye ne ku baana banji+ na lulayañano lwa mukele* nenyi?+ 6 Bino Yeloboma+ mwana wa kwa Nebati, kalume wa kwa Solomone mwana wa kwa Davida, waimene ne kusatukila nkambo yanji.+ 7 Kabiji banabalume batutu, batama bakonkenenga kwi aye. Kabiji bamusatukijile Lehoboma mwana wa kwa Solomone, kimye Lehoboma kyo ajinga mwanyike kabiji wajinga na moyo, kechi wakonsheshe kwibashinda ne.
8 “Anweba mubena kulanguluka’mba mwakonsha kushinda bufumu bwa Yehoba buji mu maboko a baana ba kwa Davida mambo anweba mwi jibumba jikatampe kabiji muji na baana ba bañombe ba ngolode balengele Yeloboma kwikala balesa benu.+ 9 Nanchi kechi mwapanga bañanga ba Yehoba,+ ba mu kisemi kya kwa Alona, ne bena Levi, ne kwitongwela anwe bene bañanga byonka byuba bantu ba mu byalo bingi nenyi?+ Muntu yense waiya na* mwana ñombe ne mikooko ilume itanu na ibiji wakonsha kwikala ke ñanga wa babula balesa. 10 Pakuba atweba, Yehoba ye Lesa wetu,+ kabiji kechi twamusha ne; bañanga betu, ba mu kisemi kya kwa Alona, babena kumwingijila Yehoba, ne bena Levi babena kwibakwashako mu mwingilo wabo. 11 Babena kulambula milambo ya kusoka kwi Yehoba pa juba pa juba lukelo ne mabanga+ pamo na bya kufutumuna binunka bulongo,+ ne bashinkwa*+ batentakana baji pa tebulu wa ngolode yawama, kabiji bambula malampi aji pa kya kutulapo malampi kya ngolode+ pa juba pa juba mabanga,+ mambo atweba tubena kwingila mingilo ya Yehoba Lesa wetu; pakuba anweba mwamukana. 12 Pano umvwai! Lesa wa kine uji ne atweba, ubena kwitutangijila pamo na bañanga banji ne matolompita a kuvumya pa kuba’mba tulwe nenu. Anweba bena Isalela, kange mulwe na Yehoba, Lesa wa bashakulu benu ne, mambo kechi musakushinda ne.”+
13 Bino Yeloboma watumine ba kwibabelamina kuba’mba beshile kunyuma yabo, kya kuba’mba abo bajinga kulutwe ya bena Yuda ne bebabelamijile bajinga kunyuma yabo. 14 Banabalume bena Yuda byo baalulukile, bamwene’mba bafwainwa kulwa na bajinga kulutwe ne na bajinga kunyuma. Onkao mambo, batendekele kujijila Yehoba,+ aku bañanga saka bavumya matolompita. 15 Banabalume bena Yuda babijikile jiwi ja nkondo, kabiji banabalume bena Yuda byo babijikile, Lesa wa kine washinjile Yeloboma ne bena Isalela bonse ku meso a kwa Abiya ne a bena Yuda. 16 Bena Isalela banyemene bena Yuda, kabiji Lesa wibapaine mu maboko abo. 17 Abiya ne bantu banji baipayile bantu bavula bingi, kabiji bena Isalela bo batapile bajinga banabalume 500,000 bayukile* kulwa nkondo. 18 Onkao mambo, banabalume bena Isalela bebashinjile pa kyokya kimye, pakuba banabalume bena Yuda bakosele mambo baketekejile* mwi Yehoba Lesa wa bashakulu babo.+ 19 Abiya wapupijile Yeloboma kabiji wakamwangachile mizhi, Betele+ ne mande anji,* Yeshana ne mande anji, ne Efulema+ ne mande anji. 20 Kabiji Yeloboma kechi waikelepo na bulume jibiji mu kimye kya kwa Abiya ne; kepo Yehoba amutapile ne kufwa wafwile.+
21 Bino Abiya watwajijile kukosesha bufumu bwanji. Mu kuya kwa moba wasongwele banabakazhi 14+ kabiji wasemejilemo baana ba balume 22 ne baana ba bakazhi 16. 22 Kabiji bintu bikwabo byapichilemo Abiya, mingilo yanji ne byambo byanji, byanembwa mu buku wa ngauzhi Ido.+
14 Kepo Abiya bamutwajile na kulaala kwalaala bashakulu banji, kabiji bamuzhiikile mu Muzhi wa Davida;+ kabiji mwananji aye Asa waswaine pa bufumu. Mu moba anji mu kyalo mwajinga mutende myaka jikumi.
2 Asa waubilenga byawama ne byaoloka kwi Yehoba Lesa wanji. 3 Wafumishemo bya kusokelapo bitapisho bya balesa bangi+ ne mapunzha atuntama, wakundawile mashiki azhila+ ne kutema bichi* bya milumbulumbu byazhila.+ 4 Kabiji waambijile bena Yuda kukeba Yehoba Lesa wa bashakulu babo ne kulondela Mizhilo ne mikambizho yanji. 5 Onkao mambo, mu mizhi yonse ya mu Yuda wafumishemo mapunzha atuntama+ ne bya kusokelapo bya kufutumuna binunka bulongo, kabiji mu bufumu bwanji mwatwajijile kwikala mutende. 6 Washimikile mizhi ya masakwa akosa mu Yuda,+ mambo mu kyalo mwajinga mutende kabiji kechi mwajinga nkondo mu yoya myaka ne, mambo Yehoba wamulengejile kukokoloka.+ 7 Waambijile bena Yuda amba: “Twayai tushimike ino mizhi ne kuzhokoloshako masakwa ne byamba,+ ne binzhilo* ne mipingilo. Mambo kyalo kikiji kyetu, kabiji twakeba Yehoba Lesa wetu. Twamukeba ne aye witulengela kukokoloka konse konse.” Onkao mambo, bintu byo bashimikile byalumbulukile.+
8 Asa wajinga na nzhita ya banabalume 300,000 bena Yuda, bajinga na makebo akatampe ne mafumo. Kabiji mu bena Benjamina mwajinga bilobo 280,000 byasendanga makebo* a acheache kabiji byajinga na mata a mukanda.*+
9 Kabiji Zela mwina Etiopya waishile na kulwa nabo saka aji na nzhita ya banabalume 1,000,000 ne makalaki 300.+ Byo afikile ku Malesha,+ 10 Asa wayile na kulwa nanji, kabiji betanchikile na kulwa nkondo mu Kimpachiko kya Zefwata ku Malesha. 11 Kepo Asa abijikile kwi Yehoba, Lesa wanji+ amba: “Anweba Yehoba, kechi kyakatazha kwi anweba kukwasha bantu bavula nangwa boba babula ngovu ne.+ Anweba Yehoba Lesa wetu, tukwashai, mambo twakinka manungo mwi anweba,+ ne mu jizhina jenu mo mo twaishila na kulwa na jino jibumba.+ Anweba Yehoba, yenu Lesa wetu. Kange muleke muntu ufwa emushinde ne.”+
12 Onkao mambo, Yehoba wakwashishe Asa ne bena Yuda kushinda bena Etiopya, kabiji bena Etiopya banyemene.+ 13 Asa ne bantu bo ajinga nabo bebapupijile kukafika ne ku Gelala,+ kabiji bena Etiopya batwajijile kufwa, kabiji kafwapo nangwa umo mwi abo washajilepo mumi ne, mambo bebonawine kwi Yehoba ne ku nzhita yanji. Kepo bena Yuda basendele bipukulwa byavula bingi. 14 Kabiji baonawine mizhi yonse yazhokolokele Gelala, mambo moyo wa kuchina Yehoba wibakwachile; kabiji bapukwile bintu byajinga mu mizhi yonse, mambo mwajinga bipukulwa byavula. 15 Kabiji balukukile ne matente a boba bajinga na bilelwa, kabiji baangachile mikooko yavula ne bangamela, kepo babwelele ku Yelusalema.
15 Mupashi wa Lesa waishile pe Azaliya mwana wa kwa Odeda. 2 Onkao mambo, wayile na kutundaila Asa ne kumwambila’mba: “Ntelekai, anweba ba Asa ne anweba bena Yuda bonse ne bena Benjamina! Yehoba ukekala ne anweba umvwe mwatwajijila kwikala nanji;+ umvwe mwamukeba, ukesolola kwi anweba,+ bino umvwe mwamukana, ne aye ukemukana.+ 3 Bena Isalela baikajile kimye kyabaya* kwa kubula Lesa wa kine, kwa kubula ñanga wa kwibafunjisha, kabiji kwa kubula mizhilo.+ 4 Bino mu kumanama kwabo byo baalulukijile kwi Yehoba Lesa wa Isalela ne byo bamukebele, wisolwele kwi abo.+ 5 Mu oa moba kafwako muntu waendelenga mutende ne,* mambo mu bangikazhi bonse ba mu byalo mwajinga kamvundumvundu. 6 Kisaka bekyonawinenga ku kisaka kikwabo ne muzhi ku muzhi mukwabo, mambo Lesa wibavulañenye na bya malwa byavula.+ 7 Bino anweba kosai, kabiji kange mulefulwe* ne,+ mambo mingilo yenu bakeifweta.”
8 Asa byo aumvwinetu bino byambo bya bungauzhi byaambile ngauzhi Odeda, wachinchikile ne kufumyamo bankishi ba bunya mu kyalo kyonse kya Yuda+ ne kya Benjamina ne mu mizhi yo aangachile ya mu kibunji kya mitumba kya Efelaimu, kabiji wawamishe kya kusokelapo bitapisho kya Yehoba kyajinga kulutwe ya kibamba kya pa kibelo kya nzubo ya Yehoba.+ 9 Kabiji wakonkenye pamo bonse ba mu Yuda ne mu Benjamina ne bantu bafumine ku byalo bingi bo bajinga nabo kufuma ku Efelaimu ne ku Manase, ne ku Shimeona,+ mambo abo baishile bavula kwi aye kufuma ku Isalela byo bamwene’mba Yehoba Lesa wanji uji nanji. 10 Onkao mambo, bebakonkenye pamo ku Yelusalema mu ñondo wa busatu mu mwaka wa bu 15 wa bukalama bwa kwa Asa. 11 Pa joja juba batapishepo bitapisho kwi Yehoba pa bipukulwa byo baletele, bañombe 700 ne mikooko 7,000. 12 Kabiji balayañene lulayañano lwa kukeba Yehoba Lesa wa bashakulu babo na muchima wabo yense ne na mweo* wabo yense.+ 13 Yense wabujilenga kukeba Yehoba Lesa wa Isalela bafwainwe kumwipaya, mwanyike nangwa mukulumpe, mwanamulume nangwa mwanamukazhi.+ 14 Onkao mambo, bachipile kwi Yehoba na jiwi ja peulu, saka babijika na lusekelo, ne na matolompita ne na nsengo. 15 Kabiji bena Yuda bonse basangalele na mambo a luchipo, mambo bachipile na muchima wabo yense kabiji bamukebelenga na muchima yense, ne aye wisolwele kwi abo,+ kabiji Yehoba watwajijile kwibalengela kukokoloka konse konse.+
16 Kabiji mfumu Asa wafumishepo Maaka+ nkambo yanji wa mukazhi pa kifulo kyanji kya bu inamfumu,* mambo walengele nkishi wa bunya wa kwingijisha pa kupopwela kichi* kya mulumbulumbu kyazhila.+ Asa watemene nkishi wa kwa Maaka ne kumuchimauna ne kukamusokela mu Kimpachiko kya Kedolona.+ 17 Bino mapunzha atuntama kechi beafumishemo+ mu Isalela ne.+ Nangwa byonkabyo, Asa waingilanga na muchima wanji yense* mu bumi* bwanji bonse.+ 18 Kabiji watwezhezhe mu nzubo ya Lesa wa kine bintu byo azhijikile aye ne bashanji—siliva, ngolode ne bipe byapusana pusana.+ 19 Kechi kwajingapo nkondo ne, kufikatu ne mu mwaka wa bu 35 wa bukalama bwa kwa Asa.+
16 Mu mwaka wa bu 36 wa bukalama bwa kwa Asa, Baasha+ Mfumu wa Isalela waishile na kulwa na bena Yuda, kabiji watendekele kushimika* muzhi wa Lama+ pa kuba’mba ashinkile bantu kubula kutwela nangwa kulupuka kuya kwi* Asa Mfumu wa Yuda.+ 2 Ponkapo Asa washikwile siliva ne ngolode yajinga mo balaminanga bya buneme mu nzubo ya Yehoba+ ne mu nzubo* ya mfumu ne kwibituma kwi Benehadada Mfumu wa Silya,+ yenka waikelenga mu Damasakasa ne kwamba’mba: 3 “Tulayañane* lulayañano amiwa ne obewa, byonkatu byo kyajinga kwi batata ne bashobe. Nakutumina bupe bwa siliva ne ngolode. Iya upwishe lulayañano lo walayañene* na Baasha Mfumu wa mu Isalela, kuba’mba afumeko kwi amiwa.”
4 Benehadada waumvwijile byaambile Mfumu Asa kabiji watumine bakulumpe ba bashilikale banji kuya na kulukuka mizhi ya mu Isalela, kabiji batapile ba mu muzhi wa Iyonyi,+ Danyi,+ Abelamaimu, ne ba mu mapunzha onse mwajinga matala a mu mizhi ya mu Nafitali.+ 5 Baasha byo aumvwine kino, ponkapo wikilekele kushimika* muzhi wa Lama ne kusha mwingilo wanji. 6 Kabiji Mfumu Asa wasendele bena Yuda bonse, ne abo basendele mabwe ne bichi bya ku Lama+ byonka Baasha byo ashimikijilenga,+ kabiji wibingijishe kushimikilako* muzhi wa Geba+ ne Mizipa.+
7 Pa kyonkakya kimye, Hanani+ wamonanga bimwesho waishile kwi Asa Mfumu wa Yuda ne kumwambila’mba: “Na mambo a kuba mwaketekejile* mwi mfumu wa Silya ne kubula kuketekela* mwi Yehoba Lesa wenu, nzhita ya mfumu wa Silya yapuluka mu kuboko kwenu.+ 8 Nanchi bena Etiopya ne bena Libya kechi bajinga na nzhita ikatampe yajinga na makalaki avula ne benda pa bambili nenyi? Bino na mambo a kuba mwaketekejile mwi Yehoba, wibapaine mu kuboko kwenu.+ 9 Mambo meso a Yehoba atalatala pano pa ntanda ponse+ kuba’mba amweshe bulume bwanji* na mambo a boba bamuketekela* na muchima wabo yense.+ Mwauba kintu kya kubula maana; kufumatu kino kimye mukalwangatu makondo.”+
10 Nangwa byonkabyo, Asa wamuzhingijile wamonanga bimwesho ne kumutaya mu kaleya* mambo wamuzhingijile na mambo a kino kintu. Kabiji pa kyonkakya kimye, Asa watendekele ne kumanyika bantu bakwabo. 11 Bintu byapichilemo Asa kufuma po atendekejile kufika ne po apelejile, byanembwa mu Buku wa Bamfumu ba mu Yuda ne mu Isalela.+
12 Mu mwaka wa bu 39 wa bukalama bwanji, Asa waikele na kikola ku maulu kabiji wakolelwe bingi; nangwatu mu kimye kyo akolelwenga, kechi waalulukijile kwi Yehoba ne, bino aye wakebeleko bañanga. 13 Kepo Asa bamutwajile na kulaala kwalaala bashakulu banji;+ wafwile mu mwaka wa bu 41 wa bukalama bwanji. 14 Onkao mambo, bamuzhiikile mu kilende kya lukumo kyo epoyijile aye mwine mu Muzhi wa Davida,+ kabiji bamulaajikile pa makila po bayuzhizhe manyi a balasama ne bintu byo bavwangakenye byo balengeleko manyi awama bingi.+ Kabiji babanzhile mujilo mukatampe wa kunemekelamo* kijilo kyanji.
17 Kabiji mwananji aye Yehoshafwata+ waswaine pa bufumu, ne kukosesha bufumu bwanji pa bena Isalela. 2 Wabikile mazhita mu mizhi yonse ya mu Yuda yajinga na masakwa akosa ne kubika bipanyi bya bashilikale mu kyalo kya Yuda ne mu mizhi ya mu Efelaimu, shanji Asa yo aangachile.+ 3 Yehoba watwajijile kwikala ne Yehoshafwata mambo waendelenga mu mashinda a kala a mushakulu wanji Davida+ kabiji kechi wakebele Baela ne. 4 Mambo wakebele Lesa wa shanji+ ne kulondela* mikambizho yanji kabiji kechi walondejilenga byubilo bya bena Isalela ne.+ 5 Yehoba wakoseshe bufumu bwanji;+ ne bena Yuda bonse batwajijile kupana bya bupe kwi Yehoshafwata, kabiji wajinga na bunonshi ne lukumo lukatampe.+ 6 Wakosele bingi mu kulondela mashinda a Yehoba, kabiji wafumishemo ne mapunzha atuntama+ ne bichi* bya milumbulumbu byazhila+ mu Yuda.
7 Mu mwaka wa busatu wa bukalama bwanji waichile babinemanga banji, Bene-haila, Obadiya, Zekaliya, Netanela ne Mikaya, kuba’mba bafunjishenga mu mizhi ya mu Yuda. 8 Bajinga na bena Levi: Shemaya, Netaniya, Zebadiya, Asahela, Shemilamota, Yehonafwanyi, Adoniya, Tobiyaja ne Tobadoniya, kabiji bajinga ne na Elishama ne Yeholama bañanga.+ 9 Batendekele kufunjisha mu Yuda, saka basenda buku wa Mizhilo ya Yehoba,+ kabiji bapitañenenga mu mizhi yonse ya mu Yuda saka bafunjisha bantu.
10 Kabiji moyo wa kuchina Yehoba waishile pa bufumu bonse bwa mu byalo byazhokolokele Yuda, kabiji kechi balwile ne Yehoshafwata ne. 11 Kabiji bena Filishitiya bamuletejile Yehoshafwata bya bupe ne mali kwikala mulambo. Bena Alaba bamuletejile mikooko ilume 7,700 ne bambuzhi balume 7,700 kufuma mu matanga abo.
12 Yehoshafwata wailengatu na kukosa,+ kabiji watwajijile kushimika masakwa akosa+ ne mizhi mwa kulamina bintu+ mu Yuda. 13 Kabiji waingijile mingilo yavula mu mizhi ya mu Yuda, kabiji wajinga na bashilikale, babilobo mu Yelusalema. 14 Bano bebatanchikile monka mwayijile bikota byabo: mu bena Yuda mwajinga bakulumpe ba biumbi, mukulumpe mutanshi wajinga Adina, wajinga na babilobo 300,000.+ 15 Wa bubiji kwi aye wajinga mukulumpe Yehohanana, wajinga na bantu 280,000. 16 Kabiji watangijilanga ne Amasiya mwana wa kwa Zikili, yenka wipaine kwingila mwingilo wa Yehoba, kabiji wajinga na babilobo 200,000. 17 Mu bena Benjamina+ mwafumine Eliada kilobo, wajinga na bantu 200,000 bajinga na mata a mukanda ne makebo.+ 18 Kabiji wa bubiji kwi aye wajinga Yehozabada, kabiji wajinga na bantu 180,000 benengezhezhe kulwa nkondo. 19 Bano bamwingijilenga mfumu kununga pa boba mfumu bo abikile mu mizhi yajinga na masakwa akosa monse mu Yuda.+
18 Yehoshafwata wajinga na bunonshi ne lukumo lukatampe,+ pano bino baikele bankulu na muntu ne Ahaba.+ 2 Byo papichile myaka, wayile kwi Ahaba ku Samaliya,+ kabiji Ahaba wamutapishisheko mikooko ne bañombe bavula ne bantu bo ajinga nabo. Kabiji wamwambijile* kuya nanji na kulwa na Lamota-gileada.+ 3 Ahaba Mfumu wa Isalela waipwizhe Yehoshafwata Mfumu wa Yuda amba: “Nanchi musakuya ne amiwa ku Lamota-gileada nyi?” Aye wamukumbwile’mba: “Amiwa ne anweba twi umo, bantu bami ne bantu benu bo bamo kabiji nsakwimukwasha mu nkondo.”
4 Bino Yehoshafwata waambijile mfumu wa Isalela amba: “Patanshi, mwipuzhai Yehoba.”+ 5 Byonkabyo, mfumu wa Isalela wakonkenye pamo bangauzhi 400, ne kwibepuzha’mba: “Nanchi tuye na kulwa na bena Lamota-gileada nyi, inyi twikaletu?” Abo bamukumbwile’mba: “Yainga, kabiji Lesa wa kine usakupana uno muzhi mu kuboko kwenu anweba mfumu.”
6 Kepo Yehoshafwata aambile’mba: “Nanchi kuno kafwako ngauzhi mukwabo wa Yehoba nyi?+ Twayai naye tumwipuzhe.”+ 7 Ponkapo mfumu wa Isalela waambijile Yehoshafwata amba: “Kuji muntu umo+ wakonsha kwitwipwizhako kwi Yehoba; bino namushikwa, mambo kechi waula bintu byawama pe amiwa ne, waulatu byatama.+ Jizhina janji Mikaya mwana wa kwa Imula.” Nangwa byonkabyo, Yehoshafwata waambile’mba: “Anweba mfumu kechi mwafwainwa kwamba byo byo ne.”
8 Onkao mambo, mfumu wa Isalela waichile kapaso ne kumwambila’mba: “Pelawizha yanga ukamulete Mikaya mwana wa kwa Imula.”+ 9 Kabiji mfumu wa Isalela ne Yehoshafwata mfumu wa Yuda bonse baikele au pa jitanda janji au pa jitanda janji, saka bavwala bivwalo bya bufumu; baikele konka ku kipujilo kyajinga ku kibelo kya muzhi wa Samaliya, ne bangauzhi bonse baawilenga kwi abo. 10 Kabiji Zedekiya mwana wa kwa Kenaana walengele nsengo ya kyela kya kapotwe ne kwamba’mba: “Yehoba waamba’mba, ‘Bena Silya ukebakozha* na ino nsengo kufikatu ne byo ukebavizha.’” 11 Ne bangauzhi bonse bakwabo baawilenga kintutu kimo amba: “Yainga ku Lamota-gileada kabiji mukebashinda;+ Yehoba ukapana uno muzhi mu kuboko kwa mfumu.”
12 Byonkabyo muluwe wayile na kwita Mikaya wamwambijile’mba: “Umvwa! Bangauzhi bonse baambatu bintu bimo byawama pa bamfumu. Pano byambo byo usakwamba bikale nobe byambo byabo,+ kabiji wambe byawama.”+ 13 Bino Mikaya waambile’mba: “Byonkatu Yehoba byo aji na bumi, byonse bisakumbuula Lesa wami, byo byo nsakwamba.”+ 14 Kepo Mikaya aishile kwi mfumu, kabiji mfumu wamwipwizhe’mba: “Mikaya, nanchi tuye na kulwa na bena Lamota-gileada nyi, inyi twikaletu?” Ponkapo wakumbwile’mba: “Yainga kabiji musakwibashinda; basakwibapana mu kuboko kwenu.” 15 Kepo mfumu amwambijile’mba: “Bimye binga byo nsakukuchipisha pa kuba’mba umbuule bintu byonse bya kine mu jizhina ja Yehoba?” 16 Ponkapo aye waambile’mba: “Namona bena Isalela bonse saka bapalañena pa mitumba, nobe mikooko yabula kafunga.+ Yehoba waji kwamba’mba: ‘Bano kechi baji na nkambo yabo ne. Muntu yense abwele ku nzubo yanji mu mutende.’”
17 Kepo mfumu wa Isalela aambijile Yehoshafwata amba: “Nanchi kechi naji kwimubuula namba, ‘Kechi usakwaula bintu byawama pe amiwa ne, usakwaulatu byatama’ nenyi?”+
18 Ponkapo Mikaya waambile’mba: “Pano umvwai byambo bya Yehoba: Naji kumona Yehoba saka aikala pa jitanda janji+ ne jibumba jonse ja mwiulu+ saka jaimana ku kilujo kyanji ne ku kipiko kyanji.+ 19 Kabiji Yehoba waji kwamba’mba, ‘Ñanyi usakuya na kujimbaika Ahaba Mfumu wa Isalela, pa kuba’mba aye na kufwila ku Lamota-gileada?’ Umo waji kwamba kintu kimo mukwabo naye waji kwamba kintu kikwabo. 20 Kabiji malaika+ umo waji kwiya kulutwe ne kwimana kwi Yehoba ne kwamba’mba, ‘Amiwa nsakumujimbaika.’ Yehoba waji kumwipuzha’mba, ‘Usakumujimbaika byepi?’ 21 Aye waji kukumbula’mba, ‘Nsakuya na kubika byambo bya bubela mu tunwa twa bangauzhi banji bonse.’ Ne aye waji kumwambila’mba, ‘Yanga ukamujimbaike, kabiji kine usakumujimbaika. Yanga ukobe byonkabyo.’ 22 Yehoba wabika byambo bya bubela mu tunwa twa bano bangauzhi benu,+ pakuba Yehoba wimutongwela bya malwa.”
23 Kepo Zedekiya+ mwana wa kwa Kenaana afwenyenye kwipi ne kumwimba lupi Mikaya+ ku jibuta+ ne kumwambila’mba: “Nanchi ubena kwamba’mba mupashi wa Yehoba waji kufuma mwi amiwa ne kwiya na kwamba ne obewa nyi?”+ 24 Mikaya wamukumbwile’mba: “Umvwa! Ukayuka kino pa juba jo ukatwela na kufyama mu kibamba kya mwine mukachi.” 25 Kepo mfumu wa Isalela aambile’mba: “Musendai Mikaya mumutwale kwi Amonyi mukulumpe wa muzhi ne kwi Yoashi mwana mfumu. 26 Mwibabuule’mba, ‘Bamfumu baamba’mba: “Bikai uno muntu mu kaleya,+ kabiji mumupenga kajo kacheche ne mema acheche kufikatu ne byo nkabwela mu mutende.” ’ ” 27 Bino Mikaya waambile’mba: “Inge mukabwele mu mutende, ko kuba’mba Yehoba kechi waamba kupichila mwi amiwa ne.”+ Kepo anungilepo’mba: “Anweba bantu bonse, yukai kino.”
28 Byonkabyo, mfumu wa Isalela ne Yehoshafwata mfumu wa Yuda bayile ku Lamota-gileada.+ 29 Kepo mfumu wa Isalela aambijile Yehoshafwata amba: “Amiwa nsakwialula ne kuya na kulwa nkondo, pakuba anweba muvwale bivwalo byenu bya bufumu.” Byonkabyo, mfumu wa Isalela wialwile amba babule kumuyuka, kabiji bayile na kulwa nkondo. 30 Bino mfumu wa Silya wakambizhe bakulumpe ba bashilikale banji ba pa makalaki amba: “Kange mulwe na muntu nangwa umo, mwanyike nangwa mukulumpe ne, kanatu na mfumu wa Isalela.” 31 Bakulumpe ba bashilikale benda pa makalaki byo bamwenetu Yehoshafwata, baambile mu michima yabo amba: “Uno ye mfumu wa Isalela.” Onkao mambo, baalulukile ne kuya na kulwa nanji; kabiji Yehoshafwata watendekele kutama muteto amba bamukwashe, ne Yehoba wamukwashishe,+ kabiji ponkapo Lesa wibafumisheko kwi aye. 32 Bakulumpe ba bashilikale benda pa makalaki byo bamwene’mba kechi ye mfumu wa Isalela ne, ponkapo balekele kumupangisha.
33 Bino mwanamulume umo watayile muketo na buta bwanji bwa mukanda kya kusopelelatu,* ne kwasa mfumu wa Isalela panungakenejile kivwalo kyanji kya kyela. Onkao mambo, mfumu waambijile waendeshenga kalaki amba: “Aluluka umfumye mu nkondo,* mambo bankozha bingi.”+ 34 Kabiji aja juba jonse nkondo yakosele bingi, ne mfumu wa bena Isalela bamwimikiletu mu kalaki saka atala kwajinga bena Silya kufikatu ne mabanga; kabiji wafwile pa kuzhika juba.+
19 Kepo Yehoshafwata Mfumu wa Yuda abwelele mu mutende+ ku nzubo* yanji mu Yelusalema. 2 Yehu+ mwana wa kwa Hanani+ wamonanga bimwesho, wayile na kumutundaila ne kumwambila Mfumu Yehoshafwata amba: “Nanchi mwafwainwa kukwasha babi,+ ne kutemwa boba bashikwa Yehoba nyi?+ Na mambo a kino bukaji bwa Yehoba buji pe anweba. 3 Nangwa byonkabyo, kuji bintu byawama byo bataana mwi anweba,+ mambo mwafumishemo bichi* bya milumbulumbu byazhila mu kyalo ne kunengezha muchima* wenu kukeba Lesa wa kine.”+
4 Yehoshafwata watwajijile kwikala mu Yelusalema, kabiji wayile jibiji na kupitañana mu bantu kufuma ku Belesheba kukafika ne ku kibunji kya mitumba kya Efelaimu,+ kuba’mba abwezhe bantu kwi Yehoba Lesa wa bashakulu babo.+ 5 Kabiji watongwele ne bamitonyi mu kyalo kyonse mu mizhi yonse yajinga na masakwa akosa ya mu Yuda, pa muzhi pa muzhi.+ 6 Kabiji waambijile bamitonyi amba: “Saka mutako muchima ku byo mubena kuba, mambo pa kuchiba mambo kechi mubena kwimenako muntu ne, bino mubena kwimenako Yehoba, kabiji aye uji ne anweba pa kuchiba mambo.+ 7 Mwikale+ na moyo wa kwakamwa Yehoba. Jimukai na byo muba, mambo Yehoba Lesa wetu kechi uji na misalululo ne,+ kabiji kechi utala ku bilungi+ bya bantu nangwa kutambula mazhikakanwa ne.”+
8 Kabiji mu Yelusalema namo, Yehoshafwata watongwelemo bena Levi bamo ne bañanga ne bakulumpe ba bikota bya bena Isalela kwikala bamitonyi ba Yehoba ne kuchiba mambo a bangikazhi ba mu Yelusalema.+ 9 Kabiji wibakambizhe’mba: “Mwafwainwa kuba bino na moyo wa kwakamwa Yehoba, na bukishinka ne na muchima yense:* 10 Inge balongo benu bekala mu mizhi yabo baleta mambo a kwichila mashi+ nangwa baipuzha pa mizhilo, nangwa mikambizho, nangwa malamuna nangwa byatongolwa, mwafwainwa kwibajimunako pa kuba’mba bakabule kuzhatwa kwi Yehoba; mambo inge ne, bukaji bwanji bukeya pe anweba ne pa balongo benu. Bino byo byo mwafwainwa kuba, pa kuba’mba mukabule kuzhatwa. 11 Amaliya ñanga mukatampe ye mukulumpe wenu utalanga pa bintu byonse bya Yehoba.+ Zebadiya mwana wa kwa Ishimela ye ntangi wa ba mu nzubo ya kwa Yuda utalanga pa bintu byonse bya mfumu. Kabiji bena Levi bakekala bakalama benu. Kosai ne kwingila, kabiji Yehoba ekale na bantu boba byawama.”+
20 Pa kupitapo kimye, bena Moabu+ ne bena Amonyi,+ pamo na bena Amonamu* bamo, baishile na kulwa ne Yehoshafwata. 2 Kepo Yehoshafwata bamubuujile’mba: “Jibumba jikatampe jaiya na kulwa ne anweba, jafuma ku kibunji kya kalunga* ka mema, ku Edomu,+ kabiji baji mu Hazazona-tamala ko kuba’mba Enagedi.”+ 3 Ponkapo Yehoshafwata waumvwine moyo, kabiji wafuukwilepo* kukeba Yehoba.+ Onkao mambo, watayile mbila ya kuba’mba bena Yuda bonse bazhikilwe na nzala. 4 Kepo bena Yuda bakonkene pamo na kwipuzha Yehoba;+ bafumine mu mizhi yonse ya mu Yuda kuba’mba bepuzhe Yehoba.
5 Kepo Yehoshafwata aimene mu kipwilo kya bena Yuda ne kya ba mu Yelusalema mu nzubo ya Yehoba kulutwe ya kipango kya katataka, 6 kabiji waambile’mba:
“Anweba Yehoba Lesa wa bashakulu betu, nanchi kechi yenu Lesa wa mwiulu;+ kabiji mwi mfumu wa bufumu bonse bwa bisaka bya bantu nenyi?+ Mu kuboko kwenu muji bulume ne ngovu, kabiji kafwako wakonsha kulwa nenu ne.+ 7 Anweba Lesa wetu, nanchi kechi mwapangilemo bangikazhi ba mu kino kyalo ku meso a bantu benu bena Isalela ne kwikipana ku baana* ba kwa Abalahama mulunda nenu kwikala ke kyabo myaka ne myaka nenyi?+ 8 Kabiji baikele monka, ne kwimushimikila nzubo yazhila ya kutumbijikilamo jizhina jenu+ ne kwamba’mba, 9 ‘Inge bya malwa bituponena, nangwa mpoko, nangwa kwitukabisha, nangwa mwalo, nangwa kipowe kya nzala, kabiji twaimana ku ino nzubo ne ku meso enu (mambo jizhina jenu jiji mu ino nzubo)+ ne kwimwita’mba mwitukwashe kimye kyo tuji mu bya malwa, mukomvwe ne kwitupokolola.’+ 10 Pano akitalai bena Amonyi ne bena Moabu ne ba mu kibunji kya mitumba kya Seila,+ bonka bo mwabujile kuswisha bena Isalela amba bebalukuke kimye kyo bafuminenga mu kyalo kya Ijipita. Abo bebasezhezhe kabiji kechi bebepayile ne.+ 11 Pano baiya na kwitufweta kupichila mu kwitupanga mu kyalo kyenu kyo mwitupele kwikala buswanyi bwetu.+ 12 Anweba Lesa wetu, nanchi kechi musakwibakambula nenyi?+ Mambo atweba tufwabo bulume bwa kulwa na jino jibumba jikatampe jibena kwiya na kwitulwisha; kabiji kechi twayuka kintu kyo twafwainwa kuba ne,+ tubena kutalatu kwi anweba.”+
13 Kabiji bena Yuda bonse baimene kwi Yehoba pamo na baana babo babacheche, bakazhi babo ne baana* babo.
14 Kabiji mukachi ka kipwilo, mupashi wa Yehoba waishile pe Yahaziela mwana wa kwa Zekaliya, Zekaliya mwana wa kwa Benaya, Benaya mwana wa kwa Yeyela, Yeyela mwana wa kwa Mataniya, mwina Levi wa mu baana ba kwa Asafwa. 15 Waambile’mba: “Telekai, anweba bena Yuda bonse, ne anweba bangikazhi ba mu Yelusalema ne anweba Mfumu Yehoshafwata! Yehoba wimwambila’mba, ‘Kange mube moyo nangwa kukakilwa na mambo a jino jibumba jikatampe ne, mambo ino nkondo kechi yenu ne, bino yo ya Lesa.+ 16 Kesha mukaye ko baji. Bakatuntukanga mukolo wa Zizi, kabiji mukebataana kwapelela kimpachiko* kwipi na kiselebwa kya Yelwela. 17 Kechi mukalwako mu ino nkondo ne. Itanchikai, imanaitu,+ kabiji mukamona Yehoba byo akemupulusha.*+ Anweba bena Yuda ne ba mu Yelusalema, kange mube moyo nangwa kukakilwa ne.+ Kesha mukaye ko baji, kabiji Yehoba ukekala nenu.’”+
18 Ponkapo Yehoshafwata wanyeñamine wakinka ne kilungi kyanji panshi, ne bena Yuda bonse ne bangikazhi ba mu Yelusalema bafukamijile Yehoba ne kumupopwela Yehoba. 19 Kepo bena Levi bajinga ba mu kisemi kya bena Kohati+ ne bena Kola baimene ne kutota Yehoba Lesa wa Isalela na jiwi ja peulu.+
20 Baimene lukelo ne kuya ku kiselebwa kya Tekoa.+ Byo bayilenga, Yehoshafwata waimene ne kwamba’mba: “Ntelekai anweba bena Yuda ne anweba bangikazhi ba mu Yelusalema! Ikalai na lwitabilo mwi Yehoba Lesa wenu pa kuba’mba mukonshe kwimana saka mwakosa.* Ikalai na lwitabilo mu bangauzhi banji,+ kabiji bintu bisakwimwendelatu bulongo.”
21 Byo apwishishe kwisamba na bantu, watongwele banabalume kuba’mba bembile+ Yehoba ne kumutota saka bavwala bivwalo byazhila kimye kyo batangijile kulutwe ya banabalume bajinga na bilwilo saka bemba’mba: “Musanchilai Yehoba, mambo butemwe bwanji bubula kwaluka bo bwa myaka ne myaka.”+
22 Byo batendekele kwimba na lusekelo nyimbo ya kumutota, Yehoba wabikile bakubelamina banabalume bena Amonyi, bena Moabu ne ba mu kibunji kya mitumba kya Seila baishile na kulukuka Yuda, kabiji betapile bene na bene.+ 23 Kabiji bena Amonyi ne bena Moabu baalukijilemo bangikazhi ba mu kibunji kya mitumba kya Seila+ ne kwibonauna ne kwibavizha; kabiji byo bapwishishe kuvizha bangikazhi ba mu Seila, batendekele kwiipaya mulwabo.+
24 Bino bena Yuda byo bafikile ku kyamba kya usopa kyajinga mu kiselebwa+ ne kutala kwajinga jibumba, bamwene mibiji yabo yafwa saka yalalazhamatu panshi;+ kafwako wapulukile ne. 25 Onkao mambo, Yehoshafwata ne bantu banji bayile na kusenda bipukulwa, kabiji mwi abo bataainemo bintu byawama byavula, bivwalo ne bipe byawama, byo betolejilenga abo bene kufikatu ne byo bebikankelwe kwibisenda.+ Moba asatu apwile na kutunta bipukulwa, mambo byavujile bingi. 26 Pa juba ja buna bakonkene pamo mu Kimpachiko* kya Belaka, mambo konkakwa ko ko bamutotejile* Yehoba. O ene mambo o batumbijile yoya mpunzha amba Kimpachiko kya Belaka*+ kufika ne lelo jino.
27 Kepo bena Yuda bonse ne ba mu Yelusalema, ne Yehoshafwata wibatangijilenga, babwelele ku Yelusalema saka basangalala, mambo Yehoba wibakwashishe kushinda balwanyi babo.+ 28 Onkao mambo, baishile mu Yelusalema na bijimba bya mizhinge, byansa,+ matolompita+ ne kuya ku nzubo ya Yehoba.+ 29 Kabiji moyo wa kuchina Lesa wakwachile bufumu bonse bwa mu byalo byo baumvwine’mba Yehoba walwa na balwanyi ba bena Isalela.+ 30 Onkao mambo, mu bufumu bwa Yehoshafwata bantu bonse baikeletu ku matwi nzoo, kabiji Lesa wanji wamulengejile kukokoloka ku balwanyi banji bonse bamuzhokolokele.+
31 Kabiji Yehoshafwata watwajijile kulama Yuda. Wajinga na myaka ya kusemwa 35 kimye kyo aikele mfumu, kabiji walamine mu Yelusalema myaka 25. Inanji wajinga Azuba mwana wa kwa Shilihi.+ 32 Waendelenga mu jishinda ja shanji aye Asa.+ Kechi wafuminemo ne, kabiji waubilenga byaoloka kwi Yehoba.+ 33 Pano bino, mapunzha atuntama kechi beonawine ne,+ kabiji bantu kechi bakinengezhe michima yabo kwi Lesa wa bashakulu babo+ ne.
34 Bintu bikwabo byapichilemo Yehoshafwata kufuma po atendekejile kufika ne po apelejile, byanembwa mu byambo bya kwa Yehu+ mwana wa kwa Hanani,+ biji mu Buku wa Bamfumu ba mu Isalela. 35 Kepo Yehoshafwata Mfumu wa Yuda aumvwañene na Ahaziya Mfumu wa Isalela, yenka waubilenga bintu byatama.+ 36 Onkao mambo, waishile kukwatankana nanji ne kulenga maato a kuya ku Tashishi,+ kabiji balengele maato mu Eziona-gebela.+ 37 Nangwa byonkabyo, Elieza mwana wa kwa Dodabahu wa ku Malesha waawile pe Yehoshafwata amba: “Na mambo a kuba mwaumvwañana na Ahaziya, Yehoba ukonauna mingilo yenu.”+ Byonkabyo, maato aonaikile,+ kabiji kechi akonsheshe kuya ku Tashishi ne.
21 Kepo Yehoshafwata bamutwajile na kulaala kwalaala bashakulu banji kabiji bamuzhiikile ko bazhiikile bashakulu banji mu Muzhi wa Davida; kabiji mwananji aye Yeholama waswaine pa bufumu.+ 2 Bankasanji, baana ba kwa Yehoshafwata bajinga Azaliya, Yehiela, Zekaliya, Azaliya, Mikela ne Shefwatiya; bano bonse bajinga baana ba kwa Yehoshafwata Mfumu wa Isalela. 3 Kabiji shabo wibapele bya bupe byavula bingi bya siliva ne ngolode, ne bya buneme, pamo na mizhi yajinga na masakwa akosa ya mu Yuda;+ bino bufumu wibupaine kwi Yeholama,+ mambo ye wajinga mubeji.
4 Yeholama byo aswaine pa bufumu bwa bashanji, wakoseshe kifulo kyanji byo aipayile na mpoko bankasanji bonse,+ ne babinemanga bamo ba mu Isalela. 5 Yeholama wajinga na myaka ya kusemwa 32 kimye kyo aikele mfumu, kabiji walamine mu Yelusalema myaka itanu na isatu.+ 6 Waendelenga mu jishinda ja bamfumu ba mu Isalela,+ byonkatu byaubanga boba ba mu nzubo ya kwa Ahaba, mambo wasongwele mwana wa kwa Ahaba;+ kabiji waubilenga byatama kwi Yehoba. 7 Bino Yehoba kechi wakebelenga konauna nzubo ya kwa Davida ne, na mambo a lulayañano lo alayañene ne Davida,+ mambo walayile kumupa lampi kikupu aye ne baana banji pamo.+
8 Mu moba anji, bena Edomu basatukijile bena Yuda+ kabiji betongwejile bene mfumu.+ 9 Onkao mambo, Yeholama ne bakulumpe ba bashilikale banji bayile kwi abo ne makalaki abo onse, kabiji waimene bufuku ne kuya na kushinda bena Edomu bamuzhokolokele ne bakulumpe ba bashilikale benda pa makalaki. 10 Bino bena Edomu batwajijiletu kusatukila bena Yuda kufika ne lelo jino. Libina+ naye wamusatukijile pa kyonkakya kimye, mambo washile Yehoba Lesa wa bashakulu banji.+ 11 Kabiji washimikile ne mapunzha atuntama+ pa mitumba ya mu Yuda ne kulengela bangikazhi ba mu Yelusalema kubula kwikala ba kishinka kwi Lesa,* kabiji watwajile bena Yuda mungi.
12 Kepo byambo byanembelwe byaishile kwi aye kufuma kwi ngauzhi Elaija,+ amba: “Yehoba Lesa wa mushakulu wobe Davida waamba’mba, ‘Kechi waenda mu mashinda a Yehoshafwata+ shobe nangwa mu mashinda a kwa Asa+ Mfumu wa Yuda ne. 13 Bino ubena kwenda mu jishinda ja bamfumu ba mu Isalela+ ne kulengela bena Yuda ne bangikazhi ba mu Yelusalema kubula kwikala ba kishinka kwi Lesa*+ byonka byajinga bupite bwa ba mu nzubo ya kwa Ahaba,+ kabiji waipaya ne bankasobe+ ba mu nzubo ya bashobe bawamine kukila obewa. 14 Onkao mambo, Yehoba ukapuma bantu bobe, baana bobe, bakazhi bobe ne bintu byobe byonse. 15 Kabiji ukakolwa bikola byavula, kubikapotu ne kikola kya ku mila, kufikatu ne mila yobe byo ikalupuka na mambo a kukolelwa mukoyo.’”
16 Kepo Yehoba aletejile+ Yeholama bena Filishitiya*+ ne bena Alaba+ bajinga kwipi na bena Etiopya. 17 Onkao mambo, balukukile Yuda ne kutwela monka, kabiji basendele bipe byonse byo bataaine mu nzubo* ya mfumu,+ pamo na baana banji ne bakazhi banji; kwashajiletu Yehoahaza*+ mwananji, wajinga mwanyike pa bonse. 18 Byo apwishishe bino byonse, Yehoba wamukambwile na kikola kibula kupwa kya ku mila.+ 19 Kabiji pa kupitapo kimye, myaka ibiji byo yapwile, mila yanji yalupukile na mambo a kikola kyanji, kabiji wafwile na misongo ikatampe na mambo a kikola kyanji; kabiji bantu banji kechi babanzhile mujilo pa kijilo kyanji byonka byo baubile na bashakulu banji ne.+ 20 Wajinga na myaka ya kusemwa 32 kimye kyo aikele mfumu, kabiji walamine mu Yelusalema myaka itanu na isatu. Kafwako muntu waumvwine bulanda kimye kyo afwile ne. Onkao mambo, bamuzhiikile mu Muzhi wa Davida,+ bino kechi mu mapunzha a kuzhikamo bamfumu ne.+
22 Kepo bangikazhi ba mu Yelusalema baswanyikile mwananji mukala aye Ahaziya pa bufumu, mambo nzhita yaishile na bena Alaba mu kampu yaipayile bakulumpe bonse.+ Onkao mambo, Ahaziya mwana wa kwa Yeholama waikele mfumu wa Yuda.+ 2 Ahaziya wajinga na myaka ya kusemwa 22 kimye kyo aikele mfumu, kabiji walamine mu Yelusalema mwaka umo. Inanji wajinga Ataliya+ munkana* wa kwa Omuli.+
3 Naye waendelenga mu mashinda aba mu nzubo ya kwa Ahaba,+ mambo inanji ye wamubuujilenga maana atama. 4 Kabiji waubilenga byatama kwi Yehoba, byonka byaubilenga ba mu nzubo ya kwa Ahaba, mambo shanji byo afwile bo bamubuulangako maana ne kumulengela konaika. 5 Ahaziya waumvwijile byo bamubuujile kabiji wayile ne Yeholama mwana wa kwa Ahaba Mfumu wa Isalela na kulwa nkondo na Hazela+ Mfumu wa Silya ku Lamota-gileada,+ konka bataya miketo ko bakozhezhe Yeholama. 6 Yeholama wabwelele ku Yezelela+ kuba’mba bilonda bikapwe byo bamukozhezhe ku Lama kimye kyo alwilenga ne Hazela Mfumu wa Silya.+
Ahaziya* mwana wa kwa Yeholama+ mfumu wa Yuda wayile ku Yezelela na kumona Yeholama+ mwana wa kwa Ahaba, mambo bamukozhezhe.*+ 7 Bino Lesa waletele lufu pe Ahaziya byo ayile kwi Yeholama; byo afikile, aye ne Yeholama bayile na kutundaila Yehu+ munkana* wa kwa Nimushi, Yehoba ye ashingile manyi amba onaune* ba mu nzubo ya kwa Ahaba.+ 8 Yehu byo atendekele kwipaya ba mu nzubo ya kwa Ahaba, wataaine babinemanga ba mu Yuda ne baana ba balongo ba kwa Ahaziya, ne ba mingilo ba kwa Ahaziya, kabiji wibepayile.+ 9 Kepo akebele Ahaziya; bamukwachile mu Samaliya mo afyamine, kabiji bamuletele kwi Yehu. Kepo bamwipayile ne kumuzhiika,+ mambo baambile’mba: “Ye munkana wa kwa Yehoshafwata, yenka wakebele Yehoba na muchima wanji yense.”+ Kafwako nangwa umo wa mu nzubo ya kwa Ahaziya wajinga na bulume bwa kuswana pa bufumu ne.
10 Ataliya+ inanji Ahaziya byo amwene’mba mwananji wafwa, waimene ne kwipaya baana bonse ba mu kikota* kya bufumu bwa Yuda.+ 11 Nangwa byonkabyo, Yehoshabeata mwana wa mukazhi wa mfumu wasendele Yehoashi+ mwana wa kwa Ahaziya ne kumubombola pa baana ba mfumu bo bafwainwe kwipaya, kabiji aye ne wamulaminenga wibafile mu kibamba kya kulaalamo kya mukachi. Yehoshabeata mwana wa Mfumu Yeholama+ (wajinga muka Yehoyada+ ñanga kabiji wajinga nyenga ya kwa Ahaziya) wamufile kuchina’mba bakamumona kwi Ataliya, onkao mambo, kechi bamwipayile ne.+ 12 Uno mwana waikele nabo myaka itanu na umo, saka bamufya pa nzubo ya Lesa wa kine, kimye Ataliya kyo alaminenga kyalo.
23 Mu mwaka wa butanu na bubiji, Yehoyada wachinchikile ne kukwatankana* na bakulumpe ba pa bitota,+ abo ba Azaliya mwana wa kwa Yelohama, Ishimela mwana wa kwa Yehohanana, Azaliya mwana wa kwa Obeda, Maaseya mwana wa kwa Adaya, ne Elishafwata mwana wa kwa Zikili. 2 Kepo bapitañene mu Yuda monse ne kukonkanya bena Levi+ kufuma mu mizhi yonse ya Yuda ne bakulumpe ba bikota bya bena Isalela. Byo bafikile ku Yelusalema, 3 kipwilo kyonse kyalayañene lulayañano+ na mfumu mu nzubo ya Lesa wa kine, kepo Yehoyada ebambijile’mba:
“Talai! Mwana mfumu ukalamanga, byonkatu Yehoba byo alayile na mambo a baana ba kwa Davida.+ 4 Bino byo byo mukooba: Kipanyi kimo pa bisatu kya bañanga ne bena Levi bakengilanga+ pa juba ja Sabado, kikekale kya kulama bibelo;+ 5 kipanyi kikwabo kikekale ku nzubo* ya mfumu,+ ne kya busatu kikekale ku Kibelo kya Kitendekesho, kabiji bantu bonse bakekale mu bipango bya nzubo ya Yehoba.+ 6 Kange mukaleke muntu nangwa umo akatwele mu nzubo ya Yehoba ne, kanatu bañanga ne bena Levi bonka babena kwingila.+ Bano bakonsha kutwelamo mambo ke jibumba jazhila, kabiji bantu bonse bakalame mukambizho wa Yehoba. 7 Bena Levi bafwainwa kuzhokoloka mfumu konse konse, kabiji bonse pa muntu pa muntu bakekale na bilwilo mu maboko abo. Muntu yense ukatwelamo mu nzubo bakamwipaye. Mukekalenga na mfumu konse ko akayanga.”*
8 Bena Levi ne bena Yuda bonse baubile byonka bibakambizhe Yehoyada ñanga. Byonkabyo, muntu yense wasendele bantu banji baingijilenga pa juba ja Sabado, pamo na boba babujilenga kwingila pa juba ja Sabado,+ mambo Yehoyada ñanga kechi waambijile bipanyi+ kukomboka ne. 9 Kepo Yehoyada ñanga apele bakulumpe ba pa bitota+ mafumo ne makebo acheache* ne makebo anzhingwile ajinga a Mfumu Davida,+ onka ajinga mu nzubo ya Lesa wa kine.+ 10 Kabiji waimikile bantu bonse, muntu yense wajinga na kilwilo* mu kuboko kwanji, kufuma ku kilujo kya nzubo kufika ne ku kipiko kya nzubo, kwipi na kya kusokelapo bitapisho ne ku nzubo saka bazhokoloka mfumu. 11 Kepo balupwile mwana mfumu+ ne kumuvwika munchinya* ne kubika Lushimuno*+ pe aye ne kumubika pa bufumu, kabiji Yehoyada ne baana banji bamushingile manyi. Baambile’mba: “Mfumu ekale myaka!”+
12 Ataliya byo aumvwine kyungwe kya bantu banyemenenga saka batota mfumu, ponkapo waishile kwajinga bantu ku nzubo ya Yehoba.+ 13 Kepo amwene mfumu saka aimana kwipi na jishiki janji ku kibelo. Babinemanga+ ne bavumya matolompita bajinga na mfumu, ne bantu bonse ba mu kyalo basangalele+ ne kuvumya matolompita, kabiji banyimbi bajinga na byombesha saka batangijila* pa kwimba nyimbo ya kutota. Ponkapo Ataliya watabwile bivwalo byanji ne kubijika’mba: “Basatuka! Basatuka!” 14 Pakuba Yehoyada ñanga walupwile bakulumpe ba pa bitota, batajilenga pa bashilikale ne kwibambila’mba: “Mufumyai mu munongo, kabiji yense usakumulondela, mumwipaye na mpoko!” Mambo ñanga waambile’mba: “Kange mumwipayile mu nzubo ya Yehoba ne.” 15 Onkao mambo, bamukwachile, kabiji byo afikile ku Kibelo kya Bambili kya ku nzubo* ya mfumu, ponkapo bamwipayijile konkakwa.
16 Kabiji Yehoyada walayañene lulayañano na bantu bonse ne na mfumu, amba bakatwajijila kwikala bantu ba Yehoba.+ 17 Byo apwishishe kwamba, bantu bonse baishile ku nzubo ya kwa Baela ne kwiikundulapo,+ kabiji bakundawile bya kusokelapo bitapisho byanji ne bipashañano byanji,+ ne kwipayila Matana ñanga wa Baela+ kulutwe ya bya kusokelapo bitapisho. 18 Kepo Yehoyada atongwele bañanga ne bena Levi kuba’mba bekale bakasopa ba pa nzubo ya Yehoba, bonka Davida bo atongwele mu bipanyi kwikala bakulama nzubo ya Yehoba kuba’mba balambulenga bitapisho bya kusoka kwi Yehoba+ byonka byo kyanembwa mu Mizhilo ya Mosesa,+ saka basekela ne kwimba nyimbo byonkatu Davida byo akambizhe. 19 Kabiji wabikile ne bakasopa ba pa bibelo+ ku bibelo bya nzubo ya Yehoba, kuba’mba muntu yense wa muzhilo abule kutwelamo. 20 Kabiji wasendele bakulumpe ba pa bitota,+ babinemanga, bantangi, ne bantu bonse ba mu kyalo ne kushinjikinya mfumu kufuma mu nzubo ya Yehoba. Kepo baishile ku nzubo* ya mfumu kutwelela mu kibelo kya peulu ne kwikazha mfumu pa jitanda+ ja bufumu.+ 21 Onkao mambo, bantu bonse mu kyalo basekejile bingi kabiji mu muzhi mwazhindaminetu nzoo, mambo baipayile Ataliya na mpoko.
24 Yehoashi wajinga na myaka ya kusemwa itanu na ibiji kimye kyo aikele mfumu,+ kabiji walamine mu Yelusalema myaka 40. Inanji wajinga Zibya wa ku Belesheba.+ 2 Yehoashi waubilenga byaoloka kwi Yehoba mu moba onse a kwa Yehoyada ñanga.+ 3 Yehoyada wamukebejile banabakazhi babiji ba kusongola, kabiji wasemene baana ba balume ne baana ba bakazhi.
4 Kabiji muchima wa kwa Yehoashi wakebeshe kuwamisha nzubo ya Yehoba.+ 5 Onkao mambo, wakonkenye pamo bañanga ne bena Levi ne kwibambila’mba: “Yainga mu mizhi ya mu Yuda na kutambula mali ku bena Isalela bonse a kuwamishishanga nzubo ya Lesa+ wenu pa mwaka pa mwaka; kabiji mwafwainwa kupelawizha kuba kino kintu.” Bino bena Levi kechi bapelawizhe kuba bino ne.+ 6 Onkao mambo, mfumu waichile Yehoyada mukulumpe wabo ne kumwambila’mba:+ “Mambo ka o mwabujila kwambila bena Levi kuleta musonko wazhila kufuma mu Yuda ne mu Yelusalema byonka byakambizhe Mosesa+ kalume wa Yehoba, ne musonko wazhila wa kipwilo kya bena Isalela wa ku tente wa Lushimuno?+ 7 Baana ba kwa Ataliya+ mwanamukazhi mubi, basabile nzubo ya Lesa wa kine,+ ne kwingijisha bintu byonse byazhila bya mu nzubo ya Yehoba pa kupopwela Babaela.” 8 Kabiji na mambo a mukambizho wa mfumu, balengele kilambwilo+ ne kwikibika pangye ku kibelo kya nzubo ya Yehoba.+ 9 Kepo batayile mbila mu Yuda ne mu Yelusalema monse kuba’mba balete kwi Yehoba musonko wazhila+ yenka Mosesa kalume wa Lesa wa kine ye akambizhe bena Isalela mu kiselebwa. 10 Babinemanga bonse ne bantu bonse basangalele bingi,+ kabiji baletelenga bupe ne kwibubika mu kilambwilo kufikatu ne byo kyayujiletu paa.*
11 Kimye kyonse bena Levi kyo baletanga kilambwilo ku mfumu ne kumona’mba muji mali avula, munembeshi wa mfumu ne ntomesha wa ñanga mukatampe, baiyanga na kufumyamo mali mu kilambwilo+ kabiji bekibwezhanga pa mpunzha yakyo. Bino byo byo baubanga pa juba pa juba, kabiji babungizhe mali avula bingi. 12 Kabiji mfumu ne Yehoyada beapananga ku boba batangijilenga mwingilo wa ku nzubo ya Yehoba, kabiji batwezhezhe ba mingilo ba kuchiba mabwe ne basendwe ba kuwamisha nzubo ya Yehoba,+ ne basendwe ba kapotwe ne ba mukuba kuba’mba bawamishe nzubo ya Yehoba. 13 Kabiji aba batangijilenga mwingilo batendekele kwingila, kabiji mwingilo wa kuwamisha bamwingijilenga bulongo saka batangijila, kabiji bawamishe nzubo ya Lesa wa kine byonka byo yajinga kala ne kwiikosesha. 14 Byo bapwishishetu kwingila, baletele mali ashajilepo ku mfumu ne kwi Yehoyada, kabiji beengijishe kulengelamo bipe bya ku nzubo ya Yehoba, bipe bya kwingijisha mu mwingilo ne bya kwingijisha pa kupana milambo ne makapu ne bipe bya ngolode ne bya siliva.+ Kabiji bapananga bitapisho bya kusoka+ pa nzubo ya Yehoba pa juba pa juba mu moba onse a kwa Yehoyada.
15 Yehoyada byo akotele ne kwikala myaka yavula, wafwile; kimye kyo afwile wajinga na myaka ya kusemwa 130. 16 Kabiji bamuzhiikile mu Muzhi wa Davida konka ko bazhiikile bamfumu,+ mambo waubile bintu byawama mu Isalela+ kwi Lesa wa kine ne ku nzubo yanji.
17 Yehoyada byo afwile babinemanga ba mu Yuda baishile na kufukamina mfumu, kabiji mfumu wibomvwijile. 18 Kabiji bashile nzubo ya Yehoba Lesa wa bashakulu babo ne kutendeka kwingijila bichi* bya milumbulumbu byazhila ne bankishi, kya kuba bukaji bwa Lesa bwaishile* pa bena Yuda ne ba mu Yelusalema mambo bajinga na mambo. 19 Yehoba wibatuminanga bangauzhi kuba’mba bebabwezhe kwi aye, ne abo batwajijile kwibajimuna,* bino bakaine kumvwa.+
20 Mupashi wa Lesa waishile pe* Zekaliya mwana wa kwa Yehoyada+ ñanga, ne aye waimene peulu kulutwe ya bantu ne kwibambila’mba: “Lesa wa kine waamba’mba, ‘Mambo ka o mubena kuzhilulwila mikambizho ya Yehoba? Kechi mukamona byawama ne! Na mambo a kuba mwamukana Yehoba, ne aye ukemukana.’”+ 21 Bino bamumvwañenejile+ ne kumwasa mabwe mu kipango kya nzubo ya Yehoba+ monka mwibakambizhizhe mfumu. 22 Byonkabyo, Mfumu Yehoashi kechi wavulukile butemwe bubula kwaluka bwamumwesheshe Yehoyada shanji Zekaliya ne, kabiji waipayile mwananji, yenka waambile byo afwilenga amba: “Yehoba amone ne kwimutotolwesha.”+
23 Ku ntendekelo ya mwaka,* nzhita ya bena Silya yaishile na kulwa ne Yehoashi, kabiji yalukukile Yuda ne Yelusalema.+ Kabiji baipayile babinemanga bonse+ ba bantu, ne kutuma bipukulwa byabo byonse ku mfumu wa Damasakasa. 24 Nangwa kya kuba nzhita ya bena Silya yajingatu na bantu bacheche, Yehoba wibapele nzhita ikatampe,+ mambo bamukaine Yehoba Lesa wa bashakulu babo; onkao mambo, abo* bamukambwile Yehoashi. 25 Byo bafumineko ko aji (mambo bamushile saka bamukozha* bingi), bakalume banji bamwalukijilemo mambo waichijile mashi a baana* ba kwa Yehoyada+ ñanga. Bamwipayijile pa mwanya wanji.+ Wafwile kabiji bamuzhiikile mu Muzhi wa Davida,+ bino kechi bamuzhiikile mu mapunzha a kuzhiikamo bamfumu ne.+
26 Bano bo bamumvwañenejile+ ne kumwipaya: Zabada mwana wa kwa Shimeata mwanamukazhi mwina Amonyi ne Yehozabada mwana wa kwa Shimiliti mwanamukazhi mwina Moabu. 27 Pa mambo a baana banji ne byambo byavula byo baambile pe aye+ ne byo awamishe* nzubo ya Lesa wa kine,+ bino bintu byonse byanembwa mu Buku wa Bamfumu. Kabiji mwananji aye Amaziya waswaine pa bufumu.
25 Amaziya wajinga na myaka ya kusemwa 25 kimye kyo aikele mfumu, kabiji walamine mu Yelusalema myaka 29. Inanji wajinga Yehoadana wa ku Yelusalema.+ 2 Waubilenga byaoloka kwi Yehoba, bino kechi na muchima yense ne. 3 Byo akoseshetu bufumu bwanji, waipayile bakalume banji baipayile bashanji bajinga bamfumu.+ 4 Bino kechi waipayile baana babo ne, mambo walondejile byanembelwe mu Mizhilo, mu buku wa Mosesa, Yehoba mo akambizhe’mba: “Bashabo kechi bafwainwa kufwa na mambo a baana babo ne, kabiji baana nabo kechi bafwainwa kufwa na mambo a bashabo ne; pakuba muntu yense ukafwa na mambo a bubi bwanji mwine.”+
5 Kabiji Amaziya wakonkenye pamo bena Yuda, ne kwibambila bena Yuda bonse ne bena Benjamina kwimana monka mwayijile bikota byabo, saka bebatangijila ku bakulumpe ba biumbi ne bakulumpe ba pa bitota.+ Wibanembele kutendekela pa wa myaka 20 kuya ne peulu,+ kabiji wataaine kuba’mba bajinga 300,000 bashilikale bayukile* kulwa nkondo, kabiji bayukile kwingijisha mafumo ne makebo akatampe. 6 Kabiji ku Isalela wakatewileko babilobo 100,000 na matalenta* a siliva 100. 7 Bino muntu wa Lesa wa kine waishile kwi aye ne kumwambila’mba: “Anweba mfumu, kange muswishe nzhita ya bena Isalela kuya nenu ne, mambo Yehoba kechi uji na bena Isalela ne,+ nangwatu na bena Efelaimu ne. 8 Bino muyetu bunke bwenu, kabiji muchinchike mu nkondo. Mambo inge ne, Lesa wa kine wakonsha kulengela balwanyi benu kwimushinda, mambo Lesa uji na bulume bwa kwimukwasha+ nangwa bwa kwimulengela kwimushinda.” 9 Ponkapo Amaziya waambijile muntu wa Lesa wa kine amba: “Pano kisakwikala byepi na matalenta 100 o napana ku bashilikale ba ku Isalela?” Muntu wa Lesa wa kine wakumbwile’mba: “Yehoba wakonsha kwimupa bintu byavula kukila byo mwapana.”+ 10 Onkao mambo, Amaziya waambijile bashilikale baishile kufuma ku Efelaimu kubwela kwabo. Nangwa byonkabyo, bebazhingijile bingi bena Yuda, kabiji babwelelenga kwabo saka bazhingila.
11 Kepo Amaziya achinchikile ne kutangijila nzhita yanji ku Kimpachiko kya Mukele,+ kabiji watapile banabalume bena Seila 10,000.+ 12 Kabiji banabalume bena Yuda bakwachilepo bantu 10,000. Kabiji bebakanjizhizhe peulu ya jibwe ne kwibataya munshi kufuma peulu ya jibwe, ne abo bonse bachimaukile. 13 Bino ba mu nzhita Amaziya bo abwezhezhemo kuba’mba babule kumulondela ku nkondo,+ balukukile mizhi ya mu Yuda, kutendekela ku Samaliya+ kukafika ne ku Bete-holona;+ batapile bantu 3,000 ne kusenda bipukulwa byavula.
14 Bino Amaziya byo abwelele kufuma ko ayile na kutapa bena Edomu, wasendele balesa ba bena Seila ne kwibemika ke balesa banji,+ kabiji watendekele kwibafukamina ne kwibasokela bya kufutumuna. 15 Onkao mambo, Yehoba wamuzhingijile bingi Amaziya, kabiji watumine ngauzhi wamwambijile’mba: “Mambo ka o mubena kupopwela balesa ba bantu babujile kupokolola bantu babo mu kuboko kwenu?”+ 16 Byo aambilenga nanji, mfumu wamwambijile’mba: “Nanchi twakutongwele kwikala wa kufundako maana mfumu nyi?+ Kileke!+ Mambo ka o bafwainwa kukutapila?” Kepo ngauzhi ekilekele, bino wanungilepo amba: “Nayuka namba Lesa wafuukula kwimonauna, mambo mwauba kino kintu kabiji kechi mwaumvwina byo nemubuula ne.”+
17 Byo ashikishe bamufundangako maana, Amaziya Mfumu wa Yuda watumine jiwi kwi Yehoashi mwana wa kwa Yehoahaza, Yehoahaza mwana wa kwa Yehu mfumu wa Isalela amba: “Iya tulwe nkondo.”*+ 18 Yehoashi Mfumu wa Isalela watumine ano mawi kwi Amaziya Mfumu wa Yuda amba: “Mukolobola wa ku Lebanoni watumine jiwi ku kichi kya sida kya ku Lebanoni amba, ‘Upane mwanobe wa mukazhi ku mwanami kuba’mba ekale mukazhanji.’ Nangwa byonkabyo, lukinyama wa ku Lebanoni wapichile ne kunyantaula mukolobola. 19 Obewa waamba’mba, ‘Umvwai! Amiwa* natapa Edomu.’+ O ene mambo muchima wobe o elundumikila, ne kukeba kwitumbijika. Pano ikala mu nzubo* yobe. Mambo ka o ubena kukebela bya malwa ne kupona, ne kulengela Yuda kuponena pamo ne obewa?”
20 Bino Amaziya kechi waumvwine ne,+ mambo kino kyafumine kwi Lesa wa kine kuba’mba ebapane mu maboko a balwanyi,+ mambo bapopwejilenga balesa ba ku Edomu.+ 21 Byonkabyo, Yehoashi Mfumu wa Isalela wayile, kabiji aye ne Amaziya Mfumu wa Yuda, balwile nkondo ku Bete-shemeshi+ wa mu Yuda. 22 Bena Yuda bebashinjile ku bena Isalela, onkao mambo, muntu yense wanyemejile ku nzubo* yanji. 23 Yehoashi Mfumu wa Isalela wakwachile Amaziya Mfumu wa Yuda mwana wa kwa Yehoashi, Yehoashi mwana wa kwa Yehoahaza,* konka ku Bete-shemeshi. Kepo amuletele ku Yelusalema, ne aye wapumwine nsakwa ya Yelusalema kufuma ku Kibelo kya Efelaimu+ kufika ku Kibelo kya ku Jikonka,+ makyubichi 400.* 24 Wasendele ngolode yonse ne siliva ne bipe byonse byo bataaine mu nzubo ya Lesa wa kine byalaminenga Obeda-edomu ne mo balaminenga bya buneme bya mu nzubo* ya mfumu,+ kuvwangakotu ne bazha. Kepo abwelele ku Samaliya.
25 Amaziya+ mwana wa kwa Yehoashi mfumu wa Yuda waikele myaka 15 kufuma pafwijile Yehoashi+ mwana wa kwa Yehoahaza mfumu wa Isalela.+ 26 Bintu bikwabo byapichilemo Amaziya, kufuma po atendekejile kufika ne po apelejile, nanchi kechi byanembwa mu Buku wa Bamfumu ba mu Yuda ne ba mu Isalela nenyi? 27 Kufumatu kimye Amaziya kyo alekele kulondela Yehoba, bamwalukijilemo+ mu Yelusalema, kabiji wanyemejile ku Lakishi, bino batumine banabalume bamulondejile ku Lakishi ne kumwipayila konkakwa. 28 Kabiji bamubwezhezhe saka bamusenda mu kalaki ye bakokelenga ku bambili kabiji bamuzhiikile konka ko bazhiikile bashakulu banji mu muzhi wa Yuda.
26 Kepo bantu bonse ba mu Yuda basendele Uzaya+ wajinga na myaka ya kusemwa 16, ne kumuswanyika pa bufumu bwa shanji aye Amaziya.+ 2 Washimukulwile Elota+ ne kumubwezha ku Yuda byo batwajile mfumu* na kulaala kwalaala bashakulu banji.+ 3 Uzaya+ wajinga na myaka ya kusemwa 16 kimye kyo aikele mfumu, kabiji walamine mu Yelusalema myaka 52. Inanji wajinga Yekoliya wa ku Yelusalema.+ 4 Waubilenga byaoloka kwi Yehoba, byonkatu byaubanga Amaziya shanji.+ 5 Kabiji watwajijile kukeba Lesa mu moba a kwa Zekaliya yenka wamufunjishe kwakamwa Lesa wa kine. Mu bimye byonse byo akebelenga Yehoba, Lesa wa kine wamulengejile kubila.+
6 Wayile na kulwa na bena Filishitiya+ kabiji wapumwine ne nsakwa ya Gata,+ nsakwa ya Yabine+ ne nsakwa ya Ashadoda.+ Kabiji washimikile mizhi mu nyaunda ya Ashadoda ne mu bena Filishitiya. 7 Lesa wa kine watwajijile kumukwasha kulwa na bena Filishitiya, na bena Alabya+ baikalanga mu Gulabaela ne na bena Meuni. 8 Bena Amonyi+ batendekele kupana milambo kwi Uzaya. Kabiji nkuwa yanji yakafikile ne ku Ijipita, mambo wajinga bingi na bulume. 9 Kabiji Uzaya washimikile byamba+ mu Yelusalema ku Kibelo kya ku Jikonka,+ Kibelo kya ku Kimpachiko+ ne Pachimpukila Nsakwa, kabiji wibikoseshe. 10 Kabiji washimikile byamba+ mu kiselebwa, ne kupoya* mishima* ya mema yavula (mambo wajinga na bilelwa byavula bingi); kabiji waubile kintutu kimo ne mu Shefela ne ku mutunta.* Wajinga na banjimi ne ba kufina mañanzañanza mu mitumba ne mu Kamela, mambo watemenwe bingi bunjimi.
11 Kabiji Uzaya wajinga na nzhita yayukile bingi kulwa nkondo. Yayanga ku nkondo, mu bipanyi bipanzhile bulongo. Beibajile ne kwiinemba+ kwi Yeyela munembeshi+ ne Maaseya wa kibiji, bonka bo batangijilenga kwi Hananiya kinemanga wa mfumu. 12 Bakulumpe ba bikota bonse batangijilenga bano babilobo bajinga 2,600. 13 Nzhita yo batangijilenga ya banabalume bepanzhile kulwa nkondo bajinga 307,500, nzhita yajinga na bulume bwa kukwasha mfumu kulwa na balwanyi.+ 14 Uzaya wapele nzhita yonse makebo, mafumo,+ tumpompo, malaya a byela,+ mata a mukanda ne mabwe a mu binzhipunzhipu.+ 15 Kabiji mu Yelusalema walengele minkinyi ya nkondo, yo balengele ku basendwe; beibikile pa byamba+ ne pa makonka a masakwa ya kutaya miketo ne mabwe akatampe. Onkao mambo, nkuwa yanji yafikile kwalepa, mambo bamukwashishe bingi kabiji wakosele.
16 Nangwa byonkabyo, byo aikele na bulume, wilundumikile bingi ne kwiletela mwine lonaiko, kabiji walekele kwikala wa kishinka kwi Yehoba Lesa wanji, mambo watwelele mu nzubo ya Yehoba na kusoka bya kufutumuna pa kya kusokelapo bya kufutumuna.+ 17 Ponkapotu Azaliya ñanga ne bañanga ba Yehoba bakwabo 80 bachinchikile bamulondejile mukachi. 18 Bamukainye Mfumu Uzaya ne kumwambila’mba: “Anweba ba Uzaya, kechi mwafwainwa kusoka bya kufutumuna kwi Yehoba ne!+ Bañanga bo bonkatu bafwainwa kusoka bya kufutumuna, mambo bo ba mu kisemi kya kwa Alona,+ bonka bo bazhijika. Lupukaimo mu nzubo yazhila, mambo mwauba kintu kyatama kabiji na mambo a kino, kechi musakutumbijikwa kwi Yehoba Lesa ne.”
19 Bino Uzaya wazhingijile bingi,+ kabiji wajinga na kababula mu kuboko kwanji kuba’mba asoke bya kufutumuna; byo azhingijile bañanga, mbumba+ yaishile pa kilungi kyanji ne bañanga sabaji ponka byo bajinga mu nzubo ya Yehoba kwipi na kya kusokelapo bya kufutumuna. 20 Azaliya ñanga mukatampe ne bañanga bonse byo bamutajile, bamwene’mba pa kilungi kyanji paji mbumba! Onkao mambo, bamulupwilemo, ne aye mwine wapelawizhe kulupukamo, mambo Yehoba wamukambwile.
21 Mfumu Uzaya waikele na mbumba kufikatu ne byo afwile, kabiji watwajijile kwikala mu nzubo ya bunke byo ajinga na mbumba,+ mambo bamukainye kutwela mu nzubo ya Yehoba. Mwananji aye Yotamo ye wajinga mukulumpe wa pa nzubo* ya mfumu, kabiji ye wachibilanga mambo bantu ba mu kyalo.+
22 Kabiji bintu bikwabo byapichilemo Uzaya, kufuma po atendekejile kufika ne po apelejile, byanembelwe na ngauzhi Isaya+ mwana wa kwa Amozi. 23 Kepo Azaliya bamutwajile na kulaala kwalaala bashakulu banji, kabiji bamuzhiikile ko bazhiikile bashakulu banji, bino aye bamuzhiikile mu mushiji wa bamfumu, mambo baambile’mba: “Ye muntu wa mbumba.” Kabiji mwananji aye Yotamo+ wamuswaine pa bufumu.
27 Yotamo+ wajinga na myaka ya kusemwa 25 kimye kyo aikele mfumu, kabiji walamine mu Yelusalema myaka 16. Inanji wajinga Yelusha mwana wa kwa Zadoka.+ 2 Waubilenga byaoloka ku meso a Yehoba, byonkatu byaubanga Uzaya shanji,+ bino aye kechi watwelelemo mu nzubo ya Yehoba ne.+ Bino bantu baubilenga byatama. 3 Kabiji washimikile kibelo kya peulu kya nzubo ya Yehoba,+ ne kushimikilapo byavula pa nsakwa ya Ofela.+ 4 Washimikile ne mizhi+ mu kibunji kya mitumba kya Yuda,+ ne bishimikwa byakosa+ ne byamba+ mu jisaka. 5 Walwile nkondo na mfumu wa bena Amonyi+ kabiji wibashinjile, kya kuba mu yenkawa mwaka bena Amonyi bamupele matalenta* a siliva 100, ne bipimo* bya kolo bya wichi 10,000 ne a mbaale 10,000. Kabiji bena Amonyi bamupele bino mu mwaka wa bubiji ne wa busatu.+ 6 Onkao mambo, Yotamo wakosejilengakotu, mambo wasajile* jishinda jaoloka ku meso a Yehoba Lesa wanji.
7 Bintu bikwabo byapichilemo Yotamo ne makondo onse o alwile ne bintu byo aubile, byanembwa mu Buku wa Bamfumu ba mu Isalela ne ba mu Yuda.+ 8 Wajinga na myaka ya kusemwa 25 kimye kyo aikele mfumu, kabiji walamine mu Yelusalema myaka 16.+ 9 Kepo Yotamo bamutwajile na kulaala kwalaala bashakulu banji, kabiji bamuzhiikile mu Muzhi wa Davida.+ Kabiji mwananji aye Ahaza waswaine pa bufumu.+
28 Ahaza+ wajinga na myaka ya kusemwa 20 kimye kyo aikele mfumu, kabiji walamine mu Yelusalema myaka 16. Kechi waubilenga byaoloka ku meso a Yehoba byonka byaubanga Davida mushakulu wanji ne.+ 2 Pakuba aye waendelenga mu mashinda a bamfumu ba mu Isalela,+ kabiji walengele ne bipashañano bya byela+ bya Babaela. 3 Kabiji wasokelenga bya kufutumuna mu Kimpachiko kya Mwana wa kwa Hinomu* ne kusoka baana banji mu mujilo,+ kulondela byubilo bya bunya bya bisaka bya bantu+ Yehoba byo apangile ku meso a bena Isalela. 4 Kabiji watapishenga bitapisho ne kusoka bya kufutumuna mu mapunzha atuntama,+ pa tutumbatumba, ne munshi ya bichi bikatampe byonse.+
5 Onkao mambo, Yehoba Lesa wanji wamupaine mu kuboko kwa mfumu wa Silya,+ kabiji bamushinjile ne kusenda bantu bavula mu buzha ne kwibaleta ku Damasakasa.+ Kabiji bamupaine ne mu kuboko kwa mfumu wa Isalela yenka waipayile bantu banji bavula. 6 Mambo Peka+ mwana wa kwa Lemaliya waipayile bantu 120,000 ba mu Yuda mu juba jimo, bonse bajinga banabalume bachinchika, mambo bamushile Yehoba Lesa wa bashakulu babo.+ 7 Kabiji Zikili, kilobo mwina Efelaimu, waipayile Maaseya mwana wa mfumu ne Azilikama, watalanga pa kipango* ne Elekana wajinga wa kibiji kwi mfumu. 8 Kabiji bena Isalela batwajile balongo babo 200,000 mu buzha—banabakazhi, baana ba balume ne baana ba bakazhi; kabiji basendele ne bipukulwa byavula ne kwibitwala ku Samaliya.+
9 Bino ngauzhi wa Yehoba wa jizhina ja Odeda wajinga konka. Walupukile na kutundaila nzhita yaishilenga ku Samaliya ne kwiyambila’mba: “Umvwai! Na mambo a kuba Yehoba Lesa wa bashakulu benu wibazhingijile bena Yuda, wibapaine mu kuboko kwenu,+ kabiji mwibepayile na mambo a bukaji bwafika ne mwiulu. 10 Pano mubena kukeba kwalula bena Yuda ne ba mu Yelusalema kwikala bakalume benu ba balume ne ba bakazhi.+ Nangwa byonkabyo, nanchi ne anweba kechi muji na mambo kwi Yehoba Lesa wenu nenyi? 11 Pano ntelekai, kabiji mubwezhe bazha bo mwasendele mu balongo benu, mambo bukaji bwa Yehoba buji pe anweba.”
12 Ponkapo bakulumpe ba bena Efelaimu bamo, Azaliya mwana wa kwa Yehohanana, Belekiya mwana wa kwa Meshilemota, Yehizekiya mwana wa kwa Shaluma ne Amasa mwana wa kwa Hadelai, basolomokele boba bafumine na kulwa nkondo, 13 kabiji bebambijile’mba: “Kange mulete bazha muno ne, mambo kisakwitulengela kwikala na mambo kwi Yehoba. Kintu kyo mubena kukeba kuba kisakunungapotu pa bubi bwetu ne pa mambo etu, mambo mambo etu abaya, kabiji bukaji bukatampe buji pa bena Isalela.” 14 Onkao mambo, bashilikale bajinga na bilwilo bapaine bazha ne bipukulwa+ ku babinemanga ne kipwilo kyonse. 15 Kepo banabalume bo batongwele mazhina baimene ne kusenda bazha, kabiji pa bipukulwa batolelepo bivwalo bya kupa boba bajinga mulekese. Onkao mambo, bebavwikile ne kwibapa makwabilo, kajo ne bya kutoma, ne manyi a kushinga pa mibiji yabo. Kabiji aba babujile kukosa bebasendejile pa bambongolo ne kwibatwala ku balongo babo ku Yeliko, muzhi wa bisonga. Kepo babwelele ku Samaliya.
16 Pa kyonkakya kimye Mfumu Ahaza walombele bukwasho ku bamfumu ba ku Asilya.+ 17 Kabiji bena Edomu baishile jibiji na kulukuka bena Yuda ne kusenda bazha. 18 Bena Filishitiya+ nabo balukukile mizhi ya mu Shefela+ ne mu Negeba wa mu Yuda kabiji baangachile Bete-shemeshi,+ Ayalona,+ Gedelota, Soko ne mande anji,* Timina+ ne mande anji, ne Gimizo ne mande anji; kabiji baikele monka. 19 Yehoba wapelwile bena Yuda na mambo a Ahaza Mfumu wa Isalela, mambo walekele bena Yuda kuba byo bakebelenga, kabiji kino kibalengejile kubula kwikala ba kishinka kwi Yehoba.
20 Kepo Tigilata-pilinesa+ Mfumu wa Asilya aishile na kulwa nanji ne kumukatazha,+ kechi waishile na kumukosesha ne. 21 Mambo Ahaza washikwile bipe bya mu nzubo ya Yehoba ne bya mu nzubo* ya mfumu+ ne bya mu mazubo a babinemanga ne kwibipana kwi mfumu wa Asilya; bino kechi kyamukwashishe ne. 22 Kabiji mu kimye kyo amanaminenga, Mfumu Ahaza po akijilemo kubula bukishinka kwi Yehoba. 23 Watendekele kutapisha ku balesa ba ku Damasakasa+ bonka bamushinjile,+ kabiji waambile’mba: “Balesa ba bamfumu ba ku Silya byo babena kwibakwasha, ne amiwa nsakutapishanga kwi abo, pa kuba’mba bankwashe.”+ Bino bamulengejile aye ne bena Isalela bonse kuya mungi. 24 Kabiji Ahaza wabungizhe bipe bya mu nzubo ya Lesa wa kine; kepo achibawile bipe bya mu nzubo ya Lesa wa kine,+ ne kushinka binzhilo bya mu nzubo ya Yehoba,+ kabiji wilengejile mwine bya kusokelapo bitapisho mu makonka onse a mu Yelusalema. 25 Kabiji mu mizhi yonse ya mu Yuda, washimikijilemo mapunzha atuntama a kusokelapo bitapisho bya kufutumuna ku balesa bangi,+ kabiji wamuzhingijishe bingi Yehoba Lesa wa bashakulu banji.
26 Bintu bikwabo byo apichilemo, bintu byo aubilenga kufuma po atendekejile kufika ne po apelejile, byanembwa mu Buku wa Bamfumu ba mu Yuda ne ba mu Isalela.+ 27 Kepo Ahaza bamutwajile na kulaala kwalaala bashakulu banji, kabiji bamuzhiikile mu muzhi, mu Yelusalema, mambo kechi bamutwajile mu mapunzha a kuzhiikamo bamfumu ba mu Isalela ne.+ Kabiji mwananji aye Hezekiya waswaine pa bufumu.
29 Hezekiya+ wajinga na myaka ya kusemwa 25 kimye kyo aikele mfumu, kabiji walamine mu Yelusalema myaka 29. Inanji wajinga Abiya mwana wa kwa Zekaliya.+ 2 Waubilenga byaoloka ku meso a Yehoba,+ byonkatu byaubanga mushakulu wanji Davida.+ 3 Mu mwaka mutanshi wa bukalama bwanji, mu ñondo mutanshi, washinkwile binzhilo bya nzubo ya Yehoba ne kwibiwamisha.+ 4 Kabiji waletele bañanga ne bena Levi ne kwibakonkanya mu lubanza wajinga ku musela. 5 Wibambijile’mba: “Ntelekai, anweba bena Levi. Izhijikai+ anweba bene ne kuzhijika nzubo ya Yehoba Lesa wa bashakulu benu, kabiji mufumyemo bintu byatama mu mpunzha yazhila.+ 6 Mambo bashetu kechi bajinga ba kishinka ne, kabiji baubilenga bintu byatama kwi Yehoba Lesa wetu.+ Bamukaine kabiji kechi banemekele tente wa lusambakeno wa Yehoba ne, kabiji bamuvundamijile.+ 7 Kabiji bashinkile ne binzhilo bya kibamba kya pa kibelo+ ne kuzhimya malampi.+ Balekele kusoka bya kufutumuna+ ne kuleka kulambula bitapisho bya kusoka+ kwi Lesa wa Isalela mu mpunzha yazhila. 8 Onkao mambo, bukaji bwa Yehoba bwaishile pa bena Yuda ne ba mu Yelusalema,+ kya kuba wibalengejile kwikala ba kulengela bantu kukankamana, kukumya ne kwibalengela kwita milozhi,* byonkatu byo mubena kwimwena na meso enu.+ 9 Bashakulu betu bebepayile na mpoko,+ kabiji baana betu ba balume ne baana betu ba bakazhi, ne bakazhi betu bebatwajile mu buzha na mambo a kino kintu.+ 10 Pano muchima wami wakebesha bingi kulayañana lulayañano ne Yehoba Lesa wa Isalela+ pa kuba’mba bukaji bwanji bufume pe atweba. 11 Anweba baana bami, kino kechi kyo kimye kya kuba mukose* ne, mambo Yehoba wimusala anweba amba mumwingijilenga, ne kwikala ba mingilo banji,+ ne kumusokela bitapisho bya kufutumuna.”+
12 Ponkapo bano bena Levi batendekele kwingila: Mahata mwana wa kwa Amasai ne Yoela mwana wa kwa Azaliya mwina Kohati;+ mu bena Melali+ mwafumine Kisha mwana wa kwa Abidi ne Azaliya mwana wa kwa Yahalelela; mu bena Geleshona+ mwafumine Yoa mwana wa kwa Zima ne Edena mwana wa kwa Yoa; 13 mu baana ba kwa Elizafwana mwafumine Shimuli ne Yewela; mu baana ba kwa Asafwa+ mwafumine Zekaliya ne Mataniya; 14 mu baana ba kwa Hemanyi+ mwafumine Yehiela ne Shimei; mu baana ba kwa Yedutuna+ mwafumine Shemaya ne Uziela. 15 Kepo bakonkenye balongo babo pamo ne kwizhijika abo bene, kabiji baishile na kutokesha nzubo ya Yehoba byonka bibakambizhe mfumu na byambo bya Yehoba.+ 16 Bañanga batwelele mu nzubo ya Yehoba na kwiitokesha kabiji balupwilemo bintu byonse bya bunya byo bataaine mu nzubo ya Yehoba ne kwibileta mu lubanza wa nzubo+ ya Yehoba. Kabiji bena Levi bebisendele ne kwibitwala pangye ku Kimpachiko kya Kedolona.+ 17 Byonkabyo, batendekele kwiizhijika pa juba jitanshi ja ñondo mutanshi, kabiji pa juba ja butanu na busatu ja ñondo bafikile ku kibamba kya Yehoba kya pa kibelo.+ Kabiji bazhijikile nzubo ya Yehoba pa moba atanu na asatu, kabiji bapwishishe pa juba ja bu 16 ja ñondo mutanshi.
18 Byo bapwishishe, bayile ku Mfumu Hezekiya ne kumwambila’mba: “Twatokesha nzubo yonse ya Yehoba, ne kya kusokelapo bitapisho bya mulambo wa kusoka+ ne bipe byakyo byonse,+ ne tebulu wa bashinkwa+ batentakana* ne bipe byanji. 19 Kabiji bipe byonse Mfumu Ahaza byo alekele kwingijisha mu kimye kya bukalama bwanji byo abujile kwikala wa kishinka+ twibinengezha ne kwibizhijika,+ kabiji biji kwipi na kya kusokelapo bitapisho kya Yehoba.”
20 Kabiji Mfumu Hezekiya wabuukile lukelokelo ne kukonkanya pamo babinemanga ba mu muzhi, kabiji bayile ku nzubo ya Yehoba. 21 Baletele bañombe balume batanu na babiji, mikooko ilume itanu na ibiji, baana ba mikooko balume batanu na babiji, ne bambuzhi balume batanu na babiji ba mulambo wa bubi wa bufumu, wa nzubo yazhila, ne wa bena Yuda.+ Kabiji wabuujile bañanga ba mu kisemi kya kwa Alona, kwibalambula pa kya kusokelapo bitapisho kya Yehoba. 22 Kepo baipayile bañombe,+ kabiji bañanga bashikwile mashi ne kwiasansa pa kya kusokelapo bitapisho;+ kabiji baipayile mikooko ilume ne kusansa mashi pa kya kusokelapo bitapisho, kabiji baipayile baana ba mikooko balume ne kusansa mashi pa kya kusokelapo bitapisho. 23 Kepo baletele bambuzhi balume ba mulambo wa bubi ku mfumu ne ku kipwilo kabiji batentekelepo maboko abo. 24 Bañanga baipayile bambuzhi ne kupana mulambo wa bubi pamo na mashi abo pa kya kusokelapo bitapisho, kuba’mba bafute mambo a bena Isalela bonse, mambo mfumu waambile’mba mulambo wa kusoka ne mulambo wa bubi wafwainwa kwikala wa bena Isalela bonse.
25 Kabiji waambijile bena Levi kwimana ku nzubo ya Yehoba na nsonsolo, bijimba bya mizhinge ne byansa+ monka mwayijile mukambizho wa Davida+ ne wa kwa Gadi+ wamwenanga mfumu bimwesho ne wa kwa ngauzhi Natana,+ mambo uno mukambizho wafumine kwi Yehoba kupichila mu bangauzhi banji. 26 Byonkabyo, bena Levi baimene saka baji na byombesha bya kwa Davida, ne bañanga saka baji na matolompita.+
27 Kepo Hezekiya akambizhe’mba balambule kitapisho kya kusoka pa kya kusokelapo bitapisho.+ Byo batendekele kusoka mulambo wa kusoka, batendekele kwimba lwimbo wa Yehoba ne matolompita saka alondela lutangijilo lwa byombesha bya kwa Davida Mfumu wa bena Isalela. 28 Kabiji kipwilo kyonse kyafukamine panshi, kimye kyo baimbilenga lwimbo ne matolompita saka avuma, baubile bino byonse posotu ne mulambo wa kusoka byo apwile. 29 Aku bapwishatu kusoka mulambo, mfumu ne bonse bo ajinga nabo, bafukamine ne kupona kinkuvumene. 30 Mfumu Hezekiya ne babinemanga baambijile bena Levi kutota Yehoba na byambo bya kwa Davida+ ne bya kwa Asafwa+ wamonanga bimwesho. Byonkabyo, batotelenga na lusekelo, kabiji bafukamine panshi ne kupona kinkuvumene.
31 Kepo Hezekiya aambile’mba: “Pano byo bemusala* kwikala ba kwa Yehoba, iyai mulete bitapisho ne milambo ya kusanta ku nzubo ya Yehoba.” Onkao mambo, kipwilo kyatendekele kuleta bitapisho ne milambo ya kusanta, kabiji bonse bajinga na muchima wa kwipana baletele milambo ya kusoka.+ 32 Milambo ya kusoka yonse yaletele kipwilo yajinga bañombe 70, mikooko ilume 100, baana ba mikooko balume 200—abino byonse byajinga bya mulambo wa kusoka kwi Yehoba+— 33 kabiji milambo yazhila yajinga bañombe 600 ne mikooko 3,000. 34 Bino kechi kwajinga bañanga bavula ba kusuba ino milambo ya kusoka ne, onkao mambo, balongo babo bena Levi bebakwashisheko+ kufikatu ne mwingilo yense byo bamupwishishe, posotu ne bañanga byo bezhijikile abo bene,+ mambo bena Levi bateleko* bingi muchima kwizhijika abo bene kukila bañanga. 35 Kabiji kwajinga milambo ya kusoka yavula,+ pamo na mafuta a bitapisho bya mutende+ ne milambo ya binyu ya pa milambo ya kusoka.+ Byonkabyo, mwingilo wa ku nzubo ya Yehoba wabweleletu pa kala.* 36 Onkao mambo, Hezekiya ne bantu bonse basangalele bingi pa bintu Lesa wa kine byo aubijile bantu,+ mambo abino byonse byaubiwetu nobe mu kukopa kwa jiso.
30 Hezekiya watumine jiwi ku bena Isalela+ bonse ne ku bena Yuda, kabiji wanembejile makalata bena Efelaimu ne bena Manase,+ kuba’mba beye ku nzubo ya Yehoba ku Yelusalema ku Kijiilo kya Lupitailo kya Yehoba Lesa wa Isalela.+ 2 Mfumu ne babinemanga banji ne kipwilo kyonse kyajinga mu Yelusalema, bafuukwilepo kwikala na Kijiilo kya Lupitailo mu ñondo wa bubiji,+ 3 mambo bakankelwe kwikala nakyo pa kimye kyakyo,+ mambo bañanga bachechetu bo bezhijikile+ ne bantu kechi bakonkene mu Yelusalema ne. 4 Mfumu ne kipwilo kyonse bamwene’mba luno lunengezho lujitu bulongo. 5 Onkao mambo, bafuukwilepo kutaya mbila mu Isalela monse, kufuma ku Belesheba kukafika ne ku Danyi,+ kuba’mba bantu bakeye ku Kijiilo kya Lupitailo kya Yehoba Lesa wa Isalela ku Yelusalema, mambo jibumba kechi jaikelepo na kijiilo kwesakana na mwayijile byanembelwe ne.+
6 Kepo baluwe* bayile mu Isalela monse ne mu Yuda na makalata afumine ku mfumu ne ku babinemanga banji, byonka bibakambizhe mfumu amba: “Bena Isalela babwele kwi Yehoba Lesa wa Abalahama, wa Izaka ne wa Isalela, pa kuba’mba abwele ku bantu bashalapo bonka bapulukile mu maboko a bamfumu ba ku Asilya.+ 7 Kange mwikale nobe bashakulu benu ne balongo benu babujile kwikala ba kishinka kwi Yehoba Lesa wa bashakulu benu ne, kya kuba wibaletejile lonaiko, byonkatu byo mubena kumona.+ 8 Pano kange mukoseshe michima yenu nobe bashakulu benu ne.+ Nekenenai Yehoba ne kwiya ku nzubo yanji yazhila+ yonka yo azhijika kikupu ne kwingijilanga Yehoba Lesa wenu, pa kuba’mba bukaji bwanji bufume pe anweba.+ 9 Mambo inge mubwele kwi Yehoba, balongo benu ne baana benu bakebobila lusa ku boba bebakwata buzha,+ kabiji bakebaswisha kubwela ku kino kyalo,+ mambo Yehoba Lesa wenu ye wa kifyele* ne lusa,+ kabiji kechi ukemuvundamina inge mwabwela kwi aye ne.”+
10 Byonkabyo, baluwe* bapichile mu mizhi yonse ya mu kyalo kya Efelaimu ne kya Manase+ ne ku Zebuluna, bino bantu bebasekelenga ne kwibendeleka.+ 11 Nangwa byonkabyo, bantu bamo ba ku Ashela, Manase ne Zebuluna, bepelwile ne kuya ku Yelusalema.+ 12 Kuboko kwa Lesa wa kine kwajinga ne mu Yuda kuba’mba bantu bakwatankane* ne kwingila mwingilo wibakambizhe mfumu ne babinemanga banji monka mwayijile byambo bya Yehoba.
13 Bantu bavula bakonkene pamo mu Yelusalema ku Kijiilo kya Bashinkwa Babula Mbizho+ mu ñondo wa bubiji;+ kyajinga kipwilo kikatampe. 14 Baimene ne kufumya bya kusokelapo bitapisho byajinga mu Yelusalema,+ kabiji bafumishemo bya kusokelapo bya kufutumuna+ ne kwibitaya mu Kimpachiko kya Kedolona. 15 Kepo baipayile nyama wa Kijiilo kya Lupitailo pa juba ja bu 14 ja ñondo wa bubiji. Bañanga ne bena Levi baumvwine bumvu, onkao mambo, bezhijikile ne kuleta milambo ya kusoka ku nzubo ya Yehoba. 16 Baimene mu bifulo byabo, monka mwayijile Mizhilo ya kwa Mosesa muntu wa Lesa wa kine; kepo bañanga basanshile mashi+ o batambwile ku bena Levi pa kya kusokelapo bitapisho. 17 Mu kipwilo mwajinga bantu bavula babujile kwizhijika abo bene, kabiji bena Levi bo bajinga na mwingilo wa kwipaya banyama ba Kijiilo kya Lupitailo ba bantu babujile kuzhila,+ kuba’mba bebazhijike kwi Yehoba. 18 Mambo bantu bavula, kikatakata aba bafumine ku Efelaimu, Manase,+ Isakala ne Zebuluna kechi betokeshe ne, bino bajiile Kijiilo kya Lupitailo, kupusana na byanembelwe. Bino Hezekiya wibalombejileko amba: “Anweba Yehoba, mwawama,+ balekelaiko mambo 19 bonse banengezha michima yabo kuba’mba bakebe Lesa wa kine,+ Yehoba, Lesa wa bashakulu babo, nangwa kya kuba kechi betokesha monka mwayila mizhilo ya buzhile ne.”+ 20 Kabiji Yehoba wamumvwine Hezekiya ne kulekelako bantu mambo.*
21 Onkao mambo, bena Isalela bajinga mu Yelusalema baikele na Kijiilo kya Bashinkwa Babula Mbizho+ moba atanu na abiji saka basangalala bingi,+ kabiji bena Levi ne bañanga batotelenga Yehoba pa juba pa juba saka bemba na byombesha byabo kwi Yehoba.+ 22 Kabiji Hezekiya waambile ne kutundaika* bena Levi bonse baingijilenga Yehoba na maana. Kabiji bajiile kijiilo moba onse atanu na abiji,+ saka batapisha bitapisho bya mutende+ ne kusanchila Yehoba Lesa wa bashakulu babo.
23 Kepo kipwilo kyonse kyafuukwilepo kwikala na kijiilo pa moba atanu na abiji akwabo, byonkabyo, baikele na kijiilo moba atanu na abiji akwabo saka basangalala.+ 24 Kabiji Hezekiya Mfumu wa Yuda wapaine ku kipwilo bañombe balume 1,000 ne mikooko 7,000, ne babinemanga bapaine ku kipwilo bañombe balume 1,000 ne mikooko 10,000;+ kabiji bañanga bavula bezhijikile abo bene.+ 25 Kabiji kipwilo kyonse kya bena Yuda, bañanga, bena Levi, kipwilo kyonse kyafumine ku Isalela,+ ne benyi+ bafumine mu kyalo kya Isalela ne boba baikalanga mu Yuda basangalelenga. 26 Kabiji mwajinga kusangalala kukatampe mu Yelusalema, mambo kufumatu mu moba a kwa Solomone mwana wa kwa Davida mfumu wa bena Isalela, kechi kwaikajilepo kijiilo kiji nobe kino mu Yelusalema ne.+ 27 Kepo bañanga bena Levi baimene ne kupesha bantu;+ ne Lesa waumvwine jiwi jabo, ne lulombelo lwabo lwafikile mwazhila mo ekala, mwiulu.
31 Byo bapwishishetu kuba bino byonse, bena Isalela bonse bajingapo bayile mu mizhi ya mu Yuda, kabiji balalawile mashiki azhila+ ne kutema bichi* bya milumbulumbu byazhila,+ ne kusandañanya mapunzha atuntama+ ne bya kusokelapo bitapisho+ monse mu Yuda ne mu Benjamina, ne mu Efelaimu ne mu Manase,+ kufikatu ne byo bebyonawine byonsetu, kepo bena Isalela bonse babwelele ku mizhi yabo, awu kwanji, awu kwanji.
2 Kepo Hezekiya atongwele bañanga mu bipanyi byabo+ ne bena Levi mu bipanyi byabo,+ kuba’mba bañanga ne bena Levi bengilenga monka mwayijile mwingilo wabo+ wa milambo ya kusoka ne wa bitapisho bya mutende ne kwingijila Lesa ne kusanta ne kutota mu bibelo bya bipango* bya Yehoba.+ 3 Bintu bimo bya mfumu bebipaine kwikala bya milambo ya kusoka,+ kuvwangakotu ne milambo ya lukelo ne ya mabanga,+ pamo na milambo ya kusoka pa juba ja Sabado,+ pa kutentama kwa bañondo+ ne pa bijiilo,+ monka mwayijile byanembwa mu Mizhilo ya Yehoba.
4 Kabiji wakambizhe bantu baikalanga mu Yelusalema kupa bañanga ne bena Levi+ bintu bibafwainwa, pa kuba’mba balondelenga* mizhilo ya Yehoba na muchima yense. 5 Byo bebakambizhetu, bena Isalela bapaine bintu byavula bya mu kajo ka nsomo, binyu bya katataka, manyi+ ne buki ne bintu byonse byafumine mu majimi;+ kabiji baletele bya bujikumi byavula bya mu bintu byonse.+ 6 Kabiji bena Isalela ne bena Yuda baikalanga mu mizhi ya mu Yuda nabo baletele bya bujikumi bya mu bañombe ne mikooko ne bya bujikumi bya mu bintu byazhila+ byo bazhijikile kwi Yehoba Lesa wabo. Bebiletele ne kwibilumbika milumba yavula. 7 Mu ñondo wa busatu+ batendekele kulumbika bupe bwabo mu milumba; kabiji bapwishishe mu ñondo wa butanu na bubiji.+ 8 Hezekiya ne babinemanga byo baishile ne kumona ino milumba, batotele Yehoba ne kupesha bantu banji bena Isalela.
9 Hezekiya byo aipwizhe bañanga ne bena Levi pa mambo a ino milumba, 10 ne Azaliya ñanga mukatampe wa mu nzubo ya kwa Zadoka wamwambijile’mba: “Kufumatu kimye kyo batendekele kuleta bya bupe mu nzubo ya Yehoba,+ bantu bajiilenga ne kwikuta, kabiji byakishalapotu byavula, mambo Yehoba wapesha bantu banji, kabiji bino byo bintu byavula byashalapo.”+
11 Ponkapo Hezekiya wibambijile kunengezha bibamba* mu nzubo ya Yehoba mwa kwibilamina,+ onkao mambo bebinengezhezhe. 12 Baletelenga mu bukishinka bya bupe, bya bujikumi+ ne bintu byazhila; Konaniya mwina Levi ye watalanga pa bino byonse, kabiji mulongo wanji aye Shimei ye wajinga wa kibiji. 13 Yehiela, Azaziya, Nahata, Asahela, Yelimota, Yozabada, Eliela, Isemakiya, Mahata ne Benaya bajinga babinemanga bakwashishenga Konaniya ne Shimei mulongo wanji, byonka bibakambizhe Mfumu Hezekiya, kabiji Azaliya ye watajilenga pa nzubo ya Lesa wa kine. 14 Kabiji Kole mwana wa kwa Imina, mwina Levi kasopa wa pa kibelo kya ku musela,+ ye watajilenga pa milambo ya kwifuukwila+ yo bapananga kwi Lesa wa kine, kabiji waabenye bya bupe byo bapaine kwi Yehoba+ ne bintu byazhijisha.+ 15 Kabiji ye watangijilenga ba Edena, Minyamina, Yeshua, Shemaya, Amaliya ne Shekaniya, mu mizhi ya bañanga,+ mu mwingilo wabo wa bukishinka, kuba’mba babanyenga ku balongo babo bajinga mu bipanyi bintu bibafwainwa,+ bakulumpe ne banyike. 16 Kuno kwajinga kununga pa kwabanya bintu ko baabenye ku banabalume ba myaka isatu ne kuya peulu banembelwe monka mwayijile bisemi byabo, kabiji baiyanga pa juba pa juba ku nzubo ya Yehoba na kwingila mingilo ya mu bipanyi byabo.
17 Bañanga bebanembele monka mwayijile bikota byabo,+ byonkatu byo kyajinga ku bena Levi bajinga na myaka ya kusemwa 20 ne kuya peulu,+ monka mwayijile mingilo ya bipanyi byabo.+ 18 Kuno kunembwa kwavwangilemo baana babo bonse, bakazhi babo, baana babo ba balume ne baana babo ba bakazhi, kipwilo kyabo kyonse, mambo batwajijile kwizhijika ku bintu byazhila na mambo a mwingilo wabo wa bukishinka, 19 pamo na ba mu kisemi kya kwa Alona, bañanga baikalanga mu majimi ajinga na mapunzha mwa kujiila banyama azhokolokele mizhi yabo.+ Mu mizhi yonse, mwajinga banabalume bo batongwele mazhina amba bapane byafwainwa ku mwanamulume yense wajinga mu bañanga ne ku yense wajinga pa mutanchi po banembele bena Levi.
20 Hezekiya waubile kino monse mu Yuda, kabiji watwajijile kuba byawama ne byaoloka ne bya bukishinka kwi Yehoba Lesa wanji. 21 Kabiji mingilo yonse yo aingijile byo akebelenga Lesa wanji, nangwa mingilo ya ku nzubo ya Lesa wa kine+ nangwa ku Mizhilo ne mikambizho, wiingijile na muchima yense, kabiji wamwene byawama.
32 Bino bintu ne ino mingilo ya bukishinka+ byo yapwile, Senakelibu Mfumu wa Asilya waishile na kulukuka Yuda. Wazhokolokele mizhi ya masakwa akosa, kukeba’mba apumune masakwa ne kwiishinda.+
2 Hezekiya byo amwene’mba Senakelibu waiya kabiji ubena kukeba kulwa nkondo na ba mu Yelusalema, 3 byo esambile na babinemanga banji ne nzhita yanji, wafuukwilepo kushinka masulo a mema ajinga pangye ya muzhi,+ ne abo bamukwashishe. 4 Bantu bavula bakonkene pamo, kabiji bashinkile masulo onse a mema ne a kakola kapichile mu kyalo ne kwamba’mba: “Mambo ka bamfumu ba ku Asilya o bafwainwa kwishila ne kutaana mema avula?”
5 Kabiji wibikileko kushimukulula nsakwa yakundukile ne kushimikilapo byamba, kabiji pangye washimikijilepo nsakwa ikwabo. Wawamishe ne Kituntaulo*+ kya mu Muzhi wa Davida, kabiji walengele bilwilo* byavula bingi ne makebo. 6 Kepo atongwele bakulumpe ba bashilikale ba kutangijila bantu ne kwibakonkanya mu lubanza wa ku kibelo kya muzhi ne kwibatundaika* amba: 7 “Chinchikai ne kukosa. Kange mube moyo nangwa kukakilwa na mambo a mfumu wa Asilya+ ne jibumba jonse jo aji najo ne, mambo baji ne atweba bavula kukila bo aji nabo.+ 8 Aye waketekela mu bulume bwa bantu, pakuba atweba tuji na Yehoba Lesa wetu witukwasha ne kulwa makondo etu.”+ Kabiji bantu bakosele na byambo byaambile Hezekiya Mfumu wa Yuda.+
9 Bino Senakelibu Mfumu wa Asilya saka aji ku Lakishi+ na nzhita yanji yonse ya bulume,* watumine bakalume banji ku Yelusalema kwi Hezekiya Mfumu wa Yuda ne Bayudea bonse ba mu Yelusalema+ amba:
10 “Senakelibu Mfumu wa Asilya waamba’mba, ‘Nanchi mwaketekela mu ñanyi kintu byo mwaikalatu mu Yelusalema saka bamuzhokoloka?+ 11 Nanchi Hezekiya kechi ubena kwimutwala mungi ne kwimwipayisha ku kipowe kya nzala ne kilaka byo abena kwamba’mba: “Yehoba Lesa wetu uketupokolola mu kuboko kwa mfumu wa Asilya” nenyi?+ 12 Nanchi Hezekiya kechi ye waonawine mapunzha atuntama a Lesa wenu+ ne bya kusokelapo bitapisho+ ne kwambila bena Yuda ne ba mu Yelusalema amba: “Mwafwainwa kufukamanga ku kya kusokelapo bitapisho kimotu kabiji po po mwafwainwa kusokelanga bitapisho bya kufutumuna” nenyi?+ 13 Nanchi kechi mwayuka amiwa byo nauba ne bashakulu bami byo baubile ku bantu bonse ba mu byalo nenyi?+ Nanchi balesa ba bino bisaka bya bantu ba mu byalo bakonsheshe kupokolola byalo byabo mu kuboko kwami nyi?+ 14 Ñanyi lesa wa bino bisaka bya bantu bo baonawine ku bashakulu bami wakonsheshe kupokolola bantu banji mu kuboko kwami, pa kuba’mba Lesa wenu emupokolole mu kuboko kwami?+ 15 Kange muleke Hezekiya emujimbaike nangwa kwimutwala mungi ne!+ Kange mumwitabile ne, mambo kafwako lesa wa kisaka kya bantu nangwa wa bufumu wakonsheshe kupokolola bantu banji mu kuboko kwami ne mu maboko a bashakulu bami ne. Pano Lesa wenu wakonsha kwimupokolola byepi mu kuboko kwami?’”+
16 Bakalume banji baambile ne bintu bikwabo byatama pe Yehoba Lesa wa kine ne pe Hezekiya kalume wanji. 17 Kabiji wanembele ne makalata+ a kutuka Yehoba Lesa wa Isalela+ ne kwamba byatama pe aye amba: “Byonkatu biji balesa ba bisaka bya bantu ba mu byalo bakankelwe kupokolola bantu babo mu kuboko kwami,+ ne Lesa wa kwa Hezekiya kechi ukapokolola bantu banji mu kuboko kwami ne.” 18 Batwajijile kubijika mu mulaka wa bena Yuda ku bantu ba mu Yelusalema bajinga pa nsakwa kuba’mba bebalengeshe moyo ne kwibazakamisha, pa kuba’mba bangate muzhi.+ 19 Baambile byatama pe Lesa wa mu Yelusalema byonkatu byo baambile byatama pa balesa ba bantu ba pano pa ntanda, bonka bo balenga na maboko a bantu. 20 Bino Mfumu Hezekiya ne ngauzhi Isaya+ mwana wa kwa Amozi balombelenga pa kino ne kujijila Lesa mwiulu amba ebakwashe.+
21 Kepo Yehoba atumine malaika ne kwipaya babilobo bonse,+ bantangi ne bakulumpe ba mu kampu wa mfumu wa Asilya, kya kuba kyamulengele bumvu wabwela ne ku kyalo kyanji. Kepo atwelele mu nzubo ya lesa wanji, kabiji monkamwa baana banji bamo bamutapile na mpoko.+ 22 Onkao mambo, Yehoba wapokolwele Hezekiya ne bangikazhi ba mu Yelusalema mu kuboko kwa kwa Senakelibu Mfumu wa Asilya ne mu maboko a bakwabo bonse kabiji wibalengejile kukokoloka ku balwanyi babo bebazhokolokele. 23 Kabiji bantu bavula baletele bupe kwi Yehoba mu Yelusalema ne bintu byawama kwi Hezekiya Mfumu wa Yuda,+ kabiji kufuma kyokya kimye bisaka bya bantu byonse byamunemekele bingi.
24 Mu oa moba Hezekiya wakolelwe bingi kabiji kwashajiletu pacheche kufwa, kabiji walombele kwi Yehoba,+ ne aye wamukumbwile ne kumupa kiyukilo.+ 25 Bino Hezekiya kechi waubijile monka mwayijile bintu byawama byo bamubijile ne, mambo muchima wanji wilundumikile, ne kuleta bukaji bwa Lesa pe aye ne pa bena Yuda ne pa ba mu Yelusalema. 26 Nangwa byonkabyo, Hezekiya wipelwile ne kuleka kwilundumika mu muchima wanji,+ aye ne bangikazhi ba mu Yelusalema, kabiji bukaji bwa Yehoba kechi bwaishile pe abo mu moba a kwa Hezekiya ne.+
27 Kabiji Hezekiya waikele na bunonshi bwavula ne lukumo;+ kabiji wishimikijile matala a kubikamo+ siliva, ngolode, mabwe a buneme, manyi a balasama, mwa kubika makebo ne mwa kulamina bipe byonse byawama. 28 Kabiji washimikile ne mwa kulamina kajo ne binyu bya katataka ne manyi, ne bipaka mwa kulamina bilelwa byapusana pusana ne bipaka bya mikooko. 29 Kabiji wishimikijile ne mizhi, ne kulela bilelwa byavula, mikooko ne bañombe, mambo Lesa wamupele bintu byavula bingi. 30 Hezekiya ye washinkile nsulo ya peulu ya mema+ a mu Gihona+ ne kwiatwala ku muzhika wa Muzhi wa Davida,+ kabiji Hezekiya waingijile bulongo mingilo yanji yonse. 31 Nangwa byonkabyo, bantomesha ba babinemanga ba ku Babilona byo bebatumine na kumwipuzha pa kiyukilo+ kyamwekele mu kyalo,+ Lesa wa kine wamushile bunke kuba’mba amweseke+ ne kuyuka byonse byajinga mu muchima wanji.+
32 Bintu bikwabo byapichilemo Hezekiya ne mingilo yanji ya butemwe bubula kwaluka,+ biji mu kimwesho kyanembele ngauzhi Isaya+ mwana wa kwa Amozi, mu Buku wa Bamfumu ba mu Yuda ne ba mu Isalela.+ 33 Kepo Hezekiya bamutwajile na kulaala kwalaala bashakulu banji, kabiji bamuzhiikile ku mutunta ku mapunzha a kuzhiikamo a baana ba kwa Davida;+ ne bena Yuda bonse ne bangikazhi ba mu Yelusalema bamunemekele pa lufu lwanji. Kabiji mwananji aye Manase waswaine pa bufumu.
33 Manase+ wajinga na myaka ya kusemwa 12 kimye kyo aikele mfumu, kabiji walamine mu Yelusalema myaka 55.+
2 Waubilenga byatama kwi Yehoba, ne kulondela byubilo bya bunya bya bisaka bya bantu Yehoba byo apangilemo ku bena Isalela.+ 3 Washimukulwile mapunzha atuntama akundawile Hezekiya shanji,+ ne kushimika bya kusokelapo bitapisho bya Baela ne kusumpa bichi* bya milumbulumbu byazhila, kabiji wafukamijilenga bintu byonse bya mwiulu ne kwibingijila.+ 4 Kabiji washimikile ne bya kusokelapo bitapisho mu nzubo ya Yehoba,+ yonka Yehoba yo aambilepo amba: “Mu Yelusalema mo mukekala jizhina jami kikupu.”+ 5 Kabiji bintu byonse bya mwiulu wibishimikijile bya kusokelapo bitapisho mu bipango bibiji bya nzubo ya Yehoba.+ 6 Kabiji wasokele* ne baana banji mu mujilo+ mu Kimpachiko kya Mwana wa kwa Hinomu;+ ne kuba bingelekezha ne bya lubuko,+ ne kupanda manga, kabiji watongwele bantu besamba na mipashi ne bamba bikamweka kulutwe.+ Waubile bintu byatama byavula bingi ku meso a Yehoba, ne kumuzhingijisha.
7 Kipashañano kya kusonga kyo alengele wikibikile mu nzubo ya Lesa wa kine,+ yaambilepo Lesa kwi Davida ne ku mwananji Solomone amba: “Mu ino nzubo ne muno mu Yelusalema, ye nasala mu mikoka yonse ya bena Isalela, mo mo nkabika jizhina jami kikupu.+ 8 Kabiji kechi nkafumyamo maulu a bena Isalela mu kyalo kyo napele bashakulu babo ne, inge bakatesheko muchima kulondela byonse byo nebakambizhe, Mizhilo yonse, malamuna ne mikambizho yo napaine kupichila mwi Mosesa.” 9 Manase watwajilenga mungi bena Yuda ne bangikazhi ba mu Yelusalema, ne kwibalengela kuba bintu byatama kukila byaubanga bisaka bya bantu Yehoba byo aonawine ku meso a bena Isalela.+
10 Yehoba watwajijile kwambila Manase ne bantu banji, bino kechi bateleko muchima ne.+ 11 O ene mambo, Yehoba o ebaletejile bakulumpe ba nzhita ya mfumu wa Asilya, kabiji bakwachile Manase ne kumukoba twanda kabiji bamukashile mashimbi abiji a mukuba ne kumutwala ku Babilona. 12 Byo ajinga mu malwa, wasashijile Yehoba Lesa wanji amba amubile bibusa* kabiji watwajijile kwipelula ku meso a Lesa wa bashakulu banji. 13 Watwajijile kulomba kwi aye, ne Lesa waumvwine misashijilo yanji ne kumvwa kujila kwanji kwa kukeba bukwasho, kabiji wamubwezhezhe ku Yelusalema pa bufumu bwanji.+ Kepo Manase ayukile’mba Yehoba ye Lesa wa kine.+
14 Kepo ashimikile nsakwa ya pangye ya Muzhi wa Davida+ ku muzhika wa Gihona+ mu kimpachiko* kukafika ne ku Kibelo kya Masabi,+ wiipishishe ku Ofela,+ kabiji wiishimikile kuya peulu pene. Kabiji watongwele bakulumpe ba nzhita mu mizhi yonse ya masakwa akosa ya mu Yuda. 15 Kepo afumishemo balesa bangi ne nkishi mu nzubo ya Yehoba+ ne bya kusokelapo bitapisho byonse byo ashimikile pa mutumba wa nzubo ya Yehoba+ ne mu Yelusalema, ne kwibitaya pangye ya muzhi. 16 Kabiji wanengezhezhe ne kya kusokelapo bitapisho kya Yehoba+ ne kutendeka kutapishishapo bitapisho bya mutende+ ne bitapisho bya kusanta,+ kabiji waambijile bena Yuda kwingijila Yehoba Lesa wa Isalela. 17 Nangwa byonkabyo, bantu batwajijile kutapisha pa mapunzha atuntama, nangwa kya kuba batapishengatu kwi Yehoba Lesa wabo.
18 Bintu bikwabo byapichilemo Manase, ne mulombelo ye alombele kwi Lesa wanji, ne byambo bya bamona bimwesho byo baambilenga ne aye mu jizhina ja Yehoba Lesa wa Isalela, byanembwa mu buku wa bintu byapichilemo bamfumu ba mu Isalela. 19 Kabiji mulombelo wanji+ ne misashijilo yanji byo byakumbwilwe, bubi bwanji bonse ne kubula bukishinka kwanji,+ ne ko ashimikijile mapunzha atuntama ne kusumpa bichi* bya milumbulumbu byazhila+ ne bipashañano bya kusonga saka a kyangye kwipelula, byanembwa mu byambo bya bantu banji bamonanga bimwesho. 20 Kepo Manase bamutwajile na kulaala kwalaala bashakulu banji, kabiji bamuzhiikile pa nzubo yanji; kabiji mwananji aye Amonyi wamuswaine pa bufumu.+
21 Amonyi+ wajinga na myaka ya kusemwa 22 kimye kyo aikele mfumu, kabiji walamine mu Yelusalema myaka ibiji.+ 22 Kabiji waubilenga byatama ku meso a Yehoba, byonkatu byaubanga Manase shanji; kabiji Amonyi watapishenga ku bipashañano bya kusonga byonse byalengele Manase shanji,+ kabiji watwajijile kwibingijila. 23 Bino kechi wipelwile kwi Yehoba+ byonka bipelwile Manase shanji ne;+ bino Amonyi wanungilengapotu pa bubi bwanji. 24 Kepo bakalume banji bamwalukijilemo+ kabiji bamwipayijile mu nzubo yanji. 25 Pakuba bantu ba mu kyalo batapile bonse baalukijilemo Mfumu Amonyi,+ kabiji baswanyikilepo mwananji aye Yosiya pa bufumu.+
34 Yosiya+ wajinga na myaka ya kusemwa itanu na isatu kimye kyo aikele mfumu, kabiji walamine mu Yelusalema myaka 31.+ 2 Waubilenga byaoloka kwi Yehoba ne kwenda mu mashinda a kwa Davida mushakulu wanji, kabiji kechi wasendukijile ku kilujo nangwa ku kipiko ne.
3 Mu mwaka wa butanu na busatu wa bukalama bwanji, saka akiji kalombwana, watendekele kukeba Lesa wa Davida mushakulu wanji;+ kabiji mu mwaka wa bu 12, watendekele kutokesha mu Yuda ne mu Yelusalema,+ wafumishemo mapunzha atuntama+ ne bichi* bya milumbulumbu byazhila, bipashañano bya kusonga,+ ne bipashañano bya byela. 4 Kabiji bakundawile bya kusokelapo bitapisho bya Baela saka atalako, kabiji wachibawile bya kusokelapo bya kufutumuna byajinga peulu yabyo. Kabiji watetawile bichi* bya milumbulumbu byazhila, bipashañano bya kusonga, ne bipashañano bya byela ne kwibivingaula ke bungatu kabiji buno bunga wibukushile pa bilende bya boba batapishanga bitapisho ku bino bintu.+ 5 Kabiji wasokejilepo bikupa bya bañanga pa bya kusokelapo bitapisho byabo.+ Onkao mambo, watokeshe mu Yuda ne mu Yelusalema.
6 Kabiji mu mizhi ya mu Manase, mu Efelaimu,+ mu Shimeona ne kufika mu Nafitali, ne mu masala abo ebazhokolokele, 7 wakundawile bya kusokelapo bitapisho ne kutetaula bichi* bya milumbulumbu byazhila ne bipashañano bya kusonga,+ ne kwibivingaula ke bungatu; kabiji wachibawile byonse bya kusokelapo bya kufutumuna byajinga mu kyalo kyonse kya Isalela,+ kepo abwelele ku Yelusalema.
8 Mu mwaka wa bu 18 wa bukalama bwanji, saka atokesha kala kyalo ne nzubo ya Lesa, watumine Shafwana+ mwana wa kwa Azaliya ne Maaseya mukulumpe wa muzhi, ne Yoa mwana wa kwa Yoahaza munembeshi wa mambo kuba’mba bawamishe nzubo ya Yehoba Lesa wanji.+ 9 Baishile kwi Hilikiya ñanga mwine mukatampe ne kumupa mali afumine ku nzubo ya Lesa, bena Levi bakalama ba bibelo o batambwile ku bena Manase, bena Efelaimu, ne bena Isalela bonse,+ kubikakotu ne bena Yuda, bena Benjamina, ne bangikazhi ba mu Yelusalema. 10 Ne abo beapaine ku boba bo batongwele kutangijila mwingilo wa ku nzubo ya Yehoba. Kabiji ba mingilo ba ku nzubo ya Yehoba beengijishe kuwamisha nzubo. 11 Beapaine ku basendwe ne ku bantungi kuba’mba bapote mabwe a kusonga ne bichi bya mbambalo ne myamba ya kushimikila mazubo bamfumu ba Yuda o balekele na konaika.+
12 Kabiji bano banabalume baingijile mwingilo mu bukishinka.+ Bebatongwejile bena Levi abo ba Yahata ne Obadiya ba mu bena Melali,+ ne Zekaliya ne Meshulama, ba mu bena Kohati,+ kwikala bantangi. Kabiji bena Levi, aba bonse bajinga banyimbi bayukisha,+ 13 batajilenga pa boba baingijilenga mingilo yapusana pusana* kabiji batangijilenga ne ba boba baingijilenga mingilo ya mitundu yonse; kabiji bena Levi bamo bajinga banembeshi, bakapitao ne bakasopa ba pa bibelo.+
14 Byo basendelenga mali o baletele ku nzubo ya Yehoba,+ Hilikiya ñanga wataaine buku wa Mizhilo ya Yehoba+ yo apaine kupichila* mwi Mosesa.+ 15 Onkao mambo, Hilikiya waambijile Shafwana munembeshi amba: “Nataana buku wa Mizhilo mu nzubo ya Yehoba.” Ponkapo Hilikiya wapaine uno buku kwi Shafwana. 16 Kepo Shafwana aletele uno buku ku mfumu ne kumubuula’mba: “Bakalume benu babena kwingila mingilo yonse yo bebapele. 17 Bafumyamo mali ajinga mu nzubo ya Yehoba, kabiji beapana ku banabalume batongolwa ne ku boba babena kwingila mwingilo.” 18 Kabiji Shafwana munembeshi wabuujile mfumu amba: “Kuji buku ye akumpa Hilikiya ñanga.”+ Kepo Shafwana atendekele kutangila mfumu+ uno buku.
19 Mfumu byo aumvwinetu byambo bya mu Mizhilo, watabwile bivwalo byanji.+ 20 Kepo mfumu akambizhe Hilikiya, ne Ahikama+ mwana wa kwa Shafwana, ne Abidona mwana wa kwa Mika, ne Shafwana munembeshi, ne Asaya kalume wa mfumu amba: 21 “Yainga mungipwizheko kwi Yehoba ne kwipwizhako bantu bashala mu Isalela ne mu Yuda pa mambo a byambo biji mu buku ye bataana; mambo bukaji bwa Yehoba bukeya pe atweba bwabaya na mambo a kuba’mba bashakulu betu kechi balamine byambo bya Yehoba ne, byo babujile kulondela bintu byonse byanembwa mu uno buku.”+
22 Onkao mambo, Hilikiya ne boba bo batumine kwi mfumu bayile kwi Hulada ngauzhi wa mukazhi.+ Aye wajinga muka Shaluma mwana wa kwa Tikiba, Tikiba mwana wa kwa Halahasa, kalama wa nzubo ya bivwalo, kabiji uno mwanamukazhi waikalanga mu Mwanzo wa Bubiji mu Yelusalema; kabiji besambile nanji konkakwa.+ 23 Uno mwanamukazhi wibambijile’mba: “Yehoba Lesa wa Isalela waamba’mba, ‘Kamubuulai muntu waji kwimutuma kwi amiwa amba: 24 “Yehoba waamba’mba, ‘Nkaleta bya malwa pa ino mpunzha ne pa bangikazhi bekalamo,+ mafingo onse anembwa mu buku+ ye baji kutangila mfumu wa Yuda. 25 Mambo bankana+ kabiji babena kusoka bitapisho bya kufutumuna ku balesa bangi ne kunzhingijisha+ na mingilo ya maboko abo yonse, nketulwila bukaji bwami pa ino mpunzha, kabiji kechi bakebupwisha ne.’”+ 26 Pakuba mfumu wa Yuda yenka waji kwimutuma na kwipuzha kwi Yehoba, mumubuule’mba, “Yehoba Lesa wa Isalela waamba’mba: ‘Pa mambo a byambo byo waji kumvwa,+ 27 na mambo a kuba waji kutako muchima* ne kwipelula kwi Lesa byo waji kumvwa byo naamba pa ino mpunzha ne pa bantu bekalamo kabiji waji kwipelula ku meso ami ne kutabula bivwalo byobe ne kujila ku meso ami, ne amiwa na kumvwa,+ byo byaamba Yehoba. 28 O ene mambo o nkakutwajila na kulaala kwalaala* bashakulu bobe, kabiji bakakulaajika mu kilende kyobe mu mutende, kabiji meso obe kechi akamona bya malwa byonse byo nkaleta pa ino mpunzha ne pa bangikazhi ne.’”’”+
Kepo babwelele na kubuula mfumu bino byambo. 29 Onkao mambo, mfumu watumine mawi ne kwita bakulumpe bonse ba mu Yuda ne mu Yelusalema.+ 30 Kepo mfumu ayile ku nzubo ya Yehoba na banabalume bonse ba mu Yuda, ne bangikazhi ba mu Yelusalema, ne bañanga, ne bena Levi, ko kuba’mba bantu bonse, kutendekelatu ku mwanyike kufika ne ku mukulumpe. Watangilenga saka bomvwa byambo byonse bya mu uno buku wa lulayañano ye bataaine mu nzubo ya Yehoba.+ 31 Mfumu waimene pa mpunzha yanji ne kulayañana nabo lulayañano*+ ku meso a Yehoba amba ukalondelanga Yehoba ne kulama mikambizho yanji, ne bya kuvululako byanji, ne malamuna anji na muchima wanji yense ne na mweo* wanji yense+ kupichila mu kulondela byambo bya mu luno lulayañano byonka byanembwa mu uno buku.+ 32 Kabiji walengejile bantu bonse bajinga mu Yelusalema ne mu Benjamina kuswa lulayañano. Kabiji bangikazhi ba mu Yelusalema baubijile monka mwayijile lulayañano lwa Lesa, Lesa wa bashakulu babo.+ 33 Kepo Yosiya afumishemo bintu byonse bya bunya* mu byalo byonse bya bena Isalela,+ kabiji walengejile bantu bonse mu Isalela kwingijila Yehoba Lesa wabo. Mu moba onse a bumi bwanji* kechi balekele kulondela Yehoba Lesa wa bashakulu babo ne.
35 Yosiya wajinga na Kijiilo kya Lupitailo+ kwi Yehoba mu Yelusalema, kabiji baipayile nyama wa Kijiilo kya Lupitailo+ pa juba ja bu 14 ja ñondo mutanshi.+ 2 Wapele bañanga mingilo yabo ne kwibatundaika kwingila mwingilo wabo wa ku nzubo ya Yehoba.+ 3 Kepo aambijile bena Levi kabiji bafunjishi ba bena Isalela bonse,+ bonka bajinga bazhila kwi Yehoba amba: “Bikai Jikwachi jazhila mu nzubo yashimikile Solomone mwana wa kwa Davida mfumu wa bena Isalela;+ kechi musakwijisendanga pa bipuzhi byenu ne.+ Pano ingijilainga Yehoba Lesa wenu ne bantu banji bena Isalela. 4 Kabiji mwinengezhe monka mwayila bikota byenu ne bipanyi byenu, kwesakana na byanembele Davida Mfumu+ wa bena Isalela ne Solomone mwananji.+ 5 Mwimane mu mpunzha yazhila monka mwayila bikota bya balongo benu, ne bantu bonse bashala,* monka mwayila mabumba a bikota bya bena Levi. 6 Mwipaye nyama wa Kijiilo kya Lupitailo+ ne kwizhijika anwe bene ne kwibanengezhezha balongo benu kuba’mba bengile monka mwayila byambo bya Yehoba byo aambile kupichila mwi Mosesa.”
7 Yosiya wapele bantu bonse matanga, baana ba mikooko balume ne baana ba bambuzhi balume, bajinga ba Kijiilo kya Lupitailo ne ba bantu bonse batainweko, mu ano matanga mwafumine banyama 30,000, ne bañombe bajinga 3,000. Bino byafumine mu bunonshi bwa mfumu.+ 8 Babinemanga banji nabo bapaine bupe bwa mulambo wa kwifuukwila wa bantu, wa bañanga ne wa bena Levi. Hilikiya,+ Zekaliya ne Yehiela, bantangi ba ku nzubo ya Lesa wa kine, bapele bañanga banyama ba Kijiilo kya Lupitailo 2,600 ne bañombe 300. 9 Konaniya ne balongo banji ba Shemaya ne Netanela, pamo na Hashabiya, Yeyela ne Yozabada, bakulumpe ba bena Levi, bapele bena Levi banyama ba Kijiilo kya Lupitailo 5,000 ne bañombe 500.
10 Banengezhezhe byonse, kabiji bañanga baimene mu bifulo byabo ne bena Levi baimene monka mwayijile bipanyi byabo,+ byonka byakambizhe mfumu. 11 Baipayile banyama ba Kijiilo kya Lupitailo,+ kabiji bañanga basanshile mashi pa kya kusokelapo bitapisho o bebapele,+ bena Levi saka basuba banyama.+ 12 Kabiji banengezhezhe milambo ya kusoka kuba’mba babanye ku bantu bonse, bonka bo babikile mu mabumba mwayijile bikota byabo, pa kuba’mba beipane kwi Yehoba byonkatu byo kyanembwa mu buku wa Mosesa; kabiji byo byo baubile ne ku bañombe. 13 Batekele* nyama ya Kijiilo kya Lupitailo pa mujilo monka mwayijile kisho;+ batekele milambo yazhila mu mipika, mu mipika ya mikupa, ne mu bikango, kepo beiletele bukiji ku bantu bonse. 14 Kabiji benengezhejile bintu abo bene ne bya bañanga, mambo bañanga ba mu kisemi kya kwa Alona, batapishenga bitapisho bya kusoka ne mafuta kufikatu ne byo bwaijile, byonkabyo bena Levi benengezhejile bintu abo bene ne bya bañanga ba mu kisemi kya kwa Alona.
15 Kabiji banyimbi baana ba kwa Asafwa,+ bajinga mu bifulo byabo monka mwayijile mukambizho wa kwa Davida,+ wa kwa Asafwa,+ wa kwa Hemanyi ne wa kwa Yedutuna+ wamwenanga mfumu bimwesho; kabiji bakasopa ba pa bibelo bajinga ku bibelo byapusana pusana.+ Kechi bafwainwe kusha mwingilo wabo ne, mambo balongo babo bena Levi bebanengezhejileko bintu. 16 Onkao mambo, banengezhezhe byonse byakebewenga mu mwingilo wa Yehoba pa joja juba pa kuba’mba bekale na Kijiilo kya Lupitailo+ ne kupana milambo ya kusoka pa kya kusokelapo bitapisho kya Yehoba, monka mwayijile mukambizho wa Mfumu Yosiya.+
17 Bena Isalela bashinkilweko baikele na Kijiilo kya Lupitailo pa kyonkakya kimye ne Kijiilo kya Bashinkwa Babula Mbizho moba atanu na abiji.+ 18 Kechi kwajingapo Kijiilo kya Lupitailo kyajinga nobe kino mu Isalela kufumatu mu moba a ngauzhi Samwela ne; kabiji kechi kwajingapo bamfumu bakwabo ba bena Isalela baikelepo na Kijiilo kya Lupitailo kyaikelepo ne Yosiya,+ bañanga, bena Levi, bena Yuda bonse ne bena Isalela bashinkilweko ne bangikazhi ba mu Yelusalema ne. 19 Kino Kijiilo kya Lupitailo kyajingako mu mwaka wa bu 18 wa bukalama bwa kwa Yosiya.
20 Bino byonse byo byapwile, Yosiya saka anengezha kala nzubo ya Lesa, Neko Mfumu+ wa Ijipita waishile na kulwa ku Kakemishi kwipi na Ufelata. Kepo Yosiya ayile na kulwa nanji.+ 21 Watumine baluwe kwi aye na kumwambila’mba: “Obewa mfumu wa Yuda, mambo ka o waishila na kulwa ne amiwa? Amiwa kechi naiya na kulwa ne obewa ne, naiya na kulwa na nzubo ikwabo, kabiji Lesa wañambila’mba mpelawizhe. Pa kuba’mba bintu bikuwamine, leka kulwa na Lesa, yenka uji ne amiwa, kuchina’mba wakakonauna.” 22 Nangwa byonkabyo, Yosiya wakaine kufumako kwi aye, bino wialwile amba babule kumuyuka+ pa kuba’mba alwe nanji, kabiji kechi waumvwijile byambo bya kwa Neko byafumine mu kanwa ka Lesa ne. Byonkabyo, waishile na kulwa mu Musanza wa Megido.+
23 Kabiji batayanga miketo bamwashile Mfumu Yosiya, ne aye mfumu waambijile bakalume banji amba: “Mfumyaiko kuno, mambo bankozha bingi.” 24 Bakalume banji bamufumishemo mu kalaki ne kumubika mu kalaki wanji mukwabo wa nkondo ne kumutwala ku Yelusalema. Kabiji wafwile ne kumuzhiika bamuzhiikile ku kilende kya bashakulu banji,+ kabiji bena Yuda bonse ne ba mu Yelusalema bamujijile Yosiya. 25 Kabiji Yelemiya+ waimbijile Yosiya lwimbo, ne banyimbi bonse ba balume ne ba bakazhi+ batwajijile kwimba nyimbo ya bulanda* pe Yosiya kufika ne lelo jino; kabiji kyafuukwilwe’mba bafwainwa kwimbanga ino nyimbo mu Isalela, kabiji yanembwa mu nyimbo ya bulanda.
26 Bintu bikwabo byapichilemo Yosiya ne mingilo yanji ya butemwe bubula kwaluka, byo alondejilenga byanembwa mu Mizhilo ya Yehoba, 27 ne byo aubile kufuma po atendekejile kufika ne po apelejile, byanembwa mu Buku wa Bamfumu ba mu Isalela ne ba mu Yuda.+
36 Kepo bantu bonse ba mu kyalo basendele Yehoahaza+ mwana wa kwa Yosiya ne kumuswanyika pa bufumu bwa shanji mu Yelusalema.+ 2 Yehoahaza wajinga na myaka ya kusemwa 23 kimye kyo aikele mfumu, kabiji walamine mu Yelusalema bañondo basatu. 3 Nangwa byonkabyo, mfumu wa Ijipita wamufumishepo pa bufumu mu Yelusalema ne kulipilisha kyalo matalenta* a siliva 100 ne talenta wa ngolode umo.+ 4 Kabiji mfumu wa Ijipita watongwele mulongo wa kwa Yehoahaza, aye Eliakima kwikala mfumu wa bena Yuda ne wa ba mu Yelusalema ne kumupimpula jizhina ke Yehoyakimu; bino Neko+ wasendele Yehoahaza mulongo wanji ne kumuleta ku Ijipita.+
5 Yehoyakimu+ wajinga na myaka ya kusemwa 25 kimye kyo aikele mfumu, kabiji walamine mu Yelusalema myaka 11. Waubilenga byatama kwi Yehoba Lesa wanji.+ 6 Nebukaneza Mfumu+ wa Babilona waishile na kulwa nanji kuba’mba amukase na mashimbi abiji a mukuba ne kumutwala ku Babilona.+ 7 Kabiji Nebukaneza wasendele bipe bimo bya mu nzubo ya Yehoba ku Babilona ne kukebibika mu kipango kyanji ku Babilona.+ 8 Bintu bikwabo byapichilemo Yehoyakimu, bintu bya bunya byo aubile ne byatama byo bataaine mwi aye, byanembwa mu Buku wa Bamfumu ba mu Isalela ne ba mu Yuda; kabiji mwananji aye Yehoyakina waswaine pa bufumu.+
9 Yehoyakina+ wajinga na myaka ya kusemwa 18 kimye kyo aikele mfumu, kabiji walamine mu Yelusalema bañondo basatu ne moba jikumi; kabiji waubilenga byatama kwi Yehoba.+ 10 Ku ntendekelo ya mwaka,* Mfumu Nebukaneza watumine bakuya na kumuleta ku Babilona,+ pamo na bipe bya buneme bya mu nzubo ya Yehoba.+ Kabiji watongwele Zedekiya mulongo wa bashanji kwikala mfumu wa bena Yuda ne wa ba mu Yelusalema.+
11 Zedekiya+ wajinga na myaka ya kusemwa 21 kimye kyo aikele mfumu, kabiji walamine mu Yelusalema myaka 11.+ 12 Waubilenga byatama kwi Yehoba Lesa wanji. Kechi wipelwile kwi ngauzhi Yelemiya,+ waambijilenga monka mwamukambizhizhe Yehoba ne. 13 Wasatukijile ne Mfumu Nebukaneza,+ yenka wamuchipishe mu jizhina ja Lesa, watwajijile kwitota* ne kukosesha muchima kabiji wakaine kubwela kwi Yehoba Lesa wa Isalela. 14 Bakulumpe bonse ba bañanga ne bantu kechi bajinga ba kishinka ne, baubilenga bintu byonse bya bunya bya bisaka bikwabo, ne kuzhilulula nzubo ya Yehoba+ yo azhijikile mu Yelusalema.
15 Kabiji Yehoba Lesa wa bashakulu babo watwajijile na kwibajimuna kupichila mu baluwe banji, wibajimwinengako javula, mambo wibobijile lusa bantu banji ne mpunzha yanji ya kwikalamo. 16 Bino baendelekelenga baluwe ba Lesa wa kine,+ ne kulengulula byambo byanji+ ne kuseka bangauzhi banji,+ posotu ne bukaji bwa Yehoba byo bwaishile pa bantu banji,+ kufikatu ne byo kwabujile wa kwibabuka.
17 Wibaletejile mfumu wa bena Kalodeya,+ yenka waipayile bansongwalume babo na mpoko+ mu nzubo yabo yazhila;+ kechi waumvwijile lusa nsongwalume nangwa kisungu nangwa mukote nangwa kilema ne.+ Lesa wapaine bintu byonse mu kuboko kwanji.+ 18 Bipe byonse bya mu nzubo ya Lesa wa kine, bikatampe ne bichebiche kubikapotu ne bya buneme bya mu nzubo ya Yehoba ne bya buneme bya mfumu ne bya babinemanga banji, byonse wibitwajile ku Babilona.+ 19 Wasokele nzubo ya Lesa wa kine,+ kabiji wakundwile nsakwa ya Yelusalema+ ne kusoka byamba byayo byonse byakosa na mujilo, ne konauna bya buneme byonse.+ 20 Aba bapulukile ku mpoko wibatwajile mu buzha ku Babilona,+ kabiji baikele ke bakalume banji+ ne ba baana banji kufikatu ne bufumu bwa Pelisha byo bwatendekele kulama,+ 21 pa kuba’mba byambo bya Yehoba byo aambile kupichila mwi Yelemiya bifike,+ kufikatu ne kyalo byo kyabwezhezhe masabado akyo.+ Moba onse o kyaikele masala kyalaminenga sabado wakyo, kufikizha myaka 70.+
22 Mu mwaka mutanshi wa kwa Kilusa+ Mfumu wa Pelisha, pa kuba’mba byambo bya Yehoba byo aambile kupichila mwi Yelemiya+ bifike, Yehoba walengejile Kilusa Mfumu wa Pelisha kutaya mbila mu bufumu bwanji bonse, ne kunemba+ wiinembele’mba: 23 “Kilusa Mfumu wa Pelisha waamba’mba, ‘Yehoba Lesa wa mwiulu wampa bufumu bonse bwa pano pa ntanda,+ kabiji wankambizha kumushimikila nzubo mu Yelusalema uji mu Yuda.+ Yense wa mwi anweba bantu banji bonse, Yehoba Lesa wanji ekale nanji, kabiji ayenga.’”+
Nangwa’mba “bakamwipwizhenga konkakwa.”
Mu Kihebelu, “kuya ku bano bantu ne kubwela.”
Nangwa’mba “mweo wa boba bakushikwa afwe.”
Mu Kihebelu, “moba avula.”
Nangwa’mba “benda pa bambili.”
Nangwa’mba “benda pa bambili.”
Nangwa, “kufuma ku Ijipita ne Kuwe; basulu ba mfumu bebapotanga kufuma ku Kuwe,” kampe ku Kilikya.
Kolo umo waesakana na malita 220. Monai bya Kulumbulula B14.
Bbafi umo waesakana na malita 22. Monai bya Kulumbulula B14.
Kyubichi umo waesakana na masentimita 44.5, bino bamo balanguluka’mba “kipimo kya kala” kimenako kyubichi walepa masentimita 51.8. Monai bya Kulumbulula B14.
Nangwa’mba “makyubichi 20 ajinga mu bwipi bwa nzubo.”
Kubaya kwayo kechi kwayukanyikwa ne.
Mu Kihebelu, “nzubo.”
Talenta umo waesakana na makilogalamu 34.2. Monai bya Kulumbulula B14.
Shekele umo waesakana na magalamu 11.4. Monai bya Kulumbulula B14.
Mu Kihebelu, “nzubo.”
Ko kuba’mba, kwipi na Mwazhila.
Nangwa’mba “kabeta ka ku bulenge.”
Nangwa’mba “kabeta ka ku buyeke.”
Kulumbulula’mba “Aye [ko kuba’mba Yehoba] Ejikoseshe.”
Kampe kulumbulula’mba “Mu Bulume.”
Nangwa’mba “mwa kulamina mema.”
Nobe masentimita 7.4. Monai bya Kulumbulula B14.
Bbafi umo waesakana na malita 22. Monai bya Kulumbulula B14.
Nangwa’mba “mukachi.”
Nangwa’mba “bikochikala mo basendelanga mema.”
Ko kuba’mba, Kijiilo kya Mimba.
Nangwa’mba “Bañanga bena Levi.”
Mu Kihebelu, “mwanobe ukafuma mu musana wobe.”
Nangwa’mba “mukachi.”
Kyubichi umo waesakana na masentimita 44.5. Monai bya Kulumbulula B14.
Nangwa’mba “mukwabo wamufinga.” Ko kuba’mba, luchipo lwajinga na jifingo lo lukekala mambo anji umvwe wachipile bubela nangwa kulala muzhilo.
Mu Kihebelu, “mafingo.”
Mu Kihebelu, “afingañana.”
Nangwa’mba “mwibamanyika.”
Nangwa’mba “bateete.”
Mu Kihebelu, “mukachi ka bibelo byanji.”
Nangwa’mba “byubilo byenu.”
Monai Mutanchi.
Mu Kihebelu, “mutazhe kungi kilungi kya.”
Kampe’mba kwamba pa bena Levi.
Nangwa’mba “ku kibelo kya Hamata.”
Kufuma pa juba ja kijiilo, nangwa’mba juba ja bu 15.
Nangwa’mba “jilapa.”
Mu Kihebelu, “bakekala kishimpi.”
Nangwa’mba “jilapa.”
Mu Kihebelu, “baana ba kwa Isalela.”
Nangwa’mba “ashimukulwile.”
Nangwa’mba “Bimpampa.”
Nangwa’mba “bamutanchikile bulongo; bamupwishishe.”
Talenta umo waesakana na makilogalamu 34.2. Monai bya Kulumbulula B14.
Nangwa’mba “bishimpi.”
Nangwa’mba “munongo walepa.”
Mu Kihebelu, “kafwako kyafyamine kwi.”
Mu Kihebelu, “kafwako mupashi washajile mwi aye ne.”
Nangwa’mba “byambo byenu.”
Talenta umo waesakana na makilogalamu 34.2. Monai bya Kulumbulula B14.
Nangwa’mba “jilapa.”
Nangwa, “bupe bwaesakana na mutengo wa.”
Shekele umo waesakana na magalamu 11.4. Monai bya Kulumbulula B14.
Tumakebo tucheche, javula twasendanga bataya miketo.
Mu Binembelo bya Kihebelu, lupondo umo waesakene na magalamu 570. Monai bya Kulumbulula B14.
Mu Kihebelu, “kukeba kilungi kya kwa.”
Nangwa’mba “benda pa bambili.”
Ko kuba’mba, Ufelata.
Nangwa’mba “kimanyika.”
Mu Kihebelu, “Kanyansa kami kakabaya kukila lubunda wa batata.”
Mu Kihebelu, “matente.”
Mu Kihebelu, “bo basala.”
Nangwa’mba “wakoseshe.”
Nangwa’mba “kupalañenya.”
Mu Kihebelu, “bufumu bwa.”
Nangwa’mba “jilapa.”
Mu Kihebelu, “banyema.”
Mu Kihebelu, “bo basala.”
Mu Kihebelu, “bo basala.”
Ko kuba’mba, lulayañano lwa myaka lubula kwaluka.
Mu Kihebelu, “waishile na kuyuzha kuboko kwanji na.”
Ko kuba’mba, bashinkwa ba kupana kwi Lesa.
Mu Kihebelu, “bo basala.”
Mu Kihebelu, “bakinkile manungo.”
Nangwa’mba “azhokolokako.”
Monai Mutanchi.
Mu Kihebelu, “binzhilo bibiji.”
Tumakebo tucheche, javula twasendanga bataya miketo.
Mu Kihebelu, “byanyantanga buta bwa mukanda.”
Mu Kihebelu, “Moba avula.”
Mu Kihebelu, “kechi kwajinga mutende ku balupukilenga nangwa batwelelenga ne.”
Mu Kihebelu, “kange muponeshe maboko enu.”
Monai Mutanchi.
Nangwa’mba “mwanamukazhi.”
Monai Mutanchi.
Nangwa’mba “wipaine na muchima yense.”
Mu Kihebelu, “moba anji.”
Nangwa’mba “kukosesha; kushimukulula.”
Nangwa’mba “kubula kulupuka ne kutwela mu mpunzha ya.”
Nangwa’mba “jilapa ja.”
Nangwa’mba “waumvwañene.”
Nangwa’mba “tumvwañane.”
Nangwa’mba “kukosesha; kushimukulula.”
Nangwa’mba “kukosesheshako; kushimukulwilako.”
Mu Kihebelu, “mwakinkile manungo.”
Mu Kihebelu, “kukinka manungo.”
Nangwa’mba “akwashe.”
Nangwa’mba “bepana na muchima yense.”
Mu Kihebelu, “mu nzubo ya bikulu.”
Kyamweka, kechi basokele Asa ne, bino basokeleko binunka bulongo.
Mu Kihebelu, “kwendela mu.”
Monai Mutanchi.
Nangwa’mba “wamwitabishe.”
Nangwa’mba “ukebashinjika.”
Nangwa’mba “kwa kubula kuyuka.”
Mu Kihebelu, “kampu.”
Nangwa’mba “jilapa.”
Monai Mutanchi.
Nangwa’mba “ne muchima wenu wafuukulapo.”
Nangwa’mba “muchima wa kishinka.”
Nangwa, “bena Meuni.”
Kyamweka, Kalunga ka Mema Kafwa.
Mu Kihebelu, “watazhizhe kilungi kyanji ku.”
Mu Kihebelu, “lukunwa wa.”
Mu Kihebelu, “baana ba balume.”
Nangwa’mba “kakola.”
Nangwa’mba “monai Yehoba byo akemupokolola.”
Nangwa’mba “mwachinchika.”
Nangwa’mba “Musanza.”
Mu Kihebelu, “bamupesheshe.”
Kulumbulula’mba “Mapesho.”
Nangwa’mba “ba mu Yelusalema kuba bupite bwa ku mupashi.”
Nangwa’mba “ba mu Yelusalema kuba bupite bwa ku mupashi.”
Mu Kihebelu, “aletejile Yeholama mupashi wa bena Filishitiya.”
Nangwa’mba “jilapa ja.”
Kabiji utelwa’mba Ahaziya.
Mu Kihebelu, “mwana wa mukazhi.”
Mu manyusikilipiti amo a Kihebelu, “Azaliya.”
Nangwa’mba “wakolelwe.”
Mu Kihebelu, “mwana wa mulume.”
Mu Kihebelu, “achibeko.”
Mu Kihebelu, “kwipaya nkunwa yonse ya bufumu.”
Nangwa’mba “ne kulayañana.”
Nangwa’mba “jilapa ja.”
Mu Kihebelu, “mfumu inge walupuka ne kutwela.”
Makebo acheache, javula asendanga bataya miketo.
Nangwa’mba “jifumo.”
Nangwa’mba “kabondo.”
Kampe’mba muvungilo muji Mizhilo ya Lesa.
Nangwa’mba “saka bapana.”
Nangwa’mba “jilapa ja.”
Nangwa’mba “jilapa ja.”
Nangwa, “kufikatu ne bonse byo bapaine.”
Monai Mutanchi.
Mu Kihebelu, “bukaji bwaishile.”
Nangwa’mba “kwibashinawina.”
Mu Kihebelu, “wavwikile.”
Mu Kihebelu, “Ku mpelo ya mwaka.”
Ko kuba’mba, bena Silya.
Nangwa’mba “bamushile na bikola byavula.”
Nangwa’mba “mwana.” Kampe inge bavuzha bemenako buneme.
Mu Kihebelu, “byo ashimikile.”
Mu Kihebelu, “bo basajile.”
Talenta umo waesakana na makilogalamu 34.2. Monai bya Kulumbulula B14.
Nangwa’mba “tumonañane kilungi na kilungi.”
Mu Kihebelu, “Obewa.”
Nangwa’mba “jilapa jobe.”
Mu Kihebelu, “matente.”
Kabiji utelwa’mba Ahaziya.
Nobe mamita 178. Monai bya Kulumbulula B14.
Nangwa’mba “jilapa ja.”
Ko kuba’mba, shanji Amaziya.
Nangwa’mba “kusonga,” kyamweka mu jibwe.
Ko kuba’mba, bimbo mwa kulamina mema.
Nangwa’mba “mpunzha yazanduka ne kusebalala.”
Nangwa’mba “jilapa ja.”
Talenta umo waesakana na makilogalamu 34.2. Monai bya Kulumbulula B14.
Kolo umo waesakana na malita 220. Monai bya Kulumbulula B14.
Nangwa’mba “wanengezhe.”
Monai Mutanchi, “Ngehena.”
Mu Kihebelu, “nzubo.”
Nangwa’mba “azhokolokako.”
Nangwa’mba “jilapa ja.”
Nangwa’mba “kwendelekañana.”
Nangwa’mba “kya kukokoloka.”
Ko kuba’mba, bashinkwa ba kupana kwi Lesa.
Mu Kihebelu, “Pano byo mwayuzha maboko enu.”
Mu Kihebelu, “baolokele michima.”
Nangwa’mba “bamunengezhe.”
Mu Kihebelu, “banyema.”
Nangwa’mba “bibusa.”
Mu Kihebelu, “banyema.”
Mu Kihebelu, “bebape muchima umo.”
Mu Kihebelu, “ne kubuka bantu.”
Mu Kihebelu, “waambile ku muchima wa.”
Monai Mutanchi.
Mu Kihebelu, “makampu a.”
Nangwa’mba “bepana na muchima yense ku.”
Nangwa’mba “bibamba mwa kujiila.”
Nangwa’mba “Milo.” Kyambo kya Kihebelu kilumbulula’mba “kuyuzha.”
Nangwa’mba “mafumo.”
Mu Kihebelu, “kwamba ku muchima wabo.”
Nangwa’mba “na bashilikale banji bonse ba bulume ne lukumo.”
Monai Mutanchi.
Ko kuba’mba, wapishishe.
Nangwa’mba “wanekenye kilungi kya Yehoba Lesa wanji.”
Nangwa’mba “kakola.”
Monai Mutanchi.
Monai Mutanchi.
Monai Mutanchi.
Monai Mutanchi.
Nangwa’mba “pa boba basendanga byanema.”
Mu Kihebelu, “apaine na kuboko kwa.”
Mu Kihebelu, “ waji kunekena.”
Ino ke ñambilo ya kifwanyikizho ilumbulula lufu.
Nangwa’mba “lulayañano jikwabo.”
Monai Mutanchi.
Nangwa’mba “bankishi.”
Mu Kihebelu, “Mu moba anji onse.”
Mu Kihebelu, “ne baana ba bantu.”
Nangwa, “baoshele.”
Nangwa’mba “nyimbo ya pa majila.”
Talenta umo waesakana na makilogalamu 34.2. Monai bya Kulumbulula B14.
Kampe, kisalo.
Mu Kihebelu, “wakoseshe nshingo yanji.”