MAMBO AWAMA ANEMBELE YOANO
1 Mu ntendekelo mwajinga Mambo,+ ne oo Mambo ajinga na Lesa+ kabiji ao Mambo ajinga lesa.+ 2 Uno wajinga na Lesa mu ntendekelo. 3 Bintu byonse byalengelwe kupichila mwi aye,+ kabiji kafwako kintu nangwa kimo kyalengelwe kwa kubula aye ne.
Kintu kyaiya kwikalako 4 kupichila mwi aye ke bumi, ne abwa bumi bwajinga kyeya kya bantu.+ 5 Kabiji kino kyeya kibena kusamina mu mfishi,+ bino mfishi kechi ikishinda ne.
6 Kwaishile muntu ye batumine kwikala wa kwimenako Lesa; jizhina janji wajinga Yoano.+ 7 Uno muntu waishile kwikala kamonyi, pa kuba’mba ashimune pa mambo a kyeya+ amba bantu bonse betabile kupichila mwi aye. 8 Aye kechi ye wajinga kyeya ne,+ bino waishile na kushimuna pa mambo a kyeya.
9 Kyeya kya kine kisamina muntu yense, kyajinga pepi kwiya pano pa ntanda.+ 10 Wajinga pano pa ntanda,+ ne pano pa ntanda palengelwe kupichila mwi aye,+ bino ba pano pa ntanda kechi bamuyukile ne. 11 Waishile mu muzhi wanji, bino bantu banji kechi bamutambwijile ne. 12 Nangwa byonkabyo, bonse bamutambwijile wibapele luusa lwa kwikala baana ba Lesa,+ mambo baitabijile mu jizhina janji.+ 13 Kabiji bano kechi basemekelwe ku mubiji ne mashi ne, kabiji kechi basemekelwe na mambo a kukeba kwa bansemi ba balume ne, bino basemekelwe kwi Lesa.+
14 Byonkabyo, Mambo aikele ke muntu+ ne kwikala ne atweba, kabiji twamwene ne lukumo lwanji, lukumo lutambulatu mwana yenkawa umo+ kufuma kwi shanji; kabiji wayujile bibusa* bya Lesa ne bukine. 15 (Yoano washimwine pe aye, ne kubijika’mba: “Uno ye yewa ye naambilepo namba, ‘Awa ubena kundondela watangilako kala kulutwe yami, mambo wajingako amiwa saka nkyangye kwikalako.’”)+ 16 Mambo atweba bonse witubijile lusa lukatampe lwavula. 17 Na mambo a kuba Mizhilo yapainwe kupichila mwi Mosesa,+ luno lusa lukatampe+ ne bukine byaishile kupichila mwi Yesu Kilishitu.+ 18 Kafwako muntu wamonapo kala Lesa ne;+ kanatu yenkawa mwana umotu+ uji nobe Lesa waikala kwipi* na Shanji,+ ye wamulumbulula.+
19 Abino byo byashimwine Yoano kimye Bayudea kyo batumine bañanga ne bena Levi kufuma ku Yelusalema na kumushikisha’mba: “Nanchi yobe ñanyi?”+ 20 Aye waswile kwibakumbula kechi wakaine ne, waambile’mba: “Kechi yami Kilishitu ne.” 21 Abo bamushikishe’mba: “Nanchi wi ñanyi? Nanchi yobe Elaija nyi?”+ Aye waambile’mba: “Kechi yami iye ne.” “Nanchi yobe ngauzhi nyi?”+ Aye wakumbwile’mba: “Ine!” 22 Onkao mambo, abo bamushikishe’mba: “Nanchi yobe ñanyi? Tubuule pa kuba’mba tuye na kwibabuula aba baji kwitutuma. Nanchi witela obe mwine amba wi ñanyi?” 23 Aye wakumbwile’mba: “Amiwa yami jiwi ja yewa ubena kubijika mungye amba, ‘Ololai jishinda ja Yehoba,’*+ byonka byaambile ngauzhi Isaya.”+ 24 Bano bo batumine bafumine ku Bafaliseo. 25 Onkao mambo, abo bamushikishe’mba: “Pano mambo ka o ubatizhizha umvwe kechi wi Kilishitu nangwa Elaija nangwa Ngauzhi ne?” 26 Yoano wibakumbwile’mba: “Amiwa mbatizha mu mema. Mukachi kenu mwaimana muntu ye mwabula kuyuka, 27 yenka ubena kundondela kabiji kechi nakonsha kukasulula ntambo ya pa nkwabilo yanji ne.”+ 28 Bino bintu byamwekejile ku Betani bushiya bwa Yodano, Yoano ko abatizhenga.+
29 Juba jalondejilepo, wamwene Yesu saka eya ko aji, ne kwamba’mba: “Talai, Mwana Mukooko+ wa Lesa ufumyapo bundengamambo+ bwa ba pano pa ntanda!+ 30 Uno ye yewa ye naambilepo namba: ‘Awa ubena kundondela watangilako kala kulutwe yami, mambo aye wajinga mutanshi amiwa saka nkyangye kwikalako.’+ 31 Ne amiwa kechi namuyukile ne, bino ene mambo o naishijile na kubatizha mu mema ajinga a kuba’mba, aye asoloke ku bena Isalela.”+ 32 Kabiji Yoano washimwine’mba: “Namwene mupashi saka ekila nobe nkunda kufuma mwiulu, kabiji waikele pe aye.+ 33 Ne amiwa kechi namuyukile ne, bino Awa yenka wantumine na kubatizha mu mema, wañambijile’mba: ‘Yenka ye ukamona saka bamwikijila ku mupashi ne kwikala pe aye,+ uno ye ukabatizhanga na mupashi wazhila.’+ 34 Ne amiwa namumwene, kabiji nashimwine ne kushimuna namba uno ye Mwana Lesa.”+
35 Kabiji juba jalondejilepo Yoano waimene na baana banji ba bwanga babiji, 36 byo amwene Yesu saka apita, waambile’mba: “Talai, Mwana Mukooko+ wa Lesa!” 37 Kabiji baana ba bwanga babiji byo baumvwine waamba bino, bamulondejile Yesu. 38 Yesu byo aalulukile wamwene saka bamulondela ne kwibashikisha’mba: “Nanchi mubena kukeba ka?” Ne abo bamushikishe’mba: “Labi, (kulumbulula’mba, “Mufunjishi”) mwikala kwepi?” 39 Aye wibakumbwile’mba: “Twayai mukamone ko ngikala.” Byonkabyo, bayile na kumona ko aikelenga, kabiji baikele nanji joja juba; kyajinga nobe pa jiola* ja bujikumi. 40 Kabiji Andeleo+ bankasa ne kolo na Shimona Petelo, wajinga pa boba babiji baumvwine Yoano byo aambile ne kulondela Yesu. 41 Patanshi wataaine Shimona mulongo wanji ne kumwambila’mba: “Twataana Mesiasa”+ (kulumbulula’mba, “Kilishitu”), 42 kabiji wamutwajile kwi Yesu. Yesu byo amutajile, wamwambijile’mba: “Obewa yobe Shimona+ mwana wa kwa Yoano; usakutelwanga’mba Kefasa” (jatuntululwa’mba, “Petelo”).+
43 Juba jalondejilepo wakebele kuya ku Ngalilea. Kepo Yesu ataaine Filipa+ ne kumwambila’mba: “Ndondelenga.” 44 Filipa wafumine ku Beteseda, mu muzhi mwaikalanga Andeleo ne Petelo. 45 Filipa wataaine Natanela+ ne kumwambila’mba: “Twataana yewa ye baambilepo kwi Mosesa mu Mizhilo ne mu byanembele Bangauzhi amba: Yesu, mwana wa kwa Yosefwa,+ wa ku Nazala.” 46 Bino Natanela wamushikishe’mba: “Nanchi mu Nazala mwakonsha kufuma muntu wawama nyi?” Filipa wamukumbwile’mba: “Twaya, ukamone.” 47 Yesu wamumwene Natanela saka eya ko aji ne kwamba pe aye amba: “Talai, mwina Isalela wa kine wabula bujimbijimbi.”+ 48 Natanela wamushikishe’mba: “Mwangyuka byepi?” Yesu wamukumbwile’mba: “Filipa saka akyangye kukwita, byo wakijinga munshi ya kichi kya mukuyu, naji kukumona.” 49 Natanela waambile’mba: “Labi, anweba mwi Mwana Lesa, mwi Mfumu wa bena Isalela.”+ 50 Yesu wamushikishe’mba: “Nanchi wangitabila na mambo a kukubuula’mba naji kukumona munshi ya kichi kya mukuyu nyi? Ukamona bintu byakila pa bino.” 51 Wamwambijile jibiji amba: “Kinetu nemwambila namba, mukamona jiulu saka jashinkuka ne bamalaika ba Lesa saka bakanjila ne kwikila ku Mwana muntu.”+
2 Kabiji pa juba ja busatu kwajinga kijiilo kya masongola mu Kena wa mu Ngalilea, ne bainanji Yesu bajinga konka. 2 Yesu ne baana banji ba bwanga nabo bebechile ku kijiilo kya masongola.
3 Binyu byo byapwile, bainanji Yesu bamwambijile’mba: “Binyu byapwa.” 4 Pakuba Yesu wibashikishe bainanji amba: “Pano kitulamata byepi amiwa ne anweba? Kimye kyami kikyangye kufika.” 5 Bainanji baambijile aba baingijilenga’mba: “Kyonse kyo asakwimwambila, mwikyube.” 6 Kwajinga milondo ya mabwe itanu na umo ya mema yo batujile konka monka mwayijile mizhilo ya Bayudea+ ya kwiitokesha, yabayile ya kwitulwilamo bipimo* bya mema bibiji nangwa bisatu. 7 Yesu wibambijile’mba: “Yuzhai mema mu milondo.” Ne abo beiyuzhizhe ne pa kanwa. 8 Kabiji wibambijile’mba: “Tapulaimo, mutwajile mukulumpe wa kijiilo.” Ne abo batwajile. 9 Mukulumpe wa kijiilo byo atompelepo pa oa mema o baalwile ke binyu, kwa kubula kuyuka ko byafumine (nangwa kya kuba ba mingilo batapwile mema bayukile), mukulumpe wa kijiilo waichile musongoshi 10 ne kumwambila’mba: “Muntu yense patanshi ukisolola binyu byawama, bino umvwe bantu bapendwa, wibapa binyu byatama. Obewa waji kukifya binyu byawama pano po po wibipana.” 11 Yesu waubile kino mu Kena wa mu Ngalilea kwikala ntendekelo ya bya kukumya byanji kabiji wasolwele lukumo lwanji,+ ne baana banji ba bwanga bamwitabijile.
12 Kepo aye, bainanji, bankasanji+ ne baana banji ba bwanga bayile ku Kapenama,+ bino kechi baikeleko moba avula ne.
13 Kabiji Kijiilo kya Lupitailo+ kya Bayudea byo kyajinga pepi, Yesu wayile ku Yelusalema. 14 Wataaine mu nzubo ya Lesa bantu bapoteshenga bañombe, mikooko, bankunda+ ne bapimpwilenga mali saka baikala monka. 15 Onkao mambo, byo alengele kinzhipwila kya mizhinge, wapangilemo aba bajinga na mikooko ne bañombe mu nzubo ya Lesa, ne kwichila mali a muwayawaya a boba beapimpwilenga ne kupinuna matebulu abo.+ 16 Kabiji waambijile boba bapoteshenga bankunda amba: “Fumyai bino bintu muno! Kilekai kwalula nzubo ya Batata ke nzubo ya kubilamo busulu!”*+ 17 Kepo baana banji ba bwanga bavulukile kyanembwa’mba: “Mukoyo wa nzubo yenu, ukangikala ku muchima.”+
18 Onkao mambo, Bayudea bamwipwizhe’mba: “Ñanyi kiyukilo kyo usakwitumwesha,+ byo ubena kuba bino bintu?” 19 Yesu wibakumbwile’mba: “Kundulai ino nzubo ya Lesa, ne amiwa nkeimika mu moba asatu.”+ 20 Ponkapo Bayudea bamwipwizhe’mba: “Ino nzubo ya Lesa yashimikilwe pa myaka 46, nanchi ukakonsha kwiimika mu moba asatu nyi?” 21 Bino ino nzubo ya Lesa yo aambilengapo wajinga mubiji wanji.+ 22 Byonkabyo, kimye kyo asangukile mu bafu, baana banji ba bwanga bavulukile kuba’mba waambanga kimye kyonse pa kino,+ kabiji baitabijile kino kinembelo ne byambo byaambile Yesu.
23 Nangwa byonkabyo, byo ajinga mu Yelusalema ku Kijiilo kya Lupitailo, bantu bavula baitabijile mu jizhina janji, byo bamwene biyukilo byo aubilenga. 24 Bino Yesu kechi wibaketekejile ne, mambo wibayukile bonse 25 kabiji kechi wakebele muntu nangwa umo kumubuula pa mambo a biji bantu ne, mambo aye wayukile byo bajinga.+
3 Kwajinga muntu umo Mufaliseo jizhina janji Nikodema,+ ntangi wa Bayudea. 2 Waishile bufuku kwi Yesu+ ne kumwambila’mba: “Labi,+ twayuka namba anweba mwi mufunjishi wafuma kwi Lesa, mambo kafwako muntu nangwa umo wakonsha kuba bino biyukilo+ byo mubena kubapo ne, kana Lesa uji nanji.”+ 3 Yesu wamwambijile’mba: “Kinetu nakwambila namba, umvwe muntu wabula kusemwa jibiji,*+ kechi wakonsha kumona Bufumu bwa Lesa ne.”+ 4 Nikodema wamushikishe’mba: “Pano muntu wakonsha kusemwa byepi saka akota kala? Nanchi wakonsha kutwela munda mwa inanji ne kusemwa jibiji nyi?” 5 Yesu wamukumbwile’mba: “Kinetu nakwambila namba, inge muntu wabula kusemwa ku mema+ ne ku mupashi,+ kechi wakonsha kutwela mu Bufumu bwa Lesa ne. 6 Awa wasemwa ku muntu ye muntu, pakuba awa wasemwa ku mupashi ye mupashi. 7 Kange ukumye pa byo nakwambila’mba: Anweba bantu mwafwainwa kusemwa jibiji ne. 8 Mwela upupila ko akeba kabiji mumvwa ne byo apupa, bino kechi muyuka ko abena kufumina ne ko abena kuya ne. Byo byo kiji ne ku yense wasemwa ku mupashi.”+
9 Nikodema wamushikishe’mba: “Abino bintu byakonsha kumweka byepi?” 10 Yesu wamukumbwile’mba: “Nanchi obewa kechi yobe mufunjishi wa bena Isalela nenyi, pano wakankalwa byepi kuyuka bino bintu? 11 Kinetu nakwambila namba, bintu byo twayuka byo byo twamba kabiji bintu byo tumona twibishimuna, bino anweba kechi mutambula byo tushimuna ne. 12 Umvwe nemubuula bintu bya pano pa ntanda, ne anweba kwibitabila ne, mwakonsha kwitabila byepi umvwe nemubuule bintu bya mwiulu? 13 Kabiji kafwako muntu wayapo kala mwiulu ne,+ kana yenkawa wafumine mwiulu,+ Mwana muntu. 14 Kabiji byonkatu Mosesa byo aimikile muloolo mu kiselebwa,+ ne Mwana muntu naye bakamwimika,+ 15 kuba’mba yense wamwitabila akekale na bumi bwa myaka ne myaka.+
16 “Mambo Lesa watemenwe bingi ba pano pa ntanda kya kuba wapaine Mwananji yenkawa umotu,+ kuba’mba bonse bamwitabila kechi bakonaike ne, poso bakekale na bumi bwa myaka ne myaka.+ 17 Lesa watumine Mwananji pano pa ntanda, kechi na kuzhachisha ba pano pa ntanda ne, poso bakapuluke kupichila mwi aye.+ 18 Yense waitabila mwi aye kechi bakamuzhachisha ne.+ Pakuba yense wabula kwitabila mwi aye, bamuzhachisha kala, mambo kechi waitabila mu jizhina ja Mwana Lesa yenkawa umotu ne.+ 19 Kabiji pa kyo kino po paimena luzhachisho: kuba’mba kyeya kyaiya pano pa ntanda,+ bino bantu batemwako mfishi kukila kyeya, mambo mingilo yabo yatama. 20 Mambo yense uba byatama washikwa kyeya kabiji kechi wiya ku kyeya ne, pa kuba’mba mingilo yanji ibule kulengululwa.* 21 Bino yense uba mingilo yaoloka wiya ku kyeya,+ kuba’mba mingilo yanji isoloke monka mwayila kyaswa muchima wa Lesa.”
22 Byo apwishishe kwamba bino, Yesu ne baana banji ba bwanga bayile mu mizhi ya mu Yudea, ne kwikala nabo moba amo saka abatizha.+ 23 Bino Yoano naye wabatizhenga mu Enona kwipi na Salima, mambo kwajinga mema avula,+ ne bantu baishilenga kabiji bebabatizhenga;+ 24 mambo pa kikye kimye Yoano saka bakyangye kumutaya mu kaleya.+
25 Kepo pabuukile mapata pakachi ka baana ba bwanga ba kwa Yoano ne Muyudea umo pa mambo a kwitokesha. 26 Onkao mambo, baishile kwi Yoano ne kumwambila’mba: “Labi, muntu ye mwajinga nanji ku bushiya bwa Yodano ye mwashimwine,+ monai ubena kubatizha, ne bonse babena kuya kwi aye.” 27 Yoano wibambijile’mba: “Kafwako muntu wakonsha kuba kintu bunke bwanji ne, poso bamupakyo kufuma mwiulu. 28 Anweba mwayuka kushimuna kwami byo nemubuujile namba, ‘Kechi yami Kilishitu ne,+ bino bantuma kulutwe yanji.’+ 29 Awa uji na musongwa ye musongoshi.+ Nangwa byonkabyo, mulunda wa musongoshi umvwe waimana kwipi na musongoshi ne kumvwa byo abena kwamba, wikala na lusekelo lukatampe na mambo a kumvwa jiwi janji. Onkao mambo, amiwa nasekela bingi. 30 Aye wafwainwa kuyilangako palutwe, pakuba amiwa nafwainwa kubwelanga panyuma.”
31 Awa wafuma mwiulu+ wakila bantu bonse. Awa wafuma pano pa ntanda ye wa pano pa ntanda kabiji wamba bintu bya pano pa ntanda. Awa wafuma mwiulu wakila bantu bonse.+ 32 Kintu kyo amona ne kumvwa kyo kyo ashimuna,+ bino kafwako muntu uswa kushimuna kwanji ne.+ 33 Yense waswa kushimuna kwanji ye waitabila* amba Lesa wa kine.+ 34 Muntu ye batuma kwi Lesa, wamba byambo bya Lesa,+ mambo Lesa pa kupana mupashi kechi upima* ne. 35 Shanji wamutemwa Mwana+ kabiji wapana bintu byonse mu kuboko kwanji.+ 36 Awa wamwitabila Mwana ukekala na bumi bwa myaka ne myaka;+ awa ubula kukookela Mwana kechi ukekala na bumi ne,+ bino bukaji bwa Lesa bukekala pe aye.+
4 Nkambo byo ayukile’mba Bafaliseo baumvwa’mba Yesu wakwashishenga bantu kwikala baana ba bwanga ne kubatizha+ bavula kukila Yoano— 2 nangwa kya kuba Yesu kechi ye wabatizhenga ne, poso bonka baana banji ba bwanga— 3 wafumineko ku Yudea ne kubwela jibiji ku Ngalilea. 4 Bino wafwainwe kupita mu Samaliya. 5 Byonkabyo, wafikile mu muzhi wa Samaliya watelwanga’mba Saikala, wajinga kwipi na bujimi Yakoba bo apele mwananji Yosefwa.+ 6 Kabiji ko kwajinga ne mushima wa kwa Yakoba.+ Yesu byo akookele na lwendo, waikele ku mushima.* Kyajinga nobe pa jiola* ja butanu na bumo.
7 Mwanamukazhi mwina Samaliya waishile na kutapula mema. Yesu wamwambijile’mba: “Mpepo mema.” 8 (Mambo baana banji ba bwanga bayile mu muzhi na kupota kajo.) 9 Onkao mambo, mwanamukazhi mwina Samaliya wamushikishe’mba: “Anweba byo muji Muyudea, mubena kundomba byepi mema amiwa mwanamukazhi mwina Samaliya?” (Mambo Bayudea ne bena Samaliya kechi baumvwañananga ne.)+ 10 Yesu wamukumbwile’mba: “Umvwe wayukile bupe bwa Lesa+ ne wakwambila’mba, ‘Mpepo mema,’ inge waji kumulomba, ne aye inge waji kukupa mema a bumi.”+ 11 Mwanamukazhi wamwambijile’mba: “Mwane, kechi muji ne na kya kutapwilako mema ne, kabiji mushima naye wazhika. Nga ano mema a bumi musakwiafumya pi? 12 Nanchi anweba mwakila mushakulu wetu Yakoba witushijile uno mushima, kabiji mo atomanga aye ne baana banji ne banyama banji ba kulela nyi?” 13 Yesu wamukumbwile’mba: “Yense utoma ano mema ukafwa kilaka jibiji. 14 Pakuba yense utoma mema o nkamupa kechi ukafwa kilaka jibiji ne,+ bino aa mema o nkamupa akekala ke nsulo ya mema mwi aye saka atupauka ne kumupa bumi bwa myaka ne myaka.”+ 15 Uno mwanamukazhi wamwambijile’mba: “Mwane, bampepo oo mema kuba’mba mbulenga kufwa kilaka, nekileke kwiyanga kuno na kutapula mema.”
16 Aye wamwambijile’mba: “Yanga ukete mwatawobe wiye nanji kuno.” 17 Mwanamukazhi wamwambijile’mba: “Amiwa mulume mfwaye.” Yesu wamwambijile’mba: “Waamba bingi bulongo amba, ‘Amiwa mulume mfwaye.’ 18 Mambo wajinga na banabalume batanu, ne mwanamulume ye uji nanji luno kechi mwatawobe ne. Waamba kine.” 19 Uno mwanamukazhi wamwambijile’mba: “Mwane namona mwi ngauzhi.+ 20 Bashakulu betu bapopwelanga pa uno mutumba, pakuba anweba bantu mwamba’mba mu Yelusalema yo mpunzha bantu ko bafwainwa kupopwelanga.”+ 21 Yesu wamwambijile’mba: “Obewa mwanamukazhi ngitabile, kimye kibena kwiya kyo mukabula kupopwela Batata pa uno mutumba nangwa mu Yelusalema. 22 Anweba mupopwela kyo mwabula kuyuka;+ atweba tupopwela kyo twayuka, mambo lupulukilo lwaishila mu Bayudea.+ 23 Nangwa byonkabyo, kimye kibena kwiya kabiji kyafika, bapopweshi ba kine kyo bakapopwelanga Batata na mupashi ne na bukine, mambo Batata babena kukeba bantu ba uno mutundu kwibapopwela.+ 24 Lesa Mupashi,+ ne boba bamupopwela bafwainwa kumupopwela na mupashi ne na bukine.”+ 25 Uno mwanamukazhi wamwambijile’mba: “Nayuka namba Mesiasa ubena kwiya, utelwa’mba Kilishitu. Aye byo akeya, uketubuula bintu byonse patoka.” 26 Yesu wamwambijile’mba: “Yami iye, ye ubena kwamba nanji.”+
27 Ponkapo baana banji ba bwanga baishile, kabiji bakuminye bingi mambo wisambilenga na mwanamukazhi. Pano bino, kafwako wamushikishe’mba: “Ubena kukeba ka?” nangwa’mba, “Mambo ka o mubena kwisambila na uno mwanamukazhi?” ne. 28 Onkao mambo, uno mwanamukazhi washile mulondo wanji wa mema ne kuya mu muzhi na kubuula bantu amba: 29 “Twayai mukamone muntu wambuula bintu byonse byo naubile. Uno kana ye Kilishitu nyi?” 30 Balupukile mu muzhi ne kutendeka kwiya ko aji.
31 Bino baana ba bwanga bamukanjikizhenga’mba: “Labi,+ jai.” 32 Pakuba aye wibambijile’mba: “Amiwa nji na kajo ko mwabula kuyuka.” 33 Onkao mambo, baana ba bwanga beshikishenga mulwabo amba: “Nanchi paji wakumuletelapo kajo nyi?” 34 Yesu wibambijile’mba: “Kajo kami ke kuba kyaswa muchima wa yewa wantumine+ ne kupwisha mwingilo wanji.+ 35 Nanchi kechi mwamba’mba kwakishala bañondo bana kimye kya kunowa saka kikyangye kufika nenyi? Amiwa nemwambila namba: Inunai meso enu mumone majimi byo atoka kala afwainwa kunowa.+ Kabiji 36 unowa ubena kutambula mfweto ne kubungizha bipangwa bya bumi bwa myaka ne myaka, pa kuba’mba njimi ne yewa unowa basangalele pamo.+ 37 Na mambo a kino, bino byambo bya kine bya kuba’mba: Umo njimi ne mukwabo unowa. 38 Nemutumine kuya na kunowa po mwabujile kwingila. Bangi bo baingijile, ne anweba mwamwenamo mu mingilo yabo.”
39 Bena Samaliya bavula mu muzhi bamwitabijile na mambo a byambo bya mwanamukazhi byo ebabuujile bya kuba’mba: “Wambuula bintu byonse byo naubile.”+ 40 Onkao mambo, bena Samaliya byo baishile ko aji, bamwambijile kuba’mba ekale nabo, ne aye waikajileko moba abiji. 41 Byonkabyo, bavula bamwitabijile na mambo a byo aambile, 42 kabiji bamwambijile mwanamukazhi amba: “Pano kechi twaitabila na mambo a byambo byo witubuujile ne; mambo twiumvwina atwe bene, kabiji twayuka’mba uno muntu kine mupulushi wa ba pano pa ntanda.”+
43 Byo papichile moba abiji, wafumineko ne kuya ku Ngalilea. 44 Nangwa byonkabyo, Yesu mwine waambile’mba, ngauzhi kechi bamunemeka mu muzhi wanji ne.+ 45 Onkao mambo, byo afikile mu Ngalilea, bena Ngalilea bamutambwijile, mambo bamwene bintu byonse byo aubile mu Yelusalema pa kijiilo,+ mambo nabo bayile ku kijiilo.+
46 Wabwelele jibiji ku Kena wa mu Ngalilea konka ko aalwile mema ke binyu.+ Kabiji kwajinga kinemanga umo wa ku bufumu wajinga na mwana wakolelwe mu Kapenama. 47 Uno muntu byo aumvwine’mba Yesu wafuma kala ku Yudea waiya ku Ngalilea, wayileko ne kumusashijila’mba aye na kubuka mwananji, mambo wajinga pepi kufwa. 48 Bino Yesu wamwambijile’mba: “Anweba bantu nangwatu mumone biyukilo ne bya kukumya kechi musakwitabila ne.”+ 49 Kinemanga wa ku bufumu wamwambijile’mba: “Nkambo, twayai mwanami saka akyangye kufwa.” 50 Yesu wamwambijile’mba: “Yanga; mwanobe wabukwa.”+ Uno muntu waitabijile byambo byamwambijile Yesu, ne aye wayile. 51 Bino byo akijinga mu jishinda, bakalume banji bamutundaijile ne kumubuula’mba mwanenu wabukwa.* 52 Ponkapo wibashikishe kimye kyo akosele. Ne abo bamwambijile’mba: “Kikola kya mashika kyapwile kesha pa jiola* ja butanu na bubiji.” 53 Ponkapo shanji wayukile’mba kyajinga pa kyonkakya kimye Yesu kyo amwambijile’mba: “Mwanobe wabukwa.”+ Byonkabyo, aye ne bonse ba mu nzubo yanji baitabijile. 54 Kino kyajinga kya kukumya kya bubiji+ Yesu kyo aubile kimye kyo afumine mu Yudea kuya ku Ngalilea.
5 Bino bintu byo byapichile, kwajinga kijiilo+ kya Bayudea, ne Yesu wayile ku Yelusalema. 2 Monkamwa mu Yelusalema ku Kibelo kya Mikooko+ kwajinga kizhiba kyo batelanga mu Kihebelu amba Betezeda kyo bazhokolwesheko tubukonde tutanu. 3 Mu tuno tubukonde mwalaalanga bantu bavula bakolelwenga, bampofu, balemana ne boba bapapile* maboko ne maulu. 4 *—— 5 Bino kwajinga muntu umo wakolelwe pa myaka 38. 6 Byo amwene uno muntu saka alaala, ne byo ayukile’mba wakolelwe pa myaka yavula, Yesu wamwipwizhe’mba: “Nanchi ubena kukeba kubukwa nyi?”+ 7 Uno muntu wakolelwe wamukumbwile’mba: “Mwane, kafwako muntu wa kungibizha mu kizhiba umvwe mema beavundankanya ne, bino amiwa umvwe kankebe kutwelamo, mukwabo upichila kulutwe yami.” 8 Yesu wamwambijile’mba: “Imana! Shikula mukeka* wobe wende.”+ 9 Ponkapotu uno muntu wakosele kabiji washikwile mukeka* wanji watendeka ne kwenda.
Aje juba jajinga juba ja Sabado. 10 Onkao mambo, Bayudea batendekele kwambila uno muntu ye babukile’mba: “Jino juba ke juba ja Sabado, kechi wafwainwa kusenda mukeka* wobe ne.”+ 11 Bino aye wibakumbwile’mba: “Awa yenka wambuka ye wa kuñambila’mba, ‘Shikula mukeka* wobe wende.’” 12 Abo bamwipwizhe’mba: “Nanchi ñanyi waji kukwambila’mba, ‘Shikula mukeka wende’?” 13 Bino uno muntu ye babukile kechi wayukile Yesu ne, mambo Yesu watwelele mu jibumba jajinga kokwa.
14 Kepo Yesu amutaaine mu nzubo ya Lesa ne kumwambila’mba: “Tala, pano wabukwa. Kange ukabwezhepo kulenga mambo ne, pa kuba’mba kintu kyakilamo kutama kikabule kukumwekela.” 15 Uno muntu wayile na kubuula Bayudea amba Yesu ye waji kumubuka. 16 Na mambo a kino, Bayudea batendekele kukatazha Yesu, mambo waubilenga bino bintu pa juba ja Sabado. 17 Bino aye wibambijile’mba: “Batata ne luno bakingila, ne amiwa nkingila.”+ 18 O ene mambo Bayudea o bakebejilenga mwa kumwipayila, kechi na mambo a kuzhilululatu juba ja Sabado ne, bino ne na mambo a kutongola Lesa amba Batata,+ kwiesakanya aye mwine na Lesa.+
19 Onkao mambo, Yesu wibambijile’mba: “Kinetu nemwambila namba, Mwana kechi wakonsha kwiubila kintu aye mwine ne, bino aye uba kyonka kyo amona Shanji na kuba.+ Mambo bintu byonse Shanji byo oba, ne Mwana naye byo byo oba. 20 Mambo Shanji watemwa Mwana+ kabiji umumwesha bintu byonse aye byo oba, kabiji ukamumwesha ne mingilo yakila pa ino, kuba’mba mukakumye.+ 21 Byonkatu Shanji byo asangula bafu ne kwibapa bumi,+ ne Mwana naye upana bumi ku boba bo akeba kupa.+ 22 Mambo Shanji kechi uchibila mambo muntu nangwa umo ne, pakuba Mwananji ye ye apa luusa lwa kuchiba mambo onse,+ 23 pa kuba’mba bonse bakonshe kunemeka Mwana byonkatu byo banemeka Shanji. Yense ubula kunemeka Mwana kechi unemeka ne Shanji wamutumine ne.+ 24 Kinetu nemwambila namba, Yense umvwa byambo byami ne kwitabila yewa wantumine ukekala na bumi bwa myaka ne myaka,+ kabiji kechi ukazhatwa ne, bino wafumamo mu lufu ne kwikala na bumi.+
25 “Kinetu nemwambila namba, kimye kibena kwiya kabiji kyafika, bafwa kyo bakomvwa jiwi ja Mwana Lesa, ne boba baumvwijile bakekala na bumi. 26 Byonkatu Shanji byo aji nsulo ya bumi,*+ wamupa ne Mwananji bulume bwa kupana bumi.+ 27 Kabiji wamupa luusa lwa kuchiba mambo,+ mambo aye ye Mwana muntu.+ 28 Kange mukumye kino ne, mambo kimye kibena kwiya aba bonse baji mu bilende* kyo bakomvwa jiwi janji+ 29 ne kufumamo, aba baubilenga byawama bakasangukila ku bumi, ne boba baubilenga byatama bakasangukila ku kije.+ 30 Amiwa kechi nakonsha kwiubila kintu ami mwine ne. Nchibila bantu mambo monka mo naumvwina, kabiji nchibila bantu mambo monka mo aolokela,+ mambo kechi nguba kyaswa muchima wami ne, bino nguba kyaswa muchima wa yewa wantumine.+
31 “Umvwe neshimuna ami mwine ku bantu, kechi baketabila byambo byo ñamba ne.+ 32 Kuji muntu mukwabo unshimuna ku bantu, kabiji amiwa nayuka namba bintu byo amba pe amiwa bya kine.+ 33 Anweba mwatuma bantu kwi Yoano, ne aye washimuna bukine.+ 34 Nangwa byonkabyo, amiwa kechi nkeba muntu kunshimuna ku bantu ne, bino naamba bino bintu namba mukapuluke. 35 Uno muntu wajinga lampi watemenenga ne kuba kyeya, kabiji mu kakimye kacheche anweba mwaswile kusangalela mu kyeya kyanji.+ 36 Bino kushimuna kwami kwakila kwa kwa Yoano, mambo mingilo yonka yo bampele Batata kwingila, yo yo mbena kwingila, kabiji yo ibena kumwesha’mba Batata bo bantumine.+ 37 Kabiji Batata bantumine, nabo banshimuna.+ Anweba mukyangye kumvwapo jiwi jabo kabiji kechi mwakimonapo kala byo bamweka ne,+ 38 kabiji byambo byabo kechi biji mwi anweba ne, mambo kechi mwaitabila yewa ye batumine ne.
39 “Anweba mukebakeba mu Binembelo,+ mambo mulanguluka’mba mo mo mukamwena bumi bwa myaka ne myaka; kabiji byonka bino* byo binshimuna amiwa.+ 40 Pakuba anweba mubena kukana kwiya kwi amiwa+ kuba’mba mukekale na bumi. 41 Amiwa kechi ntambula lukumo ku bantu ne, 42 bino nayukishatu bulongo namba kechi mwamutemwa Lesa ne. 43 Naishila mu jizhina ja Batata, bino anweba kechi mwantambwila ne. Umvwe muntu ungi waishila mu jizhina janji mwine, mukamutambwila. 44 Mwakonsha kwitabila byepi, byo mwinemeka anwe bene na bene, ne byo mubula kukeba lukumo lufuma kwi Lesa yenka umotu?+ 45 Kange mulanguluke’mba nkemushinawina kwi Batata ne; koaji wimushinawina, aye Mosesa,+ yenka ye mwaketekela. 46 Inge mwaitabijile Mosesa, ne amiwa umvwe mwangitabila mambo aye wanembele pe amiwa.+ 47 Bino inge mwabula kwitabila bintu byo anembele, muketabila byepi byo ñamba?”
6 Bino bintu byo byapichile, Yesu waabukijile ku bushiya bwa kalunga ka mema ka Ngalilea, nangwa Tibeliasa.+ 2 Kabiji jibumba jikatampe jamulondejilenga+ mambo jamwene biyukilo bya kukumya byo aubilenga pa kubuka bakolelwenga.+ 3 Onkao mambo, Yesu wayile ku mutumba kabiji waikajile konka na baana banji ba bwanga. 4 Kabiji Kijiilo kya Lupitailo+ kya Bayudea, kyajinga pepi. 5 Yesu byo ainwine meso ne kumona’mba jibumba jikatampe jaishilenga kwi aye, washikishe Filipa amba: “Kwepi ko tusakupota bashinkwa ba kujiisha bano bantu?”+ 6 Pano bino, aye waambile bino kuba’mba amweseke, mambo wayukijile jimo kyo akebelenga kuba. 7 Filipa wamukumbwile’mba: “Bashinkwa bafwainwa kupotwa mandenali* 200, bantu kechi bakonsha kwibakumbana ne, nangwatu kya kuba baabana kachekache.” 8 Mwananji wa bwanga umo aye Andeleo bankasa ne kolo ne Shimona Petelo, wamwambijile’mba: 9 “Paji uno kalombwana uji na bashinkwa batanu ba mbale ne tumasabi tubiji. Nanchi bino byakonsha kukumbana bano bonse nyi?”+
10 Yesu wibambijile’mba: “Ambilai bantu bekale panshi.” Pajinga nsono yavula, ne banabalume baikele panshi, bajinga nobe 5,000.+ 11 Yesu washikwile bashinkwa, byo alombele, wibapaine ku boba baikele; waubile kintutu kimo ne ku tumasabi, kabiji bajiile kwesakana na byo bakebelenga. 12 Bino byo bajiile ne kwikuta, waambijile baana banji ba bwanga amba: “Tolaulai bibese byashalapo pa kuba’mba pabule konaika nangwa kamo.” 13 Onkao mambo, batolawile ne kuyuzha bitumbe 12 bya bibese byo bashilepo boba bajiile bashinkwa batanu ba mbale.
14 Bantu byo bamwene kiyukilo kyo aubile, baambile’mba: “Kine uno ye Ngauzhi wafwainwe kwiya pano pa ntanda.”+ 15 Yesu byo ayukile’mba bakeba kwiya na kumukwata kuba’mba ekale mfumu, wafumineko+ ne kubwela ku mutumba kwa bunke bwanji.+
16 Byo kyafikile mabanga, baana banji ba bwanga bakunkulukijile ku kalunga ka mema,+ 17 kabiji byo bakanjijile mu bwato, baabukijile ku bushiya bwa kalunga ka mema ku Kapenama. Pa kikye kimye saka bwaila kala, ne Yesu saka akyangye kwiya ko baji.+ 18 Kabiji manyaki aishile pa kalunga ka mema mambo a luvula mukatampe.+ 19 Nangwa byonkabyo, byo bavuwile bwato mamailoshi* asatu nangwa ana, bamwene Yesu na kwenda pa kalunga ka mema saka eya kwipi na bwato, ne abo baubile bingi moyo. 20 Bino aye wibambijile’mba: “Yami iye; kuba moyo ne!”+ 21 Kepo baswile kuya nanji mu bwato, ne bwato bwafikile konka ku kitulu ko bayilenga.+
22 Juba jalondejilepo, bantu bavula baimene bushiya bwa kalunga ka mema, bamwene’mba kafwako bwato bukwabo ne, posotu bonkabwa bucheche, ne kuba’mba Yesu kechi wakanjijile mu bobwa bwato na baana banji ba bwanga ne, bino baana banji ba bwanga bayiletu bunke bwabo. 23 Nangwa byonkabyo, maato afumine ku Tibeliasa afikile pepi na po bajiijile bashinkwa, kimye Nkambo kyo apwishishe kulomba. 24 Onkao mambo, bantu byo bamwene’mba Yesu nangwa baana banji ba bwanga, bakanjijile maato abo ne kuya ku Kapenama na kumukeba Yesu.
25 Byo bamutaaine ku bushiya bwa kalunga ka mema, bamushikishe’mba: “Labi,+ ñanyi kimye kyo mwaji kwiya kuno?” 26 Yesu wibakumbwile’mba: “Kinetu nemwambila namba, anweba kechi mubena kunkeba na mambo a biyukilo byo mwamwene ne, bino ke na mambo a bashinkwa bo mwajiile ne kwikuta.+ 27 Kange mwingijilenga kajo konaika ne, bino ingijilainga kajo ka myaka kakemulengela kwikala na bumi bwa myaka ne myaka,+ ko akemupa Mwana muntu; mambo Shanji, aye Lesa mwine wamubila bibusa Mwananji.”+
28 Onkao mambo, bamushikishe’mba: “Nanchi twafwainwa kuba byepi pa kuba’mba twingile mingilo ya Lesa?” 29 Yesu wibakumbwile’mba: “Uno ye mwingilo wa Lesa, wa kuba’mba mumwitabile awa ye atumine.”+ 30 Kepo bamushikishe’mba: “Pano ñanyi kiyukilo kyo musakuba+ pa kuba’mba twikimone ne kwimwitabila? Ñanyi mwingilo ye mubena kuba? 31 Bashakulu betu bajiilenga manna mu kiselebwa+ byonka byo kyanembwa’mba: ‘Wibapele kajo ka kuja kufuma mwiulu.’”+ 32 Kabiji Yesu wibambijile’mba: “Kinetu nemwambila namba, Mosesa kechi wimupele kajo kufuma mwiulu ne, bino Batata bemupa kajo ka kine kufuma mwiulu. 33 Mambo kajo ka Lesa, ye yewa ufuma mwiulu ne kupana bumi ku ba pano pa ntanda.” 34 Onkao mambo, abo bamwambijile’mba: “Nkambo, mwitupenga koko kajo kimye kyonse.”
35 Yesu wibambijile’mba: “Amiwa yami kajo ka bumi. Yense wiya kwi amiwa kechi ukafwa nzala ne, kabiji yense ungitabila amiwa kechi ukafwa kilaka ne.+ 36 Bino byonka byo naji kwimwambila, anweba mwammona, bino kechi mwaitabila ne.+ 37 Yense ye bampa Batata ukeya kwi amiwa, ne yewa wiya kwi amiwa kechi nkamupanga ne;+ 38 mambo naiya kufuma mwiulu,+ kechi na kuba kyaswa muchima wami ne, poso kuba kyaswa muchima wa yewa wantumine.+ 39 Kino kyo kyaswa muchima wa yewa wantumine, kya kuba’mba kechi ngelepo nangwa umo pa boba bo ampele ne, bino nafwainwa kwibasangula+ mu juba jikapelako. 40 Mambo kino kyo kyaswa muchima wa Batata, kuba’mba yense wayuka Mwana ne kumwitabila, akekale na bumi bwa myaka ne myaka+ kabiji nkamusangula+ mu juba jikapelako.”
41 Kepo Bayudea batatwile kumunyinyita mambo waambile’mba: “Amiwa yami kajo kafumine mwiulu.”+ 42 Kabiji batatwile kushikisha’mba: “Nanchi uno kechi ye Yesu mwana wa kwa Yosefwa, shanji ne inanji bo twayuka nenyi?+ Pano mambo ka o ambila’mba, ‘Nafuma mwiulu’?” 43 Yesu wibakumbwile’mba: “Kilekai kunyinyita mukachi kenu. 44 Kafwako muntu wakonsha kwiya kwi amiwa ne, poso Batata bantumine bamukokela ko nji,+ kabiji nkamusangula mu juba jikapelako.+ 45 Kyanembwa mu buku wa Bangauzhi amba: ‘Bonse bakebafunjisha kwi Yehoba.’*+ Yense umvwa kwi Batata ne kufunda, wiya kwi amiwa. 46 Kafwako muntu wamonapo kala Batata+ ne, kanatu yenkawa wafuma kwi Lesa; uno ye wamonapo Batata.+ 47 Kinetu nemwambila namba, yense witabila ukekala na bumi bwa myaka ne myaka.+
48 “Amiwa yami kajo ka bumi.+ 49 Bashakulu benu bajiilenga manna mu kiselebwa, bino bafwile.+ 50 Kano ko kajo kafuma mwiulu, kuba’mba yense akonshe kujako ne kubula kufwa. 51 Amiwa yami kajo komi kafumine mwiulu. Inge muntu waja kano kajo ukekala myaka ne myaka; kabiji kajo ko nkapana, ye mubiji wami ye nkapaina ba pano pa ntanda kuba’mba bakekale na bumi.”+
52 Kepo Bayudea batatwile kwipachika mulwabo amba: “Uno muntu wakonsha kwitupa byepi mubiji wanji amba tuje?” 53 Onkao mambo, Yesu wibambijile’mba: “Kinetu nemwambila namba, umvwe mwabula kuja mubiji wa Mwana muntu ne kubula kutoma mashi anji, kechi mukekala na bumi ne.+ 54 Yense uja mubiji wami ne kutoma mashi ami, ukekala na bumi bwa myaka ne myaka, kabiji nkamusangula+ mu juba jikapelako; 55 mambo mubiji wami ko kajo ka kine, ne mashi ami byo bya kutoma bya kine. 56 Yense uja mubiji wami ne kutoma mashi ami uji ne amiwa, ne amiwa nji ne aye.+ 57 Byonkatu Batata baji na bumi byo bantumine, ne byo nji na bumi na mambo a Batata, byonkabyo, ne yewa unja amiwa, naye ukekala na bumi na mambo a amiwa.+ 58 Kano ko kajo kafumine mwiulu. Kechi kaji pamo na koka kajiile bashakulu benu ne, mambo abo bafwile. Yense uja kano kajo ukekala myaka ne myaka.”+ 59 Waambile bino bintu byo afunjishenga mu nshinagoga* mu Kapenama.
60 Byo baumvwine kino, baana banji ba bwanga bavula baambile’mba: “Bino byambo byakatazha bingi; ñanyi usakwibyumvwa?” 61 Bino Yesu byo ayukile’mba baana banji ba bwanga banyinyichilenga pa mambo a kino, wibambijile’mba: “Nanchi kino kimutuntwisha nyi? 62 Pano kikekala byepi umvwe mukamone Mwana muntu saka aya ko afumine?+ 63 Mupashi ye upana bumi;+ pakuba mubiji kafwako byo aji ne. Byambo byo nemwambila byo bya mupashi kabiji byo bipana bumi.+ 64 Pakuba kuji bamo mwi anweba babula kwitabila.” Mambo kufumatu ku ntatwilo Yesu wayukile boba babujile kwitabila ne yewa ukamusolola.+ 65 Aye wibambijile’mba: “O ene mambo o nemwambila bino namba, kafwako wakonsha kwiya kwi amiwa ne, poso bamuswisha kwi Batata.”+
66 Na mambo a kino, baana banji ba bwanga bavula babwelele ku bintu byo bashile+ ne kuleka kwenda nanji. 67 Onkao mambo, Yesu washikishe batumwa Jikumi na Babiji amba: “Nanchi ne anweba mukeba kuya nyi?” 68 Shimona Petelo wamukumbwile’mba: “Nkambo, tukaya kwi ñanyi?+ Anweba muji na byambo bipana bumi bwa myaka ne myaka.+ 69 Twaitabila ne kuyuka’mba anweba mwi Wazhila wa Lesa.”+ 70 Yesu wibakumbwile’mba: “Nanchi amiwa kechi nemusajile anweba batumwa jikumi na babiji nenyi?+ Bino umo mwi anweba ye wa luntepentepe.”*+ 71 Waambilenga pe Yudasa mwana wa kwa Shimona Isakaliota, mambo uno ye wajinga wa kumusolola, nangwa kya kuba wajinga wa mu batumwa Jikumi na Babiji.+
7 Bino bintu byo byapichile, Yesu watwajijile kupitañana* mu Ngalilea mambo kechi wakebele kupitañana mu Yudea ne, mambo Bayudea bakebelenga kumwipaya.+ 2 Nangwa byonkabyo, Kijiilo kya Bayudea kya Matente*+ kyajinga pepi. 3 Onkao mambo, bankasanji+ bamwambijile’mba: “Fumai kuno muyenga ku Yudea pa kuba’mba baana benu ba bwanga nabo bakamone mingilo yo mubena kuba. 4 Mambo kafwako muntu uba kintu mu bufyamfya inge ukeba kuyukanyikwa ku bantu ne. Umvwe mubena kuba bino bintu, kemweshai anwe bene ku ba pano pa ntanda.” 5 Bankasanji kechi bamwitabijile ne.+ 6 Onkao mambo, Yesu wibambijile’mba: “Kimye kyami kikyangye kufika,+ pakuba anweba kimye kyenu kyafika. 7 Ba pano pa ntanda kechi bakonsha kwimushikwa ne, bino amiwa banshikwa, mambo nshimuna kuba’mba mingilo yabo yatama.+ 8 Anweba yainga ku kijiilo; amiwa kechi nsakuyako ne, mambo kimye kyami kikyangye kufika.”+ 9 Byo ebabuujile bino bintu, aye washajile monka mu Ngalilea.
10 Bino bankasanji byo bayile ku kijiilo, ne aye wayile mu bufyamfya. 11 Onkao mambo, Bayudea batendekele kumukeba pa kijiilo ne kwipuzha’mba: “Nanchi uno muntu uji pi?” 12 Kabiji bamwambilengapo bingi mu jibumba. Bamo baambilenga’mba: “Ke muntu wawama bingi.” Bakwabo nabo amba: “Kechi wawama ne. Utwala bantu mungi.”+ 13 Kafwako wamwambilengapo pa bantu ne, mambo bachiinenga Bayudea.+
14 Kijiilo byo kyafikile pakachi, Yesu watwelele mu nzubo ya Lesa ne kutendeka kufunjisha. 15 Kabiji Bayudea bakuminye bingi ne kwipuzha’mba: “Nanchi uno muntu wayuka byepi Binembelo*+ saka abujile kuyapo ku masukulu?”*+ 16 Yesu wibakumbwile’mba: “Byo mfunjisha kechi byami ne, bino bya yewa wantumine.+ 17 Umvwe muntu ukeba kuba kyaswa muchima wa Lesa, ukayuka umvwe byo mfunjisha bifuma kwi Lesa+ nangwa ñambatu milanguluko yami. 18 Yense wamba milanguluko yanji ukeba kwitumbijika aye mwine; bino awa ukeba lukumo lwa yewa wamutumine,+ ye wa kine kabiji mwi aye kechi muji bujimbijimbi ne. 19 Nanchi Mosesa kechi wimupele Mizhilo+ nenyi? Bino kafwako nangwa umo mwi anweba ukookela Mizhilo ne. Mambo ka o mubena kukebela kungipaya?”+ 20 Jibumba jamukumbwile’mba: “Obewa uji na ndemona. Ñanyi ubena kukeba kukwipaya?” 21 Yesu wibakumbwile’mba: “Naubile kya kukumya kimo, ne anweba bonse mwakuminye. 22 Pa mambo a kino, Mosesa wimupele muzhilo wa mukanda,+ bino kechi wafumine kwi Mosesa ne, wafumine ku bashakulu,+ kabiji muntu mumutwala ku mukanda pa juba ja sabado. 23 Umvwe muntu bamutwala ku mukanda pa juba ja sabado kuba’mba Mizhilo ya Mosesa ibule kuzhilululwa, nanchi mwanzhingijila amiwa na mambo a kuba nabukile muntu pa juba ja sabado nyi?+ 24 Kilekai kutalanga ku bilungi pa kuchiba mambo, pakuba chibilainga mambo monka mo aolokela.”+
25 Kepo bangikazhi bamo ba mu Yelusalema batendekele kwipuzha’mba: “Nanchi uno kechi ye muntu ye babena kukeba kwipaya nenyi?+ 26 Pano talai! ubena kwamba pa mvula bantu, kabiji kafwako kyo bamubapo ne. Nanchi bantangi bashiinwa’mba uno ye Kilishitu nyi? 27 Pakuba atweba twayuka kwafuma uno muntu;+ bino Kilishitu byo akeya, kafwako ukayuka ko akafuma ne.” 28 Byo afunjishenga mu nzubo ya Lesa, Yesu wabijikile’mba: “Anweba mwangyuka, kabiji mwayuka ne ko nafuma. Kechi neishijile ami mwine ne,+ bino awa wantumine wa kine, kabiji anweba kechi mwamuyuka ne.+ 29 Amiwa namuyuka+ mambo yami namwimenako, ne aye ye wantuma.” 30 Onkao mambo, batendekele kumubezhabezha’mba bamukwate,+ bino kafwako wamukwachile ne, mambo kimye kyanji kyaji kikyangye kufika.+ 31 Pano bino, bavula bamwitabijile,+ kabiji baipwizhenga’mba: “Umvwe Kilishitu waiya, nanchi ukoba biyukilo byakila byaubapo uno muntu nyi?”
32 Bafaliseo baumvwine bino bintu bantu byo banyinyichilenga pe aye, kabiji bañanga bakatampe ne Bafaliseo batumineko bakapaso amba bamukwate. 33 Yesu wibambijile’mba: “Nji nenu pa kakimye kacheche saka nkyangye kubwela ku yewa wantumine.+ 34 Anweba mukankeba, bino kechi mukantaana ne, kabiji akwa ko nkekala, anweba kechi mwakonsha kwiyako ne.”+ 35 Onkao mambo, Bayudea beambijilenga mulwabo amba: “Nanchi uno muntu kwepi ko abena kukeba kuya, kya kuba atweba tukakankalwe kumutaana? Nanchi ubena kukeba kuya na kwikala na Bayudea bapalañena mu Bangiliki ne kufunjisha Bangiliki nyi? 36 Nanchi watazha mwepi byo aamba’mba, ‘Anweba mukankeba, bino kechi mukantaana ne, kabiji amba akwa ko nkekala anweba kechi mwakonsha kwiyako ne’?”
37 Pa juba japeleleko janemene bingi ja kijiilo,+ Yesu waimene ne kubijika’mba: “Yense wafwa kilaka eye kwi amiwa, ne amiwa nsakumupa mema a kutoma.+ 38 Awa wangitabila, monka mwaambila kinembelo amba: ‘Mu muchima wanji mukafumanga tukola twa mema a bumi.’”+ 39 Nangwa byonkabyo, waambile bino na mambo a mupashi, aba bamwitabijile ye bajinga pepi kutambula; mambo kechi bakitambwile mupashi ne,+ mambo Yesu saka akyangye kutumbijikwa.+ 40 Bamo mu jibumba baumvwine bino byambo, baambile’mba: “Kine uno ye Ngauzhi.”+ 41 Bakwabo baambilenga’mba: “Uno ye Kilishitu.”+ Bino bamo baipwizhenga’mba: “Nanchi Kilishitu ukafuma mu Ngalilea nyi?+ 42 Nanchi kinembelo kechi kyaamba’mba, Kilishitu ukafuma mu baana ba kwa Davida+ ne kuba’mba mu Betelema+ muzhi mucheche mwaikalanga Davida mo mo akafuma nenyi?”+ 43 Onkao mambo, jibumba jaabenejilemo pa mambo a aye. 44 Pano bino, bamo bakebelenga kumukwata, bino kafwako wamukwachile ne.
45 Kepo bakapaso babwelele ku bañanga bakatampe ne Bafaliseo, kabiji Bafaliseo bebepwizhe’mba: “Mambo ka o mwabujila kumuleta?” 46 Bakapaso bakumbwile’mba: “Kafwako muntu nangwa umo wakyambapo kala byamba uno muntu ne.”+ 47 Bafaliseo baipwizhe’mba: “Nanchi ne anweba bemutwala kala mungi nyi? 48 Nanchi bantangi nangwa Bafaliseo bamo bamwitabila nyi?+ 49 Pakuba jino jibumba jabula kuyuka Mizhilo ke ja bantu bafingwa.” 50 Nikodema yenka waishile kwi aye patanshi, kabiji yenka wa mwi abo, wibambijile’mba: 51 “Kwesakana na Mizhilo yetu, umvwe tukeba kuzhachisha muntu, nanchi kechi tukyumvwa kwi aye patanshi pa kuba’mba tuyuke kyo abena kuba nenyi?”+ 52 Abo bamukumbwile’mba: “Nanchi ne obewa wafuma ku Ngalilea nyi? Ukebekebe kabiji usakumona’mba kafwako ngauzhi ukafuma mu Ngalilea ne.”*
8 12 Kepo Yesu ebambijile jibiji amba: “Amiwa nekyeya kya pano pa ntanda.+ Yense undondela kechi ukenda mu mfishi ne, bino ukekala mu kyeya kya bumi.”+ 13 Onkao mambo, Bafaliseo bamwambijile’mba: “Ubena kwishimuna obe mwine; ne kushimuna kobe kechi kwa kine ne.” 14 Yesu wibakumbwile’mba: “Nangwa neshimuna ami mwine, kushimuna kwami kwa kine, mambo nayuka ko nafumine ne ko mbena kuya.+ Bino anweba kechi mwayuka ko nafumine ne ko mbena kuya ne. 15 Anweba muchibila mambo monka mwayila bintu* bimweka;+ pakuba amiwa kechi nchibila mambo muntu nangwa umo ne. 16 Bino umvwe nachiba mambo, kuchiba kwami kwa kine, mambo kechi nji bunke ne, bino Batata bantumine baji ne amiwa.+ 17 Kabiji mu Mizhilo yenu mwanembwa’mba: ‘Kushimuna kwa bantu babiji ko kwa kine.’+ 18 Amiwa neshimuna ami mwine, ne Batata bantumine nabo banshimuna.”+ 19 Kepo bamushikishe’mba: “Nanchi Bashobe bekala pi?” Yesu wibakumbwile’mba: “Anweba kechi mwangyuka amiwa nangwa Batata ne.+ Mambo umvwe mwangyuka inge mwayuka ne Batata.”+ 20 Waambile bino byambo mu kibamba mwajinga bilambwilo+ kimye kyo afunjishenga mu nzubo ya Lesa. Bino kafwako nangwa umo wamukwachile ne, mambo kimye kyanji kyaji kikyangye kufika.+
21 Onkao mambo, wibambijile jibiji amba: “Amiwa mbena kuya kabiji mukankeba, bino anweba mukafwilatu mu bundengamambo bwenu.+ Akwa ko mbena kuya kechi mwakonsha kwiyako ne.”+ 22 Kepo Bayudea batatwile kushikisha’mba: “Nanchi ukeba kwiipaya aye mwine nyi? Mambo ubena kwamba’mba, ‘Akwa ko mbena kuya kechi mwakonsha kwiyako ne.’” 23 Aye wibambijile’mba: “Anweba mwi ba pano panshi; pakuba amiwa nafuma mwiulu.+ Anweba mwi ba pano pa ntanda; pakuba amiwa kechi ne wa pano pa ntanda ne. 24 O ene mambo o naji kwimwambila namba: Anweba mukafwilatu mu bundengamambo bwenu. Mambo inge mwabula kwitabila’mba yami iye, mukafwilatu mu bundengamambo bwenu.” 25 Onkao mambo, batatwile kumushikisha’mba: “Nanchi yobe ñanyi?” Yesu wibakumbwile’mba: “Mambo ka o mbena kutayila ne kimye na kwisamba ne anweba? 26 Nji na bintu byavula bya kwimwambila ne bya kwimuzhachisha. Pakuba aye wantumine ye wa kine, ne bintu byonka byo naumvwine kwi aye byo byo ñamba ku ba pano pa ntanda.”+ 27 Bino abo kechi bakwatakenye amba waambilenga pe Shanji kwi abo ne. 28 Yesu wibambijile’mba: “Byo mukamwimika Mwana muntu,+ po po mukayuka’mba yami iye,+ ne kuba’mba kechi neubila bintu ami mwine ne;+ pakuba monka mwamfunjishishe Batata, mo mo ñambila bino bintu. 29 Kabiji awa wantumine uji ne amiwa; kechi wanshile bunke ne, mambo nguba bintu bimutokesha ku muchima.”+ 30 Byo aambilenga bino bintu, bavula bamwitabijile.
31 Kabiji Yesu waambijile Bayudea bamwitabijile’mba: “Umvwe saka mulama byambo byami, ko kuba’mba mwi baana bami ba bwanga, 32 kabiji mukayuka bukine,+ ne bukine bukemukasulula.”+ 33 Abo bamukumbwile’mba: “Atweba twi baana ba kwa Abalahama kabiji tukyangye kwikalapo bazha ku muntu nangwa umo ne. Pano waamba byepi amba, ‘Mukakasuluka’?” 34 Yesu wibakumbwile’mba: “Kinetu nemwambila namba, yense ulenga mambo ye muzha wa bundengamambo.+ 35 Kabiji muzha kechi wikala myaka ne myaka mu nzubo ya nkambo yanji ne; mwana ye wikalamo myaka ne myaka. 36 Onkao mambo, inge Mwana wimukasulula, kine mukakasuluka. 37 Nayuka namba mwi baana ba kwa Abalahama. Bino mubena kukeba kungipaya, mambo kechi mwaitabila byo mfunjisha ne. 38 Bintu byonka byo namwene kwi Batata byo byo ñamba,+ bino anweba muba bintu byo mwaumvwine kwi shenu.” 39 Abo bamukumbwile’mba: “Abalahama ye shetu.” Yesu wibambijile’mba: “Umvwe mwajinga baana ba kwa Abalahama,+ inge muba mingilo ya kwa Abalahama. 40 Bino anweba mubena kukeba kungipaya, amiwa muntu wimubuula bukine bo naumvwine kwi Lesa.+ Abalahama kechi waubile kino ne. 41 Anweba muba mingilo ya shenu.” Abo bamwambijile’mba: “Atweba kechi twasemekelwe mu bulalelale* ne; tuji na Shetu umo, Lesa.”
42 Yesu wibambijile’mba: “Umvwe Lesa wajinga Shenu, inge mwantemwa,+ mambo amiwa nafumine kwi Lesa kabiji nji pano. Kechi neishijile ami mwine ne, bino aye ye wantumine.+ 43 Mambo ka o mwabujila kukwatakanya kyo mbena kwambapo? Mambo kechi mubena kumvwa byambo byami ne. 44 Anweba mwafuma kwi shenu Diabola, kabiji mukebesha kuba bintu bisaka shenu.+ Aye wajinga mbanzhi byo atatwile*+ kwenda mu mashinda anji atama, kabiji kechi watwajijile kwikala mu bukine ne, mambo bukine kechi buji mwi aye ne. Umvwe waamba bubela, wamba bifuma mu muchima wanji mwine, mambo aye ye wa bubela kabiji ye shanja bubela.+ 45 Mambo amiwa ñamba bukine, ne anweba kechi mungitabila ne. 46 Ñanyi mwi anweba wakonsha kunzhachisha kuba’mba nalenga mambo? Umvwe ñamba bukine, mambo ka o mubujila kungitabila? 47 Awa wafuma kwi Lesa, umvwa byamba Lesa.+ O ene mambo o mubujila kumvwa, mambo kechi mwafuma kwi Lesa ne.”+
48 Bayudea bamushikishe’mba: “Nanchi kechi twaamba kine amba, ‘Obewa wi mwina Samaliya+ kabiji uji na ndemona’ nenyi?”+ 49 Yesu wibakumbwile’mba: “Amiwa kechi nji na ndemona ne, bino nemeka Batata, pakuba anweba mumpelula. 50 Bino amiwa kechi mbena kwitumbijika ne;+ paji ubena kukeba kutumbijikwa ne kuchiba mambo. 51 Kinetu nemwambila namba, umvwe muntu walama byambo byami, kechi ukafwa ne.”+ 52 Bayudea bamwambijile’mba: “Pano po po twayuka’mba uji na ndemona. Abalahama wafwile, ne bangauzhi nabo, bino ubena kwamba’mba, ‘Umvwe muntu walama byambo byami, kechi ukafwa ne.’ 53 Nanchi obewa wakila shetu Abalahama wafwile nyi? Bangauzhi nabo bafwile. Nanchi obewa witela’mba wi ñanyi?” 54 Yesu wakumbwile’mba: “Umvwe netumbijika ami mwine, ko kuba’mba kwitumbijika kwami kwatu. Batata bo bantumbijika,+ bonka bo mutela’mba ye Lesa wenu. 55 Bino anweba kechi mwibayuka ne,+ pakuba amiwa nebayuka.+ Kabiji inge naamba’mba kechi nebayuka ne, ko kuba’mba nsakwikala wa bubela nobe anweba. Bino amiwa nebayuka kabiji nalama byambo byabo. 56 Abalahama shenu wasekejile bingi pa kuketekela kumona juba jami, kabiji wijimwene ne kusekela.”+ 57 Kepo Bayudea bamushikishe’mba: “Obewa ukyangye ne kufikizha myaka 50, nga Abalahama wamumwene byepi?” 58 Yesu wibambijile’mba: “Kinetu nemwambila namba, Abalahama saka akyangye kusemwa, amiwa najinga konka.”+ 59 Onkao mambo, batolele mabwe amba bamwase, bino Yesu wafyamine ne kulupukamo mu nzubo ya Lesa.
9 Byo apichilenga, wamwene mwanamulume wasemekelwetu mpofu. 2 Baana banji ba bwanga bamwipwizhe’mba: “Labi,+ ñanyi walengele mambo, uno muntu nyi, inyi bansemi banji pa kuba’mba asemwetu mpofu?” 3 Yesu wakumbwile’mba: “Uno muntu nangwa bansemi banji kechi bo balengele mambo ne, bino kino kyamwekele pa kuba’mba mingilo ya Lesa imwekele mwi aye.+ 4 Twafwainwa kwingila mingilo ya yewa wantumine juba byo jijiko;+ bufuku bubena kwiya kimye muntu nangwa umo kyo akabula kwingila. 5 Byo nkiji pano pa ntanda, amiwa nekyeya kya pano pa ntanda.”+ 6 Byo apwishishe kwamba bino bintu, washipijile mate panshi, ne kukanda mateshi kabiji wiashingile mu meso a uno mwanamulume+ 7 ne kumwambila’mba: “Yanga ukowe mu kizhiba kya Shiloma” (kituntululwa’mba “Mema o Batuma”). Byonkabyo, wayile na kowa kabiji wabwelele saka amona.+
8 Bo aikalanga nabo kipikipi ne boba bamumonanga byo alombalombanga bintu baipwizhe’mba: “Nanchi uno muntu kechi ye yewa waikalanga na kulombalomba bintu nenyi?” 9 Bamo baambilenga’mba: “Ye iye.” Bakwabo nabo amba: “Ine, wamupashatu.” Uno mwanamulume waambile’mba: “Yami iye.” 10 Ponkapo bamwipuzhe’mba: “Nanchi meso obe bealabisha byepi?” 11 Aye wibakumbwile’mba: “Muntu ye batela’mba Yesu waji kukanda mateshi ne kunshingao mu meso ne kuñambila’mba, ‘Yanga ku Shiloma ukowe.’+ Byonkabyo, naji kuya na kowa, natendeka ne kumona.” 12 Ponkapo bamwipwizhe’mba: “Nanchi uno muntu uji kwepi?” Aye waambile’mba: “Kechi nayuka ne.”
13 Uno mwanamulume wajinga mpofu bamutwajile ku Bafaliseo. 14 Pajinga pa juba ja Sabado+ Yesu po akanjile mateshi ne kulabisha meso anji.+ 15 Onkao mambo, pa kikye kimye Bafaliseo nabo bamwipwizhe byo atendekele kumona. Wibambijile’mba: “Waji kunshinga mateshi mu meso, ne amiwa naji kuya na kowa, kabiji mbena kumona.” 16 Bafaliseo bamo batendekele kwamba’mba: “Uno muntu kechi wafuma kwi Lesa ne, mambo kechi ulama juba ja Sabado ne.”+ Bakwabo baambilenga’mba: “Nanchi ndengamambo wakonsha kuba biyukilo bya uno mutundu nyi?”+ Onkao mambo, baabenejilemo bene na bene.+ 17 Kabiji bamwipwizhe jibiji uno mpofu amba: “Nanchi usakwambapo amba ka pa uno muntu wakulabisha meso?” Aye wibakumbwile’mba: “Aye ye ngauzhi.”
18 Nangwa byonkabyo, Bayudea kechi baitabile’mba uno mwanamulume wajinga mpofu kabiji amba watendekele kumona ne, poso byo baichile bansemi banji. 19 Kabiji bebepwizhe’mba: “Nanchi uno ye mwanenu ye mwamba’mba wasemekelwetu mpofu nyi? Pano watendeka byepi kumona?” 20 Bansemi banji bakumbwile’mba: “Twayuka’mba, uno mwanetu kabiji wasemekelwetu mpofu. 21 Bino kechi twayuka byo atendeka kumona ne; nangwa wamulabisha meso kechi twamuyuka ne. Mwipuzhai. Wakoma. Wafwainwa kwiambila mwine.” 22 Bansemi banji baambile bino mambo bachiinenga Bayudea,+ mambo Bayudea baumvwañene kuba’mba yense ukamwitabila’mba ye Kilishitu, bakamupanga mu nshinagoga.+ 23 Kino kyo kyalengejile bansemi banji kwamba’mba: “Wakoma. Mwipuzhai.”
24 Onkao mambo, bamwichile jibiji uno mwanamulume wajinga mpofu ne kumwambila’mba: “Pana lukumo kwi Lesa; twayuka namba uno muntu ndengamambo.” 25 Aye wakumbwile’mba: “Inge aye ndengamambo amiwa kechi nayuka ne. Kyo nayukakotu ke kya kuba’mba, najinga mpofu pano luno mbena kumona.” 26 Kepo bamwipwizhe’mba: “Ñanyi kintu kyo aji kukuba? Waji kukulabisha byepi meso?” 27 Aye wibakumbwile’mba: “Naji kwimubuula kala, bino kechi mwaji kumvwa ne. Mambo ka o mubena kukebela kumvwa jibiji? Nanchi ne anweba mubena kukeba kwikala baana banji ba bwanga nyi?” 28 Na mambo a kino, bamunenene ne kumwambila’mba: “Obewa wi mwana wa bwanga wa yewa muntu, pakuba atweba twi baana ba bwanga ba kwa Mosesa. 29 Twayuka namba Lesa waambanga ne Mosesa; pakuba uno muntu kechi twayuka ko afuma ne.” 30 Awa ye balabishe meso wibakumbwile’mba: “Kine kino ke kya kukumya bingi kuba’mba anweba kechi mwayuka kwafuma uno muntu ne, bino aye saka andabisha ne meso. 31 Twayuka’mba Lesa kechi umvwa milombelo ya bandengamambo ne,+ bino umvwe muntu wakamwa Lesa ne kuba kyaswa muchima wanji, aye ye ye omvwa.+ 32 Kufumatu kala kechi kyaumvwanyikapo amba muntu walabisha meso a muntu wasemekelwetu mpofu ne. 33 Umvwe uno muntu kechi wafumine kwi Lesa ne, kafwako kintu nangwa kimo kyo akonsha kuba ne.”+ 34 Abo bamukumbwile’mba: “Obewa wasemekelwe mu bundengamambo, kabiji witufunjishenga nyi?” Ne abo bamupangilemo!+
35 Yesu waumvwine’mba bamupanga, byo amutaaine wamwipwizhe’mba: “Nanchi obewa waitabila mu Mwana muntu nyi?” 36 Uno muntu wakumbwile’mba: “Nkambo, nanchi uno ye ñanyi, pa kuba’mba namwitabile?” 37 Yesu wamwambijile’mba: “Obewa wamumona kala, yenka ye ubena kwisamba nanji.” 38 Aye waambile’mba: “Nkambo, amiwa namwitabila.” Kabiji wamulambijile.* 39 Kabiji Yesu waambile’mba: “Na mambo a kuno kuchiba mambo, kyo kyo naishijile pano pa ntanda, kuba’mba aba babula kumona bamone+ kabiji aba bamona baluke ke bampofu.”+ 40 Aba Bafaliseo bajingapo baumvwine bino, kabiji bamwipwizhe’mba: “Nanchi ne atweba twi bampofu nyi?” 41 Yesu wibakumbwile’mba: “Umvwe mwajinga bampofu, inge bundengamambo mufwabo. Pano mwaamba’mba, ‘Tumona.’ Ne bundengamambo bwenu kechi bukapwa ne.”+
10 “Kinetu nemwambila namba, awa ubula kutwelela pa kibelo kya kipaka kya mikooko bino ukanjijila pangi, ye ngivi kabiji ye kapondo.+ 2 Pakuba awa utwelela pa kibelo ye kafunga wa mikooko.+ 3 Ulama kibelo umushinkwilako+ kabiji mikooko yumvwa jiwi janji.+ Wita mikooko yanji pa mazhina ne kwiilupwila pangye ya kipaka. 4 Inge wiilupula mikooko yanji yonse pangye, utangilako ne mikooko imulondela, mambo yayuka jiwi janji. 5 Mwenyi kechi ikamulondela ne, bino ikamunyema mambo kechi yayuka jiwi ja benyi ne.” 6 Yesu wibabuujile kino kishimpi, bino abo kechi bakwatankenye bintu byo ebambijilenga ne.
7 Onkao mambo, Yesu waambile jibiji amba: “Kinetu nemwambila namba, amiwa nekibelo patwelela mikooko.+ 8 Aba bonse baiya na kwibepekezha kwikala bakafunga bakine, bo bangivi kabiji bo bakapondo; ne mikooko kechi ibomvwina ne. 9 Amiwa nekibelo; yense utwela kupichila mwi amiwa ukapuluka, kabiji ukatwela ne kulupuka ne kutaana munyemvu.+ 10 Ngivi kechi wiyatu ne, poso kwiba, kwipaya ne konauna.+ Amiwa naiya kuba’mba bamone bumi ne kwikala na bumi bwa myaka. 11 Amiwa nekafunga wawama;+ kafunga wawama welela mikooko yanji bumi* bwanji.+ 12 Muntu ye batwezha mwingilo wa kulama mikooko, wabula kafunga kabiji wabula mwina mikooko, pa kumona musuka na kwiya wiisha mikooko ne kunyema ne musuka ukwatapo imo ne kwiipalañanya— 13 mambo bamutwezhatu mwingilo kabiji kechi uta muchima mikooko ne. 14 Amiwa nekafunga wawama. Mikooko yami neiyuka, ne ayo yangyuka,+ 15 byonkatu Batata byo bangyuka, ne amiwa nebayuka Batata;+ kabiji neyelela mikooko bumi* bwami.+
16 “Kabiji nji na mikooko ikwabo, yabula ya mu kino kipaka;+ ino nayo nafwainwa kwiileta, ne ayo ikomvwa jiwi jami, kabiji ikekala jitanga jimo ne kafunga umo.+ 17 O ene mambo Batata o bantemenwa,+ mambo mpana bumi* bwami,+ kuba’mba nkebutambule jibiji. 18 Kafwako muntu ukañangatabo ne, pakuba nebupana ami mwine. Nji na luusa lwa kwibupana, kabiji nji ne na luusa lwa kwibutambula jibiji.+ Uno mukambizho namutambwile kwi Batata.”
19 Kabiji Bayudea baabenejilemo jibiji+ na mambo a bino byambo. 20 Bavula baambilenga’mba: “Uno muntu uji na ndemona kabiji wakonya. Mambo ka o mubena kumutelekela?” 21 Bakwabo baambilenga’mba: “Bino kechi byambo bya muntu uji na ndemona ne. Nanchi ndemona wakonsha kulabisha meso a bampofu nyi?”
22 Pa kyokya kimye mu Yelusalema mwajinga Kijiilo kya Kuzhijika. Kyajinga kimye kya mashika, 23 ne Yesu wapitañenenga mu nzubo ya Lesa mu bukonde bwa kwa Solomone.+ 24 Kepo Bayudea bamubungile ne kumushikisha’mba: “Mambo ka o wabujila kwitubuula patoka? Umvwe yobe Kilishitu, tubuule patoka.” 25 Yesu wibakumbwile’mba: “Nemubuujile anweba, bino kechi mwaitabila ne. Mingilo yo mbena kwingila mu jizhina ja Batata, yo inshimuna.+ 26 Bino anweba kechi mwaitabila ne, mambo kechi mwi mikooko yami ne.+ 27 Mikooko yami yumvwa jiwi jami, ne ayo neiyuka kabiji indondela.+ 28 Nkeipa bumi bwa myaka ne myaka,+ ne ayo kechi bakeyonauna ne, kabiji kafwako ukeinsompola mu kuboko kwami ne.+ 29 Mikooko yo bampa Batata yanema bingi kukila bintu bikwabo kabiji kafwako ukeisompola mu kuboko kwa Batata ne.+ 30 Amiwa ne Batata twi umo.”*+
31 Kabiji Bayudea batolele mabwe jikwabo amba bamwase. 32 Yesu wibambijile’mba: “Naubile mingilo yavula yawama kufuma kwi Batata. Nanchi pa yoya mingilo wepi ye mubena kukeba kungashilapo mabwe?” 33 Bayudea bamukumbwile’mba: “Tubena kukwasa mabwe kechi na mambo a mingilo yawama ne, bino na mambo a kwamba mwenga,+ mambo obewa nangwa kya kuba wi muntu, witela’mba wi lesa.” 34 Yesu wibashikishe’mba: “Nanchi mu Mizhilo yenu, Lesa kechi waambile’mba, ‘Anweba mwi balesa’* nenyi?+ 35 Inge aye wibatelele’mba “balesa”+ aba bo bazhachisha ku mambo a Lesa, bino kwa kubula kupimpula byaamba kinembelo ne, 36 bino amiwa ye bazhijika Batata ne kutuma pano pa ntanda, mwakonsha kuñambila byepi amba, ‘Ubena kwamba mwenga,’ byo naamba namba, ‘Yami Mwana Lesa’?+ 37 Umvwe kechi mbena kwingila mingilo ya Batata ne, kungitabila ne. 38 Pakuba umvwe yo mbena kwingila, nangwa kya kuba kechi mwangitabila ne,+ itabilaiko mingilo, pa kuba’mba muyuke ne kuyukisha’mba Batata baji ne amiwa, ne amiwa nji ne Batata.”+ 39 Onkao mambo, abo bakebele kumukwata jibiji, bino aye wibanyemene.
40 Kabiji wayile jibiji ku bushiya bwa Yodano ku mpunzha Yoano ko abatizhanga kala,+ ne kwikala konka. 41 Kabiji bantu bavula baishile kwi aye batendeka ne kwamba’mba: “Yoano kechi waubilepo kiyukilo kya kukumya nangwa kimo ne, bino byonse Yoano byo aambile pa uno muntu, byajinga bya kine.”+ 42 Kabiji bavula konkakwa bamwitabijile.
11 Mwanamulume umo wa jizhina ja Lazalasa wakolelwe; wajinga wa ku Betani, mu muzhi mwaikalanga Maliya ne Mata banyenga yanji.+ 2 Uno Maliya ye waitulwijile manyi anunka bulongo pe Nkambo ne kumushimuna ku maulu na nsuki yanji;+ ye wajinga na nkasanji* wakolelwenga aye Lazalasa. 3 Onkao mambo, banyenga yanji batumine mawi kwi aye amba: “Nkambo, awa ye mwatemwa, wakolwa.” 4 Yesu byo aumvwine kino, waambile’mba: “Kino kikola kechi kya lufu ne, bino kyo kya lukumo lwa Lesa,+ kuba’mba Mwana Lesa atumbijikilwemo.”
5 Yesu watemenwe bingi Mata, Maliya ne Lazalasa. 6 Nangwa byonkabyo, byo aumvwine’mba Lazalasa wakolwa, waikele konka ko ajinga moba abiji. 7 Kepo aambijile baana banji ba bwanga amba: “Twayai tubwele jibiji ku Yudea.” 8 Baana banji ba bwanga bamushikishe’mba: “Labi,+ katatakatu papo bena Yudea basakile kwimwasa mabwe,+ kabiji mukeba kubwelako jibiji nyi?” 9 Yesu wakumbwile’mba: “Nanchi kechi kuji maola 12 a mute nenyi?+ Umvwe muntu waenda mu mute, kechi wituntula ku kintu nangwa kimo ne, mambo umona kyeya kya ba pano pa ntanda. 10 Bino umvwe muntu waenda bufuku, wituntula, mambo mwi aye kechi muji kyeya ne.”
11 Byo aambile bino bintu, wanungilepo’mba: “Lazalasa mulunda netu, walaala tulo,+ bino mbena kuya konkakwa na kumubusha.” 12 Baana banji ba bwanga bamwambijile’mba: “Nkambo, umvwe walaalatu tulo, ko kuba’mba usakwikalatu bulongo.” 13 Nangwa byonkabyo, Yesu waambilenga pa lufu lwa kwa Lazalasa. Bino abo balangulukilenga’mba ubena kwamba pa kulaalatu tulo. 14 Onkao mambo, pa kyonkakya kimye, Yesu wibambijile’mba: “Lazalasa wafwa,+ 15 ne amiwa nasekela bingi na mambo a anweba kuba’mba kechi najingako ne, pa kuba’mba anweba mwitabile. Bino twayai tuye ko aji.” 16 Byonkabyo, Tomase watelwanga’mba Mpasa, waambijile bakwabo baana ba bwanga amba: “Ne atweba twayai tuyeko, kuba’mba tukafwile nanji pamo.”+
17 Yesu byo afikile, wataaine Lazalasa waikalamo kala moba ana mu kilende.* 18 Kabiji muzhi wa Betani wajingatu kwipi na Yelusalema pajinga mamailoshi* nobe abiji. 19 Kabiji Bayudea bavula baishile kwi Mata ne kwi Maliya na kwibatekenesha na mambo a nkasabo.* 20 Mata byo aumvwine’mba Yesu ubena kwiya, wamutundaijile; bino Maliya+ washajile pa nzubo. 21 Kepo Mata aambijile Yesu amba: “Nkambo, umvwe mwajinga kuno, nkasami* inge kechi wafwa ne. 22 Nangwatu lonka luno nayuka namba byonse byo musakulomba kwi Lesa, usakwimupabyo.” 23 Yesu wamwambijile Mata amba: “Nkasobe* usakusanguka.” 24 Mata wamwambijile’mba: “Nayuka namba ukasanguka+ mu juba jikapelako.” 25 Yesu wamwambijile’mba: “Amiwa yami lusanguko ne bumi.+ Awa wangitabila, nangwa wafwa, ukasanguka; 26 kabiji yense uji na bumi ne kungitabila kechi ukafwa ne.+ Nanchi waitabila kino nyi?” 27 Mata wamwambijile’mba: “Ee, Nkambo, amiwa naitabila kuba’mba yenu Kilishitu, Mwana Lesa, yenka wafwainwe kwiya pano pa ntanda.” 28 Byo aambile bino, wafumineko ne kuya na kwita Maliya nkasanji ne kumwambila ku mbaji amba: “Mufunjishi+ waiya kabiji ubena kukwita.” 29 Maliya, byo aumvwine kino, ponkapotu waimene ne kuya ko ajinga.
30 Yesu saka akyangye kwiya mu uno muzhi, bino wakijinga konkakwa ko kwamutaaine Mata. 31 Bayudea bajinga ne Maliya mu nzubo na kumutekenesha byo bamwene waimana bukiji ne kulupukamo, bamulondejile, mambo balangulukilenga’mba waya ku kilende*+ na kujila. 32 Maliya byo afikile kwajinga Yesu ne byo amumwene, waponejile ku maulu anji ne kumwambila’mba: “Nkambo, umvwe mwajinga kuno, nkasami* inge kechi wafwa ne.” 33 Yesu byo amumwene na kujila ne Bayudea baishile nanji saka bajila, waumvwine bingi bulanda kabiji kyamukolele bingi ku muchima. 34 Aye washikishe’mba: “Nanchi mwa mubika kwepi?” Abo bamwambijile’mba: “Nkambo, twayai mukamone.” 35 Yesu wajijile ne mipolo.+ 36 Ponkapo Bayudea batatwile kwamba’mba: “Akitalai byo amutemenwe!” 37 Bino bamo baambile’mba: “Nanchi uno muntu walabishe meso a yewa mwanamulume wajinga mpofu,+ kechi wafwainwe kuzhikijila uno muntu kuba’mba abule kufwa nenyi?”
38 Yesu saka akiji na bulanda, wayile ku kilende.* Kino kilende kyajinga mu jiyengo ko babikile jibwe. 39 Yesu waambile’mba: “Jalumunaiko jibwe.” Mata, nyenga ya wafwile, wamwambijile’mba: “Nkambo, pa kino kimye wafwainwa ubena kununka, mambo papita moba ana.” 40 Yesu wamwambijile’mba: “Nanchi kechi naji kukubuula namba umvwe waitabila usakumona lukumo lwa Lesa nenyi?”+ 41 Onkao mambo, baalumwineko jibwe. Kepo Yesu atajile mwiulu+ ne kwamba’mba: “Tata, nemusanchila bingi pa kuñumvwa. 42 Nayuka namba, kimye kyonse muñumvwa; pakuba naamba bino na mambo a jino jibumba jaimana pano, pa kuba’mba betabile’mba mwantumine.”+ 43 Kabiji byo apwishishe kwamba bino bintu, wabijikile na jiwi ja peulu amba: “Lazalasa, lupukamo!”+ 44 Ponkapo uno muntu wafwile walupukilemo saka aji na bisapi byo bamupombele ku maulu ne ku maboko, ne pa meso bakashilepo bisapi. Yesu wibambijile’mba: “Mupombololai ayenga.”
45 Onkao mambo, Bayudea bavula baishile kwi Maliya ne kumona kyaubile Yesu, bamwitabijile,+ 46 bino bamo bayile ku Bafaliseo ne kwibabuula bintu byaubile Yesu. 47 Ponkapo bañanga bakatampe ne Bafaliseo bakonkenye pamo kije kya Saniedilini ne kutatula kwamba’mba: “Tusakuba byepi, mambo uno muntu ubena kuba bya kukumya byavula?+ 48 Umvwe tumuleke, bantu bonse basakumwitabila kabiji bena Loma bakeya ne kwitwangata mpunzha* yetu ne kisaka kyetu.” 49 Bino umo mwi abo, aye Kaifasa,+ wajinga ñanga mwine mukatampe mu yewa mwaka, wibambijile’mba: “Anweba kafwako nangwa kimo kyo mwayuka ne, 50 kabiji kechi mwayuka’mba kyawama muntu umo kufwila bantu kukila kisaka kyonse konaika ne.” 51 Nangwa byonkabyo, kino kechi wikyambile na milanguluko yanji mwine ne, bino na mambo a kuba wajinga ñanga mwine mukatampe mu yewa mwaka, waawile kuba’mba Yesu ukafwila kyokya kisaka, 52 kabiji kechi kyokya kisaka kyonkatu ne, bino ne kuba’mba akakonkanye pamo baana ba Lesa bapalañenejilemo. 53 Onkao mambo, kufumatu joja juba baumvwañene kumwipaya.
54 Byonkabyo, Yesu kechi wapitañenenga patoka mu Bayudea ne, bino wafumineko ne kuya mu nyaunda yajinga kwipi na kiselebwa, mu muzhi watelwanga’mba Efelaimu,+ kabiji waikele konkakwa na baana banji ba bwanga. 55 Kijiilo kya Lupitailo+ kya Bayudea kyajinga pepi, ne bantu bavula ba mu mizhi bayile ku Yelusalema, Kijiilo kya Lupitailo saka kikyangye kufika kuba’mba betokesheshe jimo abo bene mwayila mizhilo. 56 Bamukebelenga Yesu kabiji beambijilenga mulwabo byo bajinga mu nzubo ya Lesa amba: “Mwalangulukapo amba ka? Nanchi kechi ukeyako ku kijiilo nenyi?” 57 Bino bañanga bakatampe ne Bafaliseo bakambizhe kuba’mba yense usakuyuka kuji Yesu, wafwainwa kwibabuula kuba’mba bakamukwate.
12 Byo kwashajile moba atanu na jimo Kijiilo kya Lupitailo saka kikyangye kufika, Yesu wafikile ku Betani, kwajinga Lazalasa,+ Yesu ye asangwile mu bafu. 2 Onkao mambo, bamutekejile kijiilo konkakwa, kabiji Mata ye wanengezhezhenga,+ bino Lazalasa wajinga pa boba bajiilenga* ne aye. 3 Kepo Maliya ashikwile paunji* umo wa manyi anunka bulongo a nada wa kine, apotwa mali avula, ne kwietulwila ku maulu a kwa Yesu ne kumushimuna ku maulu na nsuki yanji. Kabiji mu nzubo mwakutankene bwema bwa ano manyi anunka bulongo.+ 4 Bino Yudasa Isakaliota+ mwananji wa bwanga, yenka wajinga pepi kumusolola, wamwipwizhe’mba: 5 “Mambo ka ano manyi anunka bulongo kyo baji kubujila kwiapotesha mandenali* 300 ne kwiapana ku bayanji?” 6 Aye waipwizhe bino, kechi na mambo a kuba’mba watele muchima bayanji ne, bino ke na mambo a kuba wajinga ngivi, kabiji ye walamanga kabokoshi ka mali kabiji waibangamo mali o babikangamo. 7 Kepo Yesu aambile’mba: “Mulekai uno mwanamukazhi, pa kuba’mba obe kino kintu mu kunengezha bya kuzhiika mubiji wami.+ 8 Mambo bayanji mwikala nabo kimye kyonse,+ pakuba amiwa kechi nkekalanga nenu moba onse ne.”+
9 Pa kikye kimye, jibumba jikatampe ja Bayudea jayukile’mba wajinga konkakwa, kabiji jayile kechi na mambotu a kwa Yesu ne, bino ne na kumona Lazalasa ye asangwile mu bafu.+ 10 Ponkapo bañanga bakatampe baumvwañene kuba’mba bepaye ne Lazalasa, 11 mambo aye ye walengejile Bayudea bavula kuya konkakwa ne kwitabila Yesu.+
12 Juba jalondejilepo, jibumba jikatampe jaishile ku kijiilo, jaumvwine’mba Yesu ubena kwiya ku Yelusalema. 13 Onkao mambo, bantu batolele mapambo a bisonga ne kuya na kumutundaila saka babijika’mba: “Twalomba namba mupulushai! Watokwa awa wiya mu jizhina ja Yehoba,*+ Mfumu wa bena Isalela!”+ 14 Yesu byo ataaine mwana mbongolo, waikelepo,+ byonka byo kyanembwa’mba: 15 “Kwakamwa ne, obewa mwana wa mukazhi Ziona. Tala! Mfumu obe ubena kwiya, saka aikala pa mwana mbongolo mulume.”+ 16 Patanshi baana banji ba bwanga kechi bakwatakenye bino bintu ne, bino Yesu byo atumbijikilwe,+ po po bavulukile kuba’mba bino bintu byanembelwe pe aye, ne kuba’mba baubile bino bintu kwi aye.+
17 Kabiji bantu bamo bajinga ne aye byo aichile Lazalasa ku kilende*+ ne kumusangula mu bafu, bashimwinenga.+ 18 Kabiji o ene mambo jibumba o jaishijile na kumutundaila, mambo baumvwine’mba waubile kino kya kukumya. 19 Onkao mambo, Bafaliseo beambijilenga bene na bene amba: “Kafwako ne kyo tubena kuba ne. Mambo ba pano pa ntanda bonse babena kumulondela.”+
20 Kabiji kwajinga Bangiliki bamo baishile ku kijiilo na kupopwela Lesa. 21 Bano basolomokele Filipa,+ wafumine ku Beteseda wa mu Ngalilea ne kumwambila’mba: “Mwane, tubena kukeba kumona Yesu.” 22 Filipa waishile ne kubuula Andeleo. Kepo Andeleo ne Filipa bayile na kubuula Yesu.
23 Bino Yesu wibakumbwile’mba: “Kimye kyafika kya kuba’mba Mwana muntu atumbijikwe.+ 24 Kinetu nemwambila namba, umvwe lukunwa wa wichi waponena panshi ne kufwa ne, wikalatu lukunwa umo; pakuba umvwe wafwa,+ upanga bipangwa byavula. 25 Awa watemwa bumi* bwanji ukebonauna, pakuba awa washikwa bumi*+ bwanji pano pa ntanda ukebulama ne kwikala na bumi bwa myaka ne myaka.+ 26 Umvwe muntu ukeba kuñingijila amiwa, andondelenga, kabiji akwa ko nkekala ne wa mwingilo wami ko ko akekala.+ Kabiji umvwe muntu ukeba kuñingijila, Batata bakamunemeka. 27 Pano muchima* wami wankatazha bingi,+ nanchi nsakwamba’mba ka? Tata, mpulushai ku kino kimye.+ Pano bino, kino kyo kyo naishila ku kino kimye. 28 Tata tumbijikai jizhina jenu.” Kepo jiwi+ jafumine mwiulu amba: “Amiwa ne jitumbijika kabiji nkejitumbijika jibiji.”+
29 Jibumba jaimene kokwa jaumvwine jiwi, kabiji jatendekele kwamba’mba, mvula waluluma. Bakwabo baambilenga’mba: “Malaika waamba nanji.” 30 Yesu wakumbwile’mba: “Jino jiwi jaumvwanyika kechi na mambo a amiwa ne, bino na mambo a anweba. 31 Lesa ubena kwipazhachisha pano pa ntanda; pano mfumu wa pano pa ntanda+ bakamupangapo.+ 32 Kabiji umvwe amiwa bakañimike pano pa ntanda,+ nkakokela bantu bapusana pusana ko nji.” 33 Bino byambo wibyambilenga kulumbulula musango wa lufu lo ajinga pepi kufwa.+ 34 Ponkapo jibumba jamukumbwile’mba: “Twaumvwine mu Mizhilo kuba’mba Kilishitu ukekala myaka ne myaka;+ pano obewa ubena kwamba byepi kuba’mba Mwana muntu bakamwimika?+ Nanchi uno Mwana muntu ye ñanyi?” 35 Onkao mambo, Yesu wibambijile’mba: “Kyeya musakwikala nakyo mu kakimye kacheche. Endainga byo mukiji na kyeya pa kuba’mba mfishi ibule kwimushinda; awa wenda mu mfishi kechi uyuka ko abena kuya ne.+ 36 Byo mukiji na kyeya, ikalai na lwitabilo mu kyeya, kuba’mba mwikale baana ba kyeya.”+
Yesu byo aambile bino bintu, wafumineko ko baji ne kufyama. 37 Nangwa kya kuba waubile biyukilo byavula saka bamonako, abo kechi bamwitabijile ne, 38 pa kuba’mba byambo byaambile ngauzhi Isaya bifike bya kuba’mba: “Yehoba,* bañanyi baitabila mu kintu kyo baumvwine kwi atweba?*+ Kabiji ñanyi+ ye bamwesheshe kuboko kwa Yehoba?”* 39 Kine kintu kyalengejile kuba’mba babule kwitabila, ke kyokya kikwabo Isaya kyo aambile’mba: 40 “Nebapofula meso abo ne kwibakosesha michima yabo, kuba’mba babule kumona na meso abo ne kubula kukwatakanya na michima yabo, ne kubwela kuba’mba nebabuke.”+ 41 Isaya waambile bino bintu mambo wamwene lukumo lwa Kilishitu, kabiji waambile pe aye.+ 42 Nangwa byonkabyo, bantu bavula ne bantangi bamwitabijile,+ bino na mambo a Bafaliseo kechi bamwambilengapo ne, pa kuba’mba babule kwibapanga mu nshinagoga;+ 43 mambo batemenweko lukumo lufuma ku bantu, kukila kukeba lukumo lufuma kwi Lesa.+
44 Bino Yesu wabijikile’mba: “Awa wangitabila amiwa, kechi waitabilatu amiwa yenka ne, bino waitabila ne yewa wantumine;+ 45 kabiji awa wammona, wamona ne yewa wantumine.+ 46 Naiya nobe kyeya pano pa ntanda,+ kuba’mba yense wangitabila abule kwikala mu mfishi.+ 47 Bino umvwe muntu waumvwa byambo byami ne kwibilama ne, kechi namuzhachisha ne; mambo amiwa kechi naishile na kuzhachisha ba pano pa ntanda ne, kana kwibapulusha.+ 48 Yense undengulula amiwa ne kubula kutambula byambo byami, kuji ukamuzhachisha. Byambo byo naamba byo bikamuzhachisha mu juba jikapelako. 49 Mambo kechi naamba milanguluko yami ne, bino Batata bantumine bo bankambizhe byo nafwainwa kubulañana ne kwamba.+ 50 Kabiji nayuka namba mukambizho wabo bo bumi bwa myaka ne myaka.+ Onkao mambo, bintu byo ñamba, nebyambila monka mwambuujile Batata.”+
13 Kijiilo kya Lupitailo saka kikyangye kufika, Yesu byo ayukile’mba kimye kyanji kyafika+ kya kufuma pano pa ntanda ne kubwela kwi Shanji,+ kabiji byo ebatemenwe banji bajinga pano pa ntanda, wibatemenwe kufika ne ku mpelo.+ 2 Kabiji bajiilenga kijiilo kya mabanga, Diabola saka abika kala mu muchima wa kwa Yudasa Isakaliota+ mwana wa kwa Shimona, mulanguluko wa kumusolola.+ 3 Onkao mambo, Yesu byo ayukile’mba Shanji wapana bintu byonse mu maboko anji ne kuba’mba wafumine kwi Lesa kabiji ubena kubwela kwi Lesa,+ 4 waimenepo pa kijiilo kya mabanga ne kuvuula bivwalo byanji bya peulu ne kwibitula pa mbaji. Kabiji byo ashikwile taulo winyingileye mu lubunda.+ 5 Byo aubile kino, wabikile mema mu nsanyi ne kutendeka kovwa ku maulu a baana banji ba bwanga ne kwiashimuna na taulo ye enyingile. 6 Kepo afikile pe Shimona Petelo. Aye wamwipwizhe’mba: “Nkambo, mubena kukeba kungovwa ku maulu nyi?” 7 Yesu wamukumbwile’mba: “Kintu kyo mbena kuba kechi usakwikikwatakanya pa kino kimye ne, bino ukekikwatakanya bino bintu inge byapita.” 8 Petelo wamwambijile’mba: “Kechi musakungovwa ku maulu ne.” Yesu wamukumbwile’mba: “Umvwe mbule kukovwa,+ kechi usakwikala ne amiwa ne.” 9 Shimona Petelo wamwambijile’mba: “Nkambo, kechi mungovwetu ku maulu konka ne, mungovwe ne ku maboko ne ku mutwe.” 10 Yesu wamwambijile’mba: “Awa waowa kala kechi ukebewa kowa ne kukwabo ne, poso ku maulu anji konka, mambo mubiji wanji yense watoka. Ne anweba mwatoka, bino kechi bonsetu ne.” 11 Mambo wayukile usakumusolola.+ Kyo kyo aambijile’mba: “Kechi bonsetu mwatoka ne.”
12 Byo apwishishe kwibovwa ku maulu ne kuvwala bivwalo byanji bya peulu, waikele jibiji ku tebulu ne kwibepuzha’mba: “Nanchi mwakwatakanya kintu kyo nemubila nyi? 13 Anweba muntela’mba, ‘Mufunjishi,’ ne, ‘Nkambo,’ mwamba kine, mambo yami iye.+ 14 Onkao mambo, umvwe amiwa byo nji Nkambo kabiji Mufunjishi, nemovwa ku maulu,+ ne anweba mwafwainwa* kwiovwanga ku maulu anwe bene na bene.+ 15 Mambo nemushila mwa kulondela, byonka byo nauba kwi anweba, ne anweba mwafwainwa kubanga byonka bino.+ 16 Kinetu nemwambila namba, muzha kechi wakila nkambo yanji ne, nangwatu yewa ye batuma kechi wakila yewa wamutuma ne. 17 Umvwe anweba mwibiyuka bino bintu, mwatokwa umvwe mwibyuba.+ 18 Kechi mbena kwamba pe anweba bonse ne; nayuka bami bo nasala kala. Kiji bino amba kinembelo kifike kya kuba’mba:+ ‘Awa wajanga kajo kami waaluka ke mulwanyi wami.’+ 19 Kufuma luno mbena kwimubuujila jimo saka kikyangye kumweka, pa kuba’mba umvwe kyamweka muketabile’mba yami iye.+ 20 Kinetu nemwambila namba, yense utambwila yewa ye natuma, untambwila ne amiwa,+ ne yense untambwila, utambwila ne yewa wantumine.”+
21 Yesu byo apwishishe kwamba bino bintu, muchima wamukatezhe bingi kabiji waambile’mba: “Kine nemwambila namba, umo pe anweba usakunsolola.”+ 22 Baana ba bwanga batendekele kwitala abo bene na bene, mambo kechi bayukile muntu ye aambilengapo ne.+ 23 Mwana wa bwanga umo Yesu ye atemenwe bingi,+ waikele kwipi* ne Yesu. 24 Onkao mambo, Shimona Petelo wamulabwile ne kumwambila’mba: “Tubuule ye abena kwambapo.” 25 Aye wasendalejile pa kyaji kya kwa Yesu ne kumwipuzha’mba: “Nkambo, nanchi ñanyi?”+ 26 Yesu wamukumbwile’mba: “Yenka ye nsakupa shinkwa ye nsakutanta mu nsanyi.”+ Byonkabyo, byo atanchile shinkwa mu nsanyi washikwile ne kupa Yudasa mwana wa kwa Shimona Isakaliota. 27 Yudasa byo atambwile shinkwa, Satana watwelele mwi aye.+ Onkao mambo, Yesu wamwambijile’mba: “Akya kyo ubena kukeba kuba, kyube bukiji.” 28 Nangwa byonkabyo, aba bajinga ku tebulu kechi bayukile ene mambo o amwambijile bino ne. 29 Bamo balangulukilenga’mba, Yudasa byo alamanga kabokoshi ka mali,+ Yesu wamwambila’mba, “Kapote bintu bibena kukebwa bya pa kijiilo,” nangwa’mba akape bayanji bintu. 30 Onkao mambo, byo atambwile kibese kya shinkwa walupukile ponkapotu. Kabiji bwajinga bufuku.+
31 Onkao mambo, byo alupukilemo, Yesu waambile’mba: “Pano Mwana muntu watumbijikwa,+ ne Lesa naye watumbijikwa na mambo a Mwananji. 32 Lesa ukamutumbijika,+ ne aye usakumutumbijika ponkapotu. 33 Anweba baana ba bacheche, nji nenu pa kakimye kacheche. Mukankeba; kabiji byonka byo naambijile Bayudea namba, ‘Akwa ko nkaya kechi mwakonsha kuyako ne,’+ ne anweba byo byo nemwambila. 34 Mbena kwimupa mukambizho mupya, namba mwitemwe anwe bene na bene; byonka byo nemutemwa amiwa,+ ne anweba mwitemwe anwe bene na bene.+ 35 Kino kyo kyo bakayukilako bonse amba mwi baana bami ba bwanga, umvwe mwitemwa anwe bene na bene.”+
36 Shimona Petelo wamwipwizhe’mba: “Nkambo, kwepi ko mubena kuya?” Yesu wamukumbwile’mba: “Akwa ko mbena kuya obewa kechi wakonsha kundondela luno ne, bino ukalondela kimye kikwabo.”+ 37 Petelo wamwipwizhe’mba: “Nkambo, mambo ka o nakonsha kubujila kwimulondela lonka luno? Amiwa nkemupaina bumi* bwami.”+ 38 Yesu wamwipwizhe’mba: “Nanchi wakonsha kumpaina bumi* bobe nyi? Kinetu nakwambila namba, Shikombwe saka akyangye kukokola, usakunkana jisatu.”+
14 “Kange mulukushe michima yenu ne.+ Mwitabilai Lesa;+ ngitabilai ne amiwa. 2 Mu nzubo ya Batata muji mapunzha a kwikalamo avula. Umvwe kechi kyajinga bino ne, inge nemubuula, bino mbena kuya na kwimunengezhezha mpunzha.+ 3 Kabiji umvwe naya ne kwimunengezhezha mpunzha, nkabwela jibiji ne kwimutambula, kuba’mba akwa ko nkekala, ne anweba mukekale konka.+ 4 Kabiji mbena kuya, anweba mwijiyuka jishinda.”
5 Tomase+ wamushikishe’mba: “Nkambo, kechi twayuka ko mubena kuya ne. Twakonsha kuyuka byepi jishinda?”
6 Yesu wamukumbwile’mba: “Amiwa yami jishinda+ ne bukine+ ne bumi.+ Kafwako wiya kwi Batata ne, poso wapichila mwi amiwa.+ 7 Umvwe mwangyuka amiwa, inge mwayukile ne Batata; kufuma lonka luno mwibayuka kabiji mwibamona.”+
8 Filipa wamwambijile’mba: “Nkambo, tumweshai Bashenu, ne atweba kisakwituwaina.”
9 Yesu wamushikishe’mba: “Nabanda nenu, obewa Filipa ukyangye kungyuka nyi? Awa wammona, wamona ne Batata.+ Pano washikisha byepi amba, ‘Tumweshai Bashenu’? 10 Nanchi kechi waitabila’mba amiwa nji ne Batata, ne Batata baji ne amiwa nenyi?+ Bintu byo ñamba kwi anweba, kechi ñamba byambo byami ami mwine ne,+ bino Batata baji ne amiwa bo babena kwingila mingilo yabo. 11 Ngitabilai’mba amiwa nji ne Batata ne abo baji ne amiwa; nangwa itabilai na mambo a mingilo yo nauba.+ 12 Kinetu nemwambila namba, yense wangitabila, naye ukengila mingilo yo ñingilapo; kabiji ukengila mingilo yakila ino,+ mambo amiwa mbena kuya kwi Batata.+ 13 Kabiji kyonse kyo mukalomba mu jizhina jami, nkekyuba, kuba’mba Batata batumbijikilwe mu Mwana.+ 14 Umvwe mwalomba kintu mu jizhina jami, nkekyuba.
15 “Umvwe mwantemwa, mukalama mikambizho yami.+ 16 kabiji nkalomba Batata ne abo bakemupa nkwasho* mukwabo ukekala ne anweba myaka yonse,+ 17 ko kuba’mba mupashi wa bukine,+ ye babula kutambula ba pano pa ntanda, mambo kechi bamumona nangwa kumuyuka ne.+ Anweba mwamuyuka mambo waikala mwi anweba kabiji uji mwi anweba. 18 Kechi nkemusha na bulanda* ne. Nkeya ko muji.+ 19 Kwashalatu kakimye kacheche ba pano pa ntanda kechi bakammonapo jibiji ne, pakuba anweba mukammona,+ mambo nji na bumi ne anweba mukekala na bumi. 20 Pa joja juba mukayuka’mba nji ne Batata, ne anweba muji ne amiwa ne amiwa nji nenu.+ 21 Yense umvwa mikambizho yami ne kwiilama, ye wantemwa. Kabiji yense wantemwa bakamutemwa kwi Batata, ne amiwa nkamutemwa kabiji nkesolola amiwa mwine patoka kwi aye.”
22 Yudasa+ mukwabo, kechi Isakaliota ne, wamushikishe’mba: “Nkambo, mambo ka o mubena kukebela kwisolola patoka kwi atweba bino kechi ku ba pano pa ntanda ne?”
23 Yesu wamukumbwile’mba: “Umvwe muntu wantemwa, ukalama byambo byami,+ ne Batata bakamutemwa, kabiji tukeya kwi aye ne kwikala nanji.+ 24 Yense wabula kuntemwa kechi ulama byambo byami ne. Kabiji byambo byo mubena kumvwa kechi byami ne, bya Batata bantumine.+
25 “Bino bintu nemwambila byo nkiji nenu. 26 Pakuba nkwasho, mupashi wazhila ye bakatuma Batata mu jizhina jami, ukemufunjisha bintu byonse ne kwimuvululamo bintu byonse byo nemubuujile.+ 27 Nemushila mutende; nemupa mutende wami.+ Kechi namupana kwi anweba byonka ba pano pa ntanda byo bamupana ne. Kange mulukushe michima yenu nangwa kupopomenwa na mambo a moyo ne. 28 Mwaumvwine byo nemwambijile’mba, ‘Mbena kuya kabiji nkabwela ko muji.’ Umvwe mwantemwa, sekelai kuba’mba mbena kuya kwi Batata, mambo Batata bankila.+ 29 Pano nemwambila saka kikyangye kumweka kino, pa kuba’mba muketabile umvwe kyamweka.+ 30 Amiwa kechi nsakwamba nenu byavula ne, mambo mfumu wa pano pa ntanda+ ubena kwiya, kabiji aye kechi uji na luusa pe amiwa ne.+ 31 Bino pa kuba’mba ba pano pa ntanda bayuke’mba natemwa Batata, mbena kuba byonka byankambizhe Batata.+ Imanai, twayai tufumeko kuno.
15 “Amiwa yami muñanzañanza wa kine, kabiji Batata bo banjimi. 2 Abo bakopola musampi yense uji mwi amiwa ubula kupanga bipangwa, kabiji batokesha yense upanga bipangwa kuba’mba apangenga bipangwa byavula.+ 3 Anweba mwatoka kala na mambo a byambo byo nemwambila.+ 4 Ikalai ne amiwa, ne amiwa nsakwikala ne anweba. Byonkatu musampi byo akonsha kubula kwipangila bipangwa aye mwine, poso waikala ku muñanzañanza, byonkabyo ne anweba kuba mwauba kino ne, poso mwaikala ne amiwa.+ 5 Amiwa yami muñanzañanza; anweba mwi misampi. Yense wikala ne amiwa, ne amiwa nkekala nanji, kabiji aye ukapanganga bipangwa byavula;+ mambo kwa kubula amiwa kafwako kintu kyo mwakonsha kuba ne. 6 Umvwe muntu wabula kwikala ne amiwa, bamutaya nobe musampi kabiji uuma. Ne bantu bapwizha pamo ino misampi ne kwiitaya mu mujilo, kabiji beisoka. 7 Umvwe mwaikala ne amiwa, ne byambo byami byaikala mwi anweba, mukalombe kyonse kyo mukeba kabiji bakemupakyo.+ 8 Batata batumbijikilwa mu kyonka kino, kuba’mba anweba mupangenga bipangwa byavula ne kwikala baana bami ba bwanga.+ 9 Byonkatu Batata byo bantemwa,+ ne amiwa byo nemutemwa; ikalai monka mu butemwe bwami. 10 Umvwe mwalama mikambizho yami, mukekala mu butemwe bwami, byonkatu byo nalama mikambizho ya Batata ne kwikala monka mu butemwe bwabo.
11 “Nemwambila bino bintu pa kuba’mba lusekelo lwami lwikale mwi anweba, ne lusekelo lwenu lubaye.+ 12 Uno ye mukambizho wami namba mwitemwe anwe bene na bene byonkatu byo nemutemwa.+ 13 Kafwako uji na butemwe bwakila buno bwa kuba’mba muntu apaine balunda nanji bumi* bwanji ne.+ 14 Anweba mwi balunda nami umvwe saka muba byo mbena kwimukambizha.+ 15 Pano kechi nemutele namba bazha ne, mambo muzha kechi uyuka byuba nkambo yanji ne. Bino nemutela’mba balunda nami, mambo bintu byonse byo naumvwine kwi Batata nemubulabyo. 16 Anweba kechi yenu mwansajile ne, bino yami nemusajile, ne kwimutongola namba mupangenga bipangwa byavula kuba’mba bipangwa byenu bikalenga myaka, pa kuba’mba kyonse kyo mukalomba Batata mu jizhina jami, bakemupekyo.+
17 “Nemukambizha bino bintu kuba’mba mwitemwe anwe bene na bene.+ 18 Umvwe ba pano pa ntanda bemushikwa, yukai’mba banshikilwe amiwa patanshi.+ 19 Umvwe mwajinga ba pano pa ntanda, ba pano pa ntanda inge bemutemwa mambo batemwa babo. Pano byo mwabula kwikala ba pano pa ntanda,+ bino nemusala kufuma mu ba pano pa ntanda, na mambo a kino, ba pano pa ntanda bemushikwa.+ 20 Vulukai byambo byo naji kwimwambila namba: Muzha kechi wakila nkambo yanji ne. Umvwe bamanyikile amiwa, ne anweba bakemumanyika;+ inge balamine byambo byami, bakalama ne byenu. 21 Pakuba bakemuba bino bintu byonse na mambo a jizhina jami, mambo abo kechi bayuka awa wantumine ne.+ 22 Umvwe kechi naishile na kwamba nabo ne, inge mambo bafwao.+ Bino kechi baji na mwa kwibingishisha na mambo abo ne.+ 23 Yense wanshikwa, washikwa ne Batata.+ 24 Umvwe kechi naubile mingilo mwi abo yabujile kubapo muntu mukwabo ne, inge mambo bafwao;+ bino abo bammona amiwa ne kunshikwa pamo ne Batata. 25 Bino kino kyamweka pa kuba’mba abya byambo byanembwa mu Mizhilo yabo bifike bya kuba’mba: ‘Banshikilwe pa kubula mambo.’+ 26 Nkwasho byo akafika ye nkemutumina kufuma kwi Batata, mupashi wa bukine,+ ufuma kwi Batata, aye ukanshimuna;+ 27 ne anweba mukanshimuna,+ mambo mwaikala ne amiwa kufuma ku ntendekelo.
16 “Nemwambila bino bintu pa kuba’mba mubule kwituntula. 2 Bantu bakemupanga mu nshinagoga.+ Kimye kibena kwiya kyo bakalanguluka aba bemwipaya+ amba babena kwingila mwingilo wazhila kwi Lesa. 3 Abo bakoba bino bintu mambo kechi bayuka Batata nangwa amiwa ne.+ 4 Pano bino, nemubuula bino bintu kuba’mba kimye kyabyo byo kikafika, mukavuluke’mba nemubuujilebyo.+
“Kechi nemubuujile patanshi bino bintu ne, mambo nakijinga nenu. 5 Pano mbena kuya ku yewa wantumine+ kabiji kafwako nangwatu umo wangipuzhapo amba, ‘Mubena kuya pi?’ ne. 6 Bino na mambo a kuba nemubuula bino bintu, bulanda bwimukwata.+ 7 Nangwa byonkabyo, mbena kwimubuula kine, mukamwenamo byawama byo mbena kuya. Mambo umvwe nabula kuya, nkwasho+ kechi ukeya kwi anweba ne; bino inge naya, nkemutuminaye. 8 Kabiji aye byo akeya, ukapa ba pano pa ntanda kishiino pa mambo a bundengamambo, bololoke ne bunchibamambo bwa Lesa: 9 kitanshi, pa mambo a bundengamambo,+ mambo abo kechi bangitabila ne;+ 10 kya bubiji, pa mambo a bololoke, mambo mbena kuya kwi Batata kabiji kechi mukammona jibiji ne; 11 ne pa mambo a bunchibamambo bwa Lesa, mambo mfumu wa pano pa ntanda bamuzhachisha kala.+
12 “Nkiji na bintu byavula bya kwimubuula, bino kechi mwakonsha kwibikwatakanya byonse pa kino kimye ne. 13 Pano bino, awa* byo akeya, ko kuba’mba mupashi wa bukine,+ ukemutangijila mu bukine bonse, mambo aye kechi ukamba milanguluko yanji ne, pakuba byo akomvwa byo byo akamba, ne aye ukemubuula bintu bikeya.+ 14 Awa ukantumbijika,+ mambo aye ukatambula bintu byami ne kwimubuulabyo.+ 15 Bintu byonse bya Batata byo byami.+ O ene mambo o naambila namba, aye ukatambula bintu byami ne kwimubuulabyo. 16 Kwashalatu kakimye kacheche kechi mukammona ne,+ kabiji mu kakimye kacheche mukammona.”
17 Ponkapo baana banji ba bwanga bamo beambijilenga mulwabo amba: “Watazha mu ka byo etwambila’mba, ‘Kwashalatu kakimye kacheche kechi mukammona ne, kabiji amba, mu kakimye kacheche mukammona,’ ne kuba’mba, ‘Mambo mbena kuya kwi Batata’?” 18 Onkao mambo, baambilenga’mba: “Watazha mwepi byo aamba’mba, ‘kakimye kacheche’? Kechi twayuka kintu kyo abena kwambapo ne.” 19 Yesu byo ayukile’mba bakeba kumwipuzha, wibepwizhe’mba: “Nanchi mubena kwiipuzha anwe bene pa kino, mambo naji kwamba’mba: ‘Kwashalatu kakimye kacheche kechi mukammona ne, kabiji amba mu kakimye kacheche mukammona nyi?’ 20 Kinetu nemwambila namba, anweba mukajila ne kuwowakana, pakuba ba pano pa ntanda abo bakasekela; anweba mukekala na bulanda, bino bulanda bwenu bukaluka ke lusekelo.+ 21 Mwanamukazhi pa kusema wikala na bulanda, mambo kimye kyanji kyafika, bino umvwe wasema mwana, kechi uvuluka ne misongo yo aji kupitamo ne, na mambo a lusekelo lwa kuba’mba wasema muntu pano pa ntanda. 22 Onkao mambo, ne anweba pa kino kimye muji na bulanda; bino nkemumona jibiji, ne michima yenu ikasekela,+ kabiji kafwako ukapwisha lusekelo lwenu ne. 23 Pa jo ja juba, kechi mukangipuzhapo mepuzho ne. Kinetu nemwambila namba, Umvwe mukalombe kintu kwi Batata,+ abo bakemupakyo mu jizhina jami.+ 24 Kufikatu ne luno kechi mwalombapo kintu mu jizhina jami ne. Lombai kabiji mukekitambula, pa kuba’mba mukekale na lusekelo lukatampe.
25 “Nemwambila bino bintu mu bishimpi. Kimye kibena kwiya kyo nkabula kwamba nenu mu bishimpi, bino nkemubuula patoka Batata byo baji. 26 Pa joja juba, mukalomba kwi Batata mu jizhina jami; byo naamba bino kechi naamba’mba nkemulombelako ne. 27 Mambo Batata abo bene bemutemwa, mambo anweba mwantemwa+ kabiji mwaitabila kuba’mba naishile kwimenako Lesa.+ 28 Naishile na kwimenako Batata kabiji naishile pano pa ntanda. Pano mbena kufuma pano pa ntanda ne kubwela kwi Batata.”+
29 Baana banji ba bwanga baambile’mba: “Pano mwaamba bulongo, mambo kechi mwaamba mu bishimpi ne. 30 Pano luno twayuka’mba mwayuka bintu byonse kabiji kechi mukeba muntu nangwa umo kwimwipuzha ne. Na mambo a kino, twaitabila’mba mwafumine kwi Lesa.” 31 Yesu wibepwizhe’mba: “Pano luno mwaitabila nyi? 32 Umvwai! Kimye kibena kwiya, kabiji kyafika, kyo bakemupalañanya awu kwanji awu kwanji, kabiji mukanshatu bunke;+ bino kechi nji bunke ne, mambo Batata baji ne amiwa.+ 33 Nemubuula bino bintu kuba’mba kupichila mwi amiwa mwikale mutende.+ Mukapitanga mu bya malwa pano pa ntanda, bino kosai! Amiwa nepashinda pano pa ntanda.”+
17 Yesu byo aambile bino bintu, wainukile ne kutala mwiulu ne kulomba’mba: “Tata, kimye kyafika. Tumbijikai mwanenu pa kuba’mba mwanenu emutumbijike,+ 2 byonkatu byo mwamupa luusa lwa pa bantu bonse,+ pa kuba’mba akonshe kupana bumi bwa myaka ne myaka+ ku bonse bo mwamupa.+ 3 Pa kuba’mba bakekale na bumi bwa myaka ne myaka,+ bafwainwa kwimuyuka anweba Lesa yenka wa kine,+ ne Yesu Kilishitu ye mwatumine.+ 4 Amiwa nemutumbijika pano pa ntanda,+ byo napwisha kwingila mwingilo ye mwampele.+ 5 Onkao mambo, Tata, ntumbijikai na lukumo lo najinga nalo nenu saka mukyangye kulenga ntanda.+
6 “Nejisolola* jizhina jenu ku bantu bo mwampele kufuma pano pa ntanda.+ Bajinga benu kabiji mwibapaine kwi amiwa, ne abo balama* byambo byenu. 7 Pano abo bayuka’mba bintu byonse byo mwampele byafumine kwi anweba; 8 mambo nebabuula byambo byo mwambuujile,+ kabiji bebitambula ne kuyuka’mba naishile kwikala wa kwimwimenako,+ ne abo baitabila’mba yenu mwantumine.+ 9 Amiwa nebalombelako; kechi nalombelako ba pano pa ntanda ne, bino aba bo mwampele, mambo bo benu; 10 ne bintu byami byonse byo byenu, ne byenu byo byami,+ kabiji natumbijikwa mwi abo.
11 “Amiwa kechi nkiji pano pa ntanda ne, bino abo baji pano pa ntanda,+ kabiji mbena kwiya kwi anweba. Anweba Tata Wazhila, mwibazhikijilenga+ na mambo a jizhina jenu jo mwampa, kuba’mba bekale umo* byonka anweba ne amiwa byo tuji umo.*+ 12 Byo najinga nabo nebazhikijilenga+ na mambo a jizhina jenu, jo mwampa; ne amiwa nebazhikijila, kabiji kafwako nangwa umo waonaikapo ne,+ poso yenkawa mwana wa lonaiko,+ pa kuba’mba kinembelo kifike.+ 13 Pano mbena kwiya kwi anweba, kabiji mbena kwamba bino bintu pano pa ntanda, kuba’mba bekale na lusekelo lwami lukatampe.+ 14 Amiwa nebabuula byambo byenu, bino ba pano pa ntanda bebashikwa, mambo abo kechi bo ba pano pa ntanda ne,+ byonka byo nabula kwikala wa pano pa ntanda.
15 “Kechi nalomba namba, mwibafumye pano pa ntanda ne, bino amba mwibazhikijilenga na mambo a aye mubi.+ 16 Abo kechi bo ba pano pa ntanda ne,+ byonka byo nabula kwikala wa pano pa ntanda.+ 17 Bazhijikai* na bukine;+ byambo byenu bo bukine.+ 18 Byonkatu byo mwantumine pano pa ntanda, ne amiwa nebatuma pano pa ntanda.+ 19 Kabiji mbena kwizhijika na mambo a abo, pa kuba’mba nabo bazhijikwe na bukine.
20 “Kechi nalombelakotu bano bonka ne, bino ne boba bangitabila kupichila mu byambo byabo, 21 pa kuba’mba bekale ke umo,+ byonkatu anweba Tata byo muji ne amiwa, ne amiwa byo nji ne anweba,+ ne abo bekale ne atweba, kuba’mba ba pano pa ntanda betabile’mba mwantumine. 22 Nebapa lukumo lo mwampele, pa kuba’mba bekale ke umo byonka byo tuji anweba ne amiwa.+ 23 Amiwa nji ne abo, ne abo baji ne amiwa, kuba’mba bakwatankane kwikala ke umo, pa kuba’mba ba pano pa ntanda bayuke’mba mwantumine kabiji mwibatemwa byonka byo mwantemwa amiwa. 24 Tata, mbena kukeba aba bo mwampele kwikala ne amiwa ko nji,+ pa kuba’mba bakamone lukumo lwami lo mwampa, mambo mwantemenwe, pano pa ntanda saka pakyangye kulengwa.+ 25 Anweba Tata waoloka, ba pano pa ntanda kechi bemuyuka ne,+ pakuba amiwa nemuyuka,+ ne bano bayuka’mba anweba yenu mwantumine. 26 Nejisolola jizhina jenu kwi abo kabiji nkejisolola,+ kuba’mba butemwe bo mwantemwa bwikale mwi abo, ne amiwa ngikale ne abo.”+
18 Yesu byo apwishishe kwamba bino bintu, walupukile na baana banji ba bwanga ne kuya ku bushiya bwa Kimpachiko* kya Kidelona+ kwajinga bujimi, kabiji aye ne baana banji ba bwanga batwelele monka.+ 2 Yudasa, aye wamusolwele wayukile ino mpunzha, mambo Yesu ko ko atanwanga javula na baana banji ba bwanga. 3 Onkao mambo, Yudasa wayile na nzhita ya bashilikale ne bakapaso bafumine ku bañanga bakatampe ne ku Bafaliseo baishile na masoko a mujilo, malampi ne bilwilo.+ 4 Ponkapo Yesu byo ayukile bintu byonse bisakumumwekela, wayile kwi abo ne kwibashikisha’mba: “Nanchi ñanyi ye mubena kukeba?” 5 Abo bamukumbwile’mba: “Yesu mwina Nazala.”+ Aye wibambijile’mba: “Amiwa bano.” Kabiji Yudasa, wamusolwele wajinga nabo.+
6 Nangwa byonkabyo, Yesu byo ebambijile’mba: “Amiwa bano,” babwelele lumfutwanyuma ne kupona panshi.+ 7 Onkao mambo, wibashikishe jibiji amba: “Nanchi ñanyi ye mubena kukeba?” Abo baambile’mba: “Yesu mwina Nazala.” 8 Yesu wakumbwile’mba: “Naji kwimubuula kala namba, amiwa bano. Umvwe yami mubena kukeba, balekai bano bayenga.” 9 Kino kyafikizhe akya kyo aambile’mba: “Pa bonse bo mwampele kafwako nangwa umo ye naelapo ne.”+
10 Kepo Shimona Petelo wajinga na mpoko, eisomwene ne kukampa kalume wa ñanga mwine mukatampe ne kumukopola kutwi kwa kilujo.+ Jizhina ja uno kalume wajinga Malikusa. 11 Pakuba Yesu waambijile Petelo amba: “Bwezha mpoko mu kikwa kyayo.+ Nanchi katomeno kampa Batata kechi nakonsha kwikatoma nenyi?”+
12 Kepo bashilikale ne mukulumpe wabo ne bakapaso ba Bayudea bamukwachile Yesu ne kumukasa. 13 Patanshi bamutwajile kwi Anasa, mambo wajinga muko wa kwa Kaifasa,+ wajinga ñanga mwine mukatampe mu yewa mwaka.+ 14 Kaifasa ye wabuujile ne Bayudea amba kibawamina muntu umo kufwila bantu.+
15 Kabiji Shimona Petelo ne mukwabo mwana wa bwanga balondejilenga Yesu.+ Uno mwana wa bwanga bamuyukile kwi ñanga mwine mukatampe, ne aye watwelele ne Yesu mu kipango kya ñanga mwine mukatampe, 16 bino Petelo washajile saka aimana pangye pa kibelo. Onkao mambo, mwana wa bwanga mukwabo ye bayukile kwi ñanga mwine mukatampe, walupukile pangye ne kwambila walaminenga kibelo kabiji watwezhezhe Petelo mukachi. 17 Kepo uno nsongwakazhi wa mwingilo walaminenga kibelo ashikishe Petelo amba: “Nanchi ne obewa kechi wi mwana wa bwanga wa uno muntu nenyi?” Aye wakumbwile’mba: “Ine.”+ 18 Bakalume ne bakapaso baimene saka bazhokoloka mujilo wa mashanga ye babanzhile, mambo kwajinga mashika kabiji baotelenga. Ne Petelo naye waimene nabo na koota mujilo.
19 Onkao mambo, ñanga mwine mukatampe washikishe Yesu pa mambo a baana banji ba bwanga ne mfunjishisho yanji. 20 Yesu wamukumbwile’mba: “Naambilenga patoka ku ba pano pa ntanda. Kimye kyonse nafunjishanga mu nshinagoga ne mu nzubo ya Lesa+ mukonkena Bayudea bonse, kabiji kafwako kintu kyo naambilenga mu bufyamfya ne. 21 Mambo ka o mubena kunshikishisha? Shikishai boba baumvwine byo naambilenga. Abo bayuka byo naambile.” 22 Byo aambile bino bintu, kapaso umo waimene kwipi wamuzhangwilemo lupi pa meso+ ne kumushikisha’mba: “Mambo ka o wakumbwila ñanga mukatampe byobyo?” 23 Yesu wamukumbwile’mba: “Umvwe naamba kyatama, mbuule;* inge kyo naamba kechi kyatama ne, mambo ka o wampumina?” 24 Kepo Anasa amutumine kwi Kaifasa ñanga mwine mukatampe saka bamukasa.+
25 Kabiji Shimona Petelo waimene saka ota mujilo. Kepo bamushikishe’mba: “Nanchi ne obewa kechi wi mwananji wa bwanga nenyi?” Aye wakaine ne kwamba’mba: “Ine.”+ 26 Kalume umo wa ñanga mwine mukatampe, mulongo wa yewa ye bakopwele kutwi kwi Petelo,+ wamushikishe’mba: “Nanchi kechi naji kukumona mu bujimi na uno muntu nenyi?” 27 Nangwa byonkabyo, Petelo wakaine jikwabo, ponkapotu shikombwe wakokwele.+
28 Kepo Yesu bamufumishe kwi Kaifasa ne kumutwala mu kipango kya kitumbafumu.+ Kwajinga ku makya. Bino abo bene kechi batwelelemo mu kipango kya kitumbafumu ne, pa kuba’mba babule kwizhilulula,+ bino amba bakaje Kijiilo kya Lupitailo. 29 Onkao mambo, Pilato walupukile pangye po bajinga ne kwibashikisha’mba: “Ñanyi mambo o mwamupamo uno muntu?” 30 Abo bamukumbwile’mba: “Umvwe uno muntu kechi wajinga ngubabibi* ne, inge kechi twamuleta kwi anweba ne.” 31 Onkao mambo, Pilato wibakumbwile’mba: “Musendai anwe bene mukamuchibile mambo monka mwayila mizhilo yenu.”+ Bayudea bamwambijile’mba: “Mizhilo kechi ituswisha kwipaya muntu nangwa umo ne.”+ 32 Kino kyafikizhe byambo Yesu byo aambile bya kumwesha musango ye akafwilamo.+
33 Pilato byo atwelele mu kipango kya kitumbafumu, wamwichile jibiji Yesu ne kumwipuzha’mba: “Nanchi obewa wi Mfumu wa Bayudea nyi?”+ 34 Yesu wamushikishe’mba: “Nanchi anwe bene mwiambila kino nyi, inyi paji wimubuula pe amiwa?” 35 Pilato wamukumbwile’mba: “Nanchi amiwa yami Muyudea nyi? Kisaka kyobe ne bañanga bakatampe bo bakuleta kwi amiwa. Ki ka kyo wauba?” 36 Yesu wakumbwile’mba:+ “Bufumu bwami kechi bwa pano pa ntanda ne.+ Umvwe Bufumu bwami bwajinga bwa pano pa ntanda, inge ba mingilo bami baji kundwilako kuba’mba babule kumpana ku Bayudea.+ Pakuba Bufumu bwami kechi bwa pano pa ntanda ne.” 37 Onkao mambo, Pilato wamwipwizhe’mba: “Nanchi obewa wi mfumu nyi?” Yesu wakumbwile’mba: “Anwe bene yenu mwaamba’mba yami mfumu.+ Na mambo a kino kyo kyo nasemekejilwe, kabiji kyo kyo naishijile pano pa ntanda kuba’mba nshimune bukine.+ Yense watemwa bukine umvwa jiwi jami.” 38 Pilato wamushikishe’mba: “Nanchi bukine bo bu ka?”
Byo aambile bino, wayile jibiji ku Bayudea ne kwibambila’mba: “Uno muntu kechi namutaana na mambo ne.+ 39 Kabiji kwesakana na byo muba anwe bene nafwainwa kwimukasulwila muntu umo pa juba ja Kijiilo kya Lupitailo.+ Nanchi mubena kukeba’mba nemukasulwile Mfumu wa Bayudea nyi?” 40 Abo babijikile’mba: “Kwitukasulwila uno muntu ne, kana Balabasa!” Bino Balabasa wajinga kapondo.+
19 Kepo Pilato asendele Yesu ne kumuzhipaula.+ 2 Kabiji bashilikale balukile munchinya wa miba ne kumuvwika ku mutwe kabiji bamuvwikile ne munkukumba wachiluluka;+ 3 kabiji baishilenga kwi aye ne kumwambila’mba: “Mutende* mwane, anweba Mfumu wa Bayudea!” Kabiji bamuzhangawilengamo mapi pa meso.+ 4 Pilato walupukile pangye jibiji ne kwibambila’mba: “Talai! Mbena kumuleta kwi anweba pa kuba’mba muyuke’mba amiwa kechi namutaana na mambo ne.”+ 5 Ponkapo Yesu walupukile pangye saka avwala munchinya wa miba ne munkukumba wachiluluka. Kabiji Pilato wibambijile’mba: “Talai! Uno muntu!” 6 Nangwa byonkabyo, bañanga bakatampe ne bakapaso byo bamumwene, babijikile’mba: “Mukobekai pa kichi! Mukobekai pa kichi!”*+ Pilato wibambijile’mba: “Musendai anwe bene mukamwipaye,* mambo amiwa kechi namutaana na mambo ne.”+ 7 Bayudea bamwambijile’mba: “Tuji na muzhilo, kabiji kwesakana na uno muzhilo, uno muntu wafwainwa kufwa,+ mambo witela mwine amba mwana Lesa.”+
8 Pilato byo aumvwine byo baambilenga, waubile bingi moyo, 9 kabiji watwelele jibiji mu kipango kya kitumbafumu ne kwipuzha Yesu amba: “Nanchi obewa wafuma pi?” Bino Yesu kechi wamukumbwile ne.+ 10 Onkao mambo, Pilato wamwipwizhe’mba: “Wabujila ka kunkumbula? Kechi wayuka’mba nji na luusa lwa kukukasulula nangwa lwa kukwipaya* nenyi?” 11 Yesu wamukumbwile’mba: “Anweba kechi muji na luusa pe amiwa ne, kanatu bemupalo kufuma mwiulu. O ene mambo awa muntu wansolola kwi anweba, o aikela na mambo akatampe.”
12 Pa mambo a kino, Pilato wakebelenga mwa kumukasulwila, bino Bayudea babijikile’mba: “Umvwe mumukasulule uno muntu, ko kuba’mba kechi mwi balunda ba kwa Kesala ne. Muntu yense witongola mwine amba mfumu, usatukila* Kesala.”+ 13 Onkao mambo, Pilato byo aumvwine bino byambo, wamulupwile Yesu pangye, kabiji aye waikele pa kipona kya kuchibilapo mambo pa mpunzha po batela’mba, Kyalanta, mu Kihebelu amba Ngabata. 14 Jino jajinga juba ja Kunengezha+ Kijiilo kya Lupitailo; kyajinga pa jiola* ja butanu na bumo. Aye wibambijile Bayudea amba: “Talai! Mfumu wenu!” 15 Nangwa byonkabyo, abo babijikile’mba: “Mwipayai! Mwipayai! Mukobekai pa kichi!”* Pilato wibepwizhe’mba: “Namwipaye mfumu wenu nyi?” Bañanga bakatampe bakumbwile’mba: “Atweba kechi tuji na mfumu mukwabo ne, kanatu Kesala.” 16 Kepo ebapele Yesu kuba’mba bakamwipayile pa kichi.+
Onkao mambo, bamusendele Yesu. 17 Byo asendele kichi* kya lumanamo, wayile kuntu kwatelwanga’mba Mpunzha ya Kiboyongolo,+ mu Kihebelu amba Ngolongota.+ 18 Konka kuno bamupopejile pa kichi,+ na banabalume babiji, umo kuku ne mukwabo kuku, bino Yesu wajinga pakachi.+ 19 Kabiji Pilato wanembele kiyukilo ne kwikibika pa kichi* kya lumanamo. Panembelwe’mba: “Yesu Mwina Nazala Mfumu wa Bayudea.”+ 20 Bayudea bavula batangile kino kiyukilo, mambo mpunzha ko bamupopejile Yesu yajinga kwipi na muzhi, kabiji kyanembelwe mu Kihebelu, Kilatini ne Kingiliki. 21 Nangwa byonkabyo, bañanga bakatampe ba Bayudea bamwambijile Pilato amba: “Kange munembe’mba, ‘Mfumu wa Bayudea’ ne, bino munembe’mba uno waambile’mba, ‘Amiwa yami Mfumu wa Bayudea.’” 22 Pilato wibambijile’mba: “Kyo nanemba, nanemba kala.”
23 Bashilikale byo bapwishishe kumupopa Yesu pa kichi, bashikwile bivwalo byanji bya peulu ne kwibyabanyapo pana, awu kyanji awu kyanji, kabiji bashikwile ne kivwalo kyanji kya mukachi. Bino kino kivwalo kya mukachi kechi kyajinga na mifumo ne, mambo bekipikwile kufumatu kwiulu kufika ne kunshi. 24 Onkao mambo, beambijile bene na bene amba: “Kange twikitabule ne, bino twayai tute bubale pa kuba’mba tuyuke usakwikisenda.”+ Kyajinga bino kuba’mba kinembelo kifike kyaamba’mba: “Beabenye bene bivwalo byami kabiji batele bubale pa kivwalo kyami.”+ Onkao mambo, bashilikale baubile bino bintu.
25 Nangwa byonkabyo, kwipi na kichi* kya lumanamo pajinga Yesu, kwaimene bainanji,+ bainanji ba banyike; Maliya muka Kilopasa ne Maliya Mangadala.+ 26 Onkao mambo, Yesu byo amwene bainanji ne mwananji wa bwanga ye atemenwe+ saka baimana kwipi, waambijile bainanji amba: “Talai mwanenu wo!” 27 Kepo aambijile yewa mwananji wa bwanga amba: “Tala! Bainobe bo!” Kabiji kufumatu kyonkakya kimye awa mwana wa bwanga watwajile bainanji Yesu ku nzubo yanji.
28 Bino bintu byo byapwile, Yesu byo ayukile’mba pano bintu byonse byaubiwa, pa kuba’mba kinembelo kifike, waambile’mba: “Nafwa kilaka.”+ 29 Pajinga mulondo mwajinga binyu byasasa. Onkao mambo, bashikwile kimvwambai kyo batumpikile mu binyu byasasa ne kwikisomeka ku kakichi ka isopi* ne kumubika ku kanwa.+ 30 Ponkapo byo atompelepo pa binyu byasasa, Yesu waambile’mba: “Byonse byaubiwa!”+ kabiji byo anyengekele mutwe, wafwile.+
31 Byo jajinga juba ja Kunengezha,+ pa kuba’mba mibiji ibule kushala pa bichi bya lumanamo+ pa juba ja Sabado, (mambo juba ja Sabado jajinga jikatampe),+ Bayudea baambijile Pilato kuba’mba bachimaune maulu ne kufumyapo mibiji. 32 Onkao mambo, bashilikale bayile na kuchimauna maulu a yewa mutanshi ne a mukwabo mo bebapopejile pamo. 33 Bino, byo bafikile pe Yesu, bataaine’mba wafwa kala, onkao mambo kechi bamuchimawine maulu ne. 34 Pano bino, mushilikale umo wamwashile jifumo mu mbavu,+ ponkapotu mashi ne mema apokomokele. 35 Kabiji yense wamwene kino, wikishimuna ne kushimuna kwanji kwa kine. Uno muntu wayuka’mba bintu byo amba bya kine, pa kuba’mba ne anweba mwitabile.+ 36 Bino bintu byamwekele kuba’mba kinembelo kifike kyaamba’mba: “Kafwako kikupa kyanji nangwa kimo kyo bakachimuna* ne.”+ 37 Kabiji kinembelo kikwabo kyaamba’mba: “Bakatala ku yewa ye baashile.”+
38 Bino bintu byo byapwile, Yosefwa wa ku Alimatea wajinga mwana wa bwanga wa kwa Yesu, bino wabujile kwisolola na mambo a kuchina Bayudea,+ waishile kwi Pilato na kulomba mubiji wa kwa Yesu, ne Pilato wamuswishishe. Onkao mambo, waishile na kusenda mubiji.+ 39 Kabiji Nikodema,+ awa yenka waishile patanshi bufuku kwi aye, naye waishile ne kuleta byapatakana na mola ne maalo byafikile mapaunji* nobe kitota kimo.+ 40 Onkao mambo, bashikwile mubiji wa kwa Yesu ne kumupombakanya mu bisapi bya linenyi pamo na binunka bulongo,+ monka mwayijile kisho kya Bayudea pa kuzhiika. 41 Kabiji akwa ko bamwipayijile* kwajinga ne bujimi, kabiji mu bonkabwa bujimi mwajinga kilende kya katataka+ mo babujile kubika muntu nangwa umo ne. 42 Na mambo a kuba jajinga juba ja Bayudea ja Kunengezha kijiilo,+ ne kilende* byo kyajinga pepi, bamubikile Yesu monkamwa.
20 Pa juba jitanshi mu mulungu, Maliya Mangadala wayile lukelokelo ku kilende*+ saka pakifita, kabiji wamwene jibwe bejalumunako kala ku kilende.*+ 2 Onkao mambo, wayile lubilo kwi Shimona Petelo ne ku mwana wa bwanga mukwabo ye atemenwe Yesu,+ ne kwibambila’mba: “Nkambo bamufumyamo mu kilende,+ kabiji kechi twayuka ko bamubika ne.”
3 Kepo Petelo ne mwana wa bwanga mukwabo bayile ku kilende. 4 Bonse babiji banyemejilenga pamo, bino mwana wa bwanga mukwabo wakijile Petelo lubilo kabiji ye wafikile bukiji ku kilende. 5 Byo asumbijilemo wamwene bisapi bya linenyi saka biji panshi,+ bino kechi watwelele mukachi ne. 6 Kepo Shimona Petelo aishilenga saka a mulondela, kabiji watwelele mu kilende. Kabiji wamwene bisapi bya linenyi saka biji panshi. 7 Kisapi kyo bamupombele ku mutwe kechi kyajinga pamo na bikwabo ne, bino kyajingatu pa bunke bwakyo saka bekivunga. 8 Kepo mwana wa bwanga awa wafikile bukiji ku kilende, atwelelemo ne kumona wamwene kabiji waitabijile. 9 Mambo abo baji bakyangye kuyuka kinembelo kya kuba’mba aye wafwainwa kukasanguka mu bafu.+ 10 Byonkabyo, baana ba bwanga babwelele ku mazubo abo.
11 Bino Maliya waimene pangye ya kilende saka ajila. Byo akijijilenga, wasumbijile mu kilende 12 kabiji wamwene bamalaika+ babiji mu bivwalo bitoka saka baikala po batujile mubiji wa kwa Yesu, umo ku mitwe mukwabo ku maulu. 13 Abo bamwipwizhe’mba: “Inetu, mubena kujila ka?” Aye wibambijile’mba: “Bamufumyamo Nkambo yami, kabiji kechi nayuka ko bamubika ne.” 14 Byo apwishishe kwamba bino, waalulukile ne kumona Yesu saka aimana, bino aye kechi wayukile’mba ye Yesu ne.+ 15 Yesu wamwipwizhe’mba: “Inetu, mubena kujila ka? Ñanyi ye mubena kukeba?” Aye byo alangulukilenga’mba ye wa mwingilo wa mu bujimi, wamwambijile’mba: “Mwane, umvwe yenu mwamusenda, mbuulai ko mwamubika kuba’mba ngye nkamusende.” 16 Yesu wamwichile’mba: “Maliya!” Aye byo aalulukile, waitabile mu Kihebelu amba: “Laboni!” (kulumbulula’mba “Mufunjishi!”) 17 Yesu wamwambijile’mba: “Kileke kunkwata, mambo nkyangye kuya kwi Batata. Bino yanga ku balongo bami+ ne kwibabuula’mba, ‘Amiwa mbena kuya kwi Batata+ kabiji Bashenu, ne kwi Lesa wami+ kabiji Lesa wenu.’” 18 Maliya Mangadala wayile na kubuula baana ba bwanga amba: “Namumona Nkambo!” Ne aye wibabuujile byo amwambijile.+
19 Kabiji byo kyaubile ke mabanga, pa juba jitanshi mu mulungu, ne binzhilo saka bebikiya mwajinga baana ba bwanga mambo bachiinenga Bayudea, Yesu waishile ne kwimana mukachi kabo ne kwibambila’mba: “Mutende ekale ne anweba.”+ 20 Byo aambile bino, wibamwesheshe maboko anji ne mbavu yanji.+ Kabiji baana ba bwanga basekejile bingi pa kumona Nkambo.+ 21 Yesu wibambijile jibiji amba: “Mutende ekale ne anweba.+ Byonkatu Batata byo bantumine,+ ne amiwa mbena kwimutuma.”+ 22 Byo aambile bino, wibapuyile muya ne kwibambila’mba: “Tambulai mupashi wazhila.+ 23 Umvwe mwalekela muntu mambo, Lesa wamulekela kala mambo; bino umvwe mwabula kumulekelako mambo, Lesa naye kechi wamulekelako mambo ne.”
24 Bino Tomase+ wa mu batumwa Jikumi na Babiji, ye batelanga’mba, Mpasa, kechi wajingapo kimye Yesu kyo aishile ne. 25 Onkao mambo, baana ba bwanga bakwabo bamubuujile’mba: “Twamumona Nkambo!” Pakuba aye wibambijile’mba: “Amiwa nsakwitabatu kana mmone bito* mwapichile misomali mu maboko anji ne kukulamo munwe wami ne kumukwata mu mbavu yanji.”+
26 Kabiji byo papichile moba atanu na asatu, baana banji ba bwanga bajinga mu nzubo jikwabo, ne Tomase wajinga nabo. Nangwa kya kuba binzhilo byajinga bya kukiya, Yesu watwelele monka ne kwimana mukachi kabo ne kwibambila’mba: “Mutende ekale ne anweba.”+ 27 Ponkapo waambijile Tomase amba: “Kula munwe wobe papo, umone maboko ami kabiji unkwate ne mu mbavu, uleke kuzhinauka, witabile.” 28 Tomase wamwambijile’mba: “Nkambo yami kabiji Lesa wami!” 29 Yesu wamwipwizhe’mba: “Nanchi waitabila na mambo a kuba’mba wammona nyi? Batokwa aba betabila nangwa kya kuba kechi bamona ne.”
30 Kine, Yesu waubile ne biyukilo bikwabo byavula ku baana banji ba bwanga, byabula kunembwa mu uno muvungilo.+ 31 Pakuba bino byanembwa kuba’mba mwitabile’mba Yesu ye Kilishitu, Mwana Lesa, kabiji na mambo a kwitabila, mukonshe kwikala na bumi kupichila mu jizhina janji.+
21 Kabiji Yesu wisolwele* mwine jibiji ku baana banji ba bwanga kwipi na Kalunga ka Mema ka Tibeliasa. Wisolwele bino. 2 Kwajinga Shimona Petelo, Tomase (watelwanga’mba Mpasa),+ Natanela+ wafumine ku Kena wa ku Ngalilea, baana ba kwa Zebede,+ ne baana banji ba bwanga bakwabo babiji. 3 Shimona Petelo wibambijile’mba: “Naya na kukwata masabi.” Abo bamwambijile’mba: “Ne atweba tubena kuya nobe.” Bayile ne kukanjila mu bwato, bino abwa bufuku kechi bakwachilepo nangwa jimotu ne.+
4 Nangwa byonkabyo, byo bwayilenga na kukya, Yesu waimene ku kitulu, bino baana banji ba bwanga kechi bayukile’mba, ye Yesu ne.+ 5 Kepo Yesu ebashikishe’mba: “Anweba baana, nanchi muji na kajo* ka kuja nyi?” Abo bakumbwile’mba: “Ine!” 6 Aye wibambijile’mba: “Telai bukonde ku kilujo kya bwato kabiji musakukwatapo amo.” Bebutele, bino bakankelwe kwibukokela mu bwato, mambo mwafwile masabi avula bingi.+ 7 Onkao mambo, awa mwana wa bwanga ye atemenwe Yesu,+ wabuujile Petelo amba: “Nkambo wa!” Petelo byo aumvwinetu amba iye Nkambo, wavwajile* kivwalo kyanji kya peulu, mambo wajinga mulekese,* kabiji witayile pa kalunga ka mema. 8 Bino baana ba bwanga bakwabo baishilenga mu bwato bucheche saka bakoka bukonde bwayujile masabi, mambo kechi bajinga palepa na kitulu ne, pajingatu mafiti* 300.
9 Byo batuntukijile ku kitulu, bamwene mujilo wa mashanga ne jisabi saka jiji peulu, ne shinkwa. 10 Yesu wibambijile’mba: “Letai masabi amo o mwakwata.” 11 Onkao mambo, Shimona Petelo wakanjijile mu bwato ne kukokela bukonde ku kitulu saka bwayula masabi akatampe 153. Bino nangwa kya kuba avujile, bukonde kechi bwachibaikile ne. 12 Yesu wibambijile’mba: “Iyai mwiaule.” Kafwako mwana wa bwanga nangwa umo wakonsheshe kumushikisha’mba: “Yenu bañanyi?” ne, mambo bayukile’mba ye iye Nkambo. 13 Yesu waimene ne kushikula shinkwa ne kwibapa, kabiji wibapele ne jisabi. 14 Kino kyajinga kimye kya busatu+ Yesu kyo amwekele ku baana banji ba bwanga kufuma kimye kyo bamusangwile mu bafu.
15 Byo bapwishishe kwiaula, Yesu washikishe Shimona Petelo amba: “Shimona mwana wa kwa Yoano, nanchi wantemwa kukila ano nyi?” Aye wamukumbwile’mba: “Ee Nkambo, anweba mwayuka’mba nemutemwa.” Aye wamwambijile’mba: “Jiisha twana twami twa mikooko.”+ 16 Kabiji wamushikishe ja bubiji amba: “Shimona mwana wa kwa Yoano, nanchi wantemwa nyi?” Aye wamukumbwile’mba: “Ee Nkambo, anweba mwayuka’mba nemutemwa.” Aye wamwambijile’mba: “Funganga twana twami twa mikooko.”+ 17 Wamushikishe ja busatu amba: “Shimona mwana wa kwa Yoano, nanchi wantemwa nyi?” Petelo waubile bulanda byo amushikishe ja busatu amba: “Nanchi wantemwa nyi?” Onkao mambo, wamukumbwile’mba: “Nkambo, mwayuka bintu byonse; kabiji mwayuka’mba nemutemwa.” Yesu wamwambijile’mba: “Jiisha twana twami twa mikooko.+ 18 Kinetu nakwambila namba, byo wakijinga mwanyike, wavwalanga ne kuya konse ko wakebanga kuya. Bino byo ukakota, ukatanyikanga maboko obe ne muntu mukwabo ukakuvwikanga ne kukutwala ko ukabulanga kukeba kuya.” 19 Waambile bino kutongola musango wa lufu Petelo lo akatumbijikilamo Lesa. Byo apwishishe kwamba bino, wamwambijile Petelo amba: “Twajijila kundondela.”+
20 Petelo byo aalulukile, wamwene mwana wa bwanga ye atemenwe Yesu+ saka alondela, yenkawa wasendalejile pa kyaji kya kwa Yesu kimye kya kijiilo kya mabanga ne kwamba’mba: “Nkambo, ñanyi usakwimusolola?” 21 Byo amumwene, Petelo wamushikishe Yesu amba: “Nkambo, nga uno muntu kikekala byepi?” 22 Yesu wamukumbwile’mba: “Umvwe kyo kyaswa muchima wami kuba’mba ekale posotu ne byo nkeya, pano obewa waakaminwa ka? Obewa ndondelengatu.” 23 Onkao mambo, bino byambo byakumbene mu balongo kuba’mba uno mwana wa bwanga kechi ukafwa ne. Nangwa byonkabyo, Yesu kechi wamwambijile’mba kechi ukafwa ne, bino amba: “Umvwe kyo kyaswa muchima wami kuba’mba ekale posotu ne byo nkeya, pano obewa waakaminwa ka?”
24 Uno ye mwana wa bwanga+ washimuna bino bintu kabiji ye wanembele bino bintu, ne atweba twayuka’mba kushimuna kwanji kwa kine.
25 Kabiji kuji ne bintu bikwabo byavula bingi Yesu byo aubile, kya kuba umvwe bebinembele byonse, kine pano pa ntanda inge pabula ne pa kubika ino mivungilo.+
Nangwa’mba “lusa lukatampe.”
Nangwa’mba “mu kyaji kya Bashanji.” Kino kimenako kifulo kya munema.
Monai bya Kulumbulula A5.
Ko kuba’mba, ku ma 4 koloko mute.
Kyamweka kipimo kya kupiminamo bya mema mema kyajinga bbafi waesakene na malita 22. Monai bya Kulumbulula B14.
Nangwa’mba “kisankanyi; busulu.”
Nangwa, “kusemwa mwiulu.”
Nangwa’mba “kushala patoka.”
Nangwa’mba “washiinwa.”
Nangwa’mba “mu bipimo.”
Nangwa’mba “nsulo.”
Ko kuba’mba, ku ma 12 koloko mute.
Nangwa’mba “ubena kumvwako bulongo.”
Ko kuba’mba, ku ma 1 koloko mute.
Nangwa’mba “kalepu.”
Monai bya Kulumbulula A3.
Nangwa’mba “mwanya.”
Nangwa’mba “mwanya.”
Nangwa’mba “mwanya.”
Nangwa’mba “mwanya.”
Nangwa’mba “aye mwine uji na bupe bwa bumi.”
Nangwa’mba “bilende bya kivuluko.” Monai Mutanchi.
Ko kuba’mba, Binembelo.
Monai bya Kulumbulula B14.
Nobe makilomita atanu nangwa atanu na umo. Monai bya Kulumbulula B14.
Monai bya Kulumbulula A5.
Nangwa’mba “pa mvula bantu.”
Nangwa’mba “diabola.”
Nangwa’mba “kwenda.”
Nangwa’mba “Mimba.”
Mu Kingiliki, “byanembwa.”
Ko kuba’mba, masukulu a balabi.
Mu manyusikilipiti a kala avula o baitabizha kafwamo kyepelo 53 kufika ku kitango 8, kyepelo 11.
Nangwa’mba “mwayila mizhilo ya bantu.”
Mu Kingiliki, poneya. Monai Mutanchi.
Nangwa’mba “kufuma ku ntendekelo.”
Nangwa’mba “kukunyika kilungi.”
Nangwa’mba “mweo.”
Nangwa’mba “mweo.”
Nangwa’mba “mweo.”
Nangwa’mba “twakwatankana.”
Nangwa’mba “mwapasha balesa.”
Nangwa’mba “kolojanji.”
Nangwa’mba “kilende kya kivuluko.”
Nobe makilomita asatu. Monai bya Kulumbulula B14.
Nangwa’mba “kolojabo.”
Nangwa’mba “kolojami.”
Nangwa’mba “Kolojobe.”
Nangwa’mba “kilende kya kivuluko.”
Nangwa’mba “kolojami.”
Nangwa’mba “kilende kya kivuluko.”
Ko kuba’mba, nzubo ya Lesa.
Nangwa’mba “kwikala kya kusendalala ku tebulu.”
Ko kuba’mba, paunji wa bena Loma waesakene na magalamu 327. Monai bya Kulumbulula B14.
Monai bya Kulumbulula B14.
Monai bya Kulumbulula A5.
Nangwa’mba “kilende kya kivuluko.”
Nangwa’mba “mweo.”
Nangwa’mba “mweo.”
Nangwa’mba “mweo wami.”
Monai bya Kulumbulula A5.
Nangwa’mba “mu sawakya wetu?”
Monai bya Kulumbulula A5.
Nangwa’mba “muji na mwingilo wa.”
Mu Kingiliki, “mu kyaji kya.”
Nangwa’mba “mweo.”
Nangwa’mba “mweo.”
Nangwa’mba “wa kwimutekenesha.”
Nangwa’mba “nobe baana ba kishale.”
Nangwa’mba “mweo.”
Byambo byonse bya kuba’mba “awa” ne “aye” biji mu kyepelo 13 ne 14 bibena kwamba pa kyambo kya “nkwasho” kiji mu kyepelo 7. Yesu waingijishe kyambo kya “nkwasho” (mu Kingiliki kimenako mwanamulume) kwikitongola nobe muntu kwimenako mupashi wazhila, kechi muntu ne.
Nangwa’mba “nejiyukisha.”
Nangwa’mba “bakookela.”
Nangwa’mba “mu buumo.”
Nangwa’mba “mu buumo.”
Nangwa’mba “Bapaatulai.”
Nangwa’mba “kakola ka mayoo ka Kidelona.”
Nangwa’mba “nshiine.”
Nangwa’mba “mbanzhi.”
Nangwa’mba “Totai.”
Nangwa’mba “Mwipayilai pa kichi! Mwipayilai pa kichi!”
Nangwa’mba “mwipayilai pa kichi!”
Nangwa’mba “kukwipayila pa kichi?”
Nangwa’mba “ukana.”
Ko kuba’mba, ku ma 12 koloko mute.
Nangwa’mba “Mwipayilai pa kichi!”
Monai Mutanchi.
Monai Mutanchi.
Monai Mutanchi.
Monai Mutanchi.
Nangwa’mba “kusansakanya.”
Ko kuba’mba, mapaunji a bena Loma. Monai bya Kulumbulula B14.
Nangwa’mba “bamwipayijile pa kichi.”
Nangwa’mba “kilende kya kivuluko.”
Nangwa’mba “kilende kya kivuluko.”
Nangwa’mba “kilende kya kivuluko.”
Nangwa’mba “mukovu.”
Nangwa’mba “wamwekele.”
Nangwa’mba “masabi.”
Nangwa’mba “winyingile.”
Nangwa’mba “kechi wavuujiletu byonse ne.”
Nobe mamita 90. Mu Kingiliki, “nobe makyubichi 200.” Monai bya Kulumbulula B14.