BIBENA KUMWEKA MU NTANDA
Kwamba Pa Byalo Biji Ku North Ne South America
Masawakya afuma ku byalo bya ku muzhika abena kumwesha bukishinka bwa byambo bya mu Baibolo.
BYA KUKEPESHAKO BIJIKILA
Sawakya kufuma ku Vancouver, mu Canada waamba’mba, bantu bakonsha kukepeshako bijikila inge bakepeshako kutanga byambo byo bebatumina pa mafoni nangwa pa kompyuta. Kostadin Kushlev watangijile jibumba japaine uno sawakya, waambile’mba: “Bantu kibakatazha bingi kuleka kutanga byambo byo bebatumine pa foni nangwa pa kompyuta, pano bino kwikanya kwakonsha kwibakwasha kukepeshako bijikila.”
BYA KULANGULUKAPO: Tubena kwikala mu “bimye byakatazha.” Onkao mambo, nanchi kechi twafwainwa kwibikako kukepesheshako bijikila nenyi?—2 Timoti 3:1.
KUKANYA BANTU KWIPAYA MASABI
Kipamo kitala pa banyama ne bilengwa na Lesa, kya Wildlife Conservation Society (WCS) kyaamba’mba: “Mwingilo wa kukanya bantu kwipaya masabi [mu kyalo kya Belize ne mu mapunzha a Caribbean] ubena kwenda bingi bulongo kabiji masabi atendeka kuvula jikwabo.” Kyanungilepo’mba: “Pakonsha kupita myaka itanu na umo pa kuba’mba masabi atendeke kuvula jibiji, bino pa kubatu’mba akavule, pakapita myaka yavula bingi.” Janet Gibson, mukulumpe mu kipamo kya WCS, waambile’mba: “Kukanya bantu kwipaya masabi mu mapunzha amo mu kyalo [kya Belize] kukalengela masabi kuvula jibiji mu kino kyalo.”
BYA KULANGULUKAPO: Bilengwa byo bisemununa ne kuvula jikwabo, nanchi kino kechi kimweshatu’mba kuji Mulenga uji na maana nenyi?—Salamo 104:24, 25.
BUMBANZHI MU BRAZIL
Pepala wa byambo utelwa’mba Agência Brasil washimuna kuba’mba bumbanzhi bubena kuvujilakotu mu kyalo kya Brazil. Mu 2012, bantu kukila pa 56,000 bebepayile ku bambanzhi. Kipamo Kitala pa Bumi kyaambile’mba uno ye mwaka mo baipaile bantu bavula pa myaka yonse. Shayuka utala pa mutende, aye Luís Sapori waambile’mba kino kyamweshatu patoka’mba byubilo bya bantu bibena kutaminakotu. Waambile’mba bantu inge balengulula mafunde aamba pa bya kwikala na bakwabo, “batendeka bukapondo pa kuba’mba bobe byonse byo babena kukeba.”
NANCHI MWAYUKA NYI? Baibolo waambijile jimo amba kulutwe na lwendo, “butemwe bwa bavula bukakepa” kabiji bubi bukavujilako.—Mateo 24:3, 12.