Byo Twafwainwa Kuba na Muntu ye Bapanga mu Kipwilo

Kitukola bingi ku muchima inge mulongo wetu nangwa mulunda netu bamupanga mu kipwilo na mambo a kulenga mambo ne kubula kulapila. Byo tuba na lutangijilo lwa mu Baibolo pa uno mutwe byakonsha kumwesha kya kine byo twatemwa Lesa ne kwikala ba kishinka ku lunengezho lwanji.a Akimonai mepuzho bamo o bepuzha pa uno mutwe.

Twafwainwa kuba byepi na muntu ye bapanga mu kipwilo? Baibolo waamba’mba: “Mwikileke kupwanañana na muntu yense utelwa’mba mulongo bino saka oba bulalelale, nangwa wa lunkumbwa, nangwa upopwela bankishi, nangwa utukana, nangwa upendwapendwa, nangwa uja bya lunkanankana, muntu wa uno mutundu kechi mwafwainwa ne kuja nanji ne.” (1 Kolinda 5:11) Pa mambo a muntu yense “ubula kulondela lufunjisho lwa Kilishitu” tutanga’mba: “Kange mumutambwile mu nzubo yenu nangwa kumwimunatu ne. Mambo awa wamwimuna, wakwatankana nanji mu mingilo yanji yatama.” (2 Yoano 9-11) Kechi twafwainwa kwichina kala ne kwisamba bintu bya mu Baibolo nangwa majashitu akwabo na bantu bo bapanga mu kipwilo ne. Mwingilo Wetu wa Bufumu wa August 2002 mapa 3 ne 4 waambile’mba: “Lwimu lonkatu ko kwakonsha kufuma misambo nangwa kwisampa bulunda. Nanchi ne atweba byo byo tukeba kuba na bantu bo bapanga mu kipwilo nyi?”

Nanchi kino kibena kulumbulula’mba kechi twakonsha kwisambakotu nangwa pacheche nabo nenyi? Ee, mambo kuji bishinka byavula byakonsha kwitulengela kuba bino. Kitanshi, ke na mambo a kuba’mba twi ba kishinka kwi Lesa ne kuketekela Mambo anji. Kechi tukookelatu Yehoba umvwe bintu bibena kwitwendela bulongo ne, bino tumukookela nangwatu inge bintu bitukatazha. Kutemwa Lesa ko kwitulengela kukookela mikambizho yanji yonse, mambo ye waoloka kabiji wa butemwe ne mizhilo yanji ilengela muntu kumwenamo bintu byawama. (Isaya 48:17; 1 Yoano 5:3) Kya bubiji, kubula kupwanañana na ndengamambo wabula kulapila kwituzhikijila atweba ne kipwilo kyonse kubula konauna byubilo byetu byawama ne bulunda bwetu ne Lesa kabiji kulengela ne kipwilo kutelwa bulongo. (1 Kolinda 5:6, 7) Kya busatu, umvwe twakakachila ku mafunde a mu Baibolo twakonsha kukwasha muntu ye bapanga mu kipwilo kumwenamo bintu byawama. Inge twalondela byafuukulapo kavoto ka mambo, twakonsha kukwasha ndengamambo kulangulukishapo bulongo pa bukwasho bwa bakulumpe mu kipwilo bo akankelwe kulondela. Kubula kupwanañana nanji kwakonsha kumukwasha ‘kulubuluka muchima,’ ne kuyuka’mba walengele mambo akatampe pa kuba’mba abwele kwi Yehoba.—Luka 15:17.

Mwakonsha kuba byepi umvwe mulongo wenu bamupanga mu kipwilo? Mu bimye bya uno mutundu, bulunda bwetu bwa kisemi bwakonsha kweseka bukishinka bwetu ne Yehoba. Twakonsha kuba byepi na mulongo wetu ye bapanga mu kipwilo? Kechi twakonsha kwambatu byonse pa mambo a byo twafwainwa kuba umvwe kino kintu kitumwekela ne, pano bino twayai twisambeko pa bintu bibiji byanema.

Mu bimye bimo, ye bapanga mu kipwilo kampe ukikala na ba mu kisemi kyanji. Byo kiji kuba’mba kumupanga mu kipwilo kechi kwakonsha kupwisha bulongo na ba mu kisemi kyanji ne, bakonsha kutwajijila kwingijila pamo nanji mingilo ya pa juba pa juba. Pano bino, na mambo a byubilo byanji, aye mwine wionawina bulunda bo ajinga nabo na kisemi kyanji ne Lesa. Onkao mambo, inge tukeba kumwesha bukishinka bwetu kwi Yehoba kechi twakonsha kupwanañana nanji ne kubila nanji pamo mingilo ya Lesa ne. Inge muntu ye bapanga mu kipwilo uji ponka kimye kya kupopwela kwa kisemi kechi wakonsha kwambapo ne. Pano bino, umvwe mwana mucheche ye ye bapanga mu kipwilo, bansemi bafwainwa kutwajijila kumufunjisha ne kumukwasha kupimpula byubilo byanji. Onkao mambo, bansemi banji bakonsha kunengezha kumufunjishanga Baibolo.b—Byambo bya Maana 6:20-22; 29:17.

Mu jishinda jikwabo, mulongo wa ku mubiji ye bapanga mu kipwilo kampe ubena kwikala na bakilongo bakwabo. Nangwa kya kuba, kimye kimo mwakonsha kukeba’mba mwisambe nanji pa bintu bimo bya mu kisemi, mwafwainwa kuyuka pa kupelela. Bena Kilishitu ba kishinka mu kisemi kechi bengijisha mashinda akwabo a bubela kuba’mba besambilengamo na mulongo wabo ye bapanga mu kipwilo wikala kungi ne. Bukishinka bwabo kwi Yehoba ne jibumba janji bwibalengela kunemeka lunengezho lwa mu Binembelo lwa kupanga muntu mu kipwilo. Kubula kupwanañana na mulongo wabo ndengamambo kwakonsha kumulengela kupimpula byubilo byanji na mambo a kumujimunako.c—Bahebelu 12:11.