Nanchi Kyakonsheka Kwikala na Lwitabilo Lwakine Nyi?

MU 1522, MARTIN LUTHER WAAMBILE’MBA: “Lwitabilo lo luketekelo lwakosa lwa kuketekela lusa lwa Lesa, kabiji lwikala lwakine kyakuba muntu uji nalo wakonsha nekwilufwila.”

KABIJI MU 1999, LUDOVIC KENNEDY NAYE WAAMBILE’MBA: “Kiji nobe atweba bonse twaalukatu ke bantu ba kukyalo babula byubilo nelwitabilo lwa bwina Kilishitu.”

NDANGULUKILO pamambo alwitabilo yaenda kupusana. Kala bantu baitabijile bingi mwi Lesa. Ano moba mu ino ntanda muji luzhinauko nebuyanji, lwitabilo lwakine mwi Lesa ne mu Baibolo lubena kupelawizha kupwa.

Lwitabilo lwa Kine

Bavula balanguluka’mba “lwitabilo” kwitabilatu mu bintu bya bupopweshi nangwa’mba mwane kikulutu wimwina Lesa. Pano bino Baibolo yamba’mba “lwitabilo” lulumbulula luketekelo lwine, lwalumbuluka kabiji lwakosa mwi Lesa ne mu milaye yanji. Kyo kyubilo kiyukanyikisha muntu’mba mwana wabwanga wakwa Yesu Kilishitu.

Pakimye kimo, Yesu waambile pa mambo abuneme bwa “kulomba moba onse ne kukoka ne.” Pakwamba kino waipwizhepo ne jipuzho jaambilenga’mba kana lwitabilo lwakine lukekalako mu ano moba etu alelo nyi, nangwa ne. Waipwizhe’mba: “Mwana muntu byo akeya, ukatana [luno] lwitabilo panopantandanyi?” Nga mamboka oaipwizhizhe jino jipuzho?—Luka 18:1,8.

Lwitabilo Lwapwa

Bintu byavula byakonsha kulengela bantu kuleka lwitabilo. Bimo bya bino bintu ke buyanji ne meseko abwikalo bwa juba nejuba. Kyakumwenako, monai byaubile Pulofesa Michael Goulder wajinga mukulumpe wachechi mu Manchester, England mu 1958 kimye kyaubiwe mapuso a ndeke mumuzhi wa Munich mwafwile bantu bavula ba mu kipanyi kyabapamanga mpila kya Manchester United football team. Mujashi pa televizhonyi ya BBC, ñambi Joan Bakewell waambile’mba, “Goulder waumvwine ne mumanungo zukuzuku pakumona bantu byo baubishe bulanda.” Kimo kyafuminemo kyajinga kyakuba’mba “lwitabilo lwanji mwi Lesa ulamwina bantu ku malwa lwapwile.” Goulder wabwela walumbulula ne kyoaitabila kuba’mba “Baibolo . . . kechi kyakine byambo bya Lesa ne, ke byambotu byabubela bya bantu, kampe mujitu tubyambo twa Lesa tucheche twakutolaula-tolaula.”

Buku wa All in the Mind—A Farewell to God waamba’mba, kimye kimo lwitabilo lupwatu. Kino byobyo kyajinga ku munembeshi kabiji ñambi wa pawaileshi nepa televizhonyi aye Ludovic Kennedy. Waambile’mba kufumatu kubwanyike bwanji “luzhinauko lwa kuzhinauka Lesa lwailenga nakubailako pacheche kabiji kulutwe nalwendo lwapwiletu kyapwa kwapela nekupela.” Kyamweka nobe kafwako muntu wamukumbwile mikumbu yakine ku mepuzho anji oaipwizhenga ne. Lufu lwafwile bashanji pakalunga kamema lwamwekeletu nobe kukopa kwa jiso kabiji lwalengejile lwitabilo lwanji kupwijijila. Lulombelo lwa kulomba kwi Lesa “amba etusunge kubyamalwa bya pakalunga ka mema ne kubalwanyi” kechi lwaumvwanyikile ne, kimye bwato bwasendele bantu mwajinga nebashanji kyobebulukukile ne kwibonauna kumato ankondo abena German mu Nkondo ya kibiji ya Ntanda yonse.

Kubula lwitabilo kechi kyenyi ne. Mutumwa Paulo waambile’mba “[kechi] bonse baji na lwitabilo ne.” (2 Tesalonika 3:2) Mulangulukapoka nanchi? Nanchi kyakonsheka kwikala na lwitabilo lwakine mwi Lesa ne Byambo byanji mu ino ntanda muji luzhinauko lubena kwenda na kubailako nyi? Balaulabalaulai bulongo kibaba kyalondelapo mumone byokyaamba pa uno mutwe.