Lutekenesho ku Baji mu Makatazho

BANABALUME ne banabakazhi bakishinka bajingako kala byo bapitanga mu makatazho, balombanga na mukoyo kwi Lesa amba ebakwashe. Pano bino, bakebangapo ne mashinda a kukepesheshamo lukatazho, nabiji kubapo maana amo a kubombokelamo balwanyi babo. Kya kumwenako, Davida wachinchikile bya malwa na mambo a kuba waketekejile mwi Lesa kabiji ne na mambo a kuba aye naye wibikileko. Nga atweba lelo?

Umvwe mubena kupita mu lukatazho, javula mukebapo mashinda amo a kupwishishamo lukatazho lwenu. Kya kumwenako, inge mwaikala kwa kubula nkito, nanchi kechi mwakonsha kwibikako kya kine kukebapo mwingilo umo wakonsha kwimukwasha mu bwikalo bwenu ne kisemi kyenu ne nyi? (1 Timoti 5:8) Nangwa umvwe kya kuba mukolwa kikola kibula kupwa, nanchi kechi mukeba bashayuka ba michi ya ku kipatela kuba’mba bemukwashe ne nyi? Nangwatu Yesu wajinga na bulume kufuma kwi Lesa bwa kubuka bikola byonse po byapela, naye wayukile kino kuba’mba ‘ukolwa ye usaka ñanga [“dokotala,” NW].’ (Mateo 9:12) Bino nangwa byonkabyo, makatazho enu kampe kechi akonsha kupwishiwa ne; mwakonsha kutwajijila kuchinchika pa bimye bimo.

Mambo ka ne kuba mwamubula Yehoba makatazho enu mu lulombelo ne? Kya kumwenako, kimye kyo tubena kukeba nkito, kulomba ne kuketekela mwi Yehoba kuketukwasha kukana nkito iji yonse ibula kuswañana na mafunde a mu Baibolo. Kabiji tukachinuzhuka ‘kusendulwa kufuma ku lwitabilo’ na lunkumbwa nangwa lwiso lwa mali. (1 Timoti 6:10) Kya kine, kimye kyo tubena kufuukula bintu byanema bya nkito, mu kisemi, nangwa bya butuntulu bwa mubiji, twakonsha kutundaikwa na byambo byaambile Davida kuba’mba: “Utwike Yehoba kisendwa kyobe, ne aye ukakukosesha: Kechi ukamuleka mololoke amba atenkene nangwa jimotu ne.”—Masalamo 55:22.

Lulombelo lufuma mukachi ka muchima nalo lwakonsha kwitukwasha kwikala bashikimana mu milanguluko yetu ne kumona’mba makatazho etu kechi apwisha lusekelo lwetu ne. Mutumwa Paulo wajinga mwina Kilishitu wakosa wanembele’mba: “Mu bintu byonse kasa musolola kwi Lesa byo musaka monka mu lulombelo ne lusashijilo ne kuba sante pamo.” Mu ñanyi jishinda lulombelo lwa kine mo lwakonsha kwitukwasha? “Mutende wa Lesa ubula kuyukanyika, ukalama michima yenu ne milanguluko yenu mwi Kilishitu Yesu.” (Filipai 4:6, 7) Mutende wa Lesa “ubula kuyukanyika.” Onkao mambo, ukonsha kwitukwasha umvwe twaponena mu bya malwa. Mutende ‘ukalama michima yetu ne milanguluko yetu,’ kwitukwasha kuchinuzhuka muchima wakanswatu ne kuba bintu na bumbulwamaana, byakonsha kulengela makatazho etu kubailako.

Lulombelo lwakonsha ne kwalula bintu bitumwekela. Kimye mutumwa Paulo kyo bamutayile mu kaleya mu Loma, walombele bakwabo bena Kilishitu kumubikangamo ne aye mu milombelo yabo. Mambo ka Paulo kyo akebejilenga buno bukwasho? Aye wibanembejile’mba: “Nemusashijila kine kine namba, mube kino, mbwezhiwe koko ko muji bukiji.” (Bahebelu 13:19) Mu jishinda jikwabo, Paulo wayukile’mba Yehoba pa kumvwa milombelo ya mukoyo ya bakwabo ba mu lwitabilo wakonsha kwalula bintu ne kumona kimye kyo akonsha kufumishiwamo.—Filemonyi 22.

Nanchi lulombelo lwakonsha kukepeshako makatazho etu nyi? Lwakonsha. Pano bino, twafwainwa kuvuluka amba Yehoba Lesa kimye kimo kechi wakonsha kukumbula milombelo yetu monka motwakonsha kukebela ne. Paulo walombelenga bimye byavula bingi na mambo a “mwiba mu mubiji” wanji wamumanyikilenga bingi. Nangwa byonkabyo, mu kifulo kya kupwisha lukatazho, Lesa wamwambijile Paulo amba: “Bupe bwami bwakuwaina: mambo mu kunekena mo bulumbulukila bulume bwami.”—2 Kolinda 12:7-9.

Byo ibyo, makatazho etu kechi akonsha kwamunwa kwi atweba ponkapotu ne. Nangwa byonkabyo, tukekala na kimye kya kumwesha byo twaketekela Lesa wetu wa mwiulu. (Yakoba 1:2-4) Shiinwai kuba’mba, nangwa kya kuba Yehoba Lesa kechi ufumyapo makatazho ne, aye wakonsha ‘kwimumwena ne jishinda ja kupulukilamo, amba mumone mwa kwilukonshesha.’ (1 Kolinda 10:13) Kyanema bingi kumona’mba Yehoba aye “Lesa wa bukwasho bonse; ye witukwasha mu bya malwa byetu byonse.” (2 Kolinda 1:3, 4) Lesa wakonsha kwitupa byo tukeba pa kuba’mba tukose, kabiji tuji na luketekelo lwa bumi bwa myaka.

Byambo bya Lesa Baibolo, bitupa mulaye wa kuba’mba Yehoba “ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne.” (Lumwekesho 21:3, 4) Nanchi kimukatazha kwitabila amba ntanda mwabula makatazho ikekalako nyi? Kyakonsha kwimukatazha umvwe kya kuba mwikala bwikalo bwa kupita mu malwa. Bino nangwa kikale byonkabyo, Lesa walaya kuba’mba, kechi kukekala bintu bya kuchina nangwa bya malwa biji byonse ne, kabiji byonse byo akeba kuba kine bikobiwa.—Isaya 55:10, 11.

[Bipikichala pa peja 9]

Kufuma mu bulanda ne kwikala na lutekenesho