Bwina Kilishitu bwa Kine Bubena Kuya Palutwe
MU MYAKA kitota kitanshi, mwingilo ye aingijilenga Yesu Kilishitu walajile bingi bantu michima kuzhokoloka mwaya ntanda yonse. Byambo byanji byajinga bya lutundaiko, bipana maana, kabiji byaletejilenga bantu lusekelo mu jishinda ja kukumya. Aba bavula bamumvwinenga kasa amba, byambo byanji bibafikile bingi pa muchima.—Mateo 7:28, 29.
Yesu wakainetu nsalansala kwivwanga mu bupopweshi bwamanyikañananga ne bumulwila ntanda bwajingako mu moba anji. Aye wipelwile mwine ne kumusolomoka ku bantutu basujilwe. (Mateo 11:25-30) Wayukishetu patooka ngovu ya mipashi yatama iji panopantanda kabiji waingijishe ngovu yo bamupele kwi Lesa kushinda ino mipashi. (Mateo 4:2-11, 24; Yoano 14:30) Yesu mu busendwe bwanji walumbulwile bulongo kukwatankana kukatampe kuji pakachi ka buyanji ne bundengamambo, kabiji mu butemwe bwanji waambile pa Bufumu bwa Lesa kuba’mba bo bukaleta mutende wa kikupu. (Mako 2:1-12; Luka 11:2, 17-23) Kyapeleleko, wafumishepo mfishi yajingapo kimye kyalepa ya kubula kuyuka bumuntu bwa Shanji, ne kulengela jizhina ja Lesa kuyukanyikwa ku boba bonse baji na lusekelo lwa kukeba kwikala balunda ne Aye.—Yoano 17:6, 26.
Onkao mambo, kechi kya kukumya ne, kuba’mba baana ba bwanga ba kwa Yesu bakumbenye bukiji mambo anji aji na bulume nangwa kyakuba bebayanjishe pakatampe ku bapopweshi ne bamulwila ntanda. Mu myakatu nobe 30, bipwilo bya bwina Kilishitu byakosa byalengelwe mu Africa, Asia, ne mu Europe. (Kolose 1:23) Bukine Yesu bo afunjishe, bwafikile pa michima ya bantu bepelula ne bakishinka ba mu Bufumu bonse bwa bena Loma.—Efisesa 1:17, 18.
Pano nanchi nga bano baana ba bwanga bakatataka bafumine mu bantu banonshi ne bayanji, bisho byapusana, mishobo, ne bupopweshi bwapusana pusana, baishile byepi kukwatankena pamo mu bukine bwa “lwitabilo lumo,” nobe byonka byaambile mutumwa Paulo? (Efisesa 4:5) Kika kibakwashishe “kwamba jiwi jimo jonka” pakuba amba babule kupusenamo? (1 Kolinda 1:10) Byo kiji kuba’mba kuji bingi kubula kukwatankana kwa bantu bamba’mba bena Kilishitu lelo jino, kyawama nanchi patanshi tukimone Yesu aye mwine byo afunjishe.
Kishina Kilengela Bena Kilishitu Bakine Kukwatankana
Kimye kyo bamutotolweshenga kwi Pontiusa Pilato, Yesu watongwele kishina kilengela bena Kilishitu kukwatankana. Waambile’mba: “O mambo o nasemenwe, ne o naishijile panopantanda, namba nshimune bya bukine. Ne bonse ba bukine bomvwa jiwi jami.” (Yoano 18:37) Onkao mambo, kulondela mafunjisho a Yesu ne Byambo bya Lesa byanembeshiwa na mupashi, Baibolo, byo bibalengela baana ba bwanga bakine ba kwa Kilishitu kukwatankana.—1 Kolinda 4:6; 2 Timoti 3:16, 17.
Kya kine kuba’mba, pa bimye bimo baana ba bwanga ba kwa Yesu bakonsheshe kwikala na mepuzho a kine ne kupusenamo mukachi kabo. Abya nanchi kika kyakonsheshe kwibakwasha? Yesu walumbulwile’mba: ‘Aye mupashi wa bukine, byo akeya, ukemutangijila ku byonse bya kine; mambo aye kechi ukambanga byanji mwine ne; pakuba byonkabya byo akomvwa, byo byo akamba: ne aye ukemubula bintu bikamweka.’ (Yoano 16:12, 13) Mu jino jishinda, mupashi wazhila wa Lesa wakonsheshe kukwasha baana ba bwanga bakine ba kwa Yesu kumvwisha bukine bo aambilenga Lesa. Kabiji uno mupashi wakonsheshe kupanga bipangwa mwi abo nabiji butemwe, lusekelo, ne mutende, bino byonse byakonsheshe kwibalengela kukwatankana mukachi kabo.—Byubilo 15:28; Ngalatiya 5:22, 23.
Yesu kechi waswishishe lutobo nangwa kulenga tumabumba mukachi ka baana banji ba bwanga ne; nangwa kwibetabizha kutuntulula bukine bwa mu Baibolo kuba’mba buswañane na bisho bya kisemwa nangwa bya mu bupopweshi bwa bantu bo batainenga ne. Bino, bufuku bwapeleleko kwikala nabo, walombele na mukoyo amba: “Kechi nebalombela abo bonka ne, pakuba ne abo nabo bakangitabila amiwa na byambo byabo; namba bonse bekale ke umo; byonka biji anweba, Tata, byo muji mwi amiwa ne amiwa mwi anweba, byonkabi ne abo nabo bekale mwi atweba: namba ba panopantanda betabile’mba anweba yenu mwantumine.” (Yoano 17:20, 21) Onkao mambo nanchi kukwatankana kwawama, na mupashi ne na bukine kwaikala ke kayukilo ka kuyukilako baana ba bwanga ba kwa Kilishitu kufumatu patatwijile bwina Kilishitu kufikizha ne ano moba etu a lelo. (Yoano 4:23, 24) Bino machechi a lelo jino kechi akwatankana ne, aabenamo. Mambo ka?
Ene Mambo Machechi kyo Aabenamo
Kwambatu kine, bisho ne byubilo byapusana pusana biji mukachi ka bantu bamba’mba bena Kilishitu lelo jino, kechi byakwatankanapotu nangwa pacheche na mafunjisho a kwa Yesu ne. Munembeshi umo wa byambo waambile’mba: “Byonka byo kyajinga kukala, ne lelo jino bena Kilishitu bakatataka betabila byonse bifuma mu Baibolo byaswañana na bintu byo bakeba—ne kusuula binembelo byabula kuswañana na mafunjisho a bupopweshi bwabo.” Abino byo byaambijile jimo Yesu ne batumwa banji amba bikobiwa.
Kya kumwenako, mutumwa Paulo byo atangijilwe na mupashi, wanembejile mukwabo mukulumpe mu kipwilo aye Timoti amba: “Kimye kikeya kyo bakabula kuswa mafunjisho alumbuluka; bino byo baji na matwi ababana, bakevujishisha abo bene bafunjishi ba monka mwayila bya kusakasaka byabo; kabiji bakafutulwila matwi abo kungi kufuma ku bya bukine, ne kusendukila ku bishimitu.” Nanchi bena Kilishitu bonse basendwilwe nyi? Ine. Paulo watwajijile amba: “Pakuba obewa wikale watekanya mu bintu byonse, saka ukosa mu bya malwa, ne kuba mwingilo wa busapwishi bwa mambo awama, ne kupwisha bulongo mingilo yobe.” (2 Timoti 4:3-5; Byubilo 20:29, 30; 2 Petelo 2:1-3) Timoti ne bena Kilishitu bakwabo bakishinka balondejile kuno kufunda kwanembeshiwe na mupashi.
Bena Kilishitu Bakine Batwajijila na Kukwatankana
Byonka byajinga Timoti, bena Kilishitu bakine lelo jino bekala batekanya kupichila mu kukana milanguluko ya bantu ne kwitabakotu Binembelo bibatangijila mu bintu byo baitabilamo. (Kolose 2:8; 1 Yoano 4:1) Mu kupashañanya bena Kilishitu ba mu myaka kitota kitanshi, Bakamonyi ba kwa Yehoba nabo babena kwingila mwingilo wabo mu byalo kukilaila pa 230, kusapwila mambo ene a kwa Yesu, mambo awama a Bufumu ku bantu konse konse. Monai mashinda ana anema o bakwatankenamo mu kulonda Yesu ne bwina Kilishitu bwa kine kechi na mambo a kumapunzha apusana pusana ko bekela ne.
Lwitabilo lwabo lwaimena pa Mambo a Lesa. (Yoano 17:17) Pulisiti wa mu Belgium wanembele pe abo amba: “Kintu kimo kyo twakonsha kufunda kwi abo [Bakamonyi ba kwa Yehoba] ke kwipana kwabo kwa kukebesha kuteleka ku Mambo a Lesa ne kuchinchika kwabo kwa kusapwila ano mambo.”
Baketekela mu Bufumu bwa Lesa kuba’mba bobukapwisha makatazho onse aji panopantanda. (Luka 8:1) Mu muzhi wa Barranquilla, mu Colombia, Kamonyi umo wasapwijile ku muntu umo utundaika bingi bya bumulwila ntanda wa jizhina ja Antonio. Uno Kamonyi kechi waambilepo byambo bya bumulwila ntanda bya kutundaika jibumba jajingamo yewa muntu nangwa kwambapo byambo bya kutundaika jibumba jikwabo ja bumulwila ntanda ne. Aye wamubujiletu Antonio amba amufunjishenga Baibolo pamo na banyenga yanji kwakubula kulipilapo kiji kyonse ne. Kechi pabanjile ne kubandatu ne, Antonio waishile kuyuka’mba Bufumu bwa Lesa kine bo bonkatu bwakonsha kuleta luketekelo ku bantu bayanda mu Colombia ne kuzhokoloka mwaya ntanda yonse.
Banemeka jizhina ja Lesa. (Mateo 6:9) Kimye kitanshi Bakamonyi ba kwa Yehoba kyo basambakene ne Maria, awo wakosele kya kine kine mu Katolika, waikalanga mu Australia, waswishishe Bakamonyi amba bamumweshe jizhina ja Lesa mu Baibolo. Abya panyuma ya kumumwesha waubilepo byepi? Waambile’mba: “Kimye kitanshi kyo namwene jizhina ja Lesa mu Baibolo, najijile. Natemenwe bingi pa byo nafwanyijilwe kuyuka ne kwingijisha jizhina ja Lesa.” Maria watwajijile kufunda Baibolo, kabiji kimye kitanshi mu bumi bwanji, waishile kumuyuka Yehoba byo aji ne kwikala mulunda nanji wa kine kine.
Bakwatankana mu butemwe. (Yoano 13:34, 35) Pepala wa byambo umo wa mu mizhi ya The Ladysmith-Chemainus Chronicle, mu Canada, washimwine’mba: “Kikale mwaitabila mu bupopweshi bwa byepi nangwa byepi, nangwa kechi mujipo na bupopweshi buji bonse mo muya ne, bino mwafwainwa kutakaika Bakamonyi ba kwa Yehoba 4,500 baingijile bufuku bonse mulungu wapwa ne kichika na kushimika Nzubo ya Kupwilamo Kukatampe yaesakana monse mu bula ne mu bwipi mamita 2,300 mu muzhi wa Cassidy . . . Uno mwingilo byo bamwingijile na lusekelo kwakubula kwitala kutunwa, kwitobosha nangwa kukeba kutumbalelapo ne, kimwesha kuba’mba kano ko kayukilo ka bena Kilishitu bakine.”
Pano akilangulukai pa bintu byo twaambapo. Nangwa kyakuba aba bafunda bya bupopweshi ba mu Kilishitendomu, bamishonale, ne bantutu baya ku chechi batwajijila na mabano mu machechi abo, bino bena Kilishitu bakine abo babena kuvujilakotu kikupu mwaya ntanda yonse. Kwambatu kine, bena Kilishitu bakine babena kwingila mwingilo wabo ye bapewa wa kusapwila ne kufunjisha Mambo a Lesa. (Mateo 24:14; 28:19, 20) Umvwe ne anweba ‘mwikizha kyefu ne kubinza’ na mambo a bya bunya bibena kubiwa kabiji mwatana lukatazho na mambo a kubula kukwatankana mu bupopweshi bwa Kilishitendomu, twimutundaika kwivwanga ku Bakamonyi ba kwa Yehoba bakwatankana mu mpopwelo ya bwina Kilishitu bwa kwa Lesa yenka wakine, Yehoba.—Ezikyo 9:4; Isaya 2:2-4.