Bupopweshi ka bo Mwafwainwa Kusala?

‘BUPOPWESHI bwapusana pusana ke mashindatu apusana pusana abena kuya kuntu kumotu. Kishinka ke kya kuba’mba kujitu Lesa umo, ke ibyo ne nyi?’ Uno mulanguluko ye ujipo na bavula balanguluka’mba nangwa kya kuba kyanema kwikalapo mu bupopweshi bumo, kechi kiji na mambo na bupopweshi muntu boasala kuyamo ne.

Kimye kitanshi kulangulukapo, ino ñambilo yumvwanyika nobe ijitu bulongo, mambo kya kine kuba’mba kujitu Lesa umo, Wa bulume bonse. (Isaya 44:6; Yoano 17:3; 1 Kolinda 8:5, 6) Nangwa byonkabyo, kechi twakonsha kulengulula lupusano luji pakachi ka mabumba avula a bupopweshi amba kuba’mba engijila Lesa wa kine ne. Apusana bingi mu byubilo byao, lwitabilo, mafunjisho, ne bikebewa byao. Luno lupusano lwabaya bingi kya kuba aba baji mu bupopweshi nangwa mu jibumba jimo kibakatazha bingi kumvwisha nangwa kuswa bifunjisha bakwabo nangwa byo baitabilamo.

Bino Yesu waambile’mba: “Lesa ye Mupashi: ne bonse bamupopwela bafwainwa kumupopwela na Mupashi ne na bukine.” (Yoano 4:24) Nanchi kupopwela Lesa na bukine kuleta milanguluko yapusana pusana ya pa mambo a byoaji, nkebelo yanji, ne byo akeba kumupopwela nyi? Abya kyakonsha kuyilamo kuketekela’mba kechi kyo kine kintu kwi Lesa Wa bulume bonse kumupopwela mu jishinda jo tumupopwelamo nyi?

Bena Kilishitu ba Kine ba mu Myaka Kitota Kitanshi ne ba Luno

Kimye kimo bena Kilishitu ba mu myaka kitota kitanshi baikalanga na milanguluko yapusana pusana pa bintu. Kya kumwenako, byo aambilenga pa boba ba mu Kolinda, Paulo waambile’mba: “Bambujile mambo enu anweba balongo bami ku ba kwa Kelowe, amba, monka mwi anweba muji mapata. O o ano o mbenakunena namba, anweba pa muntu pa muntu, mubenakwamba’mba, Amiwa ne wa kwa Paulo; ne amiwa ne wa kwa Apolosa; ne amiwa ne wa kwa Kefasa; ne amiwa ne wa kwa Kilishitu.”—1 Kolinda 1:11, 12.

Nanchi Paulo wamwene luno lupusano amba lwatutu nyi? Abya muntu mwine wiubilanga byubilo byanji bya ku lupulukilo nyi? Ine kwalepeshatu! Paulo wakambizhe’mba: “Nemusashijila, anwebakwetu, monka mu jizhina ja Nkambo yetu Yesu Kilishitu, namba, bonse kasa mwamba jiwi jimo jonka, kechi mwikale ne mapata mwenu ne; poso mulamankane pamo na muchima umo ne milanguluko imo.”—1 Kolinda 1:10.

Ee bino, kukwatankana pamo mu lwitabilo kechi kwakonsha kwikalako kya kukanjikizha ne. Kwikalakotu umvwe bantu bamona bulongo bintu ne kufika pa mulanguluko umo ne kumuswa. Mu jino jishinda, lufunjisho lwa pa bunke lwa Mambo a Lesa ne kukebesha mu bukishinka kwingijisha byo wafunda ke mashinda anema bingi pa kuba’mba pekale kukwatankana kwaambiwepo na Paulo. Abya kuno kukwatankana kwakonsha kutanyiwa nyi? Byonka byo kyaambiwapo mu mutwe wafumako, Lesa waingila kimye kyabaya na bantu banji mu bujibumba. Nanchi kyakonsheka kuyuka jojo jibumba lelo jino nyi?

Mfweto iji Mukupwañena Pamo na Jibumba Jaitabizhiwa na Lesa

Davida pa kimye kimo waipwizhe’mba: “Anweba Yehoba ñanyi ukekala bwenyi mu tente wenu? Ñanyi ukekalanga pa mutumba wenu wazhila?” Kine jino ke jipuzho jafwainwa kulangulukwapo. Davida wakumbwile’mba: “Yenkaye wenda bulongotu ne kuba byaoloka, ne kwamba byakine na muchima wanji yense.” (Masalamo 15:1, 2) Kumvwisha Baibolo bulongo mu kuluñama kulengela muntu kuyuka bupopweshi bulondela bikeba Lesa. Apa bino, inge muntu ke apwañane na jino jibumba, wakonsha kwikala na bantu bapopwela Lesa mu kukwatankana ne ‘na mupashi ne na bukine.’

Nangwatu mu ino ntanda yabula lukwatankano, Bakamonyi ba kwa Yehoba bamwesha’mba kyakonsheka kwikala bakwatankana mu lwitabilo lumotu ne kubila bintu pamo. Mukachi kabo muji bantu bajinga kala mu bupopweshi ne mu bisho byavula byapusana pusana. Bamo Bakamonyi luno, kala bazhinaukanga pe Lesa nangwa kukana amba ufwako. Bakwabo nabo kechi balangulukangapotu ne kya kine pa bupopweshi ne. Mu bubwe bupopweshi bonse bwapusana pusana, bisho, ne butemwamaana mwafuma bantu luno bakwatankana mu bupopweshi bumo bubula kumweka panopantanda lelo jino.

Baibolo, Mambo a Lesa, o alengela amba kuno kukwatankana kwikaleko. Ee bino, Bakamonyi ba kwa Yehoba bayuka’mba kechi bakonsha kukanjikizha bantu bya kuba ne. Pano bino, basanchila jishuko jo baji najo ja kutundaika bantu kufunda mu Baibolo kuba’mba nsajilo yabo ya mpopwelo imene pa kyokyo kitendekesho kyakosa. Mu jino jishinda, bavula bakonsha kwikala na mfweto ifuma mu kupopwela Lesa na ‘mupashi ne na bukine.’

Lelo jino, kizumba kya kuponena mu byubilo byatama ne kongolwa kibabaye bingi. Kyanema bingi kusala bantu bawama kwendañana nabo. Baibolo waamba’mba ‘awa wenda na ba maana ukekala ke wa maana’ kabiji ne kuba’mba ‘kwendañana na babi ko kuvulañanya bisela byawama.’ (Byambo bya Mana 13:20; 1 Kolinda 15:33) Kupwañana na bapopweshi ba kine ba Lesa kuzhikijila. Onkao mambo, Baibolo wituvululako’mba: “Twilanguluke atwe bene na bene mu kwiubisha butemwe ne mingilo yawama; ne kuleka kupwila pamo, byo boba bamo, ne, poso kwifunda, ne kwibikishakotu byo mumona aja juba kasa jibenakufwenya pepi.” (Bahebelu 10:24, 25) Kine ano ke mapesho akatampe bingi umvwe balunda ba kine, balongo ne banyenga ba ku mupashi ke bekwashe bene na bene mu butemwe kufikizha mitembo yabo ya kwingijila Lesa!

Ottmar waambilepo pa uno mulanguluko. Wakomejile mu kisemi kya Bakatolika mu Germany, bino walekele kuya ku chechi. Walondolwele’mba: “Kimye kyonse kyo nayanga ku chechi, nabwelangapotu kwakubula kutolapotu nangwa kamo ne, ubatu nobe byonka byo naji kuya.” Nangwa byonkabyo, wajinga na lwitabilo mwi Lesa. Kepo amonañene na Bakamonyi ba kwa Yehoba ne kushiinwa washiinwe’mba kine abe bantu bakalume bakine ba Lesa. Wamwene buneme bwa kupwañana nabo. Luno wamba’mba: “Nabambakana bingi mu jibumba ja panopantanda ponse, kabiji mbena kwiumvwa wa mutende mu milanguluko ne mu muchima. Mbena kukwashiwa pachepache kwikala na maana alumbuluka a mu Baibolo. Kino ke kintu kikatampe bingi kwi amiwa.”

Lwito ku Boba Babena Kukeba

Bantu baji mu lumvwañano mu bujibumba bakonsha kwingila bingi bulongo mwingilo kukila boba babena kwiingijila bunke bunke. Kya kumwenako, mikambizho ya kwa Yesu ya kushajikapo baana banji ba bwanga yajinga ya kuba’mba: ‘Yainga na kwibasambisha ba mu mikoka yonse ya bantu baluke ke baana ba bwanga, ne kwibabatiza mu jizhina ja Tata ne ja Mwana ne ja mupashi wazhila; ne kwibafunjisha balamenga byonse byo nemukambizhe.’ (Mateo 28:19, 20) Uno mwingilo wakonsha kwingijiwa byepi bulongo umvwe kwaji kafwako lutangijilo nangwa jibumba? Nga muntu wakonsha kumvwina byepi uno mukambizho wa mu Binembelo umvwe wingijila Lesa bunke bwanji?

Mwaka wapwa, Bakamonyi ba kwa Yehoba mwaya ntanda basampainye mabuku alumbulula Baibolo 91,933,280 akatampe ne acheche, mabuloshuwa, kuvwangako ne magazini 697,603,247. Mu jino jishinda baambañene na bantu bavula bingi mu byalo 235 byambo bifuma mu Mambo a Lesa. Kino ke kishiino kishiina’mba jibumba jakwatankana pamo jingila mwingilo mukatampe bingi kukila muntu ubena kwingilatu bunke kwakubula ne wa kumukwashako ne.

Kununga pa kusampanya mabuku alumbulula Baibolo, Bakamonyi ba kwa Yehoba bafunjisha bantu mafunjisho a Baibolo kyatutu kwibakwasha kumvwisha bikeba Lesa. Mwaka wapwa, mafunjisho a Baibolo 5,726,509 afunjishiwe mulungu ne mulungu ku bantu umo umo nangwa mu bujibumba. Ino mikambizho ya mu Baibolo yakwasha bantu bavula kwala kitendekesho kyakosa kya kuyukilako pa kusala mpopwelo. Mwaitwa kwiya na kufunda bikeba Lesa byonka byo byaambiwa mu Baibolo. Apa bino panyuma ya byobyo mukasalepo anwe bene kyo mukoba.—Efisesa 4:13; Filipai 1:9; 1 Timoti 6:20; 2 Petelo 3:18.

Umvwe mukeba kutokesha Lesa pa muchima, kyanema bingi kwikala mu jibumba ja bupopweshi—pano bino, kechi kikaleikaletu mu jibumba jiji jonse ne. Pa kusala bupopweshi mwafwainwa kwimena pa maana alumbuluka a mu Baibolo, kechi kwikalatu kitabilambijinga nangwa kumvwatu kyumvwe umvwe byamba bantu ne. (Byambo bya Mana 16:25) Fundai bikebewa bya bupopweshi bwa kine. Byesakanyai na byo mwaitabilamo. Apa bino musalepo.—Mpitulukilo ya mu mizhilo 30:19.

[Bipikichala pa peja 7]

Bakamonyi ba kwa Yehoba bakwatankana mu ino ntanda yabula kukwatankana