Nanchi Ntanda Yakonsha Kukwatankana Nyi?

NANCHI ino ntanda ibena kunangijila ku mutende nyi, inyi ku malwa akatampe? Kyakonsheka kubiwa mu mbaji yonse ibiji.

Bantangi ba byalo bimo bamba amba mutende wa ntanda yonse wakonsha kwikalako. Kampe kyakatazhatu ke kutana mashinda mwakubila kino. Bantu bavula bomvwa bingi moyo ku ano mepuzho: Kyalo ka kiji na mabomba ashinchisha? Abya kana bakonsha kwiengijisha nyi? Ki ka kyakonsha kumweka umvwe beengijisha?

Kwesakana na mwapita bwikalo bwa bantu, bishinka bimwesha amba malwañano ne misalululo ya mishobo ke makatazho amo alengela amba kubule kwikala luketekelo lwa kukwatankana, kabiji bupopweshi nabo bubena kutumpulako mu kifulo kya kupwisha ano makatazho. Munembeshi wa byambo aye James A. Haught wanembele amba: “Kintu kyonse kilengela bantu kwabenamo kyakonsha kulengela bumbanzhi, kabiji bupopweshi bo bwine bwalengela bantu kwabenamo. Nangwa kya kuba bantu bavula bayuka’mba bupopweshi bulengela bantu ‘kuwama michima,’ kyamwekeshatu patoka amba bo bubena kulengela bantu kuba byubilo byatama.” Nembi aye Steven Weinberg naye wajingatu na mulanguluko wipashako. Wanembele’mba: “Mabano obiwa mu bupopweshi akonsha kulengela bantu bawama michima kuba bintu byatama.”

Nanchi luketekelo lwa kuba’mba bantu mwaya ntanda bakakwatankana ko luji nyi? Ee! Pano bino, kwesakana na byo mwaya mutange, kwakonsha kufuma kukwatankana kwa ntanda yonse kechi ku bantu nangwa bupopweshi bwa bantu ne.

[Mabulañano pa peja 3]

Nanchi ntanda iji nobe bomba uji kwipi na kulozeka nyi?