Balengejile Bwikalo Bwabo Kwikala na Nkebelo Nanchi ne Anweba Mwakonsha Kuba Byonkabye Nyi?

MULONGO umo mu kyalo kya Canada wa jizhina ja Marc watwelele nkito pa kampanyi kalenga minkinyi ingijisha boba bengila na bya mulwelele. Waingilangako nkito ya kimye kicheche aku saka engila bupainiya bwa kimye kyonse. Mukulumpe wa nkito wamupele Marc kifulo kikatampe pa nkito kuba’mba engilenga kimye kyonse ne kufolanga muzema wa mali. Nga Marc waubilepo byepi?

Nyenga wa jizhina ja Amy wikala mu kyalo kya Philippines waingilanga bupainiya bwa kimye kyonse aku saka afunda sukulu. Panyuma ya kupwisha, bamumwenejile nkito ya kimye kyonse yo afwainwe kwingilanga kimye kyabaya bino saiji ya kufola mali avula bingi. Nga Amy wasajilepo kuba ka?

Byafuukwilepo Marc byapusene na byafuukwilepo Amy, kabiji bintu byafuminemo byamwesheshe lujimuno lwa maana lwapainwe ku bena Kilishitu mu Kolinda kala. Mutumwa Paulo wanembele’mba: ‘Aba bengijisha bya panopantanda babule kukizhamo kwibingijisha.’—1 Ko. 7:29-31, NW.

Ingijishainga bya Panopantanda, Pano Kechi Mukizhemo Ne

Saka tukyangye kumvwa byamwekejile ba Marc ne Amy, twayai tumoneko pacheche mwatala kyambo kya kuba’mba “panopantanda” (nangwa’mba koʹsmos mu Kingiliki) kyaingijishepo Paulo mu nkalata yanji yo anembejile bena Kilishitu. Mu kino kibaba kya mu Baibolo, kyambo kya koʹsmos kitazha ku ino ntanda yo twikalamo, bantu bonse, kabiji ne bintu byonse byubiwa mu bwikalo bwa juba ne juba, nabiji mazubo, kajo, ne bivwalo.a Pa kuba’mba tupote bino bintu bikebewa pa juba pa juba, atweba bavula tukebewa kutwela nkito. Ee, kafwako mwakwikikwashisha ne, bino twafwainwatu kwingijisha bya panopantanda pa kuba’mba twingile mingilo yetu ya mu Binembelo ya kwimwena atweba bene ne ba mu kisemi kyetu bintu bitufwainwa. (1 Timo. 5:8) Nangwa byonkabyo, twayuka kuba’mba “panopantanda pakapita.” (1 Yoa. 2:17) Onkao mambo, twingijisha bya panopantanda monka mo kyafwainwa, bino ‘kechi kukizhamo ne.’—1 Ko. 7:31.

Na mambo a luno lujimuno lwa mu Baibolo lwa kwingijisha bulongo bya panopantanda, balongo ne banyenga bavula baeseka jibiji kumona biji bwikalo bwabo, kukepeshako kimye kyo bataya ku nkito, ne kupeezhako bwikalo bwabo. Panyuma ya kuba bino, bataine kuba’mba bwikalo bwabo bwawaminako mambo a kwikala na kimye kyabaya kya kwikala pamo na bisemi byabo ne kwingilako mwingilo wa Yehoba. Kabiji bwikalo bwabo byo bebupeezhako bwibalengela kubula kutaya kimye kyabaya na kuba bya panopantanda, kabiji batatu muchima kwi Yehoba. Nanchi ne anweba mwakonsha kupeezhako bwikalo bwenu kuba’mba mwingilenga kimye kyabaya mu kuba bintu bisangajika muchima wa Yehoba nyi?—Mat. 6: 19-24, 33.

“Luno Twafwenya Kwipi ne Yehoba Kukila Kala”

Marc wakwambiwapo kala, walondejile lujimuno lwa mu Baibolo lwa kubula kukizhamo kwingijisha bya panopantanda. Wakaine kutambula kyokya kifulo kikatampe kyo bamupele pa nkito. Byo papichile moba acheche, mukulumpe wa nkito waesekele kumujimbaika Marc kuba’mba atendeke kwingila yoya nkito kupichila mu kumwambila’mba usa kumunungilako ne mali akwabo. Bino Marc waambile’mba: “Lwajinga lweseko bingi, bino nakaine jibiji.” Walondolola kyalengejile kukana amba: “Mukazhami Paula ne ami mwine twakebele kupana bumi bwetu mu kwingijila Yehoba papelela bulume bwetu. Onkao mambo, twafuukwilepo kupeezhako bwikalo bwetu. Twalombele kwi Yehoba kuba’mba etupe maana mwa kufikizhizha kikonkwanyi kyetu, kabiji twatongwelepo juba jimo ja kutendeka kwingijila Yehoba kimye kyabaya.”

Paula waambile’mba: “Naingilanga nkito ya bunembeshi pa kipatela jisatu mu mulungu ne kufolatu mali afwainwa. Kabiji naingilanga ne bupainiya bwa kimye kyonse. Pano bino, byonka byaubile Marc, ne amiwa nakebelenga kwingijila Yehoba konse kwakebewenga bataya mbila ya Bufumu. Pano byo nanembele nkalata ya kuleka nkito, mukulumpe wami wa nkito waambile’mba napewa kifulo kikatampe kya kwikala mukulumpe wa banembeshi. Ino nkito ya bunembeshi mu kipatela yajinga ya kutakotu jisaka pa kufola mali, bino nakoselepotu namba kanatu ndeke nkito. Byo nabujile mukulumpe wami wa nkito kine kintu kyandengejile kuba’mba nkebe kuleka nkito, wantakaikile bingi pa lwitabilo lwami.”

Palutwe kacheche, ba Marc ne Paula batambwijile mwingilo wa kuya na kwingila bupainiya bwiikajila mu kipwilo kicheche kyaikela pa jikuji ja ku kyalo kya Canada. Ki ka kyafuminemo byo bavilukile? Marc washimuna’mba: “Panyuma ya kuleka kwingila nkito ya kufola mali avula yo naingila myaka yavula mu bwikalo bwami, naakaminwe bingi pa mambo a kimye kya kulutwe, bino Yehoba witupesheshe bingi pa mwingilo wetu wa busapwishi. Twi balusekelo bingi na mambo a kukwasha bantu kwingijila Lesa. Kabiji mwingilo wa kimye kyonse wakoseshe bingi masongola etu. Misambo yetu ikalatu ya pa bya kwingila mwingilo wa Yehoba. Luno twafwenya kwipi ne Yehoba kukila kala.” (Byubilo 20:35) Paula wanungako amba: “Umvwe waleka kwingila nkito ne kusha nzubo yawama, wafwainwa kukinka manungo mwi Yehoba. Ne atweba byo byo twaubile, kabiji Yehoba witupesheshe bingi. Balongo ne banyenga bo twatana mu kipwilo kyo tujiko betutemwa bingi. Bulume bwami bo natayanga ku nkito ya ku mubiji lelo jino mbena kwibwingijisha mu kukwashishamo bantu kuyuka Lesa. Nji bingi na lusekelo pa kwingila uno mwingilo.”

‘Naikele Bingi Bulongo, Pano Kechi Najinga na Lusekelo Ne’

Amy wajikwambiwapo kala aye wasajilepo jishinda jingi. Waswile kwingila yoya nkito ya ku mubiji yo bamupele ya kimye kyonse. Amy waambile’mba: “Mu mwaka mutanshi, najingatu bulongo wabambakana mu busapwishi, bino namwene kuba’mba nata bingi muchima ku nkito ya ku mubiji kukila kwingijila Yehoba. Bañambijile kuba’mba mfunjilepo mingilo ikwabo ya ku mubiji ne kwikala na kifulo kikatampe bingi pa nkito. Byo naishile kwikala na kifulo kikatampe pa nkito, nayangatu kimye kicheche mu busapwishi. Kyapeleleko, nalekele kusapwila.”

Byo avulukile kyokya kimye kyo aingilanga kala, Amy washimwine’mba: “Najinga bingi na mali avula. Naendaukanga bingi kwavula ne kwiyowa bintu byavula bingi na mambo a nkito yami. Bino kechi naikele wa lusekelo ne. Nangwa kya kuba najinga na mali, makatazho aubiletu mbwee. Nalangulukilepo bingi namba mmone kine kintu kyatama. Kepo naishile kutana amba, byo natele muchima na kukeba nkito ya ino ntanda, kwashajiletu tiki kuba’mba ‘nsendulwe kufuma mu lwitabilo.’ Kyafuminemo, byonka byaamba Mambo a Lesa, najinga na “bya bulanda byavula.”—1 Timo. 6: 10.

Pano uno Amy waishile kubapo ka? Mwine waambile’mba: “Nabujile bakulumpe mu kipwilo kuba’mba bankwashe ngikale jibiji na bulunda bwawama na Lesa, kabiji natendekele kupwila. Kimye kya kwimba lwimbo, natendekele kuchikauka. Navulukile kimye kyo najinga wa lusekelo myaka itanu yo naingilanga mwingilo wa busapwishi saka nji painiya, nangwa kya kuba pa kyokya kimye nayanjile ku mubiji. Nayukile kuba’mba nafwainwa kuleka kutaya kimye na kukeba mali avula ne kusambila kukebesha Bufumu. Natendekele kwingila nkito ya kifulo kicheche, kino kyalengejile’mba mfolenga kichika kya mali o nafolanga patanshi, kabiji natendekele kwingilako mwingilo wa kusapwila jibiji.” Amy uji bingi na lusekelo ne kwamba’mba: “Nataine bingi lusekelo pa myaka icheche yo naingijilenga bupainiya. Lelo jino natana kuba’mba nji bingi na lusekelo lo nabujile kwikalapo nalo kimye kyo nakoyokanga na kwingijila ino ntanda.”

Nanchi ne anweba mwakonsha kupimpulako bwikalo bwenu nyi? Umvwe mwaingijisha kimye kyo muji nakyo mu kutumbijika bya Bufumu, ne anweba mukekala bwikalo bwawama bingi.—Mana. 10:22.

[Tubyambo twa mushi]

[Mabulañano pa peja 19]

Nanchi ne anweba mwakonsha kupimpulako bwikalo bwenu nyi?

[Kitenguluzha/Kipikichala pa peja 19]

“Natemwa Bingi Mwingilo wa Kimye Kyonse!”

Mukulumpe mu kipwilo umo wa jizhina ja David wa ku United States naye wakebele kutendeka kwingila mwingilo wa busapwishi bwa kimye kyonse waingilangapo mukazhanji ne baana banji. Wanengezhezhe pa kampanyi ko aingilangapo kuba’mba engilengatu jimo jimo ne kutendeka kwingila bupainiya bwa kimye kyonse. Nanchi kino kyamuletejile lusekelo mu bwikalo bwanji nyi? Bañondo bacheche balondejilepo, David wanembejile mulunda nanji wa mulume amba: “Kafwako kintu kikwabo kyakonsha kuletela muntu lusekelo kyakila kwingijila Yehoba pamo na kisemi kyanji ne. Nalangulukile amba kikankatazha bingi pa kuba’mba nkapijilwe kwingila mwingilo wa bupainiya, pano namutemwa bingi uno mwingilo! Undetela bingi lusekelo.”

[Kipikichala pa peja 18]

Ba Marc ne Paula baji mu mwingilo