Nanchi Mukivuluka Nyi?

Nanchi mwamwenamo mu kutanga Byamba bya Usopa byakatataka nyi? Monai inge mwakonsha kukumbula ano mepuzho:

• Kimye ka ba maana kyo bayile na kumona Yesu?

Baibolo umo waamba’mba: ‘Aba ba maana kechi bayile na kumumona Yesu saka akiji mu kijilamo banyama pa juba jo asemenwe, byonka byaubile bakafunga ne. Bano ba maana bayile na kumumona panyuma ya kupitapo bañondo.’ Pa kyokya kimye Yesu wakijinga “mwana” wa pa maboko waikalanga mu nzubo. (Mat. 2:7-11) Umvwe Yesu bamupele ngolode ne bya bupe bya buneme, nanchi Maliya inge wapaine tuñonyi tubiji ku nzubo ya Lesa panyuma ya kupitapo moba 40 nyi?—1/1, peja 31.

• Bantu bavula bakonsha kuba byepi pa kuba’mba bwikalo bwabo bwikale na nkebelo?

Muntu wakonsha kwiipuzha’mba: ‘Nanchi nakonsha kupimpulako bwikalo bwami nyi?’ Amy byo byo aubile. Wajinga bingi munonshi, bino kechi wajinga wa lusekelo ne. Wataine kuba’mba, byo atele muchima na kukeba nkito ya ino ntanda, kwashajiletu tiki kuba’mba asendulwe kufuma mu lwitabilo. Onkao mambo, wafuukwilepo kusambila kukebesha Bufumu, kabiji kino kyamulengejile kwingilako bupainiya. Amy waamba’mba: “Lelo jino natana kuba’mba nji bingi na lusekelo lo nabujile kwikalapo nalo” kimye kyo nakoyokanga na kwingila mingilo ya ino ntanda.—1/15, peja 19.

• Ki ka kyakonsha kukwasha bansemi bamo ba bakazhi kwikala balusekelo?

Bansemi bavula ba bakazhi bengila. Bamo bengila ino nkito kuba’mba bapotemo bikebewa pa nzubo, bakwabo bakeba mali a kwisangajikilamo nangwa kupotamo bintu byo bakeba abo bene kwa kubula wa kwibakalakanya ne. Kabiji bakwabo nabo bomvwatu bulongo kwingila. Bansemi bamo ba bwina Kilishitu baji na mwingilo wanema bingi pa nzubo, kikatakata mwana inge ukiji mucheche. Bamo bafuukulapo kubula kwingila nkito ya ku mubiji kimye kyabaya nangwa kulekatu kwingila nkito kuba’mba bekalengako na kimye kya kulaminamo kisemi, kabiji kino kibaletela bingi lusekelo.—4/1, mapeja 26-29.

• Ñanyi “kisemi” kyo aambilengapo Yesu mu byambo byanji byanembwa pa Mateo 24:34?

Pavula Yesu po aingijishe kyambo kya kuba’mba “kisemi” watazhizhenga ku bubi byo aambilenga pa mambo a bantu batama. Bino kechi byo aambile ne, kimye kyo aambilenga ku baana banji ba bwanga bajinga pepi na kushingwa na mupashi wazhila. Bo bafwainwe kuyuka bulongo mwatajile byambo byatongolwa pa Mateo 24:32, 33. Onkao mambo, Yesu waambilenga pa baana banji ba bwanga, bajingako mu myaka kitota kitanshi ne bajiko mu ano moba.—2/15, mapeja 23-4.

• Mu ñanyi jishinda Mizhilo mo yaalukijile ke kalama, byonka byo kyaambiwapo mu Ngalatiya 3:24?

Kalama wa mu kimye kya kala waketekejilwe bingi, mambo ye walamanga bulongo mwana ne kulondela mikambizho ya shanja mwana. Popamotu, ne Mizhilo nayo yalamawizhanga Bayudea ku bintu byakonsheshe kwibaluwika, nabiji kwisongozhana na bantu babulanga kupopwela Lesa wa kine. Bino byonka byajinga kalama wa mwana, ne Mizhilo nayo yajingatu ya kimye kicheche, yaingijilenga kufikatu ne kimye kyaishile Kilishitu.—4/1, mapeja 18-21.

• Kwesakana na Yakoba 3:17, ñanyi byubilo byo twafwainwa kwikala nabyo?

Pa kuba’mba twikale na bukishinka, twafwainwa kukanatu nsalansala kuba bintu byatama. (Nte. 39:7-9) Kabiji twafwainwa kwikala ba mutende, kuchinuzhuka kuba bukaji, nangwa byubilo byakonsha kupwisha mutende. Atweba umo umo twafwainwa kwiipuzha amba: ‘Abya nayukanyikwa amba ndeta mutende nyi, inyi amba nekalwisha balunda? Nanchi ngubatu monka natobokela na bakwetu nyi? Abya nji na kizhingijisha nyi, nangwa yami ‘nzhingijisha bakwetu? Nanchi ndekelako bakwetu mambo ne kubula kwibakanjikizha amba baswe byubilo byami nyi?’—3/15, mapeja 24-5.

• Mambo ka Yesu kyo abukijile yewa muntu wajinga mpofu pachepache? (Mako 8:22-26)

Baibolo kechi wapana mukumbu waoloka bulongo ne. Nangwa byonkabyo, Yesu byo abukile yewa muntu mpofu, wamulabishengamo pachepache kuba’mba apilwe ne kumona bulongo. Kino kyamwesheshenga butemwe bwajinga ne Yesu pa yewa muntu mpofu.—2/15, peja 29.