Mwayuka Nyi?
Kimye ka ba maana kyo bayile na kumona Yesu?
Mu Mambo awama a kwa Mateo, betubula kuba’mba ‘ba maana ba ku musela’ bayile na kumona Yesu ne kumutwajila bya bupe. (Mateo 2:1-12) Kibelengelo kya bano ba maana nangwa’mba “bamagi” bayile na kumona Yesu kechi kyayukanyikwa ne, kabiji kafwapo kiyukilo kiji kyonse kimwesha’mba bajinga basatu byonka byayuka bantu bavula ne; kabiji Baibolo kechi wibatongola pa mazhina ne.
Mu Mateo 2:11, Baibolo wa New International Version Study Bible waamba’mba: “Kupusanako na byayuka bantu bavula, bano Bamagi kechi bayile na kumona Yesu mu kipaka kimye kya bufuku bwa juba jo asemekelwe byonka byaubile bakafunga ne. Abo baishile na kumona uno ‘mwana’ mu ‘nzubo’ kasa papita ne kala bañondo panyuma ya kusemwa kwanji.” Kino kyayukanyikwa na mambo a kuba Heloda byo akebelenga kwipaya uno mwana, wapaine mukambizho wa kwipaya baana bonse bachebache ba balume ba mu Betelema, ne ba monse mu mbaji, ne ba myaka ibiji, ne bakyangye kufikizha myaka ibiji. Wasajilepo kwipaya bano baana ba bachebache kupichila mu kuyuka bimino byabo ‘monka mo aumvwijile mwaka ku ba maana.’—Mateo 2:16.
Umvwe bano ba maana bayile na kumona Yesu bufuku bonka bwa juba jo asemekelwe ne kumuletela bya bupe, Maliya inge kechi wapaine tutela tubiji panyuma ya moba 40 pa kumupana Yesu mu nzubo ya Lesa mu Yelusalema ne. (Luka 2:22-24) Kupana tutela tubiji lwajinga lunengezho lwa mu Mizhilo ku bayanji babulanga kukonsha kupana mwana mukooko. (Bena Levi 12:6-8) Nangwa byonkabyo, bino bya bupe kyamweka byaishile pa kimye pafwainwa kabiji kampe byakwashishe bingi basemi ba kwa Yesu mu Ijipita.—Mateo 2:13-15.
Mambo ka Yesu o kyamutayijile moba ana pa kuba’mba afike ku kilende kya kwa Lazalasa?
Kyamweka nobe Yesu mo mo anengezhejile. Twakonsha kwambila ka bibye? Akilangulukai pa jishimikila jiji mu Yoano kitango 11.
Lazalasa waikalanga mu Betani kabiji mulunda wa kwa Yesu byo akolelwe kyabaya bingi, banyenga yanji batumine jiwi kwi Yesu. (Byepelo 1-3) Pa kikye kimye, Yesu wajinga palepa na Betani musinso wa kwendapo moba abiji nangwa kukilapo. (Yoano 10:40) Kyamweka Lazalasa wafwile kimye jiwi byo jakafikilenga kwi Yesu. Pano Yesu waubilepo ka? “Waikajile konka ko ajinga moba abiji,” bino pa ke aye ku Betani. (Kyepelo 6, 7) Onkao mambo, byo apembelejile moba abiji kabiji ne kwendapo moba akwabo abiji, wakafikile ku kilende pa juba ja buna kufuma pafwijile Lazalasa.—Kyepelo 17.
Patanshi, Yesu wasangwile bantu babiji—umo wamusangwile aku ufwatu kabiji mukwabo kyamweka wamusangwile pa kimye kikwabo pa jonka juba jo afwile. (Luka 7:11-17; 8:49-55) Abya wakonsheshe kusangula muntu wafwa sapapita kala ne moba ana ne mubiji watendeka kubola nyi? (Kyepelo 39) Buku umo waambapo pa Baibolo waamba kuba’mba, Bayudea baketekejile’mba “umvwe muntu wafwa papita ne moba ana, kechi wakonsheshe kusangulwa ne; mambo pa kikye kimye, mubiji watendeka kubola kabiji ne mweo ye baketekejile’mba wabakaminanga peulu ya uno mubiji pa moba asatu, naye ko kuba’mba wafumapo ne kufumapo.”
Umvwe bamo pa boba bapwijile ku kilende bajinga na luzhinauko, bajinga pepi kumona bulume bwa Yesu bo ajinga nabo pa lufu. Byo aimene ku kilende Yesu wabijikile na jiwi jikatampe amba: “Lazalasa, lupukaimo.” Kepo “aye wafwile walupukilemo.” (Kyepelo 43, 44) Mulanguluko wayuka bavula wa kuba’mba mweo wa muntu kechi ufwa ne, kechi lo luketekelo ku bantu bafwa ne. Lusanguko lo luketekelo lwa kine ku bantu bafwa.—Ezikyo 18:4; Yoano 11:25.