Bukalama baw kwa Satana Kechi Bukatwajijila Ne
“Mubi kechi ukamona byawama ne.”—SAPWI. 8:13.
1. Mambo ka buchibamambo buji kulutwe bwa babi kyo bwaikela bwa kutekenesha?
KATATAKATU babi bakebachibile mambo. Bakebatotolwesha pa byo boba. (Mana. 5:22; Sapwi. 8:12, 13) Kino kitekenesha bingi kikatakata ku boba batemwa bololoke ne boba bo bajila makusu pa mutwe kabiji bo bamanyika ku babi. Kintu kikatampe ke kya kuba’mba, pa babi bonse bo bakachibila mambo paji ne shanja bubi, aye Satana Diabola.—Yoa. 8:44.
2. Mambo ka o pakebewenga kupitapo kimye pa kuba’mba mambo akolomwenwe mu Edena apwe?
2 Mu Edena, Satana kupichila mu kwilundumika kwanji, walengejile bantu kukana bukalama bwa Yehoba. Kyafuminemo, bansemi betu batanshi baumvwijile Satana ne kulengulula buntangi bwa Yehoba kabiji baikele ke bandengamambo ku meso anji. (Loma 5:12-14) Kya kine, Yehoba wayukile kyakonsheshe kufuma mu milengulwila ne bunsatuki bwabo. Nangwa byonkabyo, malwa afumine mu kuba bino amwekele ku bilengwa byajimuka byonse. Onkao mambo, pakebewenga kupitapo kimye pa kuba’mba amweshe kuba amba bansatuki baubile kyatama.
3. Twafwainwa kwibumona byepi bukalama bwa bantu?
3 Bantu byo bakaine kutangijilwa ne Yehoba, balengele makafulumende abo a kwibatangijila. Mutumwa Paulo byo anembejilenga bena Kilishitu bakwabo mu Loma, watongwele ano makafulumende a bantu amba “bakulumpe balama kyalo.” Mu moba a kwa Paulo, bakulumpe balama kyalo, bajinga boba kikatakata bajinga mu Bufumu bukatampe bwa bena Loma bwatangijilwanga ne Nelo, awo walamine kufuma mu 54-68 C.E. Paulo waambile amba bakulumpe balama kyalo ‘batongolwa ne Lesa.’ (Tangai Loma 13:1, 2.) Nanchi kino kilumbulula kuba’mba Paulo watumbijikilenga bukalama bwa bantu kuba’mba bwakila bwa Lesa nyi? Kechi ibyo ne. Mu kifulo kya byobyo, waambilenga kuba’mba Yehoba byo aswisha bukalama bwa bantu kwikalako, bena Kilishitu bafwainwa kunemeka kyokya “kyatongola Lesa” ne kuswa bano bakalama.
Jishinda Jitwala ku Malwa
4. Lumbululai ene mambo bukalama bwa bantu kyo bukabujila kutwajijila.
4 Nangwa byonkabyo, bukalama bwa bantu bubena kutangijilwa ne Satana kechi bukatwajijila ne. Mambo ka? Kintu kimo ke kya kuba’mba kechi baji na maana ajipo na Lesa ne. Yehoba ye yenkatu uji na maana alumbuluka. Onkao mambo, ye yenkatu wafwainwa kulama bulongo. (Yele. 8:9; Loma 16:27) Kupusanako na bantu bafunjila bintu mu makatazho ne bilubo, Yehoba kimye kyonse uyuka jishinda jawama ja kubilamo bintu. Bukalama bubula kulondela mizhilo yanji kechi bukatwajijila ne. Mambo a kino, kwakubula kubikako milanguluko yatama yo aji nayo, Satana jishinda jo alaminamo kupichila mu bukalama bwa bantu jimwesha patoka kuba’mba wakankalwa kufumatu kuntendekelo.
5, 6. Ki ka kyalengejile Satana kusatukila Yehoba?
5 Muntu wa milangwe kechi weseka kuba kintu kikabula kutwajijila ne. Umvwe watwajijila na kwikyuba, wakonsha kwilangulusha pa kyo aubile. Mpito ya bwikalo bwa bantu yamweshatu pa kimye kyabaya kuba’mba kechi mufuma mfweto mu kulengulula Mulenga wa bulume bonse ne. (Tangai Byambo bya Mana 21:30.) Nangwa byonkabyo, Satana byo elundumikile ne kwitota, wasatukijile Yehoba. Onkao mambo, Diabola wasajilepo jishinda jitwala bantu ku malwa kyanshijitu.
6 Byubilo bya kwa Satana bya bwitote byamwekejile mu kalama wa bena Babilona awo witotelenga amba: “Amiwa nkakanjila mwiulu. Kabiji nkekajika jitanda jami mwiulu mwine kukila paji tubangabanga twa Lesa, nkekala pa mutumba wa kipwilo kya balesa ko kwine na ku kabeta ka ku buyeke; nkakanjila mwiulu kupitaila makumbi; amiwa nkealula ne kwesakana nanji pamo aye Mwine Wakila.” (Isa. 14:13-15) Bumbulwa kalango bwa bakalama kechi bwatwajijile ne, kabiji mu bukalama bwa bena Babilona mwafumine kalulu kuvimba meso. Po pamotu, Satana ne bantu banji katatakatu bakebonaune.
Mambo ka Lesa o Aswishisha Bantu Kwitolwela ku Bukalama Bwanji?
7, 8. Mfweto ka yafumamo Yehoba byo aswisha bubi kwikalako pa ka kimye kacheche?
7 Bantu bamo bakonsha kukumya ene mambo Yehoba o abujile kuzhikijila bantu kubula kwikala ku lubaji lwa kwa Satana ne kulonda bukalama bwanji bukabula kutwajijila. Byo aji Lesa wa Bulume Bonse, wakonsheshe kuba bino. (Lupu. 6:3) Pano bino, kechi wasakile kuba bino ne. Maana anji amwesheshenga kuba’mba kubula kuzhikijila bantu mu kumusatukila mu kuya kwa kimye kwakonsheshe kuleta bintu byawama. Kulutwe na lwendo, Yehoba ukatumbijikwa kwikala Kalama wakishinka kabiji wa butemwe, kabiji bantu bakishinka bakamwenamo mu byafuukwilepo Lesa.
8 Bantu bakonsheshe kwikala bingi bulongo kwakubula makatazho umvwe bakaine meseko a kwa Satana ne kuswa bukalama bwa Lesa. Nangwa byonkabyo, mu kufuukulapo kwa Yehoba kuleka bantu kwilama abo bene pa kimye kicheche mwafuma bintu byawama. Kyalengela bantu bamichima yakishinka kwikala na maana a kuteleka kwi Lesa ne kumuketekela. Pa myaka yavula yapitapo, bantu baeseka mashinda avula a kwilaminamo, bino kafwako nangwa jishinda jimo jaingila bulongo ne. Kino kishinka kyalengela bapopweshi ba Lesa kwikala na lwitabilo lwa kuba’mba bukalama bwa Yehoba bo bonkatu bwakonsha kulama bantu bulongo. Kya kine, Yehoba byo aswisha bukalama bwatama bwa kwa Satana kwikalako, kyalengela bantu kuyanda, kubikakotu ne boba bapopwela Lesa mu bukishinka. Nangwa byonkabyo, kuswisha bubi mu ka kimye kacheche kwalengela bano bapopweshi bakishinka kumwenamo.
Bunsatuki Bwalengela Bantu Kupa Yehoba Lukumo
9, 10. Lumbululai bukalama bwa kwa Satana byo bwalengela kupa Yehoba lukumo.
9 Kuswisha bantu kujimbaikwa ne Satana kabiji ne kwilama abo bene kechi kwalengela bukalama bwa Yehoba kulengululwa ne. Kupusanako na kino, mpito imwesha bukine bwa byambo byanembelwe na mupashi bya kwa Yelemiya bya kuba’mba bantu kechi bafwainwa kwitangijila bulongo abo bene ne. (Tangai Yelemiya 10:23.) Kunungapo, bunsatuki bwa kwa Satana bwapa Yehoba jishuko ja kumwesheshamo bulongo byubilo byanji byawama. Mu ñanyi jishinda?
10 Byo tumona bintu byatama byafuma mu bukalama bwa kwa Satana, byubilo byalumbuluka bya kwa Yehoba pano byamwekesha kukila ne byo byafwainwe kumweka. Mu jino jishinda, aba bamutemwa bamutumbijika. Ee kine, kyakonsha kumweka nobe paji milanguluko ibiji, pano bino jishinda jo alaminamo Satana jalengela kupa Lesa lukumo. Kino kyamwesha jishinda jawama Yehoba jo aingijilamo na luzhinauko lwa kuzhinauka bumfumu bwanji. Pa kulumbulula kino kishinka, twayai tumone byubilo bya kwa Yehoba bimo ne kumona bukalama bwatama bwa kwa Satana byo bwalengela Yehoba kumwesha byubilo byanji mu jishinda jakilamo kuwama.
11. Butemwe bwa Yehoba bwamweka byepi?
11 Butemwe. Binembelo bitubula kuba amba “Lesa ye butemwe.” (1 Yoa. 4:8) Kulengwa kwa bantu, kyo kyajinga kintu kitanshi kyamwesheshenga butemwe bwa Lesa. Kunungapo, jishinda ja kukumya jo twalengelwamo jimwesha butemwe bwa Lesa. Kabiji Yehoba mu butemwe wapele bantu muzhi wawama bulongo ne byonse bikebewa pa kuba’mba bekalenga balusekelo. (Nte. 1:29-31; 2:8, 9; Sala. 139:14-16) Bino bubi byo bwatendekele mu bantu, Yehoba wamwesheshe butemwe bwanji mu mashinda akwabo. Waubile byepi bino? Mutumwa Yoano wanembele byambo byaambile Yesu amba: “Lesa byo ebatemwisha ba panopantanda, wapaine Mwananji yenkawa umo amba, bonse bamwitabila kechi bonaike ne, poso amba bekale na bumi bwa myaka.” (Yoa. 3:16) Nanchi Lesa wakonsheshe kumwesha butemwe bwanji ku bantu mu jishinda jikwabo jakila jino ja kutuma Mwananji yenkawa umo panopantanda pa kuba amba akuule bandengamambo nyi? (Yoa. 15:13) Buno butemwe bwanji bupana kya kumwenako ku bantu, kibalengela kumwesha butemwe bwa Lesa bwa kwipana mu bwikalo bwabo bwa pa juba pa juba, byonka byaubilenga Yesu.—Yoa. 17:25, 26.
12. Bulume bwa Yehoba bwamwekela mu ñanyi jishinda?
12 Bulume. ‘Lesa, wa Bulume Bonse,’ ye yenka wafwainwa kupana bumi. (Lum. 11:17; Sala. 36:9) Mu ñambilo ya kifwanyikizho, umvwe muntu wasemwa, wikala nobe kipepala pabula kunembwa bintu. Umvwe wafwa, uyuzha kyokya kipepala na bintu byo afuukwilepo, byubilo ne bintu byo apichilengamo mu bwikalo bwanji kabiji ne byo ajinga. Bino byonse Yehoba wakonsha kwibivuluka. Mu kimye kyatongolwa, Yehoba wakonsha kubwezha yewa muntu ku bumi jibiji, kwesakana na monka mwaijile bwikalo bwanji. (Yoa. 5:28, 29) Onkao mambo, nangwa kya kuba kechi yo yajinga nkebelo ya Lesa ku bantu ne, lufu lwapa Yehoba jishuko ja kumwesha amba uji na bulume bwa kubwezha bafwa ku bumi jibiji. Kya kine, Yehoba ye ‘Lesa, wa Bulume Bonse.’
13. Kitapisho kya kwa Yesu kyamwesheshe byepi buchibamambo bwaoloka bwa Yehoba?
13 Bololoke. Yehoba kechi ubepa nangwa kuba byatama ne. (Mpitu. 32:4; Titu. 1:2) Kimye kyonse uba bintu kwesakana na mizhilo yanji yakine kabiji yaoloka, nangwa kya kuba, kuba bino kumweka nobe kechi kwanema ne. (Loma 8:32) Yehoba kyafwainwa kyamukolele bingi ku muchima, Mwananji ye atemwisha, aye Yesu byo afwile pa kichi kya lumanamo ubatu nobe wajinga wabula bukishinka nanchi ne. Pano bino, na mambo a kutemwa bantu bambulwa kulumbuluka, Yehoba walekele byonse bino kubiwa pa kuba amba alame mizhilo yanji yaoloka. (Tangai Loma 5:18-21.) Ino ntanda mwavula bubi yapele Yehoba jishuko ja kumwesheshamo amba ye mwine umwesha bololoke.
14, 15. Maana akilamo a Yehoba ne butekanye bwanji bimwekela mu ñanyi mashinda?
14 Maana. Panyumatu ya kuba ba Adama ne Evwa balenga mambo, Yehoba wasolwele jishinda jo akapwishishamo bubi bwaishileko na mambo a bunsatuki bwabo. (Nte. 3:15) Kuba bino bukiji bukiji ne kutwajijila kusolola bishinka pa mambo a ino nkebelo ku bakalume banji, kwalengejile maana a kwa Yehoba kumwekanyika. (Loma 11:33) Kafwako kintu nangwa kimo kyakonsha kulengela Lesa kukankalwa kupwisha makatazho ne. Ino ntanda muji byubilo byatama, nkondo, bantu bakosa michima, babula lukokelo, babula lusa, ba misalululo ne bujimbijimbi, Yehoba wajinga na jishuko ja kumwesheshamo biji maana a kine. Mwana wa bwanga Yakoba waambile amba: ‘Maana afuma mwiulu, patanshi o awamishatu, kabiji o a mutende, o akoka, o apela kusashilwa, o ayula lusa ne bipangwa byawama, o abula misalululo, o abula bujimbijimbi.’—Yako. 3:17.
15 Butekanye ne Kukoka Muchima. Byubilo bya Yehoba bya butekanye ne kukoka muchima kechi byakonsheshe kuyukanyikwa bulongo umvwe kya kuba wabujile kuyuka bulongo mwakubila na bumbulwa kulumbuluka bwa bantu, bundengamambo ne bilubo byabo ne. Yehoba byo epaine kuba bino pa myaka yavula yapitapo, kimwesha kuba’mba uji na bino byubilo byawama, kabiji na mambo a kino twafwainwa kumusanchila bingi. Mutumwa Petelo waambile bulongo kuba’mba: ‘Langulukai amba bukokamuchima bwa Nkambo yetu lo lupulukilo.’—2 Pe. 3:9, 15.
16. Mambo ka kwipana kwa kwa Yehoba kwa kulekela bantu mambo kyo kuletela lusekelo lukatampe?
16 Kwipana Kulekela Bantu Mambo. Bonse twibandengamambo, kabiji twituntula mu bintu byavula. (Yako. 3:2; 1 Yoa. 1:8, 9) Twibalusekelo bingi kuyuka kuba’mba Yehoba ulekela mambo “onsetu.” (Isa. 55:7) Kabiji langulukai ne pa kino kishinka kya kuba’mba: Byo twasemenwe babula kulumbuluka kabiji bandengamambo, twikala bingi balusekelo inge Lesa witulekelako mambo etu. (Sala. 51:5, 9, 17) Kumona bino byubilo bya Yehoba pa muntu pa muntu kwitulengela kumutemwa ne kulondela kya kumwenako kyanji mu byo tuba na bakwetu.—Tangai Kolose 3:13.
Ene Mambo Ntanda kyo Yatamina Bibye
17, 18. Bukalama bwa kwa Satana bwakankalwa mu ñanyi jishinda?
17 Pa myaka yavula yapitapo bukalama bwa kwa Satana bwa ino ntanda yonse bwakankalwa kulama bantu. Mu mwaka wa 1991, pepala wa byambo wa kuba’mba The European waambile amba: “Nanchi ntanda yakolwa nyi? Ee kya kine, bino ... kechi na mambo a byubilo bya Lesa ne, ntanda yakolwa na mambo a bantu bajimo.” Bino byambo byo byaikalapo bya kine! Bansemi betu batanshi byo bajimbaikilwe ne Satana, basajilepo bukalama bwa bantu kukila bukalama bwa Yehoba. Ne mu jino jishinda bakebelenga bukalama bukabula kutwajijila. Misongo ne bya malwa bibena kupitamo bantu mwaya ntanda, bimwesha kuba’mba bukalama bwa bantu buji na kikola kikatampe.
18 Bukalama bwa Satana bwayukanyikilwa ku byubilo bya lwiso. Nangwa byonkabyo, lwiso kechi lwakonsha kushinda butemwe ne, mambo bukalama bwa Yehoba bwaimena pa butemwe. Bukalama bwa kwa Satana bwakankalwa kuleta lusekelo nangwa mutende. Bukalama bwa kwa Yehoba bwatwajijila kutumbijikwa. Nanchi ne lelo jino tuji na biyukilo bimwesha kino nyi? Ee, tukesamba pa bino mu mutwe walondelapo.
Twafunda ka pa Mambo a Bukalama Kupichila mu Kutanga ...
• Loma 13:1, 2?
• Kolose 3:13?
[Bipikichala pa peja 25]
Bukalama bwa Satana kechi bwalengela bantu kumwenamo ne
[Byambo bya Muntu Ungi]
U.S. Army photo
WHO photo by P. Almasy
[Kipikichala pa peja 26]
Yehoba uji na bulume bwa kubwezha bafwa ku bumi jibiji
[Kipikichala pa peja 27]
Butemwe ne bololoke bwa Yehoba bwamwekejile mu kitapisho kya Mwananji