Muji na Bishinka Bimulengela Kwikala na Lusekelo

KUFUMATU ku ka jiselo kakilamo kukepa kufika ne ku myela yanshansha ikatampe, bilengwa bimwesha amba biji mu ndonda. Kino kechi kya kuzhinauka ne, mambo Mulenga “kechi ye Lesa wa kiwowo ne.” (1 Ko. 14:33) Kabiji tukumya bingi pa mambo a lunengezho lwa Lesa lwa mpopwelo. Akilangulukai pe Yehoba byo auba. Mu jibumba janji jikatampe jimo, wabikamo bantu ne bamalaika kabiji wibapa lūsa lwa kwifuukwila bintu ne kukwatankena pamo mu mpopwelo ya kine. Luno lunengezho byo lwawamapo!

Mu bena Isalela ba kala, lubaji lwa pano pa ntanda lwa jibumba ja Lesa lwaimenwangako na Yelusalema, mwajinga nzubo ya Yehoba mwaikalanga mfumu washingwa. Mwina Isalela umo wajinga muzha mu Babilona wamwesheshe byo eumvwinenga pa mambo a muzhi wazhila amba: “Lujimi wami naye akakachiletu mu kanwa kami, umvwe nabula kukuvuluka; umvwe nabula kutemwa Yelusalema kukila pa lusekelo lwami lonse.”—Sala. 137:6.

Nanchi ne anweba lelo jino byo byo mwiumvwa pa jibumba ja Lesa nyi? Abya jimuletela lusekelo kukila kintu kiji kyonse nyi? Nanchi baana benu bayuka jishimikila ja kala ja lubaji lwa jibumba ja Lesa ja pano pa ntanda ne byo lwaingilanga nyi? Abya bamwesha lusanchilo pa kwikala lubaji lwa bulongo bwa ntanda yonse bwa Bakamonyi ba kwa Yehoba? (1 Pe. 2:17) Nanchi kechi kyawama kuvwangamo bino bishinka mu Kupopwela kwenu kwa Kisemi pa kuba amba munungeko lusanchilo lwa kisemi kyenu pa mambo a jibumba ja Yehoba nenyi?

Vulukainga “Moba a Kala”

Pa mwaka pa mwaka, bisemi bya bena Isalela byakonkananga na kuja Kijiilo kya Lupitailo. Kijiilo byo kyatendekele, Mosesa wakambizhe bantu amba: ‘Baana benu byo bakemwipuzha mu moba akeya amba: Kino kyo ki ka? Mukebabule’mba: Yehoba witufumishe mu Ijipita, mu ntanda ya buzha, na bulume bwa kuboko kwanji.’ (Lupu. 13:14) Byaubile Yehoba ku bena Isalela byatwajijile kuvulukwa mu bwikalo bwa bantu. Kya kine, bansemi babalume bavula ba bena Isalela baubanga byonka bibakambizhe Mosesa. Mu mukoka walondejilepo, mwina Isalela umo walombele amba: “Twaumvwa na matwi etu, anweba Lesa, bashakulu betu betubula mingilo yo mwaingijilenga mu moba abo, mu moba a kala.”—Sala. 44:1.

Ku wakyanyike lelo jino, jishimikila ja Bakamonyi ba kwa Yehoba ja mu myaka kukila pa 100 yapitapo najo jakonsha kumvwanyika nobe “moba a kala.” Pano mwakonsha kukwasha byepi baana benu kumona amba jino jishimikila ja kine? Pa kuba amba bakwashe baana babo, bansemi bamo bengijisha buku wa Jehovah’s Witnesses—Proclaimers of God’s Kingdom, Yearbook, mashimikila anembwa mu magazini etu ne masawakyatu akwabo aamba pe Lesa, kuvwangakotu ne DVD wakatataka waamba pa bantu ba Lesa ba mu ano moba. Mavidyo aamba pa lumanamo lwapichilemo balongo betu mu kafulumende wa Soviet Union ne Nazi wa bena Germany akonsha kulengela bisemi kuketekela mwi Yehoba kimye kyo babena kupita mu meseko. Ingijishainga bino bingijisho pa Kupopwela kwenu kwa Kisemi. Kino kikakosesha lwitabilo lwa baana benu umvwe baesekwa na mambo a bukishinka bwabo.

Nangwa byonkabyo, kufunda pa bintu bya kala kwakonsha kulengela bakyanyike kubula kutako muchima. Onkao mambo bavwangaingamo baana benu. Kyakumwenako, mwakonsha kwambila mwanenu wa mulume kusala kyalo kyo atemwa, kumona bwikalo bwa kala bwa kyokyo kyalo, ne kubula kisemi kyanji bintu bimo byo afunjile. Mu kipwilo kyenu, mwakonsha kwikala bena Kilishitu baingila mu bukishinka pa myaka yavula bo mwakonsha kwitako ne kubila nabo pamo kupopwela kwenu kwa kisemi. Mwanenu wamukazhi kimo kimye wakonsha kwibepuzha mepuzho akonsha kwibalengela kwamba biji ku michima yabo kabiji ne kwamba byo bapitamo. Mwakonsha kwambila mwanenu kuvuluka bintu byanema mu bwikalo byaamba pe Lesa, nabiji kushimikwa kwa musampi, kukonkana kwa byalo nangwa kwingijisha bijimba bya malekodi mu mwingilo wa ku nzubo ku nzubo.

Yukai byo ‘Bingila Bulongo Byonse pa Kintu, pa Kintu’

Mutumwa Paulo waesakenye kipwilo kya bwina Kilishitu ku “mubiji yense, byo anungakana pamo ne kusambakana ke umo konka ku abya bipana manungi onse, pa kwingila bulongo byonse pa kintu, pa kintu, mubiji uya na kubaya ne kwikomesha mwine monka mu butemwe.” (Efi. 4:16) Kuyuka bingila mubiji wa muntu kwitulengela kumusanchila bingi Mulenga wetu ne kumunemeka. Byonkabyo, umvwe twapesapesa bingila kipwilo kya ntanda yonse, tukumya pa kumona ‘maana a Lesa a misango ne misango.’—Efi. 3:10.

Yehoba walumbulula jibumba janji, kuvwangakotu ne lubaji lwa mwiulu lwa jino jibumba byo jingila. Kyakumwenako, witubula amba patanshitu wapaine lumwekesho kwi Yesu Kilishitu, awo “watumine malaika wanji na kumubula kalume wanji Yoano; yenkawa washimwine mambo.” (Lum. 1:1, 2) Umvwe Lesa witubula bingila lubaji lwa jibumba janji jibula kumweka, nanchi kechi wakonsha kwitubula ‘bingila bulongo byonse pa kintu, pa kintu’ pano pa ntanda nenyi?

Kyakumwenako, inge kalama wa mwanzo ukeya na kwingijila kipwilo kyenu katataka, mambo ka a kubujila kwisamba na kisemi kyenu mingilo ingila bakalama benda ne mashuko o bekala nao? Betukwasha byepi atweba bonse pa muntu pa muntu? Mepuzho akwabo akebewa kwisambapo ke ano: Mambo ka o kyanemena kupana masawakya a mu mwingilo wa mu bujimi? Jibumba ja Lesa jifumya kwepi mali o jingijisha? Jibumba Jitangijila janengezhiwa byepi, kabiji jipana byepi kajo ka ku mupashi?

Umvwe twayuka byakwatankana bantu ba kwa Yehoba, kitukwasha mu mashinda asatu: Tusanchila pakatampe boba betwingijilako na ngovu. (1 Tesa. 5:12, 13) Betukwasha kutundaika lunengezho lwa Lesa. (Byu. 16:4, 5) Ne kyapelako, luketekelo lwetu mu boba betutangijila lubayilako inge twamona byaamba Binembelo pa mambo a bintu byo bafuukula ne lunengezho lubiwa.—Hebe. 13:7.

“Tajishai Bulongo Masakwa Anji”

“Pitañanai mu Ziona ne kumuzhokoloka; Balai byamba byanji; Tajishai bulongo masakwa anji; Langulukai bipango byanji: Namba, mukekibule kisemi kya kulutwe.” (Sala. 48:12, 13) Nyimbi wa masalamo watundaikilenga bena Isalela kumumwena pepi Yelusalema. Nanchi mwakonsha kufwanyikizha bisemi bya bena Isalela bayile mu muzhi wazhila ku kijiilo kya pa mwaka byo bavulukilenga bintu byawama byo bamwene ku nzubo ya Lesa nyi? Bafwainwa bakebeshenga bingi ‘kubula kisemi kya kulutwe.’

Akilangulukai pe mfumu wamukazhi wa ku Sheba, awo patanshitu wazhinaukile masawakya aambilenga pa bukalama bwawama ne maana a kwa Solomone. Ki ka kyamulengejile kuswa amba byo bamubujilenga byajinga bya kine? Waambile amba: “Amiwa kechi nebitabile ne, poso byo naiya ne kwibimona na meso ami ami mwine.” (2 Moba 9:6) Kya kine, bintu byo tumona na “meso” byakonsha kwitufika bingi pa muchima.

Mwakonsha kukwasha byepi baana benu kumona buwame bwa jibumba ja Yehoba na “meso” abo? Umvwe ofweshi wa musampi wa Bakamonyi ba kwa Yehoba uji kwipi na komwikela, inengezhai kuya na kufwakeshako. Kyakumwenako, Mandy ne Bethany, bakomejile ku mpunzha kwalepele makilomita 1,500 na kwajinga Betele wa mu kyalo kyabo. Pano bino, bansemi babo banengezhanga kuya na kufwakesha bino bishimikwa, kikatakata baana babo babakazhi byo bakikomenenga. Balondolola amba: “Saka tukyangye kuyapo ku Betele, twalangulukanga amba kwakatazha kabiji kwikalatu bakote, pano bino byo twayileko twataineko ne bakyanyike baingijijilenga Yehoba na bulume bwabo bonse ne na lusekelo. Twamwene kuba amba jibumba ja Yehoba kechi jajingatu ku mpunzha ko twikala ne, kabiji kimye kyonse kyo twayanga na kufwakesha ku Betele, kitulengelanga kufwenya kwipi ne Yehoba ne kwitutundaika kwingijila Yehoba na ngovu.” Kumwena jibumba ja Lesa pepi kwatundaikile Mandy ne Bethany kutendeka bupainiya, kabiji ne abo bebechile kuya na kwingijilako ku Betele pa ka kimye kacheche.

Tuji ne na jishinda jikwabo mo twakonsha ‘kumwena’ jibumba ja Yehoba, ko kuba amba jishinda jabujileko ku bena Isalela ba kala. Mu ino myaka, bantu ba Lesa baji na mavidyo ne ma DVD amwesha jibumba ja Lesa nabiji a kuba amba: Jehovah’s Witnesses—Organized to Share the Good News, Our Whole Association of Brothers, To the Ends of the Earth, ne United by Divine Teaching. Umvwe anweba ne kisemi kyenu mwamona bingila na ngovu boba bengijila pa Betele, bamingilo bakwasha bakwabo, bamishonale ne balongo banengezha kushonkena kwa nkambi, mukasantanga bingi pa bulongo bwa ntanda yonse.

Kipwilo kyonse kya bantu ba Lesa kiji na mwingilo wanema wa kusapwila mambo awama ne kukwasha bena Kilishitu bo bekala nabo. Nangwa byonkabyo, ikalainga na kimye pamo na kisemi kyenu kya kulanguluka pa “balongo benu baji panopantanda ponse.” Kuba bino kukemukwasha ne baana benu pamo kutwajijila kasa “mukosa mu lwitabilo.”—1 Pe. 5:9.

[Kipikichala pa pejae 18]

Jibumba ja Lesa Ke Mutwe Wanema Bingi ye Twafwainwa Kufunda

Tuji na bintu byavula byanengezhiwa byakonsha kukwasha bonse kufunjilapo byavula pa jishimikila ne bingila jibumba ja Yehoba. Ano mepuzho asakwimukwasha kufunjilapo byavula:

☞ Mwingilo wa bakalama benda lelo jino watendekele byepi?—Kyamba kya Usopa kya Kibemba kya November 15, 1996, mapa 10-15.

☞ Kintu ka kyanemene pa mambo a “Juba ja Baana” pa Kubuñana Kukatampe kwajingako mu 1941?—Kyamba kya Usopa kya Kibemba kya July 15, 2001, jipa 8

☞ Jibumba Jitangijila jifuukula byepi bintu?—“Bearing Thorough Witness” About God’s Kingdom, mapa 108-114.