Kechi Mwafwainwa Kusupilako ne Maloba ku Bakwenu ba mu Lwitabilo Ne

BA Jarosław ne bakazhi babo ba Beata bashimikizhe amba: “Twasendelwe na bya kutabataba bya mu ino ntanda mwayula bya busulu kabiji twanonkeleko pacheche. Nangwa kya kuba twakomejile mu bukine, twasendukilemo kabiji byo twakokele ku mupashi, twalangulukilenga amba kechi tukakonsha kukosa jibiji ne.”a

Mulongo mukwabo wa jizhina ja Marek uvuluka amba: “Na mambo a kupimpulwa kwa bwikalo ne bumulwila ntanda mu Poland, naubangatu natwela nkito yapwa, kabiji nakatwela ikwabo nayo yapwa. Nalefulwanga bingi. Nachiinenga kushinkula kampanyi wami, mambo kechi nayukile bya kwingila bulongo busulu ne. Palutwe kacheche, nashinkwile kampanyi, na mulanguluko wa kuba amba kino kikankwasha kulama kisemi kyami bulongo ku mubiji kwakubula konauna bumupashi bwami. Monka mu kuya kwa moba, nataine kuba amba kechi kyankwashishe ne.”

Mu ino ntanda muji mitengo ya bintu ibena kuyilako palutwe ne kukepa kwa makito, bantu bamo kibashinka bingi bulaka kabiji kino kibalengela kubula kufuukula bintu bulongo. Balongo bamo baswa kutwajijila kwingila mingilo nangwa panyumatu ya kimye kya kukotokelapo, kupajika nkito nangwa kutendeka busulu bwabo abo bene nangwa kechi bayuka bya kwingila bulongo bobo busulu ne. Balanguluka amba mali o bamwena mu ino mingilo ikwabo akakwasha kisemi kwakubula kukonyangala ku mupashi. Pano bino na mambo a bintu bisolomokatu nangwa kupimpulwa kwa bukomo kwakonsha kulengela bintu byo twafuukula bulongo kubula kulumbuluka. Ne kifumamo, bamo bafwa mu kitewa kya kwikala na lwiso kabiji bafungila bintu bya ku mupashi ku mbaji ne kutemwako bintu bya ku mubiji.—Sapwi. 9:11, 12.

Balongo ne banyenga bamo batwezhamo ne mutwe mu kupupila bya ino ntanda kya kuba kechi bekalapo ne na kimye kya kwikelamo na lufunjisho lwa pa bunke, kupwila, nangwa kwingilako mu mwingilo ne. Kya kine, kubula kuta muchima ku bino bintu konauna bumupashi ne bulunda bwabo ne Yehoba. Bano bakonsha ne kusankilapo bulunda bukwabo bwanema bo baji nabo na ‘bakwabo ba mu lwitabilo.’ (Nga. 6:10) Bamo batendekatu pachepache kwitolwela kufuma ku balongo babo bena Kilishitu. Akilangulukishaipo bulongo pa luno lubaji lwanema.

Byo Twafwainwa Kubanga ku Bakwetu ba mu Lwitabilo

Byo tuji balongo ne banyenga, tuji na mashuko avula bingi a kwimwesheshamo butemwe atweba bene na bene. (Loma 13:8) Mu kipwilo kyenu kampe mwamonapo kala ‘muyanji byo atama muteto’ nangwa amba kukeba bukwasho. (Yoba 29:12) Bamo bakonsha kukajilwa kajo. Mutumwa Yoano wituvulwilemo pa mambo a byo twafwainwa kuba kino. Waambile amba: “Aye uji na bya panopantanda, wamona mulongo wanji wakajilwa, kabiji washinka muchima wanji wa lusa ne kumutana, butemwe bwa Lesa bwaikala mwi aye byepi?”—1 Yoa. 3:17.

Kampe mwakyumvwinapo kala bino byambo kabiji ne kukwasha bantu. Pano bino kutemwa balongo betu kechi kwaimenatu pa kwibakwasha bintu bya ku mubiji ne. Bamo bakonsha kukeba bukwasho na mambo a kumvwa mukose nangwa kulefulwa. Bakonsha kwiumvwa nobe kechi bafwainwa kwingijila Yehoba ne, bakonsha kwikala na kikola kyabaya, nangwa kufwisha muntu ye batemwa. Jishinda jimo jo twakonsha kwibatundaikilamo ke kupichila mu kuteleka kimye kyo babena kwamba ne kwisamba nabo, kino kitulengela kwibakwasha kukasuluka mu milanguluko yabo ne kukosa ku mupashi. (1 Tesa. 5:14) Kuba bino kukosesha butemwe na balongo betu.

Bakafunga ba ku mupashi bo bafwainwa kikatakata kuteleka na muchima wa kifyele, kulangulukilako, kabiji ne kumwesha butemwe pa kupana lujimuno lwa mu Binembelo. (Byu. 20:28) Ne mu jino jishinda, bakalama balondela mutumwa Paulo wamweshanga amba ‘watemwishe’ balongo ne banyenga yanji ba ku mupashi.—1 Tesa. 2:7, 8.

Pano bino, umvwe mwina Kilishitu witolwela kufuma ku jitanga, kikala byepi pa mambo a mutembo wanji ku bakwabo ba mu lwitabilo? Kino kechi kilumbulula amba bakalama bekalatu kwakubula kupita mu lweseko lwa kupupila bintu bya ku mubiji ne. Pano kyakonsha kwikala byepi inge kya kuba mwina Kilishitu waponena mu luno lweseko?

Kunemenwa na Bijikila bya mu Bwikalo

Byonka byo twamona, kwingila pa kuba amba tumwene kisemi kyetu bintu bya ku mubiji bikebewa kwakonsha kuleta bijikila kabiji kwakonsha kwitulengela kubula kunemeka bintu bya ku mupashi. (Mat. 13:22) Marek waambiwapo ku ntendekelo walondolwele amba: “Busulu bwami byo bwabujile kutwajijila, nafuukwilepo kutwela nkito ya kufola mali avula mu kyalo kingi. Patanshi nayile pa bañondo basatu, kabiji nanungapo ne jikwabo bañondo basatu kabiji natwajijile kuba byonkabyo, bino saka mbwela ku nzubo moba acheche. Kino kyalengejile mukazhami wabujile kwikala mu lwitabilo kulefulwa.”

Kisemi kechi kyo kyonkatu kyayanjile ne. Marek watwajijila amba, “kununga pa kwingila maola avula saka kwakaba, naingijilenga na bantu batama bakebanga kujiila bakwabo makusu pa mutwe. Baubanga bintu nobe bambanzhi. Kyankatazhanga bingi mu milanguluko kabiji nafwilangatu mukachi. Na mambo a kukankalwa kumonapo kimye kya kwita muchima ku mubiji amiwa mwine, natendekele kuzhinauka inge kya kuba nakonsheshe kwingijila bakwetu bulongo.”

Kintu kyatama kyapichilemo Marek na mambo a mfuukwilo yanji kyafwainwa kwitulengela kuja ntuntu ne kulangulukishapo. Nangwa kya kuba kyakonsha kumweka nobe kuya na kwingijila ku byalo bingi kwakonsha kukepeshako makatazho a bya mali, nanchi kuba bino kechi kwakonsha kuvuzhizhakotu makatazho nenyi? Kyakumwenako, kino kyakonsha kulengela ba mu kisemi kyetu kwiumvwa byepi mu milanguluko kabiji kyakonsha kulamata byepi bumupashi bwabo? Nanchi ñendelo ya uno mutundu yakonsha kwitulengela kuleka kupwanañana na bakwetu ba mu kipwilo nyi? Nanchi kechi kyakonsha kwitulengela kwela jishuko jetu ja kwingijila bakwetu ba mu lwitabilo nenyi?—1 Timo. 3:2-5.

Nangwa byonkabyo, kampe byonka byo mwayukila jimo, muntu waya na kwingijila mu kyalo kingi kechi ye yenka wakonsha kutwezhamo ne mutwe mu nkito ya ku mubiji ne. Akimonai kyakumwenako kya ba Jarosław ne ba Beata. Baamba amba: “Patanshitu twikimwene nobe kyajingatu bulongo. Byo twisongweletu, twashinkwile ka shitolo kacheche kaikejile pa mpunzha yawama motwapotesheshanga nyama ya soseji. Na mambo a kuvula kwa nsubu ya mali etu, kitulengejile kubayishako busulu bwetu. Pano bino, twashalanga ku kupwila kwa kipwilo, mambo kechi twaikalanga na kimye kya kutanwako ne. Kechi papichile ne kimye kyabaya ne, nalekele bupainiya ne mwingilo wa bunkwasho mu kipwilo. Byo twatemenwe pa kubunda mali avula, twashinkwile shitolo mukatampe kabiji ne kutendeka kwingijila pamo na muntu wabulanga kupopwela Lesa. Mu kakimyetu kacheche, natendekele kuya mu byalo bingi na kumvwañana na bantu kumpa madola a mamilyonyi a kubilamo bya busulu. Pa nzubo nasumpukilangapotu jakamo kamo kabiji bulunda bwami na bakazhi bami ne mwanami wa mukazhi bwakepele. Kyapeleleko, buno busulu bukatampe bwitulengejile kukoka ku mupashi. Byo twalekele kupwila, twasupijileko ne maloba ku balongo ne banyenga yetu ba ku mupashi.”

Twakonsha kufunjilako ka ku kino? Kwikala na muchima wa kukeba kuja bya mabwenge kwakonsha kulengela mwina Kilishitu kufwa mu kitewa kya kwikala na lwiso kabiji ne kumulengelatu kuvula “bivwalo byanji,” ko kuba amba kayukilo kanji ka bwina Kilishitu. (Lum. 16:15) Kino kyakonsha kwitulengela kulubako balongo betu bo twakonsheshe kukwashanga.

Ipesapesai Kufuma Panshi ya Muchima

Twakonsha kwikunka mu kyaji kupichila mu kwamba amba ‘Kino kechi kyakonsha kummwekela ne.’ Pano bino atweba bonse twafwainwa kuteshako muchima ne kumona bintu bikebewa mu bwikalo bwetu. Paulo wanembele amba: “Kechi twaletelepo kintu panopantanda ne, ne kine byonkabyo kechi tukakonsha kusendapo kintu ne; kabiji pa kwikala na kajo ne bivwalo, byonkabyo tukasekela monka.” (1 Timo. 6:7, 8) Pano bino, bwikalo bwapusana pusana kwesakana na byalo. Bintu bimweka nobe kechi byanema mu byalo byanonka ne, byakonsha kwikala byanema mu byalo bikwabo byavula.

Kikale bwikalo bwetu ku mpunzha ko twikala buji byepi nangwa byepi, twafwainwa kulanguluka pa bino byambo bikwabo byaambile Paulo amba: “Aba baji na muchima usaka bunonshi baponena mu lweseko ne kufwa mu bwina, ne mu bya lwiso bya kukosama ne bya kwiipaya, byo bibebizha bantu mu lufu ne mu lonaiko.” (1 Timo. 6:9) Kitewa kechi kimwekanyika ne. Bekinengezha mu jishinda ja kuba amba kintu kifwemo kwakubula kuketekela. Twakonsha kubula kufwa byepi mu kitewa kya ‘bya lwiso bya kwiipaya’?

Kutangizhako bintu byanema kwakonsha kwitulengela kwikalako na kimye kya kutundaika bintu bya Bufumu, kubikakotu ne kwikala na lufunjisho lwa pa bunke. Luno lufunjisho lwakonsha kukwasha mwina Kilishitu kwikala “walumbuluka, wawaina” kukwasha bakwabo.—2 Timo. 2:15; 3:17.

Pa myaka icheche yapichilepo, bakulumpe mu kipwilo baingijile bingi mu butemwe kukwasha ne kutundaika ba Jarosław. Kino kibalengejile kupimpula bingi bwikalo bwabo. Baamba’mba: “Mu mwisambo umo wanema ye besambile, bakulumpe mu kipwilo baambilepo pa kyakumwenako kya mu Binembelo kyaamba pa nsongwalume munonshi wakebele kwikala myaka ne myaka, pano bino wabujilenga kukeba kusankilapo bintu byanji bya ku mubiji. Panyuma ya bino bangipwizhe bulongo inge kya kuba byambo byo twisambile byakonsheshe kunkwasha. Kino kyankwashishe kuyuka po nafwainwe kwingijila.”—Mana 11:28; Mako 10:17-22.

Ba Jarosław bepesele pesele kufuma panshi ya muchima kabiji bafuukwilepo kuleka kuba busulu bukatampe bo baubanga. Pa myaka ibiji yalondejilepo, abo ne kisemi kyabo bakosele jibiji ku mupashi. Lelo jino ke bakulumpe mu kipwilo babena kukwasha balongo babo. Ba Jarosław baamba amba: “Umvwe balongo batwezhamo ne mutwe mu bya busulu kya kuba balubako ne ku bintu bya ku mupashi, nebalondolwela bintu byo napitamo ne kwibabula ene mambo o kyatamina kwichina kala na bantu babula kupopwela Lesa. Kechi kyapela kukana nkito ya kufola muzema wa mali ne miteeto yatama ne.”—2 Ko. 6:14.

Marek naye wafunjijile bintu mu kitoba. Nangwa kya kuba nkito yo aingilanga mu kyalo kingi yajinga ya kutakotu jisaka pa kufola mali, yakwashishe kisemi kyanji mu bya mali, pano bino bulunda bwanji na Lesa ne na balongo banji bwatamine. Mu kuya kwa kimye, watangizheko bintu byanema. Washimuna amba: “Pa myaka yapitapo, bwikalo bwami bwajinga nobe bwa kwa Baluka wajingako kala ‘wikebejilenga bintu bikatampe.’ Kino kyandengejile kumubula Yehoba bijikila byami byonse, kabiji luno namona kuba’mba najimba ku mupashi.” (Yele. 45:1-5) Marek luno ubena kukanamina “mwingilo wawama” wa kwikala kalama mu kipwilo.—1 Timo. 3:1.

Marek wajimunako boba bakonsha kulangulukapo kuya mu kyalo kingi na kukeba nkito ya kufola mikama ya mali amba: “Umvwe mwaya mu kyalo kingi, kyapela bingi kufwa mu bitewa bya ino ntanda ibi. Kubula kuyuka mulaka wa mu kyokyo kyalo kulengela muntu kukankalwa kwisamba na bakwabo. Mwakonsha kubwela ku nzubo na mali, pano bino mwakonsha kwikala ne na bilonda bya ku mupashi byakonsha kupitapo kimye kyabaya pa kubatu amba bipwe.”

Kuyuka bya kwingila nkito yetu ya ku mubiji ne mutembo ye tuji nanji ku bakwetu kwitukwasha kutokesha Yehoba pa muchima. Kabiji twakonsha kupana kyakumwenako kyakonsha kutundaika bakwetu kufuukula bulongo bintu. Aba banemenwa bakebewa bukwasho, kwibobila lusa ne kwibobila byawama ku balongo ne banyenga yabo ba ku mupashi. Bakulumpe mu kipwilo ne bakwabo bakoma ku mupashi bakonsha kukwasha bakwabo ba mu lwitabilo kutwajijila kukosa ku mupashi pa kuba amba bakepesheko bijikila bya mu bwikalo.—Hebe. 13:7.

Twayai tumone kuba amba kechi twalubako bakwetu ba mu lwitabilo kupichila mu kutwezhamo ne mutwe mu nkito ya ku mubiji ne. (Fili. 1:10) Mu kifulo kya kuba bino, twayai ‘twikale na bya bunonshi mwi aye Lesa’ byo tubena kutangizhako bintu bya Bufumu.—Luka 12:21.

[Tubyambo twa mushi]

[Bipikichala pa peja 21]

Nanchi mingilo yenu ya ku mubiji imulengela kushala ku kupwila kwa kipwilo nyi?

[Bipikichala pa peja 23]

Nanchi mwanemeka mashuko o muji nao a kukwasha balongo ne banyenga yenu ba ku mupashi nyi?