“Mambo Awama a Bufumu Bakeasapwila”

“Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.”—MATEO 24:14.

Mwatala Bino Byambo: Wanembele mambo awama aye Luka waambile pe Yesu amba “wayile mu mizhi ikatampe ne icheche, na kusapwila mambo awama a Bufumu bwa Lesa.” (Luka 8:1) Yesu mwine waambile’mba: “Nafwainwa kusapwila mambo awama a Bufumu bwa Lesa ne ku mizhi ikwabo, mambo kino kyo kyo bantumijile.” (Luka 4:43) Watumine baana banji ba bwanga kuya na kusapwila mambo awama mu mizhi ikatampe ne icheche kabiji wibakambizhe’mba: “Mukekala bakamonyi bami . . . ne monse mwapela ntanda.”—Byubilo 1:8; Luka 10:1.

Bena Kilishitu Batanshi byo Basapwijilenga: Baana ba bwanga ba kwa Yesu balondejile byonse bibakambizhe Yesu kuba. “Pa juba pa juba mu nzubo ya Lesa ne ku nzubo ku nzubo bafunjishenga ne kusapwila mambo awama aamba pe Kilishitu Yesu kwa kubula kuleka.” (Byubilo 5:42) Bonse mu kipwilo baingijileko mwingilo wa kusapwila kechi bantu bamotu bacheche ne. Shayuka wa mpito aye Neander waambile’mba: “Celsus ye muntu mutanshi kunemba byambo byatama pa bena Kilishitu, wasekele ne kwamba’mba abe bantu batendatu boya bwa mikooko, basona masapato, banengezha myai ya kwingijisha, ke bantu babula kufunda kabiji bantutu bo bapayankana mu mwingilo wa kusapwila.” Jean Bernardi mu buku wanji wa Early Centuries of the Church wanembelemo’mba: “Bena Kilishitu bafwainwa kuya na kusapwila konsetu kabiji ku muntu yensetu. Mu mizhi ikatampe ne icheche, mu mapunzha mutanwa bantu bavula ne ku nzubo ku nzubo. Bafwainwa kusapwila bantu bonsetu nangwa baswe nangwa bakana. . . . Konse kwapela ntanda.”

Bañanyi Bengila Uno Mwingilo Ano Moba? Pulishiti umo wa mu chechi wa Anglican aye David Watson wanembele’mba: “Na mambo a kuba’mba machechi aleka kusapwila ne kufunjisha bantu kyo kyalengela bantu kubula kwingijilanga Lesa. Kabiji José Luis Pérez Guadalupe mu buku wanji wa kuba’mba Why Are the Catholics Leaving? Wanembele pa mingilo ingila machechi a ba Evangelical, ba Seventh Day ne machechitu akwabo ashala. Wanembele’mba “ano machechi kechi basapwila ku nzubo ku nzubo ne.” Kwamba pa Bakamonyi ba kwa Yehoba, wanembele’mba: “Bakamonyi bo basapwila ku nzubo ku nzubo.”

Sawakya wawama ne byambo byaambile ba Jonathan Turley biji mu Cato Supreme Court Review, 2001-2002. Uno sawakya waamba’mba: “Inge muntu umo waamba pa Bakamonyi ba kwa Yehoba, bantu bavula bafikenatu kwamba’mba beya na kwitusapwila mu mazubo pa bimye byabula kufwainwa. Onkao mambo, Bakamonyi ba kwa Yehoba kusapwila ku nzubo ku nzubo kechi bobatu bino kuba’mba babuule bantu byo baitabilamo ne, bino po paimena lwitabilo lwabo.”

[Kitenguluzha]

Nanchi Mwibimona Bino Biyukilo Nyi?

Kwesakana na Binembelo byo twisambapo mu ino mitwe yonse, ñanyi byubilo bya kuyukilako bena Kilishitu ba kine? Nangwa kya kuba kuji machechi avula bingi etongola’mba a bena Kilishitu, vulukai byambo Yesu byo abuujile baana banji ba bwanga bya kuba’mba: “Kechi bonse bañambila’mba, ‘Nkambo, Nkambo,’ bakatwela mu Bufumu bwa mwiulu ne, kana yenka uba kyaswa muchima wa Tata wa mwiulu ye ukatwelamo.” (Mateo 7:21) Kuyuka bantu babena kuba kyaswa muchima wa Tata ne kwikala na byubilo bya kuyukilako bena Kilishitu ba kine ne kupwanañana nabo, kukemukwasha kwikala na bumi bwa myaka ne myaka mu Bufumu bwa Lesa. Tubena kwimutundaika kwipuzha Bakamonyi ba kwa Yehoba bemupa kino kibaaba pa kuba’mba muyukilepo byavula pa Bufumu bwa Lesa ne bintu byawama bikaleta buno Bufumu.—Luka 4:43.