Mepuzho Afuma Ku Batanga

Nanchi byambo bya kwa Yesu biji mu Mateo 19:10-12 bilumbulula’mba aba basalapo kubula kusongola batambwila kya bupe kya bukatanda mu jishinda ja kukumya nyi?

▪ Akimonai kine kintu kyalengejile Yesu kwamba pa kwikala bukatanda. Bafaliseo byo baishile na kumwipuzha pa mambo a kwikana, Yesu wamwesheshetu patoka mizhilo ya Yehoba byo yaamba pa masongola. Mu Mizhilo mwanamulume bamuswishishe kunembela mukazhanji nkalata ya kumukana umvwe “wamutana na kintu kyatama.” Pano bino, kino kechi byo byo kyajinga mu ntendekelo ne. (Mpitu. 24:1, 2) Kepo Yesu aambile’mba: “Yense ukakana mukazhanji pa kubula mambo a bulalelale ne kusongola mukwabo, wauba bukende.”—Mat. 19:3-9.

Pa kumvwa bino, baana ba bwanga baambile’mba: “Umvwe masongola byo byo aji, kyawamatu ne kubula kusongola.” Yesu wibakumbwile amba: “Kechi bonse bakonsha kuba byobyo mu bwikalo bwabo ne, bino poso aba bo bapakyo. Bamo kechi basongola ne, mambo basemwatu bantungu, bakwabo na mambo a kwibalemeka ku bantu; pakuba kuji boba babula kusongola na mambo a Bufumu bwa mwiulu. Yense ukeba kwikala byonka bino, obe byonkabyo.”—Mat. 19:10-12.

Bantungu bajinga bantu basemwangatu na bulema nangwa kwikala byobyo na mambo a mapuso nangwa kwibalemeka. Nangwa byonkabyo, kuji boba basalapotu bene kwikala nobe bantungu. Nangwa kya kuba bakonsha kusongola, bekanya ne kutwajijila kwikala bakatanda “na mambo a Bufumu bwa mwiulu.” Byonka byajinga Yesu, basalapo kubula kusongola pa kuba’mba bepane kwingila mwingilo wa Bufumu. Kafwako wibapa kino kya bupe ne, kabiji kechi basemwa nakyo ne. Abo bene bo basalapo kuba bino, ko kuba’mba bekebela abo bene kino kya bupe.

Kununga pa byaambile Yesu, mutumwa Paulo walumbululwile kuba’mba bena Kilishitu bonse babula mu masongola nangwa baji mu masongola, bakonsha kwingijila Lesa mu jishinda jaitabilwa, pano bino, bakatanda nangwa bazhike ‘bafuukulapo ne kwikitabizha mu michima’ kwikala byobyo, ‘bakizhamo kuba bulongo.’ Mu ñanyi jishinda? Bantu baji mu masongola babanya kimye ne ngovu pa kuba’mba balame bulongo bena kwabo ne kwibatokesha ku muchima. Pakuba bena Kilishitu babula kusongola bakonsha kuta muchima ku mwingilo wa Nkambo kwa kubula bya kutabataba. Bamona kino kintu kwikala “kya bupe” kufuma kwi Lesa.—1 Ko. 7:7, 32-38.

Onkao mambo, Binembelo bitubula kuba’mba mwina Kilishitu kechi utambula kya bupe kya bukatanda nangwa buzhike mu jishinda ja kukumya ne. Bino wikala nakyo kupichila mu kutwajijila kwikala katanda nangwa muzhike pa kuba’mba atwale palutwe mwingilo wa Bufumu kwa kubula bya kumutabakanya. Bavula lelo jino bafuukulapo mu michima yabo kuba’mba bekale kwa kubula kutwela mu masongola na mambo a uno mwingilo, kabiji bakwabo bafwainwa kwibatundaikanga.