‘Kitambulai’
1 Kimye Yesu kyoesambilenga na batumwa banji pa mambo a masongola, watongwele kubula kutwela mu masongola amba “kya bupe” (NW). Kepo aambile’mba: “Wayuka kwikitambula, ekitambule.” (Mat. 19:10-12) Mu kupitapo kwa myaka, mutumwa Paulo wanembele pa buwame bwa kubula kutwela mu masongola ne kutundaika bakwabo kumwena kwi aye mukubula kutwela mu masongola. (1 Ko. 7:7, 38) Bavula lelo jino ‘bekitambula’ kyakubula kutwela mu masongola kabiji babena kwiyowa buwame bujimo. Nanchi buwame ka bumo bujimo?
2 Kwingila “Pabula bya Kwimutabanya”: Paulo wimwenejile mwine kuba’mba kubula kutwela mu masongola kwamupelenga kimye kyabaya kya kwingijila Yehoba ‘pakubula bya kumutabanya.’ Nangwatu lelo jino kyo kimotu, mulongo wabula kutwela mu masongola wakonsha kuya na kufunda Sukulu ya Lufunjisho lwa Mwingilo, wakasuluka kutwela mu mwingilo wa bupainiya, kufunda mulaka mukwabo, kuya na kwingijila kuji kukajilwa kukatampe, kwingijila pa Betele, nangwatu kwipana kwingila mingilo ikwabo. Wakonsha kwikala na kimye kikatampe kya kwikala na lufunjisho lwa pabunke ne kulanguluka langulukishapo kabiji ne kwisamba na Yehoba na muchima yense mu lulombelo. Kabiji javula muntu wabula kutwela mu masongola wikala na kimye kyabaya kya kwipana aye mwine kukwasha bakwabo. Mingilo yonse ino ke ya ‘kukwasha’ muntu.—1 Ko. 7:32-35; Byu. 20:35.
3 Kwingijila Lesa mu uno musango kwa kubula bya kwitutabankanya, kuleta bingi mapesho akatampe. Panyuma ya kwikala myaka 27 mu Kenya, nyenga umo wanembele’mba: “Najinga bingi na balunda bavula kabiji ne mingilo nayo yavujile bingi! Twaubilenga bintu pamo [ne] kwipempula... . Kubula kutwela mu masongola kwankwashishe kwikala wakasuluka kwenda ne kuya ku mapunzha akwabo na kwingijilako mwingilo, kabiji kino kyandetejile bingi lusekelo lukatampe.” Wanungilepo ne kuba’mba: “Pa myaka yavula yapitapo, bulunda bwami ne Yehoba bwabailako.”
4 Kwingijisha Kimye kya Kubula Kutwela mu Masongola Bulongo: Yesu waambile’mba mulanguluko wa kukebela kwikala kwa kubula kutwela mu masongola wafwainwa kwikala “pa mambo a bufumu bwa mwiulu.” (Mat. 19:12) Nobe byonka byotuba na kya bupe kiji kyonse, kimye muntu kyo akyangye kutwela mu masongola wakonsha kwikingijisha bulongo kuba’mba kilete lusekelo ne mfweto. Bantu bavula babula kutwela mu masongola bayuka buneme buji mu kino kya bupe kupichila mu kwingijisha kimye kyobekala nakyo ne kuketekela maana a Yehoba ne ngovu yo apana.