BANTU BEPUZHA’MBA . . .
Nanchi Yesu walayile kuba’mba ngubabibi ukekala na bumi mwiulu nyi?
Buno bwipuzho bwiya na mambo a kuba Yesu walayile kapondo ye bamupopele nanji amba ukekala nanji mu Paladisa. Yesu waambile’mba: “Kine nakwambila lelo namba, Ukekala ne amiwa mu Paladisa.” (Luka 23:43) Yukai kuba’mba Yesu kechi waambile kukekela Paladisa ne. Nanchi walumbulwilenga kuba’mba awa kapondo ukekala nanji mwiulu nyi?
Kitanshi, twayai tumone inge awa kapondo wafikijilemo kuya na kwikala mwiulu. Bantu baji na luketekelo lwa kuya mwiulu babatizhiwa mu mema ne na mupashi wazhila, kabiji bekala baana ba bwanga ba kwa Yesu ba ku mupashi. (Yoano 3:3, 5) Kikwabo kibalengela kufikilamo ke kya kuba’mba balondela mizhilo ya Lesa ne kwikala na byubilo byawama nabiji bukishinka ne lusa. (1 Kolinda 6:9-11) Kabiji bafwainwa kwikala bakishinka kwi Lesa ne Kilishitu kufikatu ne ku mpelo ya bwikalo bwabo pano pa ntanda. (Luka 22:28-30; 2 Timoti 2:12) Kanatu bafikizha bino bikebewa bino pa bafikilamo kusangulwa ne kwingila mwingilo wanema ubena kwibapembelela mwiulu wa kwikala bañanga ne bamfumu pamo ne Kilishitu ne kulama bantu myaka kiumbi.—Lumwekesho 20:6.
Pakuba awa kapondo ye bapopele pamo ne Yesu wajinga mbanzhi kabiji wafwile saka akiji mbanzhi. (Luka 23:32, 39-41) Kya kine kuba’mba wamwesheshe mushingi byo aambijile Yesu amba: “Mukamvuluke kimye kyo mukeya mu Bufumu bwenu.” (Luka 23:42) Pano bino, kechi wabatizhiwe ne kwikala mwana wa bwanga wa ku mupashi wa kwa Yesu, nangwa kwikalapo na byubilo byawama mu bwikalo bwanji ne. Nanchi kyakonsha kuyilamo kumulaya kwi Yesu kulama mu bufumu bwanji pamo na baana banji ba bwanga bajinga bakishinka kufikatu ne ku mpelo nyi?—Loma 2:6, 7.
Akilangulukai pa kino: Inge muntu walomba lulekelo lwa mambo pa kwimwibila mali, mwakonsha kufuukulapo kubula kumutongwela mali kuba’mba apane. Pano abya mwakonsha kumuketekela kya kuba mwamupa ne mwingilo wa kutala pa busulu nangwa wa kulama kisemi kyenu nyi? Mwakonsha kupa muntu ye mwaketekela. Aba baji na luketekelo lwa kwikala na bumi mwiulu bafwainwa kwikala na luketekelo lwa kuba’mba bakalama mizhilo ya Lesa pa kulama ino ntanda. (Lumwekesho 2:10) Nangwa kya kuba awa ngubabibi wajijile pa kufwa, bino kechi waji na luno luketekelo ne.
Nanchi Yesu kechi waambijile kapondo kuba’mba jonkaja juba usakwikala nanji mwiulu nenyi? Akyo kechi kyakonsha kubiwa ne mambo Yesu kechi wayile mwiulu jonkaja juba ne. Wajinga “mu mushiji”—mu kilende, moba asatu. (Mateo 12:40; Mako 10:34) Nangwatu panyuma ya lusanguko, waikele moba 40 pano pa ntanda saka akyangye kuya mwiulu. (Byubilo 1:3, 9) Kapondo kechi wakonsheshe kwikala ne Yesu mwiulu jonkaja juba ne.
Pano nga kapondo ukekala mu ñanyi Paladisa? Panyuma ya lusanguko, ukekala mu Paladisa pano pa ntanda, Yesu po akalamanga. (Byubilo 24:15; Lumwekesho 21:3, 4) Pa kuba’mba muyukilepo byavula pa uno Paladisa ne bikeba Lesa, isambai na Bakamonyi ba kwa Yehoba.