Byo “Mwayuka Lesa,” Pano Kwashala Ka?
“Mwayuka Lesa.”—GAL. 4:9.
MUSAKUKUMBULA’MBA KA?
Mambo ka o kyanemena kimye kyonse kupituluka mu bintu byo twaubile pa kuba’mba tubatizhiwe?
Mambo ka mwina Kilishitu wakoma o afwainwa kutwajijila kukoma mu lwitabilo ne mu maana a kuyuka Lesa?
Mambo ka o twafwainwa kulangulukilanga pa lwitabilo lwetu ne pa kwipana kwetu kwi Yehoba?
1. Mambo ka bendesha madeke kyo bekela na mutanchi wa kulondela pa kupesa pesa ndeke?
BENDESHA madeke saka bakyangye kutumbuka beapesa pesa kwingijisha mutanchi paji bintu 30. Kutumbuka kwa kubula kulondela byonse biji pa mutanchi ke kwibika mu kizumba. Pa bendesha madeke, mwalanguluka’mba bañanyi bo batundaika bingi kulondela byonse biji pa mutanchi pa kupesa pesa ndeke? Babanda mu uno mwingilo. Bapijilwa kwendesha madeke bakonsha kuba mukose ne kutumbukatu kwa kubula ne kwiipesa pesa ne.
2. Ñanyi bintu bena Kilishitu byo bebatundaika kupesa pesa?
2 Byonkatu byuba bendesha madeke babula mukose, ne anweba mwakonsha kwingijisha mutanchi wa kupesela peselapo lwitabilo lwenu. Nangwa mwabatizhiwatu katataka, nangwa mwaingijila Lesa pa myaka yavula, kyanema bingi kimye kyonse kupesa pesa biji lwitabilo lwenu ne kwipana kwenu kwi Yehoba Lesa. Kubula kupesa pesa lwitabilo lwetu ne kulanguluka’mba twakosa kwakonsha kwitulengela konauna bulunda bwetu na Lesa. Baibolo witujimunako’mba: “Awa ulanguluka amba waimana, ajimuke kuchina amba wakapona.”—1 Ko. 10:12.
3. Bena Kilishitu ba mu Ngalatiya bafwainwe kuba ka?
3 Bena Kilishitu ba mu Ngalatiya bafwainwe kupesa pesa lwitabilo lwabo ne kuyuka bya kwingijila Lesa bulongo. Kupichila mu kitapisho kyanji, Yesu wakwashishe bantu bamwitabijile kuyuka Lesa bulongo. Kabiji walengejile ne bamo kusalwa kwikala baana ba Lesa. (Nga. 4:9) Pakuba’mba batwajijile kwitabilwa kwi Lesa, bena Ngalatiya bafwainwe kukana mafunjisho a Bayudea bamo bakebelenga bonse kukokelanga Mizhilo ya Mosesa. Lesa walekele kwingijisha ino Mizhilo, mambo bantu ba mu bisaka bikwabo bajinga mu kipwilo kechi bajinga mu ino Mizhilo ne. Bayudea ne bantu ba mu bisaka bikwabo bafwainwe kutwajijila kukoma mu bukine. Bafwainwa kuyuka kuba’mba Lesa kechi wakebelenga bantu kulondelanga yoya Mizhilo ne.
BYA KUTENDEKELAPO PA KUYUKA LESA
4, 5. Ñanyi lujimuno Paulo lo apele bena Ngalatiya, kabiji lwanemena ka kwi atweba?
4 Lujimuno lwapaine mutumwa Paulo ku bena Ngalatiya lwanembelwe kukwasha bena Kilishitu bakine kubula kuvundamina ku bukine bwa mu Baibolo ne kwalulukila ku bintu byo bashile kala. Yehoba watangijile uno mutumwa kutundaika bena Ngalatiya ne bapopweshi banji bonse kwikala bakishinka.
5 Atweba bonse twafwainwa kuvulukanga kimye kyo twipaine ne kwikala Bakamonyi ba kwa Yehoba. Pa kuba’mba tube bino twafwainwa kulanguluka pa ano mepuzho abiji: Nanchi muvuluka byo mwaubile pa kuba’mba mufikilemo kubatizhiwa nyi? Nanchi mukivuluka byo mwayukile Lesa ne byo mwiumvwine pa kuyuka’mba mwayukanyikwa kwi aye nyi?
6. Tusakwisamba pa mutanchi wa ñanyi bintu?
6 Atweba bonse twaubile bintu bitanu na bina saka tukyangye kwiya mu bukine. Bino bintu bya kwingijisha pa kwipesa pesa biji mu kakitenguluzha ka kuba’mba: “Bintu Bilengela Kufikilamo Kubatizhiwa ne Kutwajijila Kukoma.” Kwivululamo bino bintu kusakwitukwasha kuchinuzhuka kubwela ku bintu bya mu ntanda byo twasankijilepo. Byonkatu bapijilwa kwendesha madeke byo bachinuzhuka mapuso kupichila mu kwingijisha mutanchi wa bikebewa saka bakyangye kutumbuka, ne atweba twafwainwa kupitulukanga mu bintu bitulengejile kufikilamo kubatizhiwa.
BAYUKANYIKWA KWI LESA BATWAJIJILA KUKOMA
7. Ñanyi mutanchi ye twafwainwa kulondela, kabiji mambo ka?
7 Mutanchi wa kupesela peselapo ndeke uvululako wendesha ndeke bintu byo afwainwa kuba saka akyangye kutumbuka. Ne atweba twafwainwa kwipesa pesanga kimye kyonse kufumatu kimye kya lubatizhilo. Paulo wanembejile Timoti amba: “Saka ukwachisha ku mutanchi wa byambo byawama byo waumvwine kwi amiwa monka mu lwitabilo ne butemwe biya na mambo a kwikala mwi Kilishitu Yesu.” (2 Timo. 1:13) Uno “mutanchi wa byambo byawama” uji mu Mambo a Lesa. (1 Timo. 6:3) Byonkatu kipikichala kyo banemba byo kitulengela kuyuka bikekala kyokyo kintu, ne ‘mutanchi wa byambo bya bukine’ naye witulengela kuyuka bikeba Yehoba ne kwibyuba. Onkao mambo, twayai twisambe pa bintu byo twaubile pa kuba’mba tubatizhiwe ne kumona byo twafwainwa kulondela uno mutanchi wa byambo bya bukine.
8, 9. (a) Mambo ka o twafwainwa kutwajijila kukoma mu maana a kuyuka Lesa ne mu lwitabilo? (b) Lumbululai kukoma mu maana a kuyuka Lesa kyo kwanemena, kabiji mambo ka o kyawamina kutwajijila kukoma?
8 Kintu kitanshi kyo twaubile ke kuyuka Lesa. Kepo twaitabijile. Pano bino, bino byonse bibiji byafwainwa kutwajijila kukoma. (2 Tesa. 1:3) Kukoma kuvwangamo kwaluka. “Kukoma” kulumbulula kubailako nangwa kulepelako. Onkao mambo, kufumatu pa juba ja lubatizhilo, twafwainwa kutwajijila kukoma mu lwitabilo ne mu maana a kuyuka Lesa, kechi kutola ne.
9 Twakonsha kwesakanya kukoma mu lwitabilo ne mu maana a kuyuka Lesa ku bikoma kichi. Kichi kikoma bingi bukiji, kikatakata inge kyaikizha mizhazhi kuya panshi pene. Kya kumwenako, bichi bya sida biji ku Lebanoni byakonsha kulepa mamita 37 ne kubaya mamita 12 kuzhokoloka. (Lwimbo 5:15) Kino kichi inge musele wamena utwajijila kukoma bino kechi umweka byo abena kukoma ne. Pa mwaka pa mwaka kichi kibayilako ne mizhazhi nayo iya panshi ne mu mbaji ne kulengela kichi kushikimana. Kyo kimotu na kukoma kwa bena Kilishitu mu lwitabilo ne mu maana a kuyuka Lesa. Kupichila mu lufunjisho lwa Baibolo, twakonsha kukoma bukiji mu maana a kuyuka Lesa ne kubatizhiwa. Ba mu kipwilo bamona byo tubena kuyilako palutwe. Twakonsha ne kufikilamo kwikala bapainiya nangwa kwingilako mingilo ikwabo. Nangwa byonkabyo, twafwainwa kutwajijila kukoma mu lwitabilo ne mu maana a kuyuka Lesa “ne kwikala nobe muntu wakoma wafika ku kipimo kya kimino kya Kilishitu.” (Efi. 4:13) Onkao mambo, tukoma kufuma ku bwanyike mu bwina Kilishitu kufika ku bukulumpe byonka bikoma kichi.
10. Mambo ka kutwajijila kukoma o kukebewa ne ku bena Kilishitu bakoma mu lwitabilo?
10 Pano bino, kechi twafwainwa kupelela ponkapo ne. Twafwainwa kutwajijila kuyukilapo ne bikwabo kabiji lwitabilo lwetu lwafwainwa kukoselangako. Mu jino jishinda mizhazhi ya lwitabilo ikajimba mu Mambo a Lesa. (Mana 12:3) Mu kipwilo kya bena Kilishitu muji balongo bavula ne banyenga baji bino. Mulongo umo waingila mingilo ya bukulumpe mu kipwilo pa myaka kukila pa 30 wamwene kuba’mba ne luno ukikoma mu maana a kuyuka Lesa ne mu lwitabilo. Waambile’mba: “Luno mbena kumvwisha Baibolo kukila kala. Mmonapo mashinda apusana pusana a kwingijishishamo mafunde ne mizhilo ya mu Baibolo. Kabiji kino kyandengela kutemwa bingi mwingilo wa kusapwila.”
KOSESHAINGA BULUNDA BWENU NA LESA
11. Twakonsha kuyuka byepi bulongo Yehoba pa kupitapo kimye?
11 Mu kukoma kwetu mwavwangwa ne kutwajijila kufwenya kwipi ne Yehoba, aye Shetu kabiji Mulunda netu. Ukeba atweba bonse kukasuluka. Kabiji ukeba’mba tuyuke’mba wituzhikijila kabiji witutemwa bingi byonkatu byumvwa mwana kuzhikijilwa inge uji ne bashanji bamukwata ku kuboko nangwa inge tuji na mulunda netu ye twaketekela. Byonka byo mwayuka, bulunda na Yehoba kechi bwiyatu kya kubazhimukila ne. Papita kimye pa kubatu amba tumuyuke bulongo ne kumutemwa. Onkao mambo, pa kuba’mba mu muyuke bulongo Yehoba, mwafwainwa kumonangapo kimye kya kutanga Mambo anji pa juba pa juba. Kabiji mwafwainwa kutanganga magazini a Kyamba kya Usopa ne Labainga! kubikapotu ne mabuku akwabo alumbulula Baibolo.
12. Ki ka kikebewa pa kuba’mba tuyukanyikwe kwi Yehoba?
12 Balunda na Lesa bakoma mu lwitabilo kupichila mu milombelo ifuma panshi ya muchima ne mu kupwanañana na bantu bawama. (Tangai Malakai 3:16.) Matwi a Yehoba “omvwa milombelo yabo ya misashijilo.” (1 Pe. 3:12) Byonka biji nsemi watemwa baana banji, Yehoba umvwa inge twamujijila mu lulombelo. Onkao mambo, twafwainwa ‘kukelwanga mu lulombelo.’ (Loma 12:12) Pa kuba’mba tutwajijile kwikala bena Kilishitu bakoma mu maana a kuyuka Lesa ne mu lwitabilo, twafwainwa kulombanga bukwasho kwi Lesa. Makatazho aji mu ino ntanda abaya, kechi twakonsha kwiashinda bunke bwetu ne. Umvwe twabula mukoyo wa kulomba, tukefumyako atweba bene ku bulume bupana Lesa. Nanchi mwashiinwa kuba’mba milombelo yenu yawama nyi, inyi mwamona kuba’mba kujiko mumo mo mwafwainwa kuwamishako nyi?—Yele. 16:19.
13. Mambo ka kupwanañana na bakwetu bena Kilishitu o kwanemena pa kuba’mba tutwajijile kukosesha bulunda bwetu na Lesa?
13 Aba “bamuketekela” Yehoba bamusangajika bingi, onkao mambo, byo twamuyuka Lesa, twayai tutwajijile kupwanañana na kipwilo kya bantu bamuyuka. (Na. 1:7) Mu ino ntanda mwavula bintu bilefulañana, twafwainwa kutanwanga na balongo ne banyenga bakwitutundaika. Tukamwenamo ka? Mu kipwilo muji bantu bakemutundaika kwikala na “butemwe ne kuba mingilo yawama.” (Hebe. 10:24, 25) Pa kuba’mba tulondele lutundaiko lwa kwa Paulo, twafwainwa kupwilanga pamo na bakwetu. Kabiji pa kuba’mba twikale na buno butemwe twafwainwa kupwanañananga na bakwetu bena Kilishitu. Tanwainga ku kupwila kimye kyonse ne kukumbulapo.
14. Kulapila ne kwaluka kutwajijila byepi?
14 Kintu kitanshi kyo twaubile pa kuba’mba twikale bena Kilishitu, ke kulapila ne kwaluluka nangwa’mba kuvundamina ku bubi bwetu. Pano bino, kulapila kechi kupwa ne. Mambo bumbulwa kulumbuluka buji ne atweba nobe mulolo wafyama wakonsha kwitusuma kyonse kimye. (Loma 3:9, 10; 6:12-14) Twite muchima atweba bene, kange tulubengakotu inge twauba kilubo ne. Yehoba witutekenya byo tubena kwibikako kushinda bilubo byetu ne kupimpula byubilo byetu. (Fili. 2:12; 2 Pe. 3:9) Kyakonsha kwitukwasha ke kwingijisha bulongo kimye ne bintu byetu mu mwingilo wa Yehoba kukila kuta muchima ku bintu byo tukeba atweba bene. Nyenga umo wanembele’mba: “Nakomejile mu bukine, bino kechi namuyukile bulongo Yehoba ne. Nalangulukanga’mba nafwainwa kwikala na moyo mukatampe wa kumuchiina, kino kyandengejile kulanguluka’mba kechi nakonsha kumutokesha ku muchima ne.” Mu kuya kwa moba uno nyenga bulunda bwanji na Lesa bwatendekele kutama na mambo bilubo byo aubanga. Waambile’mba, “Kechi kubula kutemwa Yehoba ne, bino kyandengelanga ke kubula kumuyuka bulongo. Bino byo nalombelepo, natendekele kwaluka.” Waambile ne kuba’mba: “Yehoba untangijila nobe mwana mucheche, kabiji unkwasha kushinda meseko mu meso anteka ne kumbula bya kuba na kifyele.”
15. Yesu ne Bashanji bamona ka?
15 ‘Ambainga ku bantu.’ Malaika wa Lesa waambijile Petelo ne batumwa bakwabo bino byambo kimye kyo bebafumishe mu kaleya mu jishinda ja kukumya. (Byu. 5:19-21) Kwingila mwingilo wa mu bujimi ke kintu kikwabo kyanema bingi pa mutanchi wetu wa kwipesela peselapo. Yesu ne Bashanji bamona lwitabilo lwetu ne mwingilo wetu. (Lum. 2:19) O ene mambo mukulumpe ye twakwambapo o aambijile’mba: “Mwingilo wa mu bujimi ye ye twaikelako.”
16. Mambo ka o kyawamina kulanguluka pa kwipana kwetu kwi Yehoba?
16 Langulukainga pa kwipana kwenu. Kintu kyakilamo kunema kyo tuji nakyo ke bulunda bwetu na Yehoba. Yehoba wayuka bantu banji. (Tangai Isaya 44:5.) Lombaingapo ne kulangulukishapo pa biji bulunda bwenu ne aye. Vulukainga ne kuba’mba juba ja lubatizhilo lwenu janema bingi. Kuba bino kukemuvululangamo kuba’mba lubatizhilo lwenu lumwesha kintu kyanema kyo mwafuukwilepo.
KUCHINCHIKA KUKEMULENGELA KUTWAJIJILA KUFWENYA KWIPI NE YEHOBA
17. Mambo ka kuchinchika o kwanemena pa kuba’mba tutwajijile kufwenya kwipi ne Yehoba?
17 Mu byambo byo anembejile bena Ngalatiya, Paulo waambile bingi pa buneme bwa kuchinchika. (Nga. 6:9) Ne lelo jino, kuchinchika kwanema bingi ku bena Kilishitu. Mukapitanga mu meseko, bino Yehoba ukemukwasha. Onkao mambo, twajijilai kulomba mupashi wazhila. Kabiji ukemutekenesha byo akafumyapo bulanda ne kuleta mutende. (Mat. 7:7-11) Akilangulukai pa kino: Umvwe Yehoba wata muchima bañonyi, abya wakonsha kukankalwa kwimuta muchima anweba mwamutemwa ne kwipana kwi aye nyi? (Mat. 10:29-31) Nangwa mupite mu meseko a mutundu ka, kange mubwele panyuma ne. Yehoba uketupesha bingi mambo twayukanyikwa kwi aye.
18. Byo “mwayuka Lesa” pano mukeba kuba ka luno?
18 Onkao mambo, inge mwayukatu Lesa katataka kabiji mwabatizhiwa, pano kwashala ka? Twajijilai kumuyuka bulongo Yehoba ne kukoma mu lwitabilo ne mu bukine. Kabiji inge mwabatizhiwe kala, pano kwashala ka? Ne anweba mwafwainwa kutwajijila kukoma mu maana a kuyuka Yehoba. Kange tulame nzenzekela bulunda bwetu na Yehoba ne. Twayai kimye kyonse twipese pesenga na mutanchi wa bukine ne kutwajijila kukosesha bulunda na Shetu, Mulunda netu kabiji Lesa wetu aye Yehoba.—Tangai 2 Kolinda 13:5, 6.
Kipikichala pa peja 13]
[Kipikichala pa peja 15]
Kichi kitwajijila kukoma, ne bena Kilishitu nabo byobyo bafwainwa kubanga
[Kitenguluzha pa peja 17]
BILENGELA KUFIKILAMO KUBATIZHIWA NE KUTWAJIJILA KUKOMA
1 Tutendekelapo ‘kuyuka’ Yehoba ne Mwananji aye Yesu Kilishitu.—Yoa. 17:3
2 Lwitabilo lwetu lubaya inge twayuka byavula.—Yoa. 3:16
3 Tulomba kwi Yehoba kimye kyonse.—Byu. 2:21
4 Tuyuka buneme bwa kupwanañana na bakwetu ba mu lwitabilo.—Hebe. 10:24, 25
5 Tulapila ku bundengamambo bwetu.—Byu 17:30
6 Twaaluluka ne kusankilapo byubilo byatama.—Byu. 3:19
7 Lwitabilo lwetu lwitulengela kwamba ku bakwetu.—2 Ko. 4:13
8 Twipana atweba bene kwi Yehoba pa kuba’mba tulondelenga bulongo Yesu.—1 Pe. 4:2
9 Tumwesha patoka kwipana kwetu kupichila mu lubatizhilo lwa mu mema.—1 Pe. 3:21