Bakulumpe mu Kipwilo—Nanchi Mutundaika ‘Bakoka’ Nyi?

Nyenga wabula kusongolwa uji na myaka kukila pa 30 aye Angela,a waakamwa. Ubena kupembelela bakulumpe mu kipwilo. Basakumwambila’mba ka? Ibyo papitako ka kimye kwakubula kutanwa ku kupwila, bino ukoka bingi na mingilo yo engila juba jonse ya kukwasha bakote. Kabiji milanguluko yamuvujila na mambo a kukolwa kwa bainanji.

Inge yenu mubena kuya na kumona Angela, mwakonsha kutundaika byepi uno muntu ‘wakoka’? (Yele. 31:25) Bino saka mukyangye kuya ku lupempu lwa bukafunga, mwakonsha kwinengezha byepi?

LANGULUKAINGA PA BIBENA KUPITAMO BALONGO BENU

Bimye bimo, bonse tukoka na mambo a mingilo yetu ya ku mubiji nangwa na mingilo ya Lesa. Kya kumwenako, ngauzhi Danyela wakokele bingi kimye kyo amwene kimwesho kyo akankelwe kuyuka mo kyatala. (Da. 8:27) Wakosele kimye malaika Ngabaliela kyo aishile na kumukwasha. Muluwe wa Lesa wabujile Danyela mwatajile kimwesho ne kumubula amba Yehoba waumvwa milombelo yanji kabiji wamubujile ne kuba’mba, “obewa bakutemwa bingi.” (Da. 9:21-23) Kabiji pa kimye kikwabo, byambo byawama byaambile malaika mukwabo byakoseshe uno ngauzhi wakokele.—Da. 10:19.

Saka mukyangye kuya na kufwakesha mukwenu wa mu lwitabilo wakoka nangwa wapopomenwa, patanshi mwafwainwa kulanguluka pa bintu byo abena kupitamo. Ñanyi makatazho o aji nao? Nga ano makatazho amulengela byepi kukoka? Ñanyi byubilo byawama byo aji nabyo? Richard waingila mwingilo wa bukulumpe mu kipwilo pa myaka 20 waambile’mba: “Amiwa nta muchima pa bintu byawama byuba balongo.” Kabiji wanungilepo amba: “Inge napesa pesa bulongo bintu bibena kupitamo balongo saka nkyangye kuya na kwibamona, kinkwasha bingi kumona byo nakonsha kwibakwasha kwesakana na byo babena kupitamo.” Inge kya kuba mukendela pamo na mukulumpe mu kipwilo mukwenu, mwafwainwa kwisambila pamo nanji pa kuba’mba muyuke bintu bibena kupitamo mulongo wenu.

KANGE MULENGELENGA BALONGO BENU KWAKAMWA NE

Ne anweba mwakonsha kuswa kuba’mba kilenga bingi bumvu muntu kwamba pa makatazho anji. Akilangulukai pa kino: Nanchi mulongo wenu ukankalwa kwamba inge bamufwakesha ku bakulumpe mu kipwilo nyi? Inge byo byo kiji, mwakonsha kuba byepi pa kuba’mba emukasulukile? Kumumwesha lusekelo ne kumwambila byambo byawama kukamutundaika bingi. Michael waingila mingilo ya bukulumpe mu kipwilo pa myaka 40, javula inge waya na kupempula muntu utendekelapo kwamba’mba: “Mwayuka, mwingilo wawama pa mingilo ingila mukulumpe mu kipwilo ke kufwakesha balongo pa mazubo abo pa kuba’mba ebayuke bulongo. Onkao mambo, naumvwa bingi bulongo pa kwimufwakesha lelo.”

Saka mukyangye kwamba byavula ne, mwafwainwa kulomba lulombelo kufuma panshi ya muchima. Mutumwa Paulo mu milombelo yanji, waambanga pa lwitabilo, butemwe ne kuchinchika kwa balongo banji. (1 Tesa. 1:2, 3) Kupichila mu kwamba pa byubilo byawama bya mulongo, mukanengezha muchima wenu ne muchima wanji pa kuba’mba mwisambo wenu awame. Kabiji byambo byenu byakonsha kutekenesha mulongo wenu. Ray mukulumpe mu kipwilo waingila pa myaka yavula waambile’mba: “Bimye bimo, tulubamo buwame bwa bintu byo twauba. Onkao mambo, umvwe muntu wa kuvululamo, kitutekenesha bingi.”

INGIJISHAINGA BAIBOLO PA KUTUNDAIKA BAKWENU

Byonka byaubanga Paulo, ne anweba mwakonsha kubula bakwenu “mapesho a Lesa” kupichila mu kwingijisha Baibolo, nangwa kwingijishatu kyepelo kimo. (Loma 1:11) Kya kumwenako, mulongo wapopomenwa wakonsha kumona nobe kechi wanema ne, byonka byaumvwine nyimbi wa masalamo wiesakenye mwine ku “fukuta wa mu bwishi” ye bavungakanya. (Sala. 119:83, 176) Inge mwapwisha kwambapo pacheche pa kinembelo, mwafwainwa kumwesha’mba mwaketekela kuba’mba mulongo wenu ‘kechi wavulama’ mikambizho ya Lesa ne.

Nanchi kishimpi kya jali ja madalika nakyo kyakonsha kukwasha nyenga waleka kupwila nangwa wakoka nyi? (Luka 15:8-10) Kyamweka jali jataikile jajinga pa bupela bwa munshingo bwawama bo balengele na mali a muwayawaya a siliva. Inge mwisamba nanji pa kino kishimpi, mukamukwasha kumona kuba’mba naye wanema bingi mu kipwilo kya bena Kilishitu. Inge mwapwisha kwisamba bino, mwakonsha kukosesha kishinka kya kuba’mba Yehoba wamuta bingi muchima mambo ke umo wa mikooko yanji icheche.

Bakwetu ba mu lwitabilo batemwa bingi kwamba pa Binembelo byo batanga. Onkao mambo, kange mwambengatu bunke ne. Panyuma ya kutanga kyepelo kibena kwamba pa byo abena kupitamo, mwakonsha kusalapo kyambo nangwa byambo bimo ne kumwambila’mba ambepo. Kya kumwenako, panyuma ya kutanga kinembelo kya 2 Kolinda 4:16, mukulumpe mu kipwilo wakonsha kwipuzha’mba, “Nanchi mwimwena mashinda Yehoba o emupelamo bulume inge mwakoka nyi?” Bwipuzho bwa uno mutundu bwakonsha kwimulengela ‘kwikosesha anwe bene na bene.’—Loma 1:12.

Kabiji mwakonsha kutundaika mukwenu wa mu lwitabilo kupichila mu kwisamba pa muntu umo wanembwa mu Baibolo wapichile mu lukatazho lwipasha na lwa yewo muntu. Muntu wakakilwa wakonsha kumvwa byonka byaumvwine Hana nangwa Epafolodita, pa kimye kimo bano bonse bajinga na bijikila, pano bino batwajijile kutalwa bulongo kwi Lesa. (1 Sam. 1:9-11, 20; Fili. 2:25-30) Kuji bantu bavula bingi banembwa mu Baibolo bo mwakonsha kwambapo.

TWAJIJILAI KWIBATA MUCHIMA

Mwakonsha kumwesha kuba’mba mwata balongo benu muchima kupichila mu kutwajijila kwibafwakesha. (Byu. 15:36) Inge mwapwisha kwisamba, mwafwainwa kwibambila kuba’mba mukengile nabo mu mwingilo. Bernard mukulumpe mu kipwilo wabanda, inge wamonañana na mulongo nangwa nyenga ye afwakashijilepo, wambapo pa bukwasho bo amukwashishe kupichila mu kwipuzha’mba, “Nga bintu bibena kwenda byepi luno?” Kupichila mu kumuta muchima, mukayuka inge kya kuba ubena kukeba kumukwasha jikwabo.

Pa kino kimye, balongo ne banyenga babena kukeba bingi kwibata muchima, kuyuka byo babena kupitamo ne kwibatemwa. (1 Tesa. 5:11) Onkao mambo, saka mukyangye kuya na kupempula mulongo, langulukai pa bintu byo abena kupitamo. Lombaipo ne kusala binembelo byo mukaya na kwingijisha. Inge mwauba bino, mukasala byambo byawama bya kutundaika ‘bakoka.’

[Tubyambo twa mushi]

[Kipikichala pa peja 29]

Saka mukyangye kuya na kufwakesha mukwenu wa mu lwitabilo, mwafwainwa kulanguluka pa bintu byo abena kupitamo

[Bipikichala pa peja 30]

Bakwetu ba mu lwitabilo batemwa bingi kwamba pa Binembelo byo batanga

[Kipikichala pa peja 31]

Twajijilai kwibata muchima