MEPUZHO A MU BAIBOLO A KUMBULWA

Nanchi Baibolo kya kine Mambo a Lesa nyi?

Baibolo ke Mambo a Lesa kabiji wapusanako na mabuku akwabo. Baibolo wapulintwa mu milaka yavula bingi. Maana anembwa mu Baibolo aji na bulume bwa kupimpula byubilo bya bantu kwikala ke byawama.—Tangai 1 Tesalonika 2:13; 2 Timoti 3:16.

Twayuka kuba’mba Baibolo ke buku wa Lesa mambo wambila jimo biji kulutwe. Kafwako muntu wakonsha kuba bino ne. Langulukai pa kyakumwenako kya mu buku wa Isaya. Bataine muvungilo wa uno buku mu jiyengo kwipi na Kalunga Kafwa saka kukiji kitota kimo kuba’mba Yesu asemwe. Waambile amba muzhi mukatampe wa Babilona kechi mukekala bantu ne. Byo papichile myaka yavula, kino kyafikile panyuma ya kupitapo myaka yavula Yesu saka afuma kala pano pa ntanda.—Tangai Isaya 13:19, 20; 2 Petelo 1:20, 21.

Baibolo wanembelwe byepi?

Baibolo wanembelwe myaka kukila pa 1,600. Bantu 40 bo banembele Baibolo, kabiji byo banembele byaijiletu mumo. Bakonsheshe kuba byepi bino? Lesa wibatangijilenga.—Tangai 2 Samwela 23:2.

Kimye kimo, Lesa waambanga na bano banembi ba Baibolo kupichila mu bamalaika, bimwesho nangwa biloto. Lesa wabikilenga milanguluko yanji mwi abo ne kwibalengela kusala byambo byo basa kwingijisha pa kunemba byambo bya Lesa.—Tangai Lumwekesho 1:1; 21:3-5.