Nanchi Mwayuka Nyi?
Nanchi kya kine kuba’mba mu myaka ya kala muntu wakonsheshe kukusa nseku mu bujimi bwa mukwabo nyi?
Buku wa Digest wanembele Mfumu Justinian mu 1468 ke buku umo pa mabuku avula aamba pa byo bachibanga mambo myaka ya kala.
PA MATEO 13:24-26, paji byambo bya kwa Yesu bya kuba’mba: “Bufumu bwa mwiulu buji nobe muntu wakushile nkunwa yawama mu bujimi bwanji. Bantu byo balaajile, mulwanyi wanji waishile ne kukusamo nseku mu wichi ne kufuma wafumineko. Nenge ya luntembela byo yakomene ne kusema, nseku nayo yamenene.” Banembi bapusana pusana bazhinauka inge kino kishimpi kyajinga kya kine, bino mabuku a kala a mizhilo ya bena Loma amba’mba kya kine.
Dikishonale wa Baibolo umo waamba’mba: “Kukusa nseku mu bujimi bwa muntu mukwabo na mambo a kukeba kushinkanya . . . ajinga mambo akatampe mu mizhilo ya bena Loma. Kubikako uno muzhilo kumwesha’mba kino kyubilo kechi kyaubiwanga javula ne.” Shayuka wa mizhilo aye Alastair Kerr walumbulwile’mba mu 533 C.E., Mfumu wa bena Loma aye Justinian wanembele buku wanji wa Digest, mizhilo ya bena Loma ne byaambile bashayuka ba mizhilo bajingako kimye bena Loma kyo balaminenga Bayudea (nobe mu myaka 100-250 C.E). Mu uno buku (Digest, 9.2.27.14), shayuka wa mizhilo aye Ulpian waambile pa mambo aambile Kinemanga wa bena Loma wajingako mu myaka kitota kya bubiji aye Celsus. Nseku beikushile mu bujimi bwa muntu mukwabo, kabiji kyafuminemo, kajo kaonaikile. Buku wa Digest waamba pa byo bafwainwe kubila mwina bujimi nangwa muntu wasonkejile bujimi kuba’mba bamufwete ku muntu wakushilemo nseku.
Bino byubilo bya bumbanzhi byamwekanga mu Bufumu bwa bena Loma kala, bimwesha’mba bintu byalumbulwile Yesu byamwekanga.
Mu myaka kitota kitanshi, bena Loma bapele Bantangi ba Bayudea Baikalanga mu Yudea luusa lwabaya byepi?
PA KYO kya kimye, mpunzha ya Yudea beilamanga ku bena Loma, kabiji babikilemo kitumbafumu wajinga na mazhita a bashilikale. Mwingilo wanji wajinga wa kutambula misonko ya bena Loma ne kulama mutende. Bena Loma bakambulanga bantu babulanga kulondela mizhilo ne baletanga makatazho. Pano bino, bena Loma javula bapanga bangikazhi ba ku ino mpunzha mwingilo wa kutangijila bakwabo.
Kije kya Bayudea kya Saniedilini kibena kuchiba mambo
Kije kya Saniedilini kyo kyajinga kije kikatampe kya Bayudea kabiji kyo kyalenganga mizhilo yalondelanga Bayudea. Monse mwapelele Yudea mwajinga bije bya bicheche. Mambo avula acheche ne akatampe kyamweka beachibanga ku bino bije kwa kubula kwibabuula bya kuba ku bantangi bena Loma. Pano bino, bije bya Bayudea kechi bebiswishishe kwipaya bambanzhi ne, bena Loma bo bajingatu na luusa lwa kuba bino. Kimo kyayukanyikwa bulongo kyo baswishishe kije kya Saniedilini kuba ke kuchibila mambo Setepena ne kumupana kuba’mba bamwipaye na mabwe.—Byu. 6:8-15; 7:54-60.
Kije kya Bayudea kya Saniedilini kyo kyajinga na luusa lukatampe. Bino Shayuka umo aye Emil Schürer waambile’mba: “Kije kya Saniedilini kechi kyajinga na luusa lwa kukanya bantangi bena Loma kufuukula bya kuba ne kutotolwesha bantu bo bamonanga’mba babena kuleta bufinda ku kafulumende wabo ne.” Kimo kyamwekele ke kyo kya kyaubile mukulumpe wa bashilikale aye Kaludiusa Lisiasa wakashile mutumwa Paulo, wajinga ngikazhi mwina Loma.—Byu. 23:26-30.