Inge Benakwenu Baleka Kwikala Bakishinka mu Masongola

Ba Maria bekala ku Spain baambile’mba: “Bamwata wami byo bambuuijile’mba basakunkaana ne kusongola mwanyike, kyankolele bingi ku muchima mambo ne bobijile bintu byavula bingi.”

Ba Bill bekala ku Spain nabo baambile’mba: “Bakazhi bami byo bankaine, kyankolele bingi ku muchima. Bintu byonse byo twakebelenga kuba byapwijile pa mpuki. Bimye bimo kechi naikalanga na bijikila ne. Bino bimye bikwabo naikalanga bingi na bijikila.”

KIKOLA bingi ku muchima inge bamwata wenu nangwa bakazhi benu baleka kwikala bakishinka. Bamo bafuukulapo kulekelako benakwabo mambo ne kukosesha jikwabo masongola abo.a Inge mwayuka kuba’mba benakwenu balengele mambo, mukatwajijila kwikala na bijikila ku muchima nangwa kya kuba mwibalekelako mambo o balengele. Ñanyi bintu byakonsha kukwasha baji na makatazho mu masongola?

BINEMBELO BYAKONSHA KWIMUKWASHA

Nangwa kya kuba baji mu masongola bekala bingi na bijikila inge benakwabo balenga mambo, bino binembelo bibatundaika bingi. Kabiji bafunda ne kuba’mba Lesa umona bulanda bo bapitamo kabiji wibomvwina bingi lusa.—Malakai 2:13-16.

“Bijikila byamvujiile, anweba mwantekeneshe ne kunsangajika.”—Salamo 94:19.

Ba Bill bavuluka’mba: “Byo natangile kino kinembelo, natendekele kufwanyikizha’mba Yehoba ubena kuntekenesha nangwa kya kuba nji na bijikila byonkatu byuba nsemi wa mulume uji na butemwe.”

“Ku muntu wa kishinka mukekala ba kishinka.”—Salamo 18:25.

Ba Carmen bo bakaine ku balume babo baambile’mba: “Bamwata wami balekele kwikala ba kishinka, bino, naketekejiletu mwi Yehoba kuba’mba kechi ukansha nangwa kundengesha bumvu ne.”

“Kange mubambishenga michima yenu na mambo a kintu nangwa kimo ne, bino mu bintu byonse mu lulombelo ne milombelo ya misashijilo pamo na kusanta, saka musolola kwi Lesa bintu byo mukeba; kabiji mutende wa Lesa wakila milanguluko ya bantu ukalama michima ne milanguluko yenu kupichila mwi Kilishitu Yesu.”—Filipai 4:6, 7.

Ba Sasha baambile’mba: “Natanganga kino kinembelo bimye byavula ne kulomba kwi Lesa moba onse. Kuba bino kwandengejile kwikala na mutende mu bwikalo bwami.”

Bonse bo twaambapo mu uno mutwe bamwenengatu nobe kechi bakekalapo bulongo jikwabo ne. Pano bino baketekejile mwi Yehoba Lesa ne kutaana lutekenesho mu Baibolo. Ba Bill baambile’mba: “Lwitabilo lwakosa lwankwashishe bingi mu bwikalo bwami bintu byo byayile munsunya. Nangwa kya kuba ‘naendelenga mu kimpachiko mwafiitatu bwii,’ bino Lesa wajinga ne amiwa.”—Salamo 23:4

a Umvwe mukeba kulekelako nangwa kubuula kulekelako mambo mwinakwenu, monai Labainga! wa Kizungu wa April 22, 1999, pa mutwe wa kuba’mba “When a Mate Is Unfaithful.”

Bintu Byakwasha Bamo Kuchinchika

Kutanga ne kulanguluka languluka pa binembelo bitekeneshañana.

Ba Bill baambile’mba: “Natanganga buku wa Yoba ne wa Masalamo, ne kushila pa bishinka byanema byo nataananga mu byepelo byaamba pa bintu byo napichilengamo. Ano mabuku andengejile kuyuka’mba bano banembi ba Baibolo nabo bapichilenga mu bintu bipasha na byo napichilengamo.”

Kuteleka ku nyimbo.

Ba Carmen bavuluka’mba: “Inge nakankalwa kulaala bufuku, natelekanga ku nyimbo. Kuba bino kwantekeneshanga bingi.” Ba Daniel nabo baambile’mba: “Nafunjile kwimba kidali, kabiji kwimba nyimbo kwandengelanga kumvwako bulongo.”

Kubuulako bakwenu byo mubena kumvwa ku muchima.

Ba Daniel baambile ne kuba’mba: “Kyankatazhanga bingi kubuulako bakwetu byo mbena kumvwa ku muchima. Nangwa byonkabyo, najinga na balunda nami ba pa muchima bo nabulanga byo mbena kumvwa ku muchima pa juba pa juba. Nebanembelanga makalata ne kwisamba nabo pa kuba’mba nebabuule byo mbena kumvwa ku muchima. Kuba bino kwankwashishe bingi.” Ba Sasha baambile’mba: “Balongo bami bankwashishe bingi. Bamama bantekeneshanga kimye kyonse. Inge mbena kwamba bantelekanga bingi. Batata nabo bantele bingi muchima kabiji bantekeneshanga.”

Kulomba kimye kyonse.

Ba Carmen baambile’mba: “Nalombanga kwi Lesa kimye kyonse. Kuba bino kwandengejile kuyuka’mba Lesa uji pepi ne amiwa, umvwa milombelo yami kabiji unkwasha. Byo napichilenga mu makatazho, natwajijile kufwenya kwipi ne Lesa.”