Inge Muji na Kikola Kikatampe

Ba Linda baji na myaka 71 baambile’mba: “Badokotala byo bambuujile’mba nji na kansa ku mapwapwa ne mu mila, naumvwinetu nobe bañambila’mba nsa kufwa. Bino byo nabwelele ku nzubo, natendekele kulanguluka namba, ‘Kechi naji kuketekela’mba basakuntaana na kino kikola ne, nangwa byonkabyo, nafwainwa kumonapo mashinda mwa kuchinchikila kino kikola.’”

Ba Elise baji na myaka 49 baambile’mba: “Nkolwa kikola kya mu mishipeshipe kilengela lubaji lumo lwa kilungi kyami kukola bingi. Kino kikola kindengela kwikala bingi na bijikila. Bimye bimo namonanga’mba kafwako wakonsha kunkwasha ne, kabiji nalangulukanga ne pa kwiipaya.”

Mwanamulume wakolwa uji mu kakinga ka balemana uji na bakazhi ne baana banji

INGE anweba nangwa mulunda nenu bamutaana na kikola kikatampe, mwafwainwa mwayuka byo kikola ku muchima. Kino kikola kimulengela kwikala bingi na milanguluko yavula. Mwakonsha kwakamwa bingi ne kwikala na bijikila inge mufwao mali a kupotamo muchi, kabiji uno muchi kampe wimulengela kwikala na lukatazho lukwabo. Kikola kikatampe kyakonsha kulengela muntu kuleka kulanguluka bulongo.

Kwepi ko twafwainwa kutaana bukwasho? Bavula bataana kuba’mba kulomba kwi Lesa kimye kyonse ne kutanga Baibolo kwibatekenesha bingi. Balongo benu ne balunda nenu nabo bakonsha kwimukwasha.

BINTU BYAKWASHA BAMO KUCHINCHIKA

Ba Robert baji na myaka 58 baambile’mba: “Inge muji na kikola kikatampe mwafwainwa kwikala na lwitabilo lwakosa mwi Lesa, mambo aye ukemukwasha kuchinchika. Lombainga kwi Lesa kimye kyonse ne kumubuula byo mubena kumvwa ku muchima. Mulombainga kuba’mba emupe mupashi wanji wazhila kuba’mba muchinchike kikola kyenu, kukosesha kisemi kyenu, kubula kwikala na binyenge ne kutwajijila kwikala ba kishinka.

“Kitekenesha bingi inge ba mu kisemi kyenu bemuta muchima. Pa juba pa juba, ba mu kisemi kyami bantumina mafoni na kungipuzha’mba, ‘Mwabuuka byepi?’ Balunda nami nabo bantundaika bingi ne kunkwasha kuchinchika mu makatazho o mbena kupitamo.”

Ñanyi misambo yo mwafwainwa kwisamba na mulunda nenu wakolwa ye mwaya na kupempula? Ba Linda baambile’mba: “Muntu ubena kukolwa ukeba kwisamba ne kuseka, kechi kwambatu pa kikola kyanji ne. Onkao mambo, inge mwaya na kupempula mulwazhi, mwafwainwa kwisambanga nanji pa bintutu bikwabo bya mu bwikalo.”

Bulume bwitupa Lesa ne lutekenesho lwa mu Binembelo, kubikapotu ne bukwasho bufuma ku balongo ne balunda netu bwitulengela kushiinwa’mba kyanema kwikala na bumi nangwa kya kuba tubena kukolwa kikola kikatampe.

Binembelo Byakonsha Kwimukwasha

Ketekelai mwi Lesa.

“Nalombele kwi Yehoba, ne aye wankumbwile. Wampokolwele ku bintu byonse byangubishenga moyo. Uno muyanji waichile, kabiji Yehoba wamumvwine.”—Salamo 34:4, 6.

Ba Linda bo twaambapo kala, baambile’mba: “Kimye kyonse kyo ndomba kwi Lesa, kechi ndomba kuba’mba apwishe kikola kyami ne. Bino ndomba kuba’mba ankwashe kukosa ne kuchinchika.”

Kutanga Mambo a Lesa Kukemukosesha.

“Kafwako muntu nangwa umo ukekala mu kyalo ukamba’mba: ‘Nakolwa’ ne.”—Isaya 33:24.

Kulanguluka languluka pa milaye ya Lesa iji kulutwe kukemulengela kwikala na luketekelo ne kwimupa bulume bwa kuchinchika.

Bulainga balongo benu ne balunda nenu kuba’mba bemukwashe

“Mulunda wa kine umwesha butemwe kimye kyonse, kabiji ye mulongo ye wakonsha kuketekela mu kimye kya bya malwa.”—Byambo bya Maana 17:17.

Ba Elise bo twaambapo kala nabo baambile’mba: “Kange mwipatulenga ku bakwenu ne. Babuulainga makatazho o mubena kupitamo kuba’mba bemukwashenga. Bimye bimo mwakonsha kutendeka kulanguluka’mba kafwako ubena kwimukwasha ne, kampe ne kulanguluka’mba Lesa kechi wimuta muchima ne, bino kino kechi kyo kimye kya kwipatula ku bakwenu ne.”