Inge Kemulanguluke’mba Kyawamatu ne Kufwa

Ba Adriana bekala ku Brazil bashimikizha’mba: “Najinga bingi na milanguluko yavula kya kuba natendekele ne kulangulukanga’mba kyawamatu ne kufwa.”

NANCHI ne anweba mwakilangulukapo kala amba kyawamatu ne kufwa nyi? Inge byo byo kiji, mwafwainwa mwayuka byaumvwinenga ba Adriana ku muchima. Bajinga bingi na bijikila kabiji bamwenengatu nobe bintu kechi bikebawaminapo mu bwikalo ne. Ba Adriana bebataine na kikola kiya na mambo a kukizhamo kwikala na bijikila.

Akilangulukai pa ba Kaoru bekala ku Japan balaminenga bansemi babo baendangatu na kukolwa kolwa. Baambile’mba: “Pa kyokya kimye, najinga bingi na lukatazho ku nkito. Kechi najinga na kilaka kya kuja kajo ne, kabiji bufuku kechi nalaalanga ne. Natendekele kulanguluka’mba kyawamatu ne kufwa.”

Mwanamulume umo wikala ku Nigeria aye Ojebode waambile’mba: “Makatazho ampezhezhe bingi maana kya kuba kimye kimo najilanga ne kujila. Onkao mambo, natendekele kulanguluka’mba kyawamatu ne kwiipaya.” Bino kyawamatu ke kya kuba’mba ba Ojebode, ba Kaoru ne ba Adriana kechi beipayile ne. Bino pa mwaka pa mwaka bantu bavula beipaya.

KWEPI KO MWAKONSHA KUTAANA BUKWASHO?

Javula bantu batemwa kwikujika ke banabalume, ne kibalengela kuba bino ke kya kuba’mba bomvwa bumvu kubuula bakwabo byo babena kumvwa ku muchima. Yesu waambile’mba, bantu bakolwa bakeba shayuka. (Luka 5:31) Inge ne anweba mulanguluka pa kwiipaya, mwane kechi mwafwainwa kumvwa bumvu kubuulako bakwenu byo mubena kupitamo ne. Bantu bavula bekala na bijikila bataana kuba’mba kuya ku kipatela na kumona ba dokotala kwibakwasha bingi kuyuka bya kuba na bijikila byo baji nabyo. Ba Ojebode, ba Kaoru ne ba Adriana bonse bano bayile ku ba dokotala kuba’mba bebakwashe kabiji luno bayuka bya kuba na makatazho abo.

Ba dokotala bataana kuba’mba muchi ne kwisamba na muntu uji na bijikila kumulengela kukasuluka. Bantu baji na bijikila bakeba bingi balongo ne balunda nabo kwibata muchima ne kwibatundaika. Mulunda wa kine ye twafwainwa kwikala nanji ke Yehoba Lesa, witupa Baibolo witukwasha mu bwikalo bwetu.

NANCHI ANO MAKATAZHO AKAPWA NYI?

Bantu bekala na bijikila pa moba avula bafwainwa kuya na kumona ba dokotala ne kupimpulako bintu byo boba mu bwikalo bwabo. Pano bino inge kya kuba bijikila bimupezha maana, mwafwainwa kulanguluka pa milaye iji kulutwe byonka byaubile ba Ojebode. Baambile’mba: “Nkebesha bingi mulaye uji pa Isaya 33:24 kufika. Uno mulaye waamba bantu pano pa ntanda byo bakabulanga kwamba’mba ‘Nakolwa.’” Byonkatu ba Ojebode byo balanguluka pa mulaye wa Lesa wa “ntanda ipya” mukabula “misongo,” ne anweba mwafwainwa kulangulukanga pa uno mulaye kimye kyonse. (Lumwekesho 21:1, 4) Lesa kechi ukafumyapotu misongo pano pa ntanda ne, bino ukafumyapo ne bintu byonse bikatazha bantu. Kechi mukomvwapo misongo jikwabo ne, kabiji ‘kechi mukeivulukapo jibiji ne, kabiji kechi ikeyapo jibiji mu michima yenu ne.’—Isaya 65:17.

Binembelo Byakonsha Kwimukwasha

Lesa wayuka makatazho o mupitamo.

“Amiwa Yehoba Lesa wobe nakukwata ku kuboko kobe kwa kilujo, yami mbena kukwambila namba, ‘kuchina ne, amiwa nkakukwasha.’”—Isaya 41:13.

Yehoba ye wayuka bulongo makatazho o tupitamo kukila bantu kabiji witukwasha bingi.

Langulukainga pa Mambo a Lesa.

‘Elaija walombele’mba afwe. Waambile’mba: Anweba Yehoba tambulai bumi bwami.’—1 Bamfumu 19:4.

Ba Ojebode baambile’mba: “Kulanguluka pa Mambo a Lesa kwankwashishe bingi. Nataaine kuba’mba ngauzhi Elaija naye pa kimye kimo walombele kuba’mba afwe.”

Funjilaiko ku bintu byapichilemo bantu banembwa mu Baibolo.

Yesu waambile’mba: “Nakulombelako kuba’mba lwitabilo lobe lutwajijile kukosa; ne obewa inge wabwela, ukakoseshe balongo bobe.”—Luka 22:32.

Mutumwa Petelo byo akaine Yesu bimye bisatu, kyamukolele bingi ku muchima ne kutendeka kujila. Ba Kaoru baambile’mba, “byamwekejile Petelo bindengela kuyuka’mba Yehoba ne Yesu bayukile byo aumvwinenga ku muchima. Akino kintundaika bingi.”

Kechi mukomvwapo misongo jikwabo ne, kabiji ‘kechi mukeivulukapo jibiji ne, kabiji kechi ikeyapo jibiji mu michima yenu ne.’—Isaya 65:17