Nanchi Nenuwa Mukatanwako Nyi?
1 Umo wabandamo mu bukamonyi kimye kimo waambile’mba: “Umvwe wapuswa ku juba jitanshi ja kupwila kwa nkambi, abya wapuswa ku byavula bingi!” Mambo ka o aambijile byo byo? Mambo a kuba’mba juba jitanshi yo ntendekelo ya kijiilo kyawama kya ku mupashi kitukokozhezha jibumba ja kwa Yehoba. (Isa. 25:6) Kutanwako kwetu kutatula pa juba jitanshi kumwesha kuba’mba twitabizha mawi a nembi wa masalamo a kuba’mba: “Nasekejile byo bañambijile’mba, Tuyenga ku nzubo ya Yehoba.”—Sala. 122:1.
2 Nangwa kikale byonkabyo, mpendwa ya batainwe ku Kupwila kwa Nkambi mwaka wapwa kwa “Icebo ca kwa Lesa ica Kusesema” yakepele bingi pa juba jitanshi kukila mpendwa ya batainweko pa juba ja bubiji ne ja busatu. Kino kibena kulumbulula kuba’mba balongo bavula bapushilwepo pa majashi a pa kupwila aambilenga pa byambo byanema bya kyambo kya bungauzhi. Kabiji balushile kukwatankana kwa lusekelo na bakwabo baitabila.
3 Kange Muleka Nkito Imuchibikizhe ne: Kampepo kyalengejile bamo kukankalwa kutanwako juba jitanshi kyajinga kijikila kya kuchina’mba bakapangiwa nkito. Nangwa byonkabyo, Bakamonyi bavula batana kuba’mba bebatwezha nkito baswisha inge balombela jimo kuya pa livi. Umo utwezha bantu nkito watemenwe bingi pa kumona bukose bwa kwa nyenga painiya bwa kutanwa ku kupwila konse kwa pa kipwilo, ne kupwila kukatampe. Uno utwezha bantu nkito kyamutundaike kutanwako ku kupwila kwa nkambi kwatainwe nyenga!
4 Kechi mwafwainwa kulanguluka kuba’mba bakulumpe bapa nkito yenu kechi bakemuswisha kwimupa kimye kya livi, nangwa kulanguluka kuba’mba kubula kutanwako ku kupwila pa juba jitanshi kijitu bulongo ne. Ikokozhai ne kushiinwa na muchima yense, kabiji mweshai bakulumpe ba nkito yenu Binembelo ne kwibabula bulongo ene mambo o kyanemena kutanwa ku kupwila kwa nkambi, kuba’mba ke lubaji lwanema mu mpopwelo yetu. (Hebe. 10:24, 25) Apa bino muketekele na michima yenu yonse mu milaye ya kwa Yehoba, sa muyuka kuba’mba byonse byo mwasaka lwa ku mubiji bikemubikilwapo umvwe mwatangizhako bya ku mupashi mu bwikalo bwenu.—Mat. 6:33; Hebe. 13:5, 6.
5 Kishina kikatampe ke kya kusanchila “bintu byawamisha.” (Fili. 1:10, 11; Sala. 27:4) Kino kitulengela kwikokozha pa kuba’mba tukamwenemo mu buno bupe kufuma kwi Yehoba. Tatulaiko kwikokozha lonkaluno, kabiji fukulai kutanwako moba onse asatu!