Jishuko Jiji ku Bakyanyike
1 Lelo jino bansemi bavula bomvwa bingi bulongo kimye kyo bavuluka jishuko jo beyowanga kimye kyo bajinga banyike ne byo bakomenenga mu kine. Jishuko jo bavuluka bavula ke ja mwingilo wa Juba ja Magazini. Uno mwingilo watendekele mu bipwilo byonse mu 1949. Juba jimo mukachi ka mulungu, bonse bevwangangamo mu uno mwingilo wa kutambika Ulupungu lwa kwa Kalinda ne Loleni!, mu mikwakwa, ku nzubo ne nzubo, ku shitolo ne shitolo, ne mu mashinda akwabo. Basapwishi bakyanyike kikatakata na lusekelo bapembelejilenga kwikalamo na lubaji mu uno mwingilo na mambo a kuba kino kibapele jishuko ja kwingilako mwingilo umo wingilapo bakulumpe mu kipwilo. Nanchi nenuwa mwaingijilengako uno mwingilo kimye kyo mwakijinga banyike nyi?
2 Vwangaimo ne Bana Benu: Bana babacheche babula kuyuka bya kutendeka mwisambo wa mu Binembelo na mwina nzubo bakonsha kutambika magazini. Kuba byobyo kukebewatu kufunda ñambilo yapela mu mawi acheche. Kampe kwambatu mawi acheche pa kipikichala kiji pa nkupo, kwawaina. Bena mazubo bavula batambula ano magazini atambika bana betu, kabiji javula batakaika bukishinka ne byubilo byawama bya bano bakyanyike. Kupichila mu kwibakwasha pacheche, bakyanyike bafwainwa kwingila uno mwingilo bulongo, ne kwingilako mwingilo mukatampe wa kukumbanya mambo awama a Bufumu. Nangwa kikale byonkabyo, bana byo babena kukoma, bansemi bakonsha kutwajijila kwibakwasha kunungulula busendwe bwabo bwa busapwishi.
3 Manuel watatwile kusapwila ku nzubo ne nzubo kimye kyo ajinga na myaka ya kusemwa isatu. Bansemi yanji bamufunjishe kusunga ñambilo ipi mu milangwe. Luno na kizaku usapwila nabo pamo, kabiji utambika magazini, mabuloshuwa, ne matalakiti avula. Usapwila ne busapwishi bwa kushukilwa. Kimye kimo bansemi kyo bayile nanji ku paka na kukokoloka, watatwile kutambika matalakiti ku bantu bo bataineko. Nangwa kya kuba’mba Manuel ukiji bingi mwanyike, kubambakana kwanji mu butumwa kutundaika bansemi yanji ne kipwilo kyonse.—Mana. 22:6.
4 Pa Kalenda ya Nte sha kwa Yehova uwa mu 2000 kila-kibelushi kyatongolwa kwikala “Juba ja Magazini”. Anweba bansemi tubena kwimutundaika kuba’mba mwikale na lusekelo jibiji mu uno mwingilo, ne kukwasha bana benu kwingilako papela bulume bwabo mu uno mwingilo.