Anweba Bansemi—Funjishai Baana Benu Byubilo Byawama

¹ Byubilo byawama kechi biswanyiwa nangwa kwibifundatu ponkapo ne. Papita kimye kyabaya pa kuba’mba mufunjishe baana byubilo byawama. “Kufunjisha” kulumbulula “kubulañana mu kubwezha-bwezhapo” nangwa’mba “kupana maana pache pache.” Bansemi bafwainwa kwibikako na mukoyo pa kuba’mba ‘bakomeshe, kufunjisha ne kujimuna [baana babo] monka mwaswila aye Nkambo.’—Efi. 6:4.

² Tatulai Kwibafunjisha Saka Bakiji Balukeke: Baana babacheche bafunda ne kuba bintu bukiji-bukiji. Bakulumpe javula bakatazhiwa bingi kufunda mulaka ungi, pano baana nangwatu bakyangye kutatula sukulu bakonsha kufunda milaka ibiji nangwa isatu pa kimye kimotu. Kange mulanguluke’mba mwanenu wakikepa kufunda byubilo byawama ne. Umvwe mwatatula bukiji ne kutwajijila na kumufunjisha bukine bwa mu Baibolo, kimye kyo akasuntukakotu pacheche, ukakomanga na ‘maana a kumona lupulukilo.’—2 Timo. 3:15.

³ Funjishai Baana Kwibijila Kuya mu Mwingilo wa mu Bujimi: Kyubilo kyawama kyo mwafwainwa kufunjisha baana kimye kyo babena kukoma ke kusapwila mambo awama a Bufumu bwa Lesa. Bansemi bavula batatula kuba bino kimye kyo basenda baana babo mu mwingilo wa ku nzubo ne nzubo saka bakijitu banyike. Umvwe bansemi saka baya kimye kyonse mu mwingilo wa busapwishi, kikwasha baana kunemeka ne kubambakana mu mwingilo kabiji bebamwesha bya kusapwila mu mbaji yapusana-pusana ya mwingilo wa mu bujimi.

⁴ Kunembesha mu Sukulu ya Mwingilo wa Teokalasi nako kukwasha baana. Kwibafunjisha byubilo byawama bya kufunda ne kutanga saka babena kwibyumvwa. Bafunda bya kwisamba pa mambo a Baibolo, bya kubwela ku bantu bobesambile nabo ne bya kutangijila mafunjisho a Baibolo. Lufunjisho lwa uno mutundu lwakonsha kwibatundaika kwingilako bupainiya ne kukanamina mashuko eikajila a mwingilo. Bavula baji pa Betele ne bamishonale bavuluka moba abo atanshi o banembeshe mu Sukulu ya Mwingilo wa Teokalasi, kabiji ne kwiimona kuba’mba ke kintu kimo kibakwashishe kwikala na byubilo byawama.

⁵ Bonse tuji nobe buchimba mu maboko a Mbumbi Mukatampe, aye Yehoba. (Isa. 64:8) Buchimba po bwakinekena po po bupela kubumba. Kechi kyapela kwibubumba umvwe bwauma ne. Byo biji ne bantu. Kipela bingi kufunjisha mwaana kimye kyo akikepa. Myaka ya bwanyike bwabo yo yawama kwibafunjishishamo, mambo kyo kimye kya kwibabumba kwikala na byubilo byawama nangwa byatama. Byo muji bansemi baji na butemwe, tatulai bukiji kufunjisha baana benu byubilo byawama mu mwingilo wa bwina Kilishitu.