Ingilai na Ngovu mu Mwingilo wa Kunowa
1 Bangauzhi ba Yehoba ne Yesu Kilishitu baambilepo pa uno mwingilo wa kukonkanya bantu. (Isa. 56:8; Ezi. 34:11; Yoa. 10:16) Uno mwingilo pano ubena kwingijiwa mu kusapwila mambo awama a Bufumu mwaya ntanda yonse. (Mat. 24:14) Lupusano pakachi ka bantu babena kwingijila Lesa ne babena kubula kumwingijila lwayukanyikwa bingi. (Mala. 3:18) Kino kibena kulumbulula ka kotuji?
2 Mwingilo Wetu: Twakonsha kufunjila kwi Paulo, waingijile na ngovu yanji mu kutwala palutwe mwingilo wa bwina Kilishitu. Wasakishe bingi kusapwila pa kuba’mba akwashe bantu bonse kumvwa mambo awama ne kupuluka. Kino kyamutundaikile bingi kwibasapwila kimye kyonse. (Loma 1:14-17) Byo tubena kumona makatazho avula ku bantu lelo jino, nanchi kechi kitutundaikapo kuvuluka’mba tuji na mwingilo mukatampe wa kusapwila bantu mu nyaunda yetu nenyi?—1 Ko. 9:16.
3 Kimye kya Kwikala Bapayankana mu Mwingilo: Mwingilo wa kusapwila uji nobe mwingilo wa kukeba bantu bataika. Onkao mambo, twafwainwa kutana bantu ne kwibakwasha lonka luno, mambo kimye kyakepa kabiji ne bantu baji mu kizumba! Yesu kyo kyo akambizhe baana banji ba bwanga amba “lombai ku Mwina bujimi atume bantu ba kunowa mu bujimi bwanji.”—Mat. 9:38.
4 Lelo jino, basapwishi ba Bufumu bavula babaishako mwingilo wabo wa kupulusha bantu mambo bayuka amba kino kyo kyonka kimye kyafwainwa. Mwanyike umo wa jizhina ja Hirohisa waikalanga na bainanji ne bankasanji bana. Pa kuba’mba akwasheko ba mu kisemi kyanji, wabukanga 3 koloko wa ku makya na kutwala mapepala a byambo. Nangwa kyajinga bino, Hirohisa wakebeshe bingi kwingila na ngovu mu mwingilo wa kusapwila, onkao mambo watatwile bupainiya bwa kimye kyonse. Abya kujipo mashinda amo mo mwakonsha kwingijila na ngovu yonse mu uno mwingilo ukabula kubwelapo nyi?
5 “Kimye bekikepesha kala.” (1 Ko. 7:29) Onkao mambo, twayai twingile na ngovu mu mwingilo wanemesha, wa kusapwila mambo awama a Bufumu ne kulenga baana ba bwanga. Yesu waesakenye uno mwingilo ku mwingilo wa kunowa. (Mat. 9:35-38) Umvwe saka twingila na ngovu mu uno mwingilo wa kunowa, tukakwasha bantu kwiya mu jibumba jikatampe ja bapopweshi balumbululwa mu Lumwekesho 7:9, 10.