Bakwatankana Pamo na Yehoba ne Mwananji Mulusekelo
Kuvuluka Juba Jikatampe Japamwaka Pamwaka Jikekalako pa March 28
1 Kutanwa ku Kijiilo kya Nkambo kikekalako panyuma yakuzhika juba pa March 28, 2002, kukamwesha’mba tumvwañana na Yehoba ne Yesu Kilishitu mulusekelo. Pa jonka jino juba janema, bena Kilishitu bashingwa bashalapo bakeyowa “lumvwañano” lwiikajila lobaji nalo pamo nabanswanyi ba Bufumu bakwabo, na Shanji, ne Mwananji. (1 Yoa. 1:3; Efi. 1:11, 12) Mamilyonyi a ‘mikooko ikwabo’ abo bakalangulukanga pajishuko jawama jobaji najo jakwingijila pamo na Yehoba ne Mwananji, kwikala bamuchima umo mulanguluko umo neabo mukwingila mwingilo wa Lesa!—Yoa. 10:16.
2 Kwingijila Pamo Mulumvwañano: Yehoba ne Yesu mulusekelo bomvwañena pamo kimye kyonse. Baingijilenga bingi bulongo pamo pamyaka yavula yakukankalwa kubala muntu saka akyangye kulengwa. (Mika. 5:2) Onkao mambo, batemwañene bingi. Byoajinga muntu wamaana, uno Mwana mubeji saakyangye kwikalako mubumuntu waambile’mba: “Najinga wanji [Yehoba] ye amwenejilemo lusekelo pa juba pa juba, saka nsekela ku meso anji moba onse.” (Mana. 8:30) Bwikalo bobaikele mulumvwañano lukatampe na Nsulo yabutemwe, kine kine bwamufunjishe Mwana Lesa bintu byavula bingi.—1 Yoa. 4:8.
3 Byoamwene kuba’mba bantu bafwainwa nkuulo, Yehoba wasajile Mwananji yenkawa umotu kikatakata wasekejile mubantu, kwikala kekitapisho kyakukuula bantu motwamwena luketekelotu. (Mana. 8:31) Byonka byobakwatankana Yehoba ne Mwananji mukwingijila pamo nkebelo imo, neatweba twakwatankana pamo nabo neatweba bene nabene mumfungwa yabutemwe bwakosa nalusekelo mukuba kyaswa muchima wa Lesa.
4 Kumwesha Lusanchilo Lwetu Lwapamuchima: Kutanwako Kukivuluko saka tubena kuteleka namushingi, tukamwesha lusanchilo pabutemwe bwa Yehoba nekitapisho kya Mwananji kwiatweba. Bishinka bikakonkomwenwapo kebyakumwenako byawama byakwa Yesu, bukishinka bwanji bwakufwa kenkuulo, nebukalama bwanji bwakwikala Mfumu mu Bufumu bwa Lesa bwaikajikwa, kubikapotu nemapesho akaleta Bufumu kubantu. Kabiji baketuvululako nekutwajijila kwikala bakishinka, babambakana mukwingijila kyaswa muchima wa Yehoba byotuji ba “mwingilo wa kwingijila bukine.”—3 Yoa. 8; Yako. 2:17.
5 Kukwashanga Bakwetu Kusapwila Pamo Neatweba: Jibumba jabakulumpe mukipwilo bafwainwa kwingila nangovu kukosesha Bakamonyi bonse bakoka baji munyaunda kuba’mba bakatanweko ku Kivuluko kya lufu lwa Kilishitu. (Mat. 18:12, 13) Yukilai jimo bomuketa kuchina kwibalubako mukamone’mba bonse mwibeta.
6 Abya mwayukapo bakwabo bakonsha kwiya nakutanwa ku Kivuluko nyi? Bafwakeshai nakwibakosesha kuba’mba bakeye nakutanwako. Batundaikai kutanwako nekwibatambulwila bulongo. Twayai twingile nangovu yetu mukino kimye kyanema mumwaka kwita bonse botufunjisha Baibolo, baji nalusekelo lwakukeba kufunda, nebisemi byetu, apa bino nebakwabotu. Bantu bonse bafunda ‘kuwama kwine kwa maana a kuyuka Kilishitu Yesu’ bakimwenamo munkuulo. (Fili. 3:8) Bonse baitabila mukitapisho kya Kilishitu bakonsha kwikala naluketekelo lwakosa lwabumi bwamyaka nemyaka.—Yoa. 3:16.
7 Kange mulubeko Kivuluko byokyakonsha kukwasha bantu bakishinkane. Myaka ibiji yapitapo pajikuji ja Papua [Papua New Guinea], bantu 11 bajinga nalusekelo lwakufunda bukine baendele mukabwato kachuchu pamaawala 17 pakalunga kauba manyaki kubatu’mba bakatanweko. Nga mamboka obaendele bino? Baambile’mba: “Twakebeshe bingi kuvulukila pamo Kivuluko kya Kilishitu nabapopweshi bakwetu bakwa Yehoba; nanchi kyafwainwe bingi kuba’mba tuye.” Akilangulukai pakukalakana kwakalakene boba bajinga nalusekelo lwakufunda bukine nelusanchilo lwabo lwakwingijila pamo mulusekelo na Yehoba, Mwananji ne balongo babwina Kilishitu mwaya ntanda yonse!
8 Tatulai lufunjisho lwa Baibolo nabonse bakeba kufunda bukine. Batundaikai kutanwanga kukupwila kwakipwilo kimye kyonse nekubulangako bakwabo bukine bobabena kufunda. Bakwashai ‘bendenga mukyeya’ ne ‘kuba byabukine’ kwingijisha mafunde amu Baibolo mubwikalo bwabo. (1 Yoa. 1:6, 7) Bakwashai kwikala balunda na Yehoba nekutwajijila nakukomenako mulusanchilo lwakwingijila pamo mukuba kyaswa muchima wanji.
9 Byojijipo jishuko jikatampe jakwikala balusekelo kukwatankena pamo ‘mu mupashi umo, kasa twibilwila na muchima umo abya byaitabilwa bya mambo awama’! (Fili. 1:27, 28) Twayayi tutengelenga kupwañena kwetu pamo kwawama pa Kivuluko pa March 28, kimye kyonse satusanchila Yehoba ne Mwananji!—Luka 22:19.