Bisemi Byakonsha Kukosa Byepi Kumupashi?
1 Bisemi byabwina Kilishitu bitakaikwa bingi mambo ‘akumwesha kunemeka Lesa kwabo ku ba mu kisaka kyabo bene.’ (1 Timo. 5:4) Nangwa byonkabyo, namambo abintu byatama bituzhokoloka byakonsha kulefula lwitabilo lwetu, kyanema bingi kuba’mba bisemi bingilenga nangovu kwikosesha kumupashi. Byakonsha kwikosesha byepi?
2 Ikalai Nabumutwe bwa Kilishitu: Mitwe yabisemi yafwainwa kulonda Yesu Kilishitu mujishinda jobengijilamo mwingilo wabo wakukoseshamo bisemi byabo. Kununga pabutemwe boamwesheshe kwiatweba bwakwipana mulufu, Yesu neluno watwajijila na ‘kujisha nekulela’ bulongo kipwilo. (Efi. 5:25-29) Bansemi babutemwe balonda kino kyakumwenako kyakintente kyakuta muchima kubikebewa byakumupashi byaba mubisemi byabo pajuba nejuba. Kino kivwangamo kwikala nalufunjisho lwa Baibolo lwakisemi mulungu nemulungu, kwisamba misambo yabya kumupashi umvwe patanyiwa kimye, nekupwisha makatazho onse inge aiya.—Mpitu. 6:6, 7.
3 Mumwingilo Wamubujimi: Bonse mukisemi bafwainwa kuyuka’mba kusapwila pe Yehoba nenkebelo yanji kubakwabo kemwingilo wanema bingi mumpopwelo yabo. (Isa. 43:10-12) Umvwe anweba bansemi mukeba baana benu kwikala Bakamonyi bakwa Yehoba bakishinka, mwafwainwa kutatwilako jimo bukiji-bukiji kwibanengezha kwikala nalusekelo lwakuya mumwingilo. Isambai ene mambo kyobafwainwa kwipaina mumwingilo nekwingilako mulungu nemulungu. (Mat. 22:37-39) Kepo munengezhe kimye kyakuba’mba mwingilenga nabo mumwingilo wamubujimi.
4 Ikalaiko nakimye mukachi kamulungu kyakukwashishamo kisemi kyenu kuyuka buneme bwamwingilo wakusapwila kikatakata kimye kyomwikala nalufunjisho lwakisemi, mwafwainwa kunengezhapo ñambilo imo yawama nekwiyesekela jimo bulongo. Funjishai baana benu bonse pamuntu pamuntu byakwingila mumwingilo, mwibakwashe kuya palutwe kwesakana nakimino nebulume bwabo. Isambai nabo mumvwe byobabena kwiumvwa panyuma yakwingila nabo kimye kitanshi uno mwingilo wawama wa Yehoba. Shimikizhai byajikumweka bikosesha lwitabilo. Umvwe bisemi “byatompa kala amba, Nkambo ye wawama,” bikafwenya kwipi na Yehoba, neaye ukebikwasha kushinda “nshiji yonse.”—1 Pe. 2:1-3.
5 Pakupwila: Byokiwamapo umvwe bonse mukisemi kebekwashe bene nabene kutanwa kukupwila kwakipwilo, kikatakata umvwe umo wamwiabo wakoka, walefulwa, nangwa uji namakatazho! Nyenga umo wakyanyike waambile’mba, “Batata umvwe bakomboka kufuma kunkito bafika panzubo sabakoka. Bino nesamba nabo kishinka kimo kyotusakufundapo pakupwila jojo juba, kabiji kino kibatundaika bingi kuya nakupwila. Umvwe neamiwa nakoka, nabo bantundaika kuba’mba ngye.”—Hebe. 10:24, 25.
6 Kubila Bintu Pamo: Bisemi byafwainwa kubilanga bintu pamo, nabiji kukwashañana mingilo yapanzubo. Kabiji pafwainwa kwikalangako nekimye kyabya kisangajimbwe byawama. Nabiji kukaya nekujiila pamo, kufwakasha, kukaya bisela byapusana-pusana, nekuya nakupempula balongo kwakonsha kusangajika kabiji ketubimye tumo twawama kwituvulukanga.—Sapwi. 3:4.
7 Bisemi byabwina Kilishitu byakosa bishinda makatazho eya mukisemi pajuba nejuba ao akonsha kulefula bumupashi bwabo. Byobafwenya kwipi ne Yehoba, wibakosesha mubulume bwangovu yanji.—Efi. 6:10.