Mwingilo Utundaikwa na Lesa
1 Mukachi ka bakalume ba Lesa ano moba, bachechetu bo bafunda sukulu kufika palepa, kwikala banonshi, nangwa kutumbalala mu buno bwikalo botujimo. Na onka ano mambo, bantu bamo basula mwingilo wetu ne kumulengulula. (Isa. 53:3) Nangwa byonkabyo, mwingilo ye twingila wa kufunjisha Baibolo waleta lutekenesho ne luketekelo ku bantu bavula mwaya ntanda yonse. Pano nga bano bantutu bengila byepi bulongo uno mwingilo? Bengila na lutundaiko lwa Lesa. (Mat. 28:19, 20; Byubilo 1:8) Mutumwa Paulo walondolwele’mba “Lesa wasalulwilwe byanekena bya panopantanda, amba ebilengeshe bumvu byakosa.”—1 Ko. 1:26-29.
2 Batumwa ne bakwabo bena Kilishitu ba mu myaka kitota kitanshi kechi ‘bafunjile ne, bajinga bantutu.’ (Byubilo 4:13) Bino, bachinchikile ne kutwajijila kwingila mwingilo wabo wa kusapwila mambo awama, kabiji Yehoba wibapesheshe pa kwingila na ngovu. Nangwa kyakuba kwajinga mikiika ne lupata, “mambo a Lesa ayilenga na kukoma na bulume ne kushinda ashinjilenga.” Kafwako nangwa kimo kyakonsheshe kuchibikizha mwingilo ne, mambo Lesa ye wa mutundaikilenga. (Byubilo 5:38, 39; 19:20) Byo byo kiji ne mu ano moba. Kafwako nangwa lupata lukatampe lufuma ku bakalama baji na ngovu lwachibikizha mambo awama kubula kukoma ne kushinda ne.—Isa. 54:17.
3 Lutotelo Lonse Luya kwi Lesa: Nanchi kifulo kyo tuji nakyo kya kwikala ba mingilo ba Lesa, kitulengela kwitota nyi? Ine. Kwamba pa mambo a mwingilo wa bwina Kilishitu, Paulo wanembele’mba: ‘Tuji na kino kya buneme mu bijiilo bya buchimba, amba bukata bwine bwa bulume bumweke byo buji bwa kwa Lesa, ne byo bubula kufuma mwi atweba.’ (2 Ko. 4:7) Paulo wayukile’mba wakonsheshetu kwingila mwingilo wanji kana na bukwasho boapaine Lesa.—Efi. 6:19, 20; Fili. 4:13.
4 Ne atweba twayuka’mba uno mwingilo wa kusapwila ubena kwingijiwa na mambo akuba’mba tuji na “bukwasho bufuma kwi Lesa.” (Byubilo 26:22) Mu yenka uno mwingilo wa ntanda yonse, Yehoba ubena kwitwingijisha mu jishinda ja kukumya kutwala mambo aletesha moyo ku mikoka yonse ya bantu kuba’mba kimwesho kya buchibamambo kyafwenya kala pepi. (Hagai 2:7) Kine byo twapeshiwapo pa kwikala “ba mu mwingilo umo ne Lesa” mu kunowa kukatampe kwa ku mupashi!—1 Ko. 3:6-9.