Nanchi Mwanenu Wakonsha Kufuukulapo Kintu Kyanema Nyi?
1. Bakamonyi bakyanyike basalapo kuba ka pa mambo a kwingijisha mashi? Panai kya kumwenako.
1 Ñanyi kintu kyanema kyo afwainwa kufuukula? Ke pa mambo a kubikwa mashi. Byonka byo kyambiwa mu kibaba kiji na mutwe wa kuba’mba “Endeni Nga Fintu Mwakambishiwa Na Yehova” mu Kyamba kya Usopa kya Kibemba kya June 15, 1991, kimwesha baana ba Bakamonyi ba kwa Yehoba byo batwajijile kwishimwina bene saka basumininwa kumwesha’mba banemekele muzhilo wa Lesa wa mashi byonka byo bamunemekele bansemi babo. Nanchi kino kyakonsha kukebewa ne ku mwanenu ukiji mucheche nyi?
2. Muzhilo ka kochi umo ye aingijishe ku mwanyike wakaine kubikwa mashi, kabiji bansemi bena Kilishitu ne baana babo bakyanyike bafunjilako ka ku kino?
2 Mizhilo Inemeka Bikeba Jiwi ja Muchima Nyi? Mu United States, kochi mukatampe wa Illinois Supreme wachibapo kala mambo a mwanyike wajinga na lūsa lwa kukana kubikwa mashi. Kimye kyo bachibilenga mambo a nyenga wa myaka 17, kochi yaambile amba: “Umvwe bishinka byaumvwanyika ne kushiinwa’mba uno mwanyike wakoma kya kuba wakonsha kuyuka byafwainwa kufumamo mu byo abena kwamba ne kufuukula bya bukulumpe, ko kuba’mba bintu byaitabilamo uno mwanyike byakonsha kumulengela kusalapo mwine kutambula yewo muchi nangwa ne.” Onkao mambo, pa kumona’mba kana mwanyike wakoma kya kukonsha kwifuukwila mwine bintu, badokotala nangwa babinemanga bakonsha kushikisha mulwazhi kwiambila mwine kyo asalapo pa mambo a mashi. Mwanyike wafwainwa kuyuka bulongo kubaya kwa kikola kyanji kabiji ne byafwainwa kufumamo mu kusalapo jishinda jo afwainwa kubukilwamo, kabiji ne kwiambila mwine byo aitabila pa mambo a muzhilo wa Lesa wa mashi.
3. Mepuzho ka bansemi o bafwainwa kulangulukishapo, kabiji mambo ka?
3 Mwanenu Ukamba’mba Ka? Abya baana benu benengezha kwiambila bene pa mambo a muzhilo wa Lesa wa mashi nyi? Nanchi baitabila kufuma panshi ya muchima wabo kuba’mba ‘kuzhila mashi’ ke mukambizho wa Lesa nyi? (Byubilo 15:29; 21:25) Abya bakonsha kulondolola byo baitabilamo kufuma mu Binembelo nyi? Nanchi bakatwajijila kukana kubikwa mashi umvwe badokotala bebambila’mba bumi bwabo buji mu kizumba, nangwa kya kuba’mba bansemi babo bafwapo nyi? Byo kiji kuba’mba ‘bintu bisolomokelatu bitufikila [atweba] bonse,’ mwakonsha kunengezhezha byepi jimo baana benu kuyuka bya kuba na meseko akonsha konauna bulumbuluke bwabo?—Sapwi. 9:11; Efi. 6:4.
4, 5. (a) Bansemi baji na ñanyi mwingilo, kabiji bakonsha kumwingila byepi? (b) Ñanyi bukwasho bujiko bwanengezhiwa bwa kukwasha bansemi?
4 Anweba Bansemi, Bi ka byo Mwafwainwa Kuba? Muji na mutembo wa kufunjisha baana benu Lesa byoamona mashi. (2 Timo. 3:14, 15) Uno mutwe walumbululwa bingi bulongo mu buku wa Ukupelulula pa mapeja 387-91. Mufundai bulongo na kisemi kyenu. Kwingijisha lubaji lwa kuba’mba “Nga Umo Asoso Kuti—”luji pa mapeja 391-3, ikalaipo na kipungu kya kufunjisha baana benu bya kwamba pa kuba’mba bayukile jimo bya kwiambila bene bintu byo baitabilamo ne ene mambo o bebitabila. (1 Pe. 3:15) Bukwasho bukwabo bwa kwitukwasha kufunda pa mambo a mashi buji mu buloshuwa wa Nishani Fintu Umulopa Wingapususha Ubumi Bobe? ne Kyamba kya Usopa kya July 1, 2004, mapeja 8-16. Kabiji mapologalamu a pa mavidyo a Transfusion-Alternative Health Care—Meeting Patient Needs and Rights ne No Blood—Medicine Meets the Challenge, ao pa kino kimye aji ne pa DVD iji na mutwe wa kuba’mba, Transfusion Alternatives—Documentary Series, apana byambo bishiina kuba’mba muntu wakonsha kubukwa na muchi mukwabo wabulamo mashi nangwa na opaleshonyi ya kubula kwingijisha mashi. Abya kisemi kyenu kyapitulukamo katataka mu bino byambo nyi?
5 Kwashai baana benu “kuyuka kyaswa muchima wa Lesa, akya kyawama, ne kyaitabilwa, ne kyalumbuluka” pa mambo a mashi. Kino kikebalengela kufuukula bintu byanema bilengela kumona bibusa bya Yehoba.—Loma 12:2.