Pembelelainga Yehoba

1. Ñanyi kishina kya kupwila kwa nkambi, kabiji mambo ka o kyanemena ano moba?

¹ Isaya wanembele amba: “Yehoba ye Lesa uchiba mambo.” Kabiji “bonse bamupembelela bo batokwa.” (Isa. 30:18b) Kuji mashimikila avula a mu Baibolo a buchibamambo bwa Lesa bwa konauna balwanyi banji ne kupokolola bantu banji bakishinka. Nga ano mashimikila afunjishapo ka bapopweshi ba Yehoba ba mu ano moba? Twafwainwa kubapo ka lonka luno pa kuba’mba twikale benengezha ku ‘juba jikatampe ja kulengesha moyo mukatampe ja Yehoba’? (Yoe. 2:31, 32) Kupwila kwetu kwa nkambi kwa “Kupokololwa Kujitu Pepi!” kubena kwiya, kuketukwasha kulangulukishapo pa ano mepuzho ne kwipima atweba bene. Kuketukwasha kupembelelanga Yehoba.

2. Twakonsha kumwesha byepi kuba’mba tunemeka kupwila kwetu kwa nkambi?

² Nanchi mwinengezha kuba’mba mukamwenemo mu moba onse asatu a kupwila kwa nkambi nyi? Kya kumwenako, abya mwibabula bakulumpe benu ba nkito pa kuba’mba bakemupe kimye kya kuya na kupwila nyi? Kange mupembelele kuba kino ne. Kibikai mu milombelo. Apa bino muye na kulomba bakulumpe benu ba nkito. (Ne. 2:4, 5) Kikwabo, kechi twafwainwa kulubako kutendeka kunengezha bya ñendelo, mwa kulaala, ne bintu bikwabo byanema ne. Kuno kwinengezha kwawama kumwesha byo twanemeka tebulu wa Yehoba wa ku mupashi. Bakulumpe mu kipwilo bafwainwa kumona amba benengezha kukwasha boba babena kukebewa bukwasho mu bya kunengezha kupwila kwa nkambi, kikatakata bakikulumpe baji mu kipwilo.—Nga. 6:10.

3. Byubilo ka byafwainwa kumwesha bantu ba Yehoba mu muzhi muji kupwila kwa nkambi?

³ Byubilo Byawama Binemeka Lesa: Umvwe twapwila pamo mu kibelengelo kyabaya pa kupwila kwa nkambi, byubilo byetu byawama bipana bukamonyi mu kimasamasa. Nanchi kino kikebewa atweba kuba ka? Umvwe tuji pa mpunzha iji yonse ya busulu iji mu nyaunda muji kupwila kwa nkambi, aba bo tusambakana bafwainwa kumvwanga bulongo mambo a byubilo byetu byawama, biji nobe kukooka muchima, bukimote, ne kwikanya. (Nga. 5:22, 23; Fili. 4:5) Atweba bonse twafwainwa kumwesha butemwe ‘bubula kuba bya bumvu, bubula kwikebela bintu, kabiji bubula kuzhingila.’ Nangwa kya kuba pamweka makatazho nangwa bintu bivulañanya, tukakebanga ‘kubila byonse lukumo lwa Lesa.’—1 Ko. 10:31; 13:5.

4. Bansemi bakonsha kukwasha byepi baana babo kumwesha byubilo mu jishinda jakonsha kuletela Yehoba lutotelo?

⁴ Panyuma ya kupwila kwa nkambi kumo, mukulumpe umo wa hotela waumvwine bingi bulongo na mambo a byubilo ne mwekelo ya bakyanyike, kabiji kino kyamulengejile kwamba’mba “kimye kyonse nkakebanga Bakamonyi ba kwa Yehoba kufikilanga mu hotela yami.” Kino byo kiletapo lusekelo! Ino ke mfweto ifuma mu kufunda ne kusopa baana ko muba anweba bansemi. Kechi kyakonsha kuwama bansemi kusha baana babo kwakubula kwibasopa ne. Baana kimye kyonse bafwainwa kusopwa bulongo. (Mana. 29:15) Mwane byubilo byabo byawama biletelenga Yehoba lutotelo ne kulenga muchima wanji kusangalala!—Mana. 27:11.

5. Twakonsha kunemeka byepi Yehoba kupichila mu mvwajilo ne mu mwekanyikilo yetu?

⁵ Mvwajilo ne Mwekanyikilo Yawama: Atweba bonse twakonsha kukwasha kulenga jizhina jawama kimye kya kupwila kwa nkambi kupichila mu kuchinuzhuka mitundu ya mvwajilo ne mwekanyikilo yabula kufwainwa. Kino kivwangamo kimye kyo tubena kuya ne kimye kyo tubena kufuma mu muzhi muji kupwila kwa nkambi, kimye kyo tubena kunengezha mpunzha ya kupwilapo, ne kimye kyo tubena kupwila bipungu byonse. Byo tuji bakalume ba Lesa, kintu kitanshi kyo twafwainwa kutako muchima ke jizhina ja Yehoba ne bikambanga bantu, kechi bintu byo twatemwa nangwa bintu bitusangajika ne. Mitwe ya bisemi iji na mutembo wa kumona kuba’mba mwekanyikilo ya bisemi byabo ibena kumwesha bumvu ne butekanye.—1 Timo. 2:9.

6. Mambo ka o twafwainwa kutwajijila kumwekanyika bulongo kimye kyo tubena kukokoloka byonka byo tumweka kimye kyo tubena kupwila, kupwila kwa nkambi?

⁶ Kyanema bingi kutwajijila kumwekanyika bulongo kimye kya kukokoloka, nabiji pa mapunzha po twafikila, ku mashitolo, ne mu malesitilanti. Kyawama bingi kuvwala bya kuvwala byetu bya kupwila kwa nkambi kimye kyo tubena kuja. Kuvwala mabaji etu a kupwila kwa nkambi kwitupa mashuko a kusapwila busapwishi bwa kushukilwa.—2 Ko. 6:3, 4.

7. Twakonsha kukwasha byepi kupwila kwa nkambi kwenda bulongo kabiji ne na lusekelo? (Monai “Bya Kuvululako bya Kupwila kwa Nkambi.”)

⁷ Isaya waambijile jimo amba: “Yehoba ubena kupembela kwimubila byawama; onkao mambo aye wanyamukila jimo mu kusaka kwimubila lusa.” (Isa. 30:18a) Lusanchilo lwa lusa lwa Yehoba ne bupe bwanji bwafwainwa kwitulengela kumunemeka kupichila mu byubilo byetu ne mwekanyikilo kimye kyo tubena kupwila pamo pa kupwila kwetu kwa nkambi. Mwane kupwila kwetu kwa nkambi kwa “Kupokololwa Kujitu Pepi!” kukapane lukumo kwi Lesa ne kwitukwasha kutwajijila na kumupembelela!

[Kitenguluzha pa peja 5]

Bya Kuvululako bya Kupwila kwa Nkambi

◼ Bimye Bikatendekelangamo Kupwila: Pa moba onse asatu, kupwila kukatendekanga na kimye kya 8:45. (Pa Nzubo ya Kupwilamo Kukatampe ya mu Lusaka, binzhilo bikashinkulwanga na kimye kya 7:00) Sa kwakishala maminiti acheche kipungu kutendeka, cheyamani ukekela jimo pa pulatifomu aku nyimbo ya Bufumu ya kutendekelapo saka imbiwa. Atweba bonse twafwainwa kwikela jimo pa kikye kimye kuba’mba kupwila kukatatule na mushingi. Kupwila kwa Juba Jitanshi kukapwa na 16:15, pa Juba ja Bubiji kukapwa na 16:05, kabiji pa Juba ja Busatu kukapwa na 15:10.

◼ Mwa Kwimikila Myotoka ne Makinga: Pa mapunzha onse pakekela kupwila kwa nkambi, kechi kukekala kulipilisha pa kwimikila myotoka nangwa makinga ne, bino kikalondelanga pa muntu wafika bukiji. Mabaji a kupwila kwa nkambi o akekala kayukilo pa kupana mwa kwimikila myotoka nangwa makinga.

◼ Kusunga pa Kwikala: Mwakonsha kusungilatu bantu pa kwikala bo mwaiya nabo mu motoka umo nangwa bo mwikala nabo nzubo imo.

◼ Kajo ka Pachaile: Mwane mukasendele jimo kajo ka pachaile kukila kusha mpunzha po mwapwila ne kuya na kukeba kajo kungi. Mwakonsha kwingijisha kipe kyaesakana kya kusendelamo kajo kyo mwakonsha kubika munshi ya kipona kyenu. Kechi kyaswishiwa kusendela kajo mu bipe bikatampe, bipe bibena kumwesha biji mukachi, ne kusenda maalwa ku kupwila ne.

◼ Mibingu: Pataiwa mali avula bingi pa kuba’mba kupwila kwa nkambi kunengezhiwe. Twakonsha kumwesha lusanchilo lwetu kupichila mu kubingulako mibingu ya kwitemenwa ya mwingilo wa ntanda yonse pa Nzubo yetu ya Bufumu nangwa pa kupwila kwa nkambi. Cheki iji yonse yapanwa pa kupwila kwa nkambi yafwainwa kupanwa ku “Watch Tower Society.”

◼ Mapuso ne Bintu Bikwabo bya Kubazhimukila: Umvwe muntu wakolelwa pa kupwila kwa nkambi, mwane monañanai na asha uji pepi usakuya bukiji bukiji ku Dipatimenti ya Bukwasho bwa Bukiji Bukiji kuba’mba wamwingilo ujiko amone kubaya kwa kyokyo kikola ne kupana bukwasho.

◼ Kulekoda: Bijimba kechi byafwainwa kusomekwa ku biñambañamba bya kwambilamo bya pa kupwila ne, byafwainwa kwingijishiwatu mu jishinda ja kubula kulabika bakwetu.

◼ Kukopa Bipikichala: Umvwe mubena kukopa bipikichala kimye kya bipungu, kwingijisha kamela ibyasha ne.

◼ Mapeja ne Maselula Foni: Mwafwainwa kwibichuna kuba’mba bibulenga kulubankanya bakwenu.

◼ Mafuta Anunkila Bulongo: Kikawama bingi atweba bonse kwesakanya pa kwisuba mafuta aji na bwema bwakilamo kununkila bulongo ao akonsha kuvundumuna bikola bya bantu babela mu kyaji nangwa bikola bikwabo bipashako.—1 Ko. 10:24.

◼ Kapepala ka Monai Uno Muntu: Kapepala ka Mwane Monai Uno Muntu (S-43) kafwainwa kwingijishiwa kunembelapo mabulañano a muntu wamwesha lusekelo kimye kya kusapwila busapwishi bwa kushukilwa mu kimye kya kupwila kwa nkambi. Basapwishi bakonsha kusenda kapepala ka monai uno muntu kamo nangwa tubiji ku kupwila kwa nkambi. Kabiji tuno tupepala tukekalako ne pa kupwila kwa nkambi mu Kibamba kya Dipatimenti ya Mabuku. Tupepala panembwa mabulañano twakonsha kupanwa ku Kibamba kya Mabuku nangwa ku munembeshi mu kipwilo umvwe mwabwela ku kipwilo kyenu.—Monai Mwingilo Wetu wa Bufumu wa February 2005, pe. 7.

◼ Lubatizhilo: Babena kuya ku lubatizhilo bafwainwa kwikela jimo pa mpunzha yo bebanengezhezha kupwila kwa Juba ja Bubiji lukelo saka kukyangye kutendeka ne. Muntu yense ubena kuya ku lubatizhilo wafwainwa kwiya na taulo wanji ne kya kuvwala kyafwainwa kya kutwela nakyo mu mema. Pa myaka yapitapo, bivwalo byavwajile bantu bamo kechi byawamine ne, kabiji kino kechi kyawamishe lubatizhilo ne. Bakulumpe mu kipwilo babena kupituluka mu mepuzho aji mu buku wa Bakwatankana Kuba Kyaswa Muchima wa Yehoba na babena kuya ku lubatizhilo, bafwainwa kumona kuba’mba bonse baumvwisha bulongo bino bishinka. Kwipana mu lubatizhilo ke kiyukilo kimwesha kufuukulapo kwa muntu kwa kukeba kwikala mulunda na Yehoba. Onkao mambo, kechi kyafwainwa babena kuya ku lubatizhilo kwikumbata nangwa kwikwata ku maboko kimye kyo babena kubatizwa ne.

◼ Byambo bya Kwitujimunako: Taiko muchima ku bintu byakonsha kuleta makatazho a kwikebela. Javula bangivi ne bantu baji na byubilo byatama batemwa kupitañena pa mazubo pabula bantu. Monai kuba’mba motoka ne nkinga yenu yamfungwa bulongo kimye kyonse, kabiji kechi mwafwainwa kusha bintu biji byonse mukachi ka motoka bibena kumweka bya kulengela bantu kulala motoka amba batole biji mukachi ne. Bangivi ne bantu basompola bintu batemwa kupitañena pa mpunzha papwila bantu bavula. Kechi kikawamapo nangwa pacheche kusha kintu kiji kyonse kya mutengo pa kipona kyenu ne. Mambo kuba mwayuka amba muntu yense waiya ku kupwila mwina Kilishitu ne. Mambo ka a kwiletelela lweseko? Masawakya abena kushimunwa kuba’mba bantu bamo bakebelenga kubombola baana. MONAI KUBA’MBA MUBENA KUSOPA BAANA BENU KIMYE KYONSE.