Nanchi Anweba ne ba mu Nzubo Yenu Mubena Kwinengezha Kukapuluka Nyi?
1 Kufikizhiwa kwa bungauzhi bwa mu Baibolo kubena kumweshatu patoka kuba’mba mpelo ya ino ntanda ibi yafwenya kala ke pepi. Tubena kwikala mu bimye byakatazha bipasha bingi na byobya byajingako Muyulo saka akyangye kwiya. (Mat. 24:37-39) Nowa wapulukile lonaiko lwa yoya ntanda, mambo “waendelenga na Lesa.” (Nte. 6:9) Nowa wafwainwa wafunjishe baana banji nkebelo ya Lesa, mambo nabo bapulukile Muyulo. Pano twakonsha kuba byepi byaubile Nowa pa kuba’mba twinengezhe kisemi kyonse kukapuluka mpelo ya buno bwikalo bwa bwatama?
2 Musapwishi Wasapwijilenga Bololoke: Pepi na myaka 40 kufika 50 Nowa watwajijile kwikala “musapwishi wasapwijilenga bololoke.” (2 Pe. 2:5) Bantu bamuzhokolokele, kikale batamine michima na mambo kutangijilwa na bamalaika basatukile nangwa ne, bafwainwa bamubilenga bingi mwenga byo ebasapwijilenga. Javula bantu bamukana bingi mwingilo wetu kabiji ne kumuba mwenga, kumwesha’mba mpelo ya buno bwikalo ijitu pepi. (2 Pe. 3:3, 4) Nangwa byonkabyo, kupusanako na bantu ba mu kimye kya Nowa, lelo jino bavula babena kutambwila mambo awama byo twibikishako kwibasapwila kabiji babena ‘kukungulukila’ ne ku mpopwelo ya Yehoba. (Isa. 2:2) Umvwe twaikala na mukoyo, ‘tusakukepulusha atwe bene ne abo betumvwa pamo.’ (1 Timo. 4:16) Onkao mambo, kyanema bingi bansemi kufunjishanga baana mu ñambilo ne mu byubilo ene mambo uno mwingilo o afwainwa kwingijiwa bukiji.—2 Timo. 4:2.
3 “Mo mo” Aubijile: Nowa ne kisemi kyanji bapulukile na mambo a kulondela bulongo mikambizho ya Yehoba. (Nte. 6:22) Ne atweba lelo jino kyanema bingi “kukokela” lutangijilo lufuma mu Baibolo kabiji ne kwi kalume wa kishinka. (Yako. 3:17, NW) Bankasa ne kolo bamo mu kisemi kimo bavuluka bashabo byo balondelanga mikambizho yo batambwilanga kufuma ku jibumba ja Yehoba. Kya kumwenako, watangijilanga lufunjisho lwa kisemi mulungu ne mulungu kabiji ne kuyila pamo na kisemi mu mwingilo wa mu bujimi byonka byaambile jibumba. Uno shabo wamonanga’mba mulungu ne mulungu wayapo na mwana umo mu mwingilo. Baana bamwenenga bukishinka bwa shabo bwa kubila ‘monka mo,’ kabiji bonse batanu na umo bakomene kwikala bakalume ba Yehoba bakishinka.
4 Mpelo ya buno bwikalo ikeshila po twabula ne kuketekelatu ne. (Luka 12:40) Kupichila mu kulondela Nowa ne kwikala na lwitabilo lwa kuba’mba tukapuluka, atweba ne ba mu nzubo yetu tukekala benengezha!—Hebe. 11:7.