Bintu ka Bakwenu byo Bafunjilako kwi Anweba?
1. Bintu ka baana ba bwanga ba kwa Yesu byo bafunjileko kwi aye?
1 Yesu waambile’mba: “Tambulai kikonkoji kyami ne kufunda kwi amiwa.” (Mat. 11:29) Ko kuba’mba, wafunjishe bantu kupichila mu byo aubanga kechi mu byambotu ne. Akilangulukai pa bintu baana ba bwanga byo bafunjile kwi Yesu. Watemenwe bantu, kwibobila lusa ne kwibatekenya. (Mat. 8:1-3; Mako 6:30-34) Kine wikepeshe bingi. (Yoa. 13:2-5) Byo bayanga ne Yesu mu mwingilo, baana ba bwanga bemwenejile bene amba wajinga wamwingilo waingilanga na ngovu ne kufunjisha bulongo bantu bukine. (Luka 8:1; 21:37, 38) Kwingila kwetu mwingilo kukwasha byepi bantu?
2. Mvwajilo ne byubilo byetu byawama mu mwingilo, byakonsha kulengela bena nzubo kuba ka?
2 Bena Nzubo: Mvwajilo ne byubilo byetu byawama kabiji ne kutemwa bantu kwakonsha kuzakula bingi bantu michima kukeba kufunda. (2 Ko. 6:3; Fili. 1:27) Betumona byo twingijisha Baibolo kimye kyonse. Bakwabo nabo batemwa bingi byo twibateleka na mushingi umvwe ke bambe. Kuba bino bintu byo twaambapo kwakonsha kulengela bantu kuteleka ku mambo a Bufumu.
3. Bintu ka byawama byo twakonsha kulengela balongo kuba?
3 Balongo Betu: Akilangulukai ne pa bintu byawama byo twakonsha kuba bya kutundaika balongo betu. Kwingila kwetu na mukoyo kwakonsha kulengela bakwetu nabo kwikala byonkabyo. Byonka kyela byo kinona kyela kikwabo, kufunjisha kwetu bulongo kukatundaika bakwetu kuba bulongo mu mwingilo wa kusapwila. (Mana. 27:17) Kunemba bulongo mazhina ne bintu bikwabo bikebewa bya bantu bamwesha lusekelo kabiji ne kubwelako bukiji, kukwasha bakwetu kuba byonkabyo. Kwingila bulongo mwingilo wetu kukalengela balongo nabo kuba bulongo.—2 Timo. 4:5.
4. Mambo ka pa kimye pa kimye o twafwainwa kupituluka mu bintu byo twamba ne kuba?
4 Pa kimye pa kimye, mwakonsha kuba bulongo kupituluka mu bintu byo mwamba ne kuba kabiji ne kumona byo byakonsha kutundaika bakwenu. Kuba kwetu bintu bulongo kukasangajika Yehoba ne kwitulengela kwamba byambo byaambilepo mutumwa Paulo amba: “Ikalai ba kundondela amiwa, pamo byonka byo nji amiwa wa kumulondela Kilishitu.”—1 Ko. 11:1.