Londainga kya Kumwenako kya kwa Yesu
1. Kya kumwenako ka Yesu kyo amwesheshe?
1 Kimye kyo tubena kwingila mwingilo wa kulenga baana ba bwanga, kasa tuvuluka kuba’mba kya kumwenako kyetu kyakonsha kukwasha aba betumona. Yesu wafunjishenga kupichila mu byambo ne mu byubilo byanji. Bonse bamonanga kizaku kyanji, butemwe bo atemenwe bantu, kusakisha kuzhijika jizhina ja Shanji ne kuba kyaswa muchima wa Shanji.—1 Pe. 2:21.
2. Mu ñanyi mashinda kya kumwenako kyetu mo kyakonsha kukwashisha aba bo tubena kwingila nabo mu mwingilo?
2 Pa Kusapwila ku Nzubo ne Nzubo: Byonka byajinga Yesu, kya kumwenako kyetu kyawama kyakonsha kutundaika aba bo tubena kwingila nabo. Basapwishi bakatataka ne boba babula kupijilwa umvwe saka betumona kuya kimye kyonse mu mwingilo, kikebalengela nabo kuyanga na kusapwila. Inge saka bamona lusekelo lwetu lwa kine lo tumwesha ku bantu, kikebavululangako nabo buneme bwa kumwesha bino byubilo kimye kyo baji mu mwingilo. Kabiji umvwe jonse saka betumona kuteshako muchima kwingijisha Binembelo, kubwelako ku bantu bo twisambile nabo ne kufunjisha mafunjisho a Baibolo, kikebatundaika nabo kuba byonkabyo.
3. Kya kumwenako kyetu kyakonsha kukwasha byepi bo tufunjisha Baibolo, kabiji bi ka byo bafwainwa kufunjilako kwi atweba?
3 Pa Kufunjisha Mafunjisho a Baibolo: Bantu bo tufunjisha Baibolo kikatakata bakamonanga byo tuba. Kya kumwenako, nangwa kya kuba twakonsha kwibalondolwela buneme bwa kunengezhezha jimo lufunjisho, kutanga binembelo ne kushila pa bishinka bikatampe, bakamwena kwi atweba kana byo byo twauba nyi nangwa ne. (Loma 2:21) Umvwe ketufike bukiji ko baji na kwibafunjisha, nabo bakatapo bingi muchima ne kumona kuba’mba kechi baleka bintu bikwabo kwibakangika kufunda Baibolo ne. Kabiji bakamona ne muchima wetu wa kwipana mu uno mwingilo ne kukosa kwa lwitabilo lwetu. Kwa kubula nangwa kuzhinaukatu ne, aba bonse bafunjishiwa ku boba balondela kya kumwenako kya kwa Yesu, javula bekala basapwishi bakosa bapanga bipangwa byawama.
4. Kimye kyo tutanwa ku kupwila kwa kipwilo, ki ka kyo tufunjisha kupichila mu kya kumwenako kyetu?
4 Pa Kupwila kwa Kipwilo: Bonse baji mu kipwilo kya bwina Kilishitu baji na lubaji lwa kufunjisha kupichila mu kumwesha kya kumwenako kyawama pa kupwila kwa kipwilo. Aba bamwesha lusekelo batendekatu katataka kutanwa ku kupwila, bamwenamo bingi ku kya kumwenako kyawama kyo bemwena bene mu kipwilo. Bamona bulongo bwetu, lukwatankano lwetu lwa bwina Kilishitu ne mwekanyikilo yetu yawama. (Sala. 133:1) Kabiji bakamona ne kya kumwenako kyetu kya kutanwa jonse ku kupwila ne kumwesha lwitabilo lwetu. Mwenyi umo pa kupwila kwetu wakuminye bingi pa kumona kashimbi umo wazhikula aye mwine mu Baibolo wanji pa kyepelo kyatongwelwe ne kulondelamo byo kyatangilwenga. Kya kumwenako kya uno kashimbi kyalengejile uno mwenyi kukeba lufunjisho lwa Baibolo ponkapotu.
5. Mambo ka o twafwainwa kubula kulengulwila buneme bwa kya kumwenako kyetu?
5 Binembelo bitutundaika kulondela kya kumwenako kyawama kya bakwetu. (Fili. 3:17; Hebe. 13:7) Onkao mambo twafwainwa kuvulukanga’mba inge ketulondele kya kumwenako kitushijile Yesu, bantu bakekimona kabiji kikakonsha kwibakwasha kuba byawama. Onkao mambo, kasa tuteshako muchima ku byambo bitanwa mu 1 Timoti 4:16, bya kuba’mba: “Kasa wiketa obe mwine ne lufunjisho lobe pamo.”