Bya Kufika pa Muchima Bantu bo Tufunjisha
1. Mfunjishisho ya kwa Yesu yafikile byepi bo afunjishanga pa muchima?
1 Yesu Kilishitu wafikanga pa muchima bantu bo afunjishanga. Pa kimye kimo, michima ya baana banji ba bwanga ‘yalukuchilenga’ byo ebalumbulwijile bulongo Binembelo. (Luka 24:32) Byo kiji kuba’mba twafwainwa kukokela Lesa na muchima yense, twafwainwa kuba byepi pa kuba’mba tufike pa muchima bantu bo tufunjisha ne kwibalengela kupimpula byubilo byabo?—Loma 6:17.
2. Kujimuka ne kuyuka bya kwamba kwitukwasha byepi kufika muntu pa muchima?
2 Jimukai ne Kuyuka bya Kwamba: Kwambatu pa bintu byawama ne byatama kechi kulengela bantu bavula kupimpula byubilo byabo ne. Kulengulula byo baitabilamo kwingijisha binembelo kwakonsha kwibalengela kukana kwibasapwila. Pa kuba’mba apimpule byo aitabilamo, twafwainwa kuyuka ene mambo o aitabila mu byo byo bintu. Inge twaingijisha bulongo mepuzho, tukamutundaika kwamba byo alanguluka. (Maana 20:5) Inge twauba bino, tukasala bulongo binembelo mu Mambo a Lesa bikamufika pa muchima. Onkao mambo, twafwainwa kumwesha amba twibata muchima ne kutekanya. (Maana 25:15) Vulukainga amba kukoma ku mupashi kwa bantu kwaenda kupusana pusana. Lekai mupashi wazhila wa Yehoba ebalengele kupimpula ndangulukilo ne byubilo byabo.—Mako 4:26-29.
3. Twakonsha kukwasha byepi bo tufunjisha kwikala na byubilo byawama?
3 Bakwashai Kwikala na Byubilo Byawama: Mashimikila a mu Baibolo amwesha buwame ne butemwe bwa Yehoba akonsha kukwasha bo tufunjisha kwikala na byubilo byawama. Twakonsha kwingijisha binembelo nabiji Salamo 139:1-4 nangwa Luka 12:6, 7 kwibamwesha Lesa byo etutemwa atweba bonse. Umvwe kya kuba bayuka lusa lukatampe luji na Yehoba, bakamutemwa ne kumwakamwa. (Loma 5:6-8; 1 Yoa. 4:19) Kabiji inge bayuka kuba’mba byubilo byabo bikunza bingi Yehoba, kukebalengela kuba bintu bikatokeshanga Yehoba ne kumunemeka.—Sala. 78:40, 41; Maana 23:15.
4. Twakonsha kumwesha byepi amba twanemeka bifuukula bantu bo tufunjisha mu mwingilo?
4 Yehoba kechi ukanjikizha bantu kulondela mikambizho yanji ne. Bino wibabula byo bakonsha kumwenamo inge balondela lujimuno lwanji. (Isa. 48:17, 18) Tulondela Yehoba inge ke tufunjishe bantu bene kwifuukwila byo bafwainwa kuba. Umvwe kya kuba bantu bene bamona kuba’mba bafwainwa kupimpula byubilo byabo, mufuma bintu byawama. (Loma 12:2) Kabiji kibalengela kufwenya kwipi ne Yehoba aye “utalatala mu michima.”—Maana 17:3.