Byambo Bikwabo bya mu Mutanchi wa Kupwila kwa Bwikalo ne Mwingilo
JUNE 3-9
BYA BUNEME BIJI MU MAMBO A LESA | NGALATIYA 4-6
“Bilumbulula ‘Kifwanyikizho’ kya Lulayañano”
it-1 1018 jifu. 2
Hegala
Kwesakana na byaambile mutumwa Paulo, Hegala ye baambapo mu kifwanyikizho waimejilengako bena Isalela bakisemwa, bepaine kwi Yehoba kwesakana na Mizhilo yo bebapele ku Mutumba wa Sinai ibalengejile kwikala mu lulayañano lwa ‘baana ba mu buzha.’ Kino kisaka kyakankelwe kulama mizhilo ya luno lulayañano na mambo a kuvula kwa mizhilulwila yabo. Byo bakijinga mu mizhilo ya luno lulayañano, bena Isalela kechi bajinga bantu bakasuluka ne, mambo bajinga bandengamambo bazhatwa amba bafwainwa kufwa. (Yoa 8:34; Lo 8:1-3) Bena Yelusalema bajingako mu moba a kwa Paulo bajinga nobe Hegala waimenejilengako bena Isalela bakisemwa. Onkao mambo, uno muzhi mu bukifwanyikizho wajinga nobe uji na baana banji mu buzha. Pa kuba bena Kilishitu bashingwa abo bajinga baana ba kwa “Yelusalema uji mwiulu,” uji nobe mwanamukazhi wasongolwa kwi Lesa mu bukifwanyikizho. Yelusalema wa mwiulu uji nobe Sala, mwanamukazhi wakasuluka, ukyangye kwikalapo mu buzha ne. Bino byonka Izaka byo bamuyanjishanga kwi Ishimela, ne baana ba kwa “Yelusalema uji mwiulu,” bo bakulusula ku Mwaana Lesa, nabo bebayanjishanga ku baana ba kwa Yelusalema wa mu buzha. Nangwa byonkabyo, Hegala ne mwananji bebapangile, kumwesha Yehoba byo akoba na kisaka kya bena Isalela bakisemwa.—Nga 4:21-31; kabiji monai ne Yoa. 8:31-40.
Ikalai na Lwitabilo Lwakosa mu Bufumu
11 Milaye ya lulayañano lwa Abalahama yafikile patanshi kimye ba mu kisemi kya kwa Abalahama kyo baswaine Ntanda ya Mulaye. Pano bino, Baibolo wasolola’mba luno lulayañano lukaleta mapesho avula bingi. (Nga. 4:22-25) Mu kuno kufika kukatampe, byonkatu mutumwa Paulo byo alumbulwile na lutangijilo lwa mupashi wazhila, lubaji lutanshi lwa mwana wa kwa Abalahama ke Kilishitu ne lubaji lwa bubiji ke ba 144,000 bena Kilishitu bashingwa na mupashi. (Nga. 3:16, 29; Lum. 5:9, 10; 14:1, 4) Mwanamukazhi wasema bano baana ke “Yelusalema uji mwiulu,” ko kuba’mba lubaji lwa mwiulu lwa jibumba ja Lesa, jalengwa na bilengwa bya mupashi bya kishinka. (Nga. 4:26, 31) Byonkatu byalaya lulayañano lwa Abalahama, mwana wa mwanamukazhi ukaletela bantu mapesho.
Kukeba Bishinka Bikwabo Byanema
Nanchi Mwayuka Nyi?
Mambo ka Yesu o atelejile Yehoba mu lulombelo amba “Abba, Tata”?
Kyambo kya Kialamaiki kya ʼab·baʼʹ kyakonsha ne kulumbulula’mba, “Tata wetu” nangwa’mba, “Anweba Tata.” Ponse pasatu patanwa kino kyambo mu Binembelo, bekingijisha mu lulombelo pa kulomba kwi Tata wa mwiulu aye Yehoba. Nanchi kino kyambo kyatala mwepi?
Buku umo waamba’mba: “Mu kimye kya kwa Yesu, baana baitanga bashabo amba Abba, kumwesha mushingi ne butemwe.” (The International Standard Bible Encyclopedia) Kyo kyambo kyo baingijishanga ne pa kwita bansemi babalume kabiji inge mwana wasemwa kyo kyambo kitanshi kyo afundanga.” Yesu waingijishe kino kyambo pa kulomba kwi Shanji. Saka kwashala maola acheche kumwipaya mu bujimi bwa Ngesemani, Yesu watelele Yehoba mu lulombelo amba “Abba, Tata.”—Mako 14:36.
Kechi kyayukanyikwa bulongo kana mu moba a Bangiliki ne bena Loma kyambo kya “ʼAbbāʼ kyatanwanga mu mabuku a Bayudea ne, mambo kechi kyafwainwe kuyilamo kutongola Lesa bino ne, mambo kino kyambo kyamweshanga kukizhamo kupwiluluka muntu.” Byo byaamba buku ye twaambapo mu jifuka jafumako. Nangwa byonkabyo, “Yesu . . . waingijishe kino kyambo mu lulombelo kumwesha bulunda bo ajinga nabo ne Shanji.” Kino kyambo kya “Abba” kitanwa ne mu binembelo bikwabo bibiji mu mabuku abiji anembele mutumwa Paulo. Kino kimwesha’mba bena Kilishitu bitanshi nabo baingijishanga kino kyambo pa kulomba.—Loma 8:15; Ngalatiya 4:6.
w10 11/1 15
Nanchi Mwayuka Nyi?
Mutumwa Paulo walumbulwilenga ka byo aambile’mba wasenda pa mubiji wanji ‘mikovu imuyukisha’mba kalume wa Yesu’?—Ngalatiya 6:17.
Abino byambo byaambile Paulo kyamweka byalumbulwilenga bintu byavula bingi ku bantu bo aambilengako mu myaka kitota kitanshi. Kala baingijishanga kyela kya kapotwe kyakaba pa kubika kayukilo muntu ye bakwata buzha ku nkondo, batupondo ba mazubo azhila nangwa bazha banyema kwabo. Kyajinga kintu kya bumvu bingi inge muntu bamubika kano kayukilo.
Nangwa byonkabyo, kechi tuyukilo twa mikovu tonse twaletanga bumvu ne. Bantu bavula kala baingijishanga tuno tuyukilo kwa kuyukila mukoka wabo nangwa bupopweshi bwabo. Buku umo waamba’mba bena Silya bebikanga tuyukilo pa mikoko ne pa nshingo kwa kwibayukila’mba bepana kwi balesa babo abo ba Hadad ne Atargatis. . . Kabiji kayukilo ka jibula bekabikanga pa bantu bapopwelanga lesa wabo aye Dionysus” (Theological Dictionary of the New Testament).
Bantu bamo ba mu ano moba balanguluka’mba Paulo waambilenga pa mikovu yo ajinga nayo na mambo a bipumo byo bamupumine byo aingijilenga mwingilo wa bumishonale wa bwina Kilishitu. (2 Kolinda 11:23-27) Nangwa byonkabyo, kyamweka Paulo waambilenga pa bwikalo bwanji bwamulengelanga kuyukanyikwa’mba mwina Kilishitu, kechi pa mikovu yo ajinga nayo pa mubiji ne.
JUNE 10-16
BYA BUNEME BIJI MU MAMBO A LESA | EPHESIANS 1-3
“Bukalama bwa Yehoba ne Mwingilo Wabo”
it-2 837 jifu. 4
Kyazhila Kyafyamika
Bufumu bwa Bumesiasa. Mu mabuku anembele Paulo, walumbulula bingi bulongo kusololwa kwa kyafyamika kyazhila kyaamba pe Kilishitu. Pa Efisesa 1:9-11, walumbulula Lesa byo asolola “kyazhila kyafyamika” kyaamba pa byo afuukula kuba amba: “Kabiji na mambo a kuba kyamutokela ku muchima wafuukwijile jimo bukalama bukafika pa kimye kyatongolwa, kuba’mba akakonkanye pamo jibiji bintu byonse mwi Kilishitu, bintu biji mwiulu ne biji pano pa ntanda. Kine kupichila mwi aye mo mo twaikela ne kutongolwa kwikala banswanyi, byo twatongwejilwe jimo monka mwayila kufuukula kwa yewa wingila bintu byonse monka mwayila kyaswa muchima wanji.” Kino “kyazhila kyafyamika” kyaamba pa kafulumende, Bufumu bwa Lesa bwa Bumesiasa. “Bintu biji mwiulu,” byaambilengapo Paulo ke boba bakalamanga pamo ne Kilishitu mu Bufumu bwa mwiulu. “Biji pano pa ntanda” bibena kwamba pa bantu bakekalanga pano pa ntanda. Yesu wabuujile baana banji ba bwanga kyazhila kyafyamika, kyaamba pa Bufumu byo aambile’mba: “Kyafyamika kyazhila kya Bufumu bwa Lesa bekipana kwi anweba.”—Mak 4:11.
“Yehoba Ukonkanya Pamo Kisemi Kyanji”
3 Bintu byonse byuba Yehoba byakwatankana na kyaswa muchima wanji. Onkao mambo, pa kufika “bimye byatongolwa,” Lesa ukengijisha ‘bukalama,’ ko kuba’mba lunengezho lwanji lwa kukwatankanya bilengwa byanji byonse bya maana. (Tangai Efisesa 1:8-10.) Buno bukalama bukengila mwingilo wabo mu bipungu bibiji. Kipungu kitanshi ke kunengezha kipwilo kya bashingwa bakekala mwiulu ne kutwajijila kwingila na lutangijilo lwa Yesu Kilishitu. Kino kipungu kyatendekele pa Pentekosita mu 33 C.E. kimye Yehoba kyo atendekele kukonkanya pamo ba kuya na kulama ne Kilishitu mwiulu. (Byu. 2:1-4) Byo kiji kuba’mba bashingwa batongolwa’mba baoloka na mambo a kitapisho kya bukuzhi bwa Kilishitu, bayuka’mba bebasala kwikala “baana ba Lesa.”—Loma 3:23, 24; 5:1; 8:15-17.
4 Kipungu kya bubiji ke kunengezha boba bakekala mu Paladisa pano pa ntanda mu Bufumu bwa Kilishitu bwa Bumesiasa. Ba mu “jibumba jikatampe” bo bakatendekelapo kwikala mu Paladisa. (Lum. 7:9, 13-17; 21:1-5) Kepo pakalondela biumbi ne biumbi bya bantu bakasangulwa mu Bukalama bwa Myaka Kiumbi. (Lum. 20:12, 13) Akifwanyikizhai lusanguko byo lukamwesha lukwatankano luji pakachi ketu! Pa kupwa myaka kiumbi, bintu “biji pano pa ntanda,” nangwa’mba bantu bakebeseka japelako. Aba bakekala bakishinka bakatelwa’mba “baana ba Lesa” ba pano pa ntanda.—Loma 8:21; Lum. 20:7, 8.
Kukeba Bishinka Bikwabo Byanema
Kange Muleke Kintu Nangwa Kimo Kwimulengela Kubula Kutumbijikwa Ne
15 Kuchinchika kwetu mu kuba kyaswa muchima wa Yehoba kukwasha bakwetu kutambula buneme. Paulo wanembejile kipwilo kya mu Efisesa amba: “Nakeba namba kechi mukoke na mambo a bya malwa byami byo mbena kwimumanamina ne, mambo bino byo bya kwimuletela lukumo.” (Efi. 3:13) Mu ñanyi jishinda kumanama kwa kwa Paulo o kwaletejile bena Efisesa “lukumo”? Kupichila mu kutwajijila kwingijila balongo banji nangwa kya kuba wapichilenga mu makatazho kwakwashishe bena Efisesa kuyuka kuba’mba mwingilo wa bwina Kilishitu wabayile kabiji wanemene bingi. Inge kya kuba Paulo wasankijilepo mwingilo wanji na mambo a lumanamo, nanchi kino inge kechi kyamwesheshe kuba’mba bulunda bwabo ne Yehoba, mwingilo wabo ne luketekelo lwabo lwajinga lwatutu nenyi? Kuchinchika kwa kwa Paulo kwatumbijikile bwina Kilishitu ne kumwesha kuba’mba kwikala mwana wa bwanga kwanema kabiji kukebewa kwikala na muchima wa kwipana.
“Kwibuyuka Butemwe bwa Kilishitu”
21 Kyambo kya Kingiliki kyatuntululwa’mba ‘kuyuka’ kilumbulula “kuyuka kwa kuba kintu kupichila mu kwikibijila.” Umvwe twamwesha butemwe byonka Yesu byo ebumwesheshe—kwipana atweba bene na muchima yense kwingijila bakwetu, kwibamwesha lusa mu byo bakajilwa, ne kwibalekelako mambo kufuma mu muchima—ko kuba’mba twakonsha kumvwisha bulongo byo eumvwa. Mu jino jishinda, kupichila mu kwibijila bintu, ‘twibuyuka butemwe bwa Kilishitu bukankalwa maana kuyuka.’ Kabiji kange tulubengako ne, kuba’mba, umvwe sa twikala byajinga Kilishitu, po po tukafwenyesha ku muntu awo Yesu ye alondele bulongo, Lesa wetu wa butemwe, aye Yehoba.
JUNE 17-23
BYA BUNEME BIJI MU MAMBO A LESA | EFISESA 4-6
Anweba Banyike—Mwimenai Diabola Saka Mwakosa
Mutumwa Paulo waesakenye bwikalo bwetu atweba bena Kilishitu ku bashilikale balwa nkondo. Pano bino, nkondo yetu kechi ya kulwa na bantu ne, ke nkondo ya ku mupashi. Kabiji balwanyi betu kechi ba kufwanyikizhatu ne, kobaji. Satana ne bandemona bayuka bingi bya kulwa. Umvwe twalanguluka pa kino, twakonsha kumona nobe kafwako kyo twakonsha kuba ne. Kikatakata banyike bena Kilishitu bakonsha kumweka nobe kechi bayuka bya kwizhikijila ne. Bakonsha kuba byepi pa kuba’mba bashinde bilengwa bya mupashi byatama biji na bulume bukatampe kukila bantu? Kishinka ke kya kuba’mba banyike bakonsha kushinda. Mambo ka? Mambo batwajijila ‘kwikosesha mwi Nkambo.’ Kununga pa kuketekela mu bulume bwa Lesa, bavwala ne bivwalo bya nkondo. Byonkatu bivwala bashilikale bafunda kulwa nkondo, banyike bena Kilishitu nabo bavwala “byonse bya nkondo byafuma kwi Lesa.”—Tangai Efisesa 6:10-12.
Anweba Banyike—Mwimenai Diabola Saka Mwakosa
4 Ne atweba bukine bo tufunda mu Mambo a Lesa bwituzhikijila ku mafunjisho a bubela. (Yoa. 8:31, 32; 1 Yoa. 4:1) Kabiji kutemwa bukine bwitufunjisha Lesa kwitukwasha “kuvwala kyela kya pa kyaji,” ko kuba’mba kulondela mizhilo yaoloka ya Lesa. (Sala. 111:7, 8; 1 Yoa. 5:3) Kunungapo, umvwe twayukisha bukine bwa mu Mambo a Lesa, twakonsha kwimena balwanyi betu saka twakosa ne kushinda.—1 Pe. 3:15.
7 Ne mizhilo yaoloka ya Yehoba izhikijila muchima wetu wa kifwanyikizho twakonsha kwiyesakanya ku kino kyela kya pa kyaji. (Maana 4:23) Byonkatu mushilikale byo akonsha kubula kuvuula kyela kya pa kyaji kya kapotwe ne kuvwala kyo balenga na kyela kyanekena, ne atweba kechi tukeba kuleka kulondela mizhilo yaoloka ya Yehoba ne kwilengela yetu ne. Kechi tuji na maana ne bulume bwa kuzhikijila muchima wetu ne. (Maana 3:5, 6) O ene mambo o tutwajijila kuwamisha ‘kyela kya pa kyaji’ kitupa Yehoba kuba’mba kitwajijile kuzhikijila muchima wetu.
10 Makwabilo avwalanga bashilikale bena Loma ebakwashanga kulwa nkondo, pano bino makwabilo a kifwanyikizho avwala bena Kilishitu ebakwasha kusampanya byambo bya mutende. (Isa. 52:7; Loma 10:15) Pano bino, kikebewa kuchinchika pa kuba’mba tusapwile mambo awama. Nsongwalume uji na myaka 20 wa jizhina ja Bo waambile’mba: “Nachinaga kusapwila bakwetu mo twafunjilanga. Naumvwanga bumvu. Inge navuluka, nkankalwa kuyuka kyandengelanga kumvwa bumvu. Luno ñumvwa bingi bulongo kuspwila bakwetu.”
w18.05 29-31 mafu. 13, 16, 20
Anweba Banyike—Mwimenai Diabola Saka Mwakosa
13 ‘Miketo ya mujilo’ imo Satana yo akonsha kwingijisha kwi anweba ke kwamba bubela pe Yehoba, kuba’mba kechi wimuta muchima ne, kabiji amba kechi wimutemwa ne. Nsongwakazhi uji na myaka 19, aye Ida, wilengululanga. Waambile’mba: “Javula namonanga’mba Yehoba uji kwalepa ne amiwa kabiji kechi ukeba’mba ngikale mulunda nanji ne.” Uba byepi na uno muketo? Waambile’mba: “Kupwila kukosesha bingi lwitabilo lwami. Kala kechi nakumbulangapo kimye kya kupwila ne, mambo nalungulukanga’mba kafwako usakumvwa byo nsakwamba ne. Pano luno nnengezha kupwila kabiji nebikako kukumbulapo jibiji nangwa jisatu. Kechi kyapeela ne, bino ñumvwa bingi bulongo inge nakumbulapo. Kabiji balongo ne banyenga bantundaika bingi. Kimye kyonse inge nafuma na kupwila, shiinwa kuba’mba Yehoba wantemwa.”
16 Byonkatu kampompo byo kazhikijilanga bongo bwa mushilikale, ne “kampompo ka luketekelo lwa lupulukilo” lwetu kazhikijila milanguluko yetu, ne maana alumbuluka a kupima bintu. (1 Tesa. 5:8; Maana 3:21) Luketekelo lwitukwasha kuta muchima pa milaye ya Lesa ne kubula kukakilwa na mambo a makatazho o tupitamo. (Sala. 27:1, 14; Byu. 24:15) Pano bino, inge tukeba’mba “kampompo” ketu kengilenga bulongo, twafwainwa kwikavwala ku mutwe kechi kwikasenda ku maboko ne.
20 Paulo waesakenye Mambo a Lesa ku mpoko itupa Yehoba. Bino twafwainwa kufunda bya kwiingijisha bulongo pa kulumbulula bintu byo twaitabilamo. (2 Ko. 10:4, 5; 2 Timo. 2:15) Mwakonsha kuwamishako byepi busendwe bwenu? Nsongwalume wa myaka 21 aye Sebastian, waambile’mba: “Kimye kyonse inge natanga Baibolo, nnembapo kyepelo kimo kyo natemwa mu kitango kyo naji kutanganga. Mbena kukeba kwikala na mutanchi wa byepelo byo natemwa bingi. Kuba bino kwankwasha kuyuka bulongo bilanguluka Yehoba.” Daniel ye twaambapo ku ntendekelo waambile’mba: “Inge mbena kutanga Baibolo, nsalamo byepelo bimo byo ndanguluka’mba byakonsha kukwasha bantu mu mwingilo. Nataana kuba’mba bantu batako bingi muchima inge bamona byo watemwa Baibolo ne kwibikako kwibakwasha.”
Kukeba Bishinka Bikwabo Byanema
it-1 1128 jifu. 3
Buzhile
Mupashi Wazhila. Bulume bwa Yehoba nangwa’mba mupashi, yeye engijisha pa kuba byo akeba. Watooka nangwa’mba wazhila, mambo bo bulume bwingijisha Lesa. O ene mambo o atelelwa’mba “mupashi wazhila” nangwa’mba “bulume bwa mupashi.” (Sl 51:11; Luk 11:13; Lo 1:4; Ef 1:13) Mupashi wazhila wingila mu bantu kwibakwisha kwikala bazhila nangwa batooka. Byubilo byatama bilengela mupashi kufuma pa muntu nangwa’mba kulengela mupashi “kwikala na bulanda.” (Ef 4:30) Nangwa kya kuba mupashi wazhila kechi muntu ne, bino wakonsha kwikala na “bulanda” mambo mo mumwekela byubilo byazhila bya Lesa. Inge mubena kuba byubilo byatama ko kuba’mba mubena kukanya “mupashi kwingila mwi anweba.” (1Te 5:19) Inge muntu watwajijila kuba byubilo byatama, ‘ukozha ku muchima’ mupashi wazhila wa Lesa, kabiji kino kyakonsha kulengela muntu kusatuka ne kwikala mulwanyi wa Lesa. (Is 63:10) Muntu ulengela mupashi wazhila kwikala na bulanda wakonsha ne kuba mwenga mupashi wazhila, mambo akatampe aambilepo Yesu Kilishitu kuba’mba muntu kechi bakonsha kumulekelako mambo mu buno bwikalo nangwa mu bobwa bukeya ne.—Mat 12:31, 32; Mak 3:28-30; monai MUPASHI.
it-1 1006 jifu. 2
Lunkumbwa
Lumwekela mu Byubilo. Lunkumbwa lumwekela mu bintu byuba muntu bimwesha byubilo byatama biji mu muchima wanji ne bya kusakasaka. Nembi wa Baibolo aye Yakoba waamba kuba’mba bya kusakasaka byatama byuba muntu byakonsha kumulengela kulenga mambo. (Ya 1:14, 15) Onkao mambo, twakonsha kuyuka muntu wa lunkumbwa kupichila mu byubilo byanji. Mutumwa Paulo waambile’mba lunkumbwa po pamotu ne kupopwela bankishi. (Ef 5:5) Bintu bisakasaka muntu wa lunkumbwa byo bikala lesa ye apopwela mambo byobyo anemeka kukila kupopwela Mulenga.—Lo 1:24, 25.
JUNE 24-30
BYA BUNEME BIJI MU MAMBO A LESA | FILIPAI 1-4
“Mutende wa Lesa Wakila Milanguluko ya Bantu”
10 Ñanyi kintu kyakonsha kwitukwasha kubula kubambisha michima yetu ne kwikala na “mutende wa Lesa”? Byambo Paulo byo anembejile bena Filipai bimwesha’mba kintu kyakonsha kwitukwasha kuleka kwakamwa ke kulomba kwi Lesa. Onkao mambo, inge twaikala na bijikila, twafwainwa kubuula Lesa mu milombelo. (Tangai 1 Petelo 5:6, 7.) Lombainga kwi Yehoba na lwitabilo mambo mwayuka’mba wimuta muchima. Lombainga kwi aye “pamo na kusanta” pa bintu byawama byo emubila. Tukosesha lwitabilo lwetu mwi aye inge saka tuvuluka’mba wakonsha “kuba bintu byavula kukila pa bintu byonse byo tulomba nangwa byo tulanguluka.”—Efi. 3:20.
“Mutende wa Lesa Wakila Milanguluko ya Bantu”
7 Kwa kubula nangwa kuzhinaukatu ne, balongo mu Filipai byo batangile nkalata ibatumijile Paulo, bavulukile byamumwekejile ne bintu byaubile Yehoba byo babujilenga kuketekela’mba byo byo asakuba. Ñanyi kintu kibafunjishenga Paulo? Wibafunjishenga’mba: Kwakamwa ne. Lombai, kabiji mukatambula mutende wa Lesa. Bino waambile ne kuba’mba “mutende wa Lesa wakila milanguluko ya bantu.” Kino kyalumbulula ka? Bantuntuluzhi bamo batuntulula bino byambo amba “wakila bintu byonse bilangulukapo bantu” nangwa’mba “wakila byonse bifuukulapo bantu kuba.” Onkao mambo, Paulo wibabuujilenga’mba “mutende wa Lesa” wawama bingi kukila ne pa byo balangulukilenga amba byo byo aji. Nangwa kya kuba na maana etu twakonsha kumona’mba makatazho kechi akapwa ne, bino Yehoba wiapwisha, kabiji wakonsha kuba kintu kyo tubula ne kuketekala.—Tangai 2 Petelo 2:9.
“Mutende wa Lesa Wakila Milanguluko ya Bantu”
16 Ki ka kifumamo inge twatwajijila kwikala na “mutende wa Lesa wakila milanguluko ya bantu”? Binembelo byakumbula’mba ‘ukalama michima ne milanguluko yetu kupichila mwi Kilishitu Yesu.’ (Fili. 4:7) Mu Kingiliki, kyambo kya kuba’mba “ukalama” ke kyambo kyo baingijishanga ku bashilikale. Bekingijishanga kulumbulula bashilikale byo balamanga ne kuzhikijila muzhi mu myaka ya kala. Muzhi umo ye bazhikijilanga ku bashilikale ke Filipai. Bangikazhi mu Filipai balalangatu ku matwi nzoo mambo bayukile’mba kuji bashilikale babena kulama bibelo bya muzhi. Ne atweba inge twaikala na “mutende wa Lesa,” kechi tukakamwanga ne. Twayuka’mba Yehoba wituta muchima kabiji ukeba kwitukwasha. (1 Pe. 5:10) Kuyuka bino kwitukwasha kubula kukizhamo kwikala na bijikila nangwa kubambisha muchima.
Kukeba Bishinka Bikwabo Byanema
it-2 528 jifu. 5
Milambo
Milambo ya binyu. Javula bena Isalela bapananga milambu ya binyu pamo na milambo ikwabo, kikatakata byo batendekele kwikala mu Ntanda ya Mulaye. (Ba 15:2, 5, 8-10) Ino milambo yajinga ya binyu (“maalwa”) kabiji beitulwilanga pa kya kusokelapo bitapisho. (Ba 28:7, 14; esekanyaiko Lup 30:9; Ba 15:10.) Mutumwa Paulo wanembejile bena Kilishitu ba mu Filipai amba: “Nangwa kya kuba babena kungichila nobe mulambo wa binyu pa kitapisho ne mwingilo wazhila ye mwingila na mambo a lwitabilo lwenu, natemwa ne kusekela pamo ne anweba bonse.” Mu kino kinembelo, Paulo waambile pa mulambo wa binyu kulumbulula byo akebeshenga kwingijila bena Kilishitu bakwabo. (Fp 2:17) Byo kwashajiletu pachepache kufwa, wanembejile Timoti amba: “Mbena kwitululwa nobe mulambo wa binyu ne kimye kya kukasululwa kwami kyafika kala.”— 2Ti 4:6.
“Lusanguko Lutanshi”—Lubena Kubiwa mu Kino Kimye Kyetu!
5 “Bena Isalela ba Lesa” bashingwa bafwainwa kulondelapo ne kwinunga kwi Nkambo Yesu Kilishitu mu lukumo lwa mwiulu, mo bakekala na “Nkambo myaka ne myaka.” (Ngalatiya 6:16; 1 Tesalonika 4:17) Luno lusanguko lutelwa’mba “lusanguko lwa mu bafu” nangwa’mba “lusanguko lutanshi.” (Filipai 3:10, 11; Lumwekesho 20:6) Inge luno lusanguko lwapwa, po kukekala kusangula bantu bavula baji na luketekelo lwa kwikala myaka ne myaka mu Paladisa panopantanda. Byonkabyo, kikale twaketekela kuya mwiulu nangwa kwikala panopantanda, twafwainwa kwiluyuka luno “lusanguko lutanshi.” Luno ke lusanguko lwa mutundu ka? Kabiji lubiwa kimye ka?