Bya Kwisamba na Bantu Kwingijisha Matalakiti

Kutendeka mu January 2018, pa jipa jitanshi ja Mutanchi wa Kupwila kwa Bwikalo ne Mwingilo pekala kipungu kya bya kwisamba na bantu. Betutundaika kuta muchima pa kwisamba na bantu mu mwingilo, kechi kwibapatu mabuku ne. Kabiji kimye kyonse kwikala mavidyo amwesha bya kwisamba na bantu kwingijisha Baibolo, pa kuba’mba basapwishi bafunjilengako. Bino nanchi kino kibena kulumbulula’mba kechi twafwainwa kupananga mabuku, magazini nangwa matalakiti mu mwingilo nenyi? Ine. Langulukai pa matalakiti. Matalakiti etukwasha bingi kutendeka misambo mu mwingilo. Pa kwisamba na bantu kwingijisha matalakiti, twakonsha kuba bino:

1. Ipuzhai bwipuzho buji pa jipa jitanshi buji na mikumbu ya kusalapo.

2. Mweshai mukumbu wa mu Baibolo uji mu kinembelo kyo bamwesha ku ntendekelo ya jipa jalondelapo. Umvwe awo muntu uji na kimye, mwakonsha kutangako byambo bimo biji mukachi ka talakiti ne kwisambapo.

3. Pai mwina nzubo talakiti ne kumutundaika kutanga byashala pa kimye kyanji.

4. Pa kupwisha, mumweshai bwipuzho buji panembwa’mba, “Kyo Mwakonsha Kulangulukangapo,” ne kunengezha kukabwelako na kukumbula bobo bwipuzho.

Inge mwabwelako, isambai mukumbu wa bwipuzho bo mwashile, ne kwipuzha bwipuzho bo mukesambapo kimye kikwabo. Mwakonsha kusala bwipuzho pa keyala wetu wa intaneti nangwa bwipuzho kufuma mu buku ye bamwesha kunyuma ya talakiti. Inge kyakonsheka, pa kimye kyo mwabwelako pai mwina nzubo buloshuwa wa Mambo Awama Afuma kwi Lesa! nangwa buku mukwabo ye tufunjishamo bantu Baibolo.