Byambo Bikwabo bya mu Mutanchi wa Kupwila kwa Bwikalo ne Mwingilo
JULY 6-12
BYA BUNEME BIJI MU MAMBO A LESA | KULUPUKA 6-7
“Pano Usakumona byo Nsakumuba Felo”
it-2 436 jifu. 3
Mosesa
Banabalume bena Isalela nabo bapimpwile bingi byubilo byabo. Patanshitu baswile kuba’mba Mosesa bamutumine kwi Lesa, pano bino Felo byo akizhizhemo kwibamanyika na mingilo yakosa, batendekele kwijizhanya kya kuba Mosesa walefwilwe ne kujijila Yehoba. (Lup 4:29-31; 5:19-23) Mosesa byo alefwilwe, Lesa Mwine Wakila wamukoseshe kupichila mu kumubuula mwatala jizhina janji ja Yehoba. Abalahama, Izaka, ne Yakoba kechi bayukile mwatajile jino jizhina ne. Byo jilumbulula byaishile kuyukanyikwa mu byo aubile pa kupokolola bena Isalela ne kwibatwala mu ntanda ya mulaye. (Lup 6:1-8) Nangwa byonkabyo, banabalume bena Isalela kechi bamumvwijile Mosesa ne. Bino kinkunka kya bu 9 byo kyapwile, popo batendekele kumukookela na muchima yense, kya kuba bakwatankene bingi, ne kulupuka mu Ijipita saka betanchika nobe “mabumba a bashilikale.”—Lup 13:18.
it-2 436 mafu. 1-2
Mosesa
Kwimana kwi Felo Mfumu wa Ijipita. Mosesa ne Alona baimenejilengako Yehoba mu ino ‘nkondo ya ba lesa.’ Felo byo aichile bañanga bapanda manga abo ba Yanesa ne Yambelesa (2Ti 3:8), kyajingatu nobe waobola balesa bonse ba bena Ijipita kuba’mba bekyombeshe ne Yehoba. Kya kukumya kitanshi kyaubile Alona kwesakana na byamubuujile Mosesa kyamwesheshetu patoka kuba’mba Yehoba uji na bulume kukila balesa ba bena Ijipita, nangwa kya kuba Felo watwajijile kukosesha muchima wanji. (Lup 7:8-13) Byo baubile kya kukumya kya busatu, ne bañanga banji baswile amba, “Kino kyaubiwa na bulume bwa Lesa!” Tusungupute twatumbile bañanga bapanda manga kya kuba bakankelwe kwimana ne kwiya kwi Felo na kwikyombesha ne Mosesa.—Lup 8:16-19; 9:10-12.
Binkunka byanekenyenye michima ne kukosesha michima ya bamo. Mosesa ne Alona bo babijikilenga kwiya kwa binkunka byonse jikumi. Binkunka byonse byaishile monka mo baambijile. Kino kyamwesheshe patoka kuba’mba Mosesa kine bamutumine kwi Yehoba. Jizhina ja Yehoba jatumbijikilwe mu Ijipita ne kulengela bamo kunekenya michima yabo, pa kuba bakwabo kibalengejile kutwajijila kuba bulunji. Bena Isalela kibalengejile kwikala na michima ya lukookelo, pa kuba Felo ne bamufundangako maana banji popo bakizhizhemo ne bwitote. (Lup 9:16; 11:10; 12:29-39) Bena Ijipita kechi balangulukilenga’mba balenga mambo balesa babo ne, bino bayukile kuba’mba Yehoba ye Lesa wakila balesa babo. Binkunka 9 byo byapwile, “Mosesa bamunemekele bingi mu kyalo kya Ijipita ku bakalume ba kwa Felo ne ku bantu.”—Lup 11:3.
Kukeba Bishinka Bikwabo Byanema
it-1 78 mafu. 3-4
Wa Bulume Bonse
Yehoba waingijishe byambo bya kuba’mba “Lesa wa bulume bonse” (ʼEl Shad·daiʹ) pa kulaya Abalahama kuba’mba ukekala na mwana aye Izaka. Uno mulaye wakebewenga Abalahama kwikala na lwitabilo lukatampe mu bulume bwa Lesa bwa kufikizha milaye yanji. Byambo bya kuba’mba wa Bulume Bonse, Yehoba wibingijishe pa kulumbulwila Abalahama kuba’mba aye ye Lesa ukapesha Izaka ne Yakoba banswanyi ba lulayañano lwa Abalahama.—Nt 17:1; 28:3; 35:11; 48:3.
Bino byakwatankana bingi na byambo Yehoba byo aambile kwi Mosesa amba: “Namwekanga kwi Abalahama, kwi Izaka ne kwi Yakoba amba yami Lesa wa Bulume Bonse [beʼElʹ Shad·daiʹ], bino jizhina jami ja Yehoba kechi nebabuujilejo bulongo ne.” (Ex 6:3) Kino kechi kibena kulumbulula’mba jizhina ja Yehoba kechi jayukanyikilwe ku bano bashakulu ba kwa Mosesa ne, mambo nabo bejingijishanga javula kabiji ne bashakulu babo nabo bejiyukile jino jizhina. (Nt 4:1, 26; 14:22; 27:27; 28:16) Mu buku wa Ntendekelo mo baamba pa bwikalo bwa bano bashakulu, byambo bya kuba’mba “Wa Bulume Bonse” bitanwamo bimye 6, kabiji jizhina ja Yehoba jitanwamo bimye 172 mu Binembelo bitanshi bya Kihebelu bya uno buku. Nangwa kya kuba bano bashakulu bemwenejile bishiino byalengejile Lesa kufwainwa kutelwa’mba “wa Bulume Bonse,” bino kechi baumvwishishe kyalengejile Lesa kwitumba jizhina ja kuba’mba Yehoba ne. Buku wa The Illustrated Bible Dictionary (Vol. 1, ji. 572) waamba’mba: “Ku bashakulu waambilenga pa milaye ya kulutwe ne kumwesha’mba aye, Yahweh, ye Lesa (ʼel) ukafikizha ino milaye kulutwe (ndumbulwilo imo ya kyambo kya sadday). Bino Lesa mu byo elumbulwile mu kipupu kyatemenenga mujilo mwavwangilwe byavula. Bulume bwa Lesa ne kukebesha kuba byo afuukula byo byavwangwa mu jizhina ja Yahweh.”—Wapitulukilemo ba J. D. Douglas, 1980.
it-2 435 jifu. 5
Mosesa
Kwizhinauka kechi kwalengejile Mosesa kubula kufikilamo ne. Mosesa wizhinaukilenga mambo wajinga na kikukuma. Mosesa wapimpwile bingi, kupusanako na byo ajinga myaka 40 kimye kyo etongwele mwine kwikala ntangi wa bena Isalela. Pa kikye kimye, watwajijile kusashijila Yehoba kuba’mba abule kumupa uno mwingilo. Nangwa kya kuba kino kyalengejile Lesa kumvwa bibi ku muchima, bino kechi wamukaine Mosesa ne. Lesa wamupele kolojanji aye Alona wa kumukwashako. Onkao mambo, Mosesa waikele wakwimenako Lesa. Mosesa kwi Alona wajinga nobe “Lesa,” mambo ye waimenangako Lesa pa kubuula Alona bya kwamba. Inge babena kwisamba na bakulumpe ba bena Isalela, nangwa baya na kumonañana ne Felo, kyamweka Yehoba wabuulanga Mosesa mikambizho ne bya kwamba, apa bino Mosesa wabuula Alona. Alona ye wajinga na mwingilo wa kwamba kwi Felo. (uno ke Felo mukwabo waswaine pe mfumu Felo Mosesa ye anyemene myaka 40). (Lup 2:23; 4:10-17) Kabiji Yehoba watelele Alona amba “ngauzhi” wa kwa Mosesa. Kibena kulumbulula kuba’mba Mosesa wajinga ngauzhi wa Lesa mambo ye wamutangijilanga, pa kuba Alona aye watambulanga mikambizho kwi Mosesa. Kabiji Mosesa bamubuujile’mba ukekala nobe “Lesa kwi Felo,” ko kuba’mba bamupeele bulume kwi Lesa pe Felo. Onkao mambo, kechi bafwainwe kuchiina uno mfumu wa bena Ijipita ne.—Lup 7:1, 2.
JULY 13-19
BYA BUNEME BIJI MU MAMBO A LESA | KULUPUKA 8-9
“Felo Kechi Wayukile’mba Kintu kyo Aubilenga Wafikizhenga Kyaswa Muchima wa Lesa Ne”
it-2 1040-1041
Kwitota
Yehoba Lesa watwajijila kutekenya bantu ne bisaka kabiji wibaleka kutwajijila kwikala na bumi nangwa kya kuba kibafwainwa kufwa. (Nt 15:16; 2Pe 3:9) Bino bamo bakookela Lesa kabiji wibobila lusa (Yos 2:8-14; 6:22, 23; 9:3-15), bino bakwabo bakosesha michima yabo ne kwimena kuntundwa Yehoba ne bantu banji. (Mpi 2:30-33; Yos 11:19, 20) Byo kiji kuba’mba Yehoba kechi ukanya muntu kwikala na muchima wa bwitote ne, Baibolo kyokyo yaambila’mba Lesa, ‘uswisha bantu kukosesha michima yabo,’ nangwa’mba ‘ukosesha michima yabo.’ Bino inge wakambula bantu betota umwesha patoka amba ye Lesa wa bulume bukatampe, kabiji kino kilengela jizhina janji kutumbijikwa.—Esakanyaiko Lup 4:21; Yoa 12:40; Lo 9:14-18.
it-2 1181 mafu. 3-5
Bubi
Kikwabo, Yehoba Lesa ulengela bintu kumweka mu jishinda ja kuba’mba babi batendeka kuba kyaswa muchima wanji kwa kubula kuyuka. Bino kechi uleka balwanyi banji kuba bintu byakonsha kulengela bakalume banji kukankalwa kwikala bakishinka ne. Kabiji Lesa ulengela byuba balwanyi banji kutumbijika bololoke bwanji. (Lo 3:3-5, 23-26; 8:35-39; Sl 76:10) Akino kyo kishinka kiji pa Byambo bya Maana 16:4 paamba’mba: “Yehoba ulengela bintu byonse kumweka monka mwayila byo akeba, ne konauna babi mu juba ja malwa.”
Jishimikila jimo jimwesha kino ke ja kwa Felo ye baambijilenga kwi Mosesa ne Alona kuba’mba aleke bena Isalela bafume mu buzha. Lesa kechi ye walengejile Felo mfumu wa bena Ijipita kwikala mubi ne. Bino wamulekele na bumi ne kulengela bintu kumweka mu jishinda jasolwele byubilo byatama byajinga ne Felo byalengejile kumukambula. Kishinka kyalengejile Yehoba kuba bino kiji pa Kulupuka 9:16 paamba’mba: “Na mambo a kino, nakikuleka: namba nkumweshe bulume bwami ne kulengela jizhina jami kuyukanyikwa pano pa ntanda ponse.”
Binkunka bina byaishile pa bena Ijipita, ne kuloba kwa kwa Felo ne nzhita yanji pa Kalunga Kachila, byalengejile bantu kuyuka bulume bwa kukumya buji ne Yehoba. (Lup 7:14–12:30; Sl 78:43-51; 136:15) Bisaka bya bantu bibazhokolokele byatwajijile kwamba pa kino nangwatu byo papichile myaka yavula. Kabiji jizhina ja Lesa jatumbijikilwe pano pa ntanda ponse. (Yos 2:10, 11; 1Sa 4:8) Inge kya kuba Yehoba waipayile bukiji Felo, buno bulume bwakukumya buji ne Lesa ne lukumo lwanji lwamwekele pa kupokolola bantu banji inge kechi lwayukanyikwa ne.
Kukeba Bishinka Bikwabo Byanema
it-1 878
Balunzhi Basumana
Bilongolo byatongolwa mu Binembelo bya Kihebelu bitanshi byalukukile bena Ijipita mu kinkunka kya buna kechi byayukanyikwa bulongo ne. Abino bilongolo bebyambapo amba byalukukiletu bena Ijipita, bino bena Isalela bajinga ku Goshenyi abo bashajilepo. (Lup 8:21, 22, 24, 29, 31; Sl 78:45; 105:31) Kyambo kya Kihebelu kya ʽA·rovʹ bekituntulwila mwapusana pusana mu ma Baibolo avula (mu Baibolo wa JB, NW, Ro) amba “balunzhi basumana,” (mu Baibolo wa Yg) amba “tupembya,” (mu Baibolo wa AS, KJ, RS) amba “malunzhi,” (mu Baibolo wa AT) amba “nkuso,” ne mu Baibolo wa (LXX) amba “tuzembe.”
Byambo bya Kikaonde bya kuba’mba “malunzhi asumana” bilumbulula bilongolo byapusana pusana bitumbuka nabiji mpobe ne tuzembe. Tuzembe tukazhi tusuma banyama ne bantu ne kukoka mashi. Kabiji tusemena make pa banyama ne bantu alenga mapila mu mibiji. Tuzembe tusuma bantu tutanwa ku mapunzha kwabula mashika. Onkao mambo, kinkuka kya malunzhi asumana kinetu kyaletele malwa akabotoka ku bena Ijipita ne bilelwa byabo, kabiji bamo bafwilenga ne kufwa.
Bishinka Bikatampe Kufuma mu Buku wa Kulupuka
8:26, 27—Mambo ka Mosesa o aambijile’mba bitapisho bya bena Isalela bikekala “bya bunya ku meso a bena Ijipita”? Mu Ijipita mwajinga kisela kya kupopwela banyama bavula bapusana pusana. Onkao mambo, kwamba pa kitapisho kwakoseshenga ne kumwesha mukoyo wajinga na Mosesa kuba’mba bena Isalela bebalekeko baye na kupana bitapisho kwi Yehoba.
JULY 20-26
BYA BUNEME BIJI MU MAMBO A LESA | KULUPUKA 10-11
“Mosesa ne Alona Kechi Bajinga na Moyo Ne”
Londelainga Yesu Kupichila Mu Kusapwila na Kuchinchika
6 Kabiji akilangulukai ne pa byachinchikile Mosesa pa kwamba kwi Felo, wajinga kalama ye bamonanga kuba’mba kechi waimenangakotu balesa ne, bino ne aye mwine wajinga lesa, kabiji wajinga mwana wa lesa juba, ye batelanga amba Ra. Kyamweka naye wapopwelanga nkishi wanji byonka byaubanga bamfumu bakwabo bo aswaine. Felo waambangatu na mizhilo ne mikambizho mu bukalama bwanji. Na mambo a bulume, kukanama ne kwilundumika, Felo kechi wakebanga bakwabo kumubula bya kuba ne. Uno ye muntu Mosesa aye wajinga kimote kabiji kafunga ko ayilenga bimye byavula kwa kubula kumwita kabiji ne kumutambwila. Nga Mosesa wamubujijile jimo amba ka uno mfumu? Wamubujile amba kukeya myalo ikatampe. Kabiji Mosesa wakambizhe Felo amba ka? Wamukambizhe kukasulula biumbi bya bazha ba kwa Felo kuba amba bafume mu kyalo! Nanchi Mosesa wafwainwe kuchinchika nyi? Ee wafwainwe!—Bala. 12:3; Hebe. 11:27.
it-2 436 jifu. 4
Mosesa
Lwitabilo ne kuchinchika byo bibakwashishe kwamba ne Felo. Yehoba ye wakwashishe Mosesa ne Alona na mupashi wanji pa kuba’mba bengile mwingilo ye ebapele. Fwanyikizhai byajinga kipango kya kwa Felo, mfumu ye bachiinanga pano pa ntanda ponse pa kyokya kimye. Mu kino kipango mwawamine bingi, kabiji Felo wajinga mfumu witota bingi wimonanga aye mwine amba lesa. Waikele pamo na bamufundangako maana, bakulumpe babashilikale, bakalume ne bazha banji saka bamuzhokoloka. Kabiji mwajinga ne bantangi ba bupopweshi, bañanga bapanda manga baimenejile kuntundwa Mosesa. Bano banabalume bebanemekele bingi ku bantu, mfumu Felo ye yenkatu wibakijile kwapwa. Abano bonse batundaikanga Felo ne balesa ba bena Ijipita. Bino Mosesa ne Alona bayile kwi Felo bimye byavula, kechi jimotu ne, mambo Felo wakainenga kulekako bazha banji Bahebelu kuba’mba baye. Mosesa ne Alona byo baambile kinkunka kya bu 8, Felo wibapangile na bukaji, kabiji byo babweleleko na kumubuula kinkunka kya bu 9, Felo wasopeshe Mosesa ne Alona kuba’mba kange bakamone kilungi kyanji jibiji ne, mambo ukebepaya.—Lup 10:11, 28.
Kukeba Bishinka Bikwabo Byanema
w95 9/1 11 jifu. 11
Bakamonyi Basolola Patoka Balesa Babubela
11 Bena Isalela byo bajinga mu Ijipita, Yehoba pa kutuma Mosesa kwi Felo waambile’mba: “Yanga kwi Felo, mambo amiwa namuswisha kukosesha muchima wanji ne michima ya bakalume banji, pa kuba’mba mmweshe bino biyukilo kwi abo, ne kuba’mba ukabuulenga baana bobe ne bankana bobe byo nauba mu kyalo kya Ijipita ne biyukilo byo nauba kwi abo; kabiji bakayuka’mba kine yami Yehoba.” (Kulupuka 10:1, 2) Bena Isalela balukookelo babuujilenga baana babo mingilo ya kukumya ya Yehoba. Kabiji baana babo nabo babuujilenga baana babo, kutwajijilatu ne mu bisemi byabo bya kulutwe. Batwajijile kuvuluka mingilo ya Yehoba ya kukumya. Ne mu ano moba kyo kimotu, bansemi baji na mwingilo wa kufunjisha baana babo pe Yehoba.—Mpitulukilo ya mu Mizhilo 6:4-7; Byambo bya Maana 22:6.
it-1 783 jifu. 5
Kulupuka
Bya kukumya byubile Yehoba pa kupokolola bena Isalela byatumbijikile jizhina janji. Byo baabukile Kalunga Kachila saka bakijitu ku kitulu, Mosesa wasawile lwimbo ne bena Isalela bonse bawelejile, kabiji Milyama ngauzhi wa mukazhi nyenga yanji watolele munsakayi, kabiji banabakazhi bonse bamulondejile na minsakayi saka bazha ne kuwelela byaimbilenga banabalume. (Lup 15:1, 20, 21) Pano bena Isalela bebapokolwele ku balwanyi babo. Bena Isalela byo bafumine mu Ijipita kechi bebayanjishangapo ku bantu nangwa ku banyama bakaji ne, nangwatu bakabwa kafwako nangwa umo wibabozele nangwa kwibabuluminatu ne. (Lup 11:7) Nangwa kya kuba jishimikila jiji mu buku wa Kulupuka kechi jaamba’mba Felo naye walobejile pamo na nzhita yanji ne, bino pa Salamo 136:15 paamba’mba Yehoba “walobeshe Felo ne nzhita yanji mu Kalunga ka Mema Kachila.”
JULY 27–AUGUST 2
BYA BUNEME BIJI MU MAMBO A LESA | KULUPUKA 12
“Bintu Bena Kilishitu byo Bafunjilako ku Kijiilo kya Lupitailo”
“Mukasangalalenga Na Muchima Yensetu”
4 Yesu wafwile pa Nisanyi 14, mu 33 C.E. Mu Isalela, juba ja Nisanyi 14 jajinga juba ja lusekelo ja Kijiilo kya Lupitailo. Pa mwaka pa mwaka pa jino juba, bisemi byajanga bya kuja byavwangilemo ne mwana mukooko wabula bulema. Mu jino jishinda, bavulukanga mwingilo waingijile mashi a mwana mukooko kupokolola baana babeji babena Isalela kimye malaika wa lufu kyo aipaile baana babeji babena Ijipita pa Nisanyi 14, mu 1513 B.C.E. (Kulupuka 12:1-14) Mwana mukooko ye bajanga pa Kijiilo kya Lupitailo waimenejilengako Yesu, awo mutumwa Paulo ye aambilepo’mba: ‘Kilishitu mwana mukooko wetu wa Lupitailo, waipayilwe kala.’ (1 Kolinda 5:7) Byonka byajinga mashi a mwana mukooko ye bajanga pa Kijiilo kya Lupitailo, ne mashi a kwa Yesu aichikile aleta lupulukilo ku bantu bavula.—Yoano 3:16, 36.
it-2 583 jifu. 6
Kijiilo kya Lupitailo
Yesu wafikizhe bintu bimo byaubiwe pa Kijiilo kya Lupitailo. Kintu kimo kyafikile ke kya mashi o bashingile pa bibelo mu Ijipita apulwishe babeji ku malaika waipayilenga babeji. Paulo waamba pa bena Kilishtu bashingwa amba kipwilo kya babeji (Heb 12:23), kabiji Kilishitu amba ye mupokolweshi na mambo a mashi anji. (1Te 1:10; Ef 1:7) Mwana mukooko ye bajanga pa Kijiilo kya Lupitailo kechi ba muchimunanga bikupa ne. Kyaambijilwe jimo mu bungauzhi kuba’mba Yesu kechi bakamuchimuna kikupa nangwa kimo ne. Buno bungauzhi bwafikile kimye kyafwile Yesu. (Sl 34:20; Yoa 19:36) Onkao mambo, Kijiilo kya Lupitailo kyaikalanga na Bayudea pa myaka yavula kyajinga pa bintu byajinga mu Mizhilo ya Mosesa byajinga nobe kimvule kya kwa Yesu Kilishitu, “Mwana Mukooko wa Lesa.”—Heb 10:1; Yoa 1:29.
‘Kino Kikekala Kwi Anweba Ke Kya Kuvulukilako’
13 Kufuma ku kisemi kimo kufika ne ku kisemi kikwabo, bena Isalela bafunjishanga baana babo bintu byanema byamwekele pa Kijiilo kya Lupitailo. Kintu kimo kyo bebafunjishanga kyajinga kya kuba’mba, Yehoba uzhikijila bapopweshi banji. Baana bafunjile kuba’mba Yehoba koaji, ne kuba amba ke Lesa wata bingi muchima bantu banji kabiji wibazhikijila. Waubile kino kimye kyo azhikijile babeji ba bena Isalela “byo aipayile bena Ijipita” na mwalo wa bujikumi.
14 Bansemi bena Kilishitu bemukambizha kubulanga baana benu pa mwaka pa mwaka Kijiilo kya Lupitailo byo kilumbulula ne. Nangwa byonkabyo, nanchi mufunjisha baana benu kuba’mba Lesa uzhikijila bantu banji nyi? Abya mwibamwesha kuba’mba mwashiinwa amba ne luno Yehoba kine uzhikijila bantu banji nyi? (Sala. 27:11; Isa. 12:2) Nanchi muba bino na baana benu saka mwakasuluka nyi, inyi na bukaji? Kulumbulwila bulongo kisemi mwatala kino kukebalengela kuketekela mwi Yehoba.
Kukeba Bishinka Bikwabo Byanema
it-2 582 jifu. 2
Kijiilo kya Lupitailo
Binkunka Jikumi byaishile pa bena Ijipita byamwesheshe’mba balesa ba bena Ijipita bulume bafwabo, kikatakata kinkunka kyaipayile babeji. (Lup 12:12) Mukooko mulume wajinga wazhila kwi lesa wabo aye Ra. Onkao mambo, kushinga mashi a mwana mukooko ye bajiile pa Kijiilo kya Lupitailo mu Ijipita ku mashiki a pa kibelu, ku bena Ijipita abo kyajinga kuba mwenga lesa wabo aye Ra. Kabiji ñombe mulume naye wajinga wazhila ku bena Ijipita. Onkao mambo, kufwa kwa bañombe bonse babeji kwalengejile lesa wapopwelanga bena Ijipita aye Osiris kumulengulula. Felo bamumonanga’mba mwana lesa wabo aye Ra. Onkao mambo, lufu lwa mubeji wa kwa Felo lwamwesheshenga kuba’mba lesa wabo aye Ra ne Felo bo batutu.
it-1 504 jifu. 1
Kushonkena
Kwajinga muzhilo wakainye kwingila mingilo yakosa pa moba a “kushonkena kwazhila.” Nabiji pa juba jitanshi ne juba japelangako pa Kijiilo kya Bashinkwa Bakubula Mbizho ajinga moba a “kushonkena kwazhila,” Yehoba o ebakambizhe amba: “Kechi mukengijilemo mwingilo ne. Kanatu kajo muntu yense ko afwainwa kuja, ko ko mukanengezhangatu kwapwa.” (Lup 12:15, 16) Nangwa byonkabyo, pa moba a “kushonkena kwazhila,” bañanga bapayankananga bingi na kusoka milambo kwi Yehoba (Le 23:37, 38), kyamweshanga kuba’mba uno muzhilo kechi wakainye kwingila mingilo ya pa juba pa juba ne. Ano kechi ajinga moba a kwikalatu ne, ajinga moba a kuba bintu bikosesha bulunda ne Lesa. Kabiji pa Sabado waikalangako jimo mu mulungu, bantu bapwilanga na kupopwela Lesa ne kutambula mikambizho. Mu kuya kwa moba, pa juba ja Sabado, bantu bapwilanga mu mashinagoga na kuteleka ku kutanga kwa Mambo a Lesa ne kwibalumbulwila mo atala. (By 15:21) Nangwa kya kuba bantu kechi baingilanga mingilo yakosa pa juba ja Sabado nangwa pa moba a “kushonkena kwazhila” ne, bino kechi baikalangatu ne, balombanga ne kulanguluka languluka pa Mulenga wabo, ne pa kyaswa muchima wanji.—Monai KUBUÑANA.