Byambo Bikwabo bya mu Mutanchi wa Kupwila kwa Bwikalo ne Mwingilo
OCTOBER 5-11
BYA BUNEME BIJI MU MAMBO A LESA | KULUPUKA 31-32
“Chinainga Kupopwela Bankishi”
w09 5/15 p. 11 mafu. 10-11
Tuyenga Kulutwe Tufike Ne Ku Bukulumpe Ku Mupashi—“juba Jikatampe ja Yehoba Jijitu Pepi”
11 11 Kwingijisha bintu byo twafunda mu Binembelo kwakonsha kukatazha bingi, kikatakata inge bintu byashupa. Kya kumwenako, panyumatu ya kuba Yehoba wapokolola bena Isalela mu buzha ku Ijipita, “bamunenene Mosesa” ne kutwajijila ‘kumweseka Yehoba.’ Mambo ka? Na mambotu a kubula mema a kutoma. (Lupu. 17:1-4) Bañondo babiji saka bakyangye kupwa kufuma po balayañenejile na Lesa ne kuswa kutwajijila kuba “byonse byo [aambile] Yehoba,” balajile muzhilo wanji ne kutendeka kupopwela bankishi. (Lupu. 24:3, 12-18; 32:1, 2, 7-9) Nanchi baubilenga kino na mambo a kumvwa moyo pa byabanjile Mosesa ku Mutumba wa Holeba koayile na kutambula mikambizho nyi? Inyi kampe balangulukile’mba bena Amaleki bakebalukuka ne kuba’mba bena Isalela kafwako kyo bafwainwe kuba kwa kubula Mosesa, yenka wibalengejile kushinda patanshi? (Lupu. 17:8-16) Kino kyakonsha kwikala byonkabye, pano nangwa ki ka nangwa ki ka kyalengejile, bena Isalela “bakaine kukokela.” (Byu. 7:39-41) Paulo watundaikile bena Kilishitu ‘kuteshakotu muchima’ kuchina’mba ‘bakaponena monka mu musango umo wa milengulwila’ ye bamwesheshe bena Isalela byo bachiine kutwela mu Ntanda ya Mulaye.—Hebe. 4:3, 11.
Kokelainga Lesa ne Kumwenamo mu Milaye yo Alaya
12 Yehoba watendekele kufikizha lubaji lutanshi lwa lulayañano lwa mu Mizhilo lo alayañene nabo kupichila mu kwibanengezhezha tente wa kupopwelamo ne buñanga bwalengejile bantu bandengamambo kumusolomoka. Kechi papichile ne kimye kyabaya ne, bena Isalela bavulamine kwipana kwabo kwi Lesa “ne kumuzhingijisha yenkaye Wazhila wa Isalela.” (Sala. 78:41) Mosesa byo ayile na kutambula mikambizho ku Mutumba wa Sinai, bena Isalela bakankelwe kupembelela kabiji balekele kuketekela mwi Lesa ne kulanguluka’mba Mosesa wibasha. Onkao mambo, balengele kipashañano kya mwana ñombe wa ngolode ne kwambila bantu amba: “Bano balesa benu, anwe bena Isalela, bemufumishe mu ntanda ya Ijipita!” (Lupu. 32:1, 4) Kepo baikele na kyo batongwele amba ‘kijiilo kya Yehoba’ kabiji balambijilenga ne kulambula milambo ku uno nkishi ye balengele. Yehoba byo amwene kino, waambijile Mosesa amba: “Basenduka lubilo kufuma mu jishinda jo nebakambizhe.” (Lupu. 32:5, 6, 8) Kyafuminemo, bena Isalela kechi bafikizhanga milaye yo balayañananga na Lesa ne.—Bala. 30:2.
“Ñanyi uji ku Lubaji lwa Yehoba?”
14 Bena Isalela bayukile’mba kupopwela bankishi ajinga mambo akatampe kwi Yehoba. (Lupu. 20:3-5) Nangwa byonkabyo, batendekele kupopwela mwana ñombe wa ngolode. Nangwa kya kuba bamwesheshe kubula lukookelo, bena Isalela bejimbaikilenga bene amba bajinga ku lubaji lwa Yehoba. Alona watelele kuno kupopwela mwana ñombe wa ngolode amba, “kijiilo kwi Yehoba.” Yehoba waubilepo byepi? Wamwene’mba bamusatukila. Ponkapo Yehoba wabuujile Mosesa amba bantu “batamisha” kabiji “basenduka mu jishinda jo nebakambizhe kuyamo.” Yehoba wazhingijile, kabiji wafuukwilepo kuvizha kisaka kyonse kya bena Isalela.—Lupu. 32:5-10.
Kukeba Bishinka Bikwabo Byanema
Kuji Kimye kya Kwingila ne Kimye kya Kukokoloka
4 Nanchi bingila Yehoba ne Yesu bilumbulula’mba kechi twafwainwa kwikalanga na kimye kya kukokoloka nenyi? Ine. Yehoba kechi ukooka ne, onkao mambo, kechi ukebewa kukokoloka ne. Baibolo waamba’mba Yehoba byo apwishishe kulenga jiulu ne ntanda, “wakokolokele ne kupemenwa.” (Lupu. 31:17) Nangwa byonkabyo, kino kilumbulula’mba Yehoba watulumene ne kumwena lusekelo mu bintu byo alengele. Kabiji nangwa kya kuba Yesu waingijile na ngovu byo ajinga pano pa ntanda, bino wamonangapo kimye kya kukokoloka ne kujiila pamo na balunda nanji kajo.—Mat. 14:13; Luka 7:34.
w87 9/1 29
Mepuzho Afuma ku Batanga
Umvwe muntu bamunemba jizhina “mu buku wa bumi” kilumbulula’mba bakamuvuluka nangwa’mba utalwa bulongo kwi Lesa. Pano bino kechi kilumbulula’mba awo muntu bamupa kala bumi bwa myaka ne myaka, uba nobe kyatongwejilwetu jimo nangwa kyaikajikwa kikupu ne. Mosesa byo aambijilengako bena Isalela, wasashijile Yehoba amba: “Pano umvwe mwaswa, balekelaiko mambo abo; pakuba umvwe mwakana, mufuute jizhina jami mu buku wenu ye mwanemba.” Lesa wamukumbwile’mba: “Amiwa nkafuuta mu buku wami muntu yenka wandenga mambo.” (Kulupuka 32:32, 33) Kishinka ke kya kuba’mba muntu nangwa kya kuba jizhina janji bejinemba mu “buku” wa bumi, wakonsha kusatuka. Inge wasatuka, Lesa ‘ufuuta jizhina janji mu buku wa bumi.’—Lumwekesho 3:5.
OCTOBER 12-18
BYA BUNEME BIJI MU MAMBO A LESA | KULUPUKA 33-34
“Byubilo Byawama Bya Yehoba”
it-2 466-467
Jizhina
Bintu byalenga Lesa bimwesha patoka’mba koaji, pano bino kechi bitubuulapo jizhina ja Lesa ne. (Sl 19:1; Lo 1:20) Kuyuka jizhina ja Lesa mwavwangwa byavula, kechi kuyukatu’mba jizhina ja Lesa ne. (2Mo 6:33) Kilumbulula kuyuka bulongo Lesa byo aji, kyaswa muchima wanji, bintu byo oba ne byubilo byanji byo baambapo mu Mambo anji. (Esakanyaiko 1Mf 8:41-43; 9:3, 7; Neh 9:10.) Abino byobyo kyajinga ne kwi Mosesa, muntu Yehoba ye ‘ayukile jizhina.’ Kino kibena kulumbulula’mba wamuyukile bulongo byo aji. (Lup 33:12) Mosesa kimye kimo wamwene kimwesho kya lukumo lwa Yehoba ne ‘kumvwa byo aambile pa jizhina janji ja Yehoba.’ (Lup 34:5) Abino byambo kechi byajingatu bya kwamba pa jizhina ja Yehoba bya kubwezhabwezhapo ne, bino byajinga byambo byaambilenga pa byubilo bya Lesa ne bintu byo oba. Waambile’mba “Yehoba, Yehoba, Lesa wa lusa ne kifyele, ubanda kuzhingila, wavula butemwe bubula kwaluka ne bukine, umwesha butemwe bubula kwaluka ku biumbi bya bantu, ulekela mambo bantu balubankanya, mizhilulwila ne bundengamambo bwabo, bino kechi ukabula kukabisha muntu uji na mambo ne, kabiji na mambo a bubi bwa bashabo, ukabisha baana, bankana ne bankanununa.” (Lup 34:6, 7) Kabiji mu lwimbo waimbile Mosesa, muji byambo bya kuba’mba “mambo nkejitayila mbila jizhina ja Yehoba.” Bino byambo byaamba pe Lesa byo aubile na bena Isalela kabiji byalumbulula Lesa byo aji.—Mpi 32:3-44.
w09 5/1 18 mafu. 3-5
Yehoba byo Elumbulwile aye Mwine
Byambo bitanshi byaambile Yehoba pa kwilumbulula byo aji ke byambo bya kuba’mba “Lesa wa lusa ne kifyele.” (Kyepelo 6) Shayuka umo waambile’mba kyambo kya Kihebelu kyo batuntulula’mba “wa lusa” kilumbulula kifyele nsemi wamulume kyo obilapo mwananji.” Kyambo kyatuntululwa “kifyele” kilumbulula “kilengela muntu kukwasha wakajilwa.” Kyamwekeshatu patoka kuba’mba Yehoba ulama bapopweshi banji byonka nsemi wamulume byo alama baana banji na kifyele ne kuta muchima kimye kyonse ku byo bakeba.—Salamo 103:8, 13.
Yehoba wanungilepo’mba “ubanda kuzhingila.” (Kyepelo 6) Kechi uzhingila bukiji na bapopweshi banji ne. Wibatekenya pa bilubo byo boba kabiji wibapa kimye kya kupimpula byubilo byabo byatama.—2 Petelo 3:9.
Kabiji Lesa watwajijile kwamba’mba “wavula butemwe bubula kwaluka ne bukine.” (Kyepelo 6) Butemwe bubula kwaluka nangwa’mba bukishinka ke kyubilo kyanema bingi paimena bulunda bubula kupwa bwa kwa Yehoba na bantu banji. (Mpitulukilo ya mu Mizhilo 7:9) Yehoba ye nsulo ya bukine. Kechi ujimbaikwa nangwa kujimbaika bantu ne. Byo aji “Lesa wa bukine,” twafwainwa kumuketekela na muchima yense, ne kushiinwa kuba’mba ukafikizha byonse byo alaya kuba kulutwe.—Salamo 31:5.
w09 5/1 18 jifu. 6
Yehoba byo Elumbulwile aye Mwine
Kishinka kikwabo kyanema bingi Yehoba kyo akeba’mba tuyuke pe aye ke kya kuba’mba “ulekela mambo bantu balubankanya.” (Kyepelo 7) Yehoba ‘waswila jimo kulekela mambo’ bonse balenga mambo inge balapila. (Salamo 86:5) Bino Yehoba kechi utalapotu pa bubi ne. Wambile’mba “kechi ukabula kukabisha muntu uji na mambo ne.” (Kyepelo 7) Lesa wetu wazhila ne koloka. Onkao mambo ukakambula babi bonse babula kulapila. Katatakatu bakebakambule na mambo a bubi bwabo.
Kukeba Bishinka Bikwabo Byanema
w04 3/15 27 jifu. 5
Bishinka Bikatampe Kufuma mu Buku wa Kulupuka
33:11, 20—Yehoba wisambilenga byepi na Mosesa sa betala “kilungi ne kilungi”? Bino byambo bilumbulula muntu wisamba na mulunda nanji. Mosesa waambanga na waimenangako Lesa ne kutambula mikambizho kufuma kwi Yehoba kupichila mu yenkao. Bino Mosesa kechi wamumwene Yehoba ne, mambo ‘kafwako muntu wakonsha kumumona Lesa ne kwikala na bumi ne.’ Yehoba aye mwine kechi waambilepo na Mosesa ne. Ngalatiya 3:19 waamba’mba: Mizhilo ‘yatongwelwe na bamalaika ne kuletwa mu maboko a kwa ñambi.’
w98 9/1 20 jifu. 5
Tangizhaingako Bintu Byanema mu Bwikalo Bwenu!
Banabalume bena Isalela ne babujile bena Isalela bo bajinga nabo bebakambizhe kuya na kwimana kwi Yehoba jisatu pa mwaka. Kabiji banabalume bamo bajinga na bisemi basendanga bakazhi babo ne baana babo ku bino bijiilo mambo bayukile’mba bikakosesha lwitabilo lwabo. Pano bañanyi bashalanga na kumona mazubo ne majimi inge kisemi kyonse kyafumapo? Yehoba waambile’mba: “Kafwako muntu nangwa umo ukakwangata kyalo kyobe kimye kyo ukaya na kwimana kwi Yehoba Lesa wobe bimye bisatu mu mwaka ne.” (Kulupuka 34:24) Lwitabilo lwakosa lwakonsheshe kukwasha bena Isalela kushiinwa’mba inge batangizhako bintu byanema mu bwikalo bwabo, bintu byabo bya ku mubiji kechi bikonaika ne. Nanchi Yehoba wafikizhe uno mulaye wanji nyi? Ee, mambo bintu byabo bya ku mubiji kechi byaonaikanga ne!
OCTOBER 19-25
BYA BUNEME BIJI MU MAMBO A LESA | KULUPUKA 35-36
“Yehoba Witufunjisha bya Kwingila Mingilo Yanji”
Yehoba Upesha Bantu Baji na Muchima wa Bumpanyi
Kyalengejile Yehoba kumvwa bulongo kechi bintu byo baletele ne, bino ke muchima wa bumpanyi wa bantu batundaikile mpopwelo ya kine. Kabiji bepaine kwingijisha kimye kyabo ne bulume bwabo. Jishimikila jaamba kuba’mba: “Banabakazhi bonse basendwe bazhingile mizhinge na maboko abo.” Kabiji bano “banabakazhi bonse basendwe bajinga na muchima wa kupana, bazhingile boya bwa bambuzhi.” Kunungapo, Yehoba wapele Bezalela “maana, milangwe ne maana a kuyuka bintu byonse bya busendwe.” Lesa wayuzhizhe Bezalela ne Oholyaba mupashi ne kwibafunjisha busendwe bwa kwingila mingilo yonse yo bebapele.—Lupu. 35:25, 26, 30-35.
Bakalume Bakishinka Bakala Batangijilwanga Na Mupashi Wa Lesa
6 Bwikalo bwa kwa Bezalela wajingako mu moba a kwa Mosesa bumwesha patoka bingila mupashi wa Lesa. (Tangai Kulupuka 35:30-35.) Bezalela bamutongwele kutangijila mwingilo wa kulenga bya mu tente wa lusambakeno. Nanchi wayukijile jimo bya kwingila uno mwingilo mukatampe nyi? Kampe, bino mwingilo ye ayukishe wajingatu wa kufyatula matafwali a bena Ijipita. (Lupu. 1:13, 14) Pano Bezalela wakonsheshe byepi kwingila uno mwingilo wakatezhe bingi? Yehoba ‘wamuyuzhizhe na mupashi wa Lesa ne na munkonsha ne na milangwe ne na maana ne na busendwe amba alanguluke bulongo bya kwingila na manono . . . mingilo yonse ya busendwe.’ Mupashi wazhila wanungulwile kya bupe kyajinga ne Bezalela. Byobyo kyajinga ne kwi Oholyaba. Bezalela ne Oholyaba bafwainwa bamuyukile bingi uno mwingilo mambo bafunjishanga ne bakwabo bya kuba. Kya kine, Lesa ye wikibikile mu michima yabo.
Bakalume Bakishinka Bakala Batangijilwanga Na Mupashi Wa Lesa
7 Kishinka kikwabo kimwesha kuba’mba Bezalela ne Oholyaba bebatangijilanga ku mupashi wa Lesa ke buya ne kukosa kwa bintu byo balengelenga. Byo balengele byaikele myaka 500 saka bebingijishatu. (2 Moba 1:2-6) Bezalela ne Oholyaba bapusana bingi na balenga byakulengalenga lelo jino, abo kechi bafwachikilepo mazhina abo pa byo balengele ne. Munema wayile kwi Yehoba pa byonse byo baubile.—Lupu. 36:1, 2.
Kukeba Bishinka Bikwabo Byanema
Fundai Mashinda A Yehoba
14 Tangizhaingako bintu bya ku mupashi. Mukoka wa bene Isalela kechi wafwanyijile kutesha muchima ku bintu bya ku mubiji kukila bya ku mupashi ne. Bwikalo bwa bena Isalela kechi bwajinga bwa kukebesha bintu bya ku mubiji ne. Yehoba wasalulwilepo juba jimo mu mulungu ne kwijizhijika, jajinga juba ja kwingijilamo mingilo ya Lesa. (Kulupuka 35:1-3; Kubala 15:32-36) Pa mwaka pa mwaka kwaikalanga ne moba akwabo a bipwilo byazhila byatongwelwe. (Bena Levi 23:4-44) Kino kyo kyajinga kimye kya kushimikizha mingilo ya kukumya ya Yehoba, kuvululwako mashinda anji, ne kumusanchila pa byonse byawama byo ebobijilenga. Bantu byo bamwesheshenga munema wabo wa kunemeka Yehoba, bamwakaminwenga ne kumutemwa kabiji baendelenga mu mashinda anji. (Mpitulukilo ya mu mizhilo 10:12, 13) Mafunde onse aji mu ino mikambizho akwasha bingi bakalume ba Yehoba ano moba.—Bahebelu 10:24, 25.
w00 11/1 29 jifu. 1
Muchima wa Bumpanyi Witulengela Kwikala na Lusekelo
Pano fwanyikizhai biumvwine bena Isalela. Bisemi byabo byonse byamanamine bingi byo bajinga mu buzha kabiji kechi bakonsheshe kwikala na bintu byo bakebelenga ne. Pano kimye kyafikile kya kwibafumya mu buzha kabiji baikele na bya bunonshi byavula bingi. Nanchi baumvwinenga lwiso kupanapo bya bunonshi bimo byo bajinga nabyo nyi? Bakonsheshe kulanguluka’mba buno bunonshi bwajinga bwabo kabiji bajinga na luusa lwa kwilamina buno bunonshi bonse. Pano bino byo bebakambizhe kuba’mba bafwainwa kupanako mali pa kuba’mba batundaike bupopweshi bwa kine, bapaine bya bupe kwa kubula kuzhinyazhinya kabiji na muchima umo! Bayukile kuba’mba Yehoba ye wibalengejile kwikala na bunonshi. Onkao mambo bapaine siliva wabo, ngolode ne bilelwa byabo. Bonse baswile kupana bya bupe. ‘Michima yabo ya bumpanyi’ yo ibalengejile kupana. Kabiiji “mupashi wa bumpanyi” naye wibalengejile kupana. Kinetu byajinga “bya bupe bya kupana kwi Yehoba.”—Kulupuka 25:1-9; 35:4-9, 20-29; 36:3-7.
OCTOBER 26–NOVEMBER 1
BYA BUNEME BIJI MU MAMBO A LESA | KULUPUKA 37-38
“Mambo ka bya Kusokelapo Bitapisho Byajinga mu Tente wa Lusambakeno o Byanemena mu Bupopweshi bwa Kine?”
it-1 82 jifu. 3
Kya Kusokelapo Bitapisho
Kya kusokelapo bya kufutumuna. Kya kusokelapo bya kufutumuna (kitelwa ne kuba’mba “kya kusokelapo bitapisho kya ngolode” [Lup 39:38]) kyamweka bekilengele na kichi kya mwiba wa kaseele, bekishingile ngolode peulu ne mu mbaji monse. Kabiji bazhokolwesheko momeno wa ngolode peulu yakyo. Kya kusokelapo bya kufutumuna kyalepele mu bula masentimita 44.5 nangwa’mba ma inchezi 17.5. Mu bwipi kyalepele masentimita 89 nangwa’mba mafiti 2.9, kabiji balengejileko ne “nsengo” mu makona onse ana peulu. Kabiji balengele makosa abiji a ngolode mwa kusokeka mibanda ya kwikisendelako yo balengele na kichi kya kaseele yo bashingako ngolode, kabiji ano makosa aikejile panshi ya momeno mu mbaji yonse ibiji ya kya kusokelapo bitapisho bya kufutumuna. (Lup 30:1-5; 37:25-28) Pa kino kya kusokelapo bitapisho, basokelangapo bya kufutumuna binunka bulongo jibiji pa juba pa juba, lukelo ne pa kuzhika juba. (Lup 30:7-9, 34-38) Kwingijisha kya kwapwilapo mujilo bekwambapo ne mu binembelo bikwabo. Kyamweka byo byo baubanga ne pa kusoka bya kufutumuna. (Le 16:12, 13; Heb 9:4; Lum 8:5; esakanyaiko ne 2Mo 26:16, 19) Kya kusokelapo bitapisho bya kufutumuna kyaikalanga monka mu tente wa lusambakeno, bekibikile kwipi na kipembe kya Mwine Mwazhijisha pa kuba’mba kitelwe kuba’mba kyajinga “kwipi na jikwachi ja Lushimuno.”—Lup 30:1, 6; 40:5, 26, 27.
it-1 1195
Bya Kufutumuna
Bya kufutumuna byazhila byo bebakambizhe kwingijishanga pa tente wa lusambakeno ye bajinga nanji mu kiselebwa bebilengele na bipe bya mutengo byapaine bena Isalela. (Lup 25:1, 2, 6; 35:4, 5, 8, 27-29) Pa kwibalumbulwila byo bafwainwe kwibivwanga, Yehoba wabuujile Mosesa amba: “Ukashikule bipimo bimotu bya binunka bulongo: bya shitakite, bya onyicha, binunka bulongo bya galabano ne binunka bulongo byawamisha. 35 Kabiji ukebilenge kwikala bya kufutumuna; abino binunka bulongo wafwainwa kwibivwangakanya bulongo na mukele kabiji bikekale byawamisha ne kuzhila. 36 Ukatwepo bimo ne kwibitula kwipi na Jikwachi ja Lushimuno jiji mu tente wa lusambakeno konka ko nkemana kwi obewa. Bikekala byazhijisha kwi anweba.” Pa kuba’mba ebakwashe kumonanga bino bya kufutumuna amba byazhila kabiji kechi bafwainwa kwibipana ku muntu uji yense ne, Yehoba wanungilepo amba: “Muntu yense ukalenga byaesakana na bino kuba’mba akomvwenga bwema bwabyo bwawama, bafwainwa kumuchibako ku balongo banji.”—Lup 30:34-38; 37:29.
it-1 82 jifu. 1
Kya Kusokelapo Bitapisho
Bya Kusokelapo Bitapisho bya pa Tente wa Lusambakeno. Byo balengelenga tente wa lusambakeno, bashimikile ne bya kusokelapo bitapisho bibiji byonkatu bibabujile Lesa. Kya kusokelapo bitapisho bya kufutumuna bekitela ne kuba’mba (“kya kusokelapo bitapisho kya mukuba” [Lup 39:39]). Kyajinga kibokoshi kyo balengele na mapulanga a mwiba wa kaseele, kyasabikile mukachi, kechi kyajinga na kitako nangwa kizhiko ne. Kyajinga mamita 2.2 monse, ne mamita 1.3 kuya mwiulu. Kabiji ku makonka akyo ana kwajinga nsengo yafutukile kutala pangye. Kyonsetu bekilambwizhizhe na mukuba. Kabiji kyela kya mesomeso nangwa’mba kyela kya mukuba kyo bapikula bekibambijile na “munshi’ ya ko kyapelela kwiulu kwipi na “pakachi kakyo.” Kabiji kwipi na kyela kya mesomeso, ku makonka onse ana babikileko makosa ana. Kyamweka mu ano makosa momo bakulanga myamba ya kichi kya mwiba wa kaseele yo bashingile ngolode ya kusendelako kya kusokelapo bitapisho. Kyamweka kino kibena kulumbulula’mba kya kusokelapo bitapisho bekichibile pachepache mu mbaji ibiji mo bakujile kyela kyapapakana kya mesomeso kyalupukijile ne bushiya. Kabiji ponka palupukijile kino kyela kya mesomeso, mu mbaji pa makonka po pajinga makosa atala mu mbaji. Bashayuka bamba byapusana pusana. Kabiji bavula bamba’mba kyamweka kwajinga makosa akwe ana, akwe ana o balamikile pangye ku mbaji ya kya kusokelapo bitapisho. Makosa a bubiji o ajinga a kukulamo myamba ya kusendelako kya kusokelapo bitapisho. Bipe bya kwingijisha ku kya kusokelapo bitapisho pajinga bibekete mwa kuwolela buto, mafosholo, masanyi afukumana, mafoloko akutolelako nyama ne mwa kwapwila mujilo.—Lup 27:1-8; 38:1-7, 30; Ba 4:14.
Kukeba Bishinka Bikwabo Byanema
it-1 36
Mwiba wa Kaseele
Kichi kya mwiba wa kaseele kikala na misampi yavula kuji miba yalepa bingi. Ino misampi javula ilenga kitooto na bichi bikwabo bya kaseele byamena pepi. O ene mambo javula mu Baibolo pa kwibitela bebivuzha’mba bichi (shit·timʹ). Bichi bya mwiba wa kaseele bilepa mamita 6 kufika ku 8. Bino javula bikalatu bipupu. Tumabula twa kino kichi twatuchetuche tumwekatu nobe mayona. Kilala buluba bwa kibobo-kibobo kabiji kupanga mikobe. Kiji na kyula kyajita kabiji kichi kine kechi kisumpwa ne. Kuno kukosa kwakyo ne kuvula ko byavula mu kiselebwa ko kwalengejile kwingijisha bingi pa kulenga tente wa lusambakeno ne bipe byajingamo. Kyokyo baingijishe ne pa kulenga jikwachi ja lulayañano (Lup 25:10; 37:1), tebulu po babikanga shinkwa wa kupana kwi Lesa (Lup 25:23; 37:10), bya kusokelapo bitapisho (Lup 27:1; 37:25; 38:1), mibanda ya kusendelapo (Lupu 25:13, 28; 27:6; 30:5; 37:4, 15, 28; 38:6), mashiki ko bakobekele kipembe (Lup 26:32, 37; 36:36), mafulemu (Lup 26:15; 36:20) ne myamba yao (Lup 26:26; 36:31).
Nanchi Mwayuka Nyi?
Kupusanako na tutajilo twa mu ano moba, twa kala betulenganga na byela byo balambwizha bulongo nabiji kyela kyafuma ku jibwe ja buneme jachiluluka (bronze), kabiji ne mukuba, siliva ne ngolode. Kimye kitanshi Baibolo kyo aamba pa tutajilo ke kimye kyo bashimikilenga Nzubo ya Lesa, mpunzha itanshi kwayanga bena Isalela na kupopwela. Banabakazhi bapaine tutajilo pa kuba’mba balengeko shomeka wa mukuba wazhila ne kya kumutentekapo. (Kulupuka 38:8) Kampe basungulwilenga tutajilo pa kuba’mba balenge bino bintu.