Sapwilai Mambo Awama a Kuba’mba Ntanda Mukabula Makatazho Iji Pepi!

Mu ñondo wa November, tukekala na mukwekele wa kusapwila mambo awama a kuba’mba ntanda yawama mukabula makatazho iji pepi. (Sl 37:10, 11; Lum 21:3-5) Tendekaiko kwinengezha lonka luno pa kuba’mba mukengileko pakatampe. Inge mwanemba pepala wa kulombelapo kwingila bupainiya bwa kukwasha mu ñondo wa November, mwakonsha kusalapo anweba bene kwingila maola 30 nangwa 50.

Monai kuba’mba mwanengezha kinembelo kyaamba pa ntanda ipya kya kwingijisha pa kwisamba na bantu. Pa kusala kinembelo, langulukai pa bantu ba mu nyaunda yenu. Inge muntu wamwesha’mba ubena kukeba kufunjilapo bikwabo pa kumufwakesha pa kimye kitanshi, mupai Kyamba kya Usopa kya bena kengi kya No. 2 2021. Mwafwainwa kubwelako bukiji ne kutendeka kumufunjisha Baibolo mu buloshuwa wa kuba’mba Mukekala Myaka ne Myaka! Kinetu kusapwila “mambo awama a bintu byawama” kuketuletela bingi lusekelo!—Is 52:7.

TAMBAI VIDYO WA LWIMBO WA KUBA’MBA NTANDA IPYA IJI KULUTWE, APA BINO MUKUMBULE ANO MEPUZHO:

• Ñanyi bintu byawama biji kulutwe byaji kulangulukangapo kashimbi?

• Ñanyi bintu bimo byo mubena kutengela mu ntanda ipya?

• Kulanguluka pa bintu byawama bikekala mu ntanda ipya kwakonsha kwimukwasha byepi kukengilako pakatampe mu mukwekele ye tukekala nanji mu November?—Luk 6:45