Kechi Nsakuleka Kwikala Kamonyi wa kwa Yehoba Ne

NATEMENWE bingi bya bupopweshi kabiji nabambakene bingi mu Chechi ya Katolika. Naimbanga mu kwaya ya mu chechi kabiji nayanga na bapulishiti mwaya kyalo kyonse na kusekelela kijiilo kya Misa. Mu 1955 bakolojami babakazhi bambujile kuba’mba kuji Paladisa ubena kwiya. Bampele Baibolo, buku wa “This Good News of the Kingdom” (Ano Mambo Awama a Bufumu) ne wa kuba’mba “Let God Be True” (Nanchi Lesa wa Kine kwi Anweba Nyi?). Naumvwine bingi bulongo, naipwizhe pulishiti inge nakonsha kutanganga Baibolo. Wakumbwile’mba, “ukakonya,” pano bino nafuukwilepo kutanganga Baibolo.

Byo navilukijile ku ba nkambo ku Boca Chica, pulishiti wangipwizhe ene mambo o nabujilenga kuya ku Chechi. Namulumbulwijile namba mafunjisho a mu Chechi kechi ayilamo na byaamba Baibolo ne. Pulishiti wazhingijile bingi. Wakajipijile ne kuñambila’mba: “Nsongwakazhi teleka, obewa wi mukooko wasatuka mu jitanga jami.”

Namukumbwile namba: “Ine, yenu mwasatuka mu jitanga ja Yehoba, mambo mikooko ya kwa Yehoba kechi ya muntu ne.”

Kufumatu popo, kechi nabweleleko jibiji ku ino chechi ne. Navilukijile ku bakolojami babakazhi kabiji byo papichiletu bañondo batanu na umo kufuma po naumvwijile bukine, nabatizhiwe. Kechi papichiletu ne moba avula ne, natatwile bupainiya bwa kimye kyonse. Byo papichile mwaka umo, nasongwelwe kwi ba Enrique Glass, bakalama bamwanzo. Kimye kyo twasapwijilenga mukokolokela bantu mu La Romana, bakapokola bakwachile ba Enrique. Byo bebatwajilenga, ne bapupijilenga lubilo sakambijika namba: “Ne amiwa ne Kamonyi wa kwa Yehoba kabiji na kusapwilanga. Pano mambo ka o mwabujila kunkwata ne amiwa?” Pano bino kechi bakebelenga kunkwata ne.

Ba Enrique bajingapo ne jikwabo mu kaleya, myaka itanu na umo ne kichika. Pa kikye kimye bebakashile bañondo 20. Nebapempulangatu jonse pa Mulungu. Juba jimo byo nayile na kwibapempula, mukulumpe wa kaleya washikishe’mba: “Wananga ka kuno?”

Namukumbwile’mba: “Bamwatawami baji mu kaleya, bebakasa mambo Bakamonyi ba kwa Yehoba.”

Wankumbwile’mba: “Ukijitu mwanyike kabiji wakonsha kwikala bwikalo bwawama kulutwe. Mambo ka o ubena kutayila kimye na Bakamonyi ba kwa Yehoba?”

Namukumbwile’mba: “Ne amiwa ne Kamonyi wa kwa Yehoba. Nangwatu mungipaye bimye bitanu na bibiji ne nkusangula bimye bitanu na bibiji, kechi nsakuleka kwikala Kamonyi wa kwa Yehoba ne.” Ponkapotu wañambijile’mba yanga, mambo kechi wakebelenga kumvwa byambo bikwabo ne.

Byo baswishishe mwingilo wa kusapwila, ba Enrique ne amiwa twaingijile myaka yavula mu mwingilo wa bukalama bwa mwanzo ne bwa nkambi. Ba Enrique baponejile mu tulo twa lufu pa 8 March mu 2008. Natwajijila na mwingilo wa bupainiya bwa kimye kyonse.