Nanchi Nakonsha Kutambula Muchi ku Kipatela amba Nkose Nyi?

Bakamonyi ba kwa Yehoba umvwe bakolwa batambula muchi ku kipatela kabiji bakeba kwibabuka amba bakose. Tukeba kulama bulongo mibiji yetu ne kwikala batuntulu. Pa bimye bimo “tukeba dokotala.” (Luka 5:​31, Easy-to-Read Version) Kabiji Bakamonyi ba kwa Yehoba bamo bengila mwingilo wa bushayuka bwa michi, byonkatu byajinga Luka mwina Kilishitu wajingako mu myaka kitota kitanshi.​—Kolose 4:14.

Mashinda amo a kubukilamo bantu alala mafunde a mu Baibolo. Ano mashinda kechi twialondela ne. Nabiji kwitubika mashi. Kechi tuswa ne, mambo Baibolo yakanya kuja mashi. (Byubilo 15:20) Kabiji Baibolo wakanya kwingijisha mashinda a kubukilwamo avwangamo kupopwela mipashi.​—Ngalatiya 5:​19-21.

Bino mashinda avula a kubukilwamo kechi alala mafunde a mu Baibolo ne. Nangwa byonkabyo, muntu wafwainwa kwifuukwilapo mwine. Kamonyi umo wakonsha kutambula muchi nangwa kuswa kumubuka kwingijisha jishinda jimo ajo jakonsha kukana kamonyi mukwabo.​—Ngalatiya 6:5.