Namwenenga Nshiji mu Kyalo Kyonse

Byashimikizha ba Patrick O’Kane

NASEMENWE mu 1965 mu kisemi kyayanda ku buyeke bwa kyalo kya Ireland. Nakomejile mu muzhi wa Derry kimye kyo kwajinga “malwañano” pa kachi ka Bakatolika ne Bapolotesitanti pa myaka 30. Jibumba jicheche ja Bakatolika jamwenenga kuba’mba bebobilenga nshiji ku Bapolotesitanti bavujile, ne kwibapamo mambo a bujimbijimbi, kulenga mizhilo yakatazha, kubula kwibatwezha makito ne kubula kwibapa mazubo alumbuluka.

Mu kyalo kyonse bantu bebobilenga nshiji kabiji namwene bamo saka bekala bulongo, bino bakwabo ne. Napumwanga bimye byavula, kunkulumuna mu motoka, ne kunshishika buta, bakapokola nangwa bashilikale bampikitanga ne kuntebawisha. Namwene kuba’mba babena kummanyika, kabiji nalangulukilenga’mba ‘ntalengapotu nyi, inyi ndwe nabo!’

Nevwangile mu kalionge wa kwijizhanya wajingako pa juba ja pa mulungu mu 1972 wa kuvuluka bantu 14 bo balozele ku bashilikale ba ku Britain ne mu kalionge wa kwijizhanya wajingako na mambo a kipowe kya nzala wa kunemeka bakaili bafwile na nzala mu 1981. Naimikile mabandela o bakainye ne kunemba byambo bya kukana kafulumende wa bena Britain konse konse. Kyamwekelenga kuba’mba kimye kyonse kwaikalanga kalionge wa kwijizhanya pa kwipaiwa kwa Katolika umo. Kalionge watendekangatu na bantu bacheche, waalukanga ke nkondo ya bantu bavula.

Kimye kyo najinga pa sukulu mukatampe, nevwangilemo mu kwijizhanya pa mambo kutama kwa bwikalo. Mu kuya kwa kimye, navilukijile ku London, kabiji nako nakevwangile mu kalionge wa kukana mizhilo ya kafulumende ya mwekelenga kuba’mba ibena kulengelatu bantu bekala bulongo kumwenamo bino na kunyanchijila bayanji. Kabiji nevwangilemo mu kuleka kwingila nkito kwanengezhewe na kabungwe kemenako bamingilo na mambo a kubula kwibafolesha mali avula, kabiji ne mu kwijizhanya na mambo a misonko ya mazubo mu march 1990, kabiji kuno kwijizhanya kwalengejile ne konaunwa kwa kishimikwa kya Trafalgar Square na bantu bazhingijile.

Nangwa byonkabyo, mu kuya kwa kimye nalefwilwe. Mu kifulo kya kumwenamo byawama, kwijizhanya kwetu kwalengelangatu lupato kubayilako.

Pa kikye kimye mulunda nami popo angyukishe ku Bakamonyi ba kwa Yehoba. Baingijishe Baibolo kufunjisha kuba’mba Lesa wayuka kuyanda kwetu kabiji ne kuba’mba ukafumyapo buyanji bonse bwaleta bantu. (Isaya 65:17; Lumwekesho 21:3, 4) Nangwa kya kuba bebikeko byepi, bantu kechi bakonsha kuleta buchibamambo bwaoloka ne kunemeka bantu bonse ne. Kechi tukebatu Yehoba kwitutangijila ne, bino tukeba ne bulume bwanji kuba’mba tushindenga makatazho aji mu ino ntanda.—Yelemiya 10:23; Efisesa 6:12.

Pano pa kino kimye mmona’mba byo nebikishangako mukukwasha bantu napulwilangamotu mabula. Kindetela bingi lusekelo kuyuka amba pano pa ntanda kechi pakekala bintu byatama ne, kabiji bantu bonse bakanemekwa.

Baibolo ufunjisha’mba, Yehoba Lesa “watemwa buchibamambo bwaoloka.” (Salamo 37:28) Kino kyo kintu kimo kyakonsha kwitulengela kushiinwa amba ukaleta bunchibamambo bwaoloka bwakankalwa kuba makafulumende a bantu. (Danyela 2:44) Inge mukeba kufunjilapo byavula, isambai na Bakamonyi ba kwa Yehoba baji ko mwikala nangwa kuya pa keyala wetu wa intaneti wa, www.pr418.com.

[Kipikichala pa peja 11]

[Byambo bya Muntu Ungi]

Bipikichala bya bantu bafolelenga kalionge: Copyright Homer Sykes

[Mabulañano pa peja 12]

Nangwa kya kuba bebikeko byepi, bantu kechi bakonsha kuleta buchibamambo bwaoloka ne kunemeka bantu bonse ne