BYAMBAPO BAIBOLO

Masongola

Nanchi Masongola Bulundatu Nyi?

“Akya kyasambakanya Lesa muntu kechi ekyabanye ne.”—Mateo 19:6.

BYAMBA BAIBOLO Lesa umona masongola amba kechi bulundatu ne. Masongola ke kukwatankana kwazhila pakachi ka mwanamulume ne mwanamukazhi. Baibolo waamba’mba: “Kufuma ku ntendekelo, ‘[Lesa] wibalengele wamulume ne wamukazhi. Na mambo a kino, mwanamulume ukasha bashanji ne bainanji, kabiji bakekala ke mubiji umo’  . . . Onkao mambo, akya kyasambakanya Lesa, muntu kechi ekyabanye ne.”a—Mako 10:6-9; Ntendekelo 2:24.

Byambo bya kuba’mba “akya kyasambakanya [nangwa’mba kyanungakanya] Lesa,” kechi bilumbulula’mba masongola alengwa mwiulu ne. Baibolo byo aamba kuba’mba Mulenga wetu ye watendekele masongola, umwesha kuba’mba masongola anema bingi. Baji mu masongola bamona masongola abo mu jino jishinda, beamona amba azhila, kechi afwainwa kupwa ne, onkao mambo, bebikako bingi kuwamisha masongola abo. Kabiji bakosesha masongola abo kupichila mu kulondela lutangijilo lwa mu Baibolo pa kwingila mingilo yafwainwa kwingila mwanamulume ne mwanamukazhi.

Mwanamulume uji na ñanyi mwingilo mu kisemi?

“Mulume ye mutwe wa mukazhanji.”—Efisesa 5:23.

BYAMBA BAIBOLO Pa kuba’mba kisemi kikale bulongo, muntu wafwainwa kufuukulanga bya kuba. Baibolo wapa mwanamulume uno mwingilo. Pano bino, kino kechi kibena kulumbulula’mba wafwainwa kukanama ne. Kabiji kechi wafwainwa kwingila na mukose mwingilo wanji kya kuba waleka kupa mushingi mukazhanji ne kumutwika kisendwa kyanema ne. Bino, Lesa ukeba kuba’mba mwanamulume engilenga na ngovu pa kuba’mba alamenga bulongo mukazhanji ne kumupa mushingi, mambo ye mulunda nanji wa pa muchima kabiji nkwasho waketekelwa. (1 Timoti 5:8; 1 Petelo 3:7) Pa Efisesa 5:28 pa aamba’mba: “Banabalume . . . bafwainwa kutemwa bakazhi babo byonka byo batemwa mibiji yabo.”

Mwanamulume watemwa mukazhanji, unemeka bintu byo oba ne bya bupe byo aji nabyo, kabiji unemeka bintu byo afuukulapo kikatakata bintu byakunza kisemi. Kabiji kechi wafwainwa kukoselatu ku byo afuukulapo aye mwine na mambo a kuba’mba ye mutwe wa kisemi ne. Muntu waakamwanga Lesa aye Abalahama byo akaine maana a mubujileko mukazhanji pa bintu bya mu kisemi kyabo, Yehoba wamwambijile’mba: “Mumvwe jiwi janji.” (Ntendekelo 21:9-12) Abalahama wipelwile ne kulondela byamubujile mukazhanji, kabiji kisemi kyanji kyaikele na lusekelo, kyakwatankene ne kutambula mapesho a Lesa.

Mwanamukazhi uji na ñanyi mwingilo mu kisemi?

“Anweba banabakazhi nekenenainga bamwatawenu.”—1 Petelo 3:1.

BYAMBA BAIBOLO Lesa saka akyangye kulenga mukazhi wa mwanamulume mutanshi waambile’mba: “Kechi kyawama muntu kwikala bunke ne; nkamulengela nkwasho wamufwainwa.” (Ntendekelo 2:18) Mwanamulume ne mwanamukazhi bekwasha. Onkao mambo, Lesa kechi walengele mwanamukazhi amba esakane pamo na mwanamulume nangwa kwikyombesha nanji ne, pakuba wamulengele kwikala nkwasho. Bonse babiji, bakonsha kufikizha mukambizho wa Lesa wa kusema baana ne kuyuzha ntanda na baana babo.—Ntendekelo 1:28.

Pa kukwasha mwanamukazhi kwingila mwingilo wanji bulongo, Lesa wamupele mubiji wawama ne bulume bwa kulanguluka. Inge wibingijisha bulongo bino bintu, ulengela masongola kuwama kabiji ukwasha mwatawanji kwikala na ndangulukilo yawama ne kutondwa na bintu byo aji nabyo. Mwanamukazhi wa uno mutundu Lesa umutakaika bingi.b—Byambo bya Mana 31:28, 31.

[Tubyambo twa mushi]