5. Nanchi Makatazho Akapwa Nyi?

Ene Mambo a o Kyanemena Kuyuka Mukumbu wa Buno Bwipuzho

Inge mwayuka’mba makatazho akapwa, kino kyakonsha kwimukwasha kuyuka ene mambo makatazho kyo aikelako ne kubula kupamo Lesa mambo.

Bya Kulangulukapo

Bantu bavula bakebesha bingi kufumyapo makatazho, pano bino kechi baji bulume bwa kuba bino ne. Akimonai bishinka byalondelapo:

Nangwa kya kuba kuji kuyilako palutwe mu bya michi . . .

• Kikola kya muchima kyatwajijila na kwipaya bantu bavula.

• Pa mwaka pa mwaka kikola kya kansa kibena kwipaya bantu bavula bingi.

• “Shayuka wa bya michi aye David Bloom waambile’mba nangwa kya kuba babena kulenga michi yakatataka lelo jino, badokotala mu bipatela bakankalwa kubuka bantu. Kabiji bantu batwajijilatu na kukolwa bikola bibula kupwa ne bikolatu bikwabo byabula ne kuyukanyikwa.”

Nangwa kya kuba mu byalo bimo baji bingi na mali . . .

• Pa mwaka pa amwaka, baana ba bacheche bafwa, kino kibena kumwekela kikatakata bantu bayanda.

• Bantu bavula mwaya ntanda babena kwikala mu mapunzha muji biko.

• Bantu bavula ko bekala kechi kuji mema a kutoma awama ne.

Nangwa kya kuba bantu bavula lelo jino bayuka’mba bafwainwa kunemeka luusa lwa bakwabo bantu . . .

• Mu byalo byavula batwajijila na kupotesha bantu, kabiji bantu boba bino kechi bebapamo mambo nangwa kwibakasa ne. Kilengela ke na mambo a kuba’mba bo bapa luusa lwa kutalapo kechi bayuka bibena kumwekanyika ne, kabiji kechi baji bulume bwa kwi bapamo mambo ne. Byo byaambile sawakya kufuma ku kipamo kya United Nations.

  YUKILAIPO NE BIKWABO

  Tambai vidyo wa kuba’mba Bufumu bwa Lesa bo Buka? uji pa jw.org.

Byaamba Baibolo

Lesa wituta muchima.

Lesa kechi walubako ku makatazho ne bya malwa byo tupitamo ne.

“[Lesa] aye kechi walengulula nangwa kushikwa kumanama kwa muntu ye bamanyika ne; Kechi wafya kilungi kyanji kwi aye ne. Byo amujijiile amba amukwashe, wamumvwine.”—SALAMO 22:24.

“Saka mutaya bijikila byenu pe aye, mambo wimuta muchima.”—1 PETELO 5:7.

Makatazho kechi akatwajijilatu na kubiwa ne.

Baibolo walaya kuba’mba Lesa ukafikizha kyaswa muchima wanji.

“Lesa. . . ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.”—LUMWEKESHO 21:3, 4

Lesa ukafumyapo makatazho onse apitamo bantu.

Ukengijisha Bufumu bwanji kufumyapo makatazho onse. Baibolo watongola buno Bufumu amba kafulumende.

“Lesa wa mwiulu ukaleta bufumu bo bakabula konauna. Kabiji buno bufumu kechi bakebupana ku bantu bangi ne. . . . bukekala myaka ne myaka.”—DANYELA 2:44.